Sunday 27 September 2009

النظرية التآمرية في قضية هالة مصطفى المستحية

تقدروا تعتبروا ان البوست ده هطرسة وتخريف، واللي مالوش مزاج يقرا تخريف ما يقراش البوست ده
فيما يخص قضية هالة مصطفى الصحفية اللي قابلت السفير الاسرائيلي والهلولة اللي معمولة عليها
انا واحدة بالعب شطرنج وسودوكو كتير لحد ما بقى تفكيري ملتوي، خدوا كلامي للآخر وارموه في الزبالة بعد كده: التمثيلية دي معمولة في اطار التنازلات اللي قدمها عوكل بعد مقابلته مع نتانياهو والمباحثات السرية اللي في امريكا
انا تقديري ان السيدة هالة كانت كبش فداء، وانا مش بادافع عنها، دي من مجموعة كوبنهاجن وتطبيعية وكل حاجة، بس كانت مستحية
او بقول اخر، ما جاتلهاش فرصة تقول الكلام اللي هي قالته امبارح في العاشرة مساء
وزارة الخارجية ورطت هالة مصطفى في مقابلة سفير الكيان الصهيوني في مؤسسة الاهرام، وهي كل النقطة انها في مؤسسة الاهرام (اللي هي وكل اللي فيها عايشين على قفايا ومن ضرايبي وبياكلوا وبيشربوا ويلبسوا ويقعدوا في التكييف من فلوسي والحقيقة ما بتقدمليش غير اسامة سرايا صفرا واخطاء مطبعية في المانشيتات اللي بالفونت الاحمر) وبعدين ادت تعليمات لعبد المنعم سعيد (اللي هو كمان من مجموعة كوبنهاجن يعني وما يتخيرش عنها) انه يعمل لها هيصة وبوليكة في النقابة
قوم هي تضطر تقول: الله؟ واشمعنى انا؟ هو انا لوحدي؟ ده فلان وفلان وفلان كمان، والسفير الاسرائيلي قال لي انا مستعد اديك قائمة بالصحفيين اللي لهم علاقة بالسفارة الاسرائيلي.
ويبقى فيه فرصة للاصوات المعارضة للائحة اللي ضد التطبيع انها تعلي صوتها، ويبتدوا يقولوا الكلام الطين اللي بيتقال من ساعة ما الموضوع ده ابتدى:
هي لائحة نقابة الصحفيين دي قرآن؟ يعني ايه رعب التطبيع اللي عاملينه للناس ده؟ اسرائيل دي مش احنا عاملين معاها سلام؟ ازاي الدولة عاملة معاها تطبيع كامل ولما صحفية تقابله تتعاقب؟ انا ما عملتش حاجة في السر........
اللايحة تتغير............ اممم هو ده بيت القصيد
ودي مش مؤامرة من جواسيس ولا عملاء، دي الدولة نفسها بتعمل هزة للنقابة وعايزة تطرح المادة اللي ضد التطبيع للمناقشة تمهيدا لان المادة دي تتلغي، او على الاقل تتجمد: "النقابة يجب الا تشكل قيدا اضافيا على الصحفي، كفانا قيودا"!!! قال يعني، واللي بيقول كده مين؟ صحفي في الاهرام والله نسيت اسمه من كتر ما نرفزني
القرد اللي من الاهرام قال: هو انتوا عملتوا استفتاء على المادة دي واخدتوا رأينا؟ اعملوا استفتاء وشوفوا كام صحفي موافق على اللايحة دي، اعملوا تصويت!!!!! هي اللايحة دي منزلة؟
وجمال فهمي يقول له سلاح مقاطعة
يقوم يرد ويقول: دي وجهات نظر
فاهمين بيحصل ايه؟ بيحصل المعتاد لما يحبوا يغيروا حاجة، يعملوا له زمبليطة عشان يهتز في دماغ الناس ويتحول الثابت الى امر قابل للنقاش، وانا ماعنديش مانع ان ده يتعمل في اي حاجة، الا في اسرائيل
والدليل على هطرستي دي، ان كل ابطال المسلسل من الاهرام
هي الفكرة كلها، ان المقاطعة ثابت من ثوابت النقابة، والحكومة عايزة تهزه عشان اتفاقات حصلت بين عوكل والنتن، وعوكل واوبابا، وكالعادة ما بيقولناش حاجة هو، هو بيعمل في صمت، والبلد بتتسرسب من بين ايدينا من غير ما نحس، زي كل حاجة فاتت هي مصر من تلاتين سنة زي دلوقت؟ مصر من عشر سنين زي دلوقت؟ وانا اللي شايفاه ان اي تطور بيحصل في صالح اللي عايزه عوكل، كل اللي عايزه هو اللي بيمشي في الاخر
عايز يجيب جمال
وقالوا له في اموركا اكسر الجليد اللي ما بين المصريين واسرائيل
ربنا يستر بقى، انا مش عايزة حاجة من النقابة غير انها تحجر وتنشف دماغها وتعمل ودن من طين وودن من عجين وتحط فردة جزمة في مخها
التخريف خلص
خدوني على قد عقلي، بس اهم حاجة اللائحة دي ما تتغيرش، ومافيش صحفي يفلت من عقاب المادة دي، وهو كده، شغل صعايدة يعني
وملحوظة: انا مش بانصح الناس تحط جزمة في دماغها وانا حاطة علبة بودرة، انا كمان حاطة في دماغي جزمة
يعني من الاخر كده ماحدش يناقشني في المقاطعة او الثبات على اللائحة، مش عايزة اسمع كلام فارغ
وزي ما قال نصر الله: اذا لم نستطع ان نقاتل فلسنا مجبرون على الاستسلام

16 comments:

Anonymous said...

تفتكري النقابه هتقدر تقاوم الضغوط دي ؟

فرحة said...

عندك حق يا نوارة وبعدين الست دى جت امبارح فى العاشرة مساء وقعدت تقول الكلام الفارغ بتاع الاخوة الليبراليين ده وبعدين قعدت تقوللك انها متسقة مع نفسها واللى بتفكر فيه هو اللى بتعمله وانها عندها مبادىء ومش ممكن تغيرها علشان تعجب الناس وكلام كده ينرفز جتهم نيلة ملوا البلد

overdose said...

اه ممكن بس هما م محتاجين تمثيليات يعني عشان اللي بتقوليه ده
هما مش بيتبعوا اخراج يسري نصر الله في الافلام

دول بيتبعوا اسلوب حسن الامام
عارفاه طبعا
اهم صلي ع النبي
اللهم زيد النبي صلا
سيري

Unknown said...

بس انا مش شايفة اي يسري نصر الله في الموضوع

ده هو هو فيلم حسن الامام بتاع كل مرة

فاكره؟

كل مرة يعملوا نفس الطريقة بنفس البنطلون بنفس الفانلة عشان يغيروا الرأي العام لحاجة هم عايزينها

Unknown said...

تخريفك يا بنت عمي سليم مية في المية

بس خليني أمارس هوايتي في تعذيبك وإحباطك... حتى لو اللايحة ما اتغيرتش يا ست الكل...

وحتى لو جبهة الممانعين نشفت دماغها وأصرت وألحت (زي عبفتاح القصري في ابن حميدو) إن كلمتها مش هتنزل الأرض المرة دي أبدا....

برضو يا نانوش المراد تم وخلاص بالفعل... الهدف لخلخة الثوابت واتلخلخت تماما... وكل مرة هيتعمل الشو ده والملايات تتفرش والليبراليين يطلعوا يقولوا البقين الحمضانين بتوع العقل بيقول كذا والموضوعية بتقتضي كذا ويشتموا أوي ويسخروا أوي ويتفهوا أوي من أدعياء التخلف والغوغائية واللاعبين بمشاعر الناس (اللي هم احنا يعني) ويطلعونا إننا وحشين أوي ورجعيين أوي وعنصريين خالص... واللي يتابعهم فعلا ويسمعهم هيتأثر بجد (أصل الكلام الافرنجي الشيك حاليا بياكل مع الناس أوي على الأرجح بسبب عقد النقص) وشوية بشوية هيبقى التطبيع هو صوت العقل والقلب والمناخير والأعضاء الحساسة كلها وهيبقى مناهضة التطبيع سمعتها سيئة وهيتم مساواتها بالتطرف الديني والإرهاب الفكري وشوية بشوية يتحط الرافضين للتطبيع في نفس السلال بتاعة المحرضين على الإرهاب والعنف والكراهية (لاحظي إن بالفعل وللأمانة هناك بالفعل كثير من العنصريين والمحرضين دول موجودين وسط صفوف مناهضي الصهيونية والرافضين للتطبيع فالخلط لن يكون صعبا) ...

هالة مصطفى شو نجح بالفعل يا نوارة ولسة هينجح أكتر خطوة خطوة.. مش باقول لك أنا باتلذذ بتعذيبك... نياههاااههااا وتلاقيكي هتعيطي دلوقت وتصعب عليكي نفسك... هوووو هووووووو (ضحكة شريرة تاني)....


فاكرة من خمستاشر سنة ولا عشرين يا ربي مش فاكر أيام كوبنهاجن... كان علي سالم وأراؤه (المستنيرة) موضع استهجان شعبي ونخبوي عام وتم تصويره للرأي العام على إنه أراجوز هو وكل الكوبنهاجنية (وهم بالحقيقة كذلك أو أغلبهم) ويا عيني علي سالم ولطفي الخولي تم مرمططهم (يستاهلوا طبعا) لحد ما بقى مالهمش أي ذرة كرامة أو مكانة في أوساط النخبة المثقفة...

دا بقى كان زماااااان....


دلوقتي صوت التطبيع من هنا ورايح خلاص هيبقى هو صوت الاعتدال والاستنارة وأي كلب فينا (كبير أو صغير) هيقل أدبه على التطبيع وعلى السلام هيطلع دين أمه في الفضائيات والتوك شوز والجرايد الرسمية والمستكلة... ولأن الكل ملطوط (راجعي احتفال أوباما والجدل الأزلي بتاع تطبيع الجلاد مع صحفيين إسرائيليين على هامش الحدث ورفض هويدي للوقوع في الفخ ذاته) فكله يا إما هيدافع عن اتساق في المواقف زي هالة والمطبعين الصريحين أو هيدافع لأنه ملطوط زي الجلاد وغيره... والنتيجة زي ما انتي توصلتي إن الجدل يدور والثوابت تتلخلخ

أنا - بوجه عام مع لخلخة الثوابت - وذبح لبقرات المقدسة كمان بين الحين والآخر أينما كان لذلك ضرورة... بس مناهضة التطبيع ليست ثابتا من الثوابت الجامدة السخيفة... بل الأمر يتعلق بمواقف مبدئية من رفض العدوان ورفض العنصرية ورفض الاحتلال ورفض انتهاكات حقوق الإنسان وغيره وغيره مما يمثله الكيان الصهيوني... وبالتالي التطبيع يجوز الحديث عنه متى امتنعت إسرائيل عن كل ما سبق وهو الأمر المستحيل تطبيقيا على أرض الواقع ومن ثم يبقى رفض التطبيع موقفا ثابتا لا يقبل للجدل طالما بقيت إسرائيل كيانا عنصريا استعماريا قمعيا منتهكا كما هي الآن

المهم م الآخر... مفيش فايدة يا هانم... حسني ونظامه ومخابراته (بالعند والمكايدة فيكي مخابراته وجيشه كمان) أذكى وأدهى مما نتخيل جميعا وناجحين 100 % في كل ما يصبون إليه وادينا بنتفرج يا أوختي

:-(

Unknown said...

ليه كده؟
ليه يعني؟ ليه الرسالة القاتلة دي عبر القارات
بتبعت لي كومنت انثراكس؟ منك لله
تستاهل انك رحت السويد
بيقولوا كلها عشر سنين وتبقى دولة اسلامية

احسن احسن
المسلمين وراك وراك
ههههههههههههههههه

Unknown said...

فتاة من الصعيد

زي ما قال لك مينو كده
بصراحة معاه حق

فرحة

دي كانت بنت كلب امبارح
عايز تنضرب بالجزمة

Unknown said...

مش مشكلة بقى... تبقى إسلامية بقى ولا منوفية... أنا جاهز مسبقا أهو ومربي لهم دقني من دلوقتي... أبدأ بقى أخزن بيرة ونبيت من دلوقت عشان السنين العجاف لما تيجي

:D

Unknown said...

هههه
كنت باقول لك على الفيس بوك اني خايفة من الكلام ده

في فرنسا والمانيا وانجلترا وايطاليا عندهم هلع من المسلمين ومن تزايد عددهم

وانا خايفة ييجي يوم يعملوا فينا زي ما عملوا في اليهود

بس ساعتها كل اللي لونهم بني ح يندبحوا يا مينو

هيهيهيهيهييييييييييي

وراك وراك وراك مطرح ما تروح وراك
ح تندبحوا مع المسلمين برضه حتى بعد ما سبتوها لهم مخضرة

مهما الايام تعمل فينا ما بنستغناش عن بعضينا ما بنستغناش ابدا ابدا ما بنستغناش عن بعضينا

كان فيه واحد مش فاكرة اسمه بيقول ان النبرة دي لو فضلت ترتفع مع تقدم اليمين في اوروبا ممكن في خلال من عشرة لعشرين سنة يحصل في المسلمين اللي حصل في اليهود

وطبعا المسيحيين العرب يا حبيبي مسلمين

هو كده
مسلمين مسيحيين كده

كان فيه واد امريكاني مصري مسيحي كان طالع بيتكلم بيقول: امي فهمتني اني ابيض واني مش عربي واننا مسيحيين

لما رحت المدرسة في امريكا قالوا عليا ملون وعربي ومسلم

ههههههههههههههههه

البسسسسسسسسسسسسسسسسسسسسسس

بس لو في الفترة اللي جاية اليسار نشط ممكن ما حدش يندبح
بس لو فضل اليمين يصعد كده زي اللي حصل في المانيا وفرنسا وايطاليا
النازيين الجدد قادمون

شد حيلك يا بطل بقى
عايزين اليسار ياكل اوروبا

simplymoi said...

اسامة سرايا صفرا
You are hilarious :}

Unknown said...

:D

البنفسج الحزين said...

شوفي بقا يعملوا تمثيليات براحتهم يطبعوا مايطبعوش يدخل السفير الاسرائيلي الاهرام يدخل ابو زعبل احنا كشعب مصري هيفضل مبدأنا
(مش هنسلم مش هنبيع مش هنوافق ع التطبيع واييييييييييييييييييييييه ايييييييييييييييييييييه.

مصعب رجب said...

أنا هحط في دماغي
دزمة
وستين دزمة كمان

حفيدة عرابى said...

تسلم ايديك وهطرستك وتخريفك وتفكيرك الملتوى
ومعاك ان شاء الله
وجاهزين بالجزم القديمة

حسن على said...

اسعد اللة مساكم جميعا: (الهطرسة)كلمة عبقرية نحتتها نوارة الذكية(بت الاية) من (الهبل)و(الغطرسة) للدلالة على تلازمهما المثير للشفقة. وتبدو علاماتها بوضوح فى تصريحات الرسمين والمتحدثين باسم كل من :الرياسة والخارجية ومجلس الوزراء لانة الراجل مزنوق يقول الشىء ونقيضة فى نغس الوقت ويجب علية ان يغلف ذلك بالجدية الكاذبة المبالغ فيها ليجبر المستمع الية على الاقتناع بتراهاتة

Mohajer Masr مهاجر مصري said...

الحكايه ابسط من كده ...... هي عيزي تاخد لجوء سياسي في امريكا فلازم تعمل شويه دوشه