Sunday 27 September 2009

حد يمني هنا يشرح لنا ايه الحوثيين دول؟

تحديث:
لقيت لهم موقع هنا، ميدو بعتهولي على التويتر، نقلا عن محمد توفيق
وميدو بعت لي الاكاونت بتاعهم على اليوتيوب وبكده يبقى لهم موقع بيعبر عنهم وواضح ان اللي دخل الموقع عشان ينقل منهم حصل له اللي حصل لي
مافهمتش حاجة، يبقى هم بقى مش ما عندهمش فرصة يتكلموا، هم مش عارفين يتكلموا
انا مش فاهمة ايه مشكلتهم حاليا دلوقت؟ يعني ايه مطالبهم واحد اتنين تلاتة، وهل مطالبهم دي تستاهل كل الحرب دي؟ اذا كان اضطهاد مذهبي فالموضوع برضه مش مستاهل حرب
والله انا بصيت على الموقع، وعلى الفيديوهات، ومافهمتش حاجة، بصوا انتوا برضه انتوا يمكن مخكوا نور عني انا خريجة خامسة ابتدائي
بصوا وفهموني لو فهمتوا حاجة
------------

انا قاعدة ادور في سلقط في ملقط على موقع للحوثيين عشان افهم هم مين وللا فيهم ايه وللا ايه اللي في دماغهم، مش لاقية، لا ليهم موقع الكتروني، ولا ليهم قناة فضائية، ولا الجزيرة بتستضيف حد منهم، وبس سامعين عنهم اسما كده في الاخبار: مقتل عشرة من الحوثيين، مقتل ثلاثين من الحوثيين، والله لنوري الحوثيين، والله لنشبح الحوثيين
طيب هم رأيهم ايه؟ يعني يسمعونا هم بيقولوا ايه واحنا برضه نشوف كلامهم معقول وللا مجانين، احنا بني ادمين برضه ولينا نظرة في الناس
:)
جابوا في الجزيرة صحفي المفروض انه محايد، انا ما ارتاحتلوش شكله، اسم الصحيفة اللي بيرأسها، كلامه الغامض
اولا لابس لي خنافس، ثانيا الصحيفة اسمها اليمن نيوز!!! ثالثا بيقول كده:
لكن هذه ليست طريقة للمطالبة بمظلمتهم (على الحوثيين يعني) انا لا ادافع عن انتهاكات الدولة، لكن عليهم القاء السلاح والمطالبة برد مظلمتهم بالحوار
ايوة، ايه بقى مظلمتهم؟
انا برضه كنت حاسة انهم مظاليم، والله، اختفاءهم ده، ولسانهم المقطوع ومالهمش حد يدافع عنهم ولا يتكلم نيابة عنهم، وعمالين يموتوا ولا حد بيسأل فيهم، والعالم كله ضدهم، والعالم ده دايما ظالم، العالم اللي واقف مع اسرائيل مش ممكن يبقى بيفهم في العدل حاجة، وخسائرهم الفادحة، كل دي بتوحي بضعفهم الشديد، طيب الضعيف دايما معاه حق حتى لو غلطان، لان مافيش ضعيف بيطالب بمطالب مش معقولة، الضعيف دايما طموحه على قده، ودايما خايف ويؤثر السلامة، عشان يعمل حاجة زي دي لازم يكون فاض بيه، ولو له حق ياخده ولو مالوش حق يتاخد بالهينة مش بالعنف لانه ضعيف في النهاية
ثم فيه حاجة غريبة قوي، السعودية ومصر وامريكا واخدين صف علي عبد الله صالح، من امتى ثلاثي اضواء المسرح دول بيجتمعوا على خير ابدا؟ لازم وراهم مصيبة، وبيقولوا ان ايران ورا الحوثيين، مع ان علي عبد الله صالح قال ايران مالهاش دعوة، طب لو علي عبد الله صالح بينفي دعم ايران لهم، يبقى الناس دي مالهاش داعم خالص، يعني يا قلبي واقفين لوحدهم خالص، ثم دول لو بياخدوا فلوس من اي حد انشالله حتى من لجنة الزكاة كانوا عرفوا يعملوا موقع بتلاتة صاغ يشرح قضيتهم اللي الواحد مش فاهم هي ايه؟
وعلي عبد الله صالح يموت عيالهم ونسوانهم ويقول اصلهم بياخدوا المدنيين دروع بشرية؟ ماحدش بيقول الكلام ده غير اسرائيل، حتى امريكا مش بتقوله، بتقول خطأ، نيران صديقة، ما حصلش، احنا اسفين، والله ما شفنا، ده مش احنا، لكن عمرها ما قالت الكلمة دي، لانه معروف في القانون الدولي ان لما المحارب يتخذ من المدنيين دروع بشرية مش مسموح للطرف التاني انه يموت المدنيين، ده اسرائيل بتقول كده عشان بلطجية يعني
بس فيه حاجة تالتة اغرب واغرب، مذيعة الجزيرة قالت ان الحوثيين بيقولوا ان الخلاف ما بينهم وبين الحكومة خلاف ثقافي!!!!! يا صلاة النبي؟ هي الناس لما تختلف ثقافيا بتحارب؟ ماهو بصراحة هم لو بيحاربوا عشان خلاف ثقافي يبقى عايزين حش رقبتهم
لا حرام، ليطلعوا مظلومين، بس مش معقولة يبقى عقلهم صغير كده
الحاجة الرابعة الاغرب واغرب واغرب، اني دخلت على موقع الجزيرة لقيت واحد يمني معلق على خبر عن الحوثيين بيقول سيهزم الحوثيون، ورغما عن انوفهم ابو سفيان صحابي
!!!!!!!!!!!!!!!!!!!!!!!!!!!
ايه يا جدعان العبث ده، لالالالالالالا، كلموني زي ما باكلمكوا، اكيد الحرب دي لسبب اكبر شوية من الخلاف على ان ابو سفيان صحابي وللا مش صحابي
يا اما قولوا لي كده بقى عشان اروح اعلق الحوثيين والحكومة من حواجبهم وانتف لهم شعر مناخيرهم
حد فاهم يفهمني
بس من غير فتي والنبي

23 comments:

أحمد عتمان - Ahmed Etman said...

و الله مش حعرف اقولك دلوقتي حاجة بالضبط غير انهم شيعة، دي انا متاكد منها
و على ما أسمع ان خلافهم مع الحكومة مش ثقافي خالص و انما هما شايفين انهم مضهدين و حقوقهم ضايعة و ان وحدة اليمن هم الطائفة الوحيدة اللي ماستفادوش منها خالص و لا ليهم نصيب في حاجة
عموما انا معايا في الشغل ناس يمنيين ، انا اصلي في السعودية، بكرة ان شاء الله حسألهملك و اذا عرفت حاجة حقولك

مواطن مصري said...

دي يا نوارة الحرب السادسة مع الحوثين بداية المعارك بدأت2004 اول المعارك بتمويل ايراني

نوارة انا كنت ماتب بوست عنهم


وع ن بدايتهم و اول انشقاق ليهم

من ساعت ما ممسك بدر الدين الحوثي

لو عاوزة تعرفي الحكاية من طقق لسلامو عليكو

شوفي البوست بتاعي
stories-from-my-life.blogspot.com/2009/09/blog-post_03.html


و انتي هتعرفي مين هم الحوثين

Unknown said...

دومدوم
طب وهم ح يعرفوا يتكلموا في السعودية؟

مواطن مصري

ما تآخذنيش يا مواطن
لا مؤاخذة يعني

مواطن مصري said...

على ما أسمع انهم طائفة زيدية

و اتمولت من ايران

مواطن مصري said...

؟

فية اية يا نوارة

Unknown said...

يعني انت واحد بتقول ايران واسرائيل واحد اخد منك كلام ازاي؟
معلش يعني
ومنحاز ضد المقاومة ومتعاطف مع عباس
وبتحب ابو الغيط
انا طالبة مصدر محايد
لا منحاز للحوثيين ولا منحاز للحكومة

مواطن مصري said...

انا امتى قولت اني متعاطف مع عباس راجعي التعليقات عندك تلاقيني شاتم في الاثنين

و بترحم على ياسر عرفات


لو على المصادر هتلاقيني ناقل المعلومات عن المصادر

مواطن مصري said...

http://www.aljaml.com/node/49229

http://pulpit.alwatanvoice.com/content-83802.html


اهي دي مصادري

Unknown said...

آآآآآآآآآآآآآه

ماهي كانت ناقصاهم

دول باين عليهم مطرقعين

محمد توفيق لقى لنا الموقع بتاعهم

http://www.almenpar.com/

كاتبين على الموقع: من نصر الى نصر

الله يلعن القات

مواطن مصري said...

هو صحيح عندهم مسموح بزراعة الحشيش مجرد سؤال

Unknown said...

القات
بيزرعوا القات
طالبان هي اللي بتزرع حشيش

هههههههههههههههههه

بس انت بتجيب من مصادر سعودية الحقيقة يا مواطن وانت نفسك مش موضوعي انت منحاز وطائفي وعنصري
ما تآخذنيش
انت واحد بتتكلم عن العرقية المصرية اللي مالهاش وجود اصلا
الواحد ياخد منك معلومات ازاي؟

مواطن مصري said...

المعلومات دي هتلاقيها حتى في ويكي بديا و أغلب المواقع الي بتكلم عنهم

انا مش بثق في مواقع الي تبقى تبع ايران

عشان يبقى اغلب كلامها مذهبي

mido said...

يحيى الحوثى بذات نفسه

عبدالرحمن أبوالعُلا said...

يوجد مقالان في غاية الاهمية لشرح أبعاد الموضوع وتاريخه علي موقع الدكتور راغب السرجاني على اللينك التالي :
http://www.islamstory.com/قصة_اليمن
http://www.islamstory.com/قصة_الحوثيين

soreal said...

if i were you i ll start here


http://en.wikipedia.org/wiki/Hussein_Badreddin_al-Houthi


then follow the links :P

مهندس مصري بيحب مصر said...

أهو عبد الرحمن جاب لك الخلاصة
خشي إقرأي المقالتين بتوع الدكتور راغب السرجاني و إنتي تفهمي

مواطن مصري said...

مثل هذه الجماعة أن تواجه الحكومة طوال هذه الفترة، خاصَّة أنها تدعو إلى فكر شيعي اثني


الحوثيون في اليمن عشري، وهو ليس فكرًا سائدًا في اليمن بشكل عام، مما يجعلنا نفترض أن أتباعه قلة؟!
لذلك تبريرات كثيرة تنير لنا الطريق في فهم القضية، لعل من أبرزها ما يلي:



أولاً: لا يمكن استيعاب أن جماعة قليلة في إحدى المحافظات اليمنية الصغيرة يمكن أن تصمد هذه الفترة الطويلة دون مساعدة خارجية مستمرة، وعند تحليل الوضع نجد أن الدولة الوحيدة التي تستفيد من ازدياد قوة التمرد الحوثي هي دولة إيران، فهي دولة اثنا عشرية تجتهد بكل وسيلة لنشر مذهبها، وإذا استطاعت

السعودية محاصرة بالشيعة من كل الجهات أن تدفع حركة الحوثيين إلى السيطرة على الحكم في اليمن، فإنّ هذا سيصبح نصرًا مجيدًا لها، خاصة أنها ستحاصر أحد أكبر المعاقل المناوئة لها وهي السعودية، فتصبح السعودية محاصَرة من شمالها في العراق، ومن شرقها في المنطقة الشرقية السعودية والكويت والبحرين، وكذلك من جنوبها في اليمن، وهذا سيعطي إيران أوراق ضغط هائلة، سواء في علاقتها مع العالم الإسلامي السُّني، أو في علاقتها مع أمريكا


http://www.islamstory.com/%D9%82%D8%B5%D8%A9_%D8%A7%D9%84%D8%AD%D9%88%D8%AB%D9%8A%D9%8A%D9%86


موقع تالت اهو عشان تتأكدي و محايد

مواطن مصري said...

وليس هذا الفرض نظريًّا، إنما هو أمر واقعي له شواهد كثيرة، منها التحوُّل العجيب لبدر الدين الحوثي من الفكر الزيديّ المعتدل إلى الفكر الاثني عشري المنحرف، مع أن البيئة اليمنية لم تشهد مثل هذا الفكر الاثني عشري في كل مراحل تاريخها، وقد احتضنته إيران بقوَّة، بل واستضافته في طهران عدة سنوات، وقد وجد بدر الدين الحوثي فكرة "ولاية الفقيه" التي أتى بها الخوميني حلاًّ مناسبًا للصعود إلى الحكم حتى لو لم يكن من نسل السيدة فاطمة رضي الله عنها، وهو ما ليس موجودًا في الفكر الزيدي. كما أن إيران دولة قوية تستطيع مدَّ يد العون السياسي والاقتصادي والعسكري للمتمردين، وقد أكّد على مساعدة إيران للحوثيين تبنِّي وسائل الإعلام الإيرانية الشيعية، والمتمثلة في قنواتهم الفضائية المتعددة مثل "العالم"

التسليح الإيراني للحوثيين و"الكوثر" وغيرهما لقضية الحوثيين. كما أن الحوثيين أنفسهم طلبوا قبل ذلك وساطة المرجع الشيعي العراقي الأعلى آية الله السيستاني، وهو اثنا عشري قد يستغربه أهل اليمن، لكن هذا لتأكيد مذهبيَّة التمرد، هذا إضافةً إلى أن الحكومة اليمنية أعلنت عن مصادرتها لأسلحة كثيرة خاصة بالحوثيين، وهي إيرانية الصنع. وقد دأبت الحكومة اليمنية على التلميح دون التصريح بمساعدة إيران للحوثيين، وأنكرت إيران بالطبع المساعدة، وهي لعبة سياسية مفهومة، خاصة في ضوء عقيدة "التقية" الاثني عشرية، والتي تجيز لأصحاب المذهب الكذب دون قيود.
http://www.islamstory.com/%D9%82%D8%B5%D8%A9_%D8%A7%D9%84%D8%AD%D9%88%D8%AB%D9%8A%D9%8A%D9%86

اسد الجيزة said...

توك ماافتكرتوا معشر المدونين المصريين ان في مشاكل في اليمن وحوثي وحرب وبتاع ولبنان نعناع وفطير وحاجات تطير هي من الاخر صراع نفوذ ايراني وامريكي علي اليمن وما ادركم ما اليمن جمال عبد الناصر ما منش عارف يلعبها صح او ما كانشي قادر يلعبهاا صح عشان كدة طرمخت عليه

Ahmed Al khashab said...

المقالتين بتوع دكتور راغب السرجانى
رائعين جدا
أنا لسه حالا شايفهم
--------
موضوع اليمن ده أنا مش كنت فاهم فيه حاجة
----------

Ahmed Al khashab said...

و نفسى أفهم موضوع الصومال
و أفهم مين مع مين
و مين الصح و مين الغلط
:D

ناصر said...

مد النظام اليمني يده للسعودية فمدت اصابعها للعبث بمكوناته الاجتماعية والثقافية والسياسية والدينية.
وبعد صبر طويل على الفساد والافساد والتهميش خرج من محافظات الشمال من يطالب بحقوق المواطنة
فاسس احزاباً سياسية وشارك في الانتخابات البرلمانية وكانت مسيرته السياسية علامة مضيئة في سماء اليمن
في لحظة ما قرر هؤلاء رفع شعار
الموت لامريكا والموت لاسرائيل
نصرة لاخوانهم في فلسطين واحتجاجاً على العربدة الامريكية في افغانستان والعراق
وخرجوا في مسيرات ضخمة تندد بالعدوان الامريكي - الاسرائيلي
وماهي الا سويعات حتى شن النظام اليمني حرباً مباغتة ودموية ضد من لم يرفعوا في وجهه شفرة
واسفرت الحرب عن مقتل الشهيد حسين بدر الدين الحوثي ومئات من محازبيه
ولم يكتفى بذلك بل صادر بيوت الناس ومزارعهم واسكن قطاعاته العسكرية في اراضيهم وبدأت رحلة معاناة الناس مع قوات كانت تتصرف مع مواطنيها بغلظة المحتل
فبدأت ثورة الناس ضد هذا الوضع بالتصاعد، الامر الذي ادى الى حرب صعدة الثانية والتي تولى قيادة المواجهة فيها المرجع الديني المعروف بدر الدين الحوثي، وعندما عجز النظام عن حسم هذه الحرب قبل بوساطة قطرية توصلت الى اتفاق بين الطرفين
مالبث ان تراجع النظام اليمني عن التزامته بموجبها وشن الحرب الثالثة ثم الرابعة ثم الخامسة ثم هذه الحرب
وتولى القيادة فيها السيد عبدالملك الحوثي

ناصر said...

مايريده الحوثيون هو نفس مايريده اي مواطن عربي محروم من حقوقه في بلده
- رغيف الخبز
- الحرية
- العدالة
- نصرة قضايا الامة
وحاول الحوثيون الوصول الى اهدافهم عبر العمل السياسي والثقافي السلمي، ولكن النظام جرد ضدهم حملات عسكرية ضارية الامر الذي اضطرهم للدفاع عن انفسهم بالسلاح