Sunday 6 December 2009

مسلمو سويسرا بيقولوا لكوا حلوا عن سمانا لجل النبي

 البوست ده انا كنت كاتباه في اول ما موضوع سويسرا ومآذنها حصل وبصراحة خفت انشره عشان كنت باتشتم على موضوع الجزائر ما كانتش طالبة اتشتم عشان الجزائر وسويسرا واتعامل كأني مسيحية بقى كمان، مش كفاية باتعامل على اني عربية؟
بس بعد ما مسلمين سويسرا قالوا لنا: احب على ايدكوا.. والنبي ما تدخلوا لنا في حاجة اتشجعت انشر البوست القديم



اولا: كامل مساندتي للمسلمين المقيمين في سويسرا حيث انهم مالهمش ذنب في كل اللي بيتحصل في بعض الدول الاسلامية ولهم حق يطالبوا بحقوقهم، لانهم ما سابوش بلادهم وهاجروا عشان يروحوا حتة تانية تعمل فيهم اللي كان بيتعمل فيهم في بلدهم، والارض لله، مش ملك حد، وكل انسان حقه انه يقيم في اي حتة من بقاع الارض ويرتاح فيها وياخد فيها كامل حقوقه مدام ما طردش حد من بيته ولا قتل حد عشان يقعد مكانه ولا دخل بقوات عسكرية ولا عصابات

ونصيحتي ليهم اثبتوا على موقفكوا، وطالبوا بحقوقكم وما تسكتوش، وخلفوا عيال كتير قوي، مش هم مش عايزين مآذن، خلاص، صلوا بقى في الشارع، ايوة، افردوا ورق جرايد وصلوا في الشارع كده، وعلى رأي امي، اقلعوا الشبشب قبل ما تدخلوا البيوت واملوا لهم الطرقة شباشب، واتوضوا وبلبلولهم الدنيا، وما تدنوش على المآذن، ادنوا في كل حتة، كل حتة تسمعوهم الادان، حتى اللي بيصلي في بيته يدن، واياك تسيبوا مواقعكوا وتهاجروا، واياك تبطلوا خلفة، واشتغلوا في كل حاجة، واياك تعيشوا على الاعانة، اشتغلوا كلكوا، وابتكروا شغلانات، اعملوا لهم لقمة قاضي وبقلاوة وكشري عشان يجيلهم انتفاخ، وخلوهم كده منين ما يمشوا يشوفوا محجبات، في الشارع، في المحلات، في المستشفيات، في المترو، في البرلمان، في الاحزاب، وفي المدارس، اشتغلوا مدرسين وربوا لهم عيالهم، من اول الحضانة لحد اساتذة الجامعة، افرضوا نفسكوا في كل حاجة وفي كل دراسة وفي كل شغلانة واما نشوف منع المآذن بقى ح ينفعهم بإيه...انتوا اصحاب حق، اتمسكوا بحقكوا زي الرجالة، ما تجروش زي العيال وما تفشوش غلكوا في حد مالوش ذنب زي المرضى
مما يقودنا الى ثانيا
 

ثانيا: كامل الشماتة في المسلمين المقيمين في بعض الدول الاسلامية، اللي هي مصر بدون ذكر اسماء: ها؟ حسيتوا بالناس وللا لسة؟ زعلانين عشان مآذن ح تتهد... حسيتوا بقى باللي عايز يبني دار عبادة ومش قادر؟ ولما يصلي في بيته يتحرق عليه؟ حسيتوا بالناس وللا لسه؟ ما سمعتش انا صوت شيخ الازهر في اللي بيحصل في بلده قبل ما يتكلم عن سويسرا، ما سمعتش حد بيقول: حراااااااااااااااام حراااااااااااااااااااااام حرق بيوت ناس بتصلي، امال بيوت الدعارة يتعمل فيها ايه؟
المنافقين في الدرك الاسفل من النار ما يجيش واحد يعمل عبيط على حرق تلات بيوت في سنة ونص على ناس بتصلي  ولما يسمع عن منع المآذن في سويسرا يلطم ويصوت، يا مفتريين، يااااااااااااااا مفتريين، بقى لو مسلم اتحرق عليه بيت في امريكا عشان بيصلي كان ح يبقى نفس رد الفعل؟ يا عالم يا مفترية، بقى منع بناء دار عبادة ولما الناس تصلي في بيتها الجمهور يولع فيها والجرايد تكتب تقول: اصلهم استفزوهم لما صلوا في البيت، بقى ده يتساوى بمنع منارة؟ ده زي واحد بيقول لواحد انا ابني مات قوم التاني يقول له: وانا والله اتسرق مني تلاتاشر جنيه امبارح.

انا عايزة اسمع رأي الناس اللي بتقول ان المسيحيين في مصر "مستفزين" وسهنات ومية من تحت تبن ونفسهم يرجعوا مصر مسيحية وبناء على كده فمنعهم من بناء كنائس وحرقهم ده "رد فعل" طبيعي لاستفزازاتهم المستمرة! قال دول، قال دول بيعرفوا يستفزوا حد، انا عايزة كائن مريخي يجي يبص لي في وشهم ويسمع صوتهم اللي ما بيطلعش اصلا، طب خلاص، المسيحيين المصريين مستفزين، انا عايزة اعرف رأي اللي بيبرر منع دور عباداتهم وحرق بيوتهم فعلا بقى في منع المآذن، مجرد المآذن، لا هدوا جامع ولا منعوا بناء جامع، بس منظر المئذنة مضايقهم، يا ترى إيه رأيهم دلوقت؟ وإيه رأيهم إن ده جه بناء على طلب الجماهير؟ وإيه رأيهم ان الأوروبيين بيقولوا نفس الكلام: المسلمين مستفزين ونفسهم يحكموا العالم وبيقولوا ان الاسلام ح ينتشر في كل اسقاع الارض وكتر خيرنا سايبينهم عايشين وسطنا (فاكر انت كتر خيرنا دي ها؟) وبيشتمونا وهم مهاجرين وعايزين يغيروا ثقافتنا، والبلد بلدنا واحنا احرار فيها (فاكر؟)، والبيت بيت ابونا والغرب عايزين يتساووا بينا، وهم عايزين ينشروا الاسلام في اوروبا، ويرجعوا بلدهم يعيشوا فيها هم مش اهل للحضارة
همممم.. كلام عنصري نازي حقير، صح؟ طب سجل لنفسك بقى وانت بتتكلم عن المسيحيين المصريين عشان انت شكلك كده بتنسى انت بتقول ايه؟

اوروبا طول عمرها عنصرية، دي حاجة مش جديدة، اللي عملوه في السود عملوه في السكان الاصليين في اي حتة راحوها عملوه في اليهود وبيعملوه دلوقت في المسلمين
والمسلمين هم اللي بيروحوا لهم عشان يعيشوا حياة احسن، وهم عندهم فلوس
صحيح ان معظم فلوسهم مسروقة منا ان لم يكن كلها، صحيح هم شبعانين عشان احنا جعانين هم مرتاحين عشان احنا تعبانين، هم عليهم مسئولية مادية ومعنوية وادبية عن اللي احنا عايشين فيه، بس الهجرة مش الطريقة الوحيدة عشان تدفعهم تمن اللي هم عملوه وبيعملوه فينا
فيه اختراع اسمه مقاومة
فيه اختراع اسمه تغيير انظمة عميلة وابطال كل الاتفاقيات والعقود مع البنك الدولي وسحب كل الارصدة العربية اللي برة وتحمل بقى تبعات تحدي القوى العالمية اللي بتشفط قوتنا ولو ح نموت والمدينة الباسلة والكلام دهون
مش كل الناس تقدر على كده؟ صح.. اغلب الناس ما تقدرش على كده، ح نحارب العالم الاول كله؟
خلاص.. هم استعماريين وعنصريين..... وبيض وحلوين واغنيا ونسوانهم مزز، اللي عايز الدح ما يقولش... بخ
والناس ما خبتش حقيقتها علينا الناس صريحة

احنا بقى اللي كنا طول عمرنا بنتنطط باننا قابلين كل الاعراق والاديان وما عندناش اي مرجعية لا ثقافية ولا دينية تخلينا نتحامل على اي مختلف واننا اول دين ينص في كتابه المقدس على حقوق اتباع الاديان الاخرى وده حتى القرآن بيقول ان الاختلاف هو حكمة خلق الخلق "ولو شاء الله لجعل الناس أمة واحدة ولا يزالون مختلفين"، وعيب يا جدع احنا من زمااااان...هئ هئ هئ

فين؟ فييييييييييييييين؟ ايه الفرق ما بين منع المآذن وحرق بيوت مسيحيين بيصلوا فيها؟
فيه فرق: منع المآذن ارحم
انا عارفة، خلينا بقى نيجي دوغري ونقول اللي بيتقال في الاروقة: انت بتقارني ازاي يعني؟ انت مسلمة وللا مسيحية؟ احنا الدين الصح وهم غلط
(لاحظ اني مؤخرا بقيت اتسئل انت مصرية وللا جزائرية، فانا كده ح ابقى مسيحية جزائرية شيعية وكمان زملكاوية... اختصر وقول شمبانزي)

ما كل اصحاب دين شايفين نفسهم صح وغيرهم غلط، ما كل اصحاب دين عايزين دينهم يسود والناس كلها تدخله، ما كل اصحاب دين فاكرين نفسهم ان ربنا بيحبهم هم بس وبيكره بقية العالم، والمسيحيين المصريين معظمهم ارثوذكس، يعني مالهمش صاحب، لا المسيحيين الاوربيين الكاثوليك والبروتستانت بيحبوهم (وده جزء من عنصريتهم لان الارثوذكسية هي المسيحية الشرقية) ولا احنا هنا راحمينهم عشان "سهنات ومليانين خبث ولؤم ومستفزين" (ههههه انتوا مستفزين ليه؟)، واذا كنت شايف تبرير انهم عايزين مصر ده كافي لمنعهم من بناء كنائس او حتى توسيع الكنائس اللي موجودة ويوم ما يصلوا في بيوتهم الناس تخرج من صلاة الجمعة بمنتهى الروحانية تحرقهم، ويوم ما واد يحب بت ويمشوا في البطال قوم ابوها الصعيدي يسيبها عايشة (انا قلت انها ماتت طلعت عايشة) ويسيب الواد اللي عمل فيها كده عايش ويموت اي حد تاني غير البت والواد المهم انه يكون مسيحي، امال صعيدي ازاي ده؟ حتى الصعيد اتضرب؟ وللا ده كان احول ده وللا ايه حكايته؟ يبقى تبرير امريكا في احتلال العراق وافغانستان، وتبرير اوروبا في اضطهاد المسلمين بدعوى انهم عايزين الاسلام ينتشر في كل الارض اكتر من كافي... عايزين مصر؟ جتهم خيبة، هو حد دريان بمصر دي؟ يا عيني على خبثهم ولؤمهم واستفزازهم، عايزين مصر؟ ده ايه الطموحات اللي خرمت السقف دي؟ عايزين مصر؟ يا واد يا شيرز.. يا جامدين انتوا يا بتوع الاسود والنمور والسلاح المستخبي في بدروم الكنيسة والسحر الاسود والعفاريت اللي لابسة البنات يا صيع.. مصر؟ طب افتح بقك كده.. ع الاخر ع الاخر.. ادي مصر..كلها.. لو عرفت تبلعها من غير ما يجيلك تلبك معوي وقئ واسهال واميبا في معدتك ح اديك خمسة وسبعين قرش ياض ياللي ما يملاش عينك الا التراب ياللي اقصى احلامك توك توك بالقسط

امال اللي عايزين العالم (سوا مسلمين وللا بروتستانت وللا يهود) وكل واحد فيهم مستني المسيح ينزل عشان يكيد التاني ويقول له: شفت؟ انا اللي طلعت صح. وفي رحلة انتظارهم لنزول المسيح نسيوا دينهم من كتر الظلم

ووالنبي ارحمونا بقى من فزع الاندلس ده اللي شبه فزع الهولوكوست من غير مبرر، وكل ما تكلمهم يقولوا لك التنصير وعايزين مصر تبقى مسيحية، انتوا مش ناس مؤمنين؟ اللي ربنا عايزه ح يكون
بقى فيه ناس مؤمنة تحمي دينها بالظلم والعدوان والمعصية والقمع وتعمل في غيرها اللي ما تقبلوش على نفسها؟ وعايزين ربنا يسترها معاهم وفاكرين نفسهم مجاهدين؟ وفوق ده كله يتحلوا بنفاق منقطع الجماهير ولما يتعمل فيهم اللي بيعملوه في الناس يرقعوا بالصوت؟ ده على اساس اننا ايه يعني؟ مخلوقين من دهب وغيرنا مخلوق من جلة؟ احنا خلقنا ربنا وهم اللي خلقهم فردوس عبد الحميد؟ 
المثل المصري بيقول: الندل لما يحتكم يقدر ولا يعفيش
شفت اخضر كتير وقليل الا الاخضر اللي فوق قبة عينيك ده.. ما المسيحيين العرب موجودين في كل حتة، ما بنسمعش حد بيحرقهم ولا يمنع كنائسهم ليه؟ ماحدش يقول العراق عشان العراق تحت احتلال وده اقل واجب انهم يفقدوا صوابهم خالص بعد اللي اتعمل فيهم، انما المسيحيين العراقيين قبل الغزو كان اللي بيسري على بقية العراقيين بيسري عليهم، يعني المسيحيين اللي في بلاد الشام مثلا مش عايزين ينشروا المسيحية وهم المسيحيين المصريين بس اللي سهنات ومستفزين وولاد تيت؟ ليه؟ اشمعنى يعني؟ وبعدين ايه ينشروا المسيحية دي؟ ما احنا عايزين ننشر الاسلام
وسبحان الله، سبحان الله يا اخي، نفس اللي انا اعرفهم وبيبرروا منع المسيحيين من بناء كنائس هم هم اللي كانوا بيشتموا في الجزائر، الله، طب راح الاسلام فين بقى؟ مش انتوا بتوع الاممية الاسلامية؟ وللا انت بتدور على اي حد تفتري عليه وخلاص؟
هو الاسلام ده اكتشاف يا ناس؟ ده بقاله اربعتاشر قرن

انا عارفة ان المسلمين مضطهدين ومحتلين ومعذبي الارض وغلابة ومقتولين ومدبوحين ومحروقين ومغتصبين ستات ورجالة ومشتتين ومالهمش سند ولا ضهر في الدنيا غير ربنا ومتسلط عليهم كلاب السكك ودود الارض وحالهم شبه حال اليهود قبل الحرب العالمية واوحش كمان، وعارفة ان الاضطهاد والعنصرية بتخلق عنصرية مضادة وبتصيب الانسان بمرض انه عايز يعمل في الناس اللي بيتعمل فيه، وعارفة ان المضطهد مع طول الاضطهاد ما بيبقاش عنده الشجاعة انه يوجه غضبه للي بيضطهده وبيعوض ده بانه يستلقط له واحد اضعف منه ويتقمص شخصية اللي بيعذبه وينزل في الاضعف هبد، واليهود حصل لهم كده، وعلى فكرة المسيحيين المصريين الارثوذكس حصل لهم كده، بس على قدهم يعني، يعني مثلا بيكشروا في وش البروتستانت المصريين، رافضين وجود شهود يهوا في مصر خالص، بس ربنا مش مديهم صحة يعملوا اكتر من كده
بس ايه؟ ح نسيب نفسنا نعيا وللا ايه؟ يعني اليهود لما اتجننوا اهم اتناشر مليون ومع ذلك ممشينا نكلم نفسنا ويوم ما انداروا، انداروا على الوحيدين اللي كانوا بيعاملوهم كويس، بس احنا مليار ونص، مليار ونص مجنون في العالم كتير
انا امي علمتني من وانا صغيرة اني لما حد يعمل فيا حاجة افكر انا عملت ايه في مين وربنا بيخلص مني

حسوا بالناس بقى يا بتوع الاقباط صوتهم علي قوي وعايزين يتسكوا على دماغهم.. حسوا بغيركوا شوية عشان ربنا يرفع عنا الذلة والمسكنة دي

البر لا يبلي و الذنب لا ينسي و الديان لا يموت فافعل ما شئت فكما تدين تدان
----------
انتهى البوست القديم
بس انا مش عايزاكوا تتخضوا على نفسكوا، المجانين كتير والحمد لله، انا مش عارفة على اي اساس الراجل ده حكم على اوباما انه مسلم غير انه بيموت في المسلمين ومؤخرا المسلمين اتعودوا يموتوا بعض زي بني اسرائيل؟
وايه دولة المماليك اللي اسرائيل عايزة تعملها دي؟ بيخطفوا العيال ويقولوا لهم ارقصي يا جارية؟ هو داء التجارة في البشر ده مش عايزين يبطلوه ابدا؟ ده من ايام زمان قوي، حتى الافريكان امريكان شايلين في قلبهم ومعبيين منهم عشان اللي وردهم لامريكا يهود..ايه؟ هي دودة؟
والمانيا وفرنسا بيقولوا سويسرا معاها حق.. ياللا خلصونا واعملوا لهم هولوكوست خلينا نقب على وش الفتة بقى وربنا يكرمنا، الهولوكوست ده دايما بيبقى استفتاح لبن، ياللا ياللا، جنونا اكتر عشان نعمل لكوا زي اليهود اللي فقدوا وما بقيتوش عارفين تسيطروا عليهم، عكوا كمان وافتروا ومارسوا هوايتكوا القديمة في العنصرية وبعدين ارجعوا عيطوا وقولوا: يا دهوتي ايه اللي عملناه ده.. سوري سوري، بس المرة دي بقى مليار ونص، يعني ح يفتح بقه ويبلعكوا.. احنا زعلنا وحش



واستمرارا لمسلسل ع الباب انا ع الباب اللي بين مصر والجزائر الجزائر صوتت لمرشح مصر في المنظمة البحرية الدولية.. يابت بطلي تقل بقى، ما الراجل عمال يراضيك وانت راخرة بتشوفيه قاعد فين وتفضلي رايحة جاية قدامه وتعملي نفسك بتكلمي واحد تاني في الموبايل، وييجي يكلمك تقولي له: سم كده.. لو سمحت مالكش دعوة بيا.. انا اكرهك انا اكرهك ما اعرفش ليه انا اكرهك
---------
هييييييييييييه انا حاسة اني ح اموت زي هيباتيا، الجماهير الغفيرة ح تقشرني زي الموزة، بس انا مش باقدر امسك نفسي، يعني انت ما بتتغاظش يا كابتن انت وهو؟ ما بتتغاظش مثلا لما تشوف معلم بيضرب عيل مع ان العيل ده مش ابنك؟ ما بتتغاظش لما تسمع ولية بترقع بالصوت وجوزها نازل ضرب فيها مع انه مش جوزك ولا هي بنتك ولا اختك؟ ما بتتغاظش لما بلطجي بيتعافى على واد غلبان؟ ماهو مش معقولة ابقى عايشة كده مش حاسة بغيري لمجرد ان غيري كده من جنسية تانية وللا دين تاني، ده حتى الانسان كائن اجتماعي بيتفاعل.. كان بوزي اسكت وما اتفاعلش مع حد، ماهو اللي بيقول مالنا ومال العرب زي اللي بيقول مالنا ومال المسيحيين ما تخلينا في مشاكلنا، برافو عليهم والله، بس هم بجد مش حاسين بحاجة خالص كده؟ وللا بيضحكوا عليا؟ طب ماييجوا الاكاديمية معايا، ده احنا طول النهار رأفت الميهي عمال يقول لنا: حس حس.. اهم حاجة تبقى بتحس مش مهم تفهم قوي اذا كنت بتحس قوي، لكن لو كنت بتفهم من غير ما تحس روح اشتغل مبيض محارة حس حس حس.. لما خلانا كلنا في حالة سنتمنتالية مهترئة




58 comments:

Kontiki said...

in Rome do as romans do
مش حيكون مفيد لما يرجعوا كل مسلم على بلدة
مش حيكون ظريف لما واحدة كمان تتقل زى مروة
المسلمين فى سويسرا ربنا رضى عنهم وعايشين فى مجتمع مفيش
وجه للمقارنة بينه و بين حياتنا هنا
يبقى مالوش لازمة ! نحترم الناس و نحترم وجودنا فى دولتهم
مش شرط كل من شارك فى الاستفتاء يكون عنصرى ممكن يكون الرفض لاسباب ابسط من كدة بكتير الازعاج مثلا
الخوف من التجمعات العنصرية
او غيرة
يكون احسن لو قلنا نحافظ على احتشامنا وحسن الخلق فى معاملاتنا ونحترم قوانين و عادات الشعب اللى احنا فى بلدة وخلاص ! مش شرط نفتش و نبتكر ونختلق ونفكر فى اسباب للخلاف
وكلنا عارفين ان المسلم دلوقتى بقى موصوم بالرذائل اقلها الارهاب
وعارفين ان مفيش خطاب اعلامى عن الاسلام او المسلمين او العرب يخلى اى دولة تحترمهم ولا وضع اى دولة اسلامية او عربية علية القيمة !
ميبقاش شعوب عمالة تتقدم و تحتل وتصنع اسلحة خطيرة ممكن تقضى على الكوكب فى ساعه وناس عمالة تحارب عشان تبنى جامع وتهد كنيسة كفاية بقى !

mido said...

انا بقى مش على راسى بطحة

و اتكلم فى اى ظلم واقع على اى فئة من الناس فى اى مكان بدءا من مصر لسويسرا

و من ثم

يعنى حلوا عن سمانا ؟

ده لو يهودى شرء و هو بياكل فى اى مكان دولته بتقلب الدنيا

و كذا تفعل ايران بالنسبة للشيعة

سبحان الله !

انا بقولهم مبروك عليكم الديمقراطية اللى حتفشخكم بالذوق

بالشفا

mido said...

بالنسبة لرأفت الميهى :

هو انت ناقصة

حساسة؟

:S

انا حس حس

و

حس حس انا

Unknown said...

وكمان طلعتى زملكاوية؟

Fatma said...

بعد الشر عليكي من موتت هيباتيا
كلامك كله انا موافقاكي فيه
ومع اني مش من مسلمي سويسرا الا اني بردو احب اقول لاغلب مسلمي العالم الاسلامي
حلوا عن سمانا لاجل النبي بقى قرفتونا جاتكم القرف

ola said...

إنت طلعت شمبانزي زيي أنا كمان؟ ههههههههههه

ola said...

إلا صحيح هو إيه علاقة المواضيع ببعضها؟
ليه ربنا خالق ناس كدة تركيبة غريبة من شوية حاجات على بعض مالهمش دعوة ببعض بس كل واحدة منهم كافية إنها تشيب
زملكاوية و متعاطفة مع موقف الجزائر و المسيحيين و متفهمة حتى وجهة النظر الأوروبية في محاولة الحفاظ على نمط حياتهم و حضارتهم - ماهو الصراحة إحنا بندي إنطباع زي الزفت- و الناس ليها
حق تقلق
و كمان معلقة صورة السيد حسن في أوضتي من 4 سنين

طب على الأقل يارب مش كنت خلقتني حتى أهلاوية؟!!! ك

Unknown said...

لالالالالالا

انا مش متفهمة لموقف الاوربيين خالص للحفاظ على نمط حياتهم

نمط حياتهم في عينهم ولاد وسخة عنصريين نازيين

اشمعنى بيدخلوا لنا بالقنابل عشان يغيروا نمط حياتنا بالعافية وعايزين يفرضوا على المهاجرين ضحاياهم نمط حياة مش بتاعتهم؟

بلطجية يعني

وطول عمرهم بلطجية وعنصريين

الكارثة لما نبقى ضحاياهم ولما نقدر على حد نعمل زيهم بالظبط، امال باي عين بندينهم؟

منظور شامل للحياة السعيده said...

شكرا يا نواره على البوست الرائع

اللي يفتح العينين و العقول و يا رب القلوب كمان

انا مسلم و مش راضي عن احوال المسيحيين (طبعا و لا المسلميين) في مصر

و بالمناسبه الواحد يلتحق بالاكاديميه دي ازاي

انا عاوز الميهي اتعلم على ايده الاحساس عشان هوا انسان رائع

ola said...

الغرب عنصري وابن ستين كلب آي نعم
بس أنا متفهمة بردو قلقهم من المثال اللي المسلمين بيعطوه عن أنفسهم
يعني المسلمين -الحاليين- زي إخواتنا و حبايبنا هنا عندهم رفض مطلق و صريح للآخر
يبقى لازم أتفهم وجهة نظر واحد خايف على نفسه و على نمط حياته
مقدرش ألوم واحد بيدافع عن ثقافته ضد ثقافة هو شايف شكلها مننا
ما هو المواطن العادي السويسري مش هيروح يتفقه في الدين الإسلامي علشان يعرف الفرق بين الدين و بين معتنقيه

يساري فلسطيني said...

رائعة كالعادة

......

انتي مش راح تبقي ليك اي صديق

غير الناس الطيبيين

خليهم يفيدوك

....

بخصوص نزول المسيح ليثبت مين الناس الصح و صلني خبر انه غير رأيه و حيروح لكوكب المريخ بسسب خلوه من البشر
ووجود ناس زرق و خضر و لكن بيحسو
.....



مع التحية

ola said...

إنت عندك توارد خواطر مع إبراهيم عيسى
:)

Unknown said...

ليه؟

انا عندي توارد خواطر مع ابراهيم عيسى فعلا
اليوم اللي نزل فيه مقال افضال مصر على العرب كنت كاتبة حاجة بنفس المعنى وبعتها الصبح بالليل لقيته ناشر المقال فكلمت ابراهيم منصور يلغي المقال

بس بتسألي ليه؟

Unknown said...

ايه ده؟
هههههههههههههه

ده كاتب عن سويسرا برضه

والله العظيم البوست ده كنت شايلاه في الدرافت من اول ما موضوع سويسرا ده حصل

ola said...

أنا مكنتش بسأل
أنا شفت مقاله و ضحكت فعلا
أيوة أنا فاكرة موضوع أفضال مصر على العرب
و علشان كدة قولت إن عندكم توارد خواطر
حتى نفس الكلمة
مسلمي سويسرا بيبوسوا إيديكوا ترفعوا إيديكوا عنهم
ضحكت والله لما المقال نزل و قريته
سبحان الله

هو عموما دا إحساس أي حد بيحس بيحس يعني
بس الموهبة بقى من عند الله
الله يديمكم نعمة علينا
:)

إنت و إبراهيم عيسى يعني

ola said...

أنا كتبت تعليق بس شكلي طيرته ههه
عموما
أنا مكنتش بسأل
أنا بقول
لأني فاكرة برضو موضوع أفضال مصر على العرب
لما شفت موضوع إبراهيم عيسى أول لما نزل ضحكت
لأنه حتى استخدم تفس العبارة
مسلموا سويسرا بيبوسوا إيدكوا تحلوا عن سماهم
هي مش غريبة يعني
لأن دا إحساس أي واحد عنده شوية حس في البلد الغريبة دي
بس هي موهبة بقى ربنا بيعطيها لناس و ناس
ربنا يديمكم نعمة علينا
إنت و إبراهيم عيسى
:)

د. محمد رضا said...

انتي بقيتي تخرفي اهوه

لا يا شيخة العدل مقطعك موت مش قادره

زعلانه عشان المسحيين اوي

طظ فيكي وفيهم

انتي مسلمة

ازعلي لدينك بس

اصل المسيحيين لو لهم حق مش هيعرفوا

ياخدوا يا حبة عين امهم

وسيبك من دور العداله دا بلا خيبه

كتكوا البلا مليتوا البلد

قال فاكرين

انتي بقالك فتره مخك اتلحس وكل شويه اقول هتعقل

ربنا يشفي

د. محمد رضا said...
This comment has been removed by the author.
يساري فلسطيني said...

كما قالت ola

الله يديمكم نعمة عليناهه


:)

إنت و إبراهيم عيسى يعني

.....


و يديمكم نقمة على اللي في بالي



امين يارب

mido said...

ضياء رشوان نقيبا للصحفيين

mido said...

لأ لسه ضيا متقدم بس مكسبش رسميا

simplymoi said...

Do unto others as you would have them do unto you ! It cant get more simple than that !
Stop protecting bad people just because they are part of your family,friends,community,religion or sporting group !
Protect the good and innocent and punish the bad ! Stop calling people bad and evil just because they live in another country or have different beliefs than yourselves !
You only need to look at the web of global interracivity to see that good people dont care about your differences,but only the simple things you have in common !!!!!
Same with team sport ! It has become just as much a bad influence on the mass population ! Once upon a time it was only on the weekends, but now with mass media its 24/7 ! People no longer have a balanced lifestyle, only forms of brainwashing ! Sport should be about enjoying seeing teams excell at their chosen field, not abusing the other team just because they scored and not your team. It shouldnt matter who wins as long as everyone had a good time !

Unknown said...

محمد رضا
هههههههههههههههههههههه

د. محمد رضا said...

وعليكم ال هههههه

Anonymous said...

شيء مؤسف .... هما عارفين ان محدش هيتكلم ولا هيسحب فلوسه من بنوكهم

-----------------------------------

بالنوسبه للصعيد .... انا قلت لحضرتك ان البنت عايشه

ما تساليش ازاي .... لان في كلام ماينفعش اشرحهولك على الملا كده :)

تحياتي

Unknown said...

فيه حد منتحل بروفايل حسن علي وبيكتب عنه كلام حقير حسبنا الله ونعم الوكيل

رجاء من الاخوة المدونين ما ينشروش اي تعليقات من منتحل بروفايل حسن علي

Unknown said...

أقل ما يقال انه بوست رااااائع فعلا"
صح - المسلمين من غير مأذن ممكن ينتشروا اضعاف مضاعفه ويثبتوا كيانهم ووالله من غير مساجد كمان
العربى عموما" معروف أنه لما بيروح مكان أوروبا بيلتزم بالقوانين وبيشتغل وبينتج أكتر مما يكون موجود فى بلده
بالنسبه لتطابق المواقف بين المسيحيين هنا والمسلمين هناك
فالرؤيه دى كانت غايبه عن ذهنى تماما" وأعتقد عن الكثيرين من متابعيك
بس أنا مافهمتش حاجه معينه
أنتى تقصدى أن ده عقاب من ربنا أو لفت نظر للى بيحصل هنا مثلا" ؟
وأن دى ممكن تكون رساله أن الأضطهاد الدينى واحد لكل الأديان ؟

سامي said...

الكنايس فى مصر بتتبنى بالهبل وفيه احصائيات اتعملت بتبين ان الكنايس فى مصر اكتر من الجوامع لما حسبوها بالنسبة لعدد السكان كام جامع لكل مسلم وكام كنيسة لكل مسيحى والاستراتيجة اللى ماشين بيها حبايبنا المسيحيين ابنى الكنيسة الاول وبعدين نشوف حل لترخيصها عشان هما مش هبل زينا يعنى وميقفش فى طريقهم خط همايونى ولا خط بارليف حتى اما مسألة حرق المصليين الغلابة اللى ملهموش كنيسة من الارهابيين اللى طالعين من صلاة الدومعة فحقيقة اتاثرت جدا يعنى لدرجة من غيظى عمال اطرقع فى صوابع رجلى لا مضطهدين فعلا وصعابنين عليا لسه من شهر ونص واحد من المضطهدين دول اغتصب طفله مسلمة عندها عشر سنين هنا فى قنا ايه اللى جرى؟ الكنيسة اللى كان بيصلى فيها الجانى (عشان يشحن ايمانه) متحرقتش يعنى ولا حاجةولا حصل حاجة لاهله والجاني اتقدم للمحاكمة واكيد القاضى(لو طلع عنده بعد نظر زيك) حيشمله بعطفه ويديله براءة حرصا على سمعة مسلمى سويسرا لانه حيحسبها لو اداله عشر سنين مثلا فممكن سويسرا تهد عشر مأذن للمسلمين هناك.. ولا حول ولا قوة الا بالله

عم مينا said...

بوست رائع يا نوارة
ضحكتني قوي الحتة بتاعة "بس على قدهم يعني، يعني مثلا بيكشروا في وش البروتستانت المصريين"
هاهاها

سامي said...

اعوذ بالله

Kalimalhus said...

أحييك تانى لأن لسه عندك نفس بالكسرة و الفتحة تتكلمى.. بس هو إنتى بتكلمى مين لا مؤاخذة .. الناس اللى متفقين معاكى رأيهم من رأيك من قبل ما تكتبيه و الناس من أصحاب الدماغات المغلقة على فراغ بيصفر فيه الهوا ما بيعرفوش يقروا و لو عرفوا ما بيفهموش و لو فهموا هيجيلهم سكته قلبية من الصدمة ..

أنا بصراحة شايف إن الكتابة أو الكلام بيجيبوا الهم و كفاية إنك يطلع عليكى الهاموش يلزقلك و يسمعك كلام يخليكى تكرهى الجنس البشرى و تكرهى نفسك .. يبقى الأحسن الواحد يشوفله كتاب يقراه أو فيلم يتفرج عليه أو أغنية يسمعها أو يلعب مع العيال..

أه قبل ما أنسى بالنسبة للموضوع .. آه هو زى ما إنتى قلتى كده ..

Kalimalhus said...

الأخ زقزوق أبو فوطة..

و النبى أيها مصدر أو إسم جهة تكون عملت هاذوها الإحصائيات اللى جنابك بتقول عليها لتنوير الجهلة من أمثالى..

و لمعلومية جنابك دور العبادة ما بتتحسبش بس بالنسبة فى عموم القطر .. يعنى لو عدد المسيحيين فى محافظة ما يقابله كنيستين يبقى المفروض كل مسيحى بقى يشد الرحال من بلدهم فى أطراف المحافظة للمكان اللى فيه الكنيسة عشان يصلى؟ .. طيب لما الناس إتلموا و صلوا فى بيوتهم إتحرقت عليهم .. و لما إنحرفوا و دخلوا بيت دعارة مش مسيحى برضوا إتولع فيهم عشان إزاى بيعملوا سيكو سيكو مع لا مؤاخذة فتيات مسلمات بيمتهن أقدم مهنة فى التاريخ علما بإن اللى إتنيلت و إمتهنت المهنة دى تعتبر خارج أى دين لغاية ما يبقى ربنا يتوب عليها.. طيب ينيلوا إيه لا صلاة عاجبة و لا عط عاجب ؟؟

Al said...

علينا أن نثبت الكثير جداً للعالم
قبل أن نطالبهم بقبولنا مرة أخرى في زمرة الإنسانية
وعلينا فضح المؤلفة جيوبهم

ومن كانت قلوبهم على بنوك سويسرا قبل مآذنها

Unknown said...

اه شفت يا تامر

طلع ان الكنايس اكتر من الجوامع ولما واحد مسلم يغتصب طفلة يبقى اسمه واحد اغتصب طفلة لكن لما مسيحي يغتصب طفلة يبقى مسيحي اغتصب طفلة مسلمة
طب مش يستذوق ويغتصب طفلة مسيحية؟

عم مينا said...

مهندس حر

لا صدقني في منهم بيعرفوا يقروا
حتي واحد اسمه محمدرضا و دكتور كمان

Unknown said...

عم مينا
محمد رضا بيتريق

عم مينا said...

ايه ده شكلي وحش قوي
هاها
أنا أسف يا أخ محمد.. العتب علي النظر

د. محمد رضا said...

ولو اني مش عارف انت بتقول ايه يا مينا

لكن ولا يهزك

ولو هزك شويه مش مشكله

عم مينا said...

هاها لا أصل أنا قرأت الكلام اللي حضرتك كتبته فوق و ما كنتش فاهم انك بتتريق فدخلت فيك شمال بس نوارة لحقتني الحمدلله

عم مينا said...

بالمناسبة يا نوارة انتي مش مدية موضوع البرادعي حقه.. فيه حاجات بتتكتب الصحف القومية اليومين دول هتخش التاريخ.. محمد علي ابراهيم طلعه عميل للأمريكان و اخوانجي في نفس المقال

Unknown said...

عم مينا

اصل انا مش عارفة حاجة خالص عن البرادعي ده

يعني لو اترشح مش ح انتخبه
ومش عارفة ليه قلقانة من الموضوع
هو مش ح يترشح بشروطه دي

سامي said...

يا نوارة
اللى يغتصب طفلة يستاهل الحرق حى سواء كان مسلم ولا نصراني ولا مجوسى
وانا ذكرت واقعة البنت دى ردا على استهبالك(دول بيستفزوا دول.. ياى انا عايزة حد من المريخ يبص فى وشهم.. ياى.. دول صوتهم مبيطلعش يا عينى ياى) ماهم صوتهم بيطلع اهم وبيعرفوا يغتصبوا بنات صغيرة اهم سواء البنات دول مسلمات ولا يهود ولا اى مله عشان متزعليش وبيعرفوا يستولوا على الاف الافدنة حوالين الاديرة من اراضى الدولة بواسطة الرهبان المحاربين زى بتوع دير ابو فانا والبحر الحمر وغيره وغيره وبيهتفوا فى مظاهرات داخل الكاتدرائية بهتافات من نوع يا بيريز يا شارون اضرب فيهم بالمليون ولما يطلعوا برة ويرموا قوات امن مبارك بالحجارة ويصيبوا ضباط وجنود الامن بيمارس معاهم ضبط النفس احيييه احيييه احيييه
دا انا بصفتى مواطن مصرى مسلم اقصى اماني انى اتساوى بالمواطنيين السوبر دول

سامي said...

مهندس حر
المعلومة اللى بتسأل عنها واللى يمكن مذكرتهاش بدقة عشان بكتب من الذاكرة يعنى
الظاهر ان التقرير الاستراتيجى للاهرام عملها(سنه 1999) وحسبها بالنسبة لعموم القطر المصرى وخلاصته ان(أن نسبة الكنائس إلى النصارى أعلى من نسبة المساجد للمسلمين)
وكان تعليق الدكتور محمد عمارة عليه الجملة الاتية(إذا كانت نسبة الكنائس لعدد النصارى تكاد أن تساوى نسبة المساجد لعدد المسلمين. فإن الواقع يقول: إن الكنائس مفتوحة على مدار النهار والليل.. والمساجد تغلق عقب الصلاة.. ومنبر الكنيسة حر كل الحرية، ومنبر المسجد مؤمم) المعلومات دى جايبها من مقال سبق وجبت لينكه هنا واطلعت عليه نوارة وجالها جنون ذهولى واتهمت كاتب المقال انه فيوزه ضاربة! فمتضطرنيش انى اجيب اللينك تانى رحمة بفيوزك انت لتضرب!بالنسبة للمثال الخيالى العجيب اللى ضربته بافتراض وجود كنيستين فى محافظة واحدة (..)واللى عايز يصلى يشد الرحال ولا يعمل ايه فانا مش حضرب امثلة خيالية وحقولك ان بيتى يتوسط شارع اوله كنيسة واخرة كنيسة وردى على تساؤلك البرىء ا اقتراح منى بتعميم تجربة الشارع بتاعنا على كل انحاء الجمهورية ويبقى فى كل شارع اولة وكنيسة واخرة كنيسة عشان نوقف نزيف دم الشهداء المتعطشين للصلاة ومن قلة الكنايس ياعينى بيصلوا فى بيوتهم ! ولما ميلقوش رد فعل بعديها بفترة الصلبان تترفع فوق البيوت والخرسانة تشتغل ويتحول البيت بقدرة قادر لكنيسة مشيدة مش ناقصها غير الترخيص نفس الاسلوب المستفز بيتكرر مئات المرات ..معنديش فكرة عن الجماعةاللى اتولعوا عشان دخلوا بيت دعارة فيه فتيات مسلمات زى ما بتقول(ايه حكاية الوليع دى معاك انت ونوارة ) لكنى باقترح على المسئول الاعلامى للكنيسة استغلال الفرصة وانتاج فيلم عن اضطهاد المسيحيين فى مصر وليكن اسمه مثلا _ بين ولعتين_

عم مينا said...

هو أكيد مش هيرشح نفسه.. شروطه تعجيزية.. ده أكنه بيقولهم يعملوا ديمقراطية حقيقية في البلد.. اتجنن ده و لا ايه؟
هو خطابه مجرد اعتذار شيك عن عدم خوض انتخابات الرئاسة و بيحرج بيه النظام..
بس اللي حصل في الصحف القومية بيدل قد ايه النظام دي ضعيف و هش و أي حد يقوله بخ يخضه
الموضوع وصل لوزراء دلوقتي مش رؤساء تحرير بس.. مفيد شهاب قال انه لا يملك مقومات رئيس الجمهورية.. لأنه عالم أححححا عالم ايه ده معاه دكتوراة في القانون الدولي.. و بعدين بيقولك معندوش الخبرة السياسية و الحزبية.. طبعاً ١٢ سنة في الوكالة الذرية دي مش خبرة سياسية و لا حاجة.. لازم الواحد ياخد كورس مكثف في أمانة السياسات .. علشان يبتدي يتعلم سياسة.. حاجة تقرف

أبو عمر - الصارم الحاسم said...

مهندس حر

انت بتكفر صاحب الكبيرة
؟
يعني الزانية خارج الملة حتى تتوب
؟

ودي جبتها منين ان شاء الله
؟

لو واحد من اصحاب الدماغات المغلقة على هوا بيصفر زي ما قلت قالها كان يبقى متطرف متشنج ارهابي صاحب دماغ مغلق على هوا بيصفر

وعلى هذا الاساس بنتكلم في اي موضوع بغير علم وبغير خلفية....الا هوانا وما نراه


انا مش بأتكلم هنا عن موضوع الفتنة الطائفية ومش باعلق على الحادثة ذاتها لاني واثق ان نادر ما حد هيفهم ولا هيقرا اللي هأقوله...لكن تعليق مهندس حر استفزني جدا

عم مينا said...

ايه ده تصدق يا زقزوق اني أول مرة أكتشف ان المسيحيين واكلنها ولعة في مصر.. ده إحنا طلعنا جامدين قوي يا راجل و أنا مش واخد بالي..
هو أما اوجد مسيحي عاطل ابن وسخة يغتصب طفلة يبقي كده المسيحيين خلاص طلعلهم صوت..
علي فكرة بالنسبة لموضوع نسبة الكنايس و المساجد.. الكنيسة بردو كانت عاملة احصائية بأرقام عكس التقرير اللي حضرتك بتقول عليه
أما بالنسبة لموضوع ان الكنايس مفتوحة ٢٤ ساعة عكس المساجد فده مش من حب الدولة للمسيحيين.. هو الطبيعي انه سواء الكنائس أو المساجد تبقي مفتوحة علي طول.. فكرة انهم بقوا يقفلوا المساجد بسبب موجة الإرهاب بتاعة التسعينات و انهم اكتشفوا ان الناس دي كانوا بيتقابلوا في المساجد.. فقرروا يقفلوها في غير وقت الصلاة.. حضرتك شايف بقي انهم من باب المساواة يقفلوا الكنايس بالمرة؟؟ مش فاهم
بالنسبة لبناء الكنايس.. أه فيه مسيحيين بيلتفوا حوالين القانون و يبنوا كنيسة من غير ترخيص.. عمرك سألت نفسك ليه.. عمرك سألت نفسك ليه مفيش مسلمين بيبنوا مسجد منغير ترخيص؟ هل ده لأن المسلمين مش مزورين و المسييحيين هما اللي بيحبوا التزوير؟
علي فكرة أنا مش من هواة موضوع اتضهاد الأقباط و شايف ان فيه ناس بتستغلوا بطريقة سيئة و غالباً بكون دايماً بتخانق مع الناس دول.. بس حضرتك جاي و عاوز تقولي ان المسلمين هما المظلومين في مصر و المسيحيين بيتعاملوا معاملة الموك معلشا اسمحلي..

طنطـــا واى said...

وحياة امى اللى هى مش مصر انا من الاول قلت انى دخلت هنا غلط ... دة الناس بتوع الثقافة فى الستينات والسبعينات كانوا أرحم
المهم انا ليا تعليق على بعض التعليقات هنا واللى فيها شبة من كلام سفير سويسرا عندنا _ واضح ان كل سفراء العالم عندنا من الجزائر الى سويسرا من النوع المضروب اللى مكملش تعليمة _ المهم الناس بتتكلم عن الديمقراطية وراى الاغلبية وكلام كدة بيفرح العيال الصغيرة

ديمقراطية اية وزبالة اية ؟؟؟ امال فين دور الحكومات والقرارات السيادية والمحافظة على المجتمع بكل فئاتة وحقوقة ؟؟ ولا حيبقى الراى للغوغائية والرعاع وبتوع الصوت بسندوتش كبدة

يعنى لو عملنا عندنا استفتاء مثلا على طرد المسيحين او قتلهم عارفين نتيجة الاستفتاء حتكون كام ؟؟ دى الديمقراطية ؟؟
وغيرة وغيرة امثلة كتير

ola said...

و ماهي المشكلة في فتح الباب لتشييد الكنائس
يعني إيه الخطورة اللي بناء الكنائس ممكن يؤثر بيها على المسلمين؟
والله حقيقي مش فاهمة
أنا مسلمة و عارفة طبعا الكلام اللي بيتردد و نوارة قالت معظمه
كمان في حاجات دمها خفيف قوي
زي إنهم بيبنوا الكنائس و الأديرة كلها خرسانة مسلحة زي م تكون قلعة
و بيعملوا السور فيه فتحات على شكل دوائر طبعا علشان فوهات المدافع
ههههههههههه
والله العظيم سمعت الكلام ده من ناس متعلمة و أحسبها واعية
بس للأسف للأسف بيضحكني ههههههه

أنا الحاجة الوحيدة اللي بتغيظني من الإخوة المسيحيين في مصر أنهم بقوا فعلا بيتعاملوا زي ما يكونوا أقلية
أو مجموعة مهاجرة مثلا
زي ما تكون البلد جديدة عليهم
كمجموعة بتتبنى موقف واحد مثلا هو موقف الكنيسة مش كمواطنين مصريين

مشكلة المسيحيين في مصر هي مشاكل المسلمين
وأي بني آدم مش من الكام ألف بتوع الحزب الوطني

عم مينا said...

طنطاوي

والله أنا إستخدمت نفس المثل ده بالظبط و أنا بتناقش مع صحابي بتوع الديمقراطية دول.. الناس مش فاهمة ان أساس الديمقراطية الحقيقية هي حقوق الإنسان و انك مينفعش تعمل استفتاء علي حقوق الإنسان

علا

للأسف انت معاكي حق و هو ده كان رد الفعل الخايب بتاع المسيحيين تجاه بعض المضايقات اللي بتحصلهم.. كل وادت تقوقع جوه كنيسته اللي بقت هي دولته.. دولة داخل دولة.. و بقوا بيتعاملوا مع البلد و كأنهم مهاجرين

سامي said...

اخر ربع ساعة من المباراة والاهلى ضاغط اوى ربنا يستررررر

احمد سعيد said...

الموضوع دة انا كنت عاوز اتكلم فيه من زمان
بس صرفت نظر عنه
نظرا لموجه ادينى مخك وامشى حافى اللى المصريين ككل ماشيين فيها اليومين دول
وعلشان عارف ان الموضوع هيكون فيه خبط ورزع كتير
لكن بما ان نوارة فتحته
فهتكلم عنه باختصار
طبعا اختصارى دة هيكون طويييييييييييل زى ما انتوا عارفين:D

اولا
دعنا نتفق
حريه العقيدة شىء اساسى فى حياة الانسان وحق يكفله العقل والمنطق وكافه الاديان السماويه ( طبعا بعد ما نستأصل كلام رجال الدين الاوغاد اياهم واللى موجودين فى كل مله )


يعنى
مسلم مسيحى يهودى بهائى سنسكريتى متوشلح
ايا كان دينه
حقه يتعبد
حقه يصلى
طالما لا يضر الغير

انطباعى عن المؤسسه الدينيه المسيحيه فى مصر

بكل موضوعيه

وبدن زعل

انا شايف
ان البابا يتبنى سياسات ليست فى صالح مصر على الاطلاق
ولا فى صالح ابناء شعبه
وان كان بيعتقد انه كدة بيخدم ابناء الكنيسه
فدة مش صحيح


النظام الكنسى فى مصر نظام متسلط على اى مسيحى يفتح بقه ويقول لأ فى اى كبيرة او صغيرة

مسيحيين مصر من سنين انعزلوا عن المجتمع واكتفوا بالدفاع عن انفسهم دون التدخل فى اى قضايا مصيريه للوطن

يعنى معادش فيه ناس زى مكرم وويصا وشفيق سدراك والناس دى

ودة عمق الفجوة بينهم وبين المسلمين
وخلا المسلمين ينظروا لهم بعين متوترة
على انهم كيان منعزل وواخد جنب
ايا كانت مبررات السياسه دى
الا انها مش فى مصلحه المسيحيين

الاخوة المسيحيين
فيهم ناس
قمه فى الذوق
والرقى
والثقافه
والتسامح الدينى


وفيهم ناس ولاد تيت
دماغهم ضاربه
وعايشين فى اوهام الحرب المقدسه
وان المسلمين دول اعدائنا
وهنعمل ونسوى
وماشيين ورا كام رجل دين سيكوباتى متخلف
سايقهم زى النعاج

ودول غالبا بيكونوا فى الاوساط الاجتماعيه المتدنيه
طبعا بجانب الفقر والجهل والقرف
الدماغ الفحلقيه الضاربه دى بتشغل اخر حلاوة


المسلمين بقى
كتير منهم حاليا
مصاب بمرض الدماغ الضاربه دة
وواخد نفس نمط التعصب
وبيشجعه على الاستمرار والزيادة
بعض السلوكيات العبيطه من الاخوة المسيحيين اللى قلت عليهم دول
واللى بتلاقى ردود فعل برضع عبيطه من مسلمين اعبط منهم

احمد سعيد said...

التعصب وكراهيه الاخر بين المسلمين والمسيحيين فى مصر من المستحيل انك تطلع طرف غلطان من الاول

لان الموضوع اشبه بنظريه البيضه ولا الفرخه


المسيحيين فى مصر بوجه عام
وانا بقول بوجه عام
مش كلهم ولا حتى اغلبهم
بس الصورة اللى ظاهرة على السطح
انهم متعصبين

دة له مرجعيه دينيه مسؤل عنها بعض الزعماء الدينيين عبر التاريخ وهما اللى كرسوا الوضع دة

بالاضافه لحملات متقطعه من التمييز الدينى ضدهم استمرت عبر التاريخ الاسلامى ولكن بشكل متقطع

ابقو اقروا كدة عن قانون الملك الناصر بتاع الشبشب الفردة وفردة وركوب الحمار بجنب
والجلاجل اللى متعلقه فى الرقبه

دة نتج عنه تعصب فى نفوس الاقباط
استغلوة فى اقرب فرصه لتفريغ موجه من الغضب فى المسلمين الوحشين

راجعوا اللى عملوة ايام حمله نابليون
وقصص الاخ فرط الرمان

طبعا اكيد فيه ناس كويسه
وناس برة السيناريوهات دى
انا مش بعمم
ولكن بتكلم عن مؤثرات اثرت على الكل ولو بشكل مختلف


التعصب الدينى فى مصر موجود وبشدة وبشكل متبادل
ولكن بما ان الاقباط اقليه فى مصر فمن الطبيعى ان الحط عليهم يبقى اكتر

ومن الطبيعى ان النظام يستغل الموضوع دة ويكبرة اكتر علشان يصيب الاقباط بالرعب من الموجه دى ويدفعهم للارتماء فى حضنه ويبتزهم سياسيا فى مقابل توفير الحمايه لهم ضد النار دى وانه يديهم شويه مميزات تافهه

ودة اللى بيحصل دلوقت مع البابا شنودة مع الاسف

لسه فيه كلام

بس نازل دلوقت

اكمل لما ارجع

احمد سعيد said...

يعنى النظام بيسيب الحبل على الغارب لبعض المسيحيين المتطرفين
علشان يوصل صورة للمسلمين ان النصارى فى مصر بياخدوا حقهم بالدراع وبيمشوا كلمتهم على الحكومه
ومع الاسف
كتير بيقعوا فى الفخ دة

ودة بيعمق الفجوة بينهم وبين المسلمين
وبيقابل بعنف من الطرف الاخر
مصحوب بصهينه حكوميه على حرق الكنايس وخلافه
ومش بيتدخلوا الا فى اخر لحظه

علشان يحسسوا المسيحيين انهم عايشين فى غابه
وان محدش هيحميهم الا النظام
ودة طبعا مش ببلاش

دة تمنه تبريكات وتقديم احترامات وتشكرات
وانتخابات
رئاسيات
للواد
جمالات


فخمتوا ؟؟؟

أبو عمر - الصارم الحاسم said...

فاكرين الحوار ده

http://www.tahyyes.org/2009/07/blog-post_26.html


اللي الكل وعلى رأسهم نوارة قعدوا يقولولي رد على الاسئلة رد على الاسئلة وهربت ليه ...وبعدين الكل وعلى رأسهم نوارة برضه مقريتش حاجة من اللي انا كتبته

:D

Unknown said...

عم مينا

انت وجعت قلبي قوي لما قلت المسيحيين بقوا يتعاملوا مع البلد على انهم مهاجرين

هو انا ناقصة اكتئاب؟

عم مينا said...

سامحيني يا نوارة ما كانش قصدي والله
بس دي الحقيقة للأسف.. حالة التقوقع بتاعة المسيحيين جوة الكنايس بتفكرني بالظبط بالمسلمين اللي في أوروبا و أمريكا..
أما الواحد بيبقي محاجر برة عادةً بيتلم علي الناس اللي شبهه.. علشان بيبقي حاسس بالغربة.. المسيحيين في مصر بقوا عاملين كدة.. بيتلموا علي بعض و كأن باقي ناس غرب بالنسبة لهم مع إن مشاكلنا واحدة و عاداتنا واحدة و تاريخنا واحد و مفيش حاجة بتفرقنا غير الدين اللي هو المفروض يكون علاقة ما بين الإنسان و ربه أصلاً

يوسف عبد الغفار said...

السلام عليكم
إنما أرد عليك لتشابه الموضوع الذي أوردتيه في مدونتك مع ما ذكرته أنا و حاولت تحليله علي مدونتي الوليدة.
لم يعجبني رد إبراهيم عيسي و لا ردك بتوريط انفسنا في حرق أي كنيسة و ذلك لعلمك عن رفضنا الدائم و الحقيقي كمسلمين عن إيذاء دور العبادةللمسيحيين و بالذات مسيحيينا المصريين.

أرجو القراءة و الرد.
http://yousefabdelghaffar.blogspot.com/2009/12/blog-post_11.html

Shoukry said...

I didn't like making this vote from the beginning as it puts discrimination between people and this should not be.

This stupid act of swiss people will have a bad impact on their life in the future. if they afraid of muslims who perform what is known as "El takkeya" they shouldn't do it this way - here I am not mentioning it against islam, I am just talking about a sort of swiss's national security - they should analyze individuals who act this way and arrest them or return they to their home countries but it seems that it costs a lot of effort and they chose to attack islam easier. Racism!!.

Well, I understand the fear of Europeans of "El Takkeya" especially after the producing the movies "Undercover Mosque" which illustrated what happens in "some" mosques in Europe and the explosions and "El Kaeda" but What is funny, muslims in Egypt accuse christians that they have the same agenda when they ask to build churches. I think this is just fear from the others which cause people to take offensive positions.

I didn't like to disturb you either but what "Mena" told you is completely true. I just wanted to tell you a simple example. when there is a vote about building churches here in Egypt. The ratio will be very disappointing. I bet it will be 95% - 5% not to build churches. even the 10% of the christians will not be collected! this is because

1. The Pope will ask Christians not to vote to avoid clashes and protect peoples' lives and around 50% of the orthodox christians will obey him as they have faith that God will interfere and chose the best from them or they are really afraid of the possible collisions.

2. 50% of the remaining christians will not go either because they don't believe in this vote or they don't trust the administration of the vote or they are careless like all Egyptians nowadays.

The 5% will be the remaining orthodox and other groups of christians and the percent moderate - let me say true - muslims. even many of the muslims who don't believe in this will change there mind just as the advertisement campaign did to Europeans and those who didn't vote in Parliament Elections or Presidential Elections will go and vote.

It is the same story every time. We have nothing to do except forgetting all this sh** about justice and human rights