Monday 21 September 2009

هو فاروق حسني تبع الوهابيين كمان؟

وهو شكله كده مش ناوي يعمل حاجة، قعد يبوس في رجلين الاسرائيلين ويستسمحهم ويتكلم عن الهولوكوست! احنا ح نفضل ناصبين العزا العالمي ده كتير على ضحايا الهولوكوست؟
وفاروق حسني لو راح ح يعمل ايه؟ اهو ده اللي انا مش عارفاه
ده خلاص مرشح مصر، زي المنتخب القومي كده ما اقدرش اقف ضده، بس انا قلقانة منه، حاسة انه ح يسخر اليونسكو للتوعية بالهولوكوست، وفوائد البكاء على الهولوكوست، وتبقى مصيبة لو الراجل ده طلع كلامه صح وفوق انه يخدم على مصالح اسرائيل يخدم على مصالح آل سعود كمان، وهي تمشي يعني، دول معاهم نفوذ دولي ودول معاهم فلوس بالهبل وهو صاحب مبادئ زي ما انتوا عارفين. ثم انا خايفة يروح يفضحنا هناك، يارب ما يعملش كده، وللا يعمل، خليه يروح يحرقهم ماهم يستاهلوا
انا بقى عايزة اعرف، فيه ناس مش عايزاه يروح اليونسكو ليه؟ انا عايزاه يروح، على الاقل نترحم احنا شوية يعني، مش احسن ما كانوا يبعتوا زاهي لحواس؟ اهو فاروق حسني على الاقل بيعرف يتكلم كلمتين على بعض بدل ما لحواس يروح يكلمهم عن نفسنا وريحتنا، وده منصب شرفي، واهو اسمه مصر برضه اخدت رئاسة اليونسكو، وفي نفس الوقت ح نخلص بقى احنا هنا، ماحدش ح يتحرق تاني ان شاء الله، واثارنا تاخد اجازة شوية، ويمكن اللي ييجي بعديه يهتم شوية بالاثار الاسلامية، لاني كنت قعدت مع طلبة كلية اثار وقالوا لي ان الدولة مهتمة بس بالاثار الفرعونية وهم صوروا اثار اسلامية مهمة جدا نايم فيها ناس والمجاري مغرقاها (ياباي يا فاروق، للدرجة دي يا اخي؟) انا باحب فيلم ملاكي اسكندرية، اصل لسة شايفة اعلانه دلوقت. المهم يعني، ربنا يسعده ويبعده، ويارب ما يفضحناش، وللا يفضحنا بقى، ماحنا مفضوحين خلقة ربنا، بس تبقى مشكلة انه بسبب انبطاحه يمكن الاسرائيليين والوهابية اكتر ماهم متمكنين، ودي مش مخاوف سياسية والله، بس الاتنين خطر على الثقافة، الاسرائيليين بيزوروا تاريخهم عشان يعملوا ان اليهود هم اللي عملو كل حاجة، والوهابيين بيطمسوا تاريخنا اصلا عشان نطلع احنا مالناش لازمة في الحياة، هم ايه؟ متجوزين في السر؟

9 comments:

مواطن مصري said...

هيكسب

و بعدين شفتي الوهابين عندهم المذهب دة اكنة دين تاني

ربنا يهديهم او ياخدهم

انا متضامن مع فاروق حسني لائني حاسس أن دي مؤامرة ضد تواجد مصري في أي منصب عالمي

لو كان مرشح قطري ولا سعودي كنتيهتلاقي الدنيا نافخاهم
اوي

لما يبقى مصر بيتهاجم جوة اكثر من برة

مش دة معناة انة دي مؤامرة على التواجد المصري في اليونسكو

ملاكي اسكندرية كان شغال النهاردة على المصرية

Unknown said...

لو قطر وللا سعودي ما كانش ح يترشح من اساسه يا مواطن
اللي مش عايز فاروق حسني امريكا وفرنسا عشان عربي

مششششششششش عشان مصري
انت بتجيب الكلام ده منين
مين اللي بيتآمر على مصر؟ انا مش شايفة غير الحكومة المصرية متآمرة على كل الناس

وبعدين يابني ماهو بيقول لك علاقته كويسة بالسعوديين

وهو طبيعي لو علاقته كويسة بالاسرائيليين اكيد ح تبقى علاقته كويسة بالسعوديين

الوهابيين عملوا مخالفات كتير قوي تضر بالثقافة واليونسكو المفروض انه كان يتدخل

زي مثلا طمسهم لقبر ام الرسول عليه الصلاة والسلام وزي انهم هدوا بيت السيدة خديجة

دي آثار تاريخية مهمة مش من حقهم يهدوها لمجرد انها في البلد اللي هم بيحكموها

يعني تخيل كده واحد مجنون يقرر يهد الاهرامات عشان حرام

بس طبعا لانها اثار تاريخية اسلامية اليونسكو ما تدخلش وقال بركة يا جامع
ياريت
الصهاينة يتمنوا ان كل التاريخ الاسلامي يتم طمسه تماما

وبيقول لك الراجل عايزين يهدوا القبة الخضرا بتاعة الرسول ويمنعوا زيارة قبره

دي مصيبة
مصيبة
المفروض من حق اليونسكو انه يتدخل ويمنعهم لو ح يعملوا حاجة زي دي
ولو فاروق حسني علاقته كويسة بآل سعود والاسرائيليين مش ح يتدخل عشان يمنع كارثة زي دي

الرسول عليه الصلاة والسلام هو النبي الوحيد في التاريخ اللي له قبر واثار
لو طمسوها يبقى بيطمسوا الاسلام نفسه

مواطن مصري said...

اذا كان فاروق حسني ضد الوهابية

و فرنسا هتدي صوتها لفاروق حسني

و بعدين انتي مش حاسة ان فية ناس و مؤامرة علية

اصلها مش غريبة يعني أن واحد يكتب في واشنطن بوست مثلا نلاقي في جرنال مصري معارض يشتم بعديها بيوم فاروق حسني

Unknown said...

مين ده؟
ماحدش يقدر يبقى ضد الوهابية
بفلوسهم يا عم
ثم ان آل سعود حلفاء اقويا قوي لاسرائيل، هم بس مش عايزين يعملوا علاقات رسمية عشان الشعب نفسه ما ياكلش وشهم وتبقى القاصمة بالنسبة لهم لانهم اصلا زهقوا الناس في عيشتها من كتمة النفس دي، مش معقولة يكتموا نفس الشعب وكمان يعملوا علاقات رسمية مع اسرائيل، بس هم داعمين لاسرائيل في سياساتهم

مين اللي قال لك ان فاروق حسني ضد الوهابية بقى؟ الوهابية دي لقطة لاي نظام، لانها بتحرم الثورة على الحاكم حتى وان كان فاسقا، امال هم بيقولوا على سيدنا الحسين غلطان ليه؟ وهم غير السلفيين، الوهابيين يعني، مش كل السلفيين وهابيين، الوهابيين عاملين زي المسيحية الصهيونية كده، قليلين ومعاهم فلوس كتير قوي مسيطرين بها على الناس ولعلمك بقى، امن الدولة بينزل للعشوائيات في الجوامع شيوخ وهابيين عشان المذهب الوهابي بيخدم النظام وبيحرم الجهاد ضد اسرائيل من غير امام، يعني مدام رئيس جمهوريتك مش بيحارب اسرائيل انت بقى ما تقاومهاش، مطرح ما يحطك النظام بتاعك تتحط والا تبقى كافر

وعشان كده هم حلفاء لامريكا ولمصر ولاسرائيل، هم ما يهمهمش ينقبوا النسوان وللا حتى يدفنوهم مدام مش بيحاربوا مصالحهم

ما تحكمش على الامور بسطحية كده
فرنسا ادته صوتها بعد ما لحس لها الجزم هي واليهود ولولا اليهود ادوله الاوكيه فرنسا ما كانتش عايزاه لانها بتكره العرب

وانا مش حاسة ان فيه مؤامرة عليه ولا حاجة، عوكل اخد له الاذن من نتانياهو مااعرفش بقى في مقابل انه يساعده في حربه على ايران وللا ايه؟ الله اعلم، بس هو استأذن له من نتنياهو، واسرائيل قالت كده، قالت اتفاهمنا وخلاص ح نوافق عليه

كده ببجاحة
فين المؤامرة عليه بقى؟
اللي هنا مش عايزينه يروح اليونسكو عشان حاسين انه مش واجهة مشرفة
بس انا اصلا مش شايفة ان اليونسكو ده حاجة محترمة عشان ندور لها على واجهة مشرفة، ده مسيطر عليه الصهاينة الى ابعد الحدود

Anonymous said...

انا اتمنى إنه يفوز
على الأقل نحمى الفنانين و المسارح و قصور الثقافة من الحريق
ثانيا نضمن وزير جديد للثقافة بعد عقدين من الاحتكار لانه لا امل لتغييره الا اذا اراد ان يجمع بين المنصبين
ثالثا كما قلت من قبل هيخليهم فى اليونسكو - استغفر الله العظيم- يعرفوا ان الله حق
او يكونوا مثله
و فى كل هذه المزايا خير وفير

حـنــّا السكران said...

رح يجيبولكم زاهي حواس وزير ثقافة .
ـ بعدين هو التواجد المصري في منصب عالمي , ما كان بيستاهل واحد ينفع و يفيد البشرية يا مواطن ؟ ولاّ أي مصري و خلاص .. طيب كنتوا ابعتوا اللمبي .

يعني واحد بيفهم متل محمد البرادعي ..مهما كان ..ما حدا بيقدر يتكلم عليه كلمة , لأنه الرجل فهمان و مختص و تاعب على نفسه .أما واحد يحرق دين أم الثقافة عشرين سنة و بعدين نبعته على منصب عالمي و لازم نتضامن معاه بس لأنه مصري ؟
اللي بيحب مصر بيطالب بخيرة رجال مصر و شبابها , و هم كتير جدا و في على الأقل مية ألف مصري بيستاهلوا مناصب عالمية أكتر بمليون مرة من واحد اختبرتوه عشرين سنة .
و يكفي انه خيار عوكل .. هذا يسقط عنه أي أهلية كانت .
ـ كلّ عام و أنت بألف خير يا نوارة , و يا مواطن , و يا كل مصر و المصريين و كلّ الطيبين في الدنيا .

Unknown said...

جو

واحد بيفهم ايه بس يا جو؟ ده مرشح النظام المصري، وما ينفعش حد يرشح غير النظام المصري، والنظام المصري رئيسه بيعمل زيارة مفاجئة لكارفور

ده اكبر راس في البلد، بيعمل زيارة مفاجئة لسوبر ماركت

تفتكر ح يجيبوا واحد بيفهم منين؟ اهو فاروق حسني ده افهم واحد في النظام المصري كله
تخيل بقى ده النبيه اللي فيهم

وبعدين انا عايزاه يغور

ح يجيبوا زاهي حواس؟ لأ، زاهي حواس لأ، لأأأأ لاااااعااااااا

حـنــّا السكران said...

ههههه

هيدي ال لأعاااااا

بدها ناديا الجندي

ـ هو عوكل بيزور سوبر ماركت ؟؟

ههههه رايح يتطمن على الأسعار

تلاقيه سأل صاحب السوبر ماركت :

لسه في أي مواطن مصري بيتجرّأ و يدخل عندكم ؟ ولاّ بس حاشيتي و أعواني ؟

ـ أيوه أنا عارف انه مرشح النظام .. منشان هيك رفضت كلام مواطن عن التضامن معه , هو أو أي حدا بيرشّحه النظام .. و خصوصا فاروق .. لأنه مدة صلاحيته منتهية أكتر من أي منتج تاني في النظام ... ده لو مواطن أكل منه لا سمح الله بيتسمّم ..و يصبح متعصّب للعرق الاّري بدل المصري .

حسن مدني said...

الحقيقة يا نوارة أنا مش عايزة يكسب لأسباب، يمكن أهمها إنه مصري. يعني حايفضحنا على الملأ. وكل مصيبة حيعملها حتتسجل على مصر، والمرشح المصري. مش مجرد العربي. يعني مش عشان عربي أو مصري لازم أؤيده وأتمنى له الفوز.
السبب الثاني وهو تقريباً في نفس الأهمية. (الراجل) عنده عداء شديد لكل ما هو عربي أو إسلامي. وكونه يمسك منصب زي ده، ويطلع يقول على ديننا أو أي من مظاهر ديننا تخلف وتأخر والكلام العجيب بتاعه. ده حيكون أسوأ ما يطلع يقوله واحد بغاري.

وبعدين مافيش مؤامرة عليه، فيه رفض عام له. أنا والسعودية، والقوميين، والإسلاميين، والإسرائيليين كلهم ضده، وكل واحد له أسبابه المختلفة. مش معناها إنهم متفقين أو متآمرين, وإنما مصلحتهم أو اتجاهاتهم جاءت في نقطة تقاطع. وده إبداع للمرشح المصري.

تحياتي