Thursday 17 September 2009

هي الحاجة نوال السعداوي عايزة مننا ايه في نهار رمضان كده؟

مش بافتح المصور لقيتها في وشي، عمالة تقول أمي علمتني التفكير وابويا علمني الحرية، حسستني انها ولدت في فرنسا ونشأت وترعرعت في ايطاليا واخدت شهادتها الثانوية من جبال الالب
بقى فيه فلاحة في الدنيا ما بتفكش الخط ح تقول لبنتها: "إن الله هو الحرية" لما بنتها تقول لها المدرس ضربني عشان سألته مين اللي خلق ربنا؟ ايه المعر ده؟ يعني الست في اوحش الحالات ح ترنها علقة تانية وفي احسن الحالات ح تقول لها: معلش يا ضنايا، خدي عسلية 
ثم مين ابو العلاء المعري اللي قال:  
سكان العالم قسمان: قسم لهم دقون وليس لهم عقول وقسم لهم عقول وليس لهم دقون
ابو العلاء المعري قال كده؟ يا سبحان الله، اول مرة اعرف ان بق ابو العلاء المعري نازل على رقبته دوغري كده من غير دقن، مين الناس اللي مالهمش دقون دول، يمكن قصده اللي عندهم لغد كبير قوي بحيث تبقى دقنه مدفونة في... ايه ده؟ ده قالها في انهي عصيدة دي؟
وابو العلاء المعري قال سكان العالم؟
لا، واللي روى بيت الشعر العبقري ده عن ابي العلاء المعري هو السيد الوالد، الحاج سعداوي، قال الحاج سعداوي في الارياف من حوالي ييجي تمانين سنة كده قال لبنته، في الارياف: .. لا يمكن ان يفرق بين الناس على اساس الجنس او الجنسية او اللون او العرق او العقيدة
دي متربية في الريف الانجليزي؟ لا والله، ولا الريف الانجليزي في اول القرن اللي فات كان فيه حد بيقول الكلام ده
الله، هو مش جان بول السعداوي وفرنسوا سجان عبد الخالق دول اللي كانوا ختنوها وعملت لهم فضيحة من كام سنة ايام حملتها على الختان وازاي قهروها وجوزوها وهي عيلة وودوها عند البلانة تسلخها زي الفرخة، مش هي كانت كتبت كده من حوالي خمستاشر سنة في نفس مجلة المصور دي والله، فجأة كده بقوا بيقروا شعر شيلي وبيحضروا حفلات سيمفونية ويرقصوا سالسا؟ 

38 comments:

كريم البحيرى said...

ياريت تبقى تبصى على مدونتى

mido said...

مبارك زار ( كارفور ) او والله كارفور علشان يطمن على استقرار الأسواق

mido said...

نوال السعداوى انتهت من زمان

مش فاهمه said...

مش لاقيين لهم شغلانه يشغلوا الناس بيها مرتضى منصور مابقاش نافع و لا جمال البنا قالك ندور فى دفاترنا القديمه راحوا مطلعين لنا نوال السعداوى من تحت السرير ......بالمناسبه ياما قالت على امها انها لما اكتشفت انها بلغت لطمت على وشها حريه ايه دى اللى بتتكلم عنها بقه .........ياعينى فاكرة لها لقاء مع هاله سرحان من سنتين تقريبا و كانت شكلها وحش قوى وهى بتقول لهاله سرحان بصىانا حلوة ازاى و طعمه ازاى و لا بنتها منى حلمى ياحبة عينى اللى حالتها تقطع القلب و لاحول ولا قوة الا بالله

TAFATEFO said...

(Y)(Y) :D:D:D:D:D

هأطبعها وأسيبها قدام بيتها

أسيب توقيع؟ :D:D

رئيس جمهوريه نفسى said...

يا نوارة السن ليه أحكام وربنا يرحمنا ويعافينا من الزهايمر واللى بيعمنله فى العقول

مواطن مصري said...

كل واحد يقول الي يقولة


من حقها بردو

خلي بالك احسن تلاقي الريس طالعلك في الشغل

جولة مفاجئة للرئيس مبارك بمجمع كارفور بالمعادى
http://www.youm7.com/News.asp?NewsID=137314

أبو أمك said...

عشان كده كل لما أروح للحلاق يسألني
عقل ولا دقن

Unknown said...

نوال السعداوي أحقر من ان احنا نهتم بتصريحاتها

Unknown said...

هههههههههههههه
عقل وللا دقن دي جامدة قوي

Unknown said...

مرة قالت انا رحت مؤتمر في الدنمارك ودافعت عن الاسلام، قلت لهم مش بس الاسلام اللي بيظلم المرأة، كل الاديان بتظلم المرأة
:)
اصيلة يام العربي

Nohaz said...
This comment has been removed by the author.
Kalimalhus said...

إنتى بتشغلى بالك بحاجات غريبة قوى .. نوال سعداوى مين فى الحر ده .. و بعدين رمضان فى آخره و العيد داخل كل سنة و إنتى طيبة ..

الحاجة اللى حارقة دمى هى إن اللى على وش القفص فى البلد دى هى أنواع التطرف من كل إتجاه .. يعنى اللى بيشغلوا عقول الناس إما متطرفى السلفيين أو متطرفى العلمانيين.. و واضح إن شعبنا إقباله الأساسى هو على الجعجعة و الإثارة و الكلام المستفز .. و لو حد كلمهم بهدوء و عقل بيناموا منه..

Dr Nemo said...

هههههههههه بصراحه يمكن دى اول مره ادخل عندك يا نواره على التعليقات علطول من غير ما اقرا الموضوع ..... طالما لمحت اسم نوال بروق الجمجمه..... دى انسانه مش هقول مجنونه بس هقول انها بتحب الظهور اوى اوى ومستعده تعمل "اللالى " عشان يهتم بيها الراى العام .... بسبنى منها خالص ..... المهم دا مقال
http://shorouknews.com/ContentData.aspx?id=113540
عن تحرى ليلة القدر وصاحبه بيقول انه يظنها او يعلم انها فى 29 .... فى الشروق على فكرهع مش شغل فرقعات منتديات يعنى

Unknown said...

يا جدعان دول كانوا عاملين معاها حوار في الاهرام ومدينها الصفحة الاولى في المصور تكتب فيها
يعني انا مش ح اشغل بالي بيها لو سابتنا هي في حالنا

Unknown said...

هي قالت في مذكراتها انها من الارياف
مذكراتها اللي كتبتها من خمستاشر سنة
وقالت ان امها ما بتفكش الخط ومقهورة وابوها كان مفتري وبيعامل الصبيان احسن منها
وانهم جوزوها غصب عنها وطاهروها وودوها عن ست تشيل لها شعر جسمها، ههههههه اي والله قالت كده، وتقول سلخوني زي الفرخة
مع ان الفرخة مش بتتسلخ
الفرخة ريشها بيتنتف، ده الخروف هو اللي بيتسلخ

فجأتن رضيت عنهم وبقوا الحاج السعداوي بول سارتر والحاجة زينب ساجان

ازاي؟ ما اعرفش

ويكا said...

والله العظيم والله العظيم
لا فض فوووكى

Unknown said...

شوفتى روقة
اكتسح فى الجولة الاولى
22
صوت
ابن ال
.........

اما نشوف فى الإعادة حيعمل ايه

mido said...

مواطن مصرى

و احنا نقول عليها اللى نقوله

من حقنا برده


-----------

نوارة لسه فى احتمال تبقى ليلة القدر بكرة
:)

جـــــــر شـكـــــــل said...

هذا رابط لكتاب نوال السعداى مذكرات طبيبة
الذى تحكى فيه عن عقدها النفسية

http://www.4shared.com/file/65683085/8982dde0/__-__.html?s=1

وهذا ربط آخر للعديد من كتب نوال السعداوى
http://www.4shared.com/dir/13026890/fd4eecdf/_sharing.html

Nohaz said...
This comment has been removed by the author.
Unknown said...

هههههههههههه

تحفة يانوارة ..أنا قريت الحوار و حواجبى لغاية دلوقتى طالعة لغاية شعرى و مانزلتش

Kalimalhus said...

يعنى الصحافة المطبوعة ماشية فى سكة المدرسة الأمريكية المعتمدة على الإثارة و اللى مايهمهاش قيمة المحتوى مادام الخبر أو الكلام المنشور بيثير اللغط و بيزغزغ الناس فى الحتت الحساسة .. نقوم إحنا نعوم على عومها و نهتم بالحاجة لمجرد إنها طلعت فى الأهرام أو المصور و إتبروزت فى حتة واضحة..؟

تعرفى إن غالبا اللى بيقروا المدونة بتاعتك أكتر من اللى بيقروا المصور؟.. ده معناه إن عندك فرصة توجهى نظر الناس للحاجة اللى تستحق إهتمامهم .. و للأمانة إنتى بتعملى كده معظم الوقت .. ماتجيش بقى و تسلطى الضوء على حاجة هى فى ذاتها ماتستاهلش عشان لقيتيها فى الأهرام و المصور..

و لو قلنا إنك بتوضحى ملاحظة تتعلق بمصداقية الولية المذكورة أدناه.. متهيألى أكتر الناس بغض النظر عن توجهاتهم ما بيدوهاش مصداقية كبيرة أصلا..

كلمينا فى حاجة تستاهل النقاش و إننا نتخانق عليها .. أنا بصراحة ليه نفس أتخانق مع حد على موضوع يستاهل..

مواطن مصري said...

بدراوي اية رائيك ان فاروق حسني هيكسب


يعني هيكسب غصب عن الاسلامين و غصب عن الصهاينة

ها

Anonymous said...

بالمتاسبة المعري قال الكلام ده فعلا
ماهو كان وجودي ما انتي عارفة

Unknown said...

ويكا
شالله تسلم

بدراوي
لازم يجيب تلاتين صوت

خلاص بقى يا بدراوي، ده مرشح مصر، زي الفريق القومي كده مضطرين نتنيل نشجعه
بس على الله لما يروح ما يحرقلهمش حاجة ولا يسرق كام قطعة اثار ويفضحنا

ميدو
اه لسة في احتمال
ما انا برضه مش عايزة اتاخد على خوانة

جر شكل
يييييييي
انت جبت الدواهي دي منين؟
منها لله والله


مهندس حر

لا بص يا مهندس للامانة نوال السعداوي مهمة
واهميتها تكمن في الاتي:
من ايام الملك خشبة واي قوة استعمارية قبل ما تعمل اي غزو بتعمل حملة كبيرة على الهدف عشان تقنع الجمهور بان الناس دول يستاهلوا الغزو
زي اللي شكسبير عمله
وزي اللي كتاب القرن التمنتاشر عملوه (بما فيهم تشارلز ديكنز ذات نفسه) وزي المستشرقين ما كانوا بييجوا ويكتبوا كتب والرسامين يرسمونا
عشان يعملوا رأي عام يدعم الاحتلال
اللي حصل ان من حوالي عشرين سنة واوروبا وامريكا بعد سقوط الاتحاد السوفييتي مركزين على الاسلام والمسلمين عشان يأهلوا الرأي العام انه يقبل بفكرة انهم يحتلونا

نوال السعداوي هي وواحدة اسمها وفاء سلطان كانوا وش القفص في الموضوع ده
وجزء كبير من الرأي العام الغربي اللي ضد الاسلام دلوقت مبني على انجازات السيدة نوال السعداوي الفكرية كل كتبها مترجمة لعدة لغات وتوزيعها كبير برة وكل سنة تروح مؤتمر وتدي محاضرات تقول فيه الخرا بتاعها

ومذكراتها دي اترجمت واطبعت بعدة لغات ووزعت كتير
ومعروفة في اوروبا اكتر من هنا كمان
واذا كان مالهاش مصداقية عندنا
فهي لها مصداقية كبيرة برة

يعني دي واحدة باعت اهلها وناسها وهي مسئولة مسئولية كبيرة عن الدم المسفوك في العراق وافغانستان

فالتقليل من شأنها مش في الصالح، حتى لو كلامها اهبل واستفزازي بس بياكل مع الخواجات

طيب واحدة عدوة مبينة زي دي لما تتبروز في الصحافة القومية

ليه بقى؟
ليه؟ المفروض انها معارضة لحسني مبارك ليه تتبروز في الاهرام؟

m5m
هههههههههههه شفت؟
طب شوف مقالها في المصور
بتقول اتمنى ان الازهر يعتذر لي بعد اربع قرون زي ما الفاتيكان اعتذرت لجاليليو بعد اربع قرون

اي والله العظيم قالت كده

Unknown said...

NohaZ

يا حبيبتي انا مش باكدبك والله
انا باقول لك انها قالت كلام قبل كده ورجعت فيه
طبعا ممكن تبقى كدابة وحطت تحابيش
مش ممكن ده اكيد
وكدابة نساية كمان

Unknown said...

faissal

لا والنبي قول لي ابو العلاء ح يقول سكان العالم ازاي؟
وح يقول لهم دقون بالدال؟ ماكل الناس عندها دقون
ما كانوش اخترعوا كلمة لحية قبل كده؟

Unknown said...

مواطن
فاروق حسني ذمته استك وممكن يروح يفضحنا هناك
على الله يستر

بيقولوا سلماوي هو اللي ح ييجي مكانه في وزارة الثقافة

الا هو شرط يعني؟ لازم وزير الثقافة يبقى كدهون يعني؟

كريم البحيرى said...

حوار الفاجومى على صفحات جريدة صوت الامة حول هجوم الفاجومى على السادات ومبارك ويؤكد مقتل السادات وهو الحوار الذى تم منعه فى برنامج على روتانا سينما وبسبب خطأ فى الاعدادتم وضع اسم جمال عبد المجيد بدلا من كريم البحيرى حيث ان البحيرى هو من قام بكتابة الحوار لمتابعة الحوار مدونة عمال مصر ياريت تقوليلى رأيكم
www.egyworkers.blogspot.com

sal said...

والله انتى هايلة يا ست نوارة
واسلوبك الساخر المميز اكثر من رائع حتى لو كان الموضوع بسيط بيبقى يستاهل
حلوة منك جان بول السعداوى
يكونش دا قريب لعبد القوى سارتر
بتاع الدفاتر
لك كامل تقديرى

Unknown said...

نوارة
......

المرشح لوزارة الثقافة هو اسماعيل سراج الدين بتاع مكتبة اسكندرية

وايه حكاية سلماوى كدهون دى؟

هو سلماوى نايتى هوا كمان؟؟؟؟

Unknown said...

اسماعيل سراج الدين؟
طب كويس
انا مش فاهمة انتوا مش عايزينه يمشي يروح اليونسكو ليه؟
ما شبعتوش لهط اثار؟

Unknown said...

يييييييييييي
يا بهيج ما طاهروهاش بالسلخ والنتف
ههههههه
منك لله
هي قالت انهم في استعدادات الفرح ودوها عن ست تشيل الشعر الزائد وكانوا بيسلخوها زي الفرخة
دي حاجة تانية غير الختان اللي برضه حكت عنه بالتفصيل الممل

TAFATEFO said...

منين ان إسماعيل سراج الدين هو المرشح للثقافة .. معتقدش ومعتقدش انه يقبل

سلماوي متحمس أوي وكذا حد كان كاتب انه مرشح لخلافة حسني

وتفضل إشكاليتي الوحيدة مع فوز حسني بالمنصب ان اسمه هيجاور اسم بطرس غالي ومحمد البرادعي والفائزين بنوبل ويتكتب في المناهج المدرسية .. أحيه .. دول ممكن يسموا شارع باسمه (و.....) وممكن كمان يعملوله تمثال بعد 100 سنه ولا حاجه

ده سبب كافي جداً لأن محدش يجيب عيال .. يمسيها بالخير كريمة مختار .. الكل بيعمل بيزنس لحسابها دلوقتي

Kalimalhus said...

نوال هى مجرد واحدة من عشرات و يمكن مئات زيها مصريين و عرب و مسلمين .. لو أحسنا الظن بيهم نعتبرهم مخدوعين و أدوات غير واعية للفكر الإمبريالى و لو أسأنا الظن هنعتبرهم عملاء بيقبضوا تمن الخيانة فلوس و شهرة و أضواء..

المهم إن الملاحظة الأساسية هى إن تواجدهم الإعلامى فى الداخل ليه دور و فى الخارج ليه دور تانى .. الإتنين مدمرين ..بس الحديث عنهم داخليا يعنى إلى جمهور الداخل مفيش منه فايده و ممكن يبقى ليه أضراره لأن الناس فى النهاية مابتفرقش قوى بين علمانى و علمانى متطرف و بين معتدل لا هو علمانى و لا سلفى إلخ .. و النتيجة إن مقولات الناس دى المستفزة و إنعدام مصداقيتهم بيصب فى تشويه قطاع كامل من المثقفين اللى كلامهم بالنسبة للشخص العادى مابيفرقش كتير..

لو مواجهة أفكار ناس زى نوال و غيرها هى الهدف فالمواجهة دى تكون بتوجيه الخطاب لجمهورهم فى الخارج .. يعنى أنا مش فاهم ليه لما تعملى سيرش على إسمها بالإنجليزى تلاقى كلام كله شعر و غزل و لما تعملى السيرش بالعربى تلاقى سب و شتيمة .. ليه مفيش كتابات بالإنجليزية فيها نقد و توضيح لأسباب إنعدام مصداقيتها و إنحراف أفكارها إلخ..؟

77Math. said...

المعري قال:
اثنان أهل الأرض : ذو عقـل بلا ديـن وآخر ديِّن لا عقل لهْ

قرأتها هنا:
http://www.mohomar.com/mohomar/66180/2009/09/16/172468-...

Dr. Ahmed Wagih said...

انا مش فاهم انتي ليه ماسكاها تريقة! الست ما قلتش حاجة غلط.. فعلاً، المعري قال حاجة زي كدة، وفعلاً، لما تبصي في مصر دلوقتي، هتلاقي اصحاب الذقون والحجاب هم غالباً أعلى نسبة في الفئات الأقل نجاحاً في المجتمع، بينما العكس هو الصحيح في الفئات العليا هتلاقي مديرين البنوك، واساتذة الجامعة المتميزين، واصحاب الشركات الناجحة، الخ.. معظمهم غير متدينيين!