Sunday 27 December 2009

يادي النيلة ما عندناش منتجات تقاطعوها

حد يفهمهم دول تجليات حكمة الرئيس اللي خلانا ما عندناش منتجات عشان لما حد يحب يقاطعنا يتحبس دمه وما يلاقيش حاجة يقاطعها
وبرضه لما نحب نقاطع حد ما نعرفش نقاطعه بايه؟ يعني مثلا لما حرمنا الجزائر اللي افلامها بتتمثل في مهرجانات عالمية وبتاخد جوائز من فيلم امير البحار اكيد يعني ما ناموش الليل
واحنا ناويين نحرم غزة من فيلم امير البحار برضه، لا ده احنا قاسيين قاسيين
وحلقة العاشرة مساء النهاردة استضافت مواطن ومخبر وحرامي، المواطن هو حسن نافعة، وفيه بقى اتنين كان مخبر وحرامي
انما قالوا ايه؟ كلام لوز، الحمد لله ربنا مسلط عليهم غباوتهم لدرجة ان واحد اتصل وقال: يا استاذة منى انا واحد بالاعدادية، ياريت بقى تفهمونا كده بالراحة احنا عدونا غزة والجزائر وسوريا وحبيبتنا اسرائيل؟ اصل لو كده فهمونا يعني، ماهو الكلام مالوش معنى الا كده
وانا ما اعرفش حسن نافعة ماله فتح بقه وذهل كده ليه؟ الراجل جات له كتمة من الكلام اللي اتقال
قال ايه ياخويا، طلعت حماس دي بقى ايه؟ اسمع:
اولا بتهرب سلاح الى داخل مصر.. لا مش منها، بتدخل لنا احنا سلاح، بتجيببه من انهي داهية وهي اصلا مالهاش منفذ غيرنا؟ دي كلها تفاصيل صغننة
ثانيا بتدخل لنا نسوان روسيات بيشتغلوا في استغفر الله العظيم الدعارة، ولما حد يكلمها تقول لهم انتوا ازاي تشتشهجموا على الناس في بيوتش الدشعارة؟ البلد مليانة كانون
ثالثا بتعمل لنا دماغ، بتدخل لنا حشيش وبانجو وهورايين وكودايين وسرنجات
وغالبا هي اللي ورا انتشار انفلوانزا الخنازير، وهي حماس اللي عدت من النفق تحت البحر الاحمر وراحت رابطة العبارة في حجر وربطت الحجر في بق حوت وراحت مولعة في ديله قام الحوت جاري والعبارة غرقت، وهي اللي نشرت فيرس سي، وهي اللي شخت لنا في المية فبقينا نشرب مية بمجاري وناكل خضار مسقي بالمجاري، وهي اللي تفت لنا في الفراخ قام تفتهم خلت الفراخ تبرد وجابت لهم انفلوانزا الطيور وهي اللي قتلت الجيش المصري وهي اللي عذبت عماد الكبير وهي اللي رمت لنا عمل على العتبة وقفت حالنا وهي اللي نبرت علينا وخلت النفس تمسكنا وهي اللي خسرتنا في ماشت الجزائر، وهي اللي خلت الواد الجزائري يقلع المنطلون لفردوس عبد الحميد ويعورها في عقلها الباطن، اصلا بيقول لك ان الجزائريين دول بربر زي ما احنا عارفين، والبربر دول اصلا غزاوية بس مش قايلين، ولعلمكوا الهكسوس دول اصلا من غزة، والحيثيين كمان وهي السبب في حالة العته اللي صايبانا والكل ملاحظها، دعت علينا وقالت: الهي تبقوا فرجة العالم يا بعدا
وعليه، فاي انسان بيحب مصر واسرائيل وبيكره الجزائر وفلسطين يبقى مواطن مصري اصيل ولازم يقف مع سد يأجوج ومأجوج
عشان الفلسطينيين دول ح ياكلونا... يامي يامي يامي يامي، ح ياكلنا العو يامي
ودول بيستهبلوا، قال جعانين قال، دي سهوكة، دي عيال صايعة ومعاها مخدرات ونسوان روسيات
مع ان، والله العظيم، والله العظيم، والله العظيم، الصحف والمدونات الاسرائيلية هي اللي قالت ان الاسرائيليين هم اللي بيبعتوا لنا مخدرات وروسيات وبونيات وكل حاجة، بس احنا عارفين ان اسرائيل بتضحي بنفسها عشان غزة تعيش، واحنا ما نرضاش ان اسرائيل في انكارها لذاتها تظلم نفسها بالطريقة دي
ومصر كبيرة، كبيرة كبيرة كبيرة كبيرة كبيرة كبيرة كبيرة، بتاعة خمسين طن كده لا وطول بعرض يعني
وفرنسا بتحبنا، وبتساعدنا مع امريكا واسرائيل اننا نبني الجدار ده ده جدار جامد جامد، زي خط بارليف، اه، احنا هدينا خط بارليف ونرجع نبنيه تاني امال انتوا فاكرينا ايه؟
ده احنا جامدين قوييييييي
انا باحبك قوي يا عووووووكل، يا مسيطني، عمرنا ما اترمينا في مزبلة التاريخ زي ايامك كده
اتارييييييييييييييييييك يا عكرووووووووووووت عملت موضوع الجزائر ده بروفة ومررت في وسطه على لسان ابنك: طظ في القومية العربية، كفاية بقى، ينعل ابو غزة (ده في النص كده والجزائر بتتشتم) احنا المصريين والمصريين احنا ومش عايزين حد يحبنا كل الناس بيكرهونا
انت بتحضرنا يعني عشان لما كل الناس يكرهونا ما نتصدمش؟
بس الشهادة لله يا عوكل الناس المرة دي مش بالعة موضوع الجدار ده، تصدق بالله؟ يعني هم ظلطوا موضوع الجزائر واتكرعوه، بس المرة دي انت اديتهم على قفاهم يا عوكل كالعادة، زي حكاية العلاوة كده، تسخنهم وتطلعهم ومرة واحدة تروح لاسعهم على قفاهم وتسيبهم فاتحين بقهم وريالتهم نازلة على صدرهم، ده كل الناس يا عوكل، كل الناس حتى اكثر الناس توحشا ايام الجزائر صايبهم الهلاهوطة ومش مصدقين نفسهم، وابتدوا يقولوا الحكاية بدأت من ايام الجزائر كان بيحضرنا
معلش احنا اصلنا زي الحمار اللي ضحك على النكتة بعد يومين، ما انت اللي رابطنا في ساقية وعلى ما بنفهم بتكون خربت مالطة من اللي انت عامله فينا
الا يا عوكل انت نهايتك ح تبقى ازاي؟ انا نفسي اعرف ربنا ح يعمل فيك ايه؟ وللا هو سايبك خلاص كده بيعذبنا بيك ويجعلنا عبرة خلقه من خلالك؟ وللا انت مستر اكس مالوش نهاية؟ انت عمال يا راجل تصغر تصغر تصغر تصغر لما ح نلاقيك بتاكل سيريلاك وقاعد على البوتي بتعمل إإح.
روح يا شيخ.. وللا ح تروح فين انت شكلك مش رايح في حتة.. اروح انا بقى

13 comments:

بهيج الشرير said...

إيه ده ياأبلتي!! إيه الواد أبو طياز إللي بيغني ده!! أنتي بتجيبي الفيديوهات دي منين؟ وبعدين كلمات الأغنية متحرفة، لأنه المفروض بدل مايقول لعوكل وبدل التبن مربى كان يقول وبدل التبن فياجرا

رامز عباس said...

http://www.facebook.com/group.php?gid=386188280178&ref=mf


ده يا فندم رابط جروب عالفيس بوك نشرت رابك مدونتك فيه وطالبتهم بمتابعه مواعيد الوقفات بمدونتك


وأن شاء الله نشوفك يوم الثلاثاء لانى حقيقى اتلخبطت في العادين اللى ذكرتيهم



بالتوفيق يا نوارة



وللعلم لازم نوسع نطاق الاحتجاج

لازم نغير الاساليب ولا ايه رأيك

lastcrazyboys said...

سؤال محـــوري .."معلش لو كان بعيد عن موضوعك" بس هو مؤرق لي بقاله فترة

اول سطر في الخبر ده
http://www.elaph.com/Web/NewsPapers/2009/12/517224.htm

والسطور الاولى هنا
http://news.egypt.com/arabic/permalink/280609.html

=== ايه العـــلاقة بينهم
....!!!؟؟؟؟؟

Rateb said...

دى حكومة احتلال ولازم نتعامل معاها على الاساس ده هو ده الواقع والشرطة والجيش دول اعوان الظلمة هل فيه شيخ يقدر يطلع يقول الكلمتين دول هل فيه اى حد معارض فى البلد يقدر يعمل الدعوة دى انهارده لا اظن سبحان الله مع انى شايف انها حقيقية

حسن مدني said...

كثير جدا من الشخصيات ماتت وذهبت إلى مزبلة التاريخ

التجديد الحقيقي إنه يروح مزبلة التاريخ وهو عايش

هو ده التجديد

تحياتي

طنطـــا واى said...

بتحط نفسك فى مواقف بايخخخخخخخخخخخخخخة ؟؟؟

بتقولى ( الا يا عوكل انت نهايتك ح تبقى ازاي؟ انا نفسي اعرف ربنا ح يعمل فيك ايه؟ ؟؟؟؟

انا سألت نفسى السؤال دة بمناسبة مرور سبعين سنة على الميلاد الغير مجيد ... على اساس انة سؤال طبيعة ومطقى لان متوسط عمر الانسان 65 سنة وبعد السبعين نيتدى نظبط .... وايامها كنت شاب حليوة مقبل على الحياة وعندى شعر مش عارف اودية فيين .... الان وبعد 15 سنة وبعد ضياع الشعر والشعر بفتح وكسر الشين اكتشفت ان دى الحاجة الوحيدة التى بلا نهاية

اهل اللى جابوا اهلى كلهم بيتحاسبوا عند ربهم وانا وبناتى واحفادى عمرنا الافتراضى قرب .. وانت نفسك حنشوفلك نهاية قريب زى اى حد طبيعى

يا امنا وام مدونات الدنيا انا اللى مزعلنى انى بقيت اقرع والشوية اللى فاضليين لونهم ابيض ... وعوكل معايا من يوم امتحانى فى الابتدائية والست شادية بتغنى اغنيتها الجديدة ياللى من البحيرة ويياللى من اخر الصعيد وعوكل لو مش خايف من الحسد كان عمل شعرة بالعند فية وفيكى زى الواد اتش دبور




لما تحبى تسألى أسالى فى حاجة منطقية معقولة وليها أسباب علمية ... اما نهاية عوكل لم تثبت فى اى موقع دينى او طبى او تربى

شمس العصارى said...

انا عارف اخرته ايه يا نوارة
جبتها من الكنترول
"و بعد ده كله زعلان من اوضة 20 "
ههههههههههه
بيقولوا ان مبارك لقى نفسه فى النار و مكانه فى اوضه 20
فقال لنفسه مبدهاش بقا هنا مفيش هزار انا اروح اوضه 20 دى و خلاص هنا مفيش شرطة و جيش و حاشية يحمونى
المهم مشى يدور على اوضه 20 و فضل ماشى كتير لما تعب و اخيرا لقى واحد فقال لما اساله فين اوضه 20 يمكن اكيد هو من سكان النار و عارف
قام الرجل رد و قاله " يخرب بيتك ده انا ابوجهل و داخل اوضه 7 .......... هو انت عملت ايه بالظبط لما تدخل اوضة 20 "
تفتكروا بعد الى عمله مبارك فى شعبه من نجويع و ظلم و ازلال و اعتقال و بعد الى عمله مع الغزويين من حصار و تجويع تفتكروا يبقى مكانه اوضه كام ؟؟؟
لو بايدى احطه فى اوضه 20بعد المئة مش 20 وبس
و ان شاء الله جدران اوضه 20 بعد المئة تكون اقوى من جدران الجدار الفولاذى على حدود غزة ..
و يبقى يقابلنى لو لقى نفق يطلع منه
19/12/2009

soreal said...

مبتنتجوش؟ أيه ده؟ رد عين؟

ده البامية و ألملوخيه اللي بتجينا كلها من عندكو
أنأ ما بستمخش إلا عا الجوافه والمنجا ألمصري
ولما أشرب عصير... لا يروي ظمأي إلى عصير انجوي

ومني عيني أجي في يوم كده ألاقيهم جايبين عصير قصب كمان P:







هذا التعليق رحمه علي روح والدي ...

مواطن مصري said...

سعد الصغير على اخر الزمن لا حول ولا قوة الا ب الله

saadeddine said...

والله شيء يدمي القلب :( فعلا
بالتوفيق لكم ودعواتنا لكم بالنصر إن شاء الله

Unknown said...

Egypt exports several fruits and vegis to Europe and the GCC (were they sell for more btw). There are also several brand-names that produce their textiles and clothing stuff in Egypt but the labels do not always reflect that, it varies. Also, Egypt ranks as one of the top destinations to European tourists and I have to say they have been doing amazingly good despite the recession, even the ads to visit Egypt that have been running on UK transport systems for this year were very well-made.

Dnt you think it would be more productive for those Europeans to pressure their own governments to accept Hamas as the elected power, return their monitoring personnel to the Rafah crossing & support Egypt's decision to open the Rafah crossing normally (which allows for closing the tunnels), which would allow the crossing to be reopened? I guess its easier to pick on Egypt, even though she's not the only bad side in this whole fiasco & even though its the Americans and the Europeans who supported the rejection of Hamas from day one.

As far as I know, you are a journalist and I take it that part of your job is to check info and facts for the stories you decide to cover!

الجمل said...

ايه ياعم ده انت داخل سخن كده ليه ده الراجل اداكو العلاوة باليمين ورجع اخدها بالشمال عشان ماتجيبوش اكل كتير كتير كتير تقوموا تتخنوا ويجيلكوا السكر بعيد الشر بعيد الشر انتوا كده دايما قاريين عوكل غلط اخس عليك

Anonymous said...

افرح ام احزن!!
لا أجد سببا للفرح ؟؟
فالضرر من كل الجهات
تقريبا معظم تعليقاتي على المدونه
.ستكون "إنا لله وإنا إليه راجعون