Saturday, 5 September 2009

حد يجيب لي عمر الشريف من تحت قطاقيط الارض

هو بيعمل برنامج على الفضائية المصرية مع مذيعة أني توك (اي كلام يعني) كده، وانا مش باتفرج لاني كفاية علي قوي باضيع وقتي مع حرب الجواسيس في البيت وبنفتح ليلى مراد في الشغل عشان تطري القعدة
(نصيحة لوجه الله: اللي مش ح يقدر يتابعهم في رمضان لازم يتابعهم بعد رمضان ولما عينيكوا تدمع من الضحك ادعوا لي عشان ادخلت السرور على نفوسكوا، الفرخة بطلت تقول: إيوإيوإيو.. وبقتش تشتشكلم كدشه، فجأة قلبت ام عبده، واحمد فلوكس عامل دور انور وجدي وعمال ينكش في شعره ويفقر زي اللي بيقروا ع الترب، وحرب الجواسيس بقت ايه، عثل عثل عثل، اكتر من اني اقول لكوا ان واحد في المانيا في الستينات سايق عربية رينو موديل التمانينات؟)
بس انا فتحت بالصدفة امبارح لقيته - انا باحبه زي ما كل الستات بتحبه - وسمعت الحوار الاتي:
عمر الشريف: ولا اتعذب ولا حاجة انضرب بالرصاص ومات ايه العذاب في كده؟
المذيعة ال
any talk:
بس السادات برغم كل اللي عمله يا استاذ عمر يستاهل يتكرم مش يتقتل
عمر الشريف: ده برة بقى لكن هو بالنسبة للعرب يستاهل يتقتل، انا ماليش دعوة انا باقول لك اللي قتلوه كانوا بيفكروا في ايه، هو صالح اسرائيل وهم زعلانين، دي حاجة بقى تزعل العرب كلهم، فهم زعلانين منه عشان كده، عبد الناصر عمل حاجات تانية، مع ان فلسطين ضاعت ايامه، بس هو عمل حاجات تانية خلتهم يبقوا مبسوطين، ماحدش بقى زعلان منه
المذيعة الاني توك: طب حضرتك كلمتنا عن علاقتك بعبد الناصر والسادات كلمنا شوية عن حسني مبارك
عمر الشريف: ما اعرفوش.... شفته تلات مرات كده، كان راح (قال حتة مش فاكراها) واخدني معاه
any talk:
طب حضرتك عشت ايام عبد الناصر والسادات ايه رأي حضرتك في فترة حكم الرئيس حسني مبارك
عمر الشريف: بصي انا بقى مصدق انه لازم يبقى فيه رئيس، مش مهم يبقى ايه، بس الظاهر موضوع الديمقراطية مش نافع هنا في الدول العربية، انا شايف كده يعني، مش لازم كل الناس تشوف كده، بس مثلا اهي العراق، صحيح كان فيه راجل وحش بيعذب الناس بتوعه بس كان لهم بلد وتجارة وكده عايشين يعني، دلوقت ايه؟ الامريكان دول اصلهم للاسف ما عندهمش مخ خالص، مافيش مخ
any talk:
بس مجهودات السيدة سوزان مبارك للنهوض بالمرأة والطفل والمجتمع و...
عمر الشريف قاطعها: انا برضه رايي زيك كده، مش ده رأيك وللا انت بتقريه من الورق؟
any talk:
لا ده رأيي لان دي حقيقة
عمر الشريف: خلاص انا زيك برضه
--------
ههههههههههههههههههههه ايه الراجل الانتيكا ده؟ انا عايزة اشوف كل الحلقات ده ح انبسط قوي، وايه المذيعة الكسر دي اللي جايبينها لعمر الشريف؟ واكيد بذكائها النادر زنقته زنقات كده كتير، واكيد طبعا عمل ردود افعال زي دي كتير، انا عايزة اتفرج، حد يجيب لي الحلقات دي على النت

14 comments:

TAFATEFO said...

ده برنامج أهبببببببببل .. المذيعة ممثلة اسمها مروة حسين .. ومفيش أي وجه مقارنة بين جذور الأبنودي وجذور عمر الشريف

أبو أمك said...

مين عمر الشريف بقى ؟

Founoon said...

لا جيبي الحلقات من الاول بقى واتفرجي :) الراجل دا رهيب
فتى احلامي
انا خايفة في يوم من الايام اشوفه ع الحقيقة لان هيبتي هتروح خالص وهعمل زي مجانين ملك الجير واجري واصوت واعيط وكل الحاجات
المذيعة غبييييييييييية غبية غبية غبية غبية غبية غبية غبية غبية وكفاية كدا احنا في رمضان ما تجيبيش سيرة ناس غبية تاني ارجوكي في رمضان

mido said...

هم حلقتين بس باين

اتعرضوا برده على القناة التانية

-------

بس رأيه فى الديمقراطية مش عاجبنى خالص

:)

mido said...

شوفى جزء صغير من الحلقة لغاية محد يرفع الباقى

مهندس حر said...

تفاتيفو حاطط نجيب ساويرس مع إبراهيم عيسى على المدونة بتاعته .. روحى إتفرجى عليهم أحسن ما تدورى عل عمر الشريف مع البتاعة اللى بتقولى عليها دى..

أنا غير مقتنع على الإطلاق إنى أهتم بسماع الآراء السياسية لواحد ما لمجرد إنه مشهور أو نجم .. لو لشخص ما تاريخ فكرى بمعنى إنه سبقله إنه قدم آراء و أفكار تستحق النظر فيها يبقى الواحد يهتم بسماعه سواء كان مع أو ضد توجهاته .. لكن الناس الغلابة دى اللى علاقتها بالسياسة زى علاقة خالتى أم بمبة بمعاهدة منع الإنتشار النووى فمفيش أصلا داعى لإقلاق منامهم بأسئلة أكبر من الحيز المتاح فى نافوخهم للأمور دى..

Sosso said...

Ana bardou batfarrag fih to7fa ! Bass bsara7a el beta3 el moozi3a 3amaletli shalal. 7omara begad ya3ni ma3a 7ad fe zaka2 Omar Sharif gaybin beta3a keada 7aram 3lihom we ba3deen el montage eh el beta3 daa!
Begad 7aram ragel 3asal zayy da yegiboulou 7omara zayyi di te7awrou.

جبهة التهييس الشعبية said...

لازم تشوفوا الراجل الايطالي صاحب الاجانس اللي بيشتغل فيه نبيل في هبش المهاسيس
من الصعيد الدواني

lymona said...

تعقيبي الوحيد على مسلسل حرب الجواسيس هو وجوب مشاهدة مسلسل هدوء نسبي ... عمل رائع بكل المقاييس يعني من الناحية الفنية كامل متكامل تحسي فيه ان اصحاب العمل احترم عقل المشاهد جدااا وهذا بالتالي يولد احترام من المشاهد لصناع العمل .. و من الناحية الشعورية انا لي تعاطف خاص مع العراق واهله ولكن ستجدي البعض منا نحن العرب لن يستقبل المسلسل بطريقة صحيحة ويدع لأراه الشخصية و"تحامله " على العراق سواء في عهد صدام او في عهد الغزو تقف عائقا اما الحكم على العمل بصورة موضوعية ... ولكن بكل موضوعية انا اقول انه افضل الاعمال الدرامية في هذه السنة ولو اني لم اتابعه بصورة منتظمة لكنني على قلة الحلقات التي تابعتها انبهرت باحترافية العمل ...

mido said...

نوارة

شوفتيه و هو بيقول

بتاتس

بتاتس

:D ;D ;D

simplymoi said...

You are so hilarious, try to be a TV critic. Nawara you are so funny.

واحد من العمال said...

عمر الشريف فنان صحيح
لكن لا يعتد بأرائه السياسيه والأجتماعيه لأن من الواضح أن أرائه مسلطحه جداً

جبهة التهييس الشعبية said...

انا عايزة اعقب على حاجة
ابو امك بيسيب تعليقات مسخرة
هههههههههههههههه

ياسمين حميد said...

قصدك برنامج الجذور؟