Monday, 14 September 2009

غشاء بكارة الصيني

انا والله مش مهمتمة بالجدل اللي اثير وسوف يثار اكتر على اثر غشاء البكارة الصيني، لاني عارفة ومتوقعة ايه اللي ح يحصل
اول حاجة ح تتعمل، ح يعمل برنامج توك شو ويجيبوا كام شيخ على كام طبيب نفسي على كام دكتور في علم الاجتماع على كام بنت يغطوا عينيها على كام ولد يصوروا معاه من ضهره وح نقعد في الجدل التافه ده سنين وايام
ما احنا ناس فاضية
احنا ناس فاضية والصين ناس مليانة، عشان كده بيشوفوا كل مجتمع عايز ايه ويصنعوه من غير رغي كتير
انا مش عايزة احطم في ذواتنا يا عيني زيادة ماهي متحطمة، انا بس لما عرفت ان الصين بتصنع غشاء بكارة دماغي اتنقلت، ولاد الجنية، ولاد الجنية، ايه اللي بيعملوه ده؟ قاعدين يشتغلوا بس؟ ما بيعملوش حاجة تانية في حياتهم؟ ما بياكلوش؟ ما بيشربوش؟ ما بيناموش؟ ما بيتفرجوش على التلفزيون؟ ما بيعاكسوش في التليفونات؟ ما بيقعدوش على الشات يقولوا: ممكن نتعرف؟ مافيش حاجة في دماغهم خالص كده غير الشغل؟
طب احنا مش ح ينفع معانا العيشة دي، انا غيرانة، احنا لازم ام البلد دي تشغلنا والا ح نتجنن، الاخ بتاع السياسات الجديدة ده، حرام عليه، ده ما بيشغلش غير خريجين الجامعة الامريكية في المشروع اللي كان عامله لتشغيل الشباب ده، طب احنا ما ينفعناش كده احنا عايزين نشتغل، الناس لما ما بتشتغلش بتبقى شبهنا كده، بقى الصينيين قعدوا، ودرسوا المجتمعاتنا، وعرفوا ان غشاء البكارة مهم وعرفوا ان فيه بنات ح تحتاجه وراحوا مصنعينه؟ ايه الدماغ دي؟
طب احنا مش بنعمل كده ليه؟ لا طبعا احنا قاعدين نقول ده ح يشكك الشباب في البنات والبنات مش ح تتجوز وح يجيلهم عقم وده حرام وتدليس إلخ إلخ إلخ
ما انشالله عنهم ما اتجوزوا، ما انشالله عنهم ما خلفوا، ثم يعني غشاء البكارة المصنع حرام ورمية الناس عطلانة من غير شغل دي هي اللي حلال؟
حرام عليكوا يا ناس، يا ناس حرام، احنا طاقات مهدرة، والله لما بنغور في اي حتة من البلد دي بنفلح وما بيبقاش في دماغنا حاجة غير الشغل، حراااااام اللي بيحصل فينا ده جريمة، شايفين الناس عايشة ازاي وبتفكر ازاي؟ انتوا ايه؟ مافيش في قلبكوا رحمة؟
هو ايه؟ هو خلاص كده؟ خلاص يعني؟ كل الناس ح تفلح واحنا اللي ح نقعد نعيط على وكستنا؟ يعني عايزين تطفشونا من البلد؟ طب نروح فين دلوقت؟ دول الخليج خلاص عرفوا يعملوا جيل جديد من العمالة الوطنية ويعتمدوا عليه، اوروبا والدول المتقدمة بنروح يا نتقتل في محكمة يا يتفوا علينا ونسكت عشان بس نفسنا نشتغل، لو احنا ناس كسلانة كنت قلت مش عارفين يشغلونا، لكن ده اي واحد تجيب له شغل بنص اللي يستحقه يبقى قلبه ح يقف من الفرحة، ونفسيته تبقى في السما، ومافيش حاجة منكدة على الناس وممشياهم يضربوا بعض في الشارع غير العطلة والفراغ
نروح الصين بقى
ملحوظة: اسرائيل عاملة علاقات كويسة قوي ومتينة مع الصين عشان هي القوة الصاعدة في المستقبل
خلينا احنا في غشاء البكارة

58 comments:

Dr Nemo said...

والله فى الجون اللى قولتيه يا نواره .... فعلا ناس فاضيه ... انا من متابعى موقع اليوم السابع ودايما باخد بالى من التعليقات وفى نفس وقت عرض المقال ده"اول ما نزل خالص امبارح بالنهار" كان فيه كام مقال تانيين برضه اهم واقوى ويستاهلوا التعليق عن ده الللللف مره ولكن ابص الاقى ما شاء الله بدال الصفحه اتنين وتلاته تعليقات ما بين ساخر ورافع للواء الاسلام ومبسوطه ومنشكح ومخضوض ومتقزز ومتفائل ومتشائم ومتنيل وووو الى اخره فى موضوع قسما بربى اتفه ما كان يعرض فى وقتها على الصفحه الرئيسية للموقع...... الرد الوحيد اللى عجبنى كان لواحد قال " اه ياناس دماغها فى ...... " دا احسن رد بصراحه على رجاله فاكرين بناتهم "......" ومستنين اى فرصه يبوظوا ... دا اتكو خيبه

Dr Nemo said...

http://www.youm7.com/News.asp?NewsID=136371
هههههههههههههه
دولة دماغها فى ......... وياريت الناس تهدى وتشوف حاجه مهمة تتكلم فيها بقا

فتاه من الصعيد said...

فعلا المصريين بيشتغلوا زي اللي مربوط في ساقيه في اي بلد طالما هيقدر يتجوز ويكون نفسه ويعيش عيشه كريمه ..... يعني مفيش جين كسل ولا حاجه

المشكله اكيد في النظام ...... وبصراحه البلد اللي واحد يجيب مجموع قارب على الميه في الميه ويمكن يكون عداها .... ويفضل يعاني في الجامعه من دراسه ومصاريف ... وفي الاخر ياخد 200 جنيه في الشهر تبقى بلد ملهاش لازمه وبتهين ولادها

اما بالنسبه للخبر .... فعادي احنا سوق والصين بتشوف طلبات الجمهور ايه ..... ربنا يعافينا

mido said...

تصدقى انا لسه لحد دلوقتى مقرتش الخبر ده على الرغم من كم اللينكات اللى اتحطت عنه فى الفايسبوك

و التويتر

و لا حقراه

مش عارف ليه مجليش مزاج اروح على موقع

اليوم الساقع

و اقرا الخبر

انا شيلت الموقع من الريدر من كذا شهر بعد الفبركات اللى لسه مستمرين فيها

غير الفرقعات اللى بيحبوا يعملوها كل شوية

و دى أخرها

soreal said...

ok, to me the news is not that china decided to make it, the news is that Egyptian merchants decided to import them..

i remeber the first time i read about this chines "product" ... i went to their website... the product is marketed as a way to experience the virgin feeling again and again and again, not to reflect a false reality

considerable number of European women actually go through the process of surgically repairing it to have that experience again... what can i say, that's what luxurious societies do.. and thats where the demand of such a produce came from

in short, i doubt that china has made it for "us"

now being said that, its situations like these that really exposes the falseness of some of our "traditional" moral values.. we have a very long way toward mending our shattered self... to bring it to care about what's worth instead...

Appy said...

ده اللى انا قولته النهارده ان الناس دي بتشتغل بطريقه غب انها تعمل حاج غريبه والاغرب انها تعمل حاجه زي دى
وانهم دارسين البلاد اللى بيعملوا فيها ده
بجد انا منبهره بيهم هم اللى شغاواكتر مع انى لما اروح مكان ويقولى الحاجه اللى عندي صينى اقوله ادينى مصري هو المصري مات وبتحمق اوي اوي
وبعدين هيبقى الجدل على ايه ما الدماتره بتعمله وهو شرف البنت كده وبس افرض واحده حصل لها ظروف اغتصاب لعبه خطره ركوب عجل ما كل ده سبب برضه اتولدت من غيره المشكله فعلا فى حياتهم ودماغهم وجديتهم
انتى شوفتى سجاده الصلاه عاملين لها شنطه شيك جدا علشان تحطيها فيها وكانك شايله شنطه خروج علشان تاخديها معاكى فى كل مكان شوفتى بقى
المشكله فعلا فى موضوع دماغ

إنترنتاوي said...

من أفضل المقالات اللي كتبتيها يا نوارة
فعلا الصين عدد سكانها حوالي خمس سكان العالم و لو قابلت أي أحد منهم على الشات بالصدفة و ده نادر أكيد هتلاقيه يتكلم في البيزنس و أنه عاوز يصدر كذا و كذا
أما العرب فطبعا معظم اللي بيدخلوا على الشات للتسلية الا من رحم الله

أبو أمك said...

الناس دي لو بتفكر صح
كانوا صدروا لنا حكومة صيني بدل اللي حكومتنا بتعملوا فينا
وساعتها كان الشعب كله هايفضل عذارى

Ahmed Nasr said...

ههههههههههه
بعد السطر الأول من تدوينتك فتحت اللينك وشفت الموضوع ايه، انا مكنش عندي أي علم بالموضوع الا منك دلوقتي..

بس فكرت نفس تفكيرك كدة..هم ولاد الجنية بيتفرجوا عالأفلام المصرية ولا ايه؟..عرفوا دي ازاي؟..احنا منعرفش حتى يا ترى الصينيين عندهم الموضوع ده زينا ولا لأ!!..منعرفش مش نعرف انهم صنعوه لينا ولا ليهم!!

الا يعني ايه غشاء بكارة بالصيني؟!!

بتنفس حريه said...

احنا كده مانجيش غير فى الهايفه ونتصدر..حتلاقى الدنيا تقوم مش حتقعد والناس فى كل حته تتكلم و مش بعيد كمان واحد زى بتاع مجلس الشعب الى جاب مراته وامه وبناته وعمل اعتصام قدام مجلس الشعب علشان الختان وخايف على بناته من الانحراف

وتسالى الناس عن الاراضى الى مرويه بابلمحارى يقولك " ربنا ينقم من اسرائيل هى السبب سبها على الله"

تقول توريث و انتخابات يقولك "ماهى مخروبه من زمان

اما تفسده اخلاق حريمنا ..تقوم ثوره

أصل غشاء البكاره بناتنا اهم من بلد فاتحه رجليها بالها 28 سنه ماحدش سال عن غشاء البكاره بتاعها

اه يا بلد عايزه ولد بس الولد راح ولا جاشى

AhmeD 3llaM said...

هي الصين او المستورد
هتنزل منتج ايا كان الا اذا كان فيه طلب عليه
دي مصيبه
بس العيب في المستوردين
يعني الصينيات تنزل مصر وتنزل القري والكفور
تبيع ملابس تسترنا
واحنا نروح هناك ونجيب حاجه تفضحنا
*****
افضل تعليق علي المهزله دي
شرف البنت مش زي عود الكبريت
دابقي ولاعه سخان اوتوماتيك
****
انا محطتش وسيلة الغوايا ادام البنت
واقولها اوعي يا بنتي تعملي كده
دا عيب وحرام
شرفك وعفافك لاء مش تجيبي لينا العار يا حبيبتي
سيدنا محمد قال
واجتنبو الشبهات
ابعدو عنها
مش نقول ان ستتنا وحشين ومستنين
وليه انا اجيبلهم الغلط ادامهم واقولهم مش تعملو
مدام قادرين نمنع وصوله

مش ابيع سجاير واصرح بتجارتها
واعمل اعلانات عن الاضرار المدمره الناتجه عن التدخين
انا عايز افهم احنا في دوله اسلاميه ولا دولة من ده علي ده
********
سمعت ان الطبيعي يكسب
وعشان كده لازم يا رجاله كلكم تجربو الطبيعي قبل الجواز عشان لما تقابلو الصناعي تقدرو تكتشفوه
وده انسب حل هنسمعه قريب
في التوك شو

شوكولاتة said...

حزنتيني والله يانوارة أنا كنت عمالة أفكر في الموضوع على أنه كارثة بس مابصتلوش من الناحية دي خالص
إحنا فعلا طاقات مهدرة ولو لاحظتي هتلاقي كل اللي فلحو في مصر بدأوا براها
ربنا يستر والموضوع ده يوقف بأي شكل

كل سنة وأنتي طيبة ياقمر

جبهة التهييس الشعبية said...

dr nemo

المصيبة ان فيه ناس بتاكل عيش على غلبنا

فتاة من الصعيد
طب بذمتك يا شيخة
فيه حد في الدنيا بيجيب مية في المية في اي بلد طبيعية؟


ميدو
شفت وزير الصحة اللي استورد خمسة مليون لقاح تطعيم

ح يطعم بيهم مين وللا مين؟ وللا بصلة المحب خروف؟

soreal
يا دهوتي
وكمان طلعوا مش عاملينها لينا؟
يعني احنا ما بنشغلش اي مكان في العالم ولا حتى دماغ الصينيين؟

ابي

سجادة صلاة وفانوس رمضان وبوصلة للقبلة
كله صناعة الصين
مش ناقص غير يصنعوا لنا مواطنين ويبعتوهم

انترنتاوي

مرة واحدة صاحبتي سألت واحد صيني: هو انتوا على طول بتشتغلوا كده؟
قال لها: امال نعمل ايه تاني؟

ماعندوش تصور ايه اللي ممكن يتعمل في الحياة لو الواحد ما اشتغلش

ابو امك
ههههههههههههههههههههه
انت عسل

احمد نصر
غشاء البكارة بالصيني، غشاء البكارة بالصيني
متهيألي اسمه شغل برضه

بتنفس حرية

الا صحيح
مصر فقدت بكارتها امتى؟ ماداهية بعد ده كله تطلع لسة عذراء الربيع

احمد علام
ما تستعجلش على التوك شو
ده احنا بكرة نسمع احلى كلام

بدراوى said...

غير التوك شو
انتظرى ماسورة فتاوى حتضرب
قريب

على رأى بلال فضل كان كاتب مقال عن الفتاوى
بيقولك الفتاوى كلها هههههههههههه
فى الحاجات اياها و بس
هههههههههههههه

مهندس حر said...

أنا سمعت عن المنتج ده من فترة بس ماكانش صينى .. طبعا الصينيين أخدوا الفكرة و هينتجوه بتكلفة أقل و يبيعوه بسعر فى متناول المستهلك الغلبان..

أعذرينى إنتى و الشباب اللى علقوا أو معظمهم لأن البوست و بعض التعليقات ضحكتنى شوية..

أكيد طبعا المنتج ده زى ما سوريال وضح ماهواش للغرض المحدد اللى كل الناس بتتكلم عنه.. و بعدين إنتو فكرتكو عجيبة جدا عن البلد لو حقيقى متصورين إن عدد البنات اللى محتاجة للحل ده ممكن يكون كبير لدرجة إنه يكون سوق رائج يستاهل تقوم عشانه صناعة كاملة .. حرام عليكو!! :)

الإخوة اللى علقوا على اليوم السابع كانت تعليقاتهم من المضحك المبكى فعلا .. فيه ناس عقلها خلاص مفيهش صواميل لدرجة أنه متخيل البنت من دول عايزة لا مؤاخذة تعيش حياتها و كل اللى ماسكها و مانعها هو السبب ده اللى ليه حلول مختلفة من زمان؟؟.. حقيقى فيه ناس بتفكر كده؟؟.. متخيلين إن بناتهم و إخواتهم هم كلهم مشاريع ساقطات لا يمنعها من التحقق إلا الخوف على حتة الجلد دى؟؟

الإنبهار بالصين طبعا مبرر بس فى حدود .. يعنى معظم المنتجات العملية الموجهة لثقافات مختلفة عنهم مبتكونش من بنات أفكارهم .. يعنى مثلا المنتجات اللى طافحة زى ماسورة المجارى اليومين دول و كلها حوالين المفتش كرومبو يخرب بيت اللى بدعه و كلها جاية من الصين اللى فكر فيها موزعين مصريين بعتوا للموردين بتوعهم فى الصين و طلبوا منهم يعملولهم كذا و كذا على شكل كذا إلخ .. الموضوع برضه كده فى سجاجيد الصلاة و السبح إلخ .. بمعنى إن الناس هناك مش عباقرة أكتر من غيرهم .. و حكاية الشغل طبيعية ماهو اللى يلاقى شغل و مايشتغلش يستاهل الحرق.. لكن قدرتهم على تصريف بضايعهم مش سببه العبقرية أو الشغل الكتير و إنما رخص الإيد العاملة أكتر حتى من عندنا لأنهم مجتمع مازال شيوعى و السلع بتتباع عندهم برخص التراب و مستوى المعيشة فى الأرض بس على الأقل الناس كلها بتشتغل و كلها بتنتج بخلاف إن فيه إمتيازات فى تكاليف الطاقة و المواد الخام و غيره تعتبر بصراحة مش شريفة من ناحية التنافس..

آخرته .. روقوا كده و ماتتعصبوش على أى حاجة .. هوه إحنا لسة هانكتشف إن المشكلة فى النظام؟.. طب ما إحنا عارفين و اللى مش عارف يبقى لا مؤاخذة كان نايم و ماتفرقش ما إحنا قاعدين بنتفرج مادام إتفقنا من زمان إن مفيش حاجة بإيدينا.. و لما تخرب بقى هنبقى نشوف لنا صرفة ساعتها .. أنا عن نفسى هروح أجدد الباسبور و أهو طلب الهجرة لموزمبيق بينظروا فيه و لو إتزنقت هخليه طلب لجوء ..

Ehab Fayez said...

فى الصين اختراع غشاء بكارة فتاه لترويجه فى منطقتنا العربية كان حلم لبعض الشباب واستطاعوا تحقيقه.

فى مصر فض غشاء بكارة فتاه في الحلال هو حلم لكثير من الشباب لا يستطعون تحقيقه علشان ظروفهم المادية.

جبهة التهييس الشعبية said...

بدراوي
اه ما هو الشيوخ دلوقت بقوا زي الملح في الطعام
ولازم يطلعوا في التوك شو طبعا

مهندس حر

ماحدش قال انهم عباقرة بس احنا بنقول انهم بيشتغلوا

اللي يلاقي شغل وما يشتغلش يبقى عايز الحرق

طيب واللي مش لاقي شغل ونفسه يا يشتغل يا باشمهندس

يعني حضرتك بتقول ان الموزعين المصريين بيبعتوا للصين عشان يصنعوا حاجات

ده ما يغيرش من الحقيقة حاجة
مش مهم تبقى من بنات افكارهم وللا من صبيان افكارنا
المهم انك لما تحب تصنع حاجة للسوق المصري بتبعت للصين

ده الغرض من البوست ومن تعليقات اللي علقوا


ايهاب
ما انشالله ما اتجوزتوا يا اخي
يا اخي ما تشوفوا لنا حل في ام البلد دي يا اخي دي حاجة بقت تخنق

مواطن مصري said...

ههههههه و الله الشعب الصيني دة جبار و يستاهل يكون قوة تنافس امريكا مش تقوليلي

ايران

الصراحة الصين غزت البلد

و الله انا لو مكان ادارة الزمالك مثلا أبعت أجيب

لعيبة صيني برخص التراب و هيجبولنا الدوري

او مثلا ممكن أـبعت أجيب عروسة من هناك اتجوزها

ههههههههههههه


مينفعش نستورد نواب من الصين ؟

مهندس حر said...

ما تفهمنيش غلط .. الجزء المضحك فى التعليقات هوه فكرة إن الصينيين عملوا البتاع ده إستجابة للطلب عليه عندنا و كأن فيه أعداد ضخمة من البنات اللى إستغفر الله العظيم يا إما عندهم مشكلة أو مستنيين حاجة زى دى عشان يعملوا مشكلة..

فكرة إن الصينيين بيشتغلوا كويس مفيهاش حاجة تضحك و أكيد فكرة صح.. أنا ماكانش قصدى إنى أقلل من قيمة أى تعليق إتكتب

Dr Nemo said...

ما انشاله ما اتجوزنا ازاى بس يا نواره ... يعنى الواحد قاعد يطلع طاقاته فى النقاشات الحاده دى ومحاولة "تصحيح" نظام الحكم عشان فى الاخر تيجى تقوليلى عنهم ما اتجوزوا .... طيب ما كده الوحده الاساسية للزفت النيلة المجتمع المتنيل اللى احنا متكببين فيه هتيجى ازاى؟؟ .... واوعى تقولى توردهلنا الصين لان ده فعلا مشروع وشغالين فى تطوريه بس لسه فى بداياته

عمرو امام said...

مهو دةعندك يا نوار الى انا قولتة فى اخرة مرة عندك يا نوارة
قولت يا جماعة تعالو نعمل بدل ما بنقول تعالو نوعى بدل ما نهاجم تعالو نعمل حاجة مفيدة مش لازم يعنى نعمل جمعية يالى بينا نصحى مصر لا
كل واحد فى شغلة فى الحتة الى ساكن فيها فى محيط اسرتة واصحابة ومعارفة نعمل نوع من تفتح الافق للناس على شان يقدرة يستوعبة التغير يا نوارة الناس هنا معندهاش استعداد للابداع اغلبيتهم اكيد مش كلهم واى تقدم واى استنارة محتاجة ابداع ومبدعين ودية مسئولية اى مثقف مصرى يا ريت يكون كلامى بيسط وواصل للناس وليكى
مع فائق احترامى

جبهة التهييس الشعبية said...

نيمو
ما تنساش تصور لنا الشمس
:)

جبهة التهييس الشعبية said...

مهندس حر
ماحدش قال ان بنات مصر استغفر الله العظيم
انت جبت الكلام ده منين؟

جبهة التهييس الشعبية said...

عمرو
مش عارفة يا عمرو هي ح تنفع وللا ح تبقى مسكنات

ما يبعتوا جمال مبارك لامريكا ويبعتوا لنا احنا اوباما مدام بيقولوا عليه نازي واشتراكي
ههههههههههههه
انا مش فاهمة نازي واشتراكي ومسلم مع بعض كلهم؟

عمرو امام said...

وبعدين يا استاذة نوارة
شباب مصر على شان نبقى عدلين نصفهم بيفكر فى مستقبلة ومستقبل البد الى هو عايش فيها والنص التانى مبيفكرش من اساسة ولا بسيسب حتى حد يفكرلة
انا هحكيلة قصة شاب انا اعرفة
الشاب دة طول عمرة متميز فى المدرسة كان متميز بين اهلة كان متميز بين اصدقائة كان متميز ولما دخل الجامعة عرف يعنى اية سياسة وانضم لمنظمة ممكن تكوينى عارفاها اسمها شرارة
وفى وقت صغير على شان هو كان ذكى قدر يبقى كدر فى المنظمة دية فى اقل من شهرين ومع السياسة كان شغال فى بيزنس خاص بية وكان بيعمل فلوس وهو لسة مكملش عشرين سنة كان دخلة فى الشهر لايقل عن عشرة الاف جنية
المهم لسبب او لاخر بطل سياسة وانقطع عن عالم المثقفين واتجاة للتجارة والبزنسي وعمل فلوس وفتح معرض عربيات وكان عمرة 28 سنة والمعادى كلها بتعملة حساب
الشاب دة عشان يوقعوة ويقضة علية حيتان البزنيس فى المعادى نخيلى جندة مين
جندة حبيبت عمرة الى كان ربنا فوق وهو تحت عندها خلوها ادمنت وبعدين سبوها علية لحد ما قضت عليها وفى النص اتجوزها فلما بقت مراتة قلتلة الى حصل كلة
ضيع كل افلوس الى عملها باع اكتر من 10 عربيات وشقة كل حاجة بمعنى كل حاجة مكنش فى جيبة ثمن علبة سجاير
الى حصل مع الشاب دة لو حصل مع اى شاب معندوش ارضية كويسة وعقل حتى لو خانة بس اقدر ينبهو وعزية وايرادة وثقة فى الله وعارف كويس ان ربنا ميزة عن باقى مخلوقاتة بالمخ والاحساس
هيسلم وبقول دة قدرى ونصيبى وهيقعد كدة لحد ما يموت او يموت بردة
اما الحد الى انا بكلمكة عنة قدر يقوم تانى وقدر يقف على رجلة اكتر من الاول
هو هنا الفرق يا جماعة لازم تبقى فية حملة توعية لكل مصر لازم الناس كلها تعرف يعنى اية كلمة انسان اية مقدرت الانسان دة ممكن يعمل اية للئسف فى مصر هنا مفهمنهم ان الانسان دة بيكل ويشتغل ويشرب ويجيب عيال وبس
المشكلة يا نوارة بالتوعية والتنوير
امال هما قتلوة فرج فودة لية وغربة نصر حامد ابو زيد لية وكتير وكتير عقولة مستنيرة موتوها وفرموها على شان نفضل فى ضلمة ليوم الدين

عمرو امام said...

ااهم من دة كلة حاجة تانية
ان الشاب الى بحكيلك عنة دة وهو فى محنتة دية وهو بيتعالج راح مكان فايف استار للعلاج يعتبر اكبر مكان لعااج الادمان فى الشرق الاوسط صاحب المكان دة بردة من اهم الاطباء النفسين فى مصر مش كدة بس لا فى العالم وكان بشغل منصب فى الحكومة
المهم بعد رحلة طويلة من العلاج فى المكان دة تقريبا سنتين ما بين دخول وخروج وهروب يعنى اكتشف حاجة
ان كل مرة بكون جاى فيها هنا بيكون جاى بنفسة وباردة وبيبكى بالدوع على شان يبطل
وبعد يومين تلاتة هوب يجيلة العفريت
كان هيتجنن طب هو فى اية الغلط فين
المهم اخر مرة راهن نفسة على ان الناس دية هما الى غلط وفى حاجة مش مظبوطة وقال انة هيبطل فى بيتهم ولوحدة منغير مساعدة اى حد وقد كان فعلا بطل لوحدة وفعلا بقى زى الفل وفضلهم بقا عاوز يعلرف الغلط كان فين
وبداء يبحث وبدا يتذكر كل المناقشات الى كانت بدور بينة وبين الفريق العلاجى الى طبعا اختلف معاهم مائت المرات والكبيرة بتاعتهم قلتلة انتا مش هتتعالج انتى هتفضل طول عمرك كدة دة لانة طبعا على شان ثوراجى قديم مكنش بيعدى اى حاجة الناس فى المكان دة بتعمل للمرضة غسيل مخ شامل بيخلة يبطل ادمان ويدمنهم هما الى بيتعالج عندهم فى برنامج اسمة الn aدة برنامج عالمى بس طبعا هنا بيطبق لصالح ناس معينة نسبة نجاحة 10 فى المية دة من لسانهم
المهم ان مش هقدر اقولك كل حاجة هنا بس حاولت اديلك ننبذة عن الموضوع
وفى حاجة اهم ان بالبحث وراء صاحب هذا المكان اتضح انه من اصل يهودى وبعد كدة ابوة اعتنق المسيحية
وكانة من سكان القدس
وجدة من اكبر الشعرة اليهود الى اشعارهم معلقة فى المعابد
مش عارف بقا دة لية علاقة بالموضوع ولا صدفة ???????????????????????

Heshmat said...

أمير سعودي يرفض دفع فاتورة فندق لـ"سوء الخدمة"

قالت وسائل إعلام مصرية إن أحد الأمراء السعوديين رفض دفع تكلفة إقامته في فندق فخم في العاصمة المصرية القاهرة، والتي زادت على 25 مليون جنيه (4.53 ملايين دولار)، بحجة أن الخدمة بالفندق لا ترقى للمستوى المطلوب.

ونقلت صحيفة "الجمهورية" المصرية عن الأمير تركي بن عبد العزيز قوله في شكوى تقدم بها للشرطة "صوت الضفادع يقلقني أثناء نومي والخدمة بالفندق غير راقية على الإطلاق كما أن حدائق الفندق مليئة بالحشرات."

وقالت الصحيفة إن الأمير السعودي حرر محضرا في قسم شرطة أول أكتوبر اتهم فيه إدارة الفندق بالإهمال الشديد مما تسبب في الأضرار المعنوية له وحاشيته التي برفقته.

وقال الأمير أمام رئيس المباحث هاني درويش إنه أثناء إقامته بالفندق "وجد سوء خدمة من العاملين وكان يشاهد حشرات داخل الجناح كما أن صوت الضفادع بالحدائق المجاورة كان يقلقه أثناء نومه،" وفقا للصحيفة.

مواطن مصري said...

سمعتي عن عزيز مرقة

اسمعي موسيقي الراز و عيشي معاها


http://www.youtube.com/watch?v=lxaUs2i0ANo

ما بقولك اسف

Dr Nemo said...

http://1.bp.blogspot.com/_rkOC-gKfU4o/Sq8PZLvzoyI/AAAAAAAAAJQ/J6RaRWPONIU/s400/IMG0702A.jpg

النهارده انا نازل مش شايف قدامى وعنيا مزغلله ...دى كانت بشعاع وشعاع وكمان شعاع.... مش عارف اذا كانت الصوره موضحه كده ولا لا لان موبايلى تعبان الشكيمه مهتز الاراده بس عموما فيه فيديو برضه هحاول ارفعه دلوقت للشروق بس مش عارف تقريبا اليوتيوب واقع ودى غريبه ..... شوية وراجع

جبهة التهييس الشعبية said...

ولعلمك انا تاني يوم ابص على الشمس وتعمل فيا المغرز ده وتقريبا نظري ح يطير بالطريقة دي
هههههههههههه
متشكرة يا نيمو
استنى بقى اما اشوف الصورة

حـنــّا السكران said...

ما في حدا بيتكرّم علينا و بيخترع غشاء بكارة جديد للعقول اللي فقدت عذريتها و انتُهكت و هُتك عرضها مليون مرة ..
الواحد ما بيعرف , يبكي ولاّ يضحك .

ـ دائما بتجيبي المفيد يا نوارة .

كل عام و أنتم بخير جميعاً .

Dr Nemo said...

لا على فكره انا كنت نازل عادى وعنيا مش تعبانى يوم ما قلتلك حاسس انها كانت ليله القدر والله اعلم بس انا متاكد ان النهارده كان الشمس شديده عن ليلة 23 ..... متاكد من دى

جبهة التهييس الشعبية said...

سبحان الله

انت كمان مصور شمس النهاردة بدري عن شمس ليلة القدر
انت صورت شمس النهاردة اول ما طلعت

شمس ليلة القدر استنيت عليها

بص
ده اللي صورته النهاردة

http://1.bp.blogspot.com/_rkOC-gKfU4o/Sq8PZLvzoyI/AAAAAAAAAJQ/J6RaRWPONIU/s400/IMG0702A.jpg


وده اللي صورته تاني يوم ليلة تلاتة وعشرين ومصوره متأخر عن النهاردة يعني المفروض الشعاع يبقى اجمد

http://3.bp.blogspot.com/_rkOC-gKfU4o/Sqxt-pza1hI/AAAAAAAAAJI/x5kJJvPGoWU/s400/IMG0700A.jpg

متشكرة قوي يا نيمو

كده الحمد لله ثبتت الرؤيا
لان شمس امبارح برضه كانت زي شمس النهاردة

مبروك بقى يا عم
ربنا يتقبل منا جميعا يارب

بس مش عايزين نخستك بقى في الكام يوم اللي فاضلين ههههههههه هي اه الحمد لله ليلة القدر ان شاء الله عدت بس ان شاء الله اللي جايين فيهم بركة كتير

جبهة التهييس الشعبية said...

على فكرة
انا مش عارفة اشكرك ازاي عشان اتعميت معايا
ههههههههههه

جبهة التهييس الشعبية said...

جووووووووو

وحشتني
انت فين يا وحش

عمرو امام said...

انا كنت عاوز اخد رائيك فى قصيدتين
وقولتيلى سبتلك تعليق بس ملقتش تعليق
طيب ممكن تقوليلى قولتى اية فى التعليق

جبهة التهييس الشعبية said...

استنى يا عمرو

انا جاية لك تاني المدونة وح اسيب التعليق يعني ح اسيبه
ههههههههههههه

Dr Nemo said...

هههههههههه ولا يهمك بس اصبرى شوفى الفيديو كمان انا اضطريت ارفعه على البلوجر لان اليوتيوب واقع ..... غريبه اوى لتانى مره ..... انا رفعت الفيديو بس مش عارف اجيب عنوانه هنا ازى .... يااااااادى الكسوف

جبهة التهييس الشعبية said...

انت منزله على البلوج بتاعك؟

استنى انا جاية

انا مش عارفة مالي مبسوطة كده؟
هههههههه
مبسوطة عشان شفت شمس ليلة القدر وللا عشان اتأكد انها شمس ليلة القدر وللا انا هابلة اصلا

انا هابلة الظاهر
ههههههههههههه

بدراوى said...

Dr.nemo

يوتيوب بيعملوا صيانة
We are currently performing site maintenance

مهندس حر said...

إنتى يا بنتى ناويالى على مصيبة؟؟.. أنا قلت إن بنات مصر مش عارف إيه و ألا قلت إن حد قال كده؟؟

أنا قلت لو تخيلنا و بس فى حالة إننا نتخيل إن أيوها حد هيعمل منتج مخصوص لترويجه عندنا إحنا بالعينية يبقى لازم إحصائيا فيه عدد كبير من المشترين المتوقعين .. و بما إن الحمدلله ده غير صحيح يبقى أكيد حتما و لابد و من غير شك إن هاذوها المنتج مش معمول لنا إحنا تحديدا دونا عن خلق الله جميعا..

و بعدين مش عشان بيبقى فيه تعليقات كتير بتقريها تيجى على التعليق بتاعى و تقريه طيارى.. و تطلعينى بخبط فى الحلل و إحتمال حد يشكنى قضية تشويه لسمعة مصر.. ما همه دلوقت بيرفعوا قضايا على اللى بيكتبوا مدونات و اللى بيعلقوا عندهم كمان.. كل واحد ياخد باله من تعليقاته..

Dr Nemo said...

مش عارف فيه مشكله عندى طيب خلاص مش مشكله هبقى ارفعه على اليوتيوب واسبلك الوصله هنا احسن .... بس مبدئيا ان شاء الله مكنتش الليله على الاقل هيا ليلة القدر

عمرو امام said...

اهم حاجة الكلام كويس يوصل للناس
ويقدرة يفهموة هو دة كل همى بس
على شان اكمل وانزل بقيت القصائد

مواطن مصري said...

نوارة سؤال كدة متعرفيش امتى عرض مسرحية قهوةس ادة عمال ادور على مواعيد لعرض المسرحية مش لاقي قولت اكيد انتي تعرفي
؟

مهندس حر said...

نوارة .. أنا أول مرة أسمع موضوع علاقة الشمس بليلة القدر .. إنتى جايباها منين؟ و هل فيه علامات تانية ؟

عمرو امام said...

على فكرة انا كتبت كتير وقطعت كتير
بس الى سموعونى قليل ومنهم والدك
سمعتة يا مصر يالى دية الى انتى قرائتيها دية
بس انا الى بقالى فترة لا بكتب ولا بقراء
وبردة نصيحتك الغلاية فى محل الاعتبار
شكررررررررررررررا

جبهة التهييس الشعبية said...

مهندس حر

دي مكتوبة في كل حتة يا مهندس، ده مافيش حتة فيها سيرة ليلة القدر الا وفيها ان تاني يوم الشمس بتطلع من غير شعاع

افتح فقه السنة طب اظن الجزء الاول

مواطن مصري said...

http://www.4shared.com/file/7136378/40457ac/Aziz_Maraka_-_Possessed.html?s=1

Aziz Maraka Possessed

اسمعيها و ادعيليييييييييي

Dr Nemo said...

http://www.saaid.net/Doat/assuhaim/107.htm

علاماتها وهى عموما مما يستأنس به وليس هنا ما هوه "اكيد" فى هذه المسألة والا لم يكن قد قيل عنها انها "مخفاة" فى العشر الاواخر......ولسه اليوتيوب بيعمل تصليحات برضه.... لما نشوف

Dr Nemo said...

- ثبت من حديث ابن عباس عند ابن خزيمة ، ورواه الطيالسي في مسنده ، وسنده صحيح أن النبي صلى الله عليه وسلم قال : ( ليلة القدر ليلة طلقة ، لا حارة ولا باردة ، تُصبح الشمس يومها حمراء ضعيفة ) صحيح ابن خزيمة ( 2912 ) ومسند الطيالسي .


رأيتها وربى صبيحة ليلة 23

جبهة التهييس الشعبية said...

ايوة
اهي

http://3.bp.blogspot.com/_rkOC-gKfU4o/Sqxt-pza1hI/AAAAAAAAAJI/x5kJJvPGoWU/s400/IMG0700A.jpg

انا مبسوطة

Dr Nemo said...

http://www.youtube.com/watch?v=Xg-uMBG-T3E

فيديو الشروق يانواره هاتى على الدقيقه 2:50 هتلاقى الشروق وادعليلى

Dr Nemo said...

هههه سورى على عوجة الرقبة بس انا استعجلت فى رفعها قبل ما اعدلها

مهندس حر said...

ده اللى لقيته فى فقه السنة:

وروى مسلم ، وأحمد ، وأبو داود ، والترمذي - وصححه عن أبي ابن كعب أنه قال : والله الذي لا إله إلا هو ، إنها لفي رمضان - يحلف ما يستثني - ووالله إني لاعلم أي ليلة هي ، هي الليلة التي أمرنا رسول الله صلى صلى الله عليه وسلم بقيامها ، هي ليلة سبع وعشرين ، وأمارتها أن تطلع الشمس في صبيحة يومها ، بيضاء ، لاشعاع لها

على العموم ربنا يجعل ظنك فى محله إن شاء الله..

جبهة التهييس الشعبية said...

اه يا نيمو
شعاعها سابقها
طب انت ما صورتش شمس تلاتة وعشرين وهي بتطلع فيديو؟

Dr Nemo said...

لا بصراحه مكنتش حاطط فى دماغى انى هتكلم مع حد اصلا فى الموضوع ده بس طالما هنتابع يبقى بعد كده هنمشى بالاستبعاد يعنى لو الايام الباقيه طلعت زى النهارده يبقى هيا كانت 23 باذن الله ... هنتابع مع بعض ونشوف

Kontiki said...

نوارة ازيك صباح الخير والله اجمد بوست قريتة من مدة بوست مليان متفجرات اولا الخبر نفسة خبر اسود قد كدة احنا بقينا شعب غشاش ؟ قد كدة بقينا مفضوحين ولسة بندفن راسنا فى الرمل وبقية الشعوب قريتنا وعرفت اننا شعب سطحى بيتمسك بالشرف الاسمى والنظر للست على انها حتة لحمة لازم تتكلفت عشان تبقى شريفة والحجاب والنقاب اللى انتشر وبقت البنات كلها ماشية بالقفطان و تحتة البدى وعليهم بنطلون جينز واربع طرح على شعرهم منظر ماسخ لا فية ذوق ولا اناقة كل دة عشان يبقوا محجبات عشان يلبسوا توب الشرف لو كان فينا شرف بجد ونسبة القذارة مش عالية مكنتش الصين صنعت البلوة دى وحتصدرهولنا ! ولو اتمنع تصديرة حيتهرب وحيتباع فى بلد الغش ! طول ما النظرة للبنت الغير محجبة انها مش ملتزمة ! طول ما هى مرفوضة و الناس بتحدفها بالطوب والقزاز ، والبنت الصريحة اللى حياتها واضحة ومبتخفش عشان مش بتغلط ومش بتستخبى الناس مبترحمهاش والمكلفتة اللى بتعمل اللى ميتعملش يتقال عليها شريفة فين القيم فى مجتمع عديم القيم مجتمع وفية سطحية بس الحمد لله خلاص البلد كلها بقت محجبات ومنقبات واحلى من الشرف مفيش والدليل اهو حيبعتولنا البلوة دى من برة وبرضة ما ننساش ان البنت اللى فرطت فى نفسها فى قصادها شاب غير امين الصراحة الاخلاق والامانة و الصدق مالى البلد بنات وشباب :D بالنسبة لمسألة العمل انهى بنت فى بلدنا تعرف تشيل شنطتها و تسافر تشتغل مندوبة فى بلد تانى زى الصينيات ما بيعملوا ؟؟؟ دى حتبقى عاوزة فتاوى ! حتة اللحمة متسافرش لوحدها ! سبب الفتنة والرزيلة على كوكب الارض متطلعش برة ولا جوة. وبرضة بالنسبة لقيمة العمل كام شاب فى بلدنا بيكافح عشان حلمة مين مبيفضلش الحلم الجاهز اللى مفيهوش تعب ،اما تناول الميديا للموضوع زى ما قلتى حيدخلوا فى متاهات وشيوخ ودكاترة و مولد ولك وفى الاخر المنتج حيجى و حيتباع .

andrew said...

بالنسبة لموضوع غشاء البكارة الصينى فده مش شىء غريب ان احنا نسمعه بسبب ان كل حاجه بقت صينى لحد ما وصل الموضوع للتريقة ان فيه خروف للعيد صينى وال 200 جنية الصينى اللى لما تفكها تبقى 1000 وكارت الشحن الصينى اللى بيبقى ب 5 ويشحنلك ب 10 بس فبعض الاحيان بتشيل القشرة اللى على الكارت وتلاقى حظ سعيد المرة القادمة
ده بسبب ان احنا شعب جاهل و مبينملش غير لغرائزنا كل الشباب دلوقتى همها الحب والجواز وكل ده عشان الجنس فقط لا غير وبما ان الحكومة بتقول ان 85 % من الشعب سعيد فده يدل على ان الشعب مرفه وبيحب ينوع ادواته فبيجيب غشاء بكارة بلستك صينى ولامؤخزة فى الجملة لما تيجى تشترى اى حاجه بتفتح الكيس وبتبص على العلامة بتاعت بلد الصنع ولو لقيتها صينى تشتريها بسعر اقل وتفاصل فيها
انتوا ملاحظين احنا رخصنا الستات قوى
وبعيدا عن الاخلاقيات ندخل فى الشغل
والبطالة والقهاوى احسن مشروع فبلدك شوف كام متخرج سنويا -تقريبا 600 الف على مستوى الجمهورية - تخيل كام قهوة تلم دول احنا شعب بيفكر فى الفلوس .العيب مش فى الحكومة بس يا اساتذة ولا فى الاخ اللى بيشغل بتوع الجامعة الامريكية. فى بلدنا الناس مش طايقة بعض وكله بيبيع نفسه واللى يدفع اكتر هيشترى
يعنى اللى حاطط صورة حسن نصرلله هنا ده هو مش عارف ان فيه مؤامرة بتتلعب على بلدنا لانها اقوى دولة فى المنطقة يا عالم احنا اقوى من اسرائيل حتى باسلحتها واقوى من ايران بثورتها
كام واحد فيكم يعرف عن الموضوع ده
كام واحد يعرف ان قطر وسوريا وايران وفرعهم فى لبنان - حسن نصرلله - ضد بلدنا وضد مستقبلنا
فكرررروا وشغلووووا عقلكم شوية