Wednesday 8 September 2010

البرادعي مسافر تاني

ايوة ايوة.. راجل وراه اشغال ومؤتمرات وتكريمات ومش فاضي لنا ولا لرغينا وكلامنا الفارغ، لازم يسافر يشوف مستقبله، بس على حسب ما وصلني الخبر انه مسافر يتفسح.. وماله، حبيب قلبي، ربنا يسعده يارب، ماهو لازم يفك عن نفسه شوية بعد التعب والارهاق والمجهود الفظيع اللي عمله، هو الراجل ون من ساعة ما جه، عمل فطار وبكرة عامل سحور واكيد اتفرج على زهرة وازواجها الخمسة ويمكن يكون شاف نادية الجنسي وهي بتضرب بالشلاليت وده مشهد مرهق جدا على فكرة، اسألوني انا، نادية بتقضي على الصحة البدنية والنفسية والعقلية، انا اللي متخصصة فيها بابذل جهد كبير عشان اتفرج عليها
بس انا خلاص.. مش حاقول له خليك هنا خليك بلاش تسافر، ولا حاقول له ليه خليتني احبك، ولا حاقول له جاي في ايه وسافرت في ايه وما ريحتش عندنا ليه
كلمة واحدة حارد بيها على كل اللي عمله فيا
اهو

13 comments:

مواطن مصري said...

أتفق معاكي انا مع التغير و المطالب السبعة و لكني لا اميل الي البرادعي ولا

الأخوان و لا الوفد

انا مع تغير المجتمع و أصلاحة من القاع الي السلطة و أتفق في بعض نقاط تكلم عنها حمدين صباحي في برنامجة

مواطن مصري said...

بس انا بحب الأغنية دي "_"

سواح في ملك اللــــــــــــــــــه- said...

شفتي الصور اللي نشروها عن عائلته الحرب القذره اشتغلت وفين يوجعك

dr.lecter said...

يانواره االراجل كتير خيره ادانا زقه لادام واحنا لازم نكمل المشوار وبعدين عاجبك البهدله اللي
طلعت عليه هو وبنته والتجريس العلني

خليه يفك شويه ولما يرجع ان شالله ننزل معاه الشارع

مواطن مصري said...

مشهد نهاية الجماعة مسلسل أكثر من رائع

في أنتظار الجزء الثاني المشهد دة يا نوارة

ياخد أوسكار و كان و نوبل


الجماعة - المشهد الاخير
http://www.youtube.com/watch?v=VpSJH_LLgow

مش فاهمه said...

الى مواطن مصرى
ينفع يكون المشهد الأخير فى سيرة حسن البنا ندمه على مافعله لو نية الكاتب سليمه و فعلا مش ممول من الحكومة كان المفروض المشهد الأخير يبقى مقتل حسن البنا لكن طبعا مقتله كان حايثير تعاطف الناس اللى بتصدق المسلسلات و كان مكن يكون سبب فى ازدياد اسهمهم قبل الأنتخابات قوم ايه قوم بسلامته يخلى المسلسل 28 حلقه بس و يحذف اهم مشهد و اللى اى كاتب دراما يتمنى يطلعه وهو مشهد قتل البنا بجد سقط وحيد حامد من نظرى اكتر ما هو ساقط

Anonymous said...

تصرفات البرادعى عكس تصريحاته فهو لا يترك مناسبة ألا ويهدد فيها النظام بالويل والثبور وعظائم الأمور ويردد أن التغيير قادم قادم
ولكن على أرض الواقع ليس هناك أى تصرف جدى يتحرك من خلاله
صحيح أننى كنت ومازالت أقدر وجهة نظره عن أن التغيير يجب أن يكون مطلبا شعبيا قبل أن يكون مطلب مجموعات من النخب وأقدر فكرة التوقيعات التى طرحها والتى نجحت فعلا أن تصل بفكرة التغيير الى قطاعات واسعة من الشعب
ولكن طول الفترة التى أستغرقتها عملية جمع توقيعات وعدم وجود خطوة واضحة بعد الحصول عليها جعل النظام يأخذ قته فى التفكيير ويبدء بأفساد الحملة بأختراع الحركات الشعبية التى تؤيد جمال مبارك مرة وتؤيد عمر سليمان مرة
من المؤكد أن البرادعى لا يدرك أن نظام حسنى مبارك بارع الذكاء فى شىء واحد فقط وهو كيفية الأحتفاظ بكرسى الحكم وأن الدخول الى ملعب التغيير مع هذا النظام يجب أن يكون بذكاء وسرعة لشل العقول التى يجمعها حسنى مبارك حوله وهمتها تبرير أخطاؤه والمساعدة على أستمرار حكمه

Karim Fadl said...

d

Unknown said...

شعب جاهل ونذل وجبان
وحكومة أشد جهلاً وجبناَ ونذالة
لم ينفع معهم لا حسن البنا
ولا جمال عبد الناصر
ولا البرادعى
هذا الشعب غاوى إللى هو فيه
ولا يريد التغيير
ولو جاله نبى
وإن أرادالتغير فهم عايز التغيير يجيله لغاية باب بيتهم ولا يفعل شيئاً ولا يريد مواجهه مع حكومة ولا ضحايا فى مواجهات
ويفضل وضع رأسه فى التراب والشكوى وخلاص

يقدر البرادعى يعمل لهم إيه يعنى

لوكان ده شعب عنده شوية دم كنا لقينا عشرة مليون توقيع
ومظاهرات مليونية

لكن إبقى قابلينى
ولا فى الأحلام

أنا وقعت على بيان التغيير من أول شهر عاد فيه البرادعى لمصر ورقمى 7474

وهو كل شوية مسافر

وهو له رؤية لكن بهوات الجمعية عاوزيى يحطوه فى جيبهم وكل واحد منهم يقول له كلمتين وإن ما عملهمش يتقمص منه

والأحزاب كل حزب عايزه يدخله عشان يمشوه على مزاجهم ويدمروه كشخص متفرد

والشعب أهو عايش فى الطراوة وكلمه تجيبه وكلمه توديه
وبيتقمص هو راخر

والراجل نفسه لا عايز يبقى رئيس جمهورية ولا دياوله هو بيحاول تغيير شىء بالناس ومع الناس إللى عايزة تغير

فإذا كانت الناس عايزاه يعمل كل حاجة وهما يتفرجوا ويتقمصوا بيقى يغوروا فى ستيهن داهيه

هو مش مغسل وضامن جنة

وحضرتك نفسك شاغلة نفسك باللى بقى مسيحى واللى بقى مسلم وده كلام فارغ ملوش محل من الإعراب

وإسرائيل بتتفرج علينا وإحن ملهيين فى مسلسلات رمضان

يا حلاوتنا

بلا خيبة

سواح في ملك اللــــــــــــــــــه- said...

واللهي يااخت مش فاهمه انتي صح ووحيد حامد لو جدع يقول حسن البنا اتقتل ازاي ومين حضر جنازته ويذكر في التاريخ ان مكرم عبيدباشا وهو مسيحي الوحيد اللي حضر جنازته

سواح في ملك اللــــــــــــــــــه- said...

انتخابات مجلس الشعب القادمه نتائجها هي اللي هتحدد مستقبل مصر يعني لسه الصوره مش واضحه وبعدين احزاب المعارضه اللي عايزه تقاطع لو قاطعوا الانتخابات يبقوا يقابلوني لو قامت لهم قومه تاني حاجه غريبه واللهي

Anonymous said...
This comment has been removed by the author.
Anonymous said...
This comment has been removed by the author.