Sunday 27 September 2009

نهار احوس؟

تحديث:
انا بقالي من ساعة ما كتبت البوست ده وانا باحاول اتصل بالمسجد على الارقام دي
26243463
26215060
بيرد عليا تسجيل يقول اطلب الارقام الداخلي، اطلب الارقام الداخلي ماحدش بيرد، الكلام ده من يوم الجمعة اللي فات
وكنت ناوية اروح المسجد بنفسي، بس دلوقت دخلت لي الاخت مروة وسابت التعليق ده اللي مفاده انها سألت في الجامع وانهم نفوا تماما الموضوع ده، فسبت لها تعليق ولقت لها اني ح اروح اسأل بنفسي
ورحت على الفيس بوك عشان اراجع المصدر بتاعي لقيت البنوتة باعتة لي الرسالة دي:
المسجد عمل كده فعلا عشان كان فى اطفال من جمعية فى نفس الشارع بدون ذكر اسمها بس اكيد انتوا هتعرفوها يعنى .. المهم المسجد فى الاول كان بيقبل اطفال عادى من دورايتام بس فى صيف اطفال الدار دى عملت سلوكيات غلط وشقاوة وكمان المشرفات بتوع الدار كان بيتاخروا فى انهم ياخدوا الاطفال ويفضلوا سايبينهم فى الجامع فترات طويلة وبناء عليه اتخذت ادارة الجامع القرار بتاع انو مش هيقبلوا اطفال من دور تانية
انا سالت يا نوارة وعرفت الحكاية بالتفصيل

ملحوظة احقاقا للحق : انا لما سالت اتقالى ان ده مش بيحصل مع كل الجمعيات على فكرة .. هما على حسب سلوك الطفل وكمان اتقالى ان هما عرفوا بعد ما دخلنا الاطفال التابعين لنا انهم من دار بطريقة ما ( فى الغالب من الاطفال نفسهم ) وسابونا واحنا فاكرين انهم ميعرفوش

انا قلت اقلك كل اللى وصلتله عشان مكنش ظلمت حد
انتهت الرسالة
الحقيقة انا كنت ناوية اشتكي المسجد ده في وزارة الاوقاف، ليه بقى؟ لأن طفاطيفو قال لي على الجامع ده "انا مش متأكد ان الجامع ده من ضمن الجوامع اللي بتتحرز اشراك الايتام في بعض النشاطات" وقال لي انهم بيعملوا كده عشان مش عايزين ينفقوا اموال الزكاة على مجهولي النسب، فلما قال لي كده فهمت ان فيه جوامع تانية بتعمل كده وبصراحة كنت ناوية اشتكي
لكن يبدو ان عدم اشراك ايتام الجمعية دي، مسألة ادارية مالهاش علاقة بالحذر من الايتام اللي اتكلم عنه امام مسجد ابو زهرة. وانا اوردت رسالة التصحيح اللي بعتتها لي نيفين، الى جانب رسالة مروة.
بس فيه حاجة، المسجد ده الحمد لله طلع مش بيضطهد الايتام، بس مصطفى وقع بلسانه وفهمت منه ان فيه مساجد تانية بتضطهدهم، انا لسة عايزة اشتكي المساجد التانية اللي مش بتشرك الايتام عشان ما تنفقش عليهم من زكاة المال، وطبعا طفاطيفو مش ح يرضى يقول لي اسماء المساجد دي، اعمل ايه؟ مافيش غير اني اشتكي الامام بتاع مسجد ابو زهرة ده لوزارة الاوقاف
بس، اهو هو قال الكلام ده على الايتام وعمل فتنة، وانا ح اشتكيه، هو اسمه الشيخ محمد عيد
ويا سلام لو مصطفى طلع طيب وقال لي على اسماء الجوامع اللي مش بترضى تصرف على الايتام من زكاة المال، اكون شاكرة والله


الا من كام سنة كده كان فيه واحدة قبقاب كده عندها جمعية وبتقول على اولاد المؤسسة ما تجوزش عليهم زكاة المال عشان ولاد حرام وانجاس. اي والله، اي والله عليكوا، قالت كده. وقالت كمان ان اصلاحهم مستحيل عشان هم انجاس، ليه يا بهانة؟ عشان مجهولي النسب! لا ومعتبرة نفسها متدينة وبتاع
بس انا قلت الولية دي مجنونة، عادي يعني الواحد ياما بيقابل مهابيش في حياته. بعد كده واحدة لطيفة كانت عايزة تطلع زكاة المال وقالت لي: هم بتوع العشوائيات دول بيصلوا، اصل لو ما بيصلوش مش ح اطلع عليهم زكاة المال. طبعا صاحبتكوا مجنونة وقلت لها: مش بيصلوا ومش عايزين من خلقتك حاجة. مع ان فيه منهم ناس بيصلوا، بس ما تفهمش ايه الجنونة اللي جات لي بقى لما سمعتها بتقول لي كده، هو فيه حد بيسأل: سكان مصر الجديدة بيصلوا وللا ما بيصلوش؟. اصل لو ما بيصلوش ح نقطع عنهم النور. انا مش فاهمة الدين ده اخترعوه امتى؟
المهم دارت الايام ولفت الايام وحصل موضوع مسجد ابو زهرة ده بتاع الناس اللي اتخانقت مع الامام عشان بيشتم الشيعة.
لقيت بنوتة لطيفة كده بعد ما رجعت من المشوار باعتة لي على الفيس بوك بتقول لي انها ساكنة هناك وانها حضرت الموضوع، وان الموضوع ما كانش فيه ضرب ولا حاجة، هي الناس اتخانقت معاه بس. هي عموما المصري اليوم ماقالتش ضربوه، هي قالت كانوا عايزين يضربوه. وبعدين في وسط الكلام كده قالت لي: هو عموما الراجل ده غريب شوية (على الامام - البنت مؤدبة مش عايزة تشتمه بس انا ممكن اشتمه عشان انا مش مؤدبة) غريب ازاي يابنتي؟ قالت لي: اصله بيحذر من الايتام
!!!!!!!!!!!!!!!!!!!!!
لأ
لأ
النكتة ديييييي جدييييدةةةةة
- يعني ايه يا بنتي بيحذر من الايتام فهميني
بيقول عليهم ولاد حرام وانا ليا طفل مسئولة عنه في جمعية رسالة ويوميها اتخانقت معاه
-نعم؟ نعم؟ ده مختل عقليا ده؟
قامت بعتت لي الرسالة دي وانا بعد اذنها ح انقلها لكوا بالنص:
طب ده بيحذر .. مسجد الصحابى باه اللى قدام ميدان الحجاز بيرفض ان الاطفال الايتام يشتركوا فى نشاط المسلم الصغير والسنة دى اشتركت للطفل اللى بقلك عليه وانا مفهاهم انه ابن اختى ... بتوع نشاط مسجد الصحابى قالولى بالحرف مبنقبلش ايتام مع انى هادفع الاشتراك والولد زى الفل وبيلبس كويس جدا ومشترك فى نادى وبيلعب رياضة ومدخلاه مدرسة خاصة يعنى سلوكياته طبيعية جدا مع العلم انو عنده اربع سنين ونص ... شفتى باه الجوامع اللطيفة !!!!!!!!!!!
انتهت الرسالة
حد يشيلني من هنا
دي جوامع؟ دي بيوت الله؟ بترفض الايتام؟ لو الجامع يرفض يتيم امال مين اللي يقبله؟ ده حتى زمان كانوا يقولوا: لاقيينه على باب الجامع، على اساس ان الجامع ده اصلا بتاع الايتام
حسبي الله ونعم الوكيل
حسبي الله ونعم الوكيل
يعني ايه؟ انا مش فاهمة يعني ايه؟ وايه مسجد الصحابي يوسف ده؟ عايزين نروح نعمل لهم فضيحة هناك، ده مسجد؟ وده الصلاة فيه حلال ده وللا ايه؟
والبنية عاملة جروب على الفيس بوك للايتام، بص كاتبة ايه
ادى اليتيم حقه


متجرحوش بكلمة
متقلش قدامه انت يتيم
بلاش تتكلم قدامه عن التبرعات والتطوع والحاجات دى
انسى كل حاجة وانت داخل تزوره
افتكر بس انو طفل صغير ... محتاجلك
احتمال يكون اتحرم من الاب من الام من الحنية
يبقى بلاش كمان نحرموا من الادمية
اوعى فى يوم تعاملوا على انه لقيط او ابن حرام
هو مجرد طفل
ربنا بس اللى عالم اهله فين
جايز ماتوا
جايز هو مخطوف
جايز حاجات كتير
اى كانت الحاجات دى هو مالووش ذنب فيها
فهموا ولادكم واخواتكم وقرايبكم
انهم مينفعش يعاملوهم باستحقار فى مدارسهم
بالعكس ... احنا كلنا واحد .....
انا وانت وانتى وهو وهى ........ انسان
مفيش لقيط ومفيش ابن حرام ......
فى بس طفل صغير .... ضحكته ممكن تنور حياتك ....
محتاجلك و ممكن ياخد ايدك يوم القيامة ويروح بيك الجنة .......
لو سمحتم مش اول سؤال نسأله فى اى دار ايتام ( هما اهلهم فين ؟؟ انت لقتوهم ازاى ؟؟ )
اكيد الاحسن اننا نسأل عن الحاجات اللى بتفرحهم وممكن نساعدهم بيها
-------
يا جدعان هو الكلام ده محتاج يتكتب؟ دي لو بتكلم مجموعة من المعاتيه اللي جايين من الاسكيمو بعد ما ماتوا الف سنة وصحيوا تاني مش ح تضطر تقول لهم الكلام ده، هو ده مش كومن سنس وللا ايه؟ هي محتاجة تفسر دلوقت سنة الفين وتسعة معنى كلمة "فأما اليتيم فلا تقهر"؟ محتاجة مفهومية دي؟
انا ما كنتش اتخيل ابدا ان الكلام الفارغ ده بتاع دول ولاد حرام انتشر بسرعة كده؟ ده من كام سنة الست اللي باقول لكوا عليها دي كانت اضحوكة المحافل الدولية
مش معقول، ده احنا ربنا ح يشنبرنا، يعني يعمل فينا ايه اكتر من اللي عامله فينا؟
لالالالالالالا كده قرف كتير عليا، ده نتانياهو له حق ينسل القبقاب المتعاص في الكنيف على ام رأسنا وشوية علينا
احنا ح نسكت على الجامع ده؟ ح نسكت؟ حد يفهمهم طيب، حد يكلمهم انا مش ح اكلمهم، يجبوا لهم شيخ ينصحهم، يفهمهم، يكبر في ودنهم ويطلع العفريت من جتتهم، اي حاجة
هي الناس دي مش خايفة من ربنا؟ هو حد ضامن عمره؟ هو حد ضامن انه عايش لولاده؟ هو حد ضامن ابنه ممكن يتوه وللا يقع في ايد حد، هو حد حتى ضامن ان بنته ربنا ما يوقعهاش في واحد ابن تيت يضحك عليها وتخلف منه ويبقى عنده حفيد زي ده؟ ح يعمل ايه ساعتها؟ مش ح يدخله الجامع؟
سؤال بس والنبي: هو فيه صحابي اسمه يوسف؟ يعني حتى اسم الجامع غلط؟

59 comments:

ragabhpl said...

ناس فاضيه ومش لاقيه حاجة تتكلم فيها
هنستنى منهم ايه يعنى


يدل ما يشتم فى الشيعه يعرف الناس اللى بيحصل فى غزة والعراق والصومال ويكلمهم عن المسبمين اللى بيدبحوا فى كل مكان

بدل ما يقول التبرع حرام علشان دول اولاد حرام .. رغم انه شرعا مش حرام دة واجب على اى فرد انه يساعده ويصرف عليه.. يروح يتكلم عن الفساد الى بيحصل فى البلد والحكومة اللى مخليا الشعب كل يتيم ومش لاقى ياكل


حسبنا الله ونعم الوكيل

mido said...

انت تعمل مشوار لمسجد يوسف ده
زى المشوار الاولانى

و تشوفى ايه حكاية المخابيل دول علشان نفضحهم بالاسم

و متخفيش

و احنا معاك من قدام كيبورداتنا

:D

mido said...

بس انت ليه مذهولة كده كأنها ظاهرة ؟
!


الحالة اللى بتتكلمى عليها

استثناء يثبت القاعدة

TAFATEFO said...

يوسف الصحابي في ميدان الحجاز .. في شارع يوسف الصحابي اللي هو الشخص اللي بنى المسجد مش صحابي اسمه يوسف ولا حاجه

Unknown said...

لا
هي مدام وصلت انها تبقى سياسة جامع يبقى فيه مجموعة من البشر بيتصرفوا كده
احنا مش ح نستنى لحد ما تبقى دي راخرة ظاهرة يا ميدو
احنا لازم نتوب الجامع ده
يا يتعدل
يا نحوله مخزن غلال
ونمشيهم يكلموا نفسهم عشان مافيش اي حد تسول له نفسه المريضة انه يفكر في حاجة زي دي تاني

Unknown said...

طب احنا عايزين نشنقه يوسف ده

Unknown said...

وبعدين ايه الشيخ اللي بيخطب في مسجد ابو زهرة وبيحذر من الايتام ده؟

ده خريج كلية مطاريد الجبل ده؟

TAFATEFO said...

ده مش عايش غالباً .. وبعدين هو ماله

ثانياً موضوع ان مسجد مبيسمحش بإشتراك أيتام دور الرعاية اللي أعرفه انه مش علشان السبب اللي حضرتك ذكرتيه .. بس معتقدش ان يوسف الصحابي منهم

عموماً أنا أعرف واحد من النشطين (مش من الإدارة) في المسجد وممكن أستفسر لحضرتك منه على الموضوع ده

Unknown said...

السبب مش انا اللي قلته
هم اللي قالوا لها ما بنقبلش ايتام

ومافيش اي سبب يبرر على فكرة
اي سبب في الدنيا

وهو فيه جوااااامع؟

جووواااااامع؟
يعني مش هو الجامع ده بس؟

TAFATEFO said...

هو قطعاً مفيش حاجه اسمها ولاد حرام في الدين .. والجوامع اللي بتتحرز من إشراك أطفال دور الرعاية في بعض (بعض) النشاطات سببهم بعيد عن موضوع أطفال حرام ده خالص .. مش بتكلم عن يوسف الصحابي اللي معرفش عنه حاجه تقريباً

well said...

جبهة التيس الشعبية ..
توقعى اى شئ زى ده لاننا وبدون ماحد يصدم او يغمى عليه ..الحقيقة اللى كتير مش واخدين بالهم منها
هى اننا عايشين فى مصر
والله عايشين فى مصر

أبو أمك said...

طب يا ترى
هم بتوع مسجد يوسف الصحابي دول بيصلوا ؟

Unknown said...

مصطفى

انا مش فاهمة والله برضه يعني ايه يتحرزوا من اشراك الايتام

وده على مذهب زنوبة القرعة ده وللا ايه؟

انا باتصل بالمسجد الادارة على طول مشغولة وباقي الخطوط مش بترد

بس ح افضل وراهم لحد ما اجيب قرارهم بقى
وانا ما كنتش اعرف ان فيه مساجد تانية بتعمل العملة السودا دي يا مصطفى
هم مش خايفين من ربنا وللا ايه؟
هو احنا هندوس وعندنا طبقة منبوذين؟
اذا كان ربنا اتكلم عن مجهولي النسب وقال عليهم اخوانكم في الدين

سيمبل مواه

ابن الشيطان اه
وهي بنت ايه بقى؟ يعني هو ابن الشيطان
وابوه وامه بقى المفروض نعمل فيهم ايه اللي عملوا العملة دي؟

well

لا احنا عمرنا ما كنا كده
انا مش عارفة مين اللي شار الشورة السودا دي
ايا كان ينعل ابو شكله حسبي الله ونعم الوكيل فيه
اذا كانت فتوى يبقى حسبي الله ونعم الوكيل في اللي افتاها

ده بني ادم لا عنده دين ولا انسانية ولا دم ولا احساس عشان يقول الكلام الفارغ ده

ابو امك
ههههههههههههههههههه
والله انت بتنورني

Rateb said...

دول يهود ولا ايه
الحمد لله محدش فكر يفجر دور الايتلام كمان
هو اى حد يقول اى كلام الناس تصدقه كده
بس كويس ان مفيش حد دافع عن الهبل ده اكيد دول شوية مخاليل ومعقدين

وَمَنْ أَظْلَمُ مِمَّن مَّنَعَ مَسَاجِدَ اللّهِ أَن يُذْكَرَ فِيهَا اسْمُهُ وَسَعَى فِي خَرَابِهَا أُوْلَـئِكَ مَا كَانَ لَهُمْ أَن يَدْخُلُوهَا إِلاَّ خَآئِفِينَ لهُمْ فِي الدُّنْيَا خِزْيٌ وَلَهُمْ فِي الآخِرَةِ عَذَابٌ عَظِيمٌ [البقرة : 114]

Anonymous said...

انا موش مع اللي بيقول احنا في مصر او دي مصر

احنا عمرنا ما كنا ولا هنكون كده

وللعلم اكتر مكان بتروحله زكاه المال والتبرعات العينيه والاضاحي في العيد هو الملجأ الوحيد في بلدنا.... وده من زماااااان .... برغم ان عدد الاطفال هناك قليل .... ومنهم مجهولي نسب ..... بس محدش بيسأل دول مين وولاد مين

السبب هو سوء اختيار أأمه المساجد اللي الشرط الوحيد انهم يلتزموا بمواضيع معينه وتوجيهات .... موش مهم يكفروا الناس والعيشه ..... المهم موش يتكلموا في السوياسه

حسبنا الله ونعم الوكيل

عاشق الجنة من الإخوان صلى على النبى said...

والله هو موضوع جميل
والطرح رائع
بس ايه ربنا هيشنبرنا دي
دي كلمة متنفعش مع لفظ ربنا
ربنا يقويلك
صلي علي النبي

رحلتنا في الحياة said...

انا اول مرة اسمع موضوع المساجد اللى مش عايزة الايتام يشتركوا دول بصراحة لكن انا من زمان اعرف فكرة بلاش الاتيام علشان انتم متعرفوش اصلهم وفصلهم فى ناس كتير ممكن تروح تزور وتساعد الايتام جوه الدار لكن بترفض انها تكفلهم فى البيت حتى لو كام يوم على اساس مبدا العرق دساس وانهم ميعرفوش اصلهم وفصلهم معرفش الفكرة الغريبة دى جت منين بالظبط ؟؟؟؟

مش فاهمه said...

الواحد قرف من اشباه المسلمين دول مش عارفه مين اللى بيلعب فى دمغتهم بالشكل ده .......عموما انتى مستغربه من الموضوع طيب ما بتوع قناة الناس بيقولوا انيل من كده و كانوا وقت حماس و حرب غزة بيدعوا على حماس علشان بتاخد معونات من ايران الشيعيه ووقتها سكتنا كل ما نسكت على حاجات بنفتكرها صغيره حا تلف تلف و تكببر ووقتها حاتيجى فى وشنا و حاتاخدنا معاها فى الرجلين ........الناس المضحوك عليها دينيا كتير عايزين نقف لهم بس ارجع و اقول كل ده بسبب سياسة تجفيف المنابع ربنا يلطف بيهم

سيد المعلمين said...

ان شاء الله الجامع هينفجر بيهم !

سبهللة said...

هو مش رسولنا اللى قال

من مسح على رأس يتيم رحمة كتب له بكل شعرة مرت عليها يده حسنة ومحا عنه بكل شعرة سيئة ورفع له بكل شعرة درجة

ومش هو برضه اللى قال
من ضم يتيماً من بين يتامى المسلمين إلى طعامه وشرابه حتى يغنيه اللَّه تعالى أوجب اللَّه تعالى له الجنة البتة إلا أن يعمل عملا لا يغفر اللَّه له

وعن أبي الدرداء رضي اللَّه تعالى عنه "أن رجلا جاء إلى النبي صلى اللَّه عليه وسلم فشكا إليه قسوة القلب فقال له النبي صلى اللَّه عليه وسلم إن سرك أن يلين قلبك فامسح برأس اليتيم وأطعمه"

صدق رسول الله

هى الناس دى اللى بتخطب فى الجوامع دى ما يعرفوش الكلام دة ؟؟
ميعرفوش الف باء الاسلام؟؟

حسبى الله ونعم الوكيل

دة الواحد بيسعى عشان يكفل يتيم وبيحث على كفالة اليتيم كل الناس اللى يعرفها لما هلا من فضل عظيم
على كدة كل المجهود دة كله ممكن يروح هباء بسبب سوية مهابيل بيخطبوا فى الجوامع
حسبى الله ونعم الوكيل

بجد حرقتى دمى

حسبى الله ونعم الوكيل

سبهللة said...

بالحق
يعنى ايه
دة أحنا ربنا هاشنبرنا ؟؟
فى عز القرف دة ضحكتينى
على حاجة انا مش فاهمة معناها

سبهللة said...

خدى دى

عن عمر بن الخطاب رضي اللَّه تعالى عنه قال: قال رسول اللَّه صلى اللَّه عليه وسلم "إن اليتيم إذا ضرب اهتزّ عرش الرحمن لبكائه فيقول اللَّه تعالى يا ملائكتي من أبكى الذي غيبت أباه في التراب؟ وهو أعلم به.
قال: تقول الملائكة ربنا لا علم لنا.
قال: فإني أشهدكم أن من أرضاه فيّ فأرضيه من عندي يوم القيامة

Unknown said...

قال رسول اللّه صلى اللّه عليه وسلم:

[من ضم يتيما فكان في نفقته، وكفاه مؤونته،كان له حجابا من النار يوم القيامة،


ومن مسح برأس يتيم كان له بكل شعرة حسنة

وماذا عن اللقيط ومجهول النسب ، ألا يدخل

هذان في مسمى اليتيم ؟.

بل ادهى وأمر لانه لايعرف له نسب سواء كان بالحلال وا ابن حرام

هؤلاء حرموا حرمانا عاماوحاجتهم إلى الرعاية والعناية شديدة جداً

بصفتهم أيتاما، والأجر في ذلك عظيم

• لهذا اللقيط أقول ...

لا تحزن وإن رأيت ظلم المجتمع وجحوده فالمولى عز وجل سيعوضك في الاخرة ان شاء الله

الرخمة said...

قرار 101
بعد المشاورات و المؤتمرات و المناقشات
قررنا نحن رخم باشا و رخمه هانم
انشاء بلوج نرخم بيه عليكم
و من باب التكرم و التفضل و الرخامه
حبينا نقول لكم عشان تيجوا تزوروا البلوج غصباً عنكم

و مش هقول سلاااام
رخامه بقى هه

قهوة الرخمين
:D

ذو النون المصري said...

والله فعلا نستحق جزمة نتنياهو
بعد ميحطها في الكنيف و اكتر
و انا في الحقيقه مش عارف اقول ايه غير انه فعلا مش مستحق نتكلم و نقول فيه اي كلام
هو فيه ايه؟؟؟؟؟؟؟؟؟؟؟

مدير التحرير said...

انحا شفتهم في السعودية الايتام الافارقة يعني مش السعودين بزوجهم على حسابهم و الامير حضر الفرح بتاعهم

آه وكفى said...

مين الصحابي يوسف بئى انا اعرف النبي يوسف واعرف يوسف جوز خالتي الله يرحمو بس معرفش حد اسمو كده

وايه الكلام التعبان ده وهو صحيح ذنب الطفل ايه حتى لو معروف ان ابوه وامو كانو اندال وغلطوا غلطة وجابوه يعني هما مش رحموه احنا كمان مش هنرحمو

على فكرة يانواره انا متأكده ان الوليه القبقاب اللي تقصديها دي بتاعة المؤسسة هى اللي قالت العروسة متصليش اول 3 ايام جواز على اساس انها فاجازة شهر عسل يعني تقريبا وقالت برضو يجوز نجمع تبرعات للبنات اللي عيزين يعملوا عمليات ترقيع

خدهم يارب
دي ايه فقعة المرارة دي على اخر اليوم

Mohamed said...

بص يا نوارة انا عمرى ما شكيت فى بوست كتبتيه باس انا المرة دى مش مصدق .
لا يمكن يكون فى مسجد بيعمل كده فبالله عليكى تابعى الموضوع واكديلنا المعلومة.
لان بتهيئلى دة مسجد اللى كان فيه مصطفى حسنى

اما يا مصطفى ايه باة السبب التانى انا مش فاهم حاجة

mido said...

تقرير خطير جدا عن ضرب ايران

Unknown said...

انا اسفة جدا يا جماعة على تأخير التعليقات
مش عارفة مالي اقوم من النوم انام تاني

Nermeen said...

ولو مش مخطوف و معروف يقينا انه من علاقة غير شرعية بردو له حقوق زيه زيي و زيك

ايه التهريج دا؟؟؟

التاريخ الاسلامي للي بيقرأ مايعرفش النفور من مجهولي النسب, زياد ابن أبيه سموه ابن أبيه عشان مش عارفين له أب و ماحدش رفضه اجتماعيا, و لما بقى مصدر قوة بدأ أبو سفيان يدعي نسبه, يعني كمان بقى مصدر فخر و الناس بتحاول تدعي أبوته

mido said...

http://www.alquds.com/node/197447

Unknown said...

والله يا شباب انا برضه مش مصدقة
واللي جنني بقى ان مصطفى بيقول ان فيه جوامع "بتتحرز" من اشراك الايتام
يعني المرض ده منتشر

حد يعرف لنا جابوا الكلام ده منين

وبالنسبة لكلام رئيس التحرير
ايوة انا عارفة ان الكلام ده مش جايبينه من السعودية
مش كل بلوة ح نرميها على السعودية حرام، السعودية مافيهاش حد بيهطرس الهطرسة دي

واضح ان فيه مهبوش افتاهم الفتوى دي وراح فاقعها في وشهم

وما تعرفش يعني ما الفتاوى كتير اشمعنى دي اللي عجبتهم؟

مين بقى اللي اخترع الاختراع ده؟ حد يقول لنا

تكون سوزان مبارك؟ اصل الولية اللي قالت الكلام بتاع انجاس دي دلوقت بقت من النسوان اللي تبع سوزان مبارك

تكون فتوى سوزان مبارك؟

هو مش ربنا برضه قال: يسألونك عن اليتامى قل اصلاح لهم خير وان تخالطوهم في اخوانكم والله يعلم المفسد من المصلح ولو شاء الله لأعنتكم إن الله عزيز حكيم

وقال على الانساب: ادعوهم لآبائهم هو اقسط عند الله فإن لم تعلموا آباءهم فإخوانكم في الدين ومواليكم

انا عمري ما سمعت ابدا ولا قريت في اي حتة انك عشان تطلع زكاة المال لازم تجيب شجرة العيلة

ثم زكاة المال لو مش ح تطلع على الايتام امال تطلع على مين؟
ولو الايتام مش ح يدخلوا الجامع امال يروحوا فين؟
ايه ده؟

Unknown said...

سبهللة
ههههههه
يشنبر يعني يعذب بس بالعامية الجديدة ههههههههه

Mohamed said...

بما اننا وصلنا الى ان حاجه بديهية زى دى محتاجة فتوى فخدى دى :

السؤال :هل يجوز إخراج الزكاة إلى دار للأيتام
المفتي : أ.د.على محيي الدين القره داغي أستاذ و رئيس قسم الفقه والأصول بكلية الشريعة، جامعة قطر
الحل

يجوز إخراج الزكاة إلى أولياء أمور اليتامى؛ ليصرفوا هذه الأموال عليهم أو على المشرفين على دار الأيتام ليقوموا بصرفها عليهم؛ لأن اليتامى في هذه الأحوال فقراء ومحتاجون يجوز صرف الزكاة عليهم لقوله تعالى: "إِنَّمَا الصَّدَقَاتُ لِلْفُقَرَاءِ وَالْمَسَاكِينِ..."،
والصدقة على اليتيم الفقير أفضل من الفقير الكبير؛ وذلك لأن الإسلام أعطى ميزة لرعاية الأيتام لم تُعْط لغيرهم، ولكن بما أن الأيتام لم يبلغوا، لا يجوز إعطاء المال إليهم مباشرة؛ لأنهم ليسوا أهلاً لقبول هذه الأموال، وإنما تعطى هذه الأموال من الصدقات والزكاوات إلى أولياء أمورهم سواء كانوا أولياء أمورهم أو المشرفين على دور الأيتام

أكون أو لا أكون said...

السلام عليكم... كـــل عام وانتوا بألف خير...

حسبنا الله ونعم الوكيل...
" كفالة اليتيم هي القيام بما يصلحه في دينه ودنياه ؛ بما يصلحه في دينه من التربية والتوجيه والتعليم ، وما أشبه ذلك ، وما يصلحه في دنياه من الطعام والشراب والمسكن "
طيب اذا منع اليتيم من دخول المساجد ازاي حيتصلح حاله؟؟؟ وازاي حيزاول حياته كأنسان مسلم...

ومجهولو النسب لهم أحكام اليتامى ، بل هم أولى بالعناية لعدم وجود أحد من والديهم وأهلهم ، واليتيم قد تكون أمه بجانبه ، وقد يزوره خاله وعمه وخالته وعمته ، أما مجهول النسب : فإنه منقطع عن كل أحد ، ولذا كانت العناية به أوجب من اليتيم معروف النسب .

وده مش كلامنا احنا ده دين الاسلام...

http://www.islam-qa.com/ar/ref/100147


ههههههه بالعراقي كلمة يشنبر يعني يدوّد...
ومشنبر يعني مدوّد...
شنبار يعني دود...

الدود الابيض الصغير اللي بيطلع بالاكل أو الملابس لمه تكون رطبه ومنسيه لفتره ...

: )



اشتقت لمدونتك كتيـــر

Unknown said...

ربي يجيب اللي فيه الخير

Unknown said...

هل انتي نوارة احمد فؤاد نجم ؟

Unknown said...

اه
انت شهدي مين؟

Mohamed said...

ردى عدل على حضرت الظابط
ههههههههه

Unknown said...

ههههههههه

Mohamed said...

قريتى دى فى الدستور يا نوارة:
"سعيد صالح.. قال أمي اتجوزت 3مرات الأول أكلناالمش والتاني علمناالغش والتالت لابيهش ولابينش فدخل السجن"

Kontiki said...

نوارة صباح الخير
يارتنى اتعميت قبل ما اقرا البوست دة
اسلام اية دة يا عالم
اعمل اية فى نفسى تانى طيب البلوج ومسحتة كتابة ومليش نفس اكل شرب لبس بقت كماليات غير ضرورية حصلتلى حادثة ولا صرخت و لا خفت وغمضت عينى و استنيت المصيبة تحصل بقيت عايشة متمنية الموت وبسمع الاخبار و بيجيلى الضغط والقهر من الاخبار الاسرية و المحلية و العالمية يبقى حتى البوابة الوحيدة اللى بتفرج عننا بوابة العمل الصالح و الخير ونبتغى لله الوسيلة بتتشوة بكلام ناس كفرة واقفين على سجاجيد الصلاة حتى اليتيم بنجرحة وبنأول ونحور ونلف وندور عشان نشوة عمل خير اى انسان بالفطرة مسلم او مسيحى ممكن يعملة والله العظيم انا شاكة من زمان فى الصحة النفسية للشعب المريض المتأسلم دة الشعب دة مش عاوز دين دة عاوز قيم انسانية عاوز يتربى فية اولا ان انسان بعيد عن الحلال و الحرام انسان شريف و نزية و خير بالفطرة انسان صادق مع نفسة ايجابى ومفيد لغيرة وبعدين يبقى يتعلم الدين مش ندى للنفوس المريضة الشاذة كرباج الحلال و الحرام والتأويل و التحوير يشتغل

Dr. Ahmed Wagih said...

ولسة...

ياما هنشوف على أيد اخواننا البعدا...

على رأي راتب؛ كويس انهم ما فجروش دار أيتام!!!

ghorBty said...

السلامـ عليكمـ

شئ موسف جدا وانت قلتي كل حاجه

بس انا هقول كلمتين وبس

اليتيمـ = طفل صغير + محرومـ + ونفسه مكسوره جه الدنيا لقي نفسه في ملجا دا مش ذنبه دا قدره واحنا ما لناش نعترض علي قدر ربنا ونقسي عليهم بذنب هما ملهموش يد فيه

اللي قال الكلامـ دا وقرر قرار اعدام للايتام وهما احياء بانعزالهم عن المجتمع دا هيحولهم كارهين للبلد وناقمين علي الناس وفوق دا كله غضب ربنا وقله الرزق علينا

المـ يقل الرسول عليه الصلاه والسلامـ

( إنما تنصرون وترزقون بضعفائكم) وهو فيه ضعف اكثر من طفل يتمـ

الله يصلح الاحوال .

سعيده بمرور الاول هنا ..

تسلمي ..

Unknown said...

نهضة مصر
ان بعض الظن اثم
بس انا عندي ظن ان حضرتك من ضمن الستة في المية اللي صوتوا على: مالها اسرائيل دولة متقدمة وديمقراطية صح؟

SweetLolla said...

La Elaha Ella Allah ,
ana msh 3arfeh 2a2oollik eh bsara7a bs kalamik ma y6amminsh abadan , eza rafdeen el Aytam shwaya shwaya y2olo Mamnoo3 el Salah fel MasGed!!!!!!!! 3l 3omom Thnx for your Articles eeli dayman bt2olilna feeha 7agat tfahhemna e7na ray7een le fean bezzab6! Thnx for your lovely way in writing. TC Wish you very Good Luck.

Marwa said...

لا حول ولا قوة إلا بالله
حد فكر يتثبت من الكلام ده قبل ما تتكلموا وعلقوا وتنشروا تعليقاتكم؟؟؟
حد فكر يتصل بالمسجد أو يروح يسأل بنفسه؟؟؟
انا باروح المسجد من 9 سنين تقريبا واعرف كتير من الناس القائمين على النشاط فيه شخصيا واحسبهم على خير ولا ازكي على الله احدا علشان كدة لما قرأت الكلام ده اتصلت بالفعل بالدكتورة المسئولة إداريا عن المسجد.. ونفت الكلام ده وقالت لي ان في بالفعل 3 ايتام من رسالة كانوا متسجلين بالفعل في النشاط الموسم اللي فاتر.. وان البنت اللي جابتهم من اعجابها بالنشاط تطوعت معاهم مدرسة...

يا ريت محدش ينشر حاجة ما اتأكدش منها بنفسه ولا حد يسخن ويرد من غير بينة والاتصال بالتليفون بالناس دي مش صعب وارقام تليفوناتهم تتجاب من 140 دليل بمنتهى السهولة..

Auroramoslema said...

السلام عليكم..
طيب يا نوارة انا قريت البوست ده.. وبصراحة دخلني شك كبير..
فبعت أسال واحدة من المتابعين لنشاط مسجد يوسف الصحابي..
وبعت لها اللينك ده .. ردت عليا بالآتي:

انا اتصلت بالدكتورة المسئولة إداريا عن المسجد.. ونفت الكلام ده وقالت لي ان في بالفعل 3 ايتام من رسالة متسجلين بالفعل في النشاط.. وان البنت اللي جابهم من اعجابها ابلنشاط تطوعت معاهم مدرسة... حسبنا الله ونعم الوكيل

تمام ولا..
فياريت الله يكرمك.. اتاكدي تاني من ناحيتك برضه.. وتنزلي بوست توضيحي

Unknown said...

انا اتصلت بالمسجد وماحدش بيرد ابدا

وح اروح بنفسي

Unknown said...

تم تحديث البوست بالرسالة اللي بعتيها يا مروة وبرسالة نيفين

Marwa said...

أرقام تليفونات المسجد اهي:

0167100022
26243463
26208763
2621506

وجزاك الله خيرا على التحديث يا نوارة

Marwa said...

وده لينك الجروب بتاعه على الفيس بوك
http://www.facebook.com/group.php?gid=76198508350&ref=ts#/group.php?gid=79051884199&ref=mf

اسد الجيزة said...

احنا لو فتحنا موضوع المساجد والتبرعات والجميعات الاهلية هانلاقي فساد يامي وسرقة وهيصة دي في ناس بتغتني من الجمعيات بتاعت المساجد اما موضوع الامام دا فدول ائمة امن الدولة دايمما لازم جهلة الناس مش قبلاهم قطع دراعي ان ماكنشي من اياهم بس انا عاوز حضرتك تجيبي كتاب اسمه المستطرف بيكلم عن اولاد الحرام وانهم لاخير فيهم والكلام دا الناس دول بيجيبو ا الكلام من الكتب ديه طاب تصدقي فيه شيخ حرم علينا الخشاف بتاع رمضان

يسري said...

السلام عليكم
عندى تعليق بس مش على البوست

تعليقى على الاستفتاء
(إيه مشاعرك ناحية إسرائيل)

مينفعش بالنسبة ليا الإختيارات دى
عشان مثلا
و متقوليش سطحية
لازم المسألة تتأصل
لازم الناس تعرف الفرق بين إسرائيل النبي و ما يسمى بإسرائيل الدولة
مش كل الناس عارفه كده
إسرائيل هو يعقوب نبي اللة .. أبو اليهود و منه تفرع الإثنى عشرة سبط و منهم نبى الله يوسف الذي أوتي شطر الحسن
دى اول نقطة

يبقى دا اول اختيار

ثانى نقطة ... إختيار (مصيرها إلى زوال بس لازم نتعامل)
نتعامل ازاى مش فاهم يعنى
نطبع ( بتشديد الباء).. و لا نقاطع ..

ثالث نقطة
إختيار ( ياه هو لسه فى حد بيسأل الاسئلة الهابلة دى )
أه لسه و لازم تتسأل و تتسأل صح و فى كل وقت عشان ميجييش يوم نسأل نلاقى حد بيقول
(دى دولة صديقة و بينا و بينها شغل و انا نازل اعمل شوبنج هناك الصيف اللى جاى )
و خايف من دا يحصل
عشان بسأل مرة سيدة صغيرة فى السن جايبه لابنها كشكول مطبوع عليه صورة مسجد قبة الصخرة
سألتها هو المسجد اللى فى الصورة دى اسمه إيه؟
ردت بسرعة المسجد الأقصي
بس
و تحياتى ليكى

أبو أمك said...

أهم طلعوا بيصلوا

Unknown said...

يسري

انا كنت كتبت في بوست سابق ان لو الاختيارات ما عجبتشك تقدر تكتب تعليق بالخصوص ده وتقول فيه رأيك

مروة

واياكم
واشكرك انك تعبتي نفسك وعملتي اتصالاتك

Mohamed said...

الحمدلله

احمد سعيد said...

ادى مشايخ الاوقاف

اكيد الراجل دة اوقاف مش كدة ؟؟

الله يخرب بيوتهم زى ويوقف حالهم قادر ياكريم