Sunday 20 December 2009

لازم لازم تشوفوا الزمن المتبقي

فيلم الزمن المتبقي سيناريو واخراج وبطولة ايليا سليمان، مخرج فلسطيني
الفيلم ده لازم يتشاف ضروري ضروري ضروري، انا عمري ما ضحكت وعيطت في نفس اللحظة زي النهاردة، والفيلم كله على بعضه مافيهوش خمستاشر جملة حوارية، ثم انا عمري ما شفت حد يتكلم عن النكبة ويضحكك لما يوجع بطنك وهو ساكت مافيش جملة حوار واحدة بس بتضحك وانت وبتعيط
الفيلم ح يتعرض بكرة ان شاء الله حفلة تسعة ونص في سيتي ستارز في بانوراما الفيلم الاوروبي لانه انتاج فرنسي
وح يتعرض تاني يوم التلات الجاي ده على طول حفلة تلاتة ونص العصر

النهاردة القاعة كانت فوق بعضها مع ان المهرجان ما كانش عليه اقبال يعني، والمهرجان فيه افلام كانت كويسة، ماعدا الافلام الهولندي، عاملة زي الافلام المصري، ونفس غلظة الحس دي بتاعة يجيبوا واحدة بضب ويتريقوا عليها، يجيبوا واحد تخين ويتريقوا عليه، والمفروض انك تضحك مش تعيط ولا تتغاظ ولا تغضب ولا حاجة، حاجة في منتهى غلظة الحس يعني، بس الحمد لله فلسطين لسة مهمة، القاعة كومبليه وكان فيه ناس واقفة
ايليا سليمان ده مبدئيا انا عايزة اقبض عليه، واكتفه، واهدده باني ح اعذبه والفق له قضية مخدرات اذا ما كانش يعمل هنا مدرسة ويعلم الناس ازاي الواحد يعمل فيلم راقي وحساس ويضحك ويعيط من غير ولا كلمة ومش عايزاه يفلت مني، النهاردة قعدت اجري وراه زي البنات اللي بيطاردوا النجوم
ثانيا عايزة احبس المصريين واقعدهم يتفرجوا على افلامه جرعة مكثفة عشان يبطلوا يبقوا زي الهولنديين ويرجعوا تاني زي المصريين
بعد كده كان فيه فيلم فرنساوي اسمه يوم التنورة انما ايه؟ حاجة وسخة وسخة، عنصري بينتقد العنصرية، ملخصه مدرسة فرنساوية عايزة تعلم ابناء العرب والافارقة التحضر انما هم مش تمران فيهم وعنصريين ومبتزين وعنفا وبيكرهوا اليهود وبيتكلموا على الستات ومتشردين وقذرين وحقراء وولاد كلب واضطرت المدرسة الفرنسية المتحضرة القطة البطة اسفة بمنتهى الرقة والمشاعر الفياضة انها تحتجزهم رهائن بالمسدس عشان تجبرهم على التعليم والتحضر اي والله، انا خرجت من نص الفيلم وانا باقول: قرررررررففففففففففف
صدق الشاعر الشعبي، اللي هو انا، لما قال: الفن بيخرج مصارين الشعوب
وانا قلقانة قوي ان مصارينا شبه مصارين الهولنديين، ده الهولنديين عنصريين اكتر من الفرنساويين، انا عايزة المصران ده يتغير او يتشال خالص ويركبوا واحد بداله

اما ايليا سليمان، فبجد يعني، لو دي مصارين الفلسطينيين فعليهم انهم يفتخروا ويتفشخروا بنفسهم، ايه الشفافية دي والحساسية دي وخفة الدم والمرارة والتفاؤل في نفس الوقت وقوة من غير خطابة وصلابة من غير تشنج ورومانسية اللي مش مهترئة دي؟ يارب يخليه، يارب يخليه لحد ما يبقى عنده مية وخمسين سنة، ويحرسه ويحميه، ده راجل كوزموبوليتان، ما تحسش انه يخص حد، الفيلم لما اتعرض في امريكا قالوا: احنا حاسين انه بيلمس علينا، ولما اتعرض في فرنسا كذلك، ولو اتعرض في الصين الناس ح تحس بتوحد معاه، كم انسانية مش معقول، قال انا باقول لواحد ده لازم ييجي يدرسنا قوم يقول لي: ماحدش ح يرضى يستضيفه اصله اسرائيلي! اسرائيلي ازاي يا عم ده عامل فيلم كوميدي عياطي عن النكبة، قال لي: ماهو عرب تمانية واربعين يعتبروا اسرائيليين وانت عارفة مفهومية اللي عندنا
يا سبحان الله، يعني ايليا سليمان اسرائيلي وبيريز صعيدي؟ ده ربنا له حاجات يا جدع
الغريبة ان الفيلم عن النكبة، اهو عن النكبة اهو، وبيضحك بسخرية مرة قوي وبيعيط وانت في وسط ما بتضحك قوي صح؟
بس متفائل جدا جدا جدا، تصدقوا؟ والله متفائل، مش بس متفائل، ده كمان مطمئن، يعني يحسسك ان فلسطين لسة بخير وانها ح تفضل عايشة
طب انا اعمل ايه انا دلوقت؟ فيلم عبارة عن تابلوهات تشكيلية رائعة، بيضحك بمرارة ويعيط بتفاؤل، وعن النكبة، ومافيهوش خطابة، والاكادة مافيهوش سياسة، تصدقوا، مافيهوش سياسة خالص، مافيهوش كلام اساسا غير كام كلمة كده متنطورين وتبقى قاعد مش عايزه يخلص، اعمل ايه؟ اروح اخطف الراجل ده واخده رهينة لحد ما يقول لنا سره ايه؟
---------------
بالنوسبة بقى لموضوع حواري في راديو بكرة تومورو تومورو آي لاف يو تومورو يو اونلي وان داي اواي
دلوقت كلمني محمود صابر وقال لي انا سبت راديو بكرة انا ومحمد الطاهر، مع انك عاملة لمحمد الطاهر بلوك يعني (ده محمود اللي بيقول ههههههههه) ليه يا محمود؟
قال ايه يا اخويا، بتوع راديو بكرة قالوا له لا مش ح نذيع حلقة نوارة عشان... اسمع بقى... عشان نوارة مش ليبرالية واحنا مش ح ندي منبرنا لحد مش ليبرالي يعبر فيه عن نفسه هههههههههههههههههههههه منتهى الليبرالية الحقيقة
طبعا انا اتفحت في الضحك.. الله، اتمنعت، المهم قلت لمحمود يا ابني ما تخسرش نفسك وما تعملش خناقة، قال لي اخسر نفسي ايه انا كنت باشتغل ببلاش انا ومحمد الطاهر عشان ندعم الحريات يقوموا بعد ما يوافقوا على الحلقة يقولوا مش ح نذيع؟ انا شامم ريحة
المهم فتكوا في الكلام قلت له ريحة ايه؟ قام الجدع خاف مني عشان انا مسحوبة من لساني وقال لي: لا انا مش متأكد من حاجة وراح قاطم وقال لي انه هو ح يكتب على الموضوع على مدونته
بس انا مش عارفة ليه صايباني كريزة ضحك.. انا باتمنع؟ ده انا حتى حسني مبارك ما بيمنعنيش، ده على كده حسني مبارك احسن منهم بقى
بس حاجة غريبة، ده محمود بيقول لي انهم كانوا عاملين اعلان على الفيس بوء قبل الحلقة وكدهون يعني، هو حد قال اني ريبرارية؟ ماهم عارفين اني مش ريبرارية من ساعة ما وافقوا على تسجيل الحلقة واعلنوا عنها على الفيس بوك، ايه اللي جد؟ ويا ترى ريحة ايه اللي شاممها محمود.. للاسف ما عرفتش استدرجه، بس لو ما نطقش ح اهدده بالبلوك، وهو حر بقى

17 comments:

mido said...

محمد عادل ( ميت ) بيقول حصل خطأ فى مونتاج الحوار

!!

shaw said...

نوارة
أنا كنت قاعد في الصف اللي وراكي بالظبط.. وكان معايا واحدة صاحبتي كانت مصممة أنها تقوم تبوس إيليا سليمان وسط البشر ومنعناها بالعافية

ايه العظمة دي؟ ايه العظمة دي؟

الوطنِ بشيكل وكِل العرب ببلاش

mido said...
This comment has been removed by the author.
Unknown said...

ميدو
بس لو خطأ فني الحلقة تتسجل تاني، هو انا صحيح كنت ح اكسل اسجلها تاني، بس على الاقل كانوا قالوا لمحمود انه خطأ فني لو ممكن نسجلها تاني، صح؟
انما محمود ساب لهم الراديو
مش حاجة غريبة انه يسيب لهم الراديو عشان خطأ فني؟

شو
هههههههههههههههه
الوطن بشيكل وكل العرب ببلاش بقيت اضحك واعيط اضحك واعيط

مواطن مصري said...

دة انا قعدت مستني

و فضيت نفسي و طنشت الخروج
و في الاخر اسمع أغاني

لناس محبهاش معدا هشام عباس

عشان أسمع حوارك

بكرة بقى حد يسجل عشان متش الزمالك

تقريبا هيكون الساعة سابعة
يا رب الزمالك يكسب المنصورة 3

mido said...

ممكن تشوفوا الفيلم اون لاين


THIS IS ENGLAND

مواطن مصري said...

نوارة this is england

وحش جداً

أتفرجي على فلم american history x

دة بقى قديم اة بس أحسن منة مليون مرة

dr.lecter said...

للاسف فاتني

Kontiki said...

ازيك يا نوارة
فكرتينى بايام حلوة قوى
ايام الجزويت والبحث عن سيناريو حلو وكلام عاوز يتقال ومش راضى يطلع على الورق
مطلوب بس خدمة لاخواتك اللى بعيد عن قاهرة المعز اذا قدرتى يعنى تجيبى لنك للافلام عشان ننزلها و نشوفها يبقى بجد كتر خيرك حيبقى واجب جامد جدا
:)

shaw said...

على فكرة يا نوارة
فيلم ايليا سليمان السابق
يد الهية
هيتعرض انهارده في مركز الابداع بالاوبرا الساعة 6 ضمن اسبوع السينما الفلسطينية
ومفروض انه افضل افلامه يعني
باقولك عشان لو تحبي تشوفيه

يساري فلسطيني said...

تحياتي

من كتر حبي لسينما 48 عملت ربع كمبارس في فلم لمحمد البكري بكندا ... ناس فهمانة فعلا ووطنية بدون هبل

بالنسبة للكلام عن انهم اسرائيليون؟

اولا ... حتى ممثليهم في الكنيست اكثر و وطنية و قومية و ثورية من القيادات الفلسطينية و العربية و الحماسية

يلا خلي نوارة تزعل ....

و هم من صمدوا في البلاد و كسروا عين اليهودي العايش بينهم

منهم محمود درويش و سميح القاسم
و توفيق زياد الذي خاطب الفدائين الفلسطينيين بقوله

اناديكم و اشد على اياديكم و ابوس الارض من تحت نعالك و اقول .. افديكم


تحياتي

amksep said...

أول فيديو حطيتيه لزعيم عزبة الهجانة كان قيل ما تعرفي إنه مش طبيعي.

إفتكرت مشهد زينات صدقي و عبد المنعم إبراهيم لما كان مجنون وعامل دكتور و هي مش عارفه

:)

LiNa Sh said...

ياريت لما ينزل أونلاين تحطي اللينك بتاعه
:)

Abdelrahman said...

دى ليبرالية على طريقة اللى ما يتسمى
بتاع " لا ديمقراطية لأعداء الديمقراطية " ... أو الأهبل التانى بتاع اللى مش معايا يبقى مع الإرهاب
(k)

واحد من البلد دى said...

يا عم الحاج ابوس إيدك
كفاية تذل ف عبيدك
مانيش قادر على نفاقك
وتبجيلك وتمجيدك
-
يا مش سامع نصيحة لحد
وخليتنا لطمنا الخد
ومش عارفين آخرها معاك
ماهوانت يا تتهدى يا تتهد
-
وبتسلمنا جيل ورا جيل
إيشى لعاطف وايشى لخليل
وجبتلنا المرض أنواع
من الزرع اللى بالمحاليل
-
ومن أيام جدود جدى
عايش تاخد ما يوم تدى
ف عيد شرطة ف عيد عمال
تقول أحلى العهود عهدى
-
ف عهدك طبعا الصحة
مافيش بقى داعى نفضحها
وزير الصحة ذات نفسه
بقى عنده البعيد كحة
-
مجارى وصرف ع الترعة
وعلة وأوبئة ترعى
وييجى المصل مجانا
ويتباع لى كما السلعة
-
وأنفلونزا جت للطير
ومن بعديها للخنازير
ده من أيام أفندينا
إلهى يصبحه بالخير
-
ماكنا نشوف مرض ولا داء
ولا نخاف نبتلى بوباء
لا كان فيه فيفى ولا دينا
ولا نانسى ولا هيفاء
-
أنافقك وبأمارة إيه؟؟
من العيش اللى بالأبونيه
وبعد ما اجيبه بالضالين
أكل نصه ونصه ارميه
-
وسرقة ونهب بالزوفة
وألف حكاية معروفة
ومين هرب ومين خرب
ولكح زى شلوفة
-
ديوننا متلتلة بالكوم
وراسك ناشفة زى الدوم
ضرايبنا فارضها حبوب
تسد النفس قبل النوم
-
وميت إعلان عن الترشيد
وعصمت زيه زى رشيد
رقيب قاعد..مافيش حسنات
وتعبان م الكتابة عتيد
-
تصدق..كنت انا حالف
لايوم اشجب ولا اخالف
وقلت زيادة ف التأكيد
أقص لسانى لو زالف
-
وقلت ايديا أقصرها
وع الماضى أحسرها
قالولى العلة ف دماغك
ويستحسن تكسرها
-
ولو حتى ح اكون مرحوم
حتفضل برضه روحى تحوم
على المجلس فوق القبة
واشوف من سقفها المخروم
-
وتبعت حد يندهلى
واقول يا روحى تستاهلى
لكن أرجوك تسيبلى يومين
أسلم فيها على أهلى


انا قلت طالما حضرتك ما بتزوريش حد

ابعتهالك لحد عندك

اصل انا من اشد المعجبين بالوالد العزيز

تحياتى

مهندس مصري بيحب مصر said...

يعني دمنا إتحرق و احنا بنسمع في اغاني
و أنا اغلب الأغاني بتاعتهم دي مليش خلق عليها
و في الآخر ما ذاعوش حاجة
محروق ده راديو يا شيخة
شوفي لنا لينك تحميل للفيلم يا ابلة
يا إما كنتي صورتيه بالموبايل في السينما و نزلتيه لنا
مش تحنسينا كده

شمس العصارى said...

مبروك انك اتمنعتى
عقبال ما تبقى صحفية كبيرة قوى فى الاهرام و يمنعوكى
ههههههههههههه
و يعنى ناخد اجازة من الشغل و نشوف سى ايليا ده ههههههه
الا انتى متابعة كل الافلام ولا ايه