Wednesday 23 September 2009

هي الناس بتضحك ليه والقذافي بيتكلم

حتى ليلى الشايب مذيعة الجزيرة بتضحك، احم، وانا باضحك، بس والله مش عارفة ليه؟ :) طب والله قال كام حاجة كويسين يعني، بس قال لهم اقروا الكتاب الاخضر واداهم نسخة من الكتاب الابيض، لا هو ما اداهمش، هو رمى النسخة في وش مقرر الجلسة، تريكي ده، رماها في وشه كدهو
ووترهم وقال لهم مبنى الامم المتحدة في نيويورك مستهدف، وهم قاعدين فيه
محمد مرعي بيقول لي ماهو بيعمل في الناس اوحش من كده، هو صحيح بيعمل في كل الناس كل حاجة، بس ده ما ينفيش ان كلامه كان فيه حاجات مظبوطة، حتى لو هو نفسه ما اتسقش معاها، ده موضوع تاني،زي انه يعذب الناس ويتكلم عن التعذيب، او زي انه يقول ان الصوماليين مش قراصنة، السفن اللي بتدخل مياه الصومال بلا اي احترام لسيادتها وترمي نفايات هم القراصنة، حتى لو كان هو نفسه له سفن بتعمل كده في الصومال، ده موضوع تاني
بس مش عارفة ليه كنت باضحك
احنا دلوقت في انتظار الكتاب الفوشيا
بس اتضايقت دلوقت، تصدقوا اتضايقت دلوقت حالا وانا باتكلم؟ عشان ما ينفعش كلام بجد وحق يتقال على لسان واحد كوميدي، كده حاجات حقيقية بتتسفه بشخص الانسان اللي بيقولها، بعد كده لما حد عليه القيمة يقول الكلام ده الناس ح تفتكر القذافي وتضحك

19 comments:

مواطن مصري said...

انا بحب القذافي بحب أسمعة سعات فعلاً بيقول كلام صح زي موضوع القراصنة و موضوع الوحدة الافريقية و قال بقين جامدين عن الامم المتحدة

بس هو سيد ابو حفيظة مش هيتكلم ولا لسة

Unknown said...

ايوة يا مواطن

تقريبا كل الكلام اللي قاله صح
زي كلامه عن طالبان والعراق وزي كلامه عن علاقة اليهود بالعرب واننا عمرنا ما احتقرناهم وبكرة يحتاجوا لنا ومش ح يلاقونا وهو ده الهدف من انشاء اسرائيل وزي موضوع القراصنة مع ان السفن الليبية بتنتهك السيادة الصومالية برضه

بس اتضايقت
اتضايقت قوي
بعد ما قعدت اضحك طبعا خصوصا لما رمى الكتاب الابيض في وش مقرر الجلسة ههههههههه

اتضايقت عشان ماحدش بياخد الراجل ده بجدية خالص كل الناس تتفرج عليه وتضحك

والكلام اللي بجد لما يتقال على لسان اراجوز يبقى ده تضييع فرصة على ان الكلام ده يتقال بجد ويؤخذ على محمل الجد

Unknown said...

وعلى فكرة كلامه عن ضرورة فتح التحقيق في جرائم امريكا صح برضه
وكلامه عن مقتل كندي صح

بس زي ما قلت لك
ما كانش ينفع هو اللي يقوله بشعره ده

مواطن مصري said...

كفاية ان الراجل دة قال لابد من تحقيق في جرائم الحرب الي حصلت في السويس

مواطن مصري said...

بتاع قطر قال بقين اي كلام و جاي يسوق لمنتجاتة

فاروق عادل said...

ههههههههههههه كانت خطبه تحجفه هو نجاد مش هيخطب ولا ايه؟

Unknown said...

هههههههه
لا ما اعتقدش يا روقة ان نجاد ح يخطب
ح يجيب لهم سيرة الهولوكوست بقى ويجننهم

خواطر شابة said...

تحية طيبة وبعد
لي عليك عتب. انا مغربية اؤمن بالوحدة الترابية لبلدي من طنجة الى الكويرة واؤمن ان الصحراء مغربية بالتاريخ وبحكم المحكمة الدولية وباجماع الشعب المغربي.
انا احترم مصر احترم تاريخها احترم سيادتها لدلك فان
عتبي عليك من باب المحبة ومن باب احترام كتاباتك وافكارك لكنني في كل مرة افتح مدونتك تستفزني عبارة "لتحيا البوليساريو كمان" .
الوحدة الترابية لبلدي امر مقدس كما هي بالنسبة لك وحدة بلدك أدامها الله عليك وعلينا.
مع تحياتي
مواطنة مغربية

Anonymous said...

سبنا من موضوع القذافي لاني مشفتش هو قال ايه لاني كنت في الشغل بس فيه موضوع نكتة بجد عن موضوع القذافي سوزان مبارك علي تويترhttp://twitter.com/SuzanMubarak والرابط اه وعامله كمان فلوينج لمين فرباوي وائل عباس وموافقة علي اضافة نورا يونس ومرعي هو دا بجد ولا لعبة مخابرات وامن دوله مفتكريش كدة لانهم مش محتاجين الاساليب ده هل هي طريقه لتحسين صورة اسرة الحكم ولاقرروا فعلا انهم يسمعوا للشباب والمدونين

اسد الجيزة said...

مقدرشي اعلق علي موضوع القذافي لاني ببساطه مشفتووش بي ااقوللك علي موضوع اظرف منه سوزان مبارك علي تويتر والhttp://twitter.com/SuzanMubarakرابط اه

مواطن مصري said...

نوارة متعرفيش أنزل من فين كتاب الاخضر شكلة جامد

مواطن مصري said...

لقيت الكتاب الاخضر خلاص

http://www.greenbookresearch.com/ar/greenbook.php

Unknown said...

يا خوف فؤادي من غدي


الاخت من المغرب
اولا انا شلت خلاص الجملة اللي مضايقاك زعلك على عيني

ثانيا ارجو تقبل اعتذاري انا لم اقصد ابدا اني اضايق الاخوة في المغرب

الجملة دي لها اسباب في وقت ما حطيتها لانها كانت في فترة حرب غزة وكان وقتها تشافيز طرد السفير الاسرائيلي فما كان من حكومة المغرب الا ان طردت السفير الفنزويلي تحججا بدعم تشافيز للبوليساريو

والحقيقة التوقيت كان استفزازي جدا وكأن حكومة المغرب تعاقب فنزويلا على طرد السفير الاسرائيلي

خالص احتراماتي لشعب المغرب

مواطن مصري said...

تراجعتي عن موقفك لية يا نوارة

انا بس بهدي النفوس

:D

مواطن مصري said...

http://www.youm7.com/News.asp?NewsID=138686

القذافى يمزق ميثاق الأمم المتحدة ويلقى به المنصة

حـنــّا السكران said...

أخبار : الحكومة المصرية تنفي خبراً

عن خصخصة مياة النيل !!!!

هو في أخبار عن خصخصة مياه النيل ؟؟


الهواء يُعتبر أملاك حكومة كمان يا نوارة ؟ الله يستر

Unknown said...

سيبك من القذافى و شوفى فاروق حسنى
---------
فاروق حسنى باق فى منصبه كوزير للثقافة

http://www.youm7.com/News.asp?NewsID=138704
---------
حسنى: لن أستقيل وأمريكا أدارت الحركة ضدى

http://www.youm7.com/News.asp?NewsID=138729&SecID=65&IssueID=77

Unknown said...

خصخصة مياه النيل؟
هيهيهيهيهييييييييييييي
وده ح يخصخصوه ازاي ده؟ ح يبيعوه للوليد بن طلال برضه؟

بدراوي

والله كنت باكتب البوست وانت بتكتب التعليق

Anonymous said...

أنا شخصيا عارف انا باضحك على إيه..

لأنه حتى لو كلامه صح فهو ببساطة بيتكلم زي الناس اللي عالقهاوي، يعني عمال يقول اقرأوا الكتاب الأخضر والأبيض، يقول لنا مثلا انه الدواء لازم يكون مجاني..كدة يعني غصب؟
مفيش يعني فكرة ازاي نحافظ على حقوق الباحث وازاي نوفر له حافز متناسب مع حجم شغله وفي نفس الوقت يوصل الدواء للمستهلك النهائي مجانا؟
مفيش طريقة عملية؟..تجربة؟..أي حاجة يا بشر ده رئيس جمهورية مش عم عبده على قهوة علولة!!