Thursday, 24 September 2009

كابتشن، يا تصوت يا تقول لي ما صوتش ليه؟

اسم الله على مقامك، ربنا يبارك في نواضرك، شايف الاستفتاء اللي على جنب المدونة ده؟
>>>>>>>>>>>>>>
اه ده، لو سمحت يا تصوت عليه يا اما لو مش ح تصوت تقول لي ما صوتش ليه؟
ممكن؟ وللا مش ح تعبرني في دي كمان؟ :) يعني لو مش مستنضفني للدرجة دي اكيد مش ح تدخل المدونة اصلا
وللا ايه؟

22 comments:

بُقُلظ said...

أنسة أنسة

بلاش تحسبى عدد الزوار من العداد اللى تحت ده

عشان كل رفريش يحسبه واحد جديد

شوفى صرفة تانية

جبهة التهييس الشعبية said...

لالالالالالا

الريفريش مش بيعمل عدد جديد

ما تقلقش
:)

مشتكرة قوي يا باشا على انسة
ميرسي ليك كتير على ذوقك

Founoon said...

نوارة مش عارفه اختار ايه ولا واحدة فيهم بتعبر عن مشاعيري

يعني الاولانية مش للدرجة دي مش هنستهبل ماهو في اسرائيل فعلا

والتاني هي فعلا مصيرها الى زوال بس انا ضد التعامل

والتالت هو فعلا امر واقع بس مش هنخبط دماغنا في الحيطة

الرابع والاخير مش اختياراتي خالص

قولي اختار ايه في اللي انتي حاطاه شبه رأيي اللي شرحتهولك داوان يا اختى

جبهة التهييس الشعبية said...

لا خلاص مدام ولا واحدة بتتعامل مع مشاعيرك

يبقى اكتبي مشاعيرك هنا وما تصوتيش

فاروق عادل said...

بصى يا انسة انا اخترت الترشيح التانى

Bella said...

الاختيارات لاتعبر عما اريده

عاملة استفتاء صعب قوي يانوارة

صعب الاختيار

جبهة التهييس الشعبية said...

لو الاختيارات مش مناسبة اكتبي اختياراتك هنا

ahmed samir said...

انا كمان مش لاقي اختيار مناسب اصوت له
عموماً رأيي

انها دولة غصب عني يعني امر واقع لكن انا مش مسلم بيه و مش حتعامل معاها و مستعد اعمل ضدها على طول الخط و مؤمن انها حتتحرر في يوم من الايام حتى لو معشتش عشان اشوف اليوم ده
( اقصد فلسطين اللي حتتحرر يعني)1

****
نقطة صغيرة بخصوص مناقشتك مع بدراوي في البوست اللي فات
اينعم للأسف اسرائيل متقدمة عننا و مش في النووي و بس عندها صناعه الكترونيات و برمجه
عندها صناعه سلاح متقدمة بتعمل كل حاجه من المسدس باراك للبندقية الجليل للدبابة الميركافا حتى الاف 16 بتطورها عشان احتياجاتها

تعتبر من اكبر الدول المصدرة للسلاح و تاني دولة على مستوى العالم في مبيعات السلاح المستعمل

soreal said...

أمر واقع... بس الجزء المتعلق بخبط الرأس يوحي بالاستسلام

بالرغم من ده ، صوتي راح للخيار ده...

بس إذا عاوزه اصححه راح أقول: إسرائيل أمر واقع، لابد التعامل معه

أبويوسف said...

تم التصويت

مهندس حر said...

مش هأصوت لنفس أسباب فنون بالضبط..

إسرائيل أمر واقع .. وحتى مع إنى بحب أقول عليها الكيان الصهيونى إلا إن ده تلاعب لفظى بيعبر عن عدم إعترافى بشرعيتها كدولة ..

المهم إن أى أمر واقع هو معرض للزوال .. بس أنا مش مؤمن بالحتمية التاريخية .. يعنى إسرائيل عرضة للزوال و زوالها مش معضلة صعبة قوى زى ماناس كتير بتتخيل .. لكن مهما كان تهافتها و سهولة إسقاطها ففى حد أدنى من قوة الدفع المطلوبة لإنجاز المهمة و طول ما إحنا بنلعب فيما تحت الحد الأدنى فممكن إسرائيل تظل باقية لقرون .. الفكرة هيه إن بقاء إسرائيل مرهون بما يفعله العرب فى المقام الأول .. العوامل الداخلية و العوامل الدولية فاعلة من حيث تأثيرها على الحد الأدنى اللى إتكلمت عليه يعنى يا إما بتخلى الجهد المطلوب أكبر شوية أو أقل حبة .. فى النهاية هى مسألة كمية مش نوعية..

إختيارى هو:

إسرائيل أمر واقع قابل لزوال و زوالها مرهون بوجود إرادة عربية فاعلة..

faissl said...

أنا اخترت الأولاني
لأن حتى لو فيه دولة اسمها إسرائيل والعالم كله معترف بيها وده مش حقيقي بالمناسبة
المفروض احنا تحديدا كعرب ما نعترفش بيها
بالنسبة لنا احنا فيه فلسطين وفيه كيان استعماري محتل لفلسطين
إيه إسرائيل دي بقه..؟ :)
شكرا على قرصة الودن دي يا نوارة
حتى لا ننسى

خمسة فضفضة said...

السلام عليكم ورحمة الله وبركاته

ما صوتش لان الاختيارات مش مناسبه

وانا مقتنعه جدا ان وعد الله ات لا محاله
و مؤمنه جدا بكلام ربنا :
(فإذا جاء وعد الاخره ليسئو وجوهكم وليدخلوا المسجد كما دخلوه اول مره وليتبروا ما علوا تتبيرا)
صدق الله العظيم

ايوه هي دوله امر واقع بس مصيرها الي زوال ان شاء الله وعسي ان يكون قريب

وفي خلال المده دي ( لحد ما تزول اقصد يعني ) المفروض لا نتعامل معاهم باي حال من الاحوال بالزمه يعني ناس عماله تقتل في اخواتنا وتقتل فينا وتسمملنا الاكل والشرب وعاوزه تجيلنا مصيبه تريحها من وشنا ناس زي دول اطبع معاهم بامارة ايه يعني

ناس عماله تعمل في اسلحه ونووي وبيولوجي وبلاوي زرقه عشان تبيدنا من علي وش الارض ( لانهم واثقين ان اليوم اللي ربنا وعدهم بيه جاي ان اجلا ام عاجلا )
احط ايدي فايدهم واسلم عليهم وانا باضحك وبوسه من هنا وبوسه من هنا وناقص اخدهم بالحضن ليه


ناس عاوزالنا الخساره باي شكل من الاشكال وعمالين يخربوا في اقتصادنا بكل الطرق اللي يقدروا عليها اتاجر معاهم واعمل بيزنس واتفاقيات تجاريه وكويز بامارة ايه

بصي ناس من الاخر كده بتحتقرنا ومش طيقانا ابقي ملهوفه عليهم اوي كده ليه وناقص اعملم عجين الفلاحه عشان يرضوا عني ليه ( والله احق ان ترضوه ان كنتم مؤمنين )

والنبي يا اوختشي سيبيني ساكته اصل انا مبئوئه ولو فتحت في الكلام مش هاسكت انهارده

مهندس مصري said...

بصي أنا متفق مع فنون
يعني فيه إسرائيل فعلاً بقوة الأمر الواقع
لكن لأ مش حنتعامل معاها و هي مصيرها إلى زوال
فإخترت الإختيار الخامس لإن سؤالك و الإجابات اللي كاتباها هي إستهبال ناتج عن حالة تهييس شديدة
ما كنتي تحطي إختيارات ناس عاقلين
إيه اللي إنتي حطاه ده؟

جبهة التهييس الشعبية said...

بس الاجابات دي ناس كتير بتقولها يا مهندس

وانا مش كاتبة هل السؤال اهبل انا كاتبة ان السؤال عن اسرائيل اهبل
:)
يعني انت حسبت نفسك مع اللي مبسوطين من وجود اسرائيل وبيستعجبوا على اللي لسة بيتناقشوا فيها

ههههههههههههه

انا حاطة اجابات معظم الناس بتقولها

وقلت لما ما تلاقيش اجابة تكتب اجابتك هنا

مهندس مصري said...

يا سلام
بس صيغة الإجابات مش واضحة
ما هو الإختيار الخامس يحتمل معنيين يا أختى
المعنى اللي إنتي عايزاه و هو إن إسرائيل خلاص بقت من ثوابت الكون و مش محتاجة حد يسأل عنها
و المعنى اللي أنا فهمته إن السؤال أهبل لإن كل الناس الطبيعين بفطرتهم بيكرهوا إسرائيل

مش بأقولك إنت كاتبة لغز مش إستبيان
المفروض تكون الإجابات متباينة و الفروق بين الإختيارات واضحة
ثم إنتي بتشوفي الناس العجيبة اللي بتقول لك الإجابات اللي كاتباها دي فين

واضح إنك مختلطة بناس غلط خالص و أنصحك تبعدي عنهم بدل ما ينقطوكي او يجننوكي
:)

جبهة التهييس الشعبية said...

لا
انا حاطة اجابات مش شعبية
حاطة اجابات شبه نخبوية
الناس اللي ماسكة ابواق وبتتكلم لان دول لهم تأثير على الرأي العام وطبيعي الناس بتكرر الكلام اللي بتقراه وبتسمعه
عشان كده كنت عايزة اعرف اللي لهم اكسس على النت نسبة منهم قد ايه كده او كده

وهم عادة كلامهم عن اسرائيل بيبقى يا اما رفض كامل، يا اما امنيات بزوالها بس بصراحة مش مستعدين يواجهوها
يا اما العيال القبيضة بقى بتوع اسرائيل دولة ديمقراطية ومتقدمة يا اما ناس اصلا مش مستعدة تتناقش في وجودها من اساسه

دول ناس موجودين يا محمد ولهم تأثير على الناس وفيه بغبغانات بيعيدوا الكلام وراهم

يا فيه ناس لها اراء تانية زي فنون ومهندس وبيللا يكتبوا رأيهم هنا

بس هو عادة الاعلام الرسمي والبديل متقسم لمجموعات بالطريقة دي للاسف مافيش ابتكاريين كتير

انت بس اللي لما حد بيغيظك بتهرب منه ههههههههه
بس ده ما ينفيش ان له تأثير

جبهة التهييس الشعبية said...

الحداشر اللي صوتوا على ان اسرائيل دولة ديمقراطية ومتقدمة
لو رجالة يكشفوا عن نفسهم

نفسي اعرف مين دول

naser said...

أمر واقع (الاكثر نفيراوعده) وهى العدو

أسماء - فلسطين للأبد said...

أنا اخترت أول واحدة .. مش استعباط وانى مش عارفة إيه هى إسرائيل بس ده انى مش معترفة بيها أصلا .. يعنى باقول مافيش حاجة اسمها كده بس فيه حاجة اسمها فلسطين المحتلة .. مش عارفة كده ينفع وللا لأ

أبو أسامة said...

أنا ما شاركتش
علشان مفيش ولا اختيا نافعني :


طبعا فيه اختيارات مستحيل أختارها أصلا زي دي :
أمر واقع، ح نخبط راسنا في الحيط يعني؟
علشان أنا فهمت من صياغة الإجابة إن أنا أسلم بالأمر الواقع .

مالها إسرائيل؟ دولة متقدمة وديمقراطية
وأنا مال أهلي .

ياااه هو لسة فيه حد بيسأل الاسئلة الهابلة دي؟
الأهبل هو اللى يختار الاختيار ده .

------------------
يتبقى اختيارين :
يعني إيه إسرائيل؟ مافيش حاجة كده، قصدك النبي؟
طبعا فيه حاجة إسمها إسرائيل
ده كيان موجود فعلا ومحدش ينكر كده
وبالتالي الاختيار ده كمان أوت

مصيرها إلى زوال، بس في الوقت الحالي لازم نتعامل
مش فهمت نتعامل يعني إيه
يعني تطبيع والذي منه لحد ما ربنا يفرجها ؟
لا مش أنا والله

أما لو نتعامل يعني نديهم بالصرمة القديمة (بالمركوب يعني ) طبعا أنا موافق


علشان كده أنا قررت أختار الاختيار ده بس بالمعنى الأخير اللى أنا قلته ده وأمري إلى الله
طبعا ده تناقض
بس عادي يعني

ag said...

أنا أول مرة أدخل مدونتك ... حبيت أقول اني خايفه قوي ... هو فيه أمل اننا نشوف النور بجد و اننا نعيش بكرامه قبل ما نموت بجد ... نفسي في حمله شعبيه معلنه لانقاذ بلدنا اقتصاديا و أمنيا ...طب الناس العاديه زينا في رأيك نعمل ايه و في ادينا ايه دلوقتي ... نفسي الاعلام يبطل المكلمات الي فاتحها على البحري مع ناس بتتخانق أو ناس بتخون أو ناس بتفرض وصايتها و يبقى فيه ناس عايزة تصلح بجد و تاخد مصر بينا للنور