Friday, 18 September 2009

هوبا تيتو مامبو

انا كنت عارفة انها ح تنضرب، كنت عارفة، ومن كام شهر جالي الهسهس ده وما تفهمش ميدو جايب الثقة دي منين يقول لي: ما تقوليش ايران ح تنضرب لبعدين الناس تقول عليكي مجنونة
وطبعا اول ما شفت البوم اسامة بن لادن الجديد (اللههههههه يررررحححححمهههه) جاي لنا من العالم الآخر ولقيته بيوجه رسالة للشعب الامريكي ويقول لهم انا عملت كده عشان دعمكم لاسرائيل قلت بسسسس، هم بيعملوا كده عشان عايزين يأهلوا الرأي العام لدعم اسرائيل، يبقى اسرائيل ناوية تعمل حاجة، ايه الحاجة اللي ممكن تعملها اسرائيل حاليا دلوقت؟ 
وقطعا ده كان شريط لشحن الرأي العام الامريكي لصالح اسرائيل، واللي سمع الشريط قال ان الكلام معقول، اقصد اللي سمع الشريط من العرب، قال ان الكلام معقول، طبعا، وهو ده المقصود، ان الكلام يبقى معقول بالنسبة لنا، لكن بالنسبة لهم المرحوم اسامة بن لادن عدو، والمجتمع الامريكي مسيطر عليه المسيحية الصهيونية، (راجع كتاب أمة اليمين) وبالنسبة للفلاحين والناس العادية دعم اسرائيل ده واجب ديني (ده في المسيحية الصهيونية بس عشان ماحدش يروح يمسك في المسيحي اللي جنبه، مافيش في العالم حد بيفكر كده غير الامريكان) تخيلوا مثلا شارون قبل ما يترمي الرمية دي قال لنا: انا ح اضربكوا عشان بتصلوا الجمعة... احنا؟ لا احنا ممكن نبطل صلاة الجمعة عادي، طب تخيلوا احنا من خمسين سنة لما كان عندنا كرامة وبن جوريون قال لنا ح اموتكوا عشان بتصلوا الجمعة، ح يبقى رد فعلنا ايه؟ 
وعشان بس مافيش معتوه يجيب اللوم على نجاد (ده احنا ح نسمع احلى كلام من هنا لحد شهر ديسمبر) الواحد لازم يقول الحق والمستحق والمستخبي والمستنيل على عينه، الناس دي مش ماشية في الحياة على ما تفرج كده زينا، مافيش عندهم تخطيط بأقل من عشر سنين قدام، يعني ضرب افغانستان ما كانش سببه حداشر سبتمبر لانه متخطط له من قبلها بعشرين سنة، وراجعوا بقى الواشنطن بوست نفسها وشهادات عملاء السي آي إيه. وبيحسبوا لكل حاجة، وبيدوها توقيت محدد، وبيحسبوا كل الاحتمالات المعقولة واللي مش معقولة ابدا كمان، وبيحطوا خطة لكل احتمال، حتى اقل الاحتمالات ورودا، الشهادة لله، انا مش عشان باكرههم افتري واضحك على نفسي، لا هم منظمين، وبيخططوا. يعني ضرب ايران في التوقيت ده متخطط له من ايام ما نجاد ده كان بالشورت
خلاص، ح نعمل ايه؟
توقعوا بقى:
1- اوباما مش ح يعمل حاجة خالص، واحتياطا هو جدد الدرع الصاروخي اللي في اوروبا واللي بيستهدف ايران، يعني وقت اللزوم ح يتدخل لصالح اسرائيل، بس ده احتياطا، غالبا هو عامل حسابه ان اسرائيل تخلص، ولو ما عرفتش تخلص ح يوجد اي حدث او اي حجة، امال القاعدة دي جددها ليه؟ ودلوقت بالذات؟ لكن مبدئيا كده كل اللي ح يعمله كده: تؤ...كدهو برضه يا قمر؟ تصاحبني ع القمر؟ وتسيبني معاه وتمشي لا حس ولا خبر؟ يا خبرررررررررررر، كده برضة يا قمر؟
2- الشهرين الجايين بقى اسمع احلى كلام عن الروافض المجوس الكفرة واستلم احلى فيديوهات واحلى رسايل على الميل بتاعك، وممكن فجأتن تلاقي لك شيخ طلع من البلالا يتكلم عن موقف الشيعة من حديث الافك، او ان الشيعة لما بيتوضوا ما بيغسلوش رجليهم، او ان الشيعة مسلطين على السنة ناموس كبير بابرة نحاس، ونتدهك احنا بقى في الجدل العقيم ده لحد ما الحرب تقوم، ويا سلام بقى،يا سلام لو واحد منهم طلع يستفز الشيعة ويقول لهم: الحسين كان غلطان
3- حسن نصر الله ح يتشتم، ما تسألنيش ليه؟ بس هو ح يتشتم وخلاص، كتير، زي ايام الشرشحة بتاعة يا شيخ قرد وقلة الادب دي
4- الحكومة المصرية ح تساعد من تحت لتحت، او يمكن من فوق لفوق زي ايام غزة الله اعلم، تطلب زي ما تطلب، بس بعض ممن يسمون انفسهم بالمعارضة المصرية ح تلاقيهم عاملين صدى صوت للمعارضة الايرانية، ح تعمل ايه المعارضة الايرانية؟
5- المعارضة الايرانية قبل واثناء الحرب ح يبقى لها دور كبير في ضرب الجبهة الداخلية وح يقعدوا بقى يشتموا في نجاد ويشيطنوا نجاد لانه هو السبب في الحرب دي وهو السبب في الخراب والدمار وهو السبب في خرم الاوزون وهو السبب في الاحتباس الحراري واحتباس البول كمان، وهو اللي جاب السرطان للاطفال اللي في مستشفى سبعة وخمسين تلاتة سبعة وخمسين وح تلاقي هنا بقى مطبلاتية كتيييييييييييييييييييييييير قوي، هنا في مصر بالذات دونا عن كل الدول العربية، يقولوا الكلام ده بالظبط ويكرروه زي البغبغانات بحيث تبقى الحكومة بتساعد من تحت لتحت، او من فوق لفوق، والمجتمع المصري ما بين متدينيين بيتكلموا عن الروافض الكفرة وما بين مش متدينيين بيتكلموا عن النظام القمعي اللي تسبب في الحرب، اشمعنى؟ عشان برغم من كل الهم اللي احنا فيه ده، مصر مهمة، مصر مهمة قوي، ورأي الشارع في مصر مهم، لكل الناس، وكل الناس شرق وغرب بيسألوا عن رأي الشارع المصري
احنا مهمين قوي كده ليه؟
والنبي ياخويا ما اعرف، الناس مخمومين فينا، وجزء كبير من اضعاف النظام الايراني انه يحس ان مالوش صدى في الشارع العربي (والمصري بالذات-انا باقول الشارع مش الحكومات) في اثناء مواجهته اسرائيل، لانه اصلا مسود وشه مع المعارضة وماسكين في شواشي بعض عشان المعارضة بتكرهنا، اه، بيكرهوا العرب وبيحتقروهم، وحاسين ان ايران بتقدم تضحيات لناس قلالات الاصل ناكرين فضلهم وجميلهم، زي منطق بتوع مصر اولا كده (المعارض الايراني اللي كان بيراسلني قال لي: احنا عادينا اسرائيل اول ما قامت الثورة وعملنا سفارة لفلسطين وعادينا العالم عشانها واول ما قامت الحرب بينا وبين العراق عرفات وقف جنب صدام ضدنا...اممم هو احنا باين قلالات الاصل فعلا)، ولما ايران تبقى في حرب والشارع العربي بيقول لهم يا روافض او يا نجاد يا نظام الملالي انتوا السبب في الحرب على بلدكوا، ده يسهل المهمة على البديل اللي عايز يوقعهم عشان يتحالف مع اسرائيل وامريكا ضد العرب لاننا "قلالات الاصل" وما نستاهلش كل التضحيات وانهم يعادوا العالم عشان خاطرنا
( امال تفتكروا هم معاديين العالم ليه؟ مين يعني السبب في ان العالم كله ضدهم؟ يعني لو ايران بكرة اعترفت باسرائيل - زي ما المعارضة عايزة - وضربت طناش على يوم القدس وبلا فلسطين بلا وجع دماغ، وفضل نظام "الملالي" تفتكروا ايران ح تفضل تحت الحصار؟ وتفتكروا، مش بقى امريكا واوروبا، تفتكروا اي نظام عربي ح يعاديها؟ وللا الامارات ح تسأل عن الجزر وللا ح تعبرها؟ ده ح يبقوا حبايب وجزر ايه؟ وقول له يا صاحبي وحبيبي قول له يا صاحبي وحبيبي اللي في جيبك في جيبي الللللي في جيبك في جيبي على رأي شريهان)
والمعارضة بتاعة: لا غزة ولا لبنان نحن فداك يا إيران. صوتهم ح يعلا مع قلة ادبنا احنا هنا
خلاص بقى
خلاص
ح نعمل ايه؟ ما نزعلش بقى، كل اللي يجيبه ربنا كويس، ما نزعلش، نحمد ربنا على السراء والضراء، واللي عايزه ربنا ح يكون
طب ايه يعني لو ايران انضربت وللا ولعت حتى؟ 
يا لهوتيييييييييييييي، مش عايزة اقول مش عايزة اتخييييل
خلاص بقى، خلاص، كل اللي يجيبه ربنا...احم، اذا ما كانش كويس يبقى على الاقل نستاهله اكيد 

33 comments:

TAFATEFO said...

حرب ايه .. ضربة مش حرب

جبهة التهييس الشعبية said...

اه
وايران بقى لما تنضرب ح تقول لهم ميرسي كتير على الضربة الرقيقة دي انا برضه احسن منكوا ومش ح ارد، الله يسامحكوا

mido said...

حتقولهم

جتكم ضربة الهى تنشكوا فى قلبكم يا بعدا

جبهة التهييس الشعبية said...

هههههههههههههههههه

طب والله ما انا لاعبة معاكوا تاني
وح اقول للميس عليكوا

مواطن مصري said...

هههه المقال دة المفروض ينزل في المصري اليوم و ينافس بلال فضل


يا نوارة ما هم بقالهم سنتين كل سنة جرنال يكتب يقول اسرائيل هتضرب و متضربش

السنة الي فاتت قالو هتضرب على نهاية العام و مفيش حاجة حصلت


و بعدين

احمد نجاد الديكتاتور الي ميفرقش حاجة عن عبد الناصر اعتقل المعارضين لة

بتهمة الخيانة دة غير الي ماتو و الي تم تككفيرهم و الي اتحطو في مقابر جماعية

و دة غير الي هيحصل في يوم القدس

تقريبا بكرة

يا نوارة نجاد عامل زي ب الظبط البروبنجاندا بتاعت ناصر قبل النكسة

النظام الايراني بينهار

و اراهنك اسرائيل مش هتتهور في ظل وجود ازمة اقتصادية

و امريكا مش هتحارب تاني

خلال الفترة الجاية

لأن اوبما عاوز يخرج من عنق الزجاجة

الي بوش حطة فية

عمرو امام said...

يا نوارة محدش هيضرب مفيش جندى عربى عيرفع سلاحة الا اذا كان بيدافع بس
بيدافع بقا عن ارضة عن عرضة عن لقمة عيشة هيدافع بس
بس نحرر او ناخد حقنا امبوسيبول
ابداااااااااااااااا

عمرو امام said...

نوارة فى مدونة اسمها بحلم ببكرة
صاحب المدونة صحافى
كاتب مقال عاوزك تقرائية
هو ممكن يدايقق بس لازم يبقى عندك حق الرد وتردى

TAFATEFO said...

ههههههههههه

لا حلو أوي .. تمام

مبوء .. على رأي أبو حفيظة

mido said...

عمرو امام

مش قصدك على تدوينة بتهاجم احمد فؤاد نجم؟

متاخدش فى بالك

جبهة التهييس الشعبية said...

والله انا ما شفتش المدونة دي ولا عمري سمعت عنها
بس يا زي ما ميدو قال لك كده يا عمرو
الكلاب تعوي والقافلة تسير

Dr Nemo said...

اها ...... مش عارف ليه ياجماعه بقيت حاسس اننا بنتفرج على افلام عرض تالت او حتى رابع وفى سنيما درجة تالته وكمان الفيلم مسروق من فيلم قديم بيحكى نفس الحدوته...... بس يارب ينزلوا حتتين اكشن فى النص غير حركة الشقلباظ و حبكة العكش اللى حصلوا فى عهد بوش..... تغيير عشان انا ملول اوى.

نواره معلش انا هضطر انام دلوقت قبل الشروق عشان عندى شغل الصبح بدرى اوى ولازم ابقى فايق ياهعمل لنفسى مشكله ..معلش شوفيلى انتى المش وابقى اكتبى ايه النظام وانا واثق فى نظرتك من غير تصوير ولا دياوله...... بالحق يا مواطن انتا يابنى علطول كده شخصيه احادية الجانب يعنى مفيش مره مرة تعمل زى الاخوانجى العميل الغير مثقف اشتاذ نواره وتقول كلمة حق لوجه الله من غير جدال عقيم.... فلقتنى بيوتوبيتك الوهميه دى

Nohaz said...
This comment has been removed by the author.
جبهة التهييس الشعبية said...

نيمو
هههههههههههههه

تصبح على خير
عندك شغل بدري ولسة ح تنام دلوقت؟
ربنا يكون في عونك

جبهة التهييس الشعبية said...

NOHAZ

ايوة يا حبيبتي الفريدم هاوس شغال الله ينور ومتغلغل في مصر فوق ما تتخيلي
مشتري الحكومة ومشتري المعارضة

انت فاكرة اللي بيسافروا على حساب الفريدم هاوس ده بغير رضا الحكومة؟
هأو
وزير الخارجية قال باللفظ: لو احنا مش عارفين هم رايحين ليه وح يعملوا ايه ومش موافقين ما كانوش سافروا

وش كده

والفريدم هاوس شغال في الصعيد وفي الدلتا ومش عايزة اقول شغال مع ايه ومين وبيعمل ايه كمان

وهم بيعملوا كده عشان ما يبقاش فيه بدائل شريفة للنظام المصري
هم عارفين ان النظام المصري مكروه ومش عايزين يكرروا غلطة ايران ان تحصل فجأة ثورة خارج سيطرتهم

كل حاجة تحت سيطرتهم للاسف واللي مش بيرضى يبقى تحت سيطرتهم بيتسجن يتظبط تمام ويخرج عليهم عدل
ومش عايزة افسر اكتر من كده
اصلا النظام المصري متعاون معاهم

قلل منتحرة ايه ياختي

انت فاكرة ان ده ممكن يحصل من غير علم بل ورضا النظام المصري؟

عشان تبقى فاهمة حسني رستق اموره خلاص للواد امال هو كان في واشنطن بيعمل ايه؟ وتفتكري فاروق حسني ح يدخل اليونسكو في مقابل ايه؟ وتفتكري بقى لما ايران تنضرب ايه التمن اللي مصر ح تدفعه؟

انا حطيت صوابعي العشرة في الشق خلاص

واكتر حاجة غايظاني العيال المتسولة اللي بيستنوا اي حسنة تطلع لهم من الفريدم هاوس
يابنتي
يااااااااااا بنتي

ده انا شفت بعيني ناس بتتمحلس لناس مش بيطيقوهم عشان يدوهم فرصة ويبعتوا اساميهم للفريدم هاوس
وافتحي بقك وللا اتكلمي بقى

هي النوبة بس؟ طب ايه رأيك بقى ان فيه شغل جامد جدا وعلى تقيل على البدو المصريين
في سينا وفي الصحرا الغربية والعرب اللي في القرى

وفيه واحدة بدون ذكر اسماء، ربنا يهديها بقى، بتتاجر بموضوع اضطهاد البدو في مصر ده وبتسافر على حسه وبتاخد فرص خيالية وجوايز وحاجة تطرش

طيب انت بتقولي لي ليه يا نهى؟ حرام عليكي، بتقولي لي ليه؟
طب ما العيال بتوع ايران برضه تبع الفريدم هاوس ومعترفين وبيقولوا ببجاحة
ما تسجلي على التويتر عندهم وتشوفي الكلام اللي بيقولوه

طب نعمل ايه يا نهى؟
يعني انت بتكربسيها على دماغي يعني؟

mido said...

مواطن مصرى

أى خبر تجيبه عن ايران من قناة العربية او الاعلام السعودى

كأنه محصلش الى أن يثبت العكس

و بعدين ان بتناقض نفسك

لأن كروبى اللى بيقول الكلام ده و العربية تنقل عنه

لو عليه عايز يجى يحتلنا

فصحصح معانا

و يا ريت تخلى بالك ان الازدواجية عندك نسبتها زادت أوى

منين بتتكلم على نجاد الدكتاتور

و مش بتجيب سيرة مبارك او القذافى فى مدونتك و لا بتهاجمهم

و لا عمرى قرتلك حاجة عنهم أد مقرتلك عن ايران


بطل الغيرة اللى انت فيها دى

:D :p

جبهة التهييس الشعبية said...

باقول لك يا نهى
بالنسبة لانك خايفة اننا نبقى زي العراق
ما تخافيش
مش ح نبقى زي العراق دلوقت
لان النظام ده امريكا مبسوطة معاه ومتهنية الى ان يقرروا انهم يتخلصوا منه
ومش ح يغيروه ابدا دلوقت
ابدا
بالعكس
هم بيحتووا المعارضين له عشان يحموه
الى اجل
هم مستنيين لما يخلصوا من الجزء الاسيوي من المنطقة العربية والاسلامية وبعدين احنا في الاخر

ح يحلوا بينا
لسة لسة
لسة فيه ايران وسوريا
قدامنا بتاع تمن سنين كمان
ههههههههههههه

جبهة التهييس الشعبية said...

انا بس كل املي ان ايران يبقى عندها مقاومة مش متوقعة

لان احنا مافيش خالص
ح نعمل ايه احنا؟
احنا غلابة قوي يا سيد

Nohaz said...
This comment has been removed by the author.
مواطن مصري said...

العراق عاوزة تعمل قضية دولية و تجيب لجنة تحقيق و تحقق مع النظام السوري عشان الاربعاء الاسود

جبهة التهييس الشعبية said...

ايوة يا حبيبتي
البي بي سي منظمة تخابر والواشنطن بوست وكل اللي بتقوليه

بس يا نهى احنا تخطينا مرحلة ان حد يتخابر علينا يا امي

خلاص
احنا ملط

ويا امي "ما نقعدش نأوأ على فلسطين وايران" هو ده شعار الفريدم هاوس

هو احنا ايه اهميتنا يا نهى؟

كله موصل على بعضه يا حبيبتي

فلسطين مهمة عشان كل التغلغل اللي فينا ده بسبب اسرائيل
اسرائيل مخطط لها انها تبقى القوة المهيمنة الوحيدة في المنطقة وتبقى كل الدول المحيطة تحت سيطرتها
مش مطبعة معاها

الشرق الاوسط الجديد هدفه انه يبقى الولايات المتحدة الاسرائيلية

وده له خطوات
الخطوة الاولى القبول بوجود اسرائيل كأمر واقع

لحد اللحظة دي العرب مش قابلين وجودها
اول ما ح يقبلوا بوجودها مش خلاص، مش ح نعيش في تبات ونبات ونخلف صبيان وبنات
ح ننتقل للخطوة التانية

ح تقنعي ازاي الشعوب العربية للقبول بوجود اسرائيل؟

اول حاجة: احنا مالنا ومال فلسطين؟
تانية حاجة: مالهم الاسرائيليين؟
تالت حاجة: كل الناس عدويني، اسرائيل بس هي اللي حبيبتي
يعني تفتيت المنطقة لكيانات صغيرة، زي مثلا النوبة والمسيحيين والبدو داخل مصر
او الشيعة والسنة في الخليج...إلخ

بعد ما تتفتت خالص تبتدي بقى تتجمع وتتركب على اساس تبقى كلها تابعة لاسرائيل

يا نهى اسرائيل الكبرى لسة خريطتها متعلقة في اسرائيل

لسة موجودة ما اتشالتش

ايران دولة قوية ومناوئة جدا للمشروع ده، النظام بتاعها يعني

لو ايران خلصوا منها ده ح يقصر مدة وصولهم لينا يا نهى

ما ينفعش ما أوأش على ايران لان سقوطها بيسرع سقوطي

مواطن مصري said...

http://www.alarabiya.net/articles/2009/09/17/85307.html


الدباغ نفى حدوث تقدم في المحادثات مع سوريا
العراق يؤكد إصراره على تحقيق دولي بشأن "الأربعاء الدامي"

Nohaz said...
This comment has been removed by the author.
Nohaz said...
This comment has been removed by the author.
mido said...

نهى بلاش الفرانكو أرب

مش عارف اقرا حاجة

:D

عمرو امام said...

يا نوارة كلنا نفسنا ان ايران تبقى قوة رادعة لامريكا ولاسرائيل بس دة حلم يا نوارة يتحقق بس فى حالة واحدة ان كلنا نبقى ايران وكلنا نبقى مصر وكلنا نبقى سوريا وكلنا نبقى العرلق وكلنا نبقى لبنان وكلنا نبقى الاردن
لما نبقى كياااااااااااااااان واحد
بس فى الوقت دة هنبقى قوة رادعة لاى كلب منهم
انما دلوقتى واحنا مشغولين مين الى قال الفتةى دية ودية مصدرها مين ومين الى غلط فى حق مين الاول والشيخ فولان بيقول ان الحج السنة دية حرام والشخ علان بيقول انة مكروة
يااااااااااااااااااااااااااااة
هو فى كدة طب المشايخ دول فاضين يقراءة ويتفقة فى الدين ازاى فاضين اذا كانة كلهم فى برامج على الفضائيات يبقى ازاى
طول ما احنا فى بلد او فى وطن عربى تفصل فية القوانين والفتاوى لذوى السلطة او المال والنفوذ
يبقى لو جابة الى قاعدين على القهاوى فى شيكاغوى وتل ابيب
هيروقونا
ويظبطونا
ومش لازم بالحروب لا بالجهل هيفضلة يزرعة الجهل بين العرب لسنين جاية
وهيفضلة يتقدمو هما واحنا نرجع لوراء كمان وكمان وكمان
هيفضلة يلعبة بالحكام العرب زى عرايس المريونت وكل عرض يبقى اقوى من الى قبلة
اتفرج يا سلام هنا عرض اليسد صدام حسين
والى مش عاجبة هنا بن لادن
والى مش عاجبة هنا الملك عبد الله والى مش عاجبة والى مش عاجبة والى مش عاجبة
لحاد الواد الصغير بتاع المغرب دة

مواطن مصري said...

ايران عاملة زي اسرائيل هتستنى الفرصة لما عشان تبقان على حقيقتها

تدخل في شئون الدول العربية و تسيطر على و على رائسهم مصر

جبهة التهييس الشعبية said...

مواطن
انت مين اللي حفظك البقين الحمضانين دول عشان اروح اقتله؟

mido said...

هههه مواطن مصرى

حينسيك اسمك لحد

متقتنعى بكلامه

:))

soreal said...

"نهى بلاش الفرانكو أرب

مش عارف اقرا حاجة

:D"


i second mido :P

either english or arabic ... arabic in english is torture :P

may i recommend google ta3reeb bookmarklet :)

مهندس حر said...

بصراحة مابقتش أقدر أحدد بثقة إن كان إسرائيل هتضرب إيران و ألا لأ .. قبل كده كنت أقدر أقول إن أوباما مش هايسمح بكده .. مش من طيبة قلب خالته يعنى .. لكن لأن وفقا لمصالحه ده ماكانش خيار مناسب..

دلوقت الوضع مختلف .. و برضه معرفتنا بالحاج أوباما بقت أفضل شوية .. يعنى إحنا عارفين من الأول إن كل الأوهام و الضلالات بتاعة الناس اللى فرحوا بيه هية مجرد هبل .. لكن اللى ماكوناش نعرفه إنه من بتوع اللعب فى المستخبى قوى كده ..

أوباما ماشى بإسلوب عجيب فى كل قضية تعامل معاها .. موقف قوى و واضح أيام الإنتخابات و شبورة بتقول إنه ناوى ينفذ وعوده أول ما مسك و بعدين تلاقى الموقف تميع و دخل فى حوارات غريبة و بقى ضبابى و يخليكى تتصورى إن الوضع مستحيل عشان فى الآخر يطلع بحاجة أقل كتير من اللى وعد بيها و يقولك أصل ده المتاح و الممكن و اللى قدرنا عليه.. الكلام ده حصل فى أمور داخلية فى أمريكا و آخرها مشروع الرعاية الصحية اللى الإخوة مؤيدى أوباما هناك جالهم الهسهس فى دماغهم من أسلوب إدارة أوباما ليه.. أنا أعرف ناس عندهم كريزة لطم و ترفيس مستمر بقالهم أسبوعين من اللى بيحصل فى الموضوع ده .. و واحد أعرفه اللى طالع عليه يقول: منه له منه له جاى رايح كله له..

اللى حاصل فى موضوع المستوطنات مع إسرائيل برضك واضح جدا و مرحلة الضبابية فيه مستمرة و نهايتها هنستفوجأ بخطوات تطبيع عربية بالجملة فى مقابل تجميد للإستيطان (مش البناء فى المستوطنات القائمة أو القدس الشرقية) لمدة 9 شهور.. و بعدها مفاوضات بين عباس و إسرائيل تقعد يومين و تفشل و يا دار مادخلك شر..

السؤال بقى إسرائيل هاتضرب إيران؟.. أوباما قال إن إدارته لن تسمح .. و نقدر نقيس مدى إلتزامه بالحكاية دى وفقا لما سبق أن إلتزم به.. وخدالى بالك؟

يعنى النهاردة هيلارى قالت : إن على إيران أن تقرر (الآن) إن كانت ستتفاوض مع الدول الستة أم لا..

الجنرال ماكريستال قائد القوات الأمريكية فى أفغانستان قال إن إيران تمثل خطرا على أمن المنطقة..

أمريكا وقفت مد نظام الدفاع الصاروخى فى بولندا و التشيك و الروس إستكنيصوا و الخطوة الجاية التفاهم حول إيران..

الحدق يفهم بقى .. إلا هو نجاد حدق و ألا لأ؟

Rateb said...

ماشى يا عم مواطن ايران زى اسرائيل اهو نغير وشوش بدل الاشكال العكرة اللى فى خلقتنا دى

بعيدا عن كده معرفش هل اسرائيل ممكن تدى تحذير لايران قبل الضرب بالوضوح ده حاسس كده انه يبقى قصر نظر

جبهة التهييس الشعبية said...

مهندس حر

ما اعرفش اذا كان نجاد حدق وللا لا

يارب يطلع حدق يا مهندس

يااااااااااارررررررررررررببببب

اكلمك بصراحة؟ لا، ح اكلمك بوقاحة

ان جالك الطوفان حط ابنك تحت رجليك

انا خايفة على بلدي
مصر الجائزة الكبرى واحنا مافيناش نفس يا تامر
مافيناش نفس لاي حاجة خالص احنا غلابة

لو ايران جات ارض يبقى سوريا مش ح تاخد اسبوعين ويبقى كده خلااااث خلاااااث خلااااااااثثثثثثثث

ربنا ينفخ في صورتك يا نجاد

يارب يطلع قد الكلام اللي بيقوله

مواطن مصري said...

شوفي ناس بيقولو هيدور صور للشروق من على النت


http://www.youtube.com/watch?v=io7Z48bQHho