Saturday 4 September 2010

تسقط الحرية عدوة العدل

تحديث:
ده ايه الوساخة والتسول دول.. جواب لاوباما؟ هو خلاص التسول ده بقى نمط حياة؟
تحديث:
اتفرجوا على هوجة الجزائر الجديدة... ولسه ولسه ولسه، امن الدولة اللي مانع تظاهرات عشان خاطر فلسطين في المساجد مسلم البت للكنيسة وفاتح الجوامع للمسلمين يعملوا فيها مظاهرات عشان كاميليا ومعيشنا في احلى اجواء للجزائر
ولسه ولسه
حسبي الله ونعم الوكيل في اللي يقدر ينقذ البلد دي من المصيبة اللي هي داخلة عليها ومش بيتصرف عشان وسخ ابن ... اقول ايه انا صايمة، حسبي الله ونعم الوكيل فيكوا واحد واحد، في كل اللي بيشارك في المصيبة دي بالشعللة او بالظلم او بالسكوت
تحديث:
يا سلااااااااااااااااام.. وسعت قوي.. وسعت قوي قوي قوي، انا مش حمارة للدرجة دي
تحديث:
اتفضلوا.. حد بقى يقول لي ان كل الاحداث دي عادية... عادية ازاي؟ ازاي كل يوم والتاني بت مختفية؟ مين اللي بيعمل كده بقى؟ لو الموضوع ان الناس بتطفش عشان تسلم او تتنصر، اشمعنى الستات بس اللي بيغيروا دينهم؟ ليه الرجالة ما بيغيروش دينهم ويطفشوا؟ 
------------
أنا محتاجة أرتب افكاري لأني في حالة انفعالية عالية.. ليه؟ عشان كنت عميا وفتحت، وغلطت ولازم اعترف بغلطي، وربنا يعلم حسن نيتي
النهاردة كان فيه مظاهرة في الازهر عشان كاميليا، عماد عرب قال لي عليها قلت له مش جاية مظاهرات في جوامع انا عشان مواطنة مختطفة، لما تبقوا تعملوها عند النائب العام ابقى اجيلكم
فقال لي معاك حق.. بس ماحدش اتقدم ببلاغ للنائب العام
هممممم، كل اللي رفعوا قضايا لمحمد حجازي والعائدين للمسيحية وللبهائيين وقدموا بلاغ للنائب العام بعد مذبحة نجع حمادي وعشان خالد سعيد وساندناهم طبعا وقمنا بواجبنا ماحدش فيهم قدم بلاغ للنائب العام عشان كاميليا، مع انها انسان يعني ما تقلش عنهم في الانسانية حاجة
احنا عايزين بقى الستات هم اللي يحكموا العالم عشان هم اللي عندهم نظرة بانورامية للاوضاع، وهم اللي عندهم الشجاعة يعتذروا لما يغلطوا
الحملة العالمية على المسلمين المسماة بالاسلاموفوبيا عنوانها كده: نحن لسنا في حرب مع المسلمين وانما نحن في حرب مع الاسلام.
الحملة دي بتقول نفس الرطانة اللي كانت بتتقال على النظام الشيوعي وعن الاتحاد السوفييتي: السوفييت ناس كويسين، والشيوعيين مضحوك عليهم، احنا ضد الفكرة نفسها مش ضد معتنقيها وعايزين نحررهم منها، طبعا دي سفسطة استعمارية، مافيش الكلام ده، الكلام ده فارغ، الفكرة في كتاب وما بتتحولش لحقيقة غير لما يعتنقها انسان، انت ضد الكتاب؟ يعني حتحارب الكتاب وتقدمه للمحاكمة وتشنقه في ميدان عام؟
الحملة على الاسلام هي هي نفس الحملة على الشيوعية بنفس البنطلون بنفس الفانلة، مش باذلين حتى مجهود انهم يغيروا السكريبتات القديمة جابوا هي السكريبتات القديمة وشالوا كلمة شيوعية وحطوا مكانها كلمة اسلام
"أنا متعاطف مع المسلمين لكنني لست متعاطفا مع الإسلام كفكرة"
كلمة استعمارية امبريالية معناها: احنا عايزين نغزو المسلمين فكريا زي ما غزوا الشيوعيين فكريا
وبرضه هي نفس الخطة وتحت نفس الشعار وبنفس العنوان: الحرية
هي نفس الجهة: الفريدم هاوس.. بيت الحرية، بيت الحرية اللي اسقط الشيوعية كمنظومة وكقوة هو اللي بيسقط الاسلام كفكرة من اساسه
حيسقطها ولا المسلمين يا عيني حيقولوا: لاااااااااااااااا احنا نفديه بارواحنا والكلام ده، ما يخصنيش، اللي يخصني اني ما اشاركش في حملة استعمارية على اهلي وناسي، وان ما كانوش اهلي وناسي هم ناس غلابة ومستضعفين ومظلومين
ايوة عارفة ان المسلمين شاركوا في الحملة على الشيوعية واكلوا يوم اكل الثور الاسود، وتحت نفس الشعارات، واتخدعوا بكلمات حق كتيرة اريد بها باطل زي ما بيتنصب لهم فخ بكلمات حق كتيرة يراد بها باطل
بس ايه؟ حنعاقبهم يعني؟
انا شخصيا مش حاعاقبهم.. مش بس عشان غلابة ومظلومين وعزيز قوم ذل ومش وش البهدلة اللي هم شايفينها دي ابدا (المسلمين مش زي اليهود، مش واخدين على المرمطة علاولة كده، عشان كده تلاقي عودهم طري شوية ومش قادرين يستحملوا زي الامريكان المسلمين اللي مش حيحتفلوا بالعيد عشان خايفين) بس عشان عيب كده، وعشان مش في الصالح، وعشان اي انتقام او "تستاهلوا انتوا اللي عملتوا في نفسكوا كده" معناه انتصار للقوى الامبريالية والرأسمالية في العالم وحيصب في مصلحتها، ثم يعني مش معقولة يعني كل ما يعوزوا يجيبوا اي عدو ارضا كده ينجحوا بمنتهى السهولة ولا كأن لهم كبير.. إيه إيه إيه؟ ماحدش عارف يوقفهم خالص؟ طب ماحدش عارف يوقفهم بس على الاقل مش حاشارك معاهم
ايه دخل ده كله بكاميليا.. مالوش دخل بشخص كاميليا، له دخل بالدلالات اللي تبينتها بما يحيط بحدث كاميليا
كل الناس بتوع حملة حرية العقيدة تغاضوا او تراخوا عن التصدي لقضية شبه قضية محمد حجازي والعائدون للمسيحية والبهائيين وخالد سعيد... ليه؟
اي كلام عن انه "لم يثبت اسلام كاميليا" كلام هجص وتهجيص واستهبال.. امال الكنيسة طلقت عيالها يعملوا مظاهرة عشانها ليه؟ ولا انتوا فاكرين ان نملة تقدر تتحرك داخل الكاتدرائية من غير اذن الكنيسة؟ امال امن الدولة عكشها وسلمها للكنيسة ليه؟ امال الكنيسة متحفظة عليها وخافياها وبتقول مش حنطلعها ليه؟ عشان غضبت من جوزها وقرفت منه؟ كل الستات المصريات قرفانين من اجوازهم على فكرة، والمسيحيين قبل المسلمين لان المسيحيين ما عندهمش طلاق، طب ما فيه مسيحية ضربت جوزها سكينة، ما اتسلمتش للكنيسة تشأمظها ليه؟
احنا عندنا طرفين مش باصين لابعد من ارنبة انفهم، الازهر والكنيسة، فعلا يعني عساكر امن مركزي او امناء شرطة لما الواحد يكارمهم قوي، الاوامر العليا اللي بتجيلهم بينفذوها، ولو جات للكنيسة اوامر عليا بان سيبوا كاميليا حيسيبوها، ولو جات لهم اوامر بان اسكتوا حيسكتوا، مين فهمكوا ان الكنيسة عندها القدرة انها تضغط على النظام؟ ده يضغط على اللي يتشدد لها، هي تحت رحمته اساسا، النظام في اي لحظة يطلق عليهم السلفيين يقطعوهم فرافيت فرافيت، والسلفيين نفسهم ما بيتحركوش من غير ارشادات من النظام
طب انا مش حاعيش بقى مشغولة في الهبل واساند مخطط اوسع عشان فيه كام عبيط في ام البلد دي خايفين من بعض وتعيش كل طايفة من التانية خايفة وتنزل ستاير بداير وشيش.. اللي مخوفهم من بعض هو النظام، والنظام ده مش ماشي من دماغه ده برضه بتجيله اوامر، وبينفذها من غير مناقشة على فكرة
واهو الراجل ساحب ابنه ورايح يبيع الفتافيت اللي باقية من فلسطين عشان يركب الواد علينا واحنا قاعدين هنا نعمل مظاهرات في كنايس وجوامع
الصورة البانورامية الاوسع ان عجل المسلمين وقع وكترت سكاكينه، وخلاص بقى خطاب معترف ومعتبر ان الناس تقول حربنا مع الاسلام والقاعدة هي اللي فاهمة الاسلام صح وبقية المسلمين سذج مش فاهمينه صح وعشان كده واجب علينا تنويرهم وتوعيتهم وعلى الجانب الاخر شوية صراصير يطلعوا لنا من الجحور يتكلموا بكلام حق يراد به باطل ويبرطعوا لنا في حرية العقيدة
طبعا.. حرية العقيدة عشان نسن قانون يفتح الباب على مصراعيه لاي حد عايز يسيب الاسلام وفي نفس الوقت اللي يدخل الاسلام يتعاقب وماحدش يسانده، وفي نفس ذات الوقت حملة شعواء على الاسلام بانه ديانة شيطانية شريرة ضد الحريات
الحرياااااات
الحريااااااااااااااااااات
احا على الحريات.. انتوا بوظتوا لي رمضان السنة دي خالص.. احا على الحريات دي اللي وقعت الاتحاد السوفييتي وفتته ستين حتة وخلت العالم كله تحت رحمة قوة واحدة
والحريات هي اللي ورطت المسلمين وخلتهم يروحوا حرب افغانستان وادي اللي حاربوا في افغانستان اترموا زي ورقة كلينكس اتنف فيها وما بقاش لها عازة، لا وشوفوا البجاحة، يقولوا: اسامة بن لادن السحر الذي انقلب على الساحر.. بقى مين اللي انقلب على مين؟ الراجل كان مصدق ورايح يجاهد فعلا، وهم ساعدوه، وبعد ما استخدموه فرموه هو واللي معاه، يبقى مين اللي اتقلب على مين؟
يعني نفس اللي اتعمل مع الاتحاد السوفييتي بيتعمل دلوقت مع المسلمين، والمسلمين مش الاتحاد السوفييتي دول ماشيين يزكوا، هو هو بالمللي:
خطاب كراهية في العالم كله ضد الفكرة نفسها، وفي نفس الوقت اختراق داخلي تحت يافطة الحرية.. هي هي طبق الاصل العلقة الاولانية، مافيش اي ابداع
وعشان نبقى واضحين مافيش حاجة اسمها ديانة وحشة وديانة حلوة.. مافيش اصلا حاجة اسمها فكرة وحشة وفكرة حلوة.. الافكار افكار. والديانة هوية ثقافية، والاديان كلها زي بعض، اول إن اول كده كلها زي بعضها، وبتؤدي لنفس النتائج، وبتستحث نفس المشاعر، وبتستخدم نفس الاستخدامات - ايجابا او سلبا - وبتحمل نفس المبادئ والاخلاقيات كمان - برضه سواء اتوظفت في الاتجاه السلبي او الايجابي - والكلام عن ان الاسلام وحش او اليهودية وحشة او المسيحية وحشة او الهندوسية او البوذية او حتى الالحاد - وهو ديانة غصب عن عين الملحدين والله - ده خطاب عنصري وخطاب كراهية ولما يكون معتنقي اي من الديانات دي واقع تحت ظلم او بيعاني من الضعف او اضطهاد او استهداف بداية من السنج وانتهاء بالقنابل العنقودية، يبقى خطاب تحريضي
وزي ما انا متأكدة مليون في المية ان الحركة السلفية الجديدة صناعة احتلال، ومصممة اسميها السلفية الجديدة عشان فيه سلفية قديمة مالهاش علاقة بالسلفية الجديدة
وقبل ما حد يقول لي مالك ومال السلفيين دول امامير والله هو انت قعدتي معاهم؟ دول حتى بيوزعوا بطاطين واكل في رمضان، دول مش كلهم زي بعض
الاتجاه السلفي على اختلاف اطيافه مؤمن بتفوق المسلم على غير المسلم وعدم المساواة بينهم ولا لأ؟ الاتجاه السلفي بيتهم المتصوفة بالبدعة وبيطعن في عقيدة الشيعة ولا لأ؟ الاتجاه السلفي مؤمن بعزل الاقليات الدينية في المجتمعات اللي فيها اغلبية مسلمة ولا لأ؟
طيب كل دي اهداف استعمارية لتفتيت لحمة المنطقة وتسهيل السيطرة عليها بعد كده، بمعرفتهم او غير معرفتهم ما يخصنيش واساس اتجاههم ما بيخدمش غير الامبريالية، وانا شايفاهم صهاينة المسلمين، ولا اتهم افرادهم بالعمالة، بس الاتجاه صناعة امبريالية، وانضمام افراد له نابع من الاضطهاد العالمي للمسلمين، وتخفيف حدة الاتجاه ما يجيش بالقمع وانما برفع اسباب الظلم اللي ادت بناس انها تنتمي للاتجاه ده كرد فعل للمذلة اللي شايفينها، وان كنت برضه احب انبه المنتمين للاتجاه بانهم بيخدموا الاحتلال وعقلهم في راسهم يعرفوا خلاصهم
بس زي ما انا شبه متأكدة ان الاتجاه ده صناعة الامبريالية
انا كمان دلوقت، وبعد المحك اللي اتحط فيه دعاة الحقوق المدنية في قضية كاميليا، بقيت متأكدة كمان ان شبورة الحريات الدينية دي صناعة استعمارية، وهدفها تحقيق الهدف الاكبر المعلن للناس اللي بيقول عدونا هو الاسلام مش المسلمين وعلينا اننا نوعي المسلمين بحقيقة دينهم الوسخ
ايييييوةةةة.. حريات دينية حريات دينية، ومع الحصار العالمي للمسلمين والتنكيل بيهم مش حيبقى فيه اكتر من الناس اللي بيخرجوا من الاسلام عشان يدخلوا اي حاجة تانية، ومش حيبقى عندنا حتى ملحدين محترمين زي فنكلستاين وتشومسكي اللي بيقولوا احنا ملحدين عقائديا يهود ثقافيا، لان اللي حيخرج من الاسلام حيبقى هدفه اساسا الهروب من الحصار المضروب عليه في كل العالم، مش عايز هو يتشتم ويتفتش في المطارات وينضرب بقنابل ويتقال عليه متخلف وبيرجم الستات وبيقطع ايدين الناس (قال يعني رجم الستات مش موجود في كل الكتب المقدسة وقال يعني حرق الناس بالفسفور اكثر انسانية من قطع ايدين الناس) وحيحصل مع المسلمين اللي حصل مع الشيوعية وبقت الناس دلوقت تتكسف تقول انا شيوعي، وعلى رأي ياسمين عبد العزيز: انا مش شيوعيييييةةةةة انا يساااار معتدل
وبعد شوية يتكسف الناس يقولوا انهم مسلمين
بعد شوية ليه؟ ما قبل شوية اهو، ناس كتير بتتكسف تقول انها مسلمة
طيب انا شاركت بعزم مافيا في قضايا الحريات الدينية، لا اخفيكم سرا، انا كنت يعني مستعجبة شوية من الانفجار المفاجئ لقضايا التحول من الاسلام لاي دين تاني ولقضايا الحريات الدينية اللي فجأة فرقعت في وشنا، بس انا قلت الحق احق ان يتبع، حق الانسان يختار دينه، وحقه يتكتب في البطاقة، وبرضه كنت مستغربة من انفجار الاعتداءات على المسيحيين كل ما يرمموا كنيسة في وشنا ده، ما بيرمموا كنايس وبيبنوا كنايس، ايه الانفجار المفاجئ ده؟ بس قلت عليا واجب الحق حق، وتوقعت ان ده مبدأ
يعني في اي حالة وتحت اي ظرف المبدأ ده ساري، سواء واحد خارج من الاسلام او داخل الاسلام، سواء واحد واقع تحت ارهاب سلفي او ارهاب كنسي
وسبب انضمامي اساسا للحملات دي مش الحرية.. مش مؤمنة انا بالحرية دي، مالهاش معنى اساسا، انا مؤمنة بالعدل، بمعنى، زي ما مسموح لمن هو خارج الاسلام ان ينضم له، من حق من هو داخل الاسلام انه يخرج منه، ده العدل، والعدل هو اللي يهمني
بس الظاهر اني هابلة ومسكوها طبلة، والظاهر ان الموضوع اكبر مني بكتير، وان الحكاية لا فيها مبدأ ولا فيها اخلاق، ولا فيها حق، ولا فيها عدل
وحيث اني مش مهتمة غير بالعدل، مش من العدل اني اشتغل في حتة بازل صغيرة تبان كأنها عادلة بينما انا باحطها في صورة اكبر ظالمة، يعني باحط حتة من صورة ست الحسن عشان اكمل صورة الغول وهو بياكلها؟ لا.. مش حاعمل كده انا
طب حاعمل ايه؟ مش عارفة والله.. انا دلوقت محتاجة اتوقف وافكر شوية، انا ماليش هدف في الدنيا غير العدل وبس. ومحتاجة ادور عليه واكمل بحتة البازل اللي في ايدي صورة عادلة مش صورة ظالمة، او اموت وانا في ايدي حتة البازل وانشالله ما حاجة كملت
انا كل حاجة حواليا بتصب في مصلحة الامبريالية العالمية، كلها، مش عارفة اروح فين... وطبعا مسلمين معاتيه حيقروا الكلام ده ويمسكوا في خناق المسيحيين مع ان المسيحيين لا يقلوا عتها عنهم والله والاتنين اهبل من بعض وعاملين زيي كده وهابلة ومسكوها طبلة هم راخرين.. بدليل انهم يا قلب امهم ما عملوش مظاهرة واحدة عشان يرأسوا أقسام النسا مثلا، دول ما يعرفوش حاجة دول، سوا دول ولا دول، يعني مما لا شك فيه ان الاعتداء على الكنائس كان وراه حاجة، بس اللي اعتدوا على الكنائس ما يعرفوش حاجة، ومما لا شك فيه ان المظاهرات في كنائس عشان مرات كاهن بينما عمرهم ما عملوا مظاهرة عشان اندرو وماريو مثلا اللي اتخطفوا من حضن امهم كان وراها حاجة بس هم ما يعرفوش حاجة
والموضوع شكله كده فيه ظروطة وقرف وعك وكلنا اتلطينا ولا ايه...
بس ليه يعني بتوع حروق اللسان ما قدموش بلاغ للنائب العام عشان كاميليا؟ بجد يعني والله العظيم سؤال يعني
ومش حاقول ليه المسيحيين ما تضامنوش ولا ليه المسلمين بيعملوا مظاهرات في الجامع عشان دول مخهم على قدهم اساسا، وعلى فكرة هم مش عايزين دولة مدنية، بجد، ولا عايزين مواطنة، هم كانوا راضيين بحالهم زي ماهم، ومش متضايقين، لا دول ولا دول، هو بس فيه حاجات معينة حصلت خوفتهم من بعض، او بالاحرى فيه ناس كانت ورا حاجات معينة تخليهم يخافوا من بعض، دولم بغبغانات قعدوا يرطرطوا على موضوع الحرية الدينية ده وهم فعلا مش عايزينه، ودوكهمة بغبغانات قعدوا يرطرطوا كلام عن حرق النصارى عباد الصليب وهم لا يعنوا الكلام ده فعلا... فيه حد مرمر لهم عيشتهم وخوفهم من بعض
بس ليه بتوع حروق اللسان ما قدموش بلاغ للنائب العام؟
بس ليه بتوع حروق اللسان ما قدموش بلاغ للنائب العام؟
بس ليه بتوع حروق اللسان ما قدموش بلاغ للنائب العام؟
بس ليه بتوع حروق اللسان ما قدموش بلاغ للنائب العام؟
بس ليه بتوع حروق اللسان ما قدموش بلاغ للنائب العام؟
بس ليه بتوع حروق اللسان ما قدموش بلاغ للنائب العام؟
ها؟ ها؟ ها؟ ها؟ ها؟
رد رد رد رد رد رد رد رد رد رد رد رد رد رد رد رد رد رد رد رد رد

84 comments:

مواطن مصري said...

عشان مفيش تمويل و احنا غلابة محدش بيسئل فينا و ان الماسونية مجندة عملاء

ل الحرب على الاسلام و الملسمين و المنظمات الحكوكية هما مجرد جنود المحفل الماسوني مش اعضاء كمان هما الي بيمهدو لمسيخ الدجال بجنة الغرب

و العلمانية و الالحاد

فهمتي ان الحرب مع الصهيو ماسونية

مواطن مصري said...
This comment has been removed by the author.
مواطن مصري said...

لازم تقتنعي

مواطن مصري said...
This comment has been removed by the author.
سواح في ملك اللــــــــــــــــــه- said...

المشكله مش في اللي اسلمت ورجعوها الكنيسه المشكله في المسلمين اللي بالاسم فقط الاسلام اولا اخلاق والاخلاق دي في حاجات كتبره بقي تتقال عليها بدايه من الرشوه اللي مبقيتش تتحط في الدرج دلوقتي في الايد علطول وانتهاءا بجرائم قتل المسلم للمسلمفين وسطيه الاسلام السمحه ماخير رسول الله بين امرين الا واختار ايسرهما وقيل اوسطهما المشكله في الضمير اللي ضاع اللي بينط علي كتف اخوه عشان يطلع والاخ في ستين داهيه المشكله في الانحلال اللي بنعيشه ولو حكيت هاحكي كتير اوي مجلدات والبساطه في الفهم والتشددوالغباء والتطرف في الجانبين يااما متطرف في الغلط يااما متطرف في مايعتقده صح المشكله في الشباب اللي علي النواصي بيعملوا الدماغ ويشاكلوا الرايح واللي جاي المشكله في في طابور العيش انتي لو عندك ضمير هتاخدي دور اللي قبلك ليه الحكايه بقت قوي ضعيف حتي في الغلابه بقي فيها قوي وضعيف البقال الطماع ده عنده دين الراجل اللي مبياكلش عياله عشان يدردعله كاسين ده عنده دين ويعني ايه ندافع ندافع عن مين واحده اسلمت مش لما احنا نبقي مسلمين الاول احنا مسلمين في البطاقه بس لو كل واحد دفع الزكاه اللي عليه مش هتلاقي فقير محدش يقوللي اللي ناهبين البل اللي ناهبين البلد لو شافونا مظبوطين في سلوكياتنا مش هيجرؤوا ينهبوها

مش فاهمه said...

الرجوع للحق فضيله انا مثلا تخيلت انى اسمع صوت حد محترم زى سليم العوا اللى كان مالى الدنيا ايام وفاء قسطنطين فينه دلوقتى و فين محامي البهائيين الأجابه فى رأيي ان الموضوع فيه ان و ان بنت لاذينه امال لو انتى يا نوارة ماعرفتيش تفهمينا وتجيبى قرار الموضوع مين اللى حايفهنا ده انتى صحفيه و متسيطه قد الدنيا

Unknown said...

على فكرة مش مهم قوي المسلم يبقى متدين ولا مش متدين ولا بيفهم روح الاسلام السمحة ولا ما بيفهمهاش

مش دي القصة خالص ولا تعنيني في شيء

انا يعنيني ان فيه هوية مستهدفة استعماريا

عماد عزت said...

الواحد بقى خايف على البلد ،انا اتفرجت على كام فيديو سلفى كدة النهاردة على اليوتيوب ،ابو اسلام على الحوينى على وجدى غنيم، حاجة تحزن،كلهم بيشتموا فى المسيحيين و بيهيجوا الناس و بيستثيروا عاطفتهم الدينية واللى يغيظ ان الكلام دة بيتذاع على النايل سات و اللى يغيظ اكتر ان الكنيسة المصرية معانده و ،ساكتة سكوت مستفز و يفتقد للحكمة و اللى يغيظ اكتر واكتر ان الحكومة واقفة تتفرج و كأن الموضوع لا يعنيها ، احنا هنستنى لغاية لما الدنيا تولع و بعدين نقول يا ريتنا كنا اتحركنا ، لازم نعمل حاجة، مع ان طول عمرى سلبى وعمرى ما طلعت فى مظاهرة ، بس الموضوع المرة دى بجد يخوف ، الطائفية كلت دماغ الناس

سواح في ملك اللــــــــــــــــــه- said...

لما مش ده اللي يعنيكي زعلانه ليه بقي الهويه لازم يكون ليها اساس والاساس ضايع يااستاذه الاسلامه منغير جوهره ميبقاش اسلام

Unknown said...

لا يعنيني لانه لا يعني العدو

يعني التلاتة مليون اللي اتقتلوا في افغانستان والعراق ما كانوش كلهم على صحيح الاسلام السمح، ويمكن ما كانوش كلهم مسلمين اساسا

وانا باتضايق من موضوع صحيح الاسلام ده.. الحياة وجهات نظر

سواح في ملك اللــــــــــــــــــه- said...

المسلم من سلم الناس من لسانه ويده مش دي برضه الهويه

سواح في ملك اللــــــــــــــــــه- said...

كونك تتضايقي دي حاجه بتاعتك بس لا يصح الا الصحيح

سواح في ملك اللــــــــــــــــــه- said...

اما بقي حكايه اللي اتقتلوا دول عشان احنا برضه معملناش بالاسلام اللي بيقول واعدوا لهم ماستطعتم من قوه واحنا بقي منتهي الضعف

Unknown said...

لا مش دي الهوية

دي اخلاقيات لا تعني احد غير الاشخاص اللي اختاروها

الهوية هو الانتماء لمجتمع يحمل ثقافة معينة والثقافة دي تاريخيا ترجع لمنظومة فكرية قد تكون دينية او غيرها

المنطقة دي من العالم اسمها العالم الاسلامي

اللي هي دي

اللي تحتها ابار بترول دي

وسكانها بيحتفلوا برمضان حتى لو مش مؤمنين بيه، وبيعيدوا حتى لو ما كانوش صايمين، وبيبصوا بصة وحشة للست اللي بتلبس عريان حتى لو بناتهم او زوجاتهم مش محجبات، وبيعتبروا عذرية الست مهمة، وبيدبحوا في العيد الكبير حتى لو مش بيصلوا، وبيقولوا صلي ع النبي حتى لو ما حدش سلم من لسانهم ويدهم الخ الخ الخ

دي اسمها هوية ثقافية

الايمان حاجة والهوية حاجة تانية

الايمان يخص الفرد، الهوية تخص المجتمع والمجموع

الايمان يستلزم الالتزام بتعاليم الاسلام، لكن الهوية هي التكوين الثقافي للمجتمع وافراده

Unknown said...

وانت مين عرفك انك فاهم الاسلام احسن من بقية الناس؟

مش مهم انت فاهم الاسلام ازاي، المهم افعالك بتؤدي لايه وبتخدم مين

وفهم الاشياء يرجع لكل واحد حسب اختياره

ربنا لما وزع الارزاق ماحدش عجبه رزقه ولما وزع العقول كل واحد عجبه عقله

Unknown said...

اه وبالمناسبة

حتى السلفيين رغم اختلافي معاهم هم لهم فهم خاص للاسلام لا اصادر عليه

وفهمهم للاسلام لا يعنيني في شي

ما يعنيني هو تصرفاتهم وافعالهم التحريضية ضد طوائف اخرى من المسلمين وضد اتباع الديانات الاخرى خاصة لما يبقوا من الاقليات

يعني ندالة ووساخة اخر حاجة

يقعدوا يشتموا في المسيحية

طب الامريكان مش مسيحيين ولا ايه؟ ولا هم بس الاقباط اللي مسيحيين؟ ولا هم ما قدروش على الحمار قدروا على البردعة؟

ده قصدي من هجومي على التيار السلفي

سواح في ملك اللــــــــــــــــــه- said...

يااستاذه انا عايز اوصللك ان الضعف اللي احنا فيه نتيجه التفكك والانحلال اللي بنعيشه تتكلب عليكم الاممكما تتكالب الاكله علي قصعتها قالوا امن قله نحن يارسول الله قال لا ولكن ستكونون كغثاء السيل

Unknown said...

بس التفكك والانحلال اللي بنعيشه بيعيشه غير المسلمين وما بيحصلهمش اللي بيحصل للمسلمين

المسلمين بيمروا بعصر اضمحلال وطبيعي ان يبقى عندهم تفكك وانحلال

كل الامم بتشيخ

وبتجدد دورتها تاني، عادي، المسلمين لا يلاموا على ما يعانوا منه ابدا لانه واقع عليهم ظلم وضحية الظلم لا يلام على وقوع الظلم عليه

لكنهم يمكن لومهم على طريقة مواجهتهم للظلم ده

سواح في ملك اللــــــــــــــــــه- said...

اللي انا اعرفه اللي بيضيع هويه المسلم عدم الالتزام بتعليمات الاسلام و بالتالي بيضيع بالتدريج ويبقي سهل اوي القضاء عليه زي مثلا كده لو عيل بايظ في عيله بيشوه سمعتها

سواح في ملك اللــــــــــــــــــه- said...

محمد عبده زمان الامام محمد عبده قال لما سافر بره وجدت مسلمين بلا اسلا م وده معناه انه لقي اخلاق المسلمين في غير المسلمين

سواح في ملك اللــــــــــــــــــه- said...

اذا الايمان ضاع فلا امان ولا دنيا لمن لم يحيي دينه

Unknown said...

لا.. الالتزام متصل بالايمان مش بالاسلام ولا بالهوية الاسلامية والتلاتة حاجات مختلفة

الاسلام لا يستلزم بالضرورة الايمان

الايمان هو الالتزام بالتعاليم الاخلاقية والشعائرية

الاسلام يستلزم الالتزام بمظاهر الشعائر

الهوية الاسلامية لا يتضمن المسلمين بس، وانما غير المسلمين المنتمين للمجتمعات الاسلامية حتى وان كانوا غير مسلمين

Unknown said...

بصى يا نوارة الموضوع باين ومن كلامك انها مؤامرة وعلى الاسلام
انما المفارقة انك بتحاولى تخلى كلامك محايد
وده ما ينفعش
انتى لو رجعتى للاسلام اللى هو ما اتفق عليه الائمة الاربعة هتلاقى كل حاجة جميلة ومش لازم تكون مرجعيتك سلفية او شيعية او صوفية
الاسلام بيحترم كل الاديان حتى الملاحدة
سيبك من كلام السلفية لكن ما ينفعش يبقى فيه هجوم عليكى وتبقى محايدة
التمسك بالهوية الاسلامية هو ده الحل
وبكرة مسيحيى الشرق ياخدوا نفس الموقف زى ايام الحملات الصليبية
الاسلام دلوقتى مش ديانة دى ثقافة
وزمان مكرم عبيد قال
انا قبطى مسلم وكان فاهم هو بيقول ايه
الموضوع شكله كده ملعوب فيه من برة
ومن الناحيتين ولا ادعى العلم والله اعلم

سواح في ملك اللــــــــــــــــــه- said...

يا استاذه في البشاير النهارده جورنال البشاير فيديو لعلي الجفري الحبيب علي الجفري حتي لو مش بتحبيه اسمعيه هيقنعك

سواح في ملك اللــــــــــــــــــه- said...

استاذه هضربلك مثل ازاي اعرف ان انتي انسانه غنيه ثريه يعني من غير ماشوف اثار الثراء عليكي مش لازم اشوف مثلا انك راكبه عربيه فارهه ولابسه غالي ولو مش ده اشوف معاكي مثلا فلوس كتير منتي متقوليش غنيه كده وخلاص

المهدى said...

ربنا يكملك بعقلك يا نوارة الإنتصار
مصر المركزية جدا تفسد من الرأس وتصلح من الرأس أيضا
السفالة والوطينة اللى أنت شايفاها نتيجة 40 سنة من حكم المنايفة وخلاص الصعيدى جاى
احفظى جيدا كل ما نحن فيه الأن كل هذا العبث سيتلاشى بأسرع مما نتصور فقط الرأس دى مصر وده المرض وكل الباقى أعراض

Unknown said...

يادي المؤامرة والحقد على الاسلام

يا سيدي الاسلام نفسه استخدم في المؤامرة على الشيوعية

انكروا بقى

هي قوة واحدة عايزة تسيطر على العالم، وبتخلص من كل القوى الحاضرة او المحتملة

ثم انا محايدة فعلا.. لاني بصراحة من جوايا باردة بخصوص المؤامرة دي

الحياة دورات.. ومافيش حاجة بتخلص

بس ما احبش اعيش اساند القوي على الضعيف ولا الظالم على المظلوم

ولما الظالم بيبقى مسلم والمظلوم بيبقى من اي ديانة تانية مش حاقف مع الظالم ولا وقفت معاه قبل كده

Unknown said...

واشمعنى يعني الائمة الاربعة بالتحديد؟

سواح في ملك اللــــــــــــــــــه- said...

الاسلام فعل مش اسم في البطاقه الاسلام بيخللي البني ادم يخترم نفسه وبالتالي الاخرين بيحترموه ويعملوله الف حساب عشان تدافعي عن شئ لازم تكوني معتقداه والاعتقاد في حد ذاته ايمان

Unknown said...

انا قصدى اننا نبعد عن شغل المذاهب والفرق لان التحزب دلوقتى قاتل
المذاهب الاربعة وابو سفيان الثورى وابن حزم لو رجعنا لما اتفقوا عليه
هنلاقى كل اللى بتنادى بيه من حرية العقيدة اللى انتى وناس كتير مؤمنة بيها وانا منهم
مش ملاحظة انك رضيتى بالاسلام كدين و كاتبة بوست عنه وفى نفس الوقت عايزة تبقى محايدة؟؟

Unknown said...

احنا فى وقت محتاجين فيه لاحياء علوم دين وحامد غزالى تانى
على فكرة انا رايى ان الحرب على الاسلام لم تتوقف الا لمحاربة الشيوعية وقبلها النازية ثم التفرغ للاسلام
الحقيقة الحرب ليست بين اسلام ومسيحية
بل حرب بين شرق اصبح الان مسلم وغرب
يريد استرجاع مستعمراته القديمة من ايام روما واثينا واللى طردهم منها كان الاسلام
ربنا يكرمك ويكرمنا ويوضح لنا الطريق

Unknown said...

احنا في وقت محتاجين نحترم نفسنا بقى ونعرف ان القنبلة بتنزل علينا كلنا

سواح في ملك اللــــــــــــــــــه- said...

وهنحترم نفسنا ازاي يااستاذه اذا ماغيرناش اخلاقنا يعني برضه لازم تبقي اخلاق اسلام

سواح في ملك اللــــــــــــــــــه- said...

الاسلام بيقول اطلبوا العلم ولو في الصين احنا فين من العلم

Unknown said...

وغير المسلمين ما عندهمش اخلاق؟

سواح في ملك اللــــــــــــــــــه- said...

الصهيونيه نجحت علشان بني صهيون معتقدين بكتابهم اللي احنا عارفين انه غلط

Unknown said...

loyality.. have u ever learnt about loyality, no matter what do u believe in, u r loyal to ur people especially if they are facing an enemy.. this is identity

سواح في ملك اللــــــــــــــــــه- said...

مين اللي قال معندهمش اخلاق بس ربنا قال ان الله لايضيع اجر من احسن عملا

Unknown said...

طول ما فيه مؤسسات دينية متأمرة ومطرمخة زى الكنيسة والازهر
وطول ما كل واحد من السياسيين ما لوش مبدأ وبيدور على مصلحته
ما تلوميش مسيحيين ولا مسلمين
الجماهير لما بتتشحن
ما ينفعش تهديهم بمقالة ولا كلمة
الا الحاج وابنه باعوا بقية دم الفلسطينيين ولا لسة
ربنا يسامحك قلبتى علينا المواجع

سواح في ملك اللــــــــــــــــــه- said...

لسه هنتكلم عن الهويه تاني ماشي ياريت تراجعي الكلام واختلاف الاراء مش عيب بس تبصي لحاجه لازم يكون ليكي ولاء للحاجه عشان تعرفي تدافعي عنها

سواح في ملك اللــــــــــــــــــه- said...

واللهي عندك حق ياكتكوت

Unknown said...

معلهش كنت عايز اعرف رايك فى حاجة يا نوارة:
ياترى انتى موافقة مين فى موقفه من اصلاح الشرق الاسلامى
موقف محمد عبده ولا الأفغانى؟
الاصلاح السياسى ولا الاصلاح الاخلاقى والتربوى
؟؟

احمد خليل said...

نوارة يا زرقاء اليمامة:كامليا زى ما بيقولوا أسلمت من سنة ونصف وحافظة أربعة أجراء من القراّن ولا تعاشر زوجها من اربعة سنوات ،وكل المحطين بيها عارفين دة .اية لزوم الشيخ انة يخدها الازهر عشان تعلن اسلامها، ما هى معلناة ، والشيخ شاهد ،وهوعارف ان الازهر حيسلمها للمباحث اللى حتسلمها للكنيسة.المسرحية معروفة ومفيهاش اى ابداع ،الغرض احداث فتنة تلهى الناس وبدل ما يعملوا مظاهرات ضد الغلاء وضد التعذيب وضد التوريث وضد تصفية القضية الفلسطينية يعملوا مظهرات عشان كامليا.
الخطة جارى تنفيذهاوالناس جهلة وغلابة ،هو مش برضة الشيوعيون بيتجوزوا
اخواتهم

Unknown said...

ههههههههههه انا مع الله

يا عم لا اصلاح ولا خرا

المعادلة ابسط من كده بكتير

مجموعة بشرية مستهدفة بسبب الثروات اللي عندها وقوتها في وحدتها على اختلاف مذاهبها ودياناتها

الانشغال بالقضايا الفلسفية دي بيضيع الوقت وبيخلي الناس تسفسط على بعض

حلهم ان اللي يعرف حاجة يعملها والباقيين يساندوه كلهم ولو بكلمة وخلاص بدل ما يعدوا يفتوا في عضده ومرة عايزين يدفعوه الجزية ومرة يقولوا عليه رافضي ومرة يقولوا مش عارفة ايه، المهم ينجزوا بقى في ليلتهم اللي مش باين لها اخر دي

المهم يعملوا حاجة فعلية على الارض، اي حاجة في الاتجاه الايجابي، مش لازم مقاومة مسلحة بس، مقاومة فكرية، مقاومة علمية المهم يلموا على بعض كلهم وما يستثنوش مجموعة منهم لحد ما تكره عيشتها ونفسها وتروح تشوف بختها في حتة تانية ولو كان مع العدو

ما بيعملوش حاجة خالص.. ما بيعملوش غير الرغي والخناق جتهم القرف كلهم

حياة الظل said...

مرحبا
كيفك يا نوارة انا صارلي فترة طويلة بتابع كتاباتك وهاي اول مر ه اكتبلك رد
وبيني وبينك نيالك على مخك
نفوت بالموضوع
انتي متاكده ان من العدالة المسيحي لمن يصير مسلم بيقدر يرجع مسيحي تاني انا شايف ان كلامك بيتناقض مع حكم ربنا ان يعتبر مرتد
؟؟؟؟؟؟؟؟؟؟؟؟؟؟؟؟؟؟؟؟
الله يخليك لا تفهميني غلط

Unknown said...

وانا ايه اللي يخليني افهمك غلط

مافيش حد للمرتد
:)

خالد

كنت لسه باقول لهم كده على التويتر، والا ما كانش الامن يعمل الفتنة دي كلها وكمان بيظهر بنفسه في المسرحية دي

ويقول لنا: بخخخخخ

واحنا معاتيه على فكره

معاتيه اخر حاجة

حياة الظل said...

مرحبا
كيفك نوارة
على فكرة صارلي زمان بتابعك وهاي اول مره بكتب رد
وبيني وبينك نيالك على مخك
نفوت بالموضوع
انتي مش شايفة ان كلامك ان من العدل اذا واحد اعتنق الاسلام وبعدين صار بدو يطلع من الاسلام بيناقض مع حكم ربنا في المرتد

ملاحظة مهم: لا تفهميني غلط

Unknown said...

رديت عليك
قلت لك مافيش حد للمرتد

حياة الظل said...

كيف الرده ملهاش حد انا الي اعرفه ان حد الرده القتل ,,,,,,,,,,,,وبعدين تعالي ما بتذكري حروب الردة؟؟؟؟

Unknown said...

ههههههههههه
لو عرفتى تخلى المسلمين يبطلوا يقولوا عباد الصليب والنصارى الكفرة
وتخلى المسيحيين يبطلوا يقولوا العرب المحتلين ومصر الفرعونية ويغلطوا فى سيدنا محمد ص عمال على بطال
و تقنعى المسلمين والمسيحيين ان مافيش حد ردة
تبقى اتحلت المشكلة
سهلة صح؟؟
:]

Unknown said...

قهوة كتكوت

سهل يبطلوا

اللي الح عليهم اعلاميا وحط الكلام ده في بقهم وخلاهم يقولوه يقدر يخليهم يبطلوه

احنا عباد الاعلام :))

عشان كده باقول لك فيه حد مرمر لهم عيشتهم هم الاتنين

حياة الظل

اولا حروب الردة اجتهاد شخصي من ابو بكر وما حصلش ان الرسول عمل حروب ردة وفيه خمسة ارتدوا في حياته وما عملهمش حاجة

ثانيا حروب الردة غير الردة الفردية، المجموعات اللي حاربهم ابو بكر يتسموا بلغة العصر: انفصاليين

مش مرتدين بمعنى انهم غيروا دينهم

حياة الظل said...

كتكوت احنا الحين مش في موضوع اقنع مسيحي ولا اقنع مسلم في ان الاخت قالت ان ما في حد ردة؟؟؟؟؟؟؟؟؟؟
مع ان حد الردة هو القتل

مواطن مصري said...

الحقي الحقي


وفاة فتاة فاقوس التى ادعت الزواج من ابن الشيخ محمد حسان


البت دي أتقتلت وش عشان متقولش بقيت الكلام

http://www.youm7.com/News.asp?NewsID=273863

شوفي التعليقات دول مطلعين حسان نبي و ربنا انتقم عشان تموت

حياة الظل said...

اممممممم
كلامك منطقي
لكن التشريع في الاسلام من رب العالمين مش من المنطق الي بقصدو بكلامي ان صارلي من وقت ما قلتيلي الردة ملهاش حد وانا بعمل سيرش على النت وكل الشيوخ والعلماء قلوا حد الردة القتل
الله اعلم اذا في علماء لهم رائي ثاني
غلبتك معي نوارة

mido said...

المرتد اللى يتسبب فى اثارة الفوضى و الفتنةو تهديد كيان الدولة يقام عليه الحد
و ده ينطبق تماما على حروب الردة

Unknown said...

حياة الظل

للاسف حاولت الاقي لك الكتاب اون لاين ما لقيتوش بس دي مقالات عنه

http://www.almultaka.net/ShowMaqal.php?id=386&cat=11

http://thawra.alwehda.gov.sy/_print_veiw.asp?FileName=33304138820070621225403

وحاول تلاقي الكتاب

Rateb said...

- سألت أبا ثعلبة الخشني قلت كيف تصنع في هذه الآية قال أي آية قلت { يا أيها الذين آمنوا عليكم أنفسكم لا يضركم من ضل إذا اهتديتم } فقال لي أما والله لقد سألت عنها خبيرا سألت عنها رسول الله صلى الله عليه وسلم فقال بل ائتمروا بالمعروف وتناهوا عن المنكر حتى إذا رأيت شحا مطاعا وهوى متبعا ودنيا مؤثرة وإعجاب كل ذي رأي برأيه ورأيت أمرا لا بد لك منه فعليك بنفسك وإياك وأمر العوام فإن من ورائكم أيام الصبر صبر فيهن على مثل قبض على الجمر للعامل منكم يومئذ كأجر خمسين رجلا يعملون مثل عمله
الراوي: أبو ثعلبة الخشني المحدث: الطحاوي - المصدر: شرح مشكل الآثار - لصفحة أو الرقم: 3/212
خلاصة حكم المحدث: صحيح

- إن بين يدي الساعة فتنا كقطع الليل المظلم يصبح الرجل فيها مؤمنا , ويمسي كافرا ، ويمسي مؤمنا ، ويصبح كافرا ، القاعد فيها خير من القائم ، والماشي فيها خير من الساعي ، فكسروا قسيكم ، وقطعوا أوتاركم ، واضربوا سيوفكم بالحجارة ، فإن دخل – يعني : على أحد منكم – فليكن كخير ابني آدم
الراوي: أبو موسى الأشعري المحدث: ابن دقيق العيد - المصدر: الاقتراح - لصفحة أو الرقم: 101
خلاصة حكم المحدث: صحيح


Rateb said...

بصراحة انا مش فاهم بردو ايه اللى بيحصل وان كان انا شايف الصورة ملخبطة كده من فترة بس هو فيه عدد من الملاحظات

اولا المسلمين اللى بينزلوا المظاهرات دول بيتاجروا بالقضية مش بيحلوها انا كان عندى يحاصروا الكاتدرائية وتبقى فتنه طائفية بجد ونخلص من ام الموضوع ده ولا اللف ع الجوامع اللى بيعملوه زائد ان قضيتهم مش صح يعنى انا ماليش حاجة عند الكنيسة انا مشكلتى مع الدولة الدولة هي اللى سلمتها وهي اللى سمحت باحتجازها حتى لو محتجزة في نادي رياضي مش فارقة

فيه شيخ ازهري طلع من كام يوم قال انه رفض يشهر الاسلام ل 180 واحد عشان لقاهم كلهم زلانطحية مفيهمش لا دكتور ولا مهندس ده اسمه ايه ده وطالع يتكلم دلوقتى ليه يقول الكلام ده

فيه احتمال ان الحكومة تكون عاوزة تخلي البلد تغلي كده لحد اما جيمي يمسك الحكم ويطلع كاميليا من الدير ويبقى بطل شعبي مش عارف انا مش فاهم حاجة

بس العملية هتتنيل اكتر من كده

Ahmed Rihan said...

من احسن لبوستس الي قريتها ليكي نوارة بالذات الكومينتات :]
ربنا معنا الفترة الجاية محدش عارف يعمل ايه في ايه
فين الحقيقة؟؟
:]

Kontiki said...

الحرية مش كلمة ولا شعار لزوم الوجاهه الحرية الفردية لازم يدعمها قانون، حقوق الانسان لازم يدعمها قانون قوى يعنى خلاصة اللى انتى كاتباة لازم يتقدم بلاغ للنائب العام عشان مش اى مواطن يتاخد ويتعذب و يطلع دينه خالد سعيد بقى كاميليا اى مواطن لازم قانون قوى يحمية
مش الكنيسة تعذب مواطن يقوم الجامع واقف قصادها ولا السلفى ياخد الضوء الاخضر عشان يقطع غيرة دى كارثة ام الكوارث
اللغه هنا لازم تتغير متبقاش مسلم و مسيحى
لازم نشيل الواو تبقى مصرى ومواطن وله حقوق وفى قانون يحمية ضد اى جهه او شخص يعتدى على اخر
الهم واحد
بطالة
فقر
غلاء
فساد
وزراء واخدين الوزارة ورث
صحة وتعليم واسكان وشباب بيموتوا فى عرض البحر عشان لقمة عيش
الهم واحد واسمنا مصريين ولازم قانون يحمينا

سواح في ملك اللــــــــــــــــــه- said...

السلام عليكم يااستاذه نواره انا عايز اعرف انتي بتقولي مفيش حد للمرتد امال المفسدين في الارض حدهم ايه واوعي تقوليلي ده غير ده لانك علي مااعتقد ربنا اداكي من العلم انك تقدري تقربي الاموروتقيسي هي المرتد مش افساد في الارض برضه

Ahmed Hamza said...

الموضوع عامل زي ما يكون مسرح عرائس ، علي المسرح شيوخ وكنيسة وخناقات وكامليا اسلمت واتخطفت وشوية اكشن كده .
وراء الكواليس في ايدي خفية بتظهر وتخفي الممثلين وتحدد وقت ظهورهم ووقت اختفاءهم .
اللي وراء الكواليس في القضية ديه هم الأمن ، الوضع السياسي في البلد .
وديه فكرة قديمة ومستخدمة علطول
يعني حسب القوانين والوضع السياسي في البلد يقرر المخرج اي مسرحية تظهر علي المسرح ومين من الممثلين يؤدي دوره.
مرة تلاقي ماتش اهلي وزمالك .
مرة تلاقي مصر وجزائر .
مرة تلاقي قضية سني وشيعي (سواء حسن نصرالله او احمد نجاد قام باعمال بطولية)
مرة تلاقي مشكلة مسلمين ومسيحين في اي حتة علي اي حاجة
مرة تلاقي قنبلة اتفجرت في مكان من مصر المحروسة بدون سبب - بدون ما جهه تعلن مسئوليتها عن الحادث.
مرة نركز شوية علي مشكلة فلسطين .
مرة مشكلة علي الحجاب او النقاب او كتاب .
واسرائيل وشوية عياط وعوايل .
في مسرحيات كتير وفي مممثلين ممتازين احسن من احمد ذكي وسعاد حسني .
الفكرة كلها ان سواقة الجهلاء والعامة والغواغاء سهلة جدا واللعب علي اوتار قلبهم الحنينة من اسهل ما يكون طالما في جهل .
ايوة يا استاذة مشكلتنا الرئيسية في الجهل .
مصر مع الاسف شديدة بلد متخلف والتعليم فيها فاشل فاشل الي ابعد الحدود.
الناس مش بتفكر ولو بتحاول تتعلم اي حاجة مفيدة .
عايزة تصدقي كلامي شوفيهم في برنامج بحث ميداني علي القاهرة والناس .
اسف للاطالة .

Lasto adri *Blue* said...

لازم تطلع فتوي.. درءً لإحداث الفتن وللمحافظة على الأنفس من التعذيب.. فكل اللى عايز يغير دينه فليفعها سراً.. والله على ما فى القلوب بصير

هي ح تكون فيها ضرر على من يريد ممارس الشعائر بجد.. بس فى الدين برضو: دفع الضرر مقدم على جلب المنفعة..
وكدة كدة مش ح يبقوا عدد مهول يعني.. وربنا يجازبهم بحق صبرهم

لا السلفيين ح يلاقوا اللى يتحمقوا عشانهم.. ولا المسيحيين ح يلاقوا اللى يسجنوه

سواح في ملك اللــــــــــــــــــه- said...

كلام استاذ راتب منطقي برضه

سواح في ملك اللــــــــــــــــــه- said...

من الاخر كده يانواره ومن غير وجع دماغ ولا صداع نصفي ولا شلل اطفال المصري تعرفي منين انه مصري من غير مايكون مواطن خضع والتزم بقوانين البلد اللي عايش فيها ودخل جيشه ودفع ضرايبه وحارب اي عدوا يفكر يعتدي عليها مش دي الهويه كمان الاسلام ليه قوانين لو التزمنا بيها يبقي احنا برضه بنحقق الهويه احنا مش عايزين ندافع عن المسلم الاسم عايزين ندافع عن المسلم اللي لما تراقبيه في تصرفاته تعرفي انه مسلم من غير مايقول وسيبك من الكتب خالص الاسلام دين فطره وانا مفهومي العام للفطره غير مفهومك انا بقول ان الفطره هي البراءه زائد خبره سليمه في التعامل مع كل ماهو صحيح ورفض الخطا

سواح في ملك اللــــــــــــــــــه- said...

انما الامم الاخلاق مابقيت فان ذهبت اخلاقهم ذهبوا

- أحمد صبحي - مصرى فى فرنسا said...

"انا كل حاجة حواليا بتصب في مصلحة الامبريالية العالمية، كلها، مش عارفة اروح فين٠٠"

ـــــــــــــــــــ

أهلاً،إنتي وصلتي يانوارة،حمدالله ع السلامة
نفسي بتوع حموم الإنسان المصريين يفهموا ده
ياريت بصراحه
للأسف قننوهم ودجنوهم لصالحهم

محمود المصرى said...

بسم الله الرحمن الرحيم

يحبس التاريخ انفاس العجب ان غلى فى امتى جمر الغضب

يبدو انه لا يتصور عقلا لدى البعض ان يغضب المسلمون لشىء يعتقدوه صحيحا , فلابد من محرك لهم اما امريكا والغرب كما فعلوا فى افغانستان او الامن كما يحدث فى مصر هذه الايام بخصوص كاميليا شحاتة.

محمود المصرى said...

بسم الله الرحمن الرحيم

حلوة حكاية الجواب دى لكن هو الناشطين دول اسماءهم ايه بالظبط؟ لأن اللى اعرفه ان اللى نظموا المظاهرة لسة فى امن الدولة فهل بعتوه من هناك؟ ممكن برضه .

بهيج الشرير said...

والنبي ياأبلتي أنا عندي إقتراح، إيه رأييك نعمل جمعية لحماية المتحولات إلى الإسلام، وعلشان الوحدة الوطنية وعلشان برضه ماحدش يقدر يهاجم الجمعية، ممكن نسميها شركة أبو التعالب ملك الفياجرا وقاهر الهكسوس وأخيه شنودة للكهولة والأساسات المعدنية

Rateb said...

وخدة بالك ان التيار السلفي باع كل مبادئه مش كانوا بيقولوا ان المظاهرات غلط امال ايه المسيرات اللى كل يوم دي وكمان بيستنجدوا بامريكا السلفيين بيستنجدوا بامريكا يادي الوكسة ولا نقولها بالفصحى نعوذ بالله من الخذلان

اه على فكرة فيه ناس من اللى بيتحركوا في المسيرات دي منتمين للتيار السلفي بالاسم بس لكن ده لا يعنى ان الشيوخ السلفيين يسكتوا المفروض يتكلموا لأن كل اللى بيحصل محسوب على التيار السلفي بكامله

الحكومة قاصدة تولع الدنيا فعلا الاخبار دي بينزلوها ليه بالشكل ده استفذاذ للمسلمين والمسيحيين يعنى
http://www.youm7.com/News.asp?NewsID=274130

هو عموما يا اما الحكومة يا اما الكنيسة يا اما السلفيين حد منهم هيلبس خازوق في اخر الموضوع ده ان مكانوش هيلبسوه جماعة وبالنسبة للناس هما بحوار او من غيره متخوزقين

بس مش غريبة ان السلفيين يرفضوا التظاهر عشان مليون ونص اسير فلسطينى ويرحبوا بيه عشان وحده مسلمة اسيرة

Unknown said...

أهلاً بالغيبوبة - الغيبوبة وصلت لآخر المدى - ياأهلاً يامرحبا

نفسى أقرأ شوية كلام مفيد - مفيد شوية عن كده

وألا الكلام المفيد خلاص خلص - بح

Unknown said...

نوارة هو انا مستغرب من حياديتك
وكلمتي دي حتدايقك وانا عارف بس معلش
لكن القنبلة لما بتقع مش بتقع ع الكل
تسمعي عن يعقوب حنا وجيش الشهداء بتاعه؟
لو تعرفيه او قريتي عنه بعد ما قلت عليه؟
ازاي وكيف ومين وفين وازي القنبلة حتقع ع الكل ؟

مواطن مصري said...

اليوم السابع ينشر وثيقة إسلام مارينا زكى فتاة الإسماعيلية http://www.youm7.com/News.asp?NewsID=274130 الموضوع فية ان

Unknown said...

if u r neutral as u claim u shouldn't have mentioned loyality.
coz loyality to a certain group of people just coz u were born among them is another name for Chauvinism.an open minded person like ur self should be loyal only to abstract ideas like JUSTICE,EQUALITY ...etc.u should be fair enough to remember what the civilized people[england] added to this part of the world.even DR/ Tarek Elbeshry addmitted that when comparing between the role the english played & what the americans are doing now [ el shorouk ,feb 26].i hope at some point the great DR as well as every body else will realise what burden that civilised people carry civilise us.
نتكلم جد شوية بقى

اى مقاومة فكرية وتمسك بالجذور وغيرة على الوطن اللى انت بتتكلمى عنهم
انت فى بلد رئيسها بنظام الحكم كله خونة ده التوصيف الوطنى لافعال عوكل- امداد العدو باسباب القوة ,العمل فى اتجاه عكسى للامن القومى المصرى المستقرة نظرياته من ايام الفراعنة,تدمير كل اسباب قوة مصر بداية من البشر بامراضهم<>

وافقارهم بتدمير الصناعة المحلية-المراجل البخارية كمثال بسيط-

وتجويعهم -راجع مقالات سكينة فؤاد اللى بقى لها عشروميت سنة بتدن فى مالطا,او تصريح ابن امه اللى بيقول فيه ان فكرة اكتفاء مصر من القمح غير عملية
اوعى تكونى تهتى منى ده التوصيف الوطنى بشكل شديد الاختصار
اما دينيا ولانى مسلم اؤمن بقول الله
<>
فالتوصيف الصحيح هو الردة لقوله تعالى ومن يتولهم منكم فانه منهم-هذا ان كانوا مسلمين فى يوم من الايام

وحالنا اليوم له سوابق تاريخية من تامر الملوك فى الاندلس على بعضهم لحساب الاسبان مما ادى لسقوط المدن الاسلامية واحدة تلو الاخرى حتى جاء الموحدين من شمال افريقيا واعادوا اللاندلس مرة اخرى حتى اصيبوا هم ايضا بلامراض القاتلة التى ادت هذه المرة لانهاء الوجود الاسلامى من الاندلس واستباحة المسلمين وبالتبعية اليهود اللذين كانوا من الذميين فى الدولة الاسلامية-بالمناسبة اذا اؤخذ الذميين اسارى من قبل الاعداء فيجب على الدولة المسلمة تجييش الجيوش لفك اسرهم,الفكرة ان ذميين دى مش شتيمة ده توصيف اهل الكتاب المقيمين فى دولة مسلمة



فان كنا نريد الخير لهذا البلد فيجب الخلاص من نظام الحكم وموالاة اهل الايمان والبراءة من ومعاداة اهل الكفر المحاربين لقوله تعالى--لايسالكم الله عن اللذين لم يقاتلوكم فى الدين ولم يخرجوكم من دياركم ان تبروهم وتقسطوا اليهم ان الله يحب المقسطين ,انما يسالكم الله عن اللذيين قاتلوكم فى الدين واخرجوكم من دياركم وظاهروا على اخراجكم ان تولوهم ومن يتولهم فاؤلئك هم الظالمون--وعلى هذا يمكن بل ويجب التعاون مع دول مثل فينزويلا فما ظنك بالمقاومة الاسلامية فى لبنان بس خدى بالك لا وجه للمقارنة بين دول وبتوع العراق فالمحك هو الموقف من الغزاة
وارجع تانى واقول ان الغزاة -من صهاينة وامريكان او غربيين عموما ,وفى قول اخر اليهود و الصليبيين حكمهم كحكم خدمهم
والمسالة اصبحت من الوضوح لدرجة اننا مينفعش نبرر لهم ,ارجو منك ان كان لك راى مختلف ان تعلنيه

Unknown said...

I am loyal to the wretched of the earth

Unknown said...

فى قصة فى سيرة ابن هشام عن واحد قتل سبعة من المشركين فى احدى الحروب -هو كان من اهل المدينة-فبيسالوه انت اسلمت امتى يعنى فقال ما معناه محصلش لكن قريش لا يمكن تدخلها بالعافية عشان احنا رجالة ولازم نقف وقفة رجالة
القصد ان الفعل يجب ان تسبقه النية الصحيحة ليقبل
لان النظرة البانورامية لى كرجل مسلم بتقول ان الانسان على الارض ليعبد الله بالكيفية التى يراها سبحانه وتعالى ليكون مستحقا لرحمة الله به وعلى الاقل ما يتعذبش عشان الحكاية مش حياتنا الدنيا بس
المسلسل
to be continued
بس الجزء التانى حساب وبس

faisal said...

حبايبنا الحلوين بتوع الفريدم هاوس عندهم بوستر صغير بيحطوه في كل مدوناتهم مكتوب عليه:
لم يؤخذ الكلام إلى المحكمة..!
وحاطين علامة تعجب في الآخر مع إنه سؤال، عادي يعني مش مشكلة دول رافضين العروبة أساسا مش ح نيجي نصحح لهم لغة..
لكن المشكلة بقه انهم عايزين يأخذوا الكلام\الفكرة إلى المحكمة وعايزينا نصدق انهم ح يسيبوا المتكلمين
كحك بسكر يعني :)

dr.lecter said...

وده معناه ايه ياامامير
ان بلدنا فيها خير كتير طول مالاشكال دي بتعمل فينا كده وطول ماحنا بنعمل في نفسنا كده
جتنا البله

utopia said...

يااااااه يانوارة
انتى بنفسك سميتى المقهورين فى العالم مسلمين-صدقينى مافيش فرق
خليكى مع المظلوم(انصر اخاك ظالما او مظلوما)
افارقة اسيويين مش هاتفرق كلهم بشر
تعرفى ان الشعب المصرى دايما رأيه صح وبيفهم -مافيش حد خايف على مصر
ولا برادعى ولا معارضة ولا نظام حكم طبعاولا سلفيين ولاالكنيسة ولا الازهر
ولا اخوان
الحكاية بتسخن بفعل فاعل
وربنا يستر

حياة الظل said...

mido
كلامك طلع مطابق للكلام الي المكتوب في
الموقع الي اعطتني اياه نوارة

===============================
يعني اذا شخص غير دينو وسبب اذى للمسلين
يطبق عليه حد الردة
بالكم الكلام هذا بنطبق على ميييييييين؟؟؟؟
===============================
جبهة التهيس الشعبية
يسلمو ابلة نوارة عذبتك معي
كلامك مزبوط ولو ان في رائي ثاني

عدى النهار said...

فى أكتر من محامي تقدموا للنائب العام بطلب للتحقيق فيما حدث مع كاميليا والتأكد من حقيقة ما ينشر عن الموضوع لكنه تحفظ على طلباتهم. الكلام ده حصل قبل خروج مظاهرات تطالب بالإفراج عنها
من المحامين ممدوح إسماعيل وخالد نزار ، مش عارف فى حد تاني ولا لأ

Karim Fadl said...

السلام عليكم ورحمة الله وبركاته،

شوفتي فيلم القادمون؟
The Arrivals

شوفيه وهو حيوفر عليكي كتير من الصدمات اللي بنجيلك لما بتفئسي المسرحيات والتغييب العقلي اللي كلنا عايشين فيه.

هو فيه كتير من الشطاحات لكن المهم هو فكرته الاساسية والمضمون.

لو مشفتيهوش قوليلي وانا ابعتلك اللينك بتاعه.

اشرف ابراهيم said...

الله الله يا مصر