Friday 25 December 2009

وقفة احتجاجية بنقابة الصحفيين الثلاثاء

 تحديث:
تصحيح الوقفة الاحتجاجية يوم الثلاثاء للاسف مش الاحد حصلت لخبطة الساعة ستة
وانا برغم من اني اتغاظت قوي ان المعاد طلع بعيد كده، وبالرغم من اني يوم التلات عندي حاجة مهمة جدا جدا جدا الساعة سبعة بس ان شاء الله رايحة برضه
مش عشان حاجة غير كلمة قالها السيد حسن نصر الله:
بعض المثقفين عم يقولوا شو جدوى انو ننزل ونتظاهر.. لك انت ياللي قاعد تحت التكييف ما بتعرف شو جدوى التظاهر بس نحنا ياللي بالجبهة بنعرف شو جدواها انو حدا بينزل ويتظاهر لحتى يدعمك
حاضر
على راسي واروحها على رموش عينيا، ده اقل من اقل الواجب
هو ما رضيش يتكلم عن موضوع الجدار المصري خالص، طبعا، ما القبيحة ست جيرانها، اللي هزم اسرائيل بيتقي شر لسانا... سبحان الله، ده الرسول عليه الصلاة والسلام قال على اللي الناس بتتقي لسانه اشر الناس




الثلاثاء القادم القادم الساعة ستة مساء بنقابة الصحفيين لجنة الحريات عاملة وقفة احتجاجية 
وماحدش يتريق ولا يسفه ولا يقل ادبه، لازم تيجوا بقى، مدام بتزعلوا من شتيمة الناس لينا يبقى لازم تيجوا، اعملوا حسابكوا احنا لسة ح نتشتم اكتر، مؤسسات حقوق الانسان والنشطاء الاوروبيين والامريكان لسة بيسخنوا، مش زينا بعد شوية بيزهقوا دول اوبة وح يلبدوا في قفانا زي الاراضة ومش ح يسيبونا الا لما يخلونا ما نسواش تلاتة نكلة، هم دول اللي فضلوا يزنوا على دماغ انجلترا لحد ما امتنعت عن تسليح اسرائيل.. بريطانيا العظمي، اللي اسست اسرائيل نفسها، زهقت من زنهم لحد ما بطلت تسلح بنتها من وشهم، وهم دول (مؤسسات بعينها والله ومعروفة بالاسم) اللي مسكوا تسيبي ليفني خلوها مش عارفة تخرج من فلسطين المحتلة، وقبلها ايهود باراك، وهم نفسهم دول بقى حاطينا المرة دي في دماغهم
اديني جبتها لكم على بلاطة اهو عشان عارفة اننا بقينا كلنا محجوب عبد الدايم ومش هاممنا اننا بنعمل جريمة بس هاممنا اننا نتعاقب عليها
ح نتعاقب، العرب دول امرهم سهل، اخرهم يتنرفزوا ويشتموا وبعد شوية يعيطوا ويقولوا ابو خالد ابو خالد والله يرحم ايام ابو خالد (ابو خالد ده يبقى عبد الناصر لو كنتوا نسيتوه يعني.. ضيع لهم فلسطين وبيحبوه بس عشان لسانه حلو، مش باقول لكوا امرهم سهل)، هبل واحنا حاطينهم في جيبنا الصغير، لكن الحيزبونات بتوع اوروبا وامريكا دول دماغهم سم وميتهم ما يدفنش ولما بيحطوا حد في دماغهم بيخلوه عبرة لمن يعتبر
اديني باقول لكوا اهو، احترموا نفسكوا بقى، شغل التبجيح والزغاريد والشرشحة ده بيخوف العرب بس، ما بيخوفش الخواجات، بيخليهم يعندوا، وحسن حسني قالها كلمة حكمة في فرحان ملازم آدم: اعمل الغلط طول ماهو فيش حد شايفك، لو حد شافك بجح، لو اللي قدامك ما خافش من بجاحتك طاطي
اييييييييوة كده، خليكوا حلوين، انا بقى لا ح اقول لكوا ربنا، ولا ح اقول لكوا انسانية، ولا تاريخ، ولا مصر، ولا دور مصر ولا الكلام الخرا ده عشان ما نضحكش على بعض، احنا لابنعرف ربنا ولا عندنا انسانية من الاخر كده ولا يهمنا التاريخ في حاجة، فلوسك في معاك، سجايرك في جيبك، دفيان ومعاك حق طاقة العشا يولع التاريخ والبلد مش كده؟ 
بس احنا ح ننضر بقى، في اكل عيشنا يعني، شفتوا بقى صراحة اكتر من كده؟ شفتوا بجاحة اكتر من كده؟ 
غير سمعتنا اللي ح تبقى زي الطين، زيادة ماهي مطينة وكل اللي بيشوفنا بيتف علينا، الناشطين الاوروبيين والامريكان لو ما لايمنهاش ح يمسكوا دماغ المستثمرين اللي هنا ويخربوا بيتنا عربي وانجليزي، وكل مصري عايش برة ح يتعامل زي الدبانة اللي واقفة على الزبالة، الاسرائيليين دلوقت ما بيعرفوش يسافروا في اي دورات رياضية من كتر التهزيء والبهدلة، وعشان تبقوا عارفين بقى، اسيادكوا الخواجات متغاظين مننا احنا اكتر ماهم متغاظين من اسرائيل، عشان مش شايفين لينا اي مبرر، شر لوجه الله كده
وقفتكوا الاحتجاجية ح تعمل ايه؟
لا ح تعمل، برضه خلينا نتكلم على مية بيضا، لما يوصل للناس ان فيه عدد كبير من المواطنين المصريين ضد بناء الجدار ده ممكن يحسن موقفنا ويخلي الناس تفتكر، وانا باقول تفتكر يعني لأن احنا دافنينه سوا، ان الشعب ده طيب وغلبان ومغلوب على امره، ومبارك هو المجرم الاثيم والقاتل اللئيم وممكن يراجعوا مسألة معاقبة الشعب كله بذنب مبارك، وما تخافوش من مبارك انه يقول مثلا: كحك، وانا اشيلها لوحدي؟
هو راجل عاقل وما عندوش مانع انه يطلع هو الشرير وانتوا الطيبين حفاظا على الاستثمارات

لكن لما كل واحد قاعد على مؤخرته والكلام الخرا اللي بتطلعوا تقولوا وتكتبوه في كل داهية ده والتليفونات الطين اللي بتعملوها لعمرو خرا اديب، ده ياكل مع العرب ده، ما ياكلش ما اللي بيأكلوكوا، لايموها واعرفوا مقامكوا كده عشان احنا زودناها قوي ونسينا نفسنا.... على نفسها جنت براقش
المرة دي مش العرب الغلابة اللي لسة عايشين على ذكرى ابو خالد وكلمة تجيبهم وكلمة توديهم اللي متصدرين لنا... دول قبائل الفايكينجز اشربوا بقى
تاني، المعاد يوم الثلاثاء  القادم في نقابة الصحفيين الساعة ستة، مش ح يحصل لنا حاجة، ح نروح نناضل ببلاش ونشيل اعلام ونضحك للصورة عشان تطلع حلوة ونغسل ايدينا زي هيرود ما غسل ايديه من دم المسيح ونبيض وش البلد ونبقى واو ومصر لسة بخير
ومعلش... ما عرفتش ادعوكوا للفاعلية بطريقة أأدب من كده، انا قرفانة من نفسي ومنكوا ومن حياتي ومن الدنيا كلها
مالكوش دعوة بقلة ادبي، ماهي الصراحة بقت قلة ادب... اهدوا كده واشربوا لكوا كوباية شاي اخضر واعقلوا الكلام ومافيش داعي بقى لحكاية الكرامة دي، دي مش الجزائر، دي اورمبا والدول المتغدمة، يعني المام يا روح ماما
---
اه.. نسيت اديكوا كام لنك كده يا حلوين
ده وصف لخط بارليف الجديد، بس اللي عاملاه مصر وامريكا واسرائيل بقى المرة دي
زي الزفت طبعا ما اقولكوش، مافيش امل نقنع اسيادنا اللي بيأكلونا ان معانا حق
وعلى فكرة يعني اسرائيل تبيعنا في اول منحنى، اصلا هي خسرانة خسرانة وبتقع دوليا وبتوقعنا معاها، وامريكا ح تعمل عبيطة واحنا اللي ح نلبسها لوحدنا
واللوم القانوني واقع علينا لوحدنا يا عثل احنا يا عثل هيع هيع هيييييييييييييع
يعني قريب قوي ح نبقى ملاحقين دوليا زي اسرائيل
اسفخص

22 comments:

simplymoi said...

Dear sister Nawara

open your eyes to the possibility that your society may not be the perfect world that they once thought it was and run amok with emotions, particularly hatred and fear. When or if the situation should arise, where a person or group of people are confronted with the idea that one day they may not have a turn to speak outright, then they themselves will will turn to the savage behaviour of hatred, fear and corruptibility of the same people that gave rise to their situation in the first place.

I understand that emotion is a huge part in our daily lives. It's the driving force behind lifetime goals, music, art and literature. However, it's also the driving force behind rape, murder, countless massacres in the name of religion and why so many people are coming into this movement with an overwhelming sense of negativity. The wrong message is being portrayed.

My advice is the complete restructuring of your way of life, your thought process and the total abandonment of anything detrimental to our search for knowledge. Nawara try Zeitgeist, it is peace and prosperity, logical thought and self control, sadly that smart girl like you still can't grasp this concept. Stop blaming the government for the country's problems because you are the government. Stop blaming the economy because you are the economy. Stop blaming them and blame yourself and realize that you are the solution. Just change. Open your heart to the truth. You do not the peace I found and faith in changing the society one day.

Anonymous said...

ههههههههههههههه

والله كلامك جاي فوقته، احنا فعلا بقينا تيييييييييييت..

انت بتمسح الشتيمة بتاعتي؟..طيب!..احنا تييييت و تيت و تيييييييت..

طيب..انا هوريك!!

Anonymous said...

على فكرة، واحدة فلسطينية باعتالي الأغنية دي..
http://www.bsmlh.net/gift/ehtef_belnas.mp3

هي رافعة راسها ومبسوطة..
وانا بقى غيران وهطق من الغيرة..
أعمل ايه؟

ماذا تفعلين لو كنتي مكاني؟

Anonymous said...

مش قادر، مش قادر اسكت يا نفسية!!
هطق!!

في بلدي، بيجيبوا الراجل في الاعلانات، مبيرفعش راسة الا لما ياخد حباية اسمها فايرتكا ولا حاجة كدة، وبيقعدوا يقولوا له فرتكها وكلام كدة..لا والاعلان نفسه بيقول انه البلد كلها كدة..وفي توافق بين اعلانات كتير عالموضوع ده، يعني زي حامد كدة اللي مش بيبقى جامد الا بالدوا..

كححححححححححك!!!
هم كلهم موكوسين كدة؟!!

ودي بنت!!..بنت يا نااااس..ورافعة راسها وبتغني كمان ومنغير أي حاجة، كدة من عند ربنا!!

عااااااااااااااااااااا..انا هفرقععععع..هي بتطرقع وانا بفرقعععععع..

يساري فلسطيني said...

متابعينك يا نوارة

و خلينا نشوف اخرتها مع الحكومات العربية و الشعوب المهلبية

.....

تخيلي لو انسان كان فاقد الذاكرة و صحي اليوم و قرأ ماتكتبيه عن دور الشعوب الاورومبية و شعوبنا الهلبية
كان انتحر من التفاهة السريالية

....

اما بخصوص الملاحقة القانونية فانا عندي صديق محامي انما ايه ... ايده و الاعدام ... يعني بقول اذا احتاجوه السخام العرب


تحياتي


ملحوظة : احنا مش هبل لأنه بنحب ابو خالد ... الشعوب تعرف الاصيل حتى لو ارتكب اخطاء.. يمكن مش نبي ... ولكن شوفي الابالسة حولك و ترحمي عليه

حسن مدني said...

عزيزتي نوارة

أشعر بالعار

زمان قالها عبد الحليم قنديل
أشعر بالعار لأنك الرئيس

واليوم

أنا أشعر بالعار

تحياتي

يساري فلسطيني said...

الاخوة العزاء

Ahmed Nasr

و
مدنى حسن

العار و الخزي للحكومات و ليس لكم
انتم الشرفاء ..

تحياتي

يساري فلسطيني

Anonymous said...

معاكى يوووم الاحد
واسمعى دى
http://www.youtube.com/watch?v=gZ2tluarzZs

dr.lecter said...

يارب نعرف نعمل حاجه

هاكون في القاهره يومها وهكنسل الشغل واحاول اااجي

king said...

الجزائرتكشف:ثروات آل مبارك في بنوك العالم 40 ملياردولار



اوردت صحيفة (الخبر(الجزائرية تقريرا واسعا مدعوما بالارقام حول ثروات آل الرئيس المصري، وقالت ان مصادر عليمة للغاية كشفت لها أن أسرة الرئيس المصري محمد حسني مبارك، وهي زوجته السيدة سوزان مبارك ونجلاه جمال وعلاء، يملكون أكثر من 40 مليار دولار كعقارات وأصول في بنوك ومؤسسات استثمارية أمريكية وبنوك سويسرية وبريطانية.

وتشير مصادر الصحيفة إلى أن جمال مبارك،الأمين العام المساعد للحزب الوطني الحاكم في مصر، يملك لوحده ثروة تقدر بـ17 مليار دولار موزعة على عدة مؤسسات مصرفية في سويسرا وألمانيا والولايات المتحدة وبريطانيا، حيث يملك حسابا جاريا سريا في بنك“ يو بي أس'' السويسري وحسابا ثانيا في بنك سويسري آخر هو”آي سي أم”. وتتوزع ثروته عبر صناديق استثمارية عديدة في الولايات المتحدة وبريطانيا منها مؤسسة ''بريستول آند ويست'' العقارية البريطانية، ومؤسسة ''فاينانشال داتاسيرفس''، التي تدير صناديق الاستثمار المشترك.أما السيدة سوزان فإنها، حسب تقرير سري تداولته جهات أجنبية عليا، دخلت نادي المليارديرات منذ العام 2000، حين تجاوزت ثروتها الشخصية مليار دولار تحتفظ بأغلبها في بنوك أمريكية، كما أنها تملك عقارات في عدة عواصم أوروبية مثل لندن وفرانكفورت ومدريد وباريس وفي إمارة دبي. وتتراوح ثروة سيدة مصرالأولى اليوم بين 3 و5 مليار دولار، وقد جنت أغلبها من التدخلات الشخصية لها لصالح مستثمرين ورجال أعمال.



أما علاء مبارك فقد بلغت قيمة ممتلكاته وأمواله الشخصية داخل وخارج مصر 8 مليار دولار، منها ممتلكات عقارية في كل من لوس أنجلس وواشنطن ونيويورك، حيث يمتلك عقارات تعدت قيمتها 2, 1 مليار دولار في شارع روديو درايف، وهو أحد أرقى شوارع العالم، وفي ضاحية منهاتن في نيويورك، بالإضافة إلى امتلاكه لطائرتين شخصيتين ويخت ملكي تفوق قيمته 60 مليون أورو.وقالت (الخبر) في تقريرها: اما بخصوص ابن الفلاح المصري الرئيس محمد حسني مبارك، فقد بلغت قيمة ثروته الشخصية في العام 2001 ما لا يقل عن 10 مليار دولار أغلبها أموال سائلة في بنوك أمريكية وسويسرية وبريطانية مثل بنك سكوتلاند الإنجليزي وبنك كريديت سويس السويسري.



وقدرت مصادر الصحيفة الجزائرية أموال الرئيس مبارك، بما لا يقل عن 15 مليار دولار جنيه أغلبها من عمولات في صفقات سلاح وصفقات عقارية مشبوهة في القاهرة ومناطق الاستثمارالسياحي في الغردقة وشرم الشيخ، وليس مستغربا أن تصل قيمة ثروة آل مبارك إلى أكثر من 40 مليار، ذلك أن أغلب الشركات الكبرى مفروض عليها أن تقدم 50 بالمائة من أرباحها السنوية لأحد أفراد أسرة مبارك، وهذا ما تحدثت عنه صحف ومواقع إلكترونية مصرية، حيث يحصل آل مبارك على 50 بالمائة من صافي الأرباح في مؤسسات السجائر مارلبورو ومترو، وهيرميس وماكدونلدز (منصور)، وسكودا (شفيق جبر)، وحديد العز (أحمد عز)، ودريم لاند)أحمد بهجت) وهي الشركة التي تتبعها محطات تلفزيون تهاجم الجزائر بصفة يومية، وإيه أر تى (صالح كامل(، وفرست (كامل والخولي)، وموفينبيك)حسين سالم)، والتجاري (الملواني(، وفودافون (نصير) سابقاً قبل أن يفرضوا نفس النسبة على الشركة الإنجليزية التي تملك فودافون مصر، وسيراميكا (أبو العنين(، والنساجون (خميس)، وموبينيل)ساويرس)، وهيونداي (غبور(، والأهرام للمشروبات (الزيات(، وسيتي ستارز (الشربتلي والشكبكشى)، وأمريكانا (الخرافي والألفي)، وتشيليز (منصور عامر(وغيرها وغيرها من الشركات الكبرى.

Unknown said...

حد يقول للجدع ده

ggt1230

انت الطيبة والاصل بقوا هبل دلوقت

maher said...

يا ggt1230
الطيبة والاصل بقوا هبل دلوقت البلد دي مبقتش تطلع رجالة خلاص خلصت من زمان احنا خرجنا بمظاهرات عشان ماتش كورة ودلوقت محدش اتكلم واحنا بنقتل مليون ونص بني ادم احنا فعلا شعب الفايركتا

سنابل said...

طيب ممكن يبقي فيه دعوى قضائية لوقف الفضيحة دى زى اللي رفعها النائب بس يتفتح لها التوكيلات من الناس
كل حد لسة عنده بقية ضمير يعمل توكيل
مش عارفة ازاى ده يتنظم ويتنفز ومين اصلا اللي يتولاه
بس باتخيل لو يتجمع كام مليون توكيل كدة ونحاول ننضف بقى

مش عارفة ده ممكن ولا باخرف

masrawy ala tool said...

‬أعلن بعض نشطاء حقوق الانسان الاوروبيين اعتزامهم تنظيم حملة في‮ ‬مختلف أنحاء أوروبا تدعو الي‮ ‬مقاطعة السياحة الي‮ ‬مصر والمنتجات المصرية احتجاجاً‮ ‬علي‮ ‬اقامة السور الجديد‮. ‬أكد الناشط البريطاني‮ ‬أرلو سيليفا بحث اقتراحات لمواجهة أعمال بناء سور الحدود المصري‮ ‬ومن بينها الدعوة لمقاطعة السياحة والبضائع المصرية بهدف تشكيل عامل ضغط علي‮ ‬القيادة المصرية‮. ‬اتهمت الناشطة البريطانية ناعومي‮ ‬جيفري‮ ‬الحكومة المصرية بارتكاب‮ »‬جريمة حرب عن طريق فرض الحصار والتجويع ضد سكان قطاع‮ ‬غزة الابرياء بالاشتراك مع اسرائيل‮«. ‬وقالت‮: »‬ليس من المعقول أن‮ ‬يذهب الاوروبيون للسياحة والمتعة في‮ ‬مصر لدعم اقتصادها علي‮ ‬حساب أرواح الابرياء

مواطن مصري said...

نوارة ارجعي ل ارشيف المدونة و افتكري موضوع الاتفاق الامني

بتاع امريكا و اسرائيل دون علم مصر

و فكري بان الجدار ممكن يعوق الاتفاقية دي

Anonymous said...

إزاي الجدار يعوق أمريكا عن تنفيذ حاجة عايزة تعملها في مصر..؟
هي مكالمة تليفون للقصر واللي عايزاه أمريكا حيتعمل
الجدار بقه بروح امه حيقطع التليفون..؟

Anonymous said...

دي اخره الجواز العرفي من اسرائيل

الفضيحه وكمان الحبس قريب

تحياتي

mido said...

حبيبك
عامل حوار
:)


المخرج الفلسطيني (إيليا سليمان): بعض النقاد المصريين اتهموني بالتطبيع رغم أن دولتهم بالكامل تنتهج سياسة التطبيع.. فليتحدثوا مع «مبارك» أولاً ثم يحاسبونني فيما بعد

وصف معظم الأفلام التي تتناول القضية الفلسطينية بأنها مصطنعة وتحمل قدرا من الانتهازية ولا تخدم القضية

يساري فلسطيني said...

نوارتنا

ممكن رايك في ال ايميل اللي بعثته ليك بخصوص موضوع اشرف مروان

تحياتي

Unknown said...

يساري فلسطيني

انا بعت لك الميل

انت ما وصلكش؟

يساري فلسطيني said...

تحياتي يانوارة

ارسلت الرد

مع خالص شكري لجوابك

Anonymous said...

رائعة بحق سيدتي.
هل لي بضافة مدونتك عندي؟