Tuesday 29 September 2009

مصر حجزت الصحفي السويدي المناهض للصهيونية؟ هههههههه

مش معقول، الخبر من هنا
احنا بقينا عسل كده؟

هي حصلت؟ ايه الفشل ده؟ فشل فشل فشل يعني
على فكرة، انا عمري ما شفت افشل من النظام المصري، ولا حتى البت اللي كانت معايا في المدرسة اللي كانت قاعدة ورا وكان شعرها فيه قمل وبتجيب كحك في كل المواد وما كانش حد بيرضى يكلمها..... غيري طبعا بسبب سنتمنتاليتي المهترئة، وصحابي كانوا بيزعقوا لي عشان باكلم البت الخايبة وممكن تعديني بالقمل، وسلفتها كراستي رجعتها مبهدلة وصحابي قالوا لي تستاهلي انت عارفة انها خايبة
الظاهر هو مكتوب عليا، على فكرة يا عوكل، انا لحد دلوقت صحابي بيزعقوا لي عشان كل شوية اكلم النظام الخايب واقول لكوا: انتوا مش خايفين من ربنا؟ انتوا ليه فاشلين؟ ويصعب عليا فاروق حسني وافضل انصح في ننوس عين امه وكده... واللي عارفيني من ايام المدرسة وبيقروا المدونة بيقولوا لي: طول عمرك تكلمي العيال الساقطة المقملة وتعزمي عليهم بالساندوتشات يا جربوعة
عاجبك كده يا عوكل؟ جبت لي الكلام

6 comments:

Kalimalhus said...

بير مش أول واحد من الصحفيين أو المدونين الأجانب المقيمين فى مصر اللى يحصل معاه كده و غالبا مش هيكون الأخير .. بشكل واضح الناس دى كلها محطوطة على قوائم الترقب و الغرض هو تصفية كل المراسلين و الصحفيين المستقلين من داخل مصر .. و ده فى إطار عام ممكن تدخلى فيه حملات إعتقال الإخوان و عمليات تخويف المدونين عامة بوقوعهم تحت طائلة قوانين مختلفة إلخ..

البلد بيتم تهيئتها لمخاض قريب.. ما تبقيش حسنة النية و تتخيلى إن اللى بيحصل تعبير عن الغباء أو الهبل .. صدقينى الناس دى عارفين همه عايزين إيه و بيعملوا كل حاجة بالورقة و القلم..

Empress appy said...

هم يضحك وهم يبكى
يابنتى ارحمى شويه ايه دخل المدرسه والفاشله مع الراجل
وبعدين صعبان عليكى النظام وفشله اقولك اقعدى من بعد العشاء للصبح
صلى وادعى لهم واحد واحد بالاسم واسم امه وانا هجيب لكى اسم امهم انهم يبقوا كويسين وينجحوا

Fatma said...

انا رأيي من رأي مهندس حر

Unknown said...

اه بس ده فشل

انا ما قلتش انه هبل
انا باقول انه فشل
نظام عمل من دولة كانت في يوم من الايام مهمة، في العالم مش بس في العالم العربي، عمل منها دولة مقملة وقاعدة في اخر الفصل وبتجيب كحك في الشهادة

عشان بيبص تحت رجليه

حالة انفلات امني تام

زبالة مالية الشارع مش عارفين يلموها او مش عايزين يلموها

ناس كتير بيتها اتخرب بالسياسات الجديدة

اعتقلات وتخويف

حاطين خدهم مداس لكل كلب ولاوطى ناس خلقهم ربنا في العالم

كل ده عشان ايه؟
عشان يجيبوا جمال؟

ايه الفشل اللي هم فيه؟ للدرجة دي جمال فاشل؟ لدرجة انهم مضطرين يعملوا حالة خراب عامة عشان يعرفوا يحطوه في... الكرسي في - على راي فنون - اقرف فرصة؟

شوشو said...

مدونه جميله

تقبل مروى

شوشو

الميكروباص said...

تم ذكر الخبر في جريدة الأخبار اليوم ولكنهم لم يذكروا السبب ولا ادري ما السبب؟؟؟؟