Tuesday 22 December 2009

وانا كل ما اقول التوبة ترميني اسرائيل

ينعل ابو شكلك يا سادات ع المسا، الهي يبقوا معلقينك من حواجبك هناك وبيشووك لحد ما تتفحم ولا حتى تنفع كفتة تاكلها الكلاب، الله يرحم اللي قتلك ويتقبله في الشهداء بس انا زعلانة منه، اتأخر قوي، استنى لما المصيبة حصلت؟ طب كلنا ايه احنا وشربنا عليه مية؟

انا كل ما انسى الراجل ده يرجعوا يفكروني بان كل مصيبة وكل كارثة في حياتنا هو السبب فيها، اسرائيل بتخلد ذكراه وفاء للخدمة الجليلة اللي عملها لها بانه خصا لها مصر وخلاها ما تسواش تلاتة نكلة في سوق الكانتو وقلعها مالط كمان عشان الناس تتفرج على عملية الاخصاء وتضرب كف على كف، الله يخرب بيته، ربنا ياخده كمان وكمان، الواحد يصحى على خبر مهبب زي ده، عشان احنا اصلنا ناقصين فضايح وعار وكسفة، ده الدنيا كلها من اقصاها الى اقصاها غرقت وشنا تفافة، ده العلم المصري كل ما حد يشوفه بيحرقه، اتحرق في واشنطن، واتحرق في سيدني، واتحرق في لندن، الجزائر ما كانتش بدعا من الامم يعني، بس طبعا ده تراث الرئيس الراحل اننا ناخد بالجزمة من الخواجات ونقول كمان ولما واحد عربي يفتح بقه نخلي اللي ما يشتري يتفرج عليه، مش ده علامه؟ مش دي ربايته وقيمه؟ بعد كده الناس ح تولع فينا احنا شخصيا، والسفير المصري ح يحضر الاحتفالية كمان، طبعا، ماهو لولا المجحوم ما كانش هو بقى سفير ولا كان ريسه بقى وزير ولا كان ريس ريسه بقى رئيس وزرا ولا كان ريس ريس ريسه بقى رئيس جمهورية ولا كان ولاد ريس ريس ريسه بقوا رجال اعمال وزعماء واحد زعيم الكورة والتاني زعيم الحزب الوطني وعاملين علينا كماشة من كل ناحية

وح يحطوا اسمه على شارع بس؟ انا باقول يحطوه على ماركة لبسة كمان ده انسب مكان لاسمه، وبرضه يلبسوه للسفير المصري ويعمل بيه ديفيليه ويمشي يتمشكح كده بيه على المسرح والاسرائيليين يصقفوا

على الله ساداتي من اللي قالعين مالط وبيعايروا اللي لابسين هدومهم بانهم لسة لابسين يعدي من هنا عشان ياخد اللي فيه النصيب هو والست والدته واللي خلفت والدته، ماحدش من الاشكال دي يعدي عندي تاني، مافيش اختلاف في الرأي في ام المدونة دي هنا، انا باكره الاختلاف في الرأي خلاص، بالجزمة هنا، ده مش اختلاف دي بجاحة عاهرة بتعاير واحدة شريفة بانها عانس، والعاهرة مالهاش عندي غير الجزمة، ح اشأمظ امها واطلع عليها كل قرفي، مافيش في المدونة دي واحدة لابسة بدلة رقص وفي بيت دعارة، فيه بوليس اداب، الناس تسيب صدقة جارية وده سايب لعنة وفضيحة جارية منه لله ومتخلفين ربايته كمان وبقى كل وسخ ذكي ونبيه وكل شريف حنجوري زي قوم لوط لما قالوا: اخرجوا آل لوط من قريتكم إنهم أناس يتطهرون

هم الاسرائيليين بيفضحونا تاني ليه؟ مش اشتروا البلد بحكومتها وخلاص؟ وعمالين نبني لهم سد يأجوج ومأجوج اهو؟ واعدمنا لهم آخر راجل في البلد دي من تمانية وعشرين سنة عشان قتل لهم حبيبهم اللي عايشين على ذكراه زي الارملة المخلصة؟ لزومه ايه، في التوقيت ده بالذات اثناء بناء الجدار، يعملوا فرح بلدي والرقاصة اللي جايبنه يحضر الفرح عشان ما تفوتهوش النقطة ده راخر؟  بيفكرونا يعني ان اننا راكبنا وسخين وقوادين مسرحينا من زمان؟ ما احنا عارفين ما يحلوا عننا بقى الناس اكلت وشنا، ده تنكيل ده، ده زي اللي رايح بيت دعارة وطول ماهو قاعد يقول لصاحبة البيت: يا قوادة يا قوادة يا قوادة.. الله، يا سيدي عرفنا، امال انت هنا ليه؟ ما انت عارف انت فين، وهي عارفة هي مين، بجد يعني ده سب دين مالوش اي مناسبة خالص، بيذلونا يعني؟ طب بمناسبة ايه بيعملوا الحكاية دي؟ ها؟ بمناسبة ذكرى ايه؟ وللا عيد ايه؟ مش معقولة يكون عشان عيد ميلاد المجحوم! مش ممكن، هو اصل عيد ميلاده يوم خمسة وعشرين الشهر ده، معقولة يكونوا بيحتفلوا بعيد ميلاده زي مابيحتفلوا بعيد ميلاد بن جوريون؟ لالالالالالا، كده كتير، كتير، كتير حرام عليهم، الانسان مهما كان يبقى في قلبه رحمة، مش ممكن كل ما يقدروا ما يعفوش كده ابدا، احنا كنا عملنا ايه عشان كل الذل ده كله؟ وللا صحيوا من النوم وجالهم مزاجهم يقولوا لنا ارقصي يا جارية على السطوح عشان الناس كلها تشوفك؟ 

ده ايه العكننة دي ع الريق النوم ياربي؟ استغفر الله العظيم ده انا ما صدقت اروق مزاجي، كان  لزومها ايه العاصفة الخماسينية دي؟ الله ينكد عليهم ويذلهم زي ما بينكدوا علينا ويذلونا ويفضحونا ونازلين فينا تشايلد ابيوز، هم وجوزهم السابق والحالي
حد الله ما بيني وبين اي ساداتي، ولا له عندي سلام ربنا، لما ابقى اتجوز اسرائيلي ابقى اصبح على ساداتي

22 comments:

مهندس مصري بيحب مصر said...

فيه ايه يا نوارة ؟

أعصابك يا بنتي ليطق لك عرق

دي نتيجة طبيعية للخدمة السوبر لوكس اللي بتقدمها حكومتنا لإسرائيل و لازم تكافئها عليها

وائل صلاح said...

إذا كان السادات وقع معاهدة كامب العار

فالنظام الحالى يسير فيها بالهتافات و التحيات
بالرغم من إن الصهاينة يخترقون حتى هذه المعاهدة اللعينة بضربهم الدائم للحدود المصرية
و بالتالى يستطيع النظام إن أراد النظر فى بنودها و التملص منها بموجب القانون الدولى

إلا إنه بيزيد عليها و فرحان بيها

ألم ترى وجه عوكل أيام مذبحة غزة و هو يبشرنا أن من حق الصهاينة مراقبة معبر رفح بالكاميرات
بموجب إتفاقية وقعها دحلان و كانت قد إنتهت مدتها فى نوفمبر
2006

و شوفى اللى مكتوب فى الجزيرة بخصوص زيارة عمر سليمان الأخيرة للكيان الصهيونى


__________

مصر تمارس ضغوطا على حكومة إسرائيل لمنعها من توقيع صفقة تبادل الأسرى مع حركة حماس لتضطر الأخيرة إلى توقيع الورقة المصرية للمصالحة مع حركة فتح

http://www.aljazeera.net/NR/exeres/B9CE1136-62E8-481F-B58C-B7C0F8838668.htm

و لا تعليق
!!!!!

Anonymous said...

وثيقة تفكيك إسرائيل يا نوارة
ما لناش غيرها يا نوارة
وسيبك تماما من النسخة العربية ولا كأنك عملتيها خلينا في اللغات التانية
اصل العرب نصهم مصريين
وحزب كامب ديفيد خلاص زي ما شفتي في نكسة الجزائر، ركب المصريين كلهم وبقى يقول يمين يبقى يمين، شمال يبقى شمال
توقيع
واحد لابس هدومه

Ahmad atef said...

علي فكرة
مع كامل احترامي لسعادتك ومع أني مش ساداتي من اللي انتي مش عايزة تصبحي عليهم ولا حتي ناصري ولا أعترف بهذه التصنيفات أصلا ماهو مش معقول حد كده طول وعرض ينسب نفسه لشخص ويبقي فرحان قوي وهو بيقول أنا أحمدي أو أنا نواري مثلا
اللي انا واثق فيه ان كل واحد يسمي نفسه زي ماهو عايز بس لازم كلنا نجتمع علي اننا "أنتي مبارك" يعني ضد مبارك وده الحد الأدني من الوطنية والفهم السليم اللي ماينفعش فعلا نصبح ولا نكلم اللي مايملكوش
المهم تصدقي ان انا الفترة اللي فاتت عكسك تماما.. من ساعة ما اخوانا ابتدوا يبنوا الجدار اللي هيدخل جيلنا حضيض حضيض مزابل التاريخ ولا فخر
وأنا عمال أترحم ع السادات.........أي أي لأ دي جات في وشي ههههههههه
عارفة ليه لأن كمية العهر والقرف والبجاحة اللي وصل لها الراجل الحالي لو ينفع نقول عليه الصفة التشريحية دي أصلا
خلت السادات بالنسبة له ولي من أولياء الله ومرابط في سبيل الله
فكل شيء نسبة وتناسب يا أختشي فلما نوصل لواحد عايز يجوع اناس في غزة ويقفل عليهم بالحديد لما يموتوا زي الفراخ
يبقي لازم نقول ع اللي عمل صلح منفرد وخلع من الباقيين ده ولي ورضي الله عنه كمان أأأأأأأأأأه يازمن الخني
واوعي تقولي أنه ده اللي وصلنا لده وبتاع لأن 28 سنة فترة كافية جدا لتغيير أي شيئ ولاعادة النظر في أي توجه أو معاهدات أوخلافه يعني هي كامب ديفيد مالزقتش ولا ماسكين عليه صور وجوابات أنه مايغيرش توجهه
ملحوظة أخيرة وعذرا للاطالة:
لعلنا نجد عند الله عذرا ولو واهيا يوم القيامة الرجاء أن ندعو جميعا: اللهم لا تؤاخذنا بما فعل السفهاء منا اللهم اني أشهدك وأنت خير الشاهدين أنني برئ من الجدار العازل بين مصر وغزة ومن كل من رضاه أوشارك فيه بجهد أو رأي أو وضع به لبنة

simplymoi said...

Nawara

Getting endearingly or extremely upset over a given set of circumstances will rarely help you to change them for the better. Instead,take an optimistic rather than pessimistic view on yourself and your country. as long as you do not take to unrealistic extremes
About president Sadat He did bad things but he was never bad person. Nor was he a good man when he behaved well. Watch this movie and you will know that he was a part of corrupted system. He was a puppet so are half of world leaders. Honestly watch it and you will know why he behaved like that.www.zeitgeistmovie.com

شمس العصارى said...

شوفتى محدش رد على الموضوع غير 2 بس يعنى هما دول الى مش ساداتيين
ههههههههههههههههههههههههههههههه
خلى بالك مصطلح سادى اساس غير كده خالص
ههههههههههههههه
بس انصافا فقط
الموضوع ده يتحمله الرئيس الحال بعلاقاته مع اسرائيل و خصوصا انه اى الرئيس قدم لاسرائيل اضعاف ما قدم السادات
يوم ما السادات عمل المعاهدة الشعب كان فرحان - ماعدا طبعا جماهير الجماعة المحظورة الى كلكم عارفينها طبعا و التيار الاسلامى معاهم - الشعب فرح و هلل و الى اليوم يهلل
و كل من ينادى بالاصلاح على طريقة النظام الحالى ورجال الاعمال و الشرطة و قواد الجيش و النخبة السياسية ايضا و غيرهم و من يسير فى ركبه و يسمع لاعلاماه و يصدقه لازالوا ايضا يهللون - و دون ان يدروا - من غير اسف على تهليلهم
اسالك سؤال ولازم تجاوبى يعنى اجبارى
مع العلم مسبقا ان اى موضوع تجاه اسرائيل لا ينفع معه سوى القوة و بغض النظر عن سلوك النظام الحالى
السؤال : احنا لو حبينا نحارب - افتراضا يعنى - من يحارب و ما الدافع و المحرك له ؟؟؟
قبل ما تجاوبى اقلك و اكيد حتفهمى قصدى اثناء حرب غزة الاخيرة ملايين كانوا فى الشارع يهتفوا و ينددوا لكن لكن لكن لما ناس قالت نوصلهم المساعدات و الاكل و العلاج كام واحد من الملايين الى فى الشارع اتحركوا ............
يبقى خلاص الى بتقوليه ده ملوش اى لازمة و اى كلام فى اى موضوع يخص اسرائيل برضه زيه ملوش لازمة
نلتقى بعد السفيرى المصرى فى اسرائيل

overdose said...

بغض النظر ليه اسرائيل تطلق اسم الدلو ده علي اسم شارع؟؟

حبا فيه؟ معتقدش

حسن مدني said...

الحقيقة إنه كده العار ركبنا من كل حتة. السور واحتفال أولاد العم والغاز وقضية خلية حزب الله. والواحد مش عارف يودي وجه فين اليومين الجايين.

معلش بعد إذنك أرد على شمس العصاري

أيام ما السادات وقع الاتفاقية الكل عارضه فيها، الإخوان والإسلاميين، والقوميين والناصريين والشيوعيين. ولذلك حسبهم كلهم مع بعض في آخر أيامه.

تحياتي

Anonymous said...

Bosy ya nora.
Ana shayf en Israel m3 kol 5atwa bt3melha, bt72a2 naga7 raheb feha. We awelha enha 5aletek tekteb el post dah. Ana fe rodody b7eb aklem be27teram bas enty ma5letesh feha 27teram.

Enty mawkfek 3amel zay mawkef el 7okam el 3arab ely hagmo el sadat we 2lo 3leh 5ayen we 3amel ew b3dha nedmo, we ana kaman kont faker eno 5ayen we 3amel laken m3 el w2t bytsbetly el 3aks. Israel mesh 3ayza Sadat tany bel 3aks deh nefsaha masr tekon kolaha Abd El-Nasser, dah israel te2ol allah keda law fe kol dawla 3arbya w7ed Abd El-Nasser yo7komha kan zamnhom m3'elbosh, we 3arfen en 27na karhenhom 3lashan keda bykaramo 3lashan neseb we nel3an feh we net2ked eno kan 5ayen, telto bahayem we shrebnaha.

Abd El-Nasser kan mesh 3aref 7agmo bytl3 ytklem we y2ol 7nrmy israel fel b7r we tany youm y2omo mdyana 3ala afana, we syaset israel kanet wad7a fel fatra deh kol kam sana ys3do el 2omor men ta7t el tarabeza we 27na 3lashan bahayem 7n2om netl3 we ne3len el 7arb 3leha we kal 3ada ydona 3ala afana. Dah ely enty 3yza. Mesh 3yza salam mesh mohem b2a sa3etha na5od 3ala afana el 2rd kolaha tet5ed el mohem mykonsh feh salam we dah ely esmo el ((""3'aba2"")).

El Sadat ragel fehm kodrato we kodret gesho we sh3bo we esht3'al 3ala 2sasha fehem eno yadobak y2dar y72a2 nasr m7dod, we mt2olelesh el sovit kano 7ys3do dol nas btetas kano bywf2o 3ala safket el 2sl7a el sob7 we yorfodo b3d el dohr zay mal sadat al, we mat2olelesh el 3arab law el 3arab kano 7y3melo 7aga m3 masr kano 3amalo delw2ty m3 palestine, bel 3aks dol el 3arab kano kaman 2ktar nas by7rbo Abd El-Nasser.

El-Sadat bawaz 7esabat israel fel mant2 we 2rbkha bel salam, law kano el palestinians wel syrians wel lebanese wf2o kan zamanhom delw2ty reg3tlohom 2rdohom we kan el palestinians b2a 3andohom forsa en homa ybno gesh, we yst3'elo emkanyathom en homa y2dro ywgho israel fel most2bal. Wel sadat 2laha mara fe mglesh el sh3b en masr 3omraha ma7to5rog men sa7et el gehad, bas mkloko bahyem men yfham! el salam deh fe 5tet el sadat kanet mograd hodna fe nazaro le7ad my2dar ybny gesho we 2ktesad balado. Afhmo b2a ya ba2ar! moshkelet el sadat bas eno mghzsh entekal el 7okm fa geh wa7ed 7omar we sees b2a rade5, we el yahod homa el 2talo el sadat 3lashan law kan kamel kanet 7teb2a karsa lehom we kan 7ynfeshom fel kowa el 2klemya.

Men 2ryty lel posts bet3tek enty momken matfhmesh ely ana 2olto fa 2klemek be tar2tek we 2shlek el mawdo3, yabenty t5yl keda en feh wa7ed b3'l adek arb3 marat (dah el yahody) wenty (el 7okam el 3arab) el mohem el ragel el d5m el yahody dah kalek 3l2a mo7tarama we 5ad sh2tek we kol mathweyby n7ytha ydrbek 2omty enty gety fe youm we darbtek bel alam bas, we ra7 geh wa7ed 7ash mabenkom we 2lek ya bent el 7alal etsl7y enty wel ragel dah we 5ody 2oda wa7da feha we sal7y l2eno law meskek 7yfsh5ek to2omy to2lelo la2 mesh 73mel sol7, yash2a kolaha ya balash?! wala t32ly we t3rfy 7agmek we t5dy goz2 men el sh2a we b3daha tro7 enty b2a el gym we tel3belek 7aga we b3dha tege tkleh 3l2a we ta5dy el sh2a?!

Israel 3ayzana nekrah el sadat we nekrah mabd2o 3lashan y3rfo y7rbona we7shedo el r2y el 3am 2odamana, we7na bahyem we ray7en ma3ahom.Ayam el sadat el media fe europe we america kanet betl3 en el yahod homa ely 3yzen salam wel 3arab 3yzen el 7arb fa kano 7shden el r2y el 3am dedena, enama el sadat fehem el le3ba deh we 3lashan keda 2trohom en homa y2balo el salam, israel maknetsh me7taga el salam mahy keda keda betdokena kolena. Afhmo b2a 7dy3o el balad, allah y5rbet tahworko we 2ndef3ko el 3'aby el bygebna le wara.

mado said...

يؤسفني اني احط اللينك علي المدونة هنا علشان اعصاب حضرتك بس مضطر ولازم تشوفيه

حملة أوروبية لمقاطعة مصر بسبب الجدار الفولاذي

خلاص يا نوارة هيقطعونا زي ما بيقطعو اسرائيل فضحتنا بقت بجلاجل.

Unknown said...

الحقيقة تكريم الكيان الصهيونى للمجحوم بعيد تماماً عن التقدير والأحترام فالصهاينة هم أول من احتقروا ويحتقرون وسيحتقرون السادات

لانهم يدركون جيداً انه خائن لأمته ولايعبر عن التيار العام فى الشارع العربى الذى يريد إزالة الكيان الصهيونى من الوجود


والصهاينة يدركون تماماً ان افضل من عبر عن الشارع العربى خير تعبير هم امثال عبد الناصر ونصر الله

وإنما يأتى تكريم الصهاينة للسادات من باب كيد النسا ليس إلا

ففقد رأى الصهاينةأن فى المصريين إلى اليوم من يملك ذرة من دم ولا يستطيع أن يرفع رأسه أمام أى غزاوى أو أى جزائرى دون أن يفتح أياً منهم فمه بكلمة لذلك فأن الصهاينة أراداوا أن يضع أمثال هؤلاء رءووسهم فى الوحل

بل أنهم يريدون من يملكون ثمالة من كرامة فى
هذا الشعب أن بقدم على الأنتحار

وإذا كان من الظلم أن نحمل المجحوم كل بلايا الـ 28 سنة الماضية من عمالة وخيانة وأنبطاح وتوطؤ وتعريص

فالمجحوم منذ الزيارة المشئومة للقدس وحتى جندلته فى المنصة لم يتوفر له إلا أقل من 4سنوات ضاع جلها فى مفاوضات أسطبل داوود هى أقل من سبع ما توفر لخليفته وعصابته الذين لم يخلعوا برقع الحياء فقط بل خلعوا سراويلهم ورفعوا أرجلهم وغنجوا للصهاينة حتى يرضوا عنهم

و من الظلم أيضاً أدعاء البعض أن الشعب المصرى كان فرحان بسلام السادات وان الجماعة المحظورة فقط هم من عارضوا كامب ديفيد

فنظرة سريعة إلى اسماء من أعتقلهم السادات فى سبتمبر 1981 تدحض هذا التصور

فالأعتقالات ضمت على سبيل المثال فقط وللتذكرة

نبيل الهلالى شيوعى قبارى عبدالله شيوعى صلاح عيسى شيوعى حسين عبد الرازق شيوعى

فريد عبد الكريم ناصرى ضياء الدين داوود ناصرى حمدين صباحى ناصرى كمال أبو عيطة ناصرى

فؤاد سراج الدين وفدى

محمد حسنين هيكل قومى عربى

محمد حلمى مراد حزب عمل إشتراكى

أحمد فرغلى حزب عمل إشتراكى

نوال السعداوى تيار ليبرالى

صافيناز كاظم تيار يسارى متحول إلى إسلامى

أحمد فؤاد نجم يسارى

عبد العظيم ابو العطا ليبرالى حزب مصر الحاكم اللى هو الجد الأكبر للحزب الوطنى

محمود القاضى ليبرالى وطنى

هذا بالإضافة إلى قادة التيار الجهادى المسلح الذين تم القبض عليهم قبل إغتيال السادات والذين يكفرون الإخوان ويناصبونهم العداء

ثم نصل اخيراً إلى اعضاء المحظورة التى نذكر منهم

عمر التلمسانى ومصطفى مشهور وجابر رزق وعصام العريان وعبد المنعم أبو الفتوح و عبد الحميد كشك وأحمد المحلاوى

إذن نحن أمام ممثلين عن مصر من أقصاها إلى أقصاها عارضوا كامب ديفيد ووقفوا فى وجه السادات واصطدموا معه وليس افخوان فقط هم من عارضوا كامب ديفيد

Unknown said...

مش عارف يانواره انا مش بموت فى السادات ولا حاجه
بس ليه تشتمى فى الميت اللى دبسنا وتسيبى الحى اللى بينفذ

السادات لو ليه حسنات على الأقل جه فى يوم وأخد أصعب قرار لرئيس دوله

انما الرئيس الحالى عمل أيه ؟

أه السادات بعد كده لبسنا طرح ومضى على أقذر أتفاقيه بين دولتين

ده حتى المانيا لما اتهزمت فى الحرب العالميه ماتهزأتش التهزيء ده كله

بس انا كل مافتكر حرب أكتوبر أباه مش عارف الراجل ده بيمثلى أيه ؟

خلص أجيال بحالها من الحرب وفى نفس الوقت نزعهم من عروبتهم وكبلهم بأتفاقية خذلان

هتشوفوا said...

يلعن ابو شكل كل دكتاتور ظالم إذا كان عبد الناصر ولا السادات ولا مبارك

المهدى said...

خطورة أنور السادات التى تؤهله للعنة الأبدية من كل مخلص وكذلك للتكريم الأبدى من كل إسرائيلى هو أنه كسر كل ثوابت الأمة التى تكونت وتراكمت منذ ثورة 19 وتبلورت وأستقرت طوال سنوات الثورة من أول إنتماء مصر العربى ( الذى لم تتخلى عنه حتى فى لحظات الهزيمة ) وحتى العلاقة بين المسلم والمسيحى وقيم العلم و العمل والبناء مقابل قيم الثراء السريع ووههم الرخاء كل ما أستقرت عليه الأمة كسره المجحوم فى 6 سنوات فقط وكأنه يسابق الزمن ويحصل للغرب وإسرائيل فى أقصر مدة على ما لم يستطيعوا الحصول عليه طوال قرن كامل لذلك قاومه الكثيرون وذهبوا به إلى نهايته المشؤمة غير مأسوف عليه أما باقى ال28 سنة فكانت عملية تجميد وترسيخ لكل باطل فعله السادات بهدؤ وحذر وتناحة حتى إعتدنا ما كنا نرفضه وللأسف أن الحكم الحالى لم يتعلم من تجربة السادات إلا درس المشهد الأخير وواضح أنه درسه جيدا وعرف أن هناك طرق أخرى للخيانة لا تذهب بك إلى المنصة وآية ذلك أمر النخبة أو كل هؤلاء الذين يملكون ترف الإهتمام بالشأن العام فى الماضى كان المثقف المتفق فى الحكم والمختلف فى السجن وده على طول التاريخ المصرى الحديث أما بعد درس المنصة فالمتفق والمختلف فى حظيرة وزارة الثقافة والجميع يملكون المال والشهرة و حق الإختلاف والجعجعة والسفسطة على أن يحافظ على الخطوط الحمراء وأمن الحظيرة وحالة العبث السريالية التى نحياها تماما كما عبر داود عبد السيد عن الحالة فى مواطن ومخبر وحرامى ( إزاى المواطن يحب أخوه الحرامى والأثنين يحبوا أخوهم المخبر ) وهكذا تذهب الضحية إلى مثواها الأخير دون كشف المجرم دائما

المجرم الحقبقى هو من كسر الثوابت وحتى نعرفه وندينه وندين فعلته ( أو ربايته على حد قولك ) فسنظل فى تلك المرحلة العبثية

شمس العصارى said...

الاخ حسن مدنى /
ايام ما السادات وقع الاتفاقية المشئومة مكنش فى قوميين كنيار لكن كان فيه كافراد منفصلين لان التيار القومى فى مصر انكسر بعد الحرب مباشرتا لما مصر اخدت خط منفصل لها بعيد عن العرب
اما الشيوعيون فلم يكن لهم وجود ولا حتى يذكر لان انتشار التيار الاسلامى الكاسح فى السبعينيات استطاع ان يقضى عليهم فكريا و يجتثهم من المجتمع
اما الناصريين فكانوا ولا زالوا منشقين على انفسهم
ــــــــــــــــــــــــــــــــــــــــــ
/ABOUAL3RBY الاخ
اولا انا فى تعليقى قلت ان الاخوان – الجماعة المحظورة كما يسميها النظام – و التيار الاسلامى معاهم ولم اخصهم بمفردهم كما ذكرت انت
و بنظرة تقسيمية للتيار الاسلامى فى السبيعينات نلحظ ان اكبر المجموعات المكونة له ( الاخوان المسلمين – الجماعة الاسلامية – التيار الجهادى الغير تكفيرى )
و من التاريخ و الواقع و الحقيقى ان التيار الجهادى يختلف مع الاخوان لكنه لا يكفر الاخوان
و انا لم اظلم الشعب المصرى حينما قلت هللوا للاتفاقية
انت ذكرت افراد يمثلون تيارات- كانت قد ضعفت حينها – و هل تلك التيارات تمثل الشعب المصرى كله
الجواب ( لا) لا تمثله كله لذالك انا قلت اغلبية الشعب هللوا و هذا فعلا
و اعود فاقول ان الشيوعيين – كأفكار و تنظيم – كانوا قد انتهوا فعليا و لم يبقى منهم سوى اسماء فرادى كما ذكرتهم انت
و كذلك الناصريين لم يكونوا فاعلين لانهم منقسمون على انفسهم بعد وجودهم
و اين الليبراليين فى السبعينيات اين وجودهم و اين تنظيمهم و اين فاعليتهم
سيدى الفاضل كل الاحترام لمن ذكرت من اسماء و كل التقدير لنشاطاتهم
لكن اقول ان تلك الاسماء فى حينها لم تكن تمثل الا نفسها فلم يعد لهم تيارات ولا وجود فعلى حقيقى على الساحة المصرية مع توقيع الاتفاقية
انا لا اختلف معك فى نضال هؤلاء و لكن اختلف معك فى هل كان لهم تيارات موجودة و قوية ام لا

الميكروباص said...

تلعني رجل أنتصر على اليهود في الحرب وأعاد إليكي الأرض
لولاه بعد الله سبحانه وتعالى كانت الأرض إلى الآن محتله
ياترى ماذا سيكون رد فعلك وقتها؟
ولله انا لا أدري ما الذي يرضي الناس
الراجل كسب اليهود ومش عاجبكم كمان
ولله فعلا حاجه تضحك

Unknown said...

لورنس العرب

بص
ربنا يوفقك كده روح اسكن في ميدان السادات في اسرائيل
تستاهلهم ويستاهلوك زي الزعيم بتاعك

حسن مدني said...

شمس العصاري

الكلام لا بد أن يسنده منطق أو دليل.

إذا كان كل هؤلاء الذين ذكرهم أبو العربي، بكل اختلافاتهم الفكرية، رفضوا هذه الاتفاقية، وهناك وزراء خريجة استقالوا.
مين الشعب الذي أيدها؟ أذكر تلك الأيام، ولا أذكر أحدا رحب بها، من عامة الناس. النس كانت مذهولة. وأكثر واحد دافع عن الاتفاقية قال، خلينا نصلح بلدنا، عشان نقدر نرجع نحارب.
أذكر جيدا 2 مليون مسلم على عرفات يدعون عليه يوم زيارة القدس، وأذكر جيداً ردود الفعل عليها، إلا إذا كان أعضاء الحزب الوطني، ومجلس الموافقة هم من يعبرون عن عموم الرأي العام.

تحياتي

Unknown said...

يا استاذ لورانس ليه بتبص للنص المليان وتسيب الفاضى

والله لولا كامب ديفيد لكان السادات أغلى عندى من نفسى

عرفات دفع حياته ثمن كامب ديفيد اللى كان فيها مع كلينتون وباراك
الراجل مارضاش يبيع شعبه وأرضه
وبعدها أتحاصر وأتقاطع وتمت تصفيته بناء على أوامر الأمريكان وبأيد فلسطينيه
مع كل أخطاء عرفات فى بداياته بس فى الأخر بنذكره بالخير علشان حافظ على كرامة شعب مهما كان تحت الأحتلال اللى أشرف من حريه بطعم الذل
وياريت الأض رجعتلنا بجد

شمس العصارى said...

الاخ حسن مدنى /
سيدى الفاضل يبدو انك لم تكمل قراءة ردى عليكم الى اخره
كما قلت من ذكرهم ابوالعربى اسماء فرادى ولا تستند الى قاعدة منظمة ولا وجود لكيان حقيقى لانتمائاتهم الفكرية
و هو وزير خارجية واحد الى استقال مش وزرا و ازيد ان بعض اعضاء مجلس الشعب استقالوا ايضا و اذكرك ان عامة الناس فى وقتها لم تكن تدرى مخاطر الاتفاقية و بنودها و الحجيج ال 2 مليون على عرفات طبعا دول مش مصريين – دول جماهير مسلمة فيهم 30 او 40 او حتى 50 الف مصرى - و اعود واكرر تانى و تالت و عاشر الاسماء المذكورة فرادى و ليسوا جماعات ولا انتى عاوز تقنعنى ان شعب مصر ساعتها كان كله ناصريىن و شيوعيىن و وفديين و قوميين و يساريين و ليبراليين ............ ده حتى لا يجوز هههههههههه
لك كل التحية

noar said...

احب اقلك انى مش من اتباع اى حزب حضرتك قريت بس شوى كنت عرفتى ان السادات مش هو الغلطان لوحدة كل القادة هما كمان شركاء لانهم لو اتفقو يوم القمة كان هسبقى ليهم كلمة مش كل واحد قاطع القمة السادات عنده مساوئ لكن له حسنات اقل شئ انه محافظ على حقوق الشعب ومكانش حد يستجرى يقول اى كلمة فى حق الشعب المصرى ولا يتعدى عليه عبد الناصر له مناصرين فى جميع انحاء العلم مع ان الخسائر التى كانت فى عهده ماتزال حتى الان ورغم ذالك مازالة الشعوب تحبه وتحترمة والاعداء يحترمونه ويرفعون له القبعات وعلى فكرة المدونة بتاعتك حلوة

Dr. Eyad Harfoush said...

عزيزتي نوارة
فكرتني تدوينتك دي بمشكلتي الأبدية مع الكابتن أنور ابن ست البرين صريع العرض، هنا آخر بوست عن حضرته، ولاحظي التعليق الموجود بأسفله

http://eharfoush.blogspot.com/2009/12/02.html

بس بالمناسبة، هو فيه حاجة اسمها ساداتي؟ السادات لم تكن له معطيات ولا قيم سياسية ولا فكر اقتصادي ولا اي ثوابت من اي نوع، فما هو منهج الساداتيين؟ اللا-منهج واللا-قيمة؟
تحياتي للتدوينة وكاتبتها