Sunday, 20 September 2009

انا مش شايفة غير نادية الجندي في جرب الحواسيس

النهاردة ابتدوا يضربوا سامية فهمي، ومنة شلبي مش عارفة تنضرب كويس وتتخرشم صح وتترمي على طول دراع الممثل اللي بيضربها وتترزع في الحيطة، مش عارفة تقول: لااااعااااا، وهي مغطية الكاميرا بكفها كله ومع ذلك لوزها باينة من بين صوابعها. حتى لما بتقع على الارض مش بتتهبد زي ما نادية كانت ح تعمل
مافيش حد كان مناسب للدور ده غير نادية الجنسي، خصوصا بقى لو طلعوها في السن ده حامل، ونبيل يفضل زي ماهو شريف سلامة ويبقى هو زميل نادية الجنسي في الكلية، يا سلاااااااام، كان ح يبقى مناسب قوي لجو الخيال العلمي بتاع المسلسل، والجمل الحوارية، كلها كلها بتاعة نادية الجنسي: الرصاصة اللي ضربته بيها طههههرته وعملت منه بطططلللللل... انتوا العدووو انتوا اللي اختارتوا لنفسكوا ككككدددده من ايام دير ياسين واطفال بحر البقر. دي كانت ح تقول في الجمل دي قوالة، وكانت ح ترقص بقى مع شلومو وتعمل احلى كلام، وشلومو كان ح يحاول يراودها عن نفسها، ثم ان شلومو ده كان لازم يبقى سعيد عبد الغني، ازاي ما عرضوش الادوار ده عليهم؟ مع ان الطقم كله بتاعها: نادر جلال، وبشير الديك، وطريقة تمثيل احمد صيام: يا حبيييبببييييي، الورق اللي المخابرات المصرية بتسيبهولها على مستوى: خالتي بتسلم عليك، ماما جولدا، الاود الاسمنتية الكبيرة اللي مليانة عساكر اسرائيليين، الموسيقى التصورية الاسرائيلية اللي بتظهر اول ما يروحوا تل ابيب، المشهد الاخير اللي كلوز على وش سامية وبعدين ديزولف على علم مصر، بس نسيوا يحطوا صوت السادات او عبد الناصر، ماهي نادية اكيد كان ليها بصمتها
العمل ده فاشل فاشل فاشل
هو فيه كشري من غير صلصة؟ فيه عبد الحليم حافظ من غير بلوزات هاي كول فتافيت السكر او على الاقل قمصان مشجرة بياقات تستخدم كفوطة سفرة في بعض الاحيان؟ فيه احمد ماهر من غير عياط بالدموع حتى وهو بيمثل هولاكو؟ فيه استظراف من كتر غلاسته يضحك من غير زكية زكريا؟ فيه اغراء يعلم العفة ويتوب ابليس ويخلي كزانوفا يترهبن وراسبوتين يحج من غير نبيلة عبيد؟ فيه رقصة الشلاليت المميتة اللي تخليك قاعد متوتر وخايف على مناخير واحد من الجمهور من غير نجوى فؤاد؟ فيه أغنية اطفال "ثقافية" لتعريف الاطفال بالمزز ورجليهم من غير صفاء ابو السعود؟ يبقى مافيش جاسوسية من غير نادية

11 comments:

ahmed said...

اسفخص .. مفيش مشهد واحد منطقي طول ال30 حلقه

santanas said...

hahahahahhahahahahaha.. happy eid ya nowara ... wa allh wak3t men el da7k ye5rbeet 3aklk .. kan naks takoolee fe kora men 3'er abu terika hahahahahahhahahahaha

mido said...

انت مسمياها ليه نادية الجنسى ؟

نادر جلال: شخصية اليهودي في «حرب الجواسيس» حملت بعض المبالغات المقصودة
.. وما خدتش بالي من الموبايل الذي ظهر في أحد مشاهد المسلسل

مشاهد الفلاش باك معمولة بحرفية شديدة

في البداية أظهرنا ضابط المخابرات بشكل قاس جدا ولم تكن العلاقة بينه وبين سامية بهذا التباسط، لكن جهات مسئولة نصحتنا بتغيير شكل العلاقة بعد أن أكدوا لنا أنها أبسط من ذلك

مواطن مصري said...

هيهيهي عندك حق و بقالنا كثير مشفناش فلم مهمة في تل ابيب

mido said...

من ضمن الاخطاء فى المسلسل اذا جازت تسميته بالمسلسل

مديحة كانت واقفة قدام محل

و عليه لوحة

summer 2009

Mo said...

هاهاهاهاااااا ايوا يا ميدو انا برضو خدت بالي من حتة Summer 2009 دي

بس السؤال يطرح نفسه: هما الناس اللي بيعملوا المسلسلات دي ما بيراجعوهاش قبل العرض ولا هو احنا اللي مفتريين و ما بنفوتش حاجة؟
كان في غلطة عجيبه في الحلقة 29 خلتني قعدت ارجع الحلقة من اولها علشان اشوفها تاني و اقعد اضحك...

الاحداث كالتالي:
سامية هانم و بلبل حبيييييبي فطروا في الفندق و نزلوا يشوفوا اكل عيشهم مع الموساد... خللوا بالكم ان سامية مقيمة في الفندق, يعني هدومها هناك... المهم راحوا على القصر وقالولها قومي على جهاز كشف الكذب قامت عاملة الشويتين بتوع كرامتي وطلعت تلم شنطة هدومها (في القصر ها؟). دخل عليها شلومو (او زي ما سامية قالتها النهارده "شالومو") و هدى اعصابها فنزلت معاه تعمل كشف الكذب و سابت الشنطة بالهدوم اللي فيها على السرير... بعد ما خلصت الكشف طلعت تاني علشان تغير هدومها (اللي هي مفروض في الفندق) فتحت الباب واذ بالمفاجأة الكبرى: الشنطة على السرير مقفولة و فيها الهدوم. عارفين يا ولاد سامية (او المخرج) عملت ايه؟ نزلت تتخانق معاهم على مين اللي سمحلهم يجيبوا شنطة هدومها من الفندق!!!

واخيرا اكبر غلطة في تاريخ التلفزيون المصري الحديث:
سامية اول ما وصلت ايطاليا خدوها على رحلة داخلية "بالطيارة" من روما على القصر اللي في جبال الالب. لو حد فيكو دخل على اي سايت لحجز تذاكر الطيران حيلاقي ان المدة بين روما و اقرب مدينتين لجبال الاب (ميلانو و تورينو) هي على الاقل ساعة و عشر دقائق بالطيارة. بس تيجي ايه المسافات دي قدام قدرات ولادنا (او المخرج), اول ما هشام سليم كلم رئيس مكتب روما و قال له ابعتلي كل العناصر اللي عندك يا دوب بينزل سماعة التليفون لقاهم عنده... اومال!!! هو احنا غلبناهم من شوية؟!!

اكيد اكيد اكيد الناس اللي عاملين المسلسلات السنة دي معتمدين ان كل واحد فينا حيبقى بيتفرج و كرشه قدامه مترين بعد الفطار و مش فاكر اسم امه... انا ماعنديش مانع اتاخد على قد عقلي بس مش كدا برضو.
على رأيك يا نوارة هو ماينفعش غير نادية الجندي في دور زي ده... بس انا متغاظ قوي من اسم نادية الجنسي ده, اصل انا جنداوي بس الحمد لله الشر برا و بعيد ماليش دعوة بيها لا من قريب ولا من بعيد... الله يجازي اللي كانت السبب بقى و جابتلنا الاسم
العرة ده.

كل سنة وانتوا طيبين يا حلوين و ربنا يجمعنا على خير في المسلسل الفاشل اللي جاي :)

Mo said...

تصدقي يا نوارة حالا دلوقتي واخد بالي انك كاتبة العنوان غلط...
"حرب الحواسيس"... سلامة حواسيسك يا شابة

جبهة التهييس الشعبية said...

انا كاتبة
جرب الحواسيس

ده اسمها الحقيقي

Sosso said...

حرب الجواميس

soreal said...

strangely, when i googled 7awasees to know what does it mean, most of the hits refer to 7rb elgawasees series xD



kol 3am we elgamee3 b5eer :)

مسلم مصري said...

إنت مش ممكن. الفقرة الأخيرة في البوست بجد بجد إبداع.