Friday 24 September 2010

بشوي والعوا يتحديان الملل

عثل يا اخواتي عثل
انا خلاص كده مش حاعرف اعيش من غيرهم هم الاتنين، حاعمل ايه دلوقت؟ ده انا باصحى كل يوم ادور على تصريحاتهم، بالذات تصريحات بشوي، جميلة جميلة
اولا العوا قال الكلام اللي قلته لصحفية الشروق ما كانش للنشر ههههههههههههههههههههههههههههههه اما بت غلسة صحيح، الراجل بينم معاها ويتفك معاها بكلمتين تقوم تنشرهم؟ وقال ان الناس فهمته غلط في حوار الجزيرة
هو عموما في حوار الجزيرة فعلا كان مثير لكن ما قالش نصا الكنيسة فيها سلاح، عملها كأنها تساؤل، بس تساؤل منيل طبعا، لكن حطها في شكل تساؤل
فالراجل يعني ما كانش بيتهم الكنيسة بامتلاك سلاح، ده كان بيسأل بيسأل.. هو السؤال حرم؟ ياباي عليكم.. قاعدين على الساقطة واللاقطة كده؟ بس تاني مرة ما تنمش مع حد ما تعرفوش على حد مش موجود، عاجبك كده؟ اهي الصحفية نقلت لهم الكلام وبقت بوليكة، عامل زيي والله، كل ما اتكلم على حد من وراه اتلفت الاقيه واقف ورايا وسمع كل حاجة هههههههههه ربنا بيعاقبني، عشان كده حرمت وبقيت اقول كل حاجة في وش كل الناس
واتضح برضه ان الناس فهمت بشوي غلط
ده حتى بيدافع عن الاسلام في المجمع الكنسي وبيقول لهم ماحدش يغلط في الاسلام والمسلمين، مهما كان دول عشرة عمرنا وابو ولادنا، والصحافة هي المسئولة، هي اللي فهمت غلط، لان الحوار كان هادئ، يبقى ازاي الحوار هادئ وهجوم على الاسلام؟ 
صحيح، الراجل عمر ما الواحد سمع حسه بيزعق ولا حتى بينادي على بتاع القوطة من البلكونة، يبقى ليه تقولوا على الحوار الهادئ اللي صوته واطي انه هجوم يا كفرة يا كفرة
طب ايه؟ اتصالحتوا كده يا شباب؟ ولا حتعملوا حاجة تاني؟
لا حتوحشوني، اوعوا تغيبوا، انا صحيح كنت قلقانة من الفتنة بس بعد شوية ادمنتكوا، مش عارفة مين حيسليني بقى بعد ما تمشوا
ممكن تعملوا تشانل على اليوتيوب وتقولوا فيه الكلام بتاعكوا عشان نتسلى وننبسط؟

9 comments:

حسن مدني said...

هذا نص رسالة د. العوا إلى جريدة الشروق


القاهرة في: 11 من شوال 1431هـ
20/9/2010

السيد الأستاذ/ عمرو خفاجي المحترم
رئيس تحرير صحيفة الشروق الغراء
تحية طيبة، وبعد،

عاجل جدًا وبالغ الأهمية
فأشير إلى الموضوع المنشور على الصفحة الأولى من جريدتكم الغراء صباح اليوم الاثنين 11من شوال 1431هـ = 20/9/2010 م بعنوان «العوا للشروق: لم أقل إن الكنائس مليئة بالأسلحة.. والذين اتهموني لم يتحققوا من نص كلامي».

وأود التأكيد على أن عبارة «لم أقل هذا الكلام وإن قلته فأنا مستعد للاعتذار» لم ترد في كلامي مع الأستاذة الصحفية التي هاتفتني. بل إن كل ما نسبت إلي قوله «للشروق» لم أقله للشروق.

وحقيقة الحال أنها سألتني عن هذا الموضوع فاعتذرت عن الكلام فيه، وسألتها إن كانت قد استمعت إلى نص الحلقة في الجزيرة فأجابت بالنفي، فطلبت منها الاستماع إليها وأن تكتب ما تجده فيها لأن الذين كتبوا عن الموضوع لم ينقلوا نص كلامي بل حرّفوه في حملة يقوم بها بعض الكنسيين. وبعد أن استَمعتْ إلى الحلقة عادت إليَّ، وقالت لي ما فَهِمَتْهُ، وكان فهمها صحيحًا، وكرَّرتُ لها أنني متوقف عن الحديث في هذا الموضوع حتى ينجلي غباره المتصاعد في صحف عدة. وذكرت لها أنني لم أصرّح لأي جهة بأي كلام في هذا الموضوع.
أرجو نشر هذا الخطاب كاملاً في الموضع نفسه من الصفحة نفسها التي نشر فيها الكلام المنسوب إلي، عملاً بحق النشر المقرر قانونًا.

وتفضلوا بقبول وافر التحية.

أ.د. محمد سليم العوَّ

حسن مدني said...

هذا نص رسالة د. العوا إلى جريدة الشروق
-----
القاهرة في: 11 من شوال 1431هـ
20/9/2010

السيد الأستاذ/ عمرو خفاجي المحترم
رئيس تحرير صحيفة الشروق الغراء
تحية طيبة، وبعد،

عاجل جدًا وبالغ الأهمية
فأشير إلى الموضوع المنشور على الصفحة الأولى من جريدتكم الغراء صباح اليوم الاثنين 11من شوال 1431هـ = 20/9/2010 م بعنوان «العوا للشروق: لم أقل إن الكنائس مليئة بالأسلحة.. والذين اتهموني لم يتحققوا من نص كلامي».

وأود التأكيد على أن عبارة «لم أقل هذا الكلام وإن قلته فأنا مستعد للاعتذار» لم ترد في كلامي مع الأستاذة الصحفية التي هاتفتني. بل إن كل ما نسبت إلي قوله «للشروق» لم أقله للشروق.

وحقيقة الحال أنها سألتني عن هذا الموضوع فاعتذرت عن الكلام فيه، وسألتها إن كانت قد استمعت إلى نص الحلقة في الجزيرة فأجابت بالنفي، فطلبت منها الاستماع إليها وأن تكتب ما تجده فيها لأن الذين كتبوا عن الموضوع لم ينقلوا نص كلامي بل حرّفوه في حملة يقوم بها بعض الكنسيين. وبعد أن استَمعتْ إلى الحلقة عادت إليَّ، وقالت لي ما فَهِمَتْهُ، وكان فهمها صحيحًا، وكرَّرتُ لها أنني متوقف عن الحديث في هذا الموضوع حتى ينجلي غباره المتصاعد في صحف عدة. وذكرت لها أنني لم أصرّح لأي جهة بأي كلام في هذا الموضوع.
أرجو نشر هذا الخطاب كاملاً في الموضع نفسه من الصفحة نفسها التي نشر فيها الكلام المنسوب إلي، عملاً بحق النشر المقرر قانونًا.

وتفضلوا بقبول وافر التحية.

أ.د. محمد سليم العوَّ

Ramy said...

يعنى أروح أموت و انا مطمن مش هيكلموا تانى

كدة أرحم نموت من الزهق احسن ما نمت بعضنا

(:(:

ربنا يهدى

نبلع الكلام

مش بيقولِك حبيبك تبلعلو الزلط

انا هبلع الأتنين و خلاص

بس يا رب يفضلوا ساكتين

Unknown said...

ماهو لو ما اتراجعش يبقى النائب العام يحقق معاه بقى

وبشوي حيتحقق معاه اساسا عشان موضوع المسلمين ضيوف ده

على الله يتحبسوا

Unknown said...

لا يا رامي

هم ان شاء الله يتحبسوا

عشان يبطلوا

ومش حاعمل لهم حملة تضامن

doudou said...

حرام عليكي يانوارة ليس على المريض حرج ..أنا رأيي نلملهم يتعالجوا...أصل هم أغبى من انهم يكونوا ضمن المؤامرة بيستخدموهم ولامؤاخذة وبس...

Ramy said...

ياريت يتحاسبوا

علشان الناس تعرف ان الدولة لسه

ماسكة الدنيا

حتى لو جوه ع الاقل

مش فاهمه said...

هو العوا و بيشوى بقوا زى بعضشيهم
طب ازاى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟و بقى فيه ناس بتدعى ان الأتنين ربنا ياخدهم عندى حق اسمى نفسى مش فاهمه لأنى مش فاهمه ازاى الأتنين ارتكبوا نفس الجرم
انا شخصيا بادعى ربنا ياخد واحد بس و يورينى فيه قدرته مرتضى منصور

عبد الله السلفى said...

بيشوى غلط والعوا مغلطش الكنيسة فيها سلاح والمسلمين مش ضيوف على حد