Thursday 9 September 2010

خلصوا ليلة حرق القرآن دي

 تحديث:
القس المجنون لغى حفلة الحريقة والكداب الكداب قال انه عمل كده عشان المسلمين حينقلوا المركز الثقافي الاسلامي من جراوند زيرو، والمسلمين الامريكان اللي حيبنوا المركز نفوا الكلام ده 
المهم يعني الموضوع اتلغى الحمد لله
-------------
عشان احنا هنا لسه خارجين من علقة وكفاية بقى
معلش احنا بنتبهدل
القس المجنون قال انه مستعد يلغي الحفلة اللي هو عاملها لو البيت الابيض طلب منه كده
البيت الابيض ما يعملش حاجة غير بالتهديد
احنا مش لينا ناس في العراق وافغانستان مقطعين البطاقة؟ ما يبعتوا للبيت الابيض تهديد علني ان لو ده حصل حيولعوا في ميتين اهلهم ويجروهم قدامهم زي الخرفان وخلاص
ولا فيه ناس من المسلمين عايزة الموضوع ده يتم عشان يتاجروا بيه كويس؟ لا والنبي.. لا والنبي، مش عشان فيه كام واحد بيسترزقوا مليار ونص يتمرمطوا وتجيلهم الحالة اللي جات لهند صبري في اخر مسلسل عايزة اتجوز.. كفاية بهدلة بقى، وكفاية هوجات
انا زهقت من الهوجات، يعني القرآن اتعمل عليه بيبي وحارسة امريكية مسحت دم الحيض بورق القرآن في ابو غريب قدام المساجين (جتها القرف في شكلها مش محرجة طيب ان حد يشوفها بالمنظر ده؟) وماحدش عمل حاجة
رجالتنا طلعوا متصورين عريانين مالط وراكبين فوق بعض وماحدش عمل حاجة
نسوان نتانياهو دخلوا بالجزم الجوامع بتاعتنا وماحدش عمل حاجة
والاهم من ده كله، بلدين احتلوا تحت سمع وبصر العالم، وتلاتة ونص مليون اتقتلوا وحداشر مليون اتشردوا وبرضه ماحدش عمل حاجة
ليه؟
عشان ما كانش فيه هوجة اعلامية، احنا خلاص، بقينا حيوانات اعلامية، والقنوات الفضائية عربية وعالمية بتنططنا الليل الليل اللي يا ميمون واحنا ننط معاها
الاعلام الامريكي هو اللي عمل هوجة اعلامية على قصة حرق القرآن والبيت الابيض هو اللي بيدين الحدث واللي عامل القصة كنيسة امريكية والفاتيكان ادلت بدلوها برضه، وكل ده معمول عشان يغسلوا وشهم من الاسلاموفوبيا
لا
مش دليل على الاسلاموفوبيا دي
الاسلاموفوبيا انتشرت وهم عاملين حاجة صادمة مبالغ فيها عشان ناس كتير تستنكرها واللي له رزق في حتة يعمله، ويتحسب للبيت الابيض انه ندد بحرق القرآن ويتحسب للفاتيكان انها قالت لهم اخص عليك، ويتحسب للامريكان "المحترمين" انهم ساندوا المسلمين، والموضوع يخلص على ان: الغرب كويس وبيحبنا ووقف معانا ضد حرق القرآن ودي كانت كنيسة صغيرة وقس واحد وكان فيه ناس كتير كويسين، وبرضه ده ضمن خطة تحسين صورة امريكا والغرب في العالم الاسلامي، ماهم عاملين بروجيكت طويل عريض ومكلفينه قد كده ولحد دلوقت مش جايب نتائج وهم عايزين ينجزوا
وميمون بينط عندنا هنا، ويالا نهيص ونخرج من مظاهرات كاميليا على مظاهرات حرق القرآن وقبلها كانت مظاهرات الرسومات المسيئة وسبحان الله تزامنت الرسومات المسيئة مع صور رجالتنا العريانين في ابو غريب، والناس كانت بتصوت على كاريكاتير وماحدش صوت على تعذيب ناسنا وتصويرهم والامعان في التنكيل بيهم بنشر الصور
ولا تكونوا فاكرين الصحافة الامريكية صحافة حرة مستقلة وقال ايه المعلومات اتسربت واتنشرت الصور غصب عن البنتاجون وتفاجأوا بيها؟ الامامير قالوا لك ما بيخافوش من الموت وعمالين يقولوا حنستهشد وسبعين حورية وبتاع، طب احنا حنوريهم اننا حتى الموت مش حيطولوه، كارت ارهاب عشان كل من تسول له نفسه مقاومة الاحتلال يفتكر صور الرجالة العريانة، وفي نفس الوقت ما اتعملش عليها هوجة اعلامية عشان مش عايزين المسلمين يعملوا اي رد فعل اعتراضي او ثوري على الموضوع.. ولا ايه؟ ولا دي كمان محتاجة شرح يا ميمون؟
ايه يا ميمون؟ 
والنبي والنبي.. والنبي والنبي.. طالبان والقاعدة ينجدونا من الزار اللي احنا داخلين عليه ده احنا ورانا اشغال وورانا حاجات مهمة نعملها
فيتيون كده تهديد على صغير: لو عملتوا كده حنطلع ميتين ابوكوا لمدة سنة قدام جوة وبرة.. قوم البيت الابيض يخاف، قوم يقول للقسيس المجنون يلم تعابينه
بس بسرعة بقى.. والنبي القاعدة طلع لها لازمة اهو، واهو برضه ياخدوا بنط عند الناس ويبقى حرق القرآن اتلغى بدراع القاعدة وطالبان بدل ما البيت الابيض يحملنا جميلة "تسامحه" معانا ومنعه لحفلة الحريقة، حيعملوا كده؟ ولا هم كمان حاكتشف انهم بيسترزقوا على قفانا
ياااااااالا.. هي جات عليهم؟

13 comments:

Unknown said...

نوارة والنبى بمناسبة العيد نفسى اتفك بكلمتين .
انتى مش ملاحظة ان الوساخة مش اختراع جيلناده اللى انتى بتهزقيه وماسحة بيه الارض؟؟
جيلنا ده لو كان وسخ فاللى شربه ورباه على الوساخة الجيل اللى قبله
اللى خد على قفاه بمزاجه علشان يقلب قرشين وهج نصهم على الخليج علشان يجيبوا الفيديون والاتارى لعيالهم
وفضلوا مكبرين لغاية ما الحكاية اتنيلت
وبعدين هما مش الاخوة الصهاينة الله يحرقهم بحق ده اليوم المفترج
لما حد بيمس الهولوكوست بكلمة
بيروح ورا الشمس؟؟
النهاردة الناس تعمل هوجة على حاجة صغيرة بكره يثوروا وياخدوا
تارهم
جاهلين ومضحوك عليهم؟؟
مش ذنبهم ده ذنب اللى رباهم
الجيل ده دمه حامى مش زى الجيل اللى قبله......بالراحة علينا شوية يا قمر
كل سنة وانتى طيبة

سواح في ملك اللــــــــــــــــــه- said...

السلام عليكم بصي ياحاجه اصل الواد القسيس ده لو قال هنحرق التوراه مثلا بلاش هنحرق التوراه لو اتكلم بس عن الهلوكوست مش هيلاقي نفسه هيضييع وبعدين هو اساسا يخاف يتكلم في المواضيع اللي تخص اليهود عشان هما عالم عارفين يدافعوا عن عقيديتهم حتي لو كانت من وجهه ناس تانيه مش حقيقيه احنا بقي في غيبوبه الاخ ابن لادن ده اكبر نكسه للاسلام انا بعتبره خادم للغرب بيقدملهم الذرائع اللي يحاربونا بيه ومش ابن لادن لوحده كل مقلدي الغرب في الحاجات السيئه اللي بيصدروهالنا للاسف حرق القران ده في الاول هيعملوا مظاهرات في العالم الاسلامي شويه مظاهرات وبعدين ينتهي الموضوع باعتذار وبعدين تتكرر وبعدين ناخد علي كده

سواح في ملك اللــــــــــــــــــه- said...

علي راي الراجل بتاع اوفياء مصر ده جتنا خيبه

سواح في ملك اللــــــــــــــــــه- said...

كل سنه وانتوا طيبين

Unknown said...

قهوة كتكوت

الواحد بس عشان يبقى منصف، الوساخة ظاهرة عالمية مش في مصر بس، ابسلوتي، موجودة في عتبة ميدان عادين الديزة

هههههههههههه

لا بجد مسألة تحول الانسانية لحيوانات اعلامية دي عالمية

سواح

مافيش حد حيحرق التوراة

والنبي صحيح فكرتني

طب ما نهددهم لو حرقوا المصحف حنطلق قناة فضائية شغلتها الوحيدة انها تنكر الهولوكست

محمد نور الدين said...

إلى النجمة بنت النجم ألف تحية من الجزائر : أثناء حرق المسجد الأقصى سنة دخل الشباب اليهودي المسجد وهو يرددون شعار يقول ، محمد مات وخلف بنات من يومها ونحن نقدم التنازلات تلوى التنازلات لأن محمد مات وخلف معهن لجنة السياسات
أيتها التحفة الرائعة وطويلةاللسان عيد سعيد وعمر مديد وكل عام وأنت ومصر بألف خير

Unknown said...

مقدرش اقولك غير ربنا يشفيكى ,مش يهديكى ,

بالنسبة للمسلمين
فنحن نؤمن بكلام الله عز وجل

كيف وان يظهروا عليكم لا يرقبوا فيكم الا و ذمة يرضونكم بافواههم وتابى قلوبهم واكثرهم فاسقون
-التوبة
بالمناسبة انا اقصد ردود الفعل الصادرة عن الفاتيكان والبيت الاسود
والحل مش اننا نعرفهم غلطهم
الحل اننا نندمهم على الغلط
ولان الامر صراع عقائدى بين الاسلام والكفر
فابشرك ان الهوجات مش هتخلص
-ولن ترضى عنك اليهود ولا النصارى حتى تتبع ملتهم-

ولن ترضى عنك اليهود ولا النصارى حتى تتبع ملتهم

ولن ترضى عنك اليهود ولا النصارى حتى تتبع ملتهم

اما بالنسبة لموضوع العلق
فاحنا لا ندعى ادارة الخد الايسر عندما نصفع على الايمن
-ولا تهنوا ولا تحزنوا وانتم الاعلون ان كنتم مؤمنين-

وانتم الاعلون ان كنتم مؤمنين
وانتم الاعلون ان كنتم مؤمنين
وانتم الاعلون ان كنتم مؤمنين
ولان الكفر ملة واحدة
وحكم الكافر المحارب واحد-بغض النظر عن جنسيته-فما يجرى على الامريكان
يجرى على ذيولهم فى مصر
اما موضوع الخروج مما تسميه علقة
فبمكنك التحدث عن نفسك فقط
واصلا انت لم تدخلى فى شىء حتى تشتكى من عدم القدرة على الدخول فى شىء اخر
بدليل مقالك المنشور فى الدستور
فكاميليا بالنسبة لك بعد كل ما حدث
واحدة مش عايزة جوزها
صحيح انها لاتعمى الابصار

مواطن مصري said...

http://www.almasryalyoum.com/node/110657?utm_source=twitterfeed&utm_medium=twitter


العريان: جاهزون للانتخابات وننتظر الوقت المناسب لإعلان أسماء المرشحين


الي توقعتة حصل الأخوان ملهمش امان

جماعة مرتزقة منتفعين

زي الراجل المجنون بتاع فلوريدا

مواطن مصري said...

http://www.almasryalyoum.com/node/110657?utm_source=twitterfeed&utm_medium=twitter


العريان: جاهزون للانتخابات وننتظر الوقت المناسب لإعلان أسماء المرشحين


الي توقعتة حصل الأخوان ملهمش امان

جماعة مرتزقة منتفعين

زي الراجل المجنون بتاع فلوريدا

سواح في ملك اللــــــــــــــــــه- said...
This comment has been removed by the author.
سواح في ملك اللــــــــــــــــــه- said...

ده فيه واحد اسمه زكريا بؤلوظ ولا بطرس نازل فينا شتيمه وفرحان اوي بنجلاء الامام وامثالها وعمال يطلع لنا لسانه من بره ابن العبيطه واحنا ولا هنا

سواح في ملك اللــــــــــــــــــه- said...

القس يتراجع مقابل اتفاق بعدم بناء المركز الاسلامي في فلوريدا صفقه يعني هههههههه عن اليوم السابع نواره هو انتي هددتيه والا ايه

Unknown said...

احمدى ربنا يانوارة ان ربع المصريين مش فاكرين ان اوباما مسلم زى ناس
هههههههههههههههه
على فكرة انتى فيكى شىء لله
موقع cnn
بيقول ان طالبان هددت باستهداف كل المسيحيين فى العالم لو المصحف اتحرق