Sunday 26 September 2010

فورين بوليسي: عسى ان تكرهوا شيئا وهو خير لكم

تحديث:
د. العوا الثلاثاء في العاشرة مساء على حسب قول حسام عيد.. البابا شنودة امتى؟
تحديث:
ود. العوا كمان حيتكلم في العاشرة مساء.. لا اعرفوا لنا بقى البابا حيتكلم امتى، والدكتور العوا حيتكلم امتى عشان نعرف نتابع الجريء والجميلات.. ايه ده؟ هو انا مش امبارح قلت اذا كان بشوي مضايقكوا عشان مدب حيجيبوا لكوا شنودة؟ والنبي انا فيا شيء لله.. المهم، يارب ما يعرضوا الاتنين في نفس الوقت
العوا حيتكلم في العاشرة، بس الساعة كام بالتحديد؟ وشنودة الساعة كام بالتحديد؟
احنا عندنا ترمس كتير في البيت، ولب، بس ما عندناش فشار، ممكن ابادل شوية ترمس مع حد عنده شوية فشار
---------
احساسه ايه جمال مبارك والفورين بوليسي بتقول عليه: عسى ان تكرهوا شيئا وهو خير لكم
طب واحنا ذنبنا ايه يا امريكا يا بلد وسخة فعلا، بجد لو لبسونا جمال مبارك انا حاعلق صورة بن لادن على العربية وعلى الحيطة وعلى المدونة
مدونة؟ هو عاد فيه مدونات بعد ما جمال مبارك يمسك؟ ده احنا امبارح على التويتر لما قرينا مقال الفورين بوليسي جات لنا صدمة وقعدنا نتخيل كميات القمع والقهر اللي حنلبسها
طبعا.. حييجي بقى، ويقول لك البلد فوضى، اساسا هم عمالين ينخربوا في البلد، ويهبلوا فيها، ويعملوا حالات الفوضى، ويخوفونا بالفتنة الطائفية عشان والبلد بتقع خلاص الناس نفسها هي اللي تطالب بجمال مبارك
وساعتها بحجة الفوضى.... يا لهويييييييييييييي، حيشنبرنا كلنا
انا باقول لكوا الكلام ده وقلبي حاسس.. وبعدين ده بيحب هتلر يا جدعان، والله، بان قوي ايام ازمة الجزائر دي، بيحب هتلر
وله افكار نازية كده
احنا وقعنا
طب يجيبوا علاء، نبعت للفورين بوليسي نقول لها: إن مع العسر يسرا.. ممكن نجيب علاء اذا كان ضروري واحد الاي كيو بتاعه تحت تسعين يعني، هو لازم يبقى دمه تقيل كمان؟
وبيقروا لنا قرآن ليه؟ انا كنت حاسة من ساعة ما اوباما جه ختم لنا المصحف في جامعة القاهرة انه زي السادات، وبعد ما يعمل فينا العملة السودا دي حيقول: ربنا لا تؤاخذنا إن نسينا أو أخطأنا
المصيبة بقى اننا بتنا ليلة نعيط على ان كله حيغطس وان امريكا وافقت عليه، بما انها ولية امرنا يعني، صبحت الصبح لقيت بلال كاتب المقال ده
:(
طب الرئيس مبارك يترشح فترة سادسة.. طب ايه؟ وبقوا يقروا لنا قرآن من دلوقت؟
بالنسبة لمسلسل الجريء والجميلات بتاع الفتنة الطائفية اللي مش عايز يخلص، الازهر اخيرا صحي من النوم واستنكر، والبابا شنودة حيطلع يتكلم النهاردة... فاصل ونواصل
والنبي انا حاسة ان الفتنة الطائفية دي معمولة عشان نلبس الخازوق المغري وبمزاجنا
احنا بنهيب بالاخوة في سوريا لما القضا يلحقنا يبقوا يعملوا لنا حملة.. احنا جاملناهم، يجاملونا بقى... والنبي حتوحشونا كلكم.. مع السلااااامة يا المونياااااا

9 comments:

عماد عزت said...

البابا شنودة الساعة 8 مساءا على القناة الأولى

مواطن مصري said...

نوارة قريتي مققالة ابراهيم عيسي النهاردة يا ريت تشوفي التعليقات الي

على المقالة نازلين شتيمة و تخوين في ابراهيم عيسي مجرج انة انتقد الاخوان

و الاخوان كاتبين انة بقى مأجور


التعليقات بتاعت الاخوان منتهى قلة الادب و مكفرين ابراهيم عيسي الي اتمنع من اون تي في


http://dostor.org/editorial/10/september/25/29934

مواطن مصري said...

شوفي تعليقات الاخوان على الاستاذ ابراهيم عيسي



أول مرة أعرف إنك كاتب بتكتب تراهات وتفاهات
ومن أكبر كتاباتك المتخلفة هى كتابتك النهاردة
مش عارف أقولك إية بس الكلام اللى إنتا كاتبة لا يرقى حتى إلى درجة الرد عليه

دة تعليق في الددستور من اخواني

بهيج الشرير said...

والنبي ياأبلتي أنا عندي سؤال! دلوقت بعد ما أبو التعالب ملك الفياجرا وقاهر الهكسوس مسك الشعب وخلص عليه ومص دمه ٣٠ سنة، الواد إبنه إبن عرس المعروف أيضا بإسم الثعبان الأقرع لما يمسكه، ناوي يمص إيه

Unknown said...

على فكرة يا نوارة الموضوع كده هايكبر
ومش هاينهتهى بكلمتين اتضغط على البابا علشان يقولهم وبعدين يقول عكسهم للمسيحيين فى الكنيسة
الحكاية مش سهلة وبيتهيألى الموضوع المرة دى مش من انتاج النظام
شكلها انتاج مستورد
ربنا يستر

بهيج الشرير said...

على فكرة ياأبلتي أنا شفت الحسنة بتاعة كاميليا في وش ليلى فوزي؛ ولسه موجودة في وشها حتى بعد ماإتجوزت أنور وجدي؛ ودي طبعا غير الحسنة بتاعة ماجدة الخطيب

عبد الله السلفى said...

العوا مش مفروض هوا الى يتكلم لانه بيدافع عن الشيعة الاولى اى عالم من علماء اهل السنة

hala said...

العوا معو حق لأنه مقهور على بلده والشعب المصري

hala said...

انا مش عارفة إنتوا المصريين خايفين من جمال مبارك ليش طب اذا مكانش هو امريكا رح تجيبلكم واحد ملعون إبن ملعونة رأي انكم ترضوا بهالملعون لانكم عارفينة و حافظينة