Sunday 6 September 2009

اقتراح

انتوا متابعين نفسكوا من اول رمضان؟ دي فرصة كويسة والشياطين محبوسة ان الواحد يعرف بالظبط ايه اللي منه وايه اللي من الشيطان، والله هو اللي من الشيطان لطيف وسهل واخره اعوذ بالله من الشيطان. عموما لو مش متابع قوي ممكن تبتدي من دلوقت، مش ح تكتب بقى عيوبك، ح تكتب الموقف، او لو دماغك بتشيل كويس، (بس تكون بتشيل كويس قوي فوتوغرافية يعني) لو انت من النوع اللي مش بيشوف غلطه يبقى تكتب الموقف زي ماهو كده وبعدين تعكسه بس تعكسه مش مع نفس الشخص عشان انت اكيد ح تبقى مأير منه، مع شخص تاني يكون هو بالنسبة لك زي انت بالنسبة للشخص التاني
هههههههههههههه اقطع دراعي ان كنتوا فاهمين مني حاجة
يعني مثلا، انت قلت كلمة لحد اكبر منك، مثلا مثلا، وهو زعل ورد عليك رد معين، انت شايف انك مش غلطان، اعكسها بقى وحط في الموقف حد اصغر منك بنفس فرق العمر، تقوم لما تتخيل الموقف وتلاقي نفسك زعلت تعرف ان من عيوبك انك وقح مثلا
هو مثال اهبل طبعا بس باحاول اوضح لكوا وجهة نظري
عشان لما الواحد يعرف يعمل ايه؟ مش عارفة، بس اهي معلومة الواحد يعرفها برضه
-------
انا عارفة اني بقيت اكلمكوا عن حرب الجواسيس كتير، بس هي فعلا سيطرت على مشاعري وشغلت كل حياتي وفكري، حلقة امبارح عملت كده: شلومو قال لباروخ انه ح ينزل نبيل مصر عشان لو نبيل متراقب يتقبض عليه في مصر ولو مش متراقب يرجع لهم بسامية بحجة انها ح تيجي تشتري عربية
وبعدين شفنا نبيل راح مصر وقابل سامية وقال لها تجيله ايطاليا وتتحجج بانها ح تشتري عربية
وبعدين اخدت نبيل عند مامتها وقالت لها انها رايحة ايطاليا تشتري عربية
وبعدين شفنا سامية وهي بتقدم اجازة اسبوعين وبتقول لرئيس التحرير انها رايحة ايطاليا تجيب عربية وهو بيقول لها لا انت رايحة لنبيل
وبعدين شفنا هشام سليم وهو بيحكي للراجل ده اللي قاعد يسمع حدوتة قبل النوم وبيقول له ان نبيل راح مصر عشان يجيب سامية ايطاليا بحجة انها ح تشتري عربية
وبعدين (ملحوظة: اظن مش متوقع مني اني اكدب او ابالغ وانا صايمة يعني، وبعدين ده في التلفزيون وكل الناس شافته، يعني مافيش داعي حد يستهتر بكلامي ومشاعري) وبعدين منة شلبي (والله العظيم) راحت لهشام سليم وقالت له ان "اياميها نبيل جه مصر وطلب مني اني اروح ايطاليا" عملوا فلاش باك لشلومو وهو بيتفق مع نبيل انه يجيب سامية ايطاليا بحجة انها ح تشتري عربية، وانا الحقيقة مش فاهمة وضع الفلاش باك ده ايه؟ يعني لا الظابط بيفتكره ولا سامية بتفتكره لانه اتفاق ما بين نبيل وشلومو، يعني كان مفروض يا نبيل يا شلومو هم اللي يفتكروه
وبعدين رجعوا من الفلاش باك اللي مش بتاعهم بس هم افتكروه بالتليباثي وهشام سليم قال لها وعملتي ايه؟ قالت له: قدمت على اجازة و.. وراحت حاكية الحلقة تاني، سابع
الللللللللههههههههههههه
انا عمري ما شفت حاجات حلوة كده، انا مبسوطة قوي، ما تنسوش تعملوا النوتة اللي باقول لكوا عليها، ومعلش استحملوني في الفترة اللي جاية بالنوسبة لحرب الجواسيس، اظن اني ح اقعد اتكلم عنها حتى بعد رمضان 

11 comments:

mido said...

بلاش تذاكرى على المسلسل ده
:))

خليك مع كتاب الوزارة

:D


تقريبا اللى صنعوا المسلسل من تقريبا ميعرفوش يعنى ايه

تليباثى

مواطن مصري said...

ههههههههه انا مش قولتلك ساعتها اتفرجي علية و مش هتندمي

دة ولا ادهم صبري


نيبل عدى ادهم صبري

ههههه

overdose said...

تليباثي يعني تخاطر عن بعد

والنبي يا جماعة حد يعرف رجائي منير محاكمته في اسكندرية حصل فيها ايه بعد اذنكوا؟

Kalimalhus said...

هوه ماحدش شاف مسلسل حكايات بنعيشها بتاع ليلى علوى؟؟.. أصل ده المسلسل الوحيد اللى أنا معتبره حلو فعلا..
اللى ما كانش متابعه من أول رمضان ممكن يبدأ يتابعه دلوقت لأنه مكون من قصتين كل واحدة 15 حلقة .. ماعرفش إن كانت القصة التانية هتبقى فى نفس مستوى الأولانية لكن بشكل عام مستوى المسلسل جيد جدا فى مختلف عناصره..

الحاج نادر جلال عاملين معاه لقاء فى الشروق و بيقولك حرب الجواسيس نقطة تحول فى تاريخ الدراما المصرية ..؟

soreal said...

متهيألي أنك إنتي عأوزه ببساطه تقولي متعملش فالناس اللي أنت متقبلوش يتعمل فيك ... صح؟

بس مراقبه النفس بصوره عامه شئ أساسي للاصلاح

أنا بصراحه ابتديت أمل من حرب الجواسيس دي... فيري ماتش بريديكتابل P:

Anonymous said...

هما في كل المسلسلات ماشيين بنظريه في الاعاده افاده

وان المشاهد متخلف عقليا ومريض نفسيا

على فكره حلوه حكايه النوته دي ..... وانا كنت بجربها بس من الذاكره

يعني لما يجيلي هاجس كده وانا بصلي في رمضان .... استغرب انه نفس الهاجس اللي كنت بفتكره من الشيطان ..... بس عرفت ان ساعات النفس تتعمل عمل الشياطين .... بس على اشد

ربنا يقينا شر انفسنا

الـسـيـدة نـون said...

ههههههههههههههههههههههههههه

انا مش بتفرج على اى مسلسلات
اللهم الا يوميات ونيس وبالصدفة كمان

بس انتى فظيعة يا نوارة
وانتى بتسردى احداث المسلسل
انا قعدت اضحك وعنيا دمعت

هههههههههههههههههههههههه


انا هاعمل النوتة اللى انتى بتقولى عليها دى
ولو انك بضربك للمثل خلتينى اقرف من نفسى

لانى تخيلت نفسى انا وماما ابطال المثل بتاعك
فاكتشفت انى وقحة وانا اللى كنت فاكرة نفسى محترمة مع الاكبر منى

شكرا ليكى


سلام
اختك خيخة

Dr Nemo said...

لا يا مواطن يا مصرى ملكش حق
ادهم صبرى كان بتاع مبادىء وكده وعمره ما كان يجيبها على ملا وشها تتحجج انها بتشترى عربية ثم انه ياسيدى مكنش بيخلى اى حد غيره "يفليشله" باك
يعنى من الاخر وعلى راى نواره بالنوسبة للمسلسل المعجزه ده زمانه دلوقت بيتشجل بالحلقه فى اسرائيل عشان يعرفوا قد ايه هما كانوا عبط عشان اتغلبوا من ناس بتفليش باك لبعضيها ومن غير اذن كمان....... نصيحه لنواره...بلاش تستمرى فى الفرجه بدال ما مستوى ذكائك ينخفض وعن المتوسط الطبيعى كمان...بلاش

Unknown said...

هيكل في معرض حديثو عن النكسة قال انو مصر كانت مليانة جواسيس فعالين في حين انو مصر كان ليها جواسيس بس في المسلسلات والسيما،يعني لا رأفت الهجان ولا احمد الهوان ولا كل روايات نبيل فاروق
هل الكلام هادا صحيح 100% ما بعرف

بس الجدير بالاهتمام انو اسرائيل ولا مرة فكرت تعمل مسلسل ولا فيلم عن بطولات الموساد مع الدول العربية
مهمة في مصر الجديدة مثلا وشلومو بيقول خالتي بتسلم عليك..للاسف 60 سنة صراع مع اسرائيل وبنطلعها في منتهى الهبل والسذاجة في المسلسلات،وبنطلع جيشها في منتهى العباطة في خطاباتنا الحنجورية وانتصاراتنا العنترية رغم اننا مهزومين منها من الوريد للوريد
.......
مبارح شفت لقاء مع عم نجم ع قناة الحرة بس ما عجبني كتير، انا كان ليا شرف مقابلتو من 3 سنين في دار ميريت،وكان يومها ملعلع ومتجلي اكتر بكتير من المقابلة التلفزيونية،بس الانسة زينب حضرت بصوتها الجميل وكانت اول مرة اشوفها واسمعها
تحياتي

مواطن مصري said...

نوارة هتشاركي في اضراب 11 سبتمبر

http://www.youm7.com/News.asp?NewsID=131950

http://dostor.org/ar/index.php?option=com_content&task=view&id=31442&Itemid=1


:D

انا ارفض هذا الاضراب

lastcrazyboys said...

سيبك من المسلسلات والكلام ده


انا جالي احبــاط ..وحالتي بقت بالبلى ..وموضوع معالجة النفس ده جابلي الكافية
على ايد الاستــاذ المجتهد" أحمد الشقيري "
خواطر 5

السنــة دي بقى الراجل عامل تأكيد للحاجات اللي بقاله 4 سنين بيرغي فيها ..وبيقولنا ..عشان تصدقوا ان في ناس عايشة كده
بس في كوكب تاني..اسمـــه " اليابان


نصيحة لوجه الله ..محدش يتابع البرنامج

بعد الحلقة دي انا بقيت اكره انزل الشارع ..بالمعنى الحرفي للكلمة

http://www.youtube.com/watch?v=lMMNqYOvzU0&feature=related