Friday, 4 September 2009

ووركاهوليك

على قناة تي في سانك من كام يوم كانوا عاملين برنامج طويل عريض عن مشكلة فظيعة، مشكلة مريعة، مشكلة تهدد الامن والاستقرار والمصلحة القومية
عدد الوركاهوليك بيزيد في اوروبا وامريكا
workaholic
يعني مدمن شغل، ما بيقدرش يبطله حتى يوم الاجازة بيروح الشغل ويشتغل "مما يؤثر على العلاقات الاسرية والانسانية" لا وايه، عندهم مصحات لعلاج مدمني الشغل
جابو كام حالة من مدمني الشغل، لو ده الشغل هنا في مصر كان زمان كل المصريين وركاهوليك
واحد قال: الشغل اهم حاجة في حياتي لانه هو اللي انا باخد عليه تقدير حقيقي مقابل المجهود اللي بابذله، البني ادمين ممكن تعاملهم كويس وييجي رد فعلهم اكبر او اقل من فعلك، لكن في الشغل انا عارف لما اعمل ايه ح يحصل ايه، وده بيحسسني بالامان، الى جانب ان التقدير مادي ومعنوي وكل ما اشتغل اكتر كل ما فرصتي في تحقيق مراكز اعلى وفلوس اكتر بتزيد عشان كده باحط كل جهدي في الشغل
!!!!!!!!!!!!!!
يا سلاااااام، بقى الشغل هو المكان الوحيد اللي كل حاجة بتعملها فيه بتتقدر؟
طيب لو مسألة الوركاهوليك دي قالقة الفرنساويين شوية يقدروا يبعتوا الوركاهوليك اعارة لمصر، ولا مصحات ولا وجع قلب
والله ما فيه اجن من اللي بيعالجهم، واحد مبسوط في شغله، وحاسس انه كل ما ح يبذل ح يتقدر اكتر، فبيبذل اقصى جهده يقوم ولاد المجنونة يدخلوه مصحة؟

11 comments:

احساس لسه حى said...

الاعلام الغربى ده مشكلة

لما يعرض اى مشكلة صغيرة يحسسك باهميتها ويقدر يوسعها ويعرضها ويكبرها

اكيد فى ناس بتحب الشغل ويمكن مدمنين شغل زى الووركاهوليك

بس فى ناس اضعافهم بيستمتعوا بحياتهم وبيسافروا وبيلفوا العالم

والاسرة عندهم بايظه لاسباب اكبر من الووركاهوليك

سلام

محمد خيري said...

ههههههههههههههههههههههههههههه

mido said...

لا طب مهو حيدمر حياته الأسرية فعلا

و خاصة انه حيهمل الطرف التانى

فتاه من الصعيد said...

انا بشتغل 10 ساعات في اليوم

بس بقضي نصهم ع النت :)

شوكولاتة said...

احنا لو عندنا عشرة وركاهوليك هنبقى ولا الصين ده أحنا هنضرب الأمريكان على قفاهم علشان إحنا أصلا أذكى منهم بس إحنا مقضينها فهلوة

تحياتي

مواطن مصري said...

طيب ينفعي واحد وركهولك يجي مصر و انا اروح اشتغل مكانة

على فكرة فعلا ادمان الشغل ممكن يدمر الحياة الاسرية

انا اعرف ناس في مصر ممكن يشتغلو ب ال 14 ساعة و ال 12 ساعة متواصل

و ممكن ياخدو شيفت بليل و النهار مع بعض و يبات في الشركة

د. ياسر عمر عبد الفتاح said...

طيب مدام همه متضايقين منهم أوي كده
يصدرولنا منهم شوية
ولو حتي بعتوهم بدل المعونة

أحــوال الهـوي said...

لان الطبيعي هناك اللي بيشتغل عندهم بيتقدر و يترقي و اللي بيبلطج عندنا هو اللي بينول التقدير

تشتغل كتير تغلط كتير
حكمه مصريه قديمه

تحياتي

soreal said...

am not workaholic, but am volunteering to do overtime tomorrow , the same i did last week :P


honestly, work here (west) is not like work there (east)
its nerve wrecking...

i normally have saturday and sunday off, if i kept having over time with no vacation for a couple of weeks, i really really feel exhausted ... and might even end up sick

and it has a long term effect on productivity, this is why they treat this issue seriously...


if u want my opinion, arabs are workaholic , but in its final stage :P

جبهة التهييس الشعبية said...

احنا عندنا كتير وركاهوليك هنا
بس مش لاقيين فرصتهم يا عيني
اول ما بيطلعوا من هنا بيفضلوا يشتغلوا زي الحمير ويبقى ده كل المراد من رب العباد
قال متضايقين عشان عندهم ناس مدمنة شغل

على رأي واحد صيني واحدة صاحبتي بتقول له: هو انتوا على طول بتشتغلوا كده
قال لها: امال نعمل ايه تاني؟
ماهو لو ما اشتغلوش الرجالة ح تقعد على القهوة والستات ح تتكلم في التليفون

البنفسج الحزين said...

مفيش اجمل من العمل والشغل وانا عن نفسي لو الاقي نوعيه الشغل اللي فعلا كل ما ابذل فيه مجهود اكتر كل ما يديني تقدير مادي ومعنوي اكتر (زي ماالراجل ده بيقول )هابقي حمارة شغل بس يا خسارة هو فين النوع ده من الشغل الشغل في مصر يا عزيزتي كده وكده وبرضه المرتبات كده وكده.