Thursday, 10 September 2009

هي البلد دي حصل فيها كده امتى؟

ح نفترض اني انا اي تي، جاية من الفضاء وزرت مصر، طبعا في الشارع الناس مش ح تخاف مني زي امريكا، ح يضحكوا على شكلي، ومش بعيد العيال الصغيرة يدوني على قفايا ويجروا، وممكن جدا عدد لا بأس به من الناس ما ياخدش باله اصلا اني انا شكلي غريب، واكيد الشحاتين في الاشارات ح يقولوا لي: حاجة لله ربنا يشفيك، واحد باشتري منه فل النهاردة من غير اي مناسبة قال لي: انا باصرف على ابويا الكفيف، قلت له: ايه لزوم الاسطوانة دي؟ ما انت بتشتغل وانا باشتري منك، قام قال لي انا باشتغل في شركة، شركة حاجة كده ناسياها، سعادتك، مش فاكرة ايه بس فاكرة انها قطاع عام، عشان دي اول حاجة خطرت في بالي، ان موظف في شركة قطاع عام وبيبيع فل في الاشارات وبيشحت على ابوه الكفيف
المهم
دلوقت انا اي تي، بعد ما يأست من اني اخوف المصريين في الشارع او حتى الفت نظرهم اني كائن فضائي يستحق معاملة خاصة، رحت على القهوة وقعدت اتفرج على التلفزيون ولقيت كده:
1- اعلانات عن بيوت ما شفتش شبهها ولا عندنا في المريخ
2- بعدها على طول اعلان مستشفى سرطان الاطفال اتبرع ولو بجنيه
3- بعدها على طول اعلان مربى الرشيدي الميزان
4- الاعلان بتاع مصر الخير: كتير مننا تحت خط الفقر
5- احمد عز في عربية تلوح ما عندناش منها في المريخ
6- اعلان جمعية رسالة عشان الناس تتبرع بهدوم "مستعملة" للفقرا عشان يلبسوها في العيد، وقايلين كده في الاعلان! قايلين اتبرع بهدومك المستعملة
7- مسلسل متخلف حتى عندنا في المريخ
8- اعلان بنك محاربة الجوع (حد مركز في الاسم ده؟ ده عامل زي مشروع محاربة الحفاء ايام الملك) وهو جايب ناس جعانة طبعا
9- اعلانات سمنة مليانة اصناف اكل
10- اعلانات غسالات وتكييفات ومستحضرات تنضيف وتلاجات واللوكيشن في بيوت عجب عجب عجب
11- اعلانات خط الفقر تاني
واخيرااااااااااااااااااا: اعلانات ضرايب اعلانات ضرايب اعلانات ضراااااااااااااييييييييييييييييبببببببببببببب كتيييييييييير
يا ساتر يا ساتر من قنطرة الدفاتر يا عبد القوييييييي
طب انا دلوقت اي تي القادم من الفضاء، وشفت الكلام ده، حطوا نفسكوا مكاني، المفروض اقول عليكوا ناس ايه؟
-----
نسيت حاجة مهمة جدا انا كإي تي مش بالاقي عندنا شبهها في المريخ، على فكرة ولا لما نزلت امريكا من كام سنة شفتها
الحالة الاجتماعية الموبايلي، المجتمع المصري مجتمع موبايلي بامتياز، حيث سيطرة الموبايل من حيث النوع والرقم والكماليات والرنات والكول تون اللي يعصبك وانت بتتصل بواحد وفجأة تلاقي الراديو اتفتح في ودنك، خصوصا وان المحلول في يد الجميع فعلا، بما فيهم اللي تحت خط الفقر واللي مستنيين هدوم مستعملة عشان يعيدوا بيها، واصبح المحمول هو العضو الاساسي في الاسرة ومش فاضل غير ان المصريين يخلفوا منه موبايلات صغيرة، اذ ان الموبايل اقرب الى الاب من ابنائه واحن على الاطفال من امهم ورب موبايل لك لم تلده امك
وانا كإي تي لما الاقي الاخوة المصريين طول النهار بيستهلكوا ما لا ينتجون ح افكر في حاجة من الاتنين: يا اما المصريين دول ماسكين ذلة على منتجي المنتجات دي يا اما المنتجين قلوبهم رحيمة، رئيفة، شفيقة جلالة
يا اما ان انا دخلت مصحة وده قسم اللي عندهم اوتيزم
(الاوتيزم مرض التوحد وغالبا اللي بيعاني منه بيبقى طول الوقت مسيطرة عليه فكرة واحدة او حاجة واحدة: عربية/ كتاب واحد معين...إلخ)

20 comments:

صح النوم said...

أأقل حاجه ممكن تقوليها يا اى تى هى:
(يا مجانين يا اولاد المجنونه ....يخرب بيت اليوم اللى شفت فيه كوكبكم ...تستاهلوا كوووول اللى يجرالكوا)

صح النوم said...

بمناسبه سيطرة وسياده الموبايل على الانسان المصرى ودى للعلم ظاهرة ماشفتهاش فى اى بلد فى العالم بالشكل اللى موجوده بيه فى مصر
فى مره لقيت عامل من بتوع النظافه اللى بيلبسوا لبس برتقانى شبه لبس جوانتاناموا وهو قاعد حاطط ايده على خده على الرصيف فى عز الحر قدام جنينه الحيوانات وشكله بؤس ع الاخر الحقيقه صعب عليا لدرجه انى قررت اديله كل اللى معايا وقعدت احلم باللى ممكن يعمله الراجل المسكين ده بالستين جنيه اللى حديهم له وازاى المبلغ ده ممكن يدخل الفرحه على قلوب عيلته اللى بتستناه
المهم بعد ما اديته المبلغ دخلت اصلى الضهر فى مسجد صغير وخرجت بعد ربع ساعه لقيت نفس الراجل ماسك الموبايل ونازل رغى وضحك بصوت عالى استفزنى وسألته انت بتكلم مين كل ده ؟؟؟قال لى برغى مع اصحابى لغايه ميعاد الورديه مايخلص
قلت له ومين اللى طالب ان شاء الله؟؟
قال لى انا طبعاً ما انا لسه شاحن بخمسين من الفلوس اللى اديتهالى ربنا يكرمك ويخليك للغلابه اللى زيي
طبعاً روحت وانا محروق من الغيظ لما واحد مش لاقى ياكل وظروفه زفت يضيع 50 جنيه فى الرغى والكلام الفارغ
علشان كده حلفتك يا اى تى لتسافر كوكبك دلوقتى حااااالا وما تتأخرش والا كلها يومين تلاته وهنزورك فى عنبر الفصامين فى مستشفى العباسيه

مهندس حر said...

متهيألى إى تى يقدر يستنتج إن أكيد عبد القوى بيقنطر الدفاتر عشان يشترى قصر و يملاه بكل السلع المعلن عنها و بعدين يبلبط فى حمام سباحة مليان سمنة بلدى و النتيجة طبعا هى إن 40% من الشعب تحت خط الفقر و إن المجارى اللى بقالها 18 سنة بتروى عطش الخضار فى الغيط هرت عيالنا بأنواع السرطان المختلفة و إن مستشفى واحد مش كفاية و كل تبرعات عبد القوى و إخواته ماتجيش حاجة جنب الضرايب المتقنطرة و أكتر منها الضرايب اللى إتخفضت فى القانون الجديد لصالح عبدالقوى و أمثاله من 50% إلى 20% و لسة بيقنطر و هايفضل يقنطر لأن الفحص بقى عشوائى و عشوائى فى بلدنا معناها إن فيه عبدالقوى اللى عمر دفاتره ماهتنكشف على مأمور ضرايب ولا بعد 50 سنة..

كده إى تى يقدر يقول إننا عبيد عبدالقوى و إننا نستاهل نتقنطر..

صح النوم said...

على فكرة يا نواره ياريت يكون اسعدك الحظ وشفتى حلقه من مسلسل يسرا بتاع السنه دى
المسلسل ده مستفز للغايه
جايب كل الناس اللى فيه بيتعاملوا مع الملايين كأنها فكه وبيسلفوها لبعض بنفس السهوله اللى بتسلفى بيها ربع جنيه لواحده صاحبتك
دا غير ان كل البيوت فيها جنينه ىييجى عشر فدادين وبيسين مقاس دولى واثاث ايطالى مابنشوفوش ولا فى افلام المليونيرات
اخو يسرا طالع راجل اعمال بيشم كوكايين ب5000 جنيه فى القعده!!!!!!!
وطبعاً الناس اللى فى المسلسل مشاكلهم تختلف كليا وجزئيا عن مشاكل الناس اللى تعرفيها
انا عن نفسى حاولت اشبه نفسى او اشبه اى حد اعرفه بأى شخصيه فى المسلسل فشلت
حتى السواق والسفرجى والشغاله لقيتهم مستواهم بعيد عنى وعن الناس اللى اعرفهم
ياريت يا اى تى تحجزلى معاك تذكره لكوكبك اصل انا اساسا اتخنقت من الكوكب ده والناس اللى عليه

The Laundry Man said...

وكله كوم والدعاية اللي البت فيها بتقول لخطيبها عن السر الخطير اللي قالق منامها ومخليها مش قادرة تنام

ماما بتسيح زبدة

يقوم هوة يرد عليها ويقول بتأثر شديد

ليه مامتك بتعمل كده؟



رمضان كريم يا نوارة

lastcrazyboys said...

سييييبك من كل ده


ايه حكاية "محابة الحفــاء " ايام الملك دي.؟

أول مرة أسمعها ...!!! ده الموضوع وراثة بقى

مواطن مصري said...

انا اعلان مصر الخير دة مستفز طيب علي جمعة مسئلش نفسة لية فية خط الفقر ؟؟؟؟؟


الاعلانات غريبة في رمضان

مواطن مصري said...

بس اجمل اعلان بتاع موبينيل

helperF1 said...

بصراحة انا قراءت البوست للاخر بس تهت.
مش عارف ايه الموضوع الاساسي للبوست
يعني مثلا بتقولي انك اي تي و بتحكي حكاية من 128 كلمة او 625 حرف و بعدين نرجع من الاول لفرضية انك اي تي

جبهة التهييس الشعبية said...

صح النوم
انا راجع للمريخ تاني
وح اقول لصحابي المريخيين ان انا جيت لهم من بلد نصها حرامية والنص التاني شحاتين
ولو سمحت اسحبي كلامك عن مسلسل يسرا
انا الظاهر فرجتي على جرب الحواسيس ح تطمعكوا فيا
انا؟ اتفرج على يسرا؟
مش للدرجة دي يعني

مهندس حر
اي تي ما يعرفش الكلام ده

لوندري مان؟

هههههههههههه
اسمك تحفة

لاست كريزي بوي
دي كانت حملة مشهورة قوي ايام الملك فاروق
الناس كانت لا مؤاخذة حافية
وعملوا جمعيات ومشاريع عشان يلبسوا الناس حاجة في رجليهم
مش عشان هم حرانين ولا حاجة
عشان فيه منهم كان بيسرق اكفان الموتى ويبيعها عشان ياكل

بالصلاة ع النبي يعني

مواطن يا حبيبي
انت عاجبك اعلان موبينيل؟

جبهة التهييس الشعبية said...

اسم الله عليك ياخويا
ما تشغلش انت بالك بالحاجات دي

مواطن مصري said...

اة اعلان موبينيل حلو اوي بتاع صحوني ع المدفع و التاني بتاع الي فية شبيه عبد الحليم

جبهة التهييس الشعبية said...

الا انتوا كلكوا قبل السحور الارسال بيفضل يقطع عندكوا؟

mido said...

انا الارسال عندى مقطعش

و عاجبنى الاعلان فعلا زى مواطن على


الرغم انه مسروق

------------
و دلوقتى بتفرج على

DISTRACT 9

ينفع تذاكرى عليه؟

:d

لأخر مرة بسألك :

حتخلصوا امتحانات و وواجبات امتى

تقريبا ؟

مهندس حر said...

أنا مش بتفرج على تاجر السعادة بس سامع كلام سخيف .. مين السيناريست الحمار اللى كاتب الهبل ده؟؟

عمرو امام said...

اقولك دية هدية خديها معاكى المريخ

يا مصر يالى حلوة تملى دنا روحى فيكى
وحشة بحكومتك وحشة براءستك دا العيب مش فيكى
الكل يامر والكل ينهى والكل باشا والكل بية
والكل طيب والكل حاضر والكل حقق علية يا بية
يا مصر قومى يا مصر قولى يحضر مضيكى
دا كان فى ثورة ايام زمان والكل ناضل مكنش جبان
دلوقتى اهلك خايفين لتهلك لو قولت كلة حق تبان
دلوقتى امك تقولك اسكت مش قدهم يا بن الجبان
وابوك يصوت ويجرى يلطم ويقول دا ابنى يا بية حيوان
شفتة المهانة شفتة المذلة نفسى مرة اكون انسان
ياعم اسكت جهلك ما يسكت لحد امتى هكون جبان
دا الحر لازم يقوم يناضل يسعى لارضة مينام جبان
والكل يالة لبنان دى طلة دا حزب الله مكنش جبان
الكل واجة والكل ناضل مخفش والله من البركان


هى ليها تكملة

مواطن مصري said...

نوارة هو بجد اوبما قلب لفكر ناصري ولا اية؟


اصل واحد قالي التأمين الصحي بقى لكل الامريكان فريييييييييييي

http://www.huffingtonpost.com/2009/09/09/obama-health-care-speech_n_281265.html


شوفي كدة و ترجمي الحوار

و عاوز افهم الموضوع دة

مش بعيد يعملهم الاتحاد الاشتراكي الامريكاني

مهندس حر said...

مواطن!!..

مين يا بنى قالك إن ناصر إخترع التأمين الصحى أو إنه إختراع إشتراكى من أصله .. دول رأسماعزية كتير عندها نظم تأمين صحى بتغطى الشعب كله و منها فرنسا مثلا.. و بعدين إنت إيه يزعجك فى إن الأمريكان الغلابة يبقى التأمين الصحى بتاعهم فريييييي؟؟ إنت بتدفع ضرايبك فى أمريكا و ألا بتدفعها فى المخروبة زينا؟

أبو أسامة said...

هي البلد دي حصل فيها كده امتى
من سنة 52 من أيام ما السادة الأشاوس حولوا بلدنا من مملكة
لعزبة أبوهم

المفروض اقول عليكوا ناس ايه؟

تقولى عليهم ناس تيييييييييييييت

بس أنا مش من ضمنهم
أنا عندى حصانة

موضوع الإعلانات : أنا شخصيا بطلت اسمع الإعلانات والمسلسلات الغبية كمان

موضوع الموبايلات : ده دليل على سفاهة وصفاقة وتفاهة وبجاحة الشعب المصري اللى فيه كتير مش مهم عنده ياكل بس المهم يشحن الموبايل علشان يرن على جوز امه في الشقة اللى فوقيه

تحياتي
وكل سنة وانتم طيبين

سامى لطفى said...

اهلا بيكم جميعا و كل سنه و انتم طيبين