Thursday 24 December 2009

الاسرائيليين بيخنقوا غزة.. واحنا معاهم

بما ان موضوع الجزائر ده صدمة عمري، وعمري ما ح انساه، وبصراحة اكتر عمري ما اسامح الشعب المصري الشقيق على اللي عمله في شعب الجزائر اللقيط عايزة اعرف علاء مبارك ح يعمل ايه في الحملة الاوروبية لمقاطعة مصر؟
(اه ما نسيت اقول لكوا ان علاء مبارك مسيطر على كل مراكز الغيظ في مخي)
واحب اكرر تاني ان اثناء حرب غزة السنة اللي فاتت علم مصر اتحرق في واشنطن، لندن، سيدني
الخبر اللي فوق مادو جابهولي وفيه اخبار تانية بقى زي ان مصر مثلا تقول مش ح اتكلم في الموضوع ده وبعدين ترجع تقول لا مش بنبنيه ولا حاجة، تصدقوا، والله لسة قريب يعني قايلة مش بنبنيه ده غير منع مسيرة غزة
طبعا هو الشعب الاوروبي الشقيق بيعمل كده عشان موضوع الحصار والجدار ده اللي حكومتنا كل ما نقول لها إإ تقول: تؤ تؤ تؤ تؤ...ماحدش يكلمني في الموضوع ده خااااااااااااااااااااااااااااااالص دلوقت.. سيبوني ارجوكوا سيبوني في اللي انا فيه
انا مش فاهمة يعني كل ما نكلمهم يقولوا ماحدش يتكلم في الموضوع ده خالص، ههههه كان عندي واحدة صاحبتي جوزها كان بيخونها، والله الحكاية دي صحيحة، فطبعا بعد ما قفشته كذا قفشة وبتاع، بقت تدور في الموبايل بتاعه تلاقي نمر الحريم اياهم، تقول له: ايه النمر دي ياراجل؟ يرد عليها، والله العظيم، بالظبط كده: لالالالالالا ارجوكي ارجوكي ارجوكي.. ويسيبها وينزل من البيت
بس انا مش غايظني في ده كله غير كلمة واحدة: مصر من حقها تحمي امنها القومي.. من الغزاوية، من الجعانين والعيانين
وانا ما اعرفش دولة بتحمي امنها القومي بانها تعمل جدار فصل عنصري
وبعدين الشهادة لله، الشعب المصري الشقيق، هو شراني ويحب الاذية زي عينيه وكل حاجة، بس الشهادة لله المرة دي والله متضايقين، متضايقين من موضوع الجدار ده، حتى سواقين التاكسي بتوع علاء مبارك، ومش شايفين اي حماية لمصر ولا حاجة، وفيه برلماني مصري رفع قضية على الفولاذ ونتائج استطلاعات الرأي بتقول ان اغلبية المصريين الجدد متضايقة من الجدار ده، ييجي واحد يقول لي: خير ان شاء الله، يعني ح نشوف الشماليل بتوع مظاهرات الجزائر نازلين يعترضوا على الجدار
ح ارد عليه واقول له: ارجوك خليك صريح، كفاية كده تجريح
هي اسرائيل دخلت كاس العالم وطلعتنا؟ ايه لزومها النزول في البرد ده؟
احسن، يارب الاوروبيين يولعوا في علم مصر كمان وكمان قدامنا كده وانا عارفة ان مافيش حد ح يفتح بقه زي لما ما فحتوش بقهم في يناير اللي فات لما حرقوه في لندن، يارب يعملوا علينا حملة مقاطعة ويقولوا علينا ما قال مالك في الخمر، ده كل المقالات اللي بتتكتب على مدونات وصحف في اورومبا والدول المتغدمة دلوقت ما بتقولش علينا غير خونة، وكلام روبرت فيسك بتاع: المصريين دول يصلوا ويسرقوا ويصلوا ويرتشوا ويصلوا يعذبوا. اتعمم والله على كل المقالات دي
احسن احسن احسن، اهو جالنا اللي يشتمنا ويدينا بالجزمة وما نعرفش نفتح فيه عملا باخلاق القرية اللي علمها لنا الرئيس الممحن بصل الحر والصنان انور السادات اللي اسرائيل ح تحتفل بعيد ميلاده وتعمل له ميدان باسمه في حي مناحم بينجن والمقروصة رقية ما فتحتش بقها، انا عايزة اسمع صوتها تاني عشان مالهاش عندي غير القبقاب بقى والسفارة المصري بتحضر الاحتفال وعلى الله جيهان تحضر الاحتفال هي كمان، ماهي صحابها الاسرائيليين اكتر من صحابها المصريين
على رأي الباشا اللي قال: بكرة الخواجة ييجي يأدبكوا
وروني بقى ح تحرقوا علم الاتحاد الاوروبي وتقولوا "... امك" يا اوروبا وعلاء مبارك يقول لسفراء الاتحاد الاوروبي لو عندك كرامة امشي ازاي؟


12 comments:

Fatma said...

انا محرجة



اوي

ola said...

شفتي التعليقات على موضوع الفولاذي في المصري اليوم؟ أنا كل يوم أدخل أقرا وأعيط ، واحد يقول فلوسنا وسلعنا المدعمة ومش عاوزينها تتهرب (على رأي إبراهيم عيسى : عاوزين ناكل) وواحد يقولك لو أخوك ماينفعش يدخل من غير استئذان واللي يعمل ناصح بقى يروح يتكلم عن إيران و الأجندة و الكراسة و الحاجات دي
كذا مرة أسيب تعليق أسأل فيه الناس اللي بتكتب الأجندة أقولهم هي الأجندة دي مكتوب فيها إيه؟ محدش يرد عليا
أنا مش زعلانة على الناس في غزة
أنا زعلانة على الناس في مصر أكتر
حسبي الله ونعم الوكيل في اللي وصلهم للحالة دي

Unknown said...

و الله يانوارة انا حاسس ان رقبتى بقت قد السمسة

مش من اخواننا الفلسطنيين فهم ستر وغطا علينا وجرحنا جرحهم واللى خناقنا هو بسحنته وغباوته وشلاضيمه اللى خناقهم

لكن انا رقبتى قد السمسة من اخواننا فى الله شرفاءالاوروبيين الذين يلقوننا كل يوم درساً فى الأنتصار للإنسانية والكرامة ورفض الخضوع

وهى ذات القيم التى تخلينا عنها هنا وبتنا نتعامل مع حصار الفلسطنيين وكانه امر واقع لا قبل لنا به او كان كائنات فضائية هى التى تقوم به وليس عملاء وخونة من بنى جلدتنا يجب ان نتصدى لهم وندفع ثمناص قبل ان نقول معذرة إلى ربنا

يساري فلسطيني said...
This comment has been removed by the author.
LMUUM said...

Eh el Kalam Da!!!!!
Wallah eno el Masreyyeeen 5alas ma ba2ash 3endoko 3a2l Tfakkaro Beeeh!
Rabenna Yhawwen 3aleena el ayyam elli Gayyah..
Hayla ya Nawara , Osloob Raheeb bs el Ma3loomat Arhab o elli Gay Lessa Arhab o Arhab o Rabbena Yostorrrr :S

شمس العصارى said...

لما الاخوان عملوا قافلة مساعدات و النظام منعهم ورفعوا قضايا و ظلوا ينادوا ............. لكن للاسف ولا حد سمعلهم و لا حد وقف جنبهم مش علشانهم لا علشان اهل غزة علاقة الكلام ده بالموضع هنا ان : لو الاخوان بمساعدة جموع الشعب وصلوا مساعدات لغزة و كسروا النظام فى النقطة دى مكنش النظام جازف النهاردة و عمل سور او غيره
اذن كل ما يدور عن فلسطين و غزة ما هو الا كلام
الكل يتكلم ولا احد يفعل
انا بستغرب ان لسه الناس بتنادى و تستعطف النظام المصرى
انا من رايى ان الناس عاوزة تلوى دراع النظام .... لكن النظام ملوش دراع ............... النظام ليه رقبة تتكسر
نلتقى بعد الكلام

☼♫♪ عمــاد الدين يــوسف ☼♫♪ said...

بصراحة ومن غير نحنحة فارغة .. كل انسان وصل لحواسه خبر حصار غزة من تلت سنين ، مشارك الانظمه والصهاينة في الحصار ، وانا اول فلول العار دي ، حد سأل نفسه هل لو احنا اللي اتحاصرنا كده هنعمل ايه ؟ طبعا الجواب على طبق دهب ( وشغال معاه بلاي باك اغنية ياحبيبتي يمصر) هيكون أحا يجدعان دحنا نكلوهم بسننا .. طيب احتين على احة الجواب ، لما احنا معتبرين الفلسطينيين عموما والغزاوين خصوصا اخونا ومن دمنا واللي يمشي عليهم يمشي علينا وكل الهجص ده عملنا ايه ؟ ييجي الجواب على صفيحه صاج (قاعد عليها عيل بيشد قله وبلاي باك اغنية موطني _لو مش عارفها هتلاقيها عندي على المدونة :) اي خدمه ) طبعا هييجي الجواب ولا حـــاجة ... يبقى نتلهي ونعرف اننا مشاركين من اول فلوسنا اللي بيتبني بيها الجدار مرورا بحديد القزعة احمد عز وليس اخيرا غازنا

من الآخر احنا بقينا واطيين جداا

شمس العصارى said...

http://www.ashefaa.com/play-14228.html
خليها من ضمن الكلام
جت عليها يعنى

مواطن مصري said...

و النبي انا مخنوق من بتوع اورمبا


دول يا نوارة
يعني يتشطرو علينا

طيب ما يتشطرو على البضائع الاسرائيلية

مثلا

ولا بتاع حماس يروح يتشطر على الجدار الي عندهم

و بعدين

سؤال

هو احنا عندنا بضائع عشان تقاطع

؟؟

هيقاطعو اية

بقى

دة نص 95 في المية في السوق استيراد

مواطن مصري said...

و بعدين يا نوارة انتي كمصرية

هل ترضي ان الغرب يفرض عليكي عقوبات

هل ترضيها لنفسك

ادعي على بلدي و اكرهة الي يقول امين

احمد العربي said...

سلام يا نوارة.... صوت عاقل في وصت الزحمة والغوغاء اللي حوالينا بشكرك على كلماتك وبتضامن معاكي في حسرتك على بلدك العظيم بلد الشهداء والقادة والرواد فعلاً أنا بتضامن مع المصريين الشرفاء، لأنو بصراحة الجدار سيضر مصر والمصريين أكثر من الغزاوية بكتير، تعودنا في غزة على البؤس والحصار والقنابل، يقولون في غزة لن يصيبنا أكثر مما أصابنا في حرب غزة الأخيرة ولكن نقاط بسيطة أحب أن أضيفها
أولا: يحق لأي دولة ممارسة السيادة على أراضيها ولكن على تلك القيادة أن تمتلك الجرأة لأن تقول ذلك على العلن ولا داعي لأن ننتظر صحافة العدو لتخبرنا بذلك هل كانت القيادة الحكيمة صاحبة الرأي السديد تعتقد أنها ستبني هكذا جدار دون أن يشعر بها أحد عجباً من سداد رأيهم
*****
ثانياً: أين السيادة في تنفيذ فكرة إسرائيلية بأموال أمريكية وتقنية فرنسية على أرض مصرية لخدمة المصالح الصهيونية، لم أسمع أو أرى مثل تلك السيادة يا أصحاب السيادة والريادة في كل شيء
*****
لا شك أن بعض الكتاب والصحف ستعترض على الحملة لمقاطعة البضائع المصرية وسيعتبروها غير قانونية وربما غير إنسانية لأنها قد تؤثر على الحالة الإقتصادية لبعض المستفيدن من توريد تلك البضائع من التجار المصريين. ولكن ألم يفكر هؤلاء في حصار شعب وفي حالتهم المعيشية؟ وكيف تكون مقاطعة البضائع المصرية جريمة بحق مصر ولا تكون محاصرة شعب بأكملة جريمة؟ بل هي عمل طبيعي ويعني مصالح مصر العليا
******
الأوروبيين
مازالت قوافل دعمهم مستمرة عبر الحدود العربية وقوافل الأمل مستمرة لدعم أهل غزة في مصابهم الكبير بزعمائهم وزعماء جيرانهم الأقربون
ويجب أن نسجل لهم أيضا تقرير جولدستون والحملة السويدية للتأكيد على القدس عاصمة مشتركة( رغم التحفظات) ولكنهم تحركوا على الأقل ولا ننسي خوف لفني من دخول لندن في حين أعلنت تللك الملعونة الحرب على غزة من قلب قاهرة المعز.
ربما السبب يعود لأن الأوروبييين يحكمهم بشر، ناس عادية ولا تحكمهم آله منزهة عن أي خطأ
قديما بنى المصريين الأهرامات لتكون قبوراُ لملوكهم وحديثاُ بنى المصريين الجدار ليكون ضماناً لوصول وريثهم للحكم.
لا أنفي حنقي الشديد على الوضع الذي تمر به الحالة الفلسطينية و جل غضبنا يصب على قياداتنا الغبية في سياساتها وفهمها للواقع الحالي ولا شك أن سوء تصرف من يدعون قيادتنا قد جلب لنا الكثير من المآسي والمهالك ولكن لا يجب أن يكون ذلك سبباً لأن نغفل أن تصرف الحكومة المصرية في مسألة الجدار هو عمل منافي للأحلاق ولا يخدم أبداً مصر ومكانتها ودورها حالياً وفي المستقبل ولا عجب أن دهاء آل سعود وباقي آلات الخليج من موضوع المصالحة وفض يدهم من شؤون فلسطين لتوريط النظام المصري وحيداً في مستنقع إدارة الحرب على حماس وقطاع غزة وفق التخطيط الصهيوأمريكي ربما لمعرفتهم مدى حاجة الحكومة المصرية في هذا الوقت بالذات للدعم الأمريكي في تثبيت الوريث
******
على المحرجين من المصررين أن يلتمسوا العذر لغضب الناس في غزة ولكن أهل غزة يروون الجدار كحبل آخر يلف على أعناقهم وكأن السنوات الماضية لم تكن كافية لخنقهم وقتلهم لذلك ستسمعون ربما بعض ما لا يروقككم عن بلدكم ولكن إلتمسوا لنا الأعذار
********
بالنسبة للشوفينين المصريين وبالرغم أنا ما بحب أدخل في هالأمر، أذا إنتو بتقولوا مصر للمصريين وطز في العرب كلهم وطز في فلسطين لانو قدمنا كتير وما خدناش منهم الا الشتيمة وبتقولوا أيضاً مصر أولاً حتلاقوا برضو في الطرف الأخر اللي حيقول نفس الكلام عن بلدة وعن شعبة وعن حبة لبلدة ومصالح شعبة وأنا بعتقد أنو لا أنتم ولا هم ستستطيعوا تمزيق العلاقة العضوية بين مصر وفلسطين وخصوصاً غزة
ولكن أوكد مرة أخرى أن بناء الجدار يضر مصر أكتر من غزة وغزة راح تعيش بعد الجدار كما عاشت قبل الجدار وربكم كريم

sal said...

احييك يا نوارة"على فكرة بنتى اسمها نواره"" من كل قلبى وعقلى
وتحية اعجاب كبييييييرة لتميم الرغوتى
ويا ترى بيحبونا ليه وبيكرهونا ليه
اييييييييييييييييه