Thursday 17 September 2009

حد ملاحظ ان وكالة عطية بتدافع عن الاخوان؟

هي مش بتدافع، بس هي مقدماهم على انهم بني ادمين، واحنا كلنا عارفين ان الاخوان مش بني ادمين ولا حاجة، ثم ان انا ما توقعتش كده بصراحة عشان كده ما اتكلمتش عن المسلسل من اول رمضان
هو الحقيقة فيه اسباب تانية، لان المسلسل عن قصة خيري شلبي بس سيناريو وحوار واخراج رأفت الميهي، ومارضتش اعمل دعاية للمسلسل احسن حد يقول لي انت بتنافقي الاستاذ بتاعك، فسكت، خصوصا ان واحد مرة دخل يستظرف على اهلي لما جبت سيرة رأفت الميهي مرتين في المدونة. انا متابعة المسلسل وعاجبني قوي، قوي يعني، لانه مش مسلسل، مختلف خالص عن المنهج بتاع المسلسلات اللي احنا واخدين عليها، وده سبب تالت خلاني ما اتكلمش عنه عشان مش كل الناس ممكن تتقبل غير المألوف
هو طبيعة رأفت الميهي انه مش بيطلع شخصيات شريرة ابدا، كل شخصية ولها اعذارها ولها الجانب الانساني بتاعها، حتى الحرامية والنور والقوادين اللي طالعين في المسلسل، بس مطلع شخصية قيادي اخواني (المفروض ان الاحداث بتدور في الخمسينيات وهي ملحمية فيها جانب صوفي) وشخصية القيادي الاخواني، زي الاخوان اللي بحق وحقيق، مش زي اللي بيطلعوا في التلفزيون، وشخصية محبوبة من كل سكان الوكالة، حتى الطبال اللي بيساعده على الهرب. طبعا فيه مواقف كوميدية تفطس من الضحك زي ان واحدة من السكان قالت انها بتتبرع للسيدة زينب فقبضوا عليها بتهمة انها بتدي فلوس لزينب الغزالي، وقبضوا على ولادها الاتنين المعاقين ذهنيا عشان قالت لهم دول اخوات قام محضر الجلسة غلط وكتب: دول اخوان: "بدل ما يكتب اخوات اخرها طبق وفيه حتتين لحمة كتبها سلطانية وفوقيها حتة لحمة واحدة". وواحد بنته اتجوزت اخوانجي فراح هو وصاحبه يفضوا البيت من اي حاجة تجيب لهم تهمة وهم بيفتشوا صاحبه طلع مصحف وقال له: ايه ده؟ مصحف؟ نهارك مدوحس، انت عايز تودي نفسك في داهية؟ ولما قفش بنته التانية ماشية مع واحد وكان ح يضربها صاحبه قال له: سيبها، ماهو مش ممكن تبقى اخوانجي وبنتك مشيها بطال، سيبها تعمل اللي هي عايزاه
واضح ان رأفت الميهي نفسه مش واخد باله ان التلفزيون المصري رفض المسلسل بتاعه عشان السبب ده، هو صدق التقرير بتاعهم يا عيني، كتبوا يقولوا ان المسلسل دون المستوى الفني، على رأفت الميهي يعني، دون المستوى الفني على شغل رأفت الميهي
:)
انا مش عارفة المسلسل ح يتعاد تاني امتى، لانك لو ما تابعتوش من اول حلقة مش ح تفهم حاجة، ح تلاقي عفاريت، وسحرة، وناس بترقص، وناس بتصلي، مش ح تفهم، لازم يبقى من الاول متابع حلقة حلقة، وهو بيبتدي بايقاع هادي ويفضل كل حلقة يسرع يسرع، فدلوقت هو في اسرع حالاته لانه قرب يخلص
هو طبعا كون ان المسلسل مطلع الشخصيات كلها انسانية دي حاجة تمشي مع الحرامية والقوادين لكن ما تشميش مع الاخوان، انا فوجئت، لاني عارفة ان رأفت الميهي المفروض انه يبقى مثقف، وطبعا كلنا عارفين انك عشان تبقى مثقف تعمل ايه؟ تشتم الاخوان، ده الف باء الثقافة يعني، امال ح تعمل ايه يعني؟ ح تقرا لا سمح الله؟ وليه التعب؟ ما تشتم الاخوان وتختصر وح تلاقي الثقافة هبطت عليك من حيث لا ترجو ولا تحتسب، الثقافة دي اصلها رزق ومفتاح رزق الثقافة شتيمة الاخوان، وفضلت مستنية كل حلقة عشان اشوف الزنبة اللي ح يفقعها في الاخوان، ما لقتش، عادي، تصوروا، مطلعهم ناس عادية، وبني ادمين يعني، بيحسوا وبيفهموا وكل شخصية لها عيوبها ومميزاتها بشكل مستقل مش استمبات، ومش مخليهم يرفعوا حواجبهم ولا يكشروا ولا يتآمروا على امن البلاد وصالحها، وكل واحد فيهم له اسباب للانضمام للاخوان، والاسباب وجيهة، ولما اتقبض عليهم متعاطف معاهم عادي زي اي انسان لما يتقبض عليه وكده يعني
سبحان الله
وانا اللي كنت فاكرة رأفت الميهي مثقف؟ كان بيخمني

25 comments:

مهندس مصري بيحب مصر said...

أصله ملتزم بالخط الأصلي للرواية
أنا ما شفتش المسلسل لكن قريت الرواية
و عجبني فيها اللي بتقوليه ده
دا غير إني عجبني إنها بتتكلم عن أماكن أنا عارفها و متربي فيها من دمنهور القديمة أيام بداية الخمسينات
و لو إن مفيش عندنا وكالة بالإسم ده
:)

Unknown said...

سبحان الله
حتى خيري شلبي طلع مش مثقف؟
:)

Dr Nemo said...

مش يمكن اخوانجى مخبى يانواره؟؟؟؟ خدى باللك ان دى تهمة جاهزه لاى متعاطف معاهم حتى لو مسيحى ولعلمك اتقالت على جورج اسحاق قبل كده والراجل ضحك هيعمل ايه يعنى..... وغيره وزير التربية والتعليم السابق برضه كانت خرجت الاشاعات ايامها انه خرج من الوزاره لمكيده فى المطبخ الرئاسى والريس كانت ايده مشغولة فى تنسيق التغيير الوزارى بان الجدع اخوان ياريس راح قالشه ..... يعنى خيرى شلبى مبدئيا مدسوس على المثقفين واستاذنك متعاطف معاهم...... اتبرعى بقا ولو بجنيه

Islam said...

أيوة، رواية خيري شلبي (وكالة عطية) أول رواية في حياتي أقراها و بتدافع عن الإخوان و بتنتقد القبض العشوائي اللي عليهم بعد حادثة المنصة ، المسلسل جميل و فيه جو ملحمي و إهتمام بالتكوين و زوايا الكاميرا و تعدد مستويات السرد بإستخدام الأغاني الشخصيات اللي بتعلق على الأحداث بإستخدام الأغاني بدل الحوار ، بس الحلو مايكملش إختيار أستاذ رأفت الميهي لحسين فهمي كان إختيار فاشل ، و تمثيله دمه ثقيل قوي ، و فيه مشكلة تانية ، الإيقاع مترهل شوية و فيه بطيء بيميز معظم المسلسلات ، السنة دي ، بس برضه إزاي مسلسل مهم زي ده يبقى (دون المستوى) أومال (بيت العيلة و كريمة كريمة ده يقى إيه)

مواطن مصري said...

انا قريت لنصف الرواية و مكملتهاش

كنت بقرائها ايام الامتحنات

الي افتكرة ان واحد منهم كان انضم ل الاخوان عشان مصلحة

mido said...

للأسف

المثقفين الحقيقيين

الدولة بتحاربهم بالتجاهل

وفاروق حسنى قايم بالدور تمام

يا رب يخسر بكرة

مواطن مصري said...

طيب يا ميدو يا رب يكسب بكرة غصب عن الاخوان

:D

Anonymous said...

وابتدى حرق الدم الإخواني اهه
1951-1952 كان بعد حادث المنصة..؟؟
بصي يا نوارة هما بني آدمين وكل حاجة
بس يحرقوا الدم بصراحة

Unknown said...

يا فيصل
يمكن انا اللي غلطانة في التاريخ

انا ما قرتش الرواية هي قارياها
واكيد القبض العشوائي ده كان بعد حادثة المنشية

هي قصدها حادثة المنشية

مش اتنين وخمسين بعد كده
المهم انها بتدور في الخمسينات
انا اسفة ح اغير في البوست لان ممكن تبقى الاحداث تمتد لبعد كده

mido said...

مواطن مصرى

منه لله فاروق حسنى

حرق الناس فى المسرح

و الاثار بتتسرق فى عهده

و اللوحات التاريخية بتتلطش و ترجع مقطعة

دخل المثقفين فى الحظيرة بنص قوله

فى عهده ضاعت ريادتنا الثقافيةو قوتنا الوحيدة فى شرق الأوسط

و كل ده فى 22 سنة



فى وزير محترم و مثقف يفضل فى منصبه كل ده؟

مواطن مصري said...

هو الي حرق المسرح ولا الناس اختارت المسرح و محدش اعترض على اختيار مكان المسرح

أرجع لحلقة عمرو الليثي مع فاروق حسني

Ahmed Al khashab said...

مش ممكن عليكى أسلوب مفيش بعد كده
:D
أنا لازم بعد كل مقالة أقرأها ليكى أخذ لنكها و أعمله شير على الفيس بوك
ما شاء الله عليكى
ربنا يبارك لك

مهندس مصري بيحب مصر said...

الرواية تدور في عامي 1954 و 1955 و تتناول في سياقها كيف كان الإخوان مرضياً عنهم من حركة الجيش المباركة - التي تحولت لثورة فيما بعد - ثم أصبحوا من أعدى اعدائها و تم حظرهم رسمياً بعد حادث المنشية و الذي ينتهي بعده بقليل الخط الزمني للرواية

احساس لسه حى said...

للاسف مشفتهاش

بس كنت عاوز اتابعها

واللى قريته عنها مش موضحلى ايه مستواها

بس بدل عجبتك ممكن تكون كويسة

TAFATEFO said...

AP NewsBreak: Nuke agency says Iran can make bomb

فليعد للدين مجده said...

انصاف الاخوان اصبح عجيبة في هذا الوسط الاعلامي الزئبقي

Islam said...

يا عم فيصل قلبك أبيض ، أنا بس غلط و بدل المنشية كتبت المنصة ، يا عم أنا مساعد مخرج و كاتب سيناريو ،
و بتكلم في التكوين و الأغاني أبقى إخواني
منين ، عشان إسمي إسلام يعني ، حقك عليا
حسمي نفسي أسر ياسين المرة الجاية

و بعدين العتب على الإسم ، أنا ولد مش بنت يا نوارة ، بس برضة الحق على أبويا ربنايخليهولي سماني إسم دوبل فيس



:D صباحك زي الفل يا نوارة

Islam said...

و بجد أسف على سوء التفاهم و و الله كنت بتسحر زبادي و أنا بكتب

:D

mido said...

مواطن مصرى

ربنا يهديك

رد بقى على قايمة المهازل اللى انا حاططهاو فى غيرها كتير

Unknown said...

احمد الخشاب
هههههههههههههه
ربنا يجبر بخاطرك

مهندس

انا ما قرتش الرواية بس المسلسل ابتدى من اول واحد وخمسين لما كان لسة الملك موجود وبعدين جات الحركة المباركة وغيرت رئيس التحرير الخ..


انا عاجبني في المسلسل انه فيه انسانية، مافيش شخصية تكرهها، يصعبوا عليك كلهم
ههههه
اصل رأفت الميهي برج الميزان زيي وسنتمنتالي مهترئ


احساس لسة حي
بص
هو اسلوبها مختلف عن بقية المسلسلات
يعني مش زي بناء المسلسلات اللي انت متوقعه
اول حلقة ح تقول: ايه ده؟ انا مش فاهم حاجة
وبعدين تبتدي تتضح الصورة وتتنور وكل ما ينور لك حلقة تبقى مبسوط وحاسس انك اكتشفت اكتشاف جديد

غير البناء الدرامي المعتاد اللي بيعمل لك مقدمة للشخصيات والموقف المحمل وبعدين يطوره

يا اسلام
هههههههههههههههههه

يعني اكيد اسلام ده اسم ولد
اما انا متخلفة صحيح
معلش حقك علي

Unknown said...

شفتى الخبر ده :

http://www.youm7.com/News.asp?NewsID=137374

مهندس مصري بيحب مصر said...

ده لينك تحميل الرواية
http://www.4shared.com/file/32614552/b9039ec7/__-__.html?s=1

مخبر قمل دولة said...

انا برضه استغربت من اسلوب خيري سلبي لما لقيته منصفهم في الرواية بدون تحيز :D مطلعهم بشر بمزايا وعيوب عادي جدا
لا وكان معجب قوي بلحية حسن البنا
بس انا مش فاكر ان جات في الرواية خالص حتة اخوات واخوان دي

Khaled Selim said...

منهم لله حبة الأرجوزات اللي أصلوا في دماغ الناس إن الملتزمين دول حبة ناس معقدة ومكشرين وبيكرهوا كل حاجة حتى نفسهم

مقال جميل يا أستذاة
ربنا يكرمك

Ahmed Salem said...

انا كانت عندي نفس الصدمة ايضا في أول مرة قرأت فيها الروايه.
الشعور بتاع ازاي ان خيري شلبي كمثقف يظهر الاخوان بصورة طبيعية كبقية البشرو الاعجب انه شاط جامد في الثورة و عبد الناصر!