Thursday, 24 September 2009

اتفوووووو


تحديث: نزلوا اسامي الناس اللي قاطعت نجاد ومش من ضمنهم البانيا، يمكن اشوف شفت غلط
اميركا وبريطانيا والارجنتين واستراليا وكوستاريكا والدنمارك وفرنسا والمانيا والمجر وايطاليا ونيوزيلندا

انا رجعت من الشغل بدري لان عندي صداع نصفي ودراعي الشمال واقف ودايخة
وجنبي واجعني من ساعة ما شفت خطبة نتانياهو ومع ذلك مش قادرة اسكت، انا عايزة اعرف لستة باسماء الدول الحلاليف اللي حضرت الكلمة دي وفضلت قاعدة، سيبك من الدول العربية، احنا خلاص رمينا طوبتهم، بس ده واحد وقف ماسك مسطرة وعمال يقول لهم انتوا ما عندكوش دم.؟ ما عندكوش احساس؟ للحضور، بيهزأ الحضور، الحضور كلهم، يعني الصين واليابان وكده يعني

انا شفت مقعد لبنان خالي، وقالوا ايران ما حضرتش، ما اعرفش سوريا حضرت وللا لا، بس جوز حلاليف كانوا قاعدين شفتهم بعينيا وفد مصر ووفد المغرب شفتهم بعينيا وهو عمال يقول دي ارضنا وارض اجدادنا ومع ذلك احنا ح نسمح للفلسطينيين بدولة على شرط يعترفوا ان دي دولة يهودية وايران دولة دينية ولازم يتم محاربتها، ووقف بعد ما هزأ كل البهايم اللي كانوا قاعدين، قعد يبرر قتل المدنيين ويقول ان ضرب سيارات الاسعاف والمستشفيات والمساجد كان مبرر عشان دي كلها مخازن سلاح، مخازن سلاح في عربيات الاسعاف
وده مين ده اللي كان قاعد في وفد المغرب ده؟ ده ملك المغرب؟ ده ملك المغرب وللا انا شفت غلط؟ ملك المغرب بجلالة قدره قاعد يسمع تلطيش وتهزيء من حتة واد صايع مجنون جربوع بيشتغل مع المافيا؟ يارب اكون شفت غلط، ووفد مصر قاعد مبتسم وشكلهم زي البقر؟ ليه؟ ليه؟ احنا مش مجبرين على كده، ايه اللي جابرنا؟ الله يفضحكوا، فضحتونا الله يفضحكوا، يا حلاليف، يا بهايم، يا خنازير، خنازير ايه؟ الخنازير لما اترمت في الجير الحي كانت بتصرخ يا عديمي الدم والاحساس والكرامة والانسانية والاخلاق والدين، يا مرمطونات يا جرابيع يا شحاتين يا متسولين يا دلاديل يا شباشب يا حشرات وحشرات حتى مش سامة يا بهايم، بهايم ايه؟ ده الواحد يشتم البهايم بيكوا، ليه؟ هو حد قال لكوا حاربوا؟ ليه تتهزأوا وتتمرمطوا وتقعدوا مبتسمين؟ انتوا بني ادمين انتوا؟ وبس مش شاطرين غير علينا؟ ويقول لنا احنا يهود لكن انتوا مش مسلمين، كده؟ كده يعني؟ استغفر الله العظيم يا رب، يارب ايه الذل ده كله يارب، احنا عملنا ايه استغفر الله العظيم.
انا ح اتجنن، باي حق اي دولة في الدنيا تقف تهين الناس بالطريقة دي؟ ثم ايه البانيا دي؟ هي وضعها في الحياة البانيا دي عشان تقاطع كلمة نجاد امبارح وتقعد في كلمة نتانياهو؟ مين البانيا يعني؟ بنت مين في مصر؟
النهاردة عشر طيارات اسرائيلية اخترقت الاجواء اللبنانية، عشرة، عشر طيارات، والموكوس فاروق حسني باس الاعتاب وعمل كل اللي نفسهم فيه وبرضه ادوله على قفاه، مستنيين ايه؟ قاعدين تعملوا ايه؟ على رأي نصر الله اذا مش قادر تحارب انت مش مجبر تذل نفسك
انتوا ايه؟ ما بتحسوش؟ طب ما بتحسوش، ما بتفهموش؟ الراجل ده هزأكوا.. هـ ز أأ كووووو.. اسبلها بالانجليزي؟
h a z a a koooooooooooooo
ده حتى مذيعة السي ان ان قالت: ده قال كلام غريب قوي، ده قال يا اما تبقوا مع اسرائيل يا اما انتوا مع الارهاب
طب ملحوقة، طب قدموا اعتراض، قدموا تظلم، اعملوا اي خرا على دماغكوا جتكوا القرف، جتكوا نيلة، يا بليدي الاحساس، يا موميات متحنطة، يا قباقيب، ماحدش فيكوا في رجله جزمة يديله بيها يا حافيين يا متسولين؟ ماسك عليكوا ايه؟ قولوا لي ماسك عليكوا ايه؟ عارف عنكوا ايه احنا ما نعرفوش عشان يتصرف معاكوا كده؟ فيه ايه؟ فيه ايه؟
طب اياك تفتحوا بقكوا معانا يا وكسة تاني ابدا، اياك تعملوا علينا حكومة وللا نظام وللا دولة، اياكوا، على الله اشوف ظابط بوليس بيكح في الشارع، على الله حد فيكوا يورينا وشه في خطبة منيلة على دماغه، يا ماسورة مجاري وطفحت في حياتنا ومش عارفين نسدها ازاي
اتفووووووووو
شايفين الاسرائيليين فرحانين بنتانياهو ازاي؟ عشان عمل لهم كرامة
احنا بقى اللي بيعمل لنا كرامة بنمسح بيه البلاط، ليه؟ تعمل لنا كرامة ليه يا قليل الادب؟ ما عاش ولا كان اللي يعمل لنا كرامة
اه نسيت اقول لكوا، الست الكتكوتة مندوبة فلسطين فضلت مرزوعة تسمع الكلمة وعلى ما اتمهمزت وهزتها وقامت اسم النبي حارستها اعتراضا كان خلاص خلص كل القرف بتاعه وكان فاضل له دقيقتين على الانتهاء من الكلمة
طب وليه تعبتي نفسك يا روح خالتك؟ ما انتي قعدتي وسمعتيه وهو عمال يقول الارض ارضنا عن ابونا وجدنا وبكرة وللا بعده لعيالنا بعدنا، وسمعتيه وهو بيقول ضرب المدنيين ضرورة وغلطة حماس، ايه اللي صابك في اخر دقيقتين وجاب لك والعياذ بالله داء الكرامة

17 comments:

abotl7a said...

انا عارف ان انتي معجبه بايران بس ايران مبتعمليش كدة لوجه الله ولا للاسلام بدليل ان ايران لما الصين اعدمت الايغور ودبحتهم من كام شهر ايرا مابعتيتشي حتي برقيه احتجاج للصين دا بالعكس علا قتهم بالصين سمن علي عسل وبعدسن نسيتي العراق وعرق الموت ومليشيات بدر وابودراع مش دول فلوسهم منهامع العلم دول مفرقعوش حتي بمب العيد قدام جندي امريكي لادول كانوا بيدبحوا في الشعب العراقي واسئلي ابودراع عمتاايران ملهاش الامصلحتها دا لازم نعترفبيه لازم نتعامل بيه علي الاساس داوناخد من مصلحتهم الي يهمنا من مصلحنا من مشيس درويش

simplymoi said...

They are dead corpses. Dead do not complain or withdrawal, Thank goodness that they didnot kiss him. Drink green tea.

جبهة التهييس الشعبية said...

ابو طلحة

اه
طب واحنا مصالحنا فين؟ يعني ما نعملش زيهم وندور على مصالحنا احنا ليه يعني؟ يعني ليه نفضل خدامين يعني
لا حرام
الخدامين ناس شقاية بياكلوا لقمتهم بعرق جبينهم

احنا ولا حصلنا خدامين

ليه كل الناس بتدور على كرامتها ومصالحها واحنا لا
اه
ايران ما بتعملش كده لوجه الله
واحنا بقى خدنا مداس لكل كلب يعدي عليه لوجه الله؟
ما بنشوفش مصلحتنا احنا كمان ليه؟

سيمبل مواه
انا ح اموت، دايخة وخايفة انام ما يصبحش عليا الصبح

فاروق عادل said...

@ abotl7a يكفى ان عندهم كرامة الكلمه اللى اتمسحت من السياسه المصريه

Bella said...

يعني احنا خيبتنا ماوردتش على حد صراحة وعندنا نفس نعيب على ايران ونقول انها بتعمل كده علشان مصالحها

طيب وماله

ياريت يعني ربنا يفتح على العقول المظلمة اللى عندنا وتنور وتعرف مصلحتنا الحقيقية فين بدل شغل لحس الاحذية اللى بناكل بيها كل شوية والتانية ده وياريتنا عاجبين اصحاب الاحذية الامريكان والصهاينة

بلا وكسة

جبهة التهييس الشعبية said...

آه
آه
مشروعهم نووي واحنا مشروعنا الصرف الصحي
طب نزعل طيب
يعني القذافي ما عملش حاجة في حياته، بس زعل، يعني بين انه زعلان شوية
انما احنا في عصر المنوفي ده ولا حتى بنزعل
ما بيزعلش، ما بيزعلش خالص، حتى حفيده مات ما زعلش
مستر اكس مالوش نهاية
وما اعرفش جايب طقم الحلاليف اللي دارز بيه الحكومة ده منين؟ لقى فين كل اعضاء فرقة مين اللي قال ان الاحساس نعمة دي؟ لقاهم فين، احنا عندنا التعداد ده من متبلدي المشاعر؟
هو اردوغان اتكلم؟

فاروق عادل said...

هو القذافى كان حاضر الجلسه اصل لو حضرها هو مجنون اه بس جرئ والله يعمل زى منتظر الزيدى

جبهة التهييس الشعبية said...

والله ما اعرف كان حاضرها وللا لا
ماحدش اهتم بانه يقول مين كان حاضر ومين ما كانش حاضر
مش زي اللي سابوا الكلمة بتاعة نجاد هللوا لهم في الاعلام قوي

مصر 30 said...

متنسيش إن مشروع الصرف الصحى بتاعنا فشل و دخل فى مياه الشرب

عاشق الجنة من الإخوان صلى على النبى said...

أنتي باين عليكي محروقة منهم قوي
بس بالراحة شوية
ايه الشتيمة دي كلها
هنقول ربنا يخلصنا منهم بقي
صلي علي النبي

mimi said...

ألف ألف سلامة عليكي من كل التعب ...

بس ليكي حق ... ده راجل والعياذ بالله مستفز ...

كفاية أسمه نتن يا هوووووووه

تحياتي ليكي وأنا من محبي كتاباتك


عيد سعيد

Ideas 4 Egypt said...
This comment has been removed by the author.
mido said...

انت ليه لما قلتلك تفتحى الميل تانى

مفتحتيش ؟

:S

دكتور كويتي said...

تسلميلي هالكلمات
سلام من الكويت

Ahmed Nasr said...

ايه ده ايه ده ايه ده؟!!

ده بيهزأهم لمجرد انهم سمعوا نجاد وهو بيتكلم!!

إيه سفن إيه!!!

انا قبل ما أسمع الكلمة تخيلت انه كان بيتباكى علشان موضوع الدعوى ضد اسرائيل!!

انما كمان عايز يقول لنا نسمع مين ومنسمعش مين؟
لأ وبيتكلم عن (الهولوكوست ديناير) كأنه بيتكلم عن منكر البعث والحساب!!

كتير والله، كدة كتير بجد!!

BoBo said...

والله يسلم بقك.. انا متابعاكي على طول على فكرة بس اول مرة اعلق.. بجد فشيتي غلي من الوضع الهباب دا.. وبعد كدة تلاقي واحد عبقري يقولك حسن نصر الله دا شيعي وحرام تحبوه وتعتبروه بطل من ابطال الاسلام.. حاجة تشل والله.. اومال مين ابطال الاسلام يا عباقرة التاريخ؟
هدي نفسك بس يا بنتي شوية احسن هو دا اللي هما عاوزينه.. احنا يجيلنا ضغط وقلب وسكر وسرطان وهما صحتهم تبقى بمب.. حسبي الله ونعم الوكيل

جبهة التهييس الشعبية said...

كتير قوي

فوق الطاقة يعني