Tuesday, 1 September 2009

طب انت ح تعمل ايه يا استاذ جمال؟

بمناسبة الشهر الفضيل، ونظرا لحبسة الشياطين فانا في اقصى حالاتي السنتمنتالية المهترئة بحيث اني واخدة قرار (اظن انه مؤقت) اني اعذر الناس على قد ما اقدر، ومن ثم فانا مش ناوية اقسو على حد، حتى المفتريين، بس والله، اخوة ومحبة ولوجه، الاستاذ جمال ح يعمل ايه؟ يعني انا عمالة اقول انا لازم احط نفسي مكان الناس عشان ارحمهم يمكن ربنا يرحمني، طب انا باحط نفسي مكانه، ح اعمل ايه؟ ح تعمل ايه يا استاذ جمال؟ لا حولا ولا قوة الا بالله، والله العظيم صعبان عليا، والله صعبان عليا
فيه حكاية قريتها زمان قوي بس فاكراها كويس جدا لانها اكلت دماغي، في الطبقات الكبرى لابن سعد، الجزء التاني، الطبقة الاولى من الصحابة، فصل عمر بن الخطاب، ولحد وقت قريب كنت فاكرة الصفحة كمان بس بقى السن
الحكاية بتقول ان سيدنا عمر وسيدنا العباس عم الرسول كانوا اصحاب قوي، واتفقوا مع بعض ان اللي يموت فيهم الاول ييجي للتاني في الرؤيا ويقول له ايه الاخبار، لو فيه خير معين يستزيد منه، حاجة غلط هو مش واخد باله منها كده (سبحان الله على اليقين). قام جه عمر اتقتل في حياة العباس. العباس بيقول قعدت استناه يجيلي ما جاش لحد ما قلقت عليه (ما شكش في حاجة، قلق عليه هو)، بعد سنة لقيته جاي في الرؤيا بينشف عرقه وبيقول لي انا لسة مخلص حساب حالا
"لكني وجدت ربا رحيما"
بعد سنة، بعد الرحمة والرأفة خلص حساب بعد سنة
طب انت ح تعمل ايه يا استاذ جمال؟ انا لو مكانك اجري بالمشوار، اولا احنا تمانين مليون، ده الجزيرة العربية كلها بمصر وفارس والعراق وفلسطين ايام عمر ما يتهياليش ابدا انهم كانوا يجيبوا الرقم ده، تعداد الناس كان قليل، وهو كان عنده فرصة يمشي يسأل الخنساء بتعيط ليه، ويدخل على ست فقيرة بتدعي عليه ويقف يطبخ لها، الخليفة، الخليفة بيطبخ لها ويحط لها الاكل هي وعيالها وهي قاعدة زي الباشا وبتشتم في عمر عشان ما تعرفش ان ده عمر، وهو سامعها وساكت
ويقولوا شدة عمر، انا قريت سيرة سيدنا عمر ده في ابن كثير، وابن سعد، وكتاب تاني اسمه عمر بن الخطاب ما لقتش غير واحد كل الناس بتزعق له، الراجل اللي قاعد يسكر يزعق له ويقول له طب انا شربت خمرة وده ذنب واحد، انت بقى اتجسست عليا وما دخلتش البيت من الباب ودخلت من غير اذن، دول تلات ذنوب اتفضل اطلع برة، وطلع، طلع ياعيني، الخليفة اطرد يا استاذ جمال من بيت واحد سكران وطلع من سكات، وام سلمة زعقت له، وواحدة ما نعرفش اسمها لحد النهاردة زعقت له في المسجد قدام الناس، حتى مراته كانت بتزعق له قدام الناس، طب انت ح تستحمل تعمل كده؟ انا لو مكانك مش ح استحمل كل الناس تزعق لي كده، ح اعيط
ثم انا لو مكانك وجالي واحد يقول لي ابن الوزير وللا السفير وللا المحافظ بتاعك ضربني مش ح اقدر اجيب ابن الوزير من قفاه من اخر الدنيا واكتفه للفلاح في وسط الشارع والم الناس عليه وقدام ابوه اقول للفلاح اضرب ابن الاكرمين حتى تشتفي، خصوصا لما يبقى صاحبي وبيني وبينه عشرة سنين يعني وابن بلدي، وده واحد غريب، والرومان كانوا بينشروا اهله بالمنشار ويفقعوا عينيهم، ولو الراجل عارف ان عمر زي الرومان ما كانش طخ المشوار ده كله، انا لو مكانه مش ح اقدر، ممكن يبقى نفسي اعمل كده، بس صعب
طب حضرتك ح تعمل ايه؟ انا والله باكلمك اهو بالراحة عشان ماليش مزاج ازعل اي حد مني، ده اختيار صعب قوي
ثم احنا شعوب مفسدة بسبب القهر اللي عانينا منه لسنين، مش ح تلاقي ناس تزعق لك يعني زي ما عمر كل ما يفكر في حاجة فيها احتمال خطأ يلاقي ميت واحد يطلعوا فيه، الحاكم الامريكي اول ما مسك العراق زعق للمساعدين العراقيين وقال لهم انتوا بتفسدوا حكامكوا لو بتعاملوهم زي ما بتعاملوني، ده الامريكاني المحتل، انت بقى ح يتسلط عليك ناس كتير تفتنك وتغرك وتزين لك وتحوش عنك اي حد ممكن يزعق لك، ومش ح تعرف تلف على تمانين مليون وتطبخ لهم، وبعدين السياسة الجديدة اللي انت عاملها وعامل لها اعلانات الجنية اللي بيلف والاستثمار اللي بيلف عشان تقنع الناس بالنظام الرأسمالي فيه منه قلة مستفيدة وكروشها متعبية ودول اللي ح يبقوا حواليك، واغلبية ح يتخرب بيتها وتجوع ومش ح تعرف بيهم او ح تعرف بيهم وتلاقي حد يقول لك: التوزيع غير العادل للثروة افضل من التوزيع العادل للفقر، ده كلام ناس مستفيدة مش ناس بتخاف من ربنا، وح تلاقي ناس كتير تقول لك قال الله وقال الرسول ويلبسوا الحق بالباطل عشان يكنزوا الذهب والفضة وكله بالشرع وبما يرضي الله، الصنف ده ما كانش موجود ايام عمر، الناس يا كانوا مؤمنين ومتعلمين من الرسول، يا منافقين وباين عليهم، يا مش مسلمين، ما كانش فيه الناس اللي بتأول الدين على كيفها عشان تاكل الشهد من وراه وتعبي عبي  شيل شيل، في النهاية انت اللي ح تتحاسب على الجعانين لوحدك، كل اللي بيدافعوا عن "الفكر الجديد" اللي جوع الناس ومخليهم رافعين ايديهم بالدعا ليل نهار يوم القيامة ح يهربوا منك، وحتى لو حبيت تعمل عمرة وللا تحج ح يفضوا لك الكعبة، مش ح يبقى عندك الفرصة اللي جات لسيدنا عمر وسيدنا علي لما شافوا واحد بيطوف وبيعيط قاموا قالوا الله الراجل ده كويس، ياللا نمشي وراه عشان ناخد من الرحمة اللي نازلة عليه وفضلوا ماشيين وراه لحد ما الراجل برضه زعق لهم وهو مش عارف مين دول، قاموا يا عيني اعتذروا له ومشيوا، ماحدش كان بيعرفهم، لا شكلهم معروف ولا لبسهم يقول انهم ناس مميزة ولا ماشيين بحرس يحوشوا عنهم الناس اللي بتزعق لهم في الرايحة والجاية
كل ده وفضل وهو بيموت يقول: ويل لعمر ولأم عمر إن لم يغفر الله لعمر
هو ادرى، مدام كان بيعيط كده يبقى هو عارف انه امر جلل، يعني هو لما يقول ربنا ح يحاسبني على الناقة في العراق لو تعثرت كان بيتنطع؟ هو متعلم من الرسول رأسا وعارف الحساب بيبقى ازاي، ولما يعيط يبقى له حق يعيط عشان هو عارف، واديه طلع بيتحاسب سنة
امال انت ح تقعد كام قرن؟
بلاش، والله العظيم نصيحة اخت لوجه الله، حد بيحبه ويخاف عليه يقول له الكلام ده، بلاش، انا عارفة انه هذا ما جناه ابي علي وما جنيت على احد، وانه واخد على النعمة وفتنة التنعم اوحش من فتنة الفقر والرسول كان بيقول على الفقر ملهي بس كان بيقول على الغنى مطغي، ومش سهل على بني ادم اتربى في العز والسلطة انه يتخيل نفسه عايش عيشة تانية، ده كده زي ما انا حد يطلب مني اني اسيب بيتنا واعيش في العشوائيات، احم، هو انا عملت حاجة شبه كده من فترة، بس صعب، وناس كتير ما تقدرش عليه، انا عارفة والله، وحاسة بيه كمان، شوفوا بقى بركة رمضان؟ انا حاسة بجمال مبارك، بس الدنيا بتخلص، على رأي عمر: انها مدة يسيرة. وكله بيعدي، الاصعب اني الاقي نفسي واقفة بيتقال لي اسامي ناس عمري في حياتي ما شفتهم ولا اعرفهم وبيقولوا لي: انت اذيتي الناس دي، وياسلام لو اتواجهت بيهم: منك لله.. يا عم وانا اعرفك؟ واطلع في الاخر خربت بيته وللا خليته ينتحر وللا يسرق وللا يقتل من كتر ما انا مجوعاه، كل ده وانا ما اعرفوش، يا ساتر يارب، يا ساتر، اعوذ بالله، والنبي يارب ما تكتبها عليا ولا على اي حد
 بلاش والنبي: انج سعد... فقد هلك سعيد  

38 comments:

واحد مش فاهم حاجة said...

امل حياتى بجد اعرف تفكيرهم بيعمل اية الكرسى دة بيسحر الناس ازاى

واللى مبيهمهمش كراسى ولا مناصب بيقدروا يتجنبوا سحر الكرسى ازاى

ولا اساسا الحكاية مش فى الكرسى ولا اية بالظبط

Founoon said...

عفارم

انا تقريبا عيطت وانا بقرا البوست دا
مش شفقة على جيمي بصراحة
تاثري كان تحسر علينا فين احنا من الناس دي
فين احنا من سيدنا عمر وسيدنا على
الواحد بيجيله رعب يكون ظلم حد ولا حد بات بيدعي عليه وهو مش عارف
خايفة من المسؤولية اللي ماطلعتش قدها
مسؤولية الناس اللي احنا عايشين في وسطهم وما بنقدملهمش حاجة

جيمي واللي زيه يستاهلوا المسؤولية دي يستاهلوا بجد
لانها حاجة وسخة مش حاجة حلوة الواحد يسعالها
دا الانسان لما يتغر بنفسه ودا الانسان لما يتعمي ومايشوفش
جيمي واللي زيه يستاهلوا يتحاسبوا يوم القيامة الحساب الصعب عن كل نفس في بلدنا

ويارب يارب يارب ما تكتب عليا ابدا اني ابقى في مكان مسؤولية يارب
انا مش حمل كدا خالص يارب

فتاه من الصعيد said...

الدين النصيحه ..... بس اللي يسمع

بت خيخة وأي كلام said...

ياااااااااااااااااااه يا نوارة

البوست ده ممزجنى اوى

عارفة البوست ده يتصنف تحت بند
المضحكات المبكيات


انتى كتبتيه بطريقة حلوة
تخلينى اضحك وفى نفس الوقت اقشعر واخاف من يوم الحساب


وعاجبتنى اخر جملة ختمتى بيها البوست


انا معنديش رد يا نوارة
لان البوست بتاعك منه فيه موجود الرد

هو سؤال
هو فعلا هايعمل ايه؟

مش هو بس

احنا كمان هانعمل ايه؟

ربنا يستر

يارب اغفر لنا خطايانا وارحمنا يا ارحم الراحمين



تحياتى يا نوارة


سلام
اختك خيخة

call to liberty said...

بوست رائع جزاك الله خيرا
اhttp://orphanliberty.blogspot.com/تمنى الزيارة

واحدة مفروسة said...

ازيك يا نوارة كل سنة و انتىطيبة و رمضان كريم
انا ملاحظةرمضان عليكي ماسكة نفسك ماسكةجامدةالله يكون فى عونك نفسي امسك نفسي عن الفرسة اناكمان
بس يظهر مش حينفع

كل يوم بنلاقى خبر انقح من التاني و يغيظ بلاد مش بلد واحدة
انا جاية بس اقولك كل سنة و انتى طيبة

بدراوى said...

انا متذكر ان فى مشهد وفاة سيدنا عمر بن الخطاب
انه فيه ناس بايعت ابنه عبد الله
و هو قال ما معناه
انه كفاية واحد بس من عيلة ابن الخطاب
يشيل المسئولية الجسيمة ديه

و صاحبنا بيقولك مسألتوش ابقى إسأله انت
هههههههههه

الحلم العربي said...

نموذج سيدنا عمر بن الخطاب أصلا يخلى أي حد يفكر كتيييييييييير قوي قبل ما يتحط في الاختبار ده
انا لما قريت " بين يدي عمر" لخالد محمد خالد من زماان قويكنت هتجنن و اعرف هو الحكام بتوعنا بيقروا الكتب دي؟؟ طيب سمعوا عن سيدنا عمر يعني ، و الله كت مقتنعة تماما انهم ما يعرفوش و ان علينا انا نهديهم كتب بسير الصحابة كنوع من تخليص ذمتنا قدامهم علشان ما نتحابش احنا كمان اننا ما قلناش كلمة حق عند سلطان جائر بس ساعتها بابا اقنعني انهم عارفين بس مطنشين

ربنا يرحمنا و يهديهم

حسن على said...

وفتنة التنعم اوحش من فتنة الفقر" كلمة التنعم هنا ذات منعنى عام,وجزء الفتنة فية ,انة يصنع الة صغيرا لأن ابن الريس عندنا و هو فى سنة" اولى تبول"بيلاقى لؤات"شرطة وحرس جمهورى بينحنوا لة وبيجروا حولية من غير لزمة ,فضلا عن "كتبة"الحكومة اللى بنفوخوا فية بالكدب صباحا ومساء وكثرة مصاحبة المواكب والحرس ,تخلق شخصية "فرانك شتانية"مخلقة من مزيج السلطة المطلقة وسوء اسنعمالها والعيش الدائم تحت تهديد الاغتيال وداخل اماكن شديدة الحراسة لايغادرها, ان ذلك الجو لابصنع شخصا طبيعيا , وفى افضل الاحوال يصنع شيئا مشوشا مشوها عن اهل البلد التى يسعى لحكمها.يصنع شخصية متألهة ومن صغره لايناقشة احد فى اى امر يطلبة . خبرة جمال مبارك العلمية والعملية لاتزيد كثيرا عن موظفى البنوك الاجنبية العاملة فى مصر ! ونسأل اللة السلامة لمصران كان مايخطط لها هو ان يحكمها جمال وراثة عن ابية فكل الاحداث تجرى فى هذا الاتجاة ...والقشاش على وصول!!!

mido said...

الكلام ده يوجه لمبارك الأب قبل الابن

يا نوارة

جبهة التهييس الشعبية said...

بصوا يا شباب احنا لازم نواجه الحقيقة

جمال هو الرئيس الفعلي دلوقت

انتوا ما بتشوفوش الاعلانات بتاعة الاستثمارات؟ بقى حسني يا قلبي ح يعمل حاجة زي دي؟ ليه؟ مش عارفينه احنا؟ ده عشرة عمر


واحد مش فاهم حاجة

بعيد عنك التسلط على الناس وحش، وحش قوي، بيغلظ الحس
"كلا بل ران على قلوبهم ما كانوا يكسبون"

الانجيل بيقول ان الغني مش ح يدخل الجنة الا اذا دخل الجمل في خرم الابرة
وسيدنا محمد قال ان عبد الرحمن ابن عوف ح يمشي على الصراط حبوا عشان معاه فلوس
الواحد لما بيحس بالقوة والنفوذ والغنى بينبسط كده بروحه ومش معقول ابدا يرضى يرجع زي الناس

فنون
ياختي آمين انا طول عمري دعوتي ربنا لا يحكمني على حد ولا يحكم حد عليا
وبالنوسبة للناس اللي حوالينا انا باريح ضميري وباقول انا واحدة ست انا عندي برد انا اصلا مفروض اقعد في البيت والدولة تصرف عليا
:)
ماهو الواحد يحب يريح نفسه زي ما انت عارفة ويتهرب من المسئولية
بس ياختي اليومين دول طالع عليا حاجة غريبة وانا تحت الدوش افتكر الناس اللي ما عندهاش مية وانا قاعدة على الفطار افتكر الناس اللي بتنام ساعة الفطار عشان ما عندهاش اكل في البيت
مش ح ينفع كده
انا على اخر رمضان ح اكون اتجننت زيادة ما انا مجنونة


فتاة من الصعيد
انا مش عارفة هو مالوش حد بيحبه ابدا خالص كده؟ مالوش حد خايف عليه؟
فيه بني ادم مالوش حد بيحبه؟ سمعت والله اعلم ان اخوه كويس، يارب يطلع كويس وينصحه

بنت خيخة

اززززييييك

آمين يارب

call to liberty

حاضر

واحدة مفروسة
وانت ايه اللي بيخليك تسمعي اخبار في الظرف غير المناسب ده ابدا؟ الدنيا صيام، وحر، وانا عيني وارمة
يبقى انت تسمعي اخبار ليه يعني؟ ده انا بقالي من ساعة رمضان ما اعرفش ايه اللي بيحصل في الدنيا

الحلم العربي

انا اسمع ان جمال بيقرا كتير، اكيد اتكعبل انشالله في كتاب واحد عن عمر
مش معقولة مش مهتم بتاريخه خالص يعني


حسن علي
تمااااااااااااااااام
100%

مهندس حر said...

عمر بن الخطاب و على بن أبى طالب رضى الله عنهما .. هما فردان مؤمنان عاش كل منهما كفرد من الأمة قبل أن يبتلى بفتنة الحكم .. فمن كان منكم يتصور نفسه قادرا على أن يكون عمر أو على الفرد العادى و ليس الحاكم فيمكنه أن يتخيل حاكما من أيامنا هذه يضاهى أو يتمثل بأى منهما فى حكمه..

تانى عشان الكلمتين اللى فاتوا كلكعوا منى .. لو إننا كأفراد عاديين نقدر نكون زى الصحابة العاديين يبقى نستاهل حكام زى أبوبكر و عمر و عثمان و على رضوان الله عليهم..

ده طبعا مش دفاع عن ننوس عين مامته ..لكنه تنبيه إلى إختلاف المحتوى كله .. المجتمع بحاله مختلف و عشان كده لا تجوز المقارنة .. و إذا جاز إن عمر أو على يكون لهم سلطة مطلقة فلا تتحول إلى مفسدة مطلقة فهذا لا يجوز مع غيرهما .. و لو وجد من يتمثل بهما فى مجتمع مختلف عن مجتمعهما لما أمكنه أن يحقق ما حققاه و النموذج هو عمر بن عبد العزيز .. تمثل بالراشدين فحكم ألف يوم و لم يتمكن من إتمام برنامجه الإصلاحى لأنه لم يجد فى رعيته سندا معينا..

فى عصرنا و زماننا و مع ما غلب على قلوبنا من عشق الدنيا و عبادة المادة يستحيل إستحالة تامة أن ينفرد شخص أو جماعة بالحكم فلا يفسدون و يستبدون و أضعف الإيمان هو السلطة المقيدة و المراقبة و ياريت لو مايبقاش فيه سلطة من بابه .. أو تكون السلطة مشاع يتبادلها كل الناس بشكل أو بآخر..

TAFATEFO said...

ما صحة حديث "عبد الرحمن بن عوف رضي الله عنه يدخل الجنة حبواً"؟
قال الإمام أحمد رضي الله عنه :"حدثنا عبد الله حدثني أبي ثنا عبد الصمد بن حسان قال أنا عمارة عن ثابت عن أنس قال : بينما عائشة في بيتها إذ سمعت صوتاً في المدينة ، فقالت ما هذا ؟ قالوا : عير لعبد الرحمن بن عوف قدمت من الشام تحمل من كل شيء ، قال فكانت سبعمائة بعير قال فارتجَّت المدينة من الصوت فقالت عائشة سمعت رسول الله صلى الله عليه وسلم:"يقول قد رأيت عبد الرحمن بن عوف يدخل الجنة حبواً فبلغ ذلك عبد الرحمن بن عوف فقال إن استطعت لأدخلنها قائماً فجعلها بأقتابها وأحمالها في سبيل الله عز وجل" [رواه أحمد في المسند 24886]
قال الهيثمي في :[ مجمع الزوائد 9/288] :"رواه أحمد والبزار بنحوه والطبراني وفيه عمارة بن زاذان ضعفه النسائي والدارقطني"أ.هـ
وقال الحافظ ابن حجر رحمه الله :"وهذا الحديث أورده ابن الجوزي في الموضوعات وقال:" قال أحمد هذا الحديث كذب منكر" قال : وعمارة يروي أحاديث مناكير وقال أبو حاتم الرازي عمارة بن زاذان لا يحتج به "أ.هـ[ القول المسدد 1/9]
الخلاصة :
الحديث لا يصح إسناده ، ثم في متنه نكاره إذ إن سيدنا عبد الرحمن بن عوف رضي الله عنه من كبراء الصحابة وأجلائهم والسابقين إلى الإسلام ..فإذا كان هو _ومن هو _ يدخل الجنة حبواً فكيف بغيره ممن هم أدنى منه درجات ودرجات ؟!!

TAFATEFO said...

رضي الله عنه قد شهد له النبي صلى الله عليه وسلم بالجنة دون ذكر التأخير أو الدخول زحفاً ، بل قال : أبو بكر في الجنة وعمر في الجنة وعلي في الجنة وعثمان في الجنة ، وطلحة في الجنة والزبير في الجنة و عبدالرحمن بن عوف في الجنة وسعد بن أبي وقاص في الجنة و سعيد بن زيد بن عمرو بن نفيل في الجنة وأبو عبيدة ابن الجراح في الجنة . فضائل الصحابة للإمام أحمد برقم ( 278 ) . ومن مناقبه رضي الله عنه أنه من أهل بدر الذي قيل لهم : ( اعملوا ما شئتم فقد وجبت لكم الجنة ، أو فقد غفرت لكم ، وهو قطعة من حديث عند أحمد في المسند ( 1 / 80 ) والبخاري برقم ( 3007 ) . ومن أهل الشجرة وبيعة الرضوان الذي قال الله فيهم : { لقد رضي الله عن المؤمنين إذ يبايعونك تحت الشجرة }[ الفتح/18] . وقد صلى رسول الله صلى الله عليه وسلم رواءه . انظر : المسند ( 4 / 249 – 250 )

جبهة التهييس الشعبية said...

انا عارفة ان السلفية من السنة مش بيحبوا الحديث ده

عشان كلهم اغنيا
:)

الا غريبة قوي ان اتباع لنبي كان بيربط بطنه من الجوع يبقى كرشهم مدلدل قدامهم مترين وبيكرهوا الفقرا ويحبوا الاغنيا

على اي حال ده اسناد قوي للحديث

عن أنس قال : بينما عائشة في بيتها سمعت صوتا في المدينة فقالت : ما هذا ؟ فقالوا : عير لعبد الرحمن بن عوف قدمت من الشام تحمل من كل شيء - قال وكانت سبعمائة بعير ، فارتجت المدينة من الصوت - فقالت عائشة : سمعت رسول الله صلى الله عليه وسلم يقول : قد رأيت عبد الرحمن بن عوف يدخل الجنة حبوا ، فبلغ ذلك عبد الرحمن فقال : إن استطعت لأدخلنها قائما ؛ فجعلها في سبيل الله عز وجل بأقتابها وأحمالها
الراوي: عائشة المحدث: ابن حجر العسقلاني - المصدر: القول المسدد - الصفحة أو الرقم: 1/9
خلاصة الدرجة: [له] شاهد قوي الإسناد

ومن موقع سعودي

http://www.dorar.net/enc/hadith/%D8%B9%D8%A8%D8%AF+%D8%A7%D9%84%D8%B1%D8%AD%D9%85%D9%86+%D8%A8%D9%86+%D8%B9%D9%88%D9%81+%D8%AD%D8%A8%D9%88%D8%A7/+w

L-o-N-e-Ly said...

مش يمكن يا نوارة يكون هو مقتنع ان الى بيحصل فى وقته ده افضل شئ ممكن و ان زمنهم غير زمننا و بيقرا كل الى قلتيه و يقول ياااااه انا والله قلبى و نيتى زيهم بس الوضع غير الوضع و يقعد يقنع نفسه انه مجنى عليه و انه عايز الخير و ان الى احنا فيه ده احسن وضع ممكن
و انه زى النخل الى الناس بتحدف بالطوب .. و و و شوية الكلام الحمضان ده
برضو فى احتمال انه يكون مصدق الكلام ده على نفسه من كتر ما سمعه

و شكرا على البوست القوى

جبهة التهييس الشعبية said...

مهندس حر
لا إله إلا الله

طب عمر ده في فترة من حياته انت كنت احسن منه، ايام ما كان بياكل الهه

وجاي من خلفية وتربية صعبة وكان بيقول ان ابوه الخطاب كان بيضربه لدرجة انه ما بقاش يعرف هو امتى غلطان وح ينضرب وامتى صح وح يتعتق

يعني لا ابوه رباه كويس
ولا نشأ في مجتمع عدل، اللي زيه كان مفروض يطلع قاطع طريق وللا مجرم

صحيح هو قابل الرسول واتعلم على ايده بس هو انسان مش مقدس ولا نبي ولا مجتبى
انسان
جاهد نفسه وادبها ومش اول ما اسلم قام ربنا نزل عليه الادب والاخلاق
فضل يأدب نفسه لاخر لحظة في حياته ومرة جمع الناس في المسجد وقعد يشتم لهم في نفسه وبعد ما خلص قالوا له طب يعني لاممنا عشان تهزأ نفسك قدامنا؟ قال لهم اصلي لقيت نفسي مبسوط كده بروحي قلت لما اكسرها

جبهة التهييس الشعبية said...

lonely

آمل انه ما يكونش فاكر كده

TAFATEFO said...

مش كده أبداً أبداً

ده كذب وافتراء على رسول الله .. وحضرتك دارسه حديث

مهندس حر said...

إيه علاقة اللى بقوله بما كان من شأن عمر فى الجاهلية؟.. و لو ده ليه أهمية مع إنه بالتأكيد مالوش لأن الإسلام يجب ماقبله بس لو فرضنا طيب ما عندك سيدنا على كرم الله وجهه أسلم صبيا و كان آخر الراشدين الأربعة يعنى عاش عمره مسلما فردا عاديا إلا سنوات قليلة كان فيها أميرا للمؤمنين..

كلامى لم يكن معناه أننا لا نستطيع تمثل خطاهم و لكن تصور أن يكون مجتمعنا مماثل لمجتمع المدينة هو ضرب من الخيال الأقرب للمستحيل و أقل الإيمان أننا لا نستطيع أن نبنى تصوراتنا عليه .. و الأصح أن نبنى تصوراتنا لما يصلح مجتمعنا على واقع و حقيقة هذا المجتمع.. و فى الإطار ده مش المفروض إننا حتى نحلم بحاكم يتمثل خطى عمر أو يقتدى به و لو إنتظرنا أن يأتينا مثل هذا الحاكم يبقى بنضحل على نفسنا..

اللى بأكد عليه هو إن فكرة أن صلاح الحكم لا يتأتى إلا بصلاح الحكام هى فكرة غير واقعية .. فى إطار المعقول و الممكن كل اللى نقدر نتمناه هو نظام يجعل فساد ذوى السلطة أقل ما يمكن و حتى ده رغم إنه ممكن نظريا ماحصلش إنه إتحقق بنجاح عملى كبير لا عندنا و لا عند غيرنا..

TAFATEFO said...

عبدالرحمن بن عوف .. أحد العشرة المبشرين بالجنة .. الصحابي الذي شهد بدراً .. الذي خلف ماله وراءه في مكة وبنى بنفسه ثروته بالحلال التي أنفق منها في سبيل الله .. الذي شهد بدراً مع رسول الله .. وشهد الحديبية يدخل الجنة حبواً!!!!!!

طب وسيدنا عثمان؟؟ ونبي الله سليمان؟؟

وتقولي رواية للحديث ضمن 16 رواية كلها كذب وباطل .. تبقى قوية الإسناد مش صحيحة الإسناد حتى .. ولا حديث صحيح وتحتجي بيها

لا حول ولا قوة إلا بالله

جبهة التهييس الشعبية said...

اه دارسة حديث وعارفة ان الاحاديث الضعيفة يؤخذ بها الا في تشريع او اذا كان فيه ما يقويها من احاديث اخرى
وعارفة انه مش بعدد الروايات
انا جبت لك اللنك كله، لو عشرة باطلين وواحد اسناده قوي يؤخذ به يا مصطفى
هي مش بالكيلو
ثم ان ماحدش قال ان عبد الرحمن بن عوف ح يدخل النار عشان تقول لي ده من المبشرين بالجنة
والتجريح يا بيبقى في الاسناد يا بيبقى في المتن، والتجريح في الاسناد مش شغلتي لكن لما يبقى فيه اسناد قوي يبقى المتن مافيهوش مشكلة المشكلة في اسناد الاحاديث الاخرى
وما تقولش كذب على رسول الله عشان انت بتقول كلام كبير وانت مش عارف حجمه وما يبقاش دليلك على اتهام زي ده انك تحسبها بالكيلو انت كده بتضحك الناس عليك
وده ما ينفيش انه شهد بدر وانه من المبشرين بالجنة
مدام حاجة لها اسناد قوي ما تتجرأش وتتهم الناس بالكذب على الرسول، دي ناس ماتت، انت شايف نفسك بتفهم احسن منهم في الحديث
ههههههه
كالعادة

جبهة التهييس الشعبية said...

مهندس حر

اللي بتقوله ده التماس اعذار لينا ولحكامنا
انا مش باحاسب الناس ربنا هو اللي بيحاسب
بس ربنا خلق الانبيا بشر عشان ما يعجزناش
والصحابة مش انبيا الصحابة بشر ونشأوا في مجتمع اوحش من اللي احنا فيه يا مهندس
والتكاسل بتاع: حد يقدر يبقى زي عمر؟
ما يقدرش ليه؟
عمر كانت ظروفه اصعب ونشأ في مجتمع اوحش
يعني لو كان طلع مجرم كان يبقى معاه عذره
احنا ايه عذرنا؟

TAFATEFO said...

طيب أنا بقى اعتبريني مش دارس حديث .. وقوليلي يعني ايه له شاهد قوي الإسناد

هل معناها ان الحديث ده سنده صحيح؟ طب ولو حديث سنده صحيح ده معناه ان بالضرورة يكون حديث صحيح؟؟ طب هل ممكن حديث سنده صحيح يكون حديث ك1ب ومنكر وباطل وضعيف؟؟

طب دي الرواية اللي مكتوب ان لها شاهد - قوية الإسناد

وتخريج نفس الرواية اللي حضرتك بتتكلمي عنها هي أول رد وفيه ما قاله الإمام أحمد وغيره في الرواية .. وبرضه أهو

قال الإمام أحمد رضي الله عنه :"حدثنا عبد الله حدثني أبي ثنا عبد الصمد بن حسان قال أنا عمارة عن ثابت عن أنس قال : بينما عائشة في بيتها إذ سمعت صوتاً في المدينة ، فقالت ما هذا ؟ قالوا : عير لعبد الرحمن بن عوف قدمت من الشام تحمل من كل شيء ، قال فكانت سبعمائة بعير قال فارتجَّت المدينة من الصوت فقالت عائشة سمعت رسول الله صلى الله عليه وسلم:"يقول قد رأيت عبد الرحمن بن عوف يدخل الجنة حبواً فبلغ ذلك عبد الرحمن بن عوف فقال إن استطعت لأدخلنها قائماً فجعلها بأقتابها وأحمالها في سبيل الله عز وجل" [رواه أحمد في المسند 24886]
قال الهيثمي في :[ مجمع الزوائد 9/288] :"رواه أحمد والبزار بنحوه والطبراني وفيه عمارة بن زاذان ضعفه النسائي والدارقطني"أ.هـ
وقال الحافظ ابن حجر رحمه الله :"وهذا الحديث أورده ابن الجوزي في الموضوعات وقال:" قال أحمد هذا الحديث كذب منكر" قال : وعمارة يروي أحاديث مناكير وقال أبو حاتم الرازي عمارة بن زاذان لا يحتج به "أ.هـ[ القول المسدد 1/9]
الخلاصة :
الحديث لا يصح إسناده ، ثم في متنه نكاره إذ إن سيدنا عبد الرحمن بن عوف رضي الله عنه من كبراء الصحابة وأجلائهم والسابقين إلى الإسلام ..فإذا كان هو _ومن هو _ يدخل الجنة حبواً فكيف بغيره ممن هم أدنى منه درجات ودرجات ؟!!

أنا بس مرضيتش أراجع حضرتك وأقولك في الأول انها نفس الرواية اللي جبت لحضرتك دليل ضعفها .. وحضرتك بتحتجي برواية كذبها وأبطلها وأنكرها من أنكرها وتقولي أصلها قوية الإسناد

أنا بضحك الناس علي وبحسبها بالكيلو .. منا أقدر أسكت وعارف اني المفروض أسكت .. وأكرملي اني أسكت ........

رمضان كريم يا فندم وحقك علي

عمرو امام said...

يا استاذة نوارة
هو العدل المطلق يقدر بتحقق على ارض الواقع يا استاذة ولا بلاش هى الحرية والمساواة بردة نقدر نحققهم بشفافية مطلفة
طب بالش دبة ودية
النفوس الضعيفة والشخصيات الضالة و اصحاب مكتبة الوجوة المتعددة
والوصولين والمتسلقين والقوادين
كل دول نقدر نمنعم وجودهم على ارض الواقع

لما نفدر نعمل كدة ساعتها بس يبعث علينا اولياءنا من جديد

TAFATEFO said...
This comment has been removed by the author.
جبهة التهييس الشعبية said...

عمرو امام

لا بس ده عمره ما حصل واتحقق قدر من العدل

مافيش عدل مطلق في الدنيا
بس الناس تجتهد عشان تحقق العدل

ماهو بني ادم اهو، وبني ادم عادي مش نبي ولا حاجة، وحاول هو واللي معاه يحققوا العدل على قد ما يقدروا

اكيد كان فيه شوية تقصير لانهم بشر في النهاية
بس بذلوا كل اللي يقدروا عليه


مصطفى
انا رديت عليك وما عنديش استعداد كل ليلة اضيعها في المناهدة معاك لانه تضييع وقت فعلا

مش انت مبسوط كده؟
خلاص يا سيدي
انت صح وبتعرف كل حاجة وكل ما دونك باطل

جبهة التهييس الشعبية said...

ايه الجنان ده؟ انت حد كلمك؟

مهندس حر said...

إيه علاقة اللى بقوله بما كان من شأن عمر فى الجاهلية؟.. و لو ده ليه أهمية مع إنه بالتأكيد مالوش لأن الإسلام يجب ماقبله بس لو فرضنا طيب ما عندك سيدنا على كرم الله وجهه أسلم صبيا و كان آخر الراشدين الأربعة يعنى عاش عمره مسلما فردا عاديا إلا سنوات قليلة كان فيها أميرا للمؤمنين..

كلامى لم يكن معناه أننا لا نستطيع تمثل خطاهم و لكن تصور أن يكون مجتمعنا مماثل لمجتمع المدينة هو ضرب من الخيال الأقرب للمستحيل و أقل الإيمان أننا لا نستطيع أن نبنى تصوراتنا عليه .. و الأصح أن نبنى تصوراتنا لما يصلح مجتمعنا على واقع و حقيقة هذا المجتمع.. و فى الإطار ده مش المفروض إننا حتى نحلم بحاكم يتمثل خطى عمر أو يقتدى به و لو إنتظرنا أن يأتينا مثل هذا الحاكم يبقى بنضحل على نفسنا..

اللى بأكد عليه هو إن فكرة أن صلاح الحكم لا يتأتى إلا بصلاح الحكام هى فكرة غير واقعية .. فى إطار المعقول و الممكن كل اللى نقدر نتمناه هو نظام يجعل فساد ذوى السلطة أقل ما يمكن و حتى ده رغم إنه ممكن نظريا ماحصلش إنه إتحقق بنجاح عملى كبير لا عندنا و لا عند غيرنا..

جبهة التهييس الشعبية said...

مهندس حر
انت عدت التعليق تاني ليه؟

مهندس حر said...

أنا لا بألتمس العذر لا لينا و لا لحكامنا .. عدم قدرتنا على الإقتداء بالصحابة خيبة مننا مش لأن الأمر مستحيل..

الفكرة إنك ماتجبيليش واحد ساقط ثانوى و عايزانى أدخله كلية الهندسة و أستناه ينجح.. الحل معاه أحوله تعليم فنى و يطلع أسطى محترم أحسن ميت مرة من مهندس خايب يجيبلنا مصيبة..

و قصدى ماتجبيليش مجتمع خايب ساقط أخلاق و معدوم قيم و عايزانى أجيب منه واحد و أسلمه سلطة مطلقة .. و بعدين أقول يا رب يبقى زى عمر و على .. إزاى يعنى إن شاء الله .. هيجيب الكلام ده منين .. ده لو بيعرف يفك الخط بالعربى عايزله شهر عشان يقرأ عبقرية عمر و لو قعد 40 سنة مش هيفهمها لأنه غير مؤهل لفهمها.. ماعندوش أصلا المستقبلات المناسبة .. الإنسان اللى ماداقش طعم الظلم ما يعرفش يفهم يعنى إيه عدل و لو شافه فيديو خمسين مرة..

مهندس حر said...

ما كانش قصدى.. عملت ريفرش للصفحة فيظهر الفاير فوكس بعت الداتا تانى.. إمسحى واحدة منهم عشان ما امسحش واحدة و تمسحى إنتى التانية .. آسف للإزعاج.. يظهر البروزر صايم :)

مهندس حر said...

على فكرة المجتمع اللى نشأ فيه الصحابة قبل إسلامهم ماكانش أسوأ من مجتمعنا .. يعنى ما يغركيش مظاهر التقى و الورع اللى إحنا راسمينها و الكلمتين اللى حافظينهم و بندلقهم حسب الظروف ده حتى الفرق بين الجاهل و العالم دلوقت بقى فى كمية اللى بيحفظه كل واحد و العالم الكبير قوى اللى بيدلق الكمية المظبوطة فى الوقت المناسب مش أكتر..

بخلاف البوية دى كلها إحنا من جوانا خربانين على الآخر و ده لأننا عايشين فى إطار فرض علينا نحسب الحاجة بقيمتها المادية و منفعتها المباشرة.. حتى فى أمور الدين .. الشعب المصرى بيعتمر فى رمضان أكتر من أى شعب تانى (قبل أنفلوانزا الخنازير طبعا) .. ليه عشان العمرة فى رمضان بحجة!!!.. تفتكرى اللى بيفكر بالطريقة دى ناس مؤمنة و ألا ناس بتستنصح على اللى خالقها (أستغفر الله العظيم و الله خير الماكرين)..

مجتمع الجاهلية ماكانش مجتمع رأسمالى معفن زى اللى إحنا عايشين فيه .. كان فيه لسة إعتبارات للشرف و الكرم و حتى العصبية القبلية مقدمة على المنافع المادية المباشرة.. لما مجتمع زى ده يستقبل رسالة سماوية و يتعلم على يدى خير الرسل و يرى بعينيه سيرة خير خلق الله تكون النتيجة هى مجتمع الصحابة اللى كانوا أحسن مننا حتى قبل تحريم الخمر .. يعنى حمزة سيد شهداء الجنة إستشهد و لم يكن أقلع عن الخمر .. فما تقوليليش دول كانوا بيشربوا و بيزنوا و خلافه.. عشان إحنا خلاص عودونا إن أخلاقيات الإنسان أهم مافيها هو الإمتناع عن الفواحش .. فى حين إن ده جزء من كل لكن لما حياتنا كلها تبقى حوالين الجزء ده عمرنا ما هنوصل لمجرد التفكير فى الكل..

جبهة التهييس الشعبية said...

يا راجل يا مفتري
ما كانش مجتمع رأسمالي ازاي؟ هم سابوا حاجة ما تاجروش فيها حتى النسوان والبني ادمين؟ ويدفنوا العيال الصغيرة احياء؟ ده لما الحكومة وأدت الخنازير صعبوا عليا
دول كانوا بيؤدوا بني ادمين
ده هند بنت عتبة لما راحت تبايع الرسول ضوافرها كانت طويلة ووسخة قال لها ما معناه دي ايد دي وللا مخلب سبع؟
واللي جوزها يموت تقعد سنة ما تستحماش
سنة
في الحر ده

mido said...

يا باشمهندس

بنى أدم بيعبد صنم من العجوة

و لما يجوع ياكله

:))

يبقى عايزه عامل ازاى؟

ضكتور جدا said...

وكم ذا بمصر من المضحكات
يارب ارحمنا برحمتك
تحياتي ورمضان كريم

Taha said...

البوست ده فكرني ببوست كنت قريته من فتره .. اسمه ماذا لو حكمنا الان عمر بن الخطاب.. للصحفي "الرائع" عبد الله كمال

http://alsiasy.blogspot.com/2009/08/blog-post.html

كل سنه وانتم طيبين.. ويفضل البوست بتاع عبد الله كمال يتقري بعد الفطار

Tota said...

انا ملاحظة ان الدكتور مصطفى مشدود اوى الايام دى ومستفز طول الوقت واحنا مش متعودين على النقاش الحاد جدا ده منه
ربنا يهدى النفوس ان شاء الله