Wednesday 23 September 2009

البسسسسسسسس فاروق حسني مش ح يستقيل



هيهيهيهيهيييييييي، طب خليك بقى فاكر يا روقة اني انا الوحيدة اللي تعاطفت معاك، انا ماليش دعوة يا بيه بالعيال الصيع دول، منك ليهم يا باشا، قطعهم
اللنك اهو، بس انا ح انزل الخبر برضه:

أكد فاروق حسنى، وزير الثقافة المصرى، أنه لن يلجأ للاستقالة من منصبه كوزير للثقافة بعد خسارته فى الفوز بمنصب المدير العام لليونسكو، وقال حسنى فى حديث أجراه مصطفى بكرى، رئيس تحرير صحيفة الأسبوع، عقب وصول حسنى إلى القاهرة مساء اليوم، الأربعاء، إنه أجرى اتصالاً بالرئيس مبارك، وأن الرئيس قال له ألق بكل ما جرى من خلفك، واستمر فى أداء مهمتك كوزير للثقافة.
(ولا تزعل نفسك يا ضنايا، بيت ابوك مفتوح، وان ما شالكش اليونسكو نشيلك في حبابي عنين الشعب)


وأشار فاروق حسنى فى الحديث الذى تنشره صحيفة الأسبوع صباح الجمعة القادم إلى الدور الذى لعبته الولايات المتحدة الأمريكية بهدف إسقاطه، وقال إن المعركة كانت تدار ضدى من نيويورك.


واعتبر وزير الثقافة المصرى أن قضية تهويد القدس وموقفه منها كان أحد الأسباب التى دفعت إلى قيام اللوبى اليهودى بشن معركة إعلانية وسياسية كبرى ضد ترشيحه لهذا المنصب، وكشف حسنى النقاب عن أنه تلقى رسائل على إميله الخاص بعد إعلان فوز المرشحة البلغارية من إسرائيليين يعلنون فيها عن سعادتهم بعدم فوزه فى الانتخابات تحت زعم معاداته للسامية.
(وماله يا اخويا، يارب ياخويا يارب)


وقال فاروق حسنى إن ما جرى لن يثنينى عن موقفى الرافض للتطبيع ما لم يتحقق السلام فى الأراضى الفلسطينية المحتلة، وقال يكفى أن هذه الانتخابات قد عرت العالم أمام العالم، ذلك أن هناك من يصر على أن يبقى الجنوب خاضعاً بشكل دائم للشمال.
وانت كنت موجود لما اتعرى؟
خلاص، خلاص، ابننا وغلط وعرف غلطه، وراجع بيت ابوه، البيت بيته واحنا ضيوف، حمد الله ع السلامة يا ابني، خد دوش وارتاح لك شوية على ما الشعب يحضر لك لقمة تاكلها

22 comments:

Unknown said...

شوفى التعليق ده على الخبر الثانى اللى سبتلك لينكه فى البوست اللى فات


مييين قال
بواسطة: MORO

بتاريخ: الأربعاء، 23 سبتمبر 2009 -
21:44

نحن الشعب المصرى,نتقدم بأخلص أيات الشكر والعرفان للحسنيين ونتمنى منهم ان يتقدمان بأستقالتيهما,ونحن اذ نقبل استقالتهما,نتمنى من الله ان يهديهما الى شعب اخر,فأذا كانا نعمة نحن استكفينا واذا كانا نقمة نحن استوينا...

حـنــّا السكران said...

ملخّص الحديث أن فاروق حسني ينفي أي علاقة

لحماس و حزب الله و الإخوان المسلمين و الأخوة في الصومال ( و رهط من خزاعة و تميم ) بخسارته كرسي اليونيسكو .
و بحمّل المسئولية للشقيقة أمريكا .

Unknown said...

هههههههههههههههه

شعب حشاش ههههههههههههههه

Unknown said...

الله
وانت مالك فرحان كده يا عربي يا دسيسة
:)
امريكا وعوكل مالهمش الا بعض، ومصارين البطن بتتعارك
فلفللللللل شططططططة

هررررررررررررررر

آه وكفى said...

هههههههههههههههههههههههههه
والله حاجة تغيظ
اصل يابنتي اصلا اشاسا اليونيسكو دي بتاعة واحد اسمو الحاجة يونس وهو اللي عمل اليونيسكو و ده اللي فاروق حسني كان موانس معاه بس اتخانقوا مع بعض فقال بئى يوقعوا من الانتخابات
ويعود عليكم الايام بخير

والله انا فرحت قولت اخيرا بدل وزير سابق سابق هنسمع تاني في العصر الحديث المعاصر وزير مستقيل بس اتضح انها أوشاعات وكلام عيال

نفسي يشغلوني وزيرة ولو يوم واحد
مش عشان اي حاجة والله
بس عشان استقيل والكلمة دي ترجع تاني
:(

Unknown said...

اااااه
الحاج يونس وشركاه

الله يرحمه بقى، كانت كلمته احسن من اي عقد
من بعد ما ولاده مسكوا الوكالة والامور اتغيرت


الا انتوا مش بتصوتوا على الاستفتاء ليه؟

بُقُلظ said...

الاغلبية لحد دلوقت بيقولوا على أسئلتك هبلة لا مؤاخذة

:D

مصيرها الى زوال طبعا

Unknown said...

هم ستاشر واحد اللي صوتوا اصلا اغلبية ايه؟ الاغلبية ما ردوش على الاستفتاء اصلا

السبعة بتوع ان السؤال اهبل دول سبعة

فيه سبعة تانيين مش قابلين بوجود اسرائيل

اربعة منهم مستعدين للمواجهة
وتلاتة منهم مش قابلين بوجودها بس خايفين من مواجهتها

اتنين قابلين بوجودها بسبب اليأس اللي هم بيقولوا ح نخبط راسنا في الحيط

والسبعة اللي فاضلين مبسوطين من وجودها
اللي بيقولوا على السؤال اهبل

ما يبقوش اغلبية بقى
بس عددهم لا بأس به لحد دلوقت

غالبية اللي دخلوا ما صوتوش اصلا
ما صوتوش ليه
ح اعرف بعد ما يخلص معاد الاستفتاء
عشان ح اطلب منهم يقولوا ما صوتوش ليه
فيه اسباب كتير تخليهم ما يصوتوش
مثلا: مش ح تفرق كتير لو صوت
- لبعدين مدونتها تبقى متراقبة ويجيبوا الاي بي بتاعي
- ما شفتش الاستفاء اصلا
- وانا مالي؟
- مش عارف اجاوب

وقد يكون فيه حاجات تانية كتير

Unknown said...

من ساعة ما حطيت الاستفتاء لحد دلوقت دخل مية وتسعين واحد ما صوتش منهم الا ستاشر واحد

بُقُلظ said...

يا أنسة

مصوتوش

عشان ميعرفوش

انت مش عاملة اعلان

فاكرة استفتاء المعبر

صوت) عليه ناس ياما
:D

Unknown said...

انا صوتت بإيه الأسئلة الهابلة ديه
!!!
ده مش معناه انى معترض على بقية الإجابات و لا قابل بوجود اسرائيل
بس اعتقد السؤال اهبل انه يتسأل

اصل ده شىء بديهى انى اقول انى ضد اسرائيل

و مفيش سؤال فى الحقائق و البديهيات

Unknown said...

آنسة؟

اشوفك دكتور مهندس لواء يا رب

ما هو محطوط في بوز المدونة اهو

حاضر ح اعمل له اعلان

Unknown said...

بديهي؟

بديهي منين يا بدراوي؟

ليه يا حبيبي؟ انت ما سمعتش الناس اللي بتقول ان اسرائيل امر واقع وان من التخلف اننا نبقى ضدها؟

ما سمعتش الناس اللي بتقول ان اسرائيل دولة متحضرة ومتقدمة وديمقراطية واللي مش قابل بيها يشرب من البحر؟

ما سمعتش عن الناس العرب اللي بتتكلم عن حق اسرائيل في الوجود؟

انت مش معانا وللا ايه؟

Unknown said...

سمعت بس انا شايف اجابة واحدة بديهية
و اعتقد اللى بيقول غير كدة يبقى مخه ضارب

اه معلش نسيت اقول مع تسليمى انى ضد اسرائيل ده لا ينفى حقيقة انها دولة متقدمة و بس

متحضرة و ديمقراطية لأ

آه وكفى said...

ليه ياترى؟

Unknown said...

طب اهم بتوع الفريدم هاوس ابتدوا يهلوا اهو في التصويت
هههههههههههههههههه

اهلا وسهلا

انا مش عارفة اسرائيل دولة متقدمة ازاي وهي عايشة على المعونة زيها زينا بالظبط؟

Unknown said...

هى عارفة تستفيد بالمعونة و احنا لأ

متقدمة بمعونة و لا من غير

ده لا ينفى انها متقدمة
و ده للأسف

Unknown said...

طيب تصنيف اسرائيل انها دولة من العالم الاول؟

لا
مش متصنفة من العالم الاول ولا من العالم التاني ولا التالت

تصدق بقى؟

الدولة الوحيدة اللي مالهاش تصنيف

ليه يا ترى؟

ازاي دولة في الشرق الاوسط متصنفة رياضيا على انها من اوروبا
ومع ذلك هي مش عضوة في الاتحاد الاوروبي

شرق اوسطية
بس بيعرفوها انها دولة غربية

ثم هي متقدمة في صناعات ايه؟
name one
ما تقوليش السلاح النووي
عشان مش هي اللي عاملاه

وعاملة كده زي الواد الخـ... لما تتكلم عن وجودها يقولوا احنا شرق اوسطيين ولما تتكلم عن تسليحها تقول احنا ممثلين للحضارة الغربية

يعني هي شرق اوسطية وللا غربية؟

Unknown said...

الحقيقة انا مش بحب التصنيفات
لأن اسرائيل حالة استثنائية فى وضع استثنائى
و تحظى برعاية دولية من معظم الدول

لكن انا بتابع احصائيات البحث العلمى و تصنيف الجامعات و دايماً بيبقى كذا جامعة اسرائيلية موجودة فى القائمة

يمكن ده الشىء اللى العوام اللى زيى
شايف انه نقطة تؤكد تقدم اسرائيل

لو عندك اسباب مغايرة يبقى عندك حق
لأنى مش حعرف اجاريكى فى اطلاعك

Unknown said...

اطلاعي؟
:)
اطلاعي ده انت جبته منين؟ انا ولا مطلعة ولا نيلة

بس التقدم في البحث العلمي بسبب الرعايا الدولية اللي بتقول عليها ده مش تقدم

Mohamed said...

مش فاهم ازاى فاتك التعليق دة:

16
الى الاخونجية هنا العبوا غيرها

بواسطة: لا تستقيل يا فاروق حسنى
بتاريخ: الخميس، 24 سبتمبر 2009 - 00:05

وفقا لما كشفته وزارة الداخلية ان بعض خلايا الجماعه المحظورة وظيفتها اثارة الياس و الاحباط و الرد فى كافة المواقع الالكترونية للافتراء على الحكومة و الرئيس و تشويه صورة مصر و الايحاء بالفتنة الطائفية و التطاول على الاقباط فقد باتت الاعيب الاخوان مفضوحة فرجاء لو لعبتم دور فى الخفاء انتم و قطر و ايارن فى تفشيل فاروق حسنى فلا تسمحوا لنفسكم ان تتكلموا باسم الشعب المصرى فانتم قلة خونة لا تعبرون الا عن التطرف و الارهاب لكنكم للاسف نشيطين فى الشر فى كل المواقع و مفضوحين اوى.


متخفش يا مواطن مش هتهمك انك صاحب التعليق لانك بتعرف تكتب ايران صح ايه ايارن دى.

Kontiki said...

فارق حسنى يستقيل !! لما الهرم يتنقل مكانة:) فكرة الاستقالة دى اصلا غير واردة على ذهن اى وزير او مسئول ى مصر مهما لما القطر اتحرق ولما الاطفال تموت فى المستشفيات مش لاقيين العلاج وغيرة كتير بلاوى بلدنا كتير اوى ميش مسئول يستقيل يستقيل لية عشان اية ويسيب الوجاهة و القنزحة لمين السلطة فى مصر كرسى طالع له دراعات كتير زى الاخطبوط اول ما حد يقعد علية الدراعات تمسكة و ميسبوش ابدا
وبعدين اية اصلا قيمة وزير الثقافة ى مصر عشان يطمح انه يبقى مدير اليونسكو !! شايفة المهرجانات الشعبية يا نوارة ولا الفكر العام و القيم اللى سائدة المجتمع ولا المستوى الفنى الراقى للاعلام اللى خلى الناس تتعلم تفكر بحيادية ومنطقيةوايجابية وكل مواطن عندة مكتبة فى بيتة لو مش شايفة كل دة اكيد طبعا شايفة الجيل الجديد وهو مش عارف احنا بناخد اجازة 6 اكتوبر لية ولا متاكدين ثورة يوليو كانت سنة 75 ولا 56
وزير ثقافة قمة انتاجة و شغلة باين على الشعب اهو يبقى يطمح لية اصلا فى المنصب كان نفع بلدة قبل ما يفكر يتمدد للخارج زى اى كائن طفيلى وطبيعى جدا رد الفعل لازم نتمسك بنظرية المؤامرة وان الاعداء الشماليين مش عاوزنا نوصل و احنا ياعينى كاملين المعانى :)
انا بطالبة بحكم انه وزير ثقافة انه يتعرف اكتر على ثقافة الهاراكيرى اليابانية و ياعالم ربنا كبير :)