Monday 27 September 2010

عااااجل: انا مفلوقة من العياط

كنت نازلة الشغل في امان الله جالي تليفون نقل نص التطورات اللي حصلت في قضية الشيخ محمد عزت محمد خضر وهو الشيخ اللي من كفر البطيخ ومحتجز بلا سبب ولا تهمة وقدم تظلمين وافرج عنه واعيد اعتقاله في المرتين
زي ما نقلت لكم شكوى الزوجة
حانقل لكم نص اللي حصل مع الشيخ محمد عزت محمد خضر
اللي حصل انه قدم تظلم تاني وافرج عنه تاني وتم نقله من امن الدولة بالقاهرة لامن الدولة بدمياط
زي ما هو موجود في اللنك الراجل ده عنده سبع امراض، وهو محجوز في امن دولة دمياط المفروض انه كان بيستعد لانهاء الاجراءات عشان يخرج، جاله نزيف، فقال للسجان انا عايز اروح المستشفى لاني معايا الادوية بتاعتي بس جالي نزيف وحاسس اني محتاج اسعاف
فالسجان قال له الظابط بيقول اوامر من فوق انك ما تروحش المستشفى، قال له طب خليني اقابل الظابط ده
غموا له عينيه وبعدين دخلوا بيه على مكتب طبعا هو مش عارفه بس عرف من الصوت انهم اتنين، غالبا اتنين ظباط
واحد منهم قال له: يا شيخ محمد انت راجل محترم، ومثقف، ومستواك الفكري مرتفع، وكنت مؤدب، ايه اللي خلاك تتجاوز وتروح للصحافة والنت والجزيرة؟ انت مش عارف ان كل ده ولا يفرق معانا في حاجة؟ احنا اللي حاكمين البلد، واي حاجة ضد النظام مش حتمشي يا شيخ محمد احنا عايزينك تعقل
- اعقل ازاي يا باشا؟ اللي اقدر عليه عملته، صحيح مش حاطلع بمقال ولا ببرنامج، بس الرسول امرنا بالاخذ بالاسباب ودي الاسباب اللي في مقدرتي اني اعملها
الظابط 2: انت عايز تطلع يا شيخ محمد؟
الشيخ محمد: طبعا يا باشا
الظابط2: وعايز ترجع تخطب تاني الجمعة؟
الشيخ محمد: ياريت
الظابط 1: بس الناس بتحبك يا شيخ محمد
الشيخ محمد: الحمد لله
الظابط 1: الحمد لله ازاي يا شيخ محمد انت كده عملت لنا مشكلة.. ما تبقاش تصلي الجمعة في جامع كبير يا شيخ محمد، ابقى صلي في جامع صغير، وبعدين احنا مش كنا منعناك من الخطبة؟ تقوم تقرا آيات تخلي الناس تعيط؟
(الشيخ محمد صوته حلو)
وتطول في القراءة؟ يعني انت بتتحايل علينا؟ انت مش عارف احنا مين؟
الشيخ محمد: طب ايه رأيك يا باشا ما اصليش الجمعة خالص
الظابط1: لا انا ما اقدرش اتحمل الوزر ده.. احنا بس عندنا مشكلة انك عامل لنا بلبلة
الشيخ محمد: انا عامل بلبلة؟ يا باشا انا باخطب في الدين، ومش بادخل في السياسة، وبأمر الناس بصالح الاعمال، والحمد لله عملنا جمعيات خيرية، وأصلحنا بين عائلات كان بقالها سنين مش بتكلم بعضها
الظابط 1: عليك نوووور، مش عايزينك تصلح بين الناس تاني
الشيخ محمد: حضرتك مش عايزني اصلح بين الناس تاني
الظابط1: خالص يا شيخ محمد، ما تدخلش في المصالحات نهائي والا حتئذي نفسك
الظابط 2: قلت لي بقى انك عايز ترجع تخطب تاني
الشيخ محمد: يا ريت
الظابط 2: ماشي، ايه رأيك احنا حنخرجك ونرجعك تخطب الجمعة تاني، بس فيه تلات شروط: اولا: تهدا على نفسك شوية، مافيش احسن من الهدوء، يعني بلاش الحماس اللي في صوتك ده وانت بتتكلم، ثانيا: في مواضيع خط احمر ما تتفتحش، احنا اللي حنقولك تخطب في ايه كل مرة وموضوع الخطبة وتقول فيها ايه، ثالثا: تخلص الخطبة وتروح بيتك على طول ما تقعدش في الجامع
الشيخ محمد: طب ماهو حضرتك انا عندي اقتراح احسن، ما اخطبش خالص، اقعد في البيت، اكمل الماجيستير والدكتوراه بتاعتي دي قدامها ولا عشر سنين
الظابط2: ما الناس حتجيلك البيت
الشيخ محمد: طب انا ممكن انزل دمياط البلد، حاسيب امي العيانة واسيب حياتي واخد ولادي ونسيب كفر البطيخ خالص
الظابط1: ماشي
الظابط 2: ماشي ايه؟ لا لا لا لا.. احنا عارفين نلمك في كفر البطيخ لما تروح تعمل لنا مشكلة في دمياط البلد؟
الظابط1: ماهو انت مش حتعمل حاجة في دمياط البلد يا شيخ محمد مش كده؟
الشيخ محمد: ايوة يا باشا
الظابط2: لا برضه
الشيخ محمد: يعني لا ولا اه؟
الظابط1: بص يا شيخ محمد، سيبنا نفكر، وحنعرض الامر على عقلنا وقلبنا ونقول لك
(ملحوظة: الحوار منقول بالنص، وقالوا له عقلنا وقلبنا)
كل ده وهم مغميين عينيه وبشربوه نعناع والراجل عنده نزيف اساسا
الشيخ محمد: طب انا عايز اروح المستشفى دلوقت انا عندي نزيف
احد الظباط: طب ثانية واحدة
جه حد اخده وهو مغمي كده ودخله مكتب تاني، لما دخل المكتب التاني، قيل له انه في مكتب رئيس الامن في دمياط، والله اعلم لانه اساسا ما كانش شايف حاجة
ودار الحوار الاتي:
الظابط: بقى بتشتكينا يا شيخ محمد
الشيخ محمد: انا باعمل اللي في ايدي عشان اخرج
الظابط: انا حاجيب لك من الاخر عشان ما عنديش وقت لك.. مافيش اي حاجة ضد النظام ده حتمشي في البلد، احنا اللي حاكمين البلد دي فاهمني
الشيخ محمد: يا باشا انا عملت ايه ضد النظام؟
الظابط: انت كويس يا شيخ محمد، والناس بتحبك، واحنا حنرجعك تخطب وتطلع شرايط وتعمل كل اللي انت عايزه
الشيخ محمد: يا باشا انا مستعد اسيب البلد، لا عايز اخطب ولا عايز اعمل حاجة
الظابط: لا حترجع وحتخطب وحتعمل كل حاجة، بس تنسق معانا
الشيخ محمد: ازاي يا باشا؟
الضابط: يعني الناس بتحبك، اولا احنا بس عايزينك تبعد عن العمل الخيري شوية، وتروح المسجد، انت الناس بتحبك وبتتلم حواليك، حتلاقي عيل جاي بيقول لك نفسي اجاهد، عيل بيكلمك عن ظلم الحاكم، بيسألك اسئلة سياسية.. مش حتعمل حاجة، بس تقول لنا اسمه، وما تخافش مش حيتئذي
الشيخ محمد: رب السجن أحب إلي مما يدعونني إليه.. يا باشا انت عايزني ابلغ في الناس عشان تعملوا فيهم اللي عملتوه فيا؟
الضابط: باقولك مش حيتئذي
الشيح محمد: لو كنتوا قلتوا لي الكلام ده قبل ما ادخل السجن كنت صدقت ويمكن كنت قبلت، بس بعد الجحيم اللي شفته هنا يا باشا اعمل في الناس اللي اتعمل فيا؟ انا باكلمك وانا بانزف يا باشا
راح الظابط شاتمه شتيمة قذرة اللي نقل لي ما رضيش يقول لي هي ايه، ورجعوه للزنزانة
وبعدين رجعوه من امن دمياط لامن الدولة في القاهرة
وانا باعيط دلوقت
ملحوظة: النص من مصدر شديد الثقة
وحسبي الله ونعم الوكيل
انا مش طالبة منكم حاجة.. مش طالبة منكم غير ان البوست ده يتوزع على اوسع نطاق، وربنا شاهد علي اني نقلت كل اللي جالي بامانة
تحديث:
عشان انا مشهدة عليا ربنا بس فيه جملة نسيتها في الحوار
لما الظابط الاخير عرض عليه انه يبلغ اسامي العيال اللي بتتكلم في السياسة وقال له مش حاعمل الناس اللي اتعمل فيا قال له حاجة كمان وغالبا هي دي اللي خلت الظابط يشتمه قال له:
انا واحد اكاديمي، نابغ في دراستي وباعمل ماجيستير، عايزني اشتغل عندك مرشد؟ ده ما يليقش بيا
ويمكن عشان كده الظابط شتمه لانه افتكره بيتنطط عليه

17 comments:

عباس ابن فرناس said...

يا نوارة انتى شفتى مقال اسامة غريب الى بيتكلم فيه عن الاخوة الاقباط النهاردة على فكرة ان الدنيا كلها اختلفت مع اسامة فى الموضوع ده انا بتفق معاه لانى عشتو بحذفيرو

عباس ابن فرناس said...

بنسبة لموضوع الشيخ المسكين التعيس الغلبان البائس ان بقول انو موضوع عادى وعادى جدا كمان ولاذم يكون عادى لان مقدمناش حاجة نعملها غير ان الواحد يقول عادى والا0000الواحد يجنن اوينتحر 0000تفتكرى الواحد ممكن يختار انهى فيهم

عباس ابن فرناس said...

بنسبة لموضوع الشيخ المسكين التعيس الغلبان البائس ان بقول انو موضوع عادى وعادى جدا كمان ولاذم يكون عادى لان مقدمناش حاجة نعملها غير ان الواحد يقول عادى والا0000الواحد يجنن اوينتحر 0000تفتكرى الواحد ممكن يختار انهى فيهم

wahat_alshohada said...

الله اكبر عليهم
الرسالة هتتوزع على ام وابو النت و الصحافة والوكالات
حسبنا الله ونعم الوكيل
الله اكبر عليهم
لو عرفتى توصلى رسالة للشيخ قولى له
لو اتعرض عليه يعمل زى ما قال لا يخطب
ولا يوافق على اى شئ يقولوه
ويتفرغ للدراسة
الله اكبر

Nicholas Urfe said...

بس بقى كده ظهرت أوي !

لما نزلتي البوست الأولاني عنو من فترة قلت لنفسي مش معقول يكونوا خدوه كده بدون أي نشاط من طرفه..يعني أكيد كل بني آدم بيحكي الحكاية من وجهة نظره هوه ( وده مش معناها أني بشكك إن الراجل بيتعرض لانتهاك صارخ لإنسانيته هو وغيره )

لكن دلوقت فهمت ، بيجندوه من ناحية ومن ناحية ثانية موضوع إصلاحه بين الناس هم مش عايزينه ، يمكن أولا لأنه بيخلق له شعبية وطبعاً الشعبية دي سلعةاستراتيجية قومية لازم تكون محتكرة للحكومة والسلطة زي الكهربا وخدمات الدفاع.
وممكن كمان اتدخل في صلح اتسبب في ضرر لطرف من محاسيب السلطة وبرضو ده
استفزهم.

العمل ايه ؟
لا مظاهرات نافعة ولا معارضة سياسية فالحة ولا كتابة بتغير حاجة ؟ العمل ايه لما الشعب بقى بيخون نفسو ، ومش عايز يتغير .

لو وقفنا مع نفسنا وقلنا عايزين حل عملي واقعي جدا ينتج عنه أثر حقيقي على أرض الواقع بعيداً عن المظاهرات والصحافة والمعارضة السياسية الفشنك ياترى يكون ايه وياترى ممكن ؟

شمس العصارى said...

ربنا يفك اسره
ويفك اسر امثاله
وربنا ينتقم من ظالميه

Anonymous said...

أيه قلة الأدب والسفالة دى
هو خلاص البلد دى بقت تكيه ومحدش عارف يلم العامل الكلاب دى
يعنى واحد حاصل على أعلى الدرجات العلمية ويتشتم ويتهان ويتقاله أشتغل معانا مرشد
عموما الصبر طيب
أنا عن نفسى هاعمل اللى ربنا يقدرنى عليه لفضح الجرائم دى

Unknown said...

منهم لله بصراحة مش عارف نعمل ايه؟؟
ولو ان الحوار نفسه غريب ومش داخل دماغى....بس لو صحيح فعلا يبقى حسبى الله ونعم الوكيل فيهم

شوفتى بشوى هايتشنبر...الحمد لله الظاهر فيه مسيحيين فاقوا اهو
http://www.facebook.com/home.php?#!/event.php?eid=104202239643065&ref=share

Nicholas Urfe said...

الدين هو أنّة المخلوق المكروب ،هو القلب في عالم بلا قلب (رحمة) كما أنه الروح في أوضاع بلا روح. إنه أفيون الشعب.

ماركس

------------------------------------

اهو الدين اللي كان مفروض ثورة المصريين المضطهدين والمتخلفين، وكان روح تحريرنا من أوضاع غاشمة وسافلة زي اللي في البوست ده ، بقى خناقة ردح بين مسلمين وارثوذوكس وكاثوليك

ورغم انو مستحيل المصريين يتحولوا لشعب ملحد في أغلبيته لكن والله حتى لو الحد المصريين ما هيتغر حاجة ، احنا موهوبين في توظيف الأفكار من أجل استخراج اسوء ما فينا

محمد نور الدين said...

من شابه اباه فما ظلم .اما من شابهت أباها ووالدتها الله يحميها و يخليها لمصر كلها .

eslaam hakiem said...

استاذة نوارة انتى مش شايفة كده انك اذيتى الراجل اكتر
اه نقول الحقيقة لكن لكل كلام وقت

eslaam hakiem said...

استاذة نوارة انتى مش شايفة كده انك اذيتى الراجل اكتر
اه نقول الحقيقة لكن لكل كلام وقت

Unknown said...

طب خليهم يهوبوا ناحيته

كل ما حيئذوه حنفضحهم زيادة لحد ما نخلي اللي ما يشتري يتفرج عليهم

لو الفضح اذية ما كانوش حبسوه

الحبس معمول عشان الزبانية يعملوا في الناس اللي هم عايزينه من غير ما حد يعرف هم بيعملوا ايه

لازم يفهموا ان كل حاجة بيعملوها الناس بتعرفها

الخوجة said...

FREE MOHAMED EZZAT - أفرجوا عن الشيخ محمد عزت محمد خضر - يرحمكم الله

Dr Nemo said...

الشيخ محمد عزت خضر من كفر البطيخ وضباط امن الدولة انصاف الآلهة
http://tarakalam.blogspot.com/2010/09/blog-post_28.html

Unknown said...

عادى فى كتير جدا غيره متعذبين اكتر اتعودنا

عبد الله السلفى said...

حسبنا الله ونعم الوكيل ده واحد من الالاف الى محدش يعرف عنهم حاجة