Monday 13 September 2010

اللي حيعمل مظاهرة قدام السفارة السوري حاطلع ترابنتينه

 تحديث:
انا جالي رد من ناشط في داخل سوريا، وقال لي ان فعلا فيه خطورة عليهم، وان تسليم البيان للسفارة او وقفة السفارة كلها مالهاش لازمة
اولا الوقفة امام السفارة حتتفسر داخل سوريا ان مبارك هو اللي حرك الناس ضد بشار الاسد بسبب الخلاف بينهم على المفاوضات
وتسليم البيان للسفارة السوري حيترمي في الزبالة
لذلك هو قال لي ان افضل وسيلة لمساعدة طل فعلا، ولانقاذ النشطاء السوريين من الاعتقال لانه هو نفسه كان حيروح في ستين داهية في الفترة اللي فاتت بسبب الفضايح اللي احنا عاملينها دي لولا ستر ربنا
الحل الوحيد اننا نوزع البيان على الوكالات كلها، رويترز والفرنسية والبي بي سي والجزيرة والسي ان ان وكل وكالة نشوفها في خلقتنا
حتلاقوا لنك البيان اللي مكتوب عليه وقع لاطلاق سراح طل ملوحي
نقطة اخيرة: فيه فرق ما بين الشخص اللي عايز يساعد بجد وينقذ حد محتاج له
وان الشخص يبقى عايز يسجل موقف وخلاص ومش مهم اثر ده على الاشخاص اللي هو بيدعي انه بيساعدهم
رجاء اللي له اتصال بالوكالات ياخد البيان ويرسله من جانبه وانا كمان حاحاول ارسل البيان من جانبي
وانا مش رايحة الوقفة دي وكل انسان حر في اختياره، بس النصيحة اللي اخلص بيها ضميري امام الله للي يهتم بنصيحتي، الوقفة دي مش حتساعد بل حتضر، الا هل بلغت اللهم فاشهد
الوقفة دي رونج رونج رونج
---------------
ما تطلعوش انيابي وضوافري، اللي عايز يتضامن مع طل ملوحي يعمل مظاهرة عند النقابة، مش قدام السفارة السوري
مش قدام السفارة السوري
تاني؟ تاني الزييطة تاني حيدخلوا وسط الهلولة وينفذوا اجندات؟ لا
كفاية القفوات اللي كلتها في ملف حرية العقيدة...... دلوقت اعد صوابع ايديا، وانا ساكتة، انا ساكتة يا مليجي، مالك ومال ابن بنت بنت بنت بنتي؟ سرقة الجزم من قدام الجوامع لسه ماحدش يعرفها، سرقة مستودع الانابيب انا بس اللي اعرفها، عشان انا ست جدعة، وانت عارف ان انا ست جدعة
طل ملوحي في السجن وناس برة تاكل عيش على قفاها؟ 
اسباب اعتراضي على التظاهر قدام السفارة السوري قلتها لعاطف على التويتر وحاعيد نشرها هنا:
معترضة عشان دي ريحة وحشة


1- كلنا الناس اللي عندها دم زعلت لما حصلت مظاهرات قدام السفارة المصري ايام حرب غزة، مع ان السفارة المصرية جهة اختصاص في القضية دي، بينما السفارة السوري مش جهة اختصاص في قضية طل ملوحي، السفارة هي ممثل لدولة، باختلاف النظام، السفارة العراقي سفارة العراق قبل صدام واثناء صدام وبعد صدام وهكذا
واللي ما نرضاهوش على نفسنا ما نرضاهوش على غيرنا
2- احنا مش بنقدر نتظاهر قدام السفارة الامريكي والسفارة الاسرائيلي، لان الامن بيهددنا انه يفتح علينا الرصاص الحي، واحنا جبنا وبنخاف، مدام جبنا وبنخاف مافيش داعي نعمل رجالة على ابو بلاش
3- المقصود بالحملة نظام الاسد، والمطلوب الافراج عن مدونة سورية، مش المقصود زعزعة سوريا نفسها وهي تحت التهديد دلوقت حالا يا ابو عاطف، ولا مقصود خلق حزازات بين المصريين والسوريين
4- المظاهرة قدام النقابة حتبقى انجح وملفتة اكتر
5- ايه وجهة النظر في التظاهر قدام سفارة سوريا؟ عايزين نقفلها؟ عايزين نضربها؟ معترضين على وجود سوريا في الحياة؟ ايه دخل السفارة السوري؟
زي ما الباسبور المصري والسفارة المصري والعلم المصري مالهمش دعوة بمبارك كمان السفارة السوري مالهاش دعوة بالاسد، موجودة قبل الاسد وبعد الاسد
6- انا شامة ريحة وحشة، وما عنديش استعداد انجر ورا ناس عندها اجندة بدعاوى حق يراد بها باطل، كفاية الب****ص اللي اخدتها في موضوع حرية العقيدة
وبعدين طل ملوحي بقالها سنة.. اشمعنى دلوقت؟
اتضامن مع طل اه، اطعن سوريا لا
---------
ثقافة التضامن مهمة، ومهمة كمان بين الشعوب العربية وبعضها، احنا محتاجين الشعوب العربية تساندنا في قضايانا، وهم محتاجينا نساندهم في قضاياهم، بالذات السوريين عشان ظروفهم اوحش منا ومش بيقدروا يتكلموا قوي زينا، ومع ذلك مش ساكتين، ومافيش حاجة اسمها اللي يعوزه البيت يحرم على الجامع
ده كلام الاندال والواطيين بس
بس كمان مش عايزة ناس تدخل في الظيطة - زي كل مرة - وتنفذ اجندات سياسية
احنا ضد الديكتاتورية، بس مش مع ضرب سوريا مثلا، مش مع خلق حزازات بين سوريا ومصر، مش مع حصار سوريا شعبيا اضافة الى حصارها دوليا
لكن احنا مع الشعب السوري، ونقدر نتضامن من غير ما نؤذيهم، ما يبقاش جبتك يا عبد المعين تعيني لقيتك يا عبد المعين شغال مع مؤسسات اجنبية وعامل عليا فورتينة 
ومش لازم نسكت على اللي بيحصل لهم عشان ما نحسش بالذنب ناحيتهم زي ما عملنا في العراق
ومش لازم نتآمر عليهم زي ما بنتآمر على ايران
ما ينفعش نتضامن بشكل محترم؟

17 comments:

wahat_alshohada said...

نوارة
لو فيه اى فعالية او وقفة للتضامن مع طل ملوحى قوليلنا ربنا يكرمك
انا كان نفسى اعمل اى شئ علشانها

Unknown said...

ماهم حيعملوا وقفة عند السفارة

وانا مش حاروح عشان زي ما انا بازعل لما حد بيتظاهر عند سفارتي ما اعملش في الناس اللي بيزعلني

وبعدين ممكن البنت تتئذي لو تظاهروا

انا شايفة انهم يقدموا بيان للسفير عليه توقيعات كتير من غير تظاهر عشان اولا ما نزعلش السوريين وما نحسسهمش اننا ضدهم كبلد وفي نفس الوقت ما نأزمش الموقف على طل لان ممكن الوقفة الاحتجاجية تستفز النظام السوري لكن البيان مش حيستفزه

وعموما اسألي اذا كنت عايزة تروح الوقفة دي

بس انا مش رايحاها

احمد خليل said...

المجد لطل الملوحى ....والعار للنظام السورى

احمد خليل said...

لية دايما نبتدئ من الاخر ،الاول حملة توقيعات فبيان فندوة فوقفة....الخ التظاهر عند السفارة حيشترك فية كل المعاديين للنظام السورى وسترفع شعارات ضد النظام وتضيع الاهداف للافراح عن طل الملوحى...وحدة واحدة
طيب نعمل اية اما النظام السورى يعمل صلح مع اسرائيل ..حملة جمع توقيعات مناسبة اولا ثم تتصاعد

احمد خليل said...

لية دايما نبتدئ من الاخر ،الاول حملة توقيعات فبيان فندوة فوقفة....الخ التظاهر عند السفارة حيشترك فية كل المعاديين للنظام السورى وسترفع شعارات ضد النظام وتضيع الاهداف للافراح عن طل الملوحى...وحدة واحدة
طيب نعمل اية اما النظام السورى يعمل صلح مع اسرائيل ..حملة جمع توقيعات مناسبة اولا ثم تتصاعد

Gemyhood said...

أنا مع الراى دة .. كل بلد و ليها ظروفها .. و انا مش هاعمل حاجة تخدم أجندة ميارك بصراحة

محمد نور الدين said...

إلى النجمة بنت النجم الف تحية من الجزائر .جملة قوية و رائعة لا تصدر إلا عن رائعة ، ثقافة التضامن، نعم نحن في أمس الحاجة إلى هذا الوعي الحضاري المتمدن علما ان تراثنا العربي يحثنا على ذلك. أنصر اخاك و أنا اتفق معك فيما أبديتيه من محاذير عن التواجد أمام السفارة السورية ألم تسمعي امس تصريحات مدير الأمن اللبناني السابق جميل السيد عن المخطط المصري الأردني الإسرائيلي داخل لبنان ، ولبنان يعني حزب الله، يعني سوريا وحتى رد رئيس لجنةالعلاقات الخارجية بالبرلمان الدكتور مصطفى الفقي كان ردا مرتبكا . امابخصوص النظام السوري لنا تجربة معه في الجزائر علما ان العلاقات السورية الجزائرية من انجح العلاقات لأسباب تاريخية . في التعسينيات حاول الرئيس احمد بن بلة التدخل لدى السلطات السورية لإطلاق سراح المناضل الرئيس السوري السابق نور الدين الأتاسي لأن هذا الرجل له افضال على الجزائر لن ينساهاالشعب الجزائري لقد قاد فريقا من الأطباء السوريين المتطوعين للمشاركة في الثورة الجزائرية بوصفه طبيب وكان معه إبراهيم ماخوص المتواجد حاليا بالجزائر .ولما تدخل لإطلاق سراحة الرئيس احمد بن بلة بخاصة أنه كان يعاني من مرض السرطان. وكان لي الشرف إنني كنت من ضمن لجنة التصامن. هل تعلمين يا عزيزتي نوارة من طلب من الرئيس احمد بن بلة العدول عن المطالبة بإطلاق سراح الأتاسي؟ لقد كانت عائلته خوفا من تصفيته الجسدية .ولم تمر إلا شهور قليلة توفى بمرض السرطان داخل السجن ووفاء لهذالرجل المناضل وتخليدا لذكراه واعترافا بأفضاله سميت إحدى مستشفيات الجزائر العاصمة باسم الدكتور نور الدين الأتاسي ولم يسمح النظام السوري لعالة الأتاسي لحضور حفل .التدشين

overdose said...

بصرراحة اللي هيقول ان مبارك هو اللي حرض الشباب انهم يتظاهروا ضد بشار الاسد يبقي عبيط واهبل ما هم عارفين ان اللي طالعين دول المعارضة هو شباب الحزب الوطني هما اللي رايحين يتظاهروا
هما في امريكا لما عملوا وقفة عشان خالد سعيد قلنا بس دا اوباما هو اللي محرضهم؟؟؟؟؟؟؟

nada ayash said...

ثقافة التضامن مهمة، ومهمة كمان بين الشعوب العربية وبعضها، احنا محتاجين الشعوب العربية تساندنا في قضايانا، وهم محتاجينا نساندهم في قضاياهم، بالذات السوريين عشان ظروفهم اوحش منا ومش بيقدروا يتكلموا قوي زينا، ومع ذلك مش ساكتين، ومافيش حاجة اسمها اللي يعوزه البيت يحرم على الجامع
ده كلام الاندال والواطيين بس
بس كمان مش عايزة ناس تدخل في الظيطة - زي كل مرة - وتنفذ اجندات سياسية
احنا ضد الديكتاتورية، بس مش مع ضرب سوريا مثلا، مش مع خلق حزازات بين سوريا ومصر، مش مع حصار سوريا شعبيا اضافة الى حصارها دوليا
لكن احنا مع الشعب السوري، ونقدر نتضامن من غير ما نؤذيهم، ما يبقاش جبتك يا عبد المعين تعيني لقيتك يا عبد المعين شغال مع مؤسسات اجنبية وعامل عليا فورتينة
ومش لازم نسكت على اللي بيحصل لهم عشان ما نحسش بالذنب ناحيتهم زي ما عملنا في العراق
ومش لازم نتآمر عليهم زي ما بنتآمر على ايران
ما ينفعش نتضامن بشكل محترم؟

*****

معلش نسختهم هون و عالفايس بوك و لو قدرت أطبعهم و أوزعهم مش رح أقصر
:)

مواطن مصري said...

فية كلام جديد طلع بيقول ان البنت الدوبليرة لكاميليا شحاته هي: نادية بيشوي - محافظة سوهاج - مركز البلينا - خريجة معهد متوسط المعلومات - معروف عنها الإتطوائيه والإنعزال


الكلام متناقل في المواقع حتى الان

مواطن مصري said...

فية كلام جديد طلع بيقول ان البنت الدوبليرة لكاميليا شحاته هي: نادية بيشوي - محافظة سوهاج - مركز البلينا - خريجة معهد متوسط المعلومات - معروف عنها الإتطوائيه والإنعزال


الكلام متناقل في المواقع حتى الان

الخوجة said...

جحا - هشام الجخ

عبد الله said...

عندك حق في كتير من كلامك .. بس موضوع ان السوريين يزعلو لما نتظاهر قدام سفارتهم و العكس .. الكلام ده يختلف من شخص لشخص أنا شخصيا مكنتش زعلان لما تظاهرو عند سفارتنا
و بعدين بصراحة واضح جدا ان اخوانا في سوريا مدعوكين و معندهمش أي حتة يتكلمو و فيها
أنا معاكي في نشر البيانات
و صحيح موضوع الوقفة و التظاهر محتاج دراسة عشان هيترتب عليه أمور كتير .. لكن لازم يحصل فين مش مهم .. لكن لازم يحصل قريب

Unknown said...

فين اللينك بتاع التوقيع لإخراج الأنسة السورية المحترمة (طل ملوحى) ؟ مافيش حاجه فى أى حتة عندك يا ست نوارة

doudou said...

البنت سورية و ده شأن داخلي سوري يعني السفارة ملهاش دعوة قصدي لو السلطات السورية اعتقلت مصري ماشي نتظاهر عند السفارة .ثم ده يتعلق بحوق الإنسان مش السياسة الخارجية
واللي بيته من ازاز ميحدفش الناس بالطوب.يبقى نقدم طلب و احتجاج والتماس مش مظاهرة عند سفارة

Muhammad Al-Ansary (@iOrto) said...

أنا بدأت أقتنع بالكلام ده، مع 3 تحفظات

الأول: بخصوص النقطة رقم 1 (اللي هي أن السوريين هيزعلوا لو تظاهرنا قدام سفارتهم) لسببين: ـ

1. أنا مازعلتش من مظاهرات الأجانب قدام سفاراتنا برة أيام حرب غزة وأيام الجدار لأن دولتي موقفها غلط، الحاجة الوحيدة اللي ممكن تزعلني أنهم يحرقوا علم بلدي (ولا الجماعة بتوعنا ناويين يحرقوا علم سوريا؟) ـ

2. سبق وبعت لك على تويتر لينك من موقع اللجنة السورية لحقوق الإنسان وفيه دعوة للناشطين (بغض النظر عن جنسياتهم) للتظاهر أمام السفارة السورية في لندن من أجل بعض المعتقلين داخل سوريا، وده معناه أن السفارة السورية مش خط أحمر للدرجادي عند السوريين، والتظاهر عندها مش هيمثل أي مشكلة على سوريي الداخل

ثانياً: اعتراضي التاني على حكاية أن التظاهر طعن في سوريا مش فاهم ازاي ، ومش فاهم بالمناسبة حكاية الأجندات الخاصة لأن كل اللي أعرفهم وناويين يروحوا مافيش في دماغهم غير الأجندة اللي في دماغ أي إنسان محترم

ثالثاً: اعتراضي الأخير على الليبل اللي في آخر البوست... الموضوع مش مستاهل أنك تقولي لنا الكلمة دي
وبعدين انتي بقيتي بتشتمينا كتير اليومين دول على فكرة

:))

Assef said...

I am Syrian and doing so in front of the embassy is not taken as an insult. We cannot protest and you guys are the only help we have to voice our support. There is no agenda, here I cannot trust my brother to ask him to come with me to protest, everyone is a spy.