Saturday 12 September 2009

يا سلااام، هو اول مرة يقول كده؟

هي العربية ماعندهاش اخبار؟ ده كان فيه تمرد في ابو غريب ما يغطوه بدل الفراغ ده
هو بابا اول مرة في حياته يقول كده؟ ما كتبها في الفاجومي، وقالها عشرميت مرة قبل كده، في خليك بالبيت وفي كل حتة يستضيفوه فيها والجدل ده دار ستميت مرة، وهدى عبد الناصر كمان كانت لمحت للكلام ده، وعمرو الليثي سأل العطيفي عبر التليفون في الاتهامات دي، والعطيفي رد بعصبية شديدة، ثم هو ثابت بالوثائق والجرايد القديمة ان العطيفي تمت ادانته في قضية تخابر لصالح اسرائيل واتحكم عليه بالاعدام، خرج ازاي من مصر؟ وليه ما يقدرش يدخلها دلوقت؟ واسرائيل برضه لمحت انها قتلت عبد الناصر اكتر من مرة قبل كده
انا لا باقول اتقتل ولا ما اتقتلش لاني اصلا مش مهتمة اهو مات وخلاص، بس الجدل ده مش جديد، والكلام ده مش جديد بالمرة، ومش اول مرة بابا يقوله ومش هو لوحده اللي قاله، ايه الفراغ اللي العربية فيه ده؟ ورايحين يسألوا ناس، ورقية السادات بتفتي هي كمان، هي ايش عرفها، طب اللي كانوا عايشين اياميها يقدروا يردوا، اي عيل من عيال عبد الناصر يقدر يرد، اي حد من المعنيين يرد، العطيفي نفسه يرد، ده في حال ان المناقشة دي جديدة اصلا وللا مهمة من اساسه ما اتمضغت المناقشة دي واتاكلت ستميت مرة، انما رقية السادات يعني بتدلي بدلوها على اعتبار انها ايه؟ وبعدين امين هويدي بيقول انتوا بتتعاملوا مع اذكى جهاز مخابرات ومش ممكن واحد يبقى مقرب من الرئيس ويتمكن انه يقتله! انا على استعداد اسمع ردود على الكلام ده وما عنديش مشكلة في تفنيده لكن الكلام اللي بيقوله امين هويدي ده يفطس من الضحك، يعني مش ممكن واحد مقرب من الرئيس يقتله لكن ممكن واحد مقرب من الرئيس يدان في قضية تخابر مع اسرائيل بعد موت الرئيس اللي هو كان بيعالجه ويتحكم عليه بالاعدام ويعرف يهرب من السجن ويخرج برة مصر؟ طب كانوا فين كل ده؟ وسايبينه يقرب من الرئيس ليه؟ وللا سايبينه يقرب بس من غير بوس لو سمحت؟ ثم احنا عندنا رئيس اتقتل فعلا يعني، بتحصل، وده مالوش دعوة بكفاءة المخابرات، ما كندي اتقتل ورابين اتقتل والاتحاد السوفييتي وقع بشغل مخابرات، كل دول يعني ما كانش عندهم اجهزة مخابرات قوية؟ وفعلا لحد دلوقت موت عبد الناصر عليه علامة استفهام وحتى بنته شاكة، وهو كان معادي ناس كتير وكتير لهم مصلحة في موته، واول لما مات ناس كتير كانت بتقول انه مات مقتول، وانا مش باعترض على ارادة ربنا، بس عبد الناصر لو عاش سنتين كمان كان الاحوال ح تتغير غير كده خالص، بس خلاص ربنا عايز كده، ومش مهم، ح نعمل ايه يعني احنا دلوقت؟ مقتول مقتول، وللا مش مقتول مش مقتول، لو مقتول اللي قتله مش ح يتحاسب خلاص، ولو مش مقتول ده لا ح يزود ولا ح ينقص من كفاءة المخابرات المصرية لأن الحاجات دي بتحصل حتى مع اقوى اجهزة مخابرات في العالم
العربية بقى مهتمة بالموضوع كده ليه؟ واثار جدل ومش جدل، طب انا ما سمعتش حد بيتكلم في الموضوع ده غير العربية، وللا عشان قال انا مش عاجبني غير حسن نصر الله؟ هههههههههههه طب وحسن نصر الله ده ضرتهم يعني؟

20 comments:

Unknown said...

نوارة ماتزعليش منى..تعليق الفاجومى على موضوع عبدالناصر والسادات مايزعلنيش لأنه رأيه

لكن اللى ضايقنى بجد رأيه لما طونى خليفة سأله عن الصلاة والصوم..بجد مايصحش يقول كده
عيب جدا وحرام قوى

ألـــــــوان الحيــــــــاة said...

العربية تفتقد لأدنى المعايير المهنية عموما فى تغطيتها للأحداث

على الرغم من تحيز الجزيرة - كل وسائل الاعلام متحيزة_ الواضح الا انها توجه المشاهد باحترافية عالية

دون الفجاجة التى تميز العربية

و عموما هناك جزء مقدس للعربية مخصوص لحكاوى القهاوى و النميمة على خلق الله

شعبوية جدا

مواطن مصري said...

هو نصر الله الي ضرب الصواريخ ولا اسرائيل بدات يا نوارة شوفي اية الي بيحصل في جنوب لبنان بيقولو اسرائيل ضربت ب المدفعية

مواطن مصري said...

هي مالها العربية هي نقلت الكلام من طوني و مصراوي نقل الكلام


حتى طفاطيفو نقل نفس الكلام

سقطات أحمد فؤاد نجم .. لماذا ؟

http://www.tabkeet.com/2009/09/blog-post_6280.html

مواطن مصري said...

الوان على الاقل العربية مش بتشتم في خلق الله ز ي الجزيرة


الي بيزورها خبراء اسرائيلين

مش بيغطو احداث الزيارة

العربية في رأي أفضل قناة اخبارية

Unknown said...

m5m
والله هو بابا طيب قوي يا محمد لسبب بسيط انا لو حد سألني باصلي وللا مش باصلي مالوش عندي غير اني اخلع اللي في رجلي واديله بيه
مش عارفة هو بيرد ليه على الكلام ده اصلا
ثم انه بيصلي، ساعات ينسى عشان ما بقتش ذاكرته زي الاول
بس انا الحقيقة ما شفتش حد بيسأل الابنودي مثلا انت بتصلي وللا لا، ولا بيسأل حتى عمرو خالد انت بتصلي وللا لا
اشمعنى بابا اللي بيتسئل السؤال ده؟ وليه بيرد؟ ليه ما بيقلعش اللي في رجله ويديهم بيه؟
ثم انا ما شفتش حاجة حرام قالها يا محمد

alwaan
هو عشان جاب سيرة نصر الله
وانت عارف نصر الله متجوز امهم وام المصريين كمان

مواطن
ايه ده؟ اسرائيل ضربت؟

لا مش ممكن، خلاص؟ انا كنت متوقعة حرب بس مش قريبة كده

استنى افتح الجزيرة
استر يارب

ماتشغلش بالك باللي اتكتب هو عشان سيرة حسن نصر الله
هو اصله بقى هو اللي ترماي مش ام زينب

لو الكلام اللي بتقوله صح يبقى هو جاب سيرة نصر الله في توقيت غلط يا مواطن

مواطن مصري said...

http://www.alarabiya.net/articles/2009/09/11/84645.html

السنيورة يُدين القصف الإسرائيلي و"اليونيفل" ترسل مزيداً من القوات


قالت القوات الدولية في جنوب لبنان (اليونيفل) إنها أرسلت مزيداً من القوات إلى المناطق التي شهدت إطلاق صاروخين على بلدة نهاريا الاسرائيلية، وقبل ذلك كان الجيش الإسرائيلي قصف بالمدفعية محيط بلدة القليلة - المعلية جنوب لبنان بـ15 قذيفة مدفعية.


مش عارف شامم ريحة استفزاز في الموضوع

mido said...

مواطن مصرى

و احنا مالنا بلبنان يا اخى

مصر أولا

كفاية بقى حنقطع نفسنا عشانهم

Unknown said...

نوارة

أنا معاكى مليون فى المية انه ماكانش يرد.. ع الأقل كان أرحم من اللى قاله..وده يؤكد مايتردد ان كل ضيوف طونى مايقدروش يرفضوا الرد على أى سؤال والا خسروا ألاف الدولارات المتفق عليها

أما انه ماقالش حاجة حرام فأكيد خدتى بالك لما قال : الاسلام دين عظيم والنبى كويس بس مش معقول أفضل طول اليوم أعمل كده (وشاور بايديه حركات الصلاة)..دى حاجة وبعدين لما يقول أنا حشاش وهاتوا لى حشيش دلوقتى وأنا أشرب..مش ده حرام ؟

عموما عمنا أحمد حايفضل حبيبنا بس حاولى توشوشيه شوية بالذات قبل الانترفيوهات دى

....................

سيبك من كده..قريتى الخبر ده :

http://www.almesryoon.com/ShowDetails.asp?NewID=69766&Page=1

مواطن مصري said...

طبعا مصر اولا

و اخيرا

و هو انا قلت نروح نساندهم ولا اية و بعدين نصر الله هيتكلم ببكرة الساعة 10

مش يمكن يقول حاجة تمس مصر

Unknown said...

لا يا محمد لا
لالالالالالالالالالالالالا
لا مش معقول
ما تصدقش المصريون بتجيب اخبار مضروبة

شفت الخبر ده في اي حتة تانية؟ لو ما شفتوش في اي حتة تانية يبقى افتكاسة من افتكاسات المصريون

Unknown said...

هو الحقيقة لسه مانزلش على أى وكالة .. بس هما جايبين المصدر نقلا عن برنامج بيتذاع على اون تى فى وباعتبارى لست ساويرسيا لأتابع هذه القناة ماشفتش البرنامج

بس خللينا ورا الخبر لما نشوف ,انا شخصيا مش مستبعده لأن هانى عنان رجل أعمال وله مصالحه وكفاية مابقتش واجهة وبرستيج زى زمان فممكن يكون بيقضى عليها تماما

Unknown said...

نوارة ازيك
انا الحقيقة الفيديو اللى حاطه
طفاطيفو
معرفتش اسمعه كويس

بس عاوز اقول حاجة بخصوص عمنا نجم
او باباكى

انا سمعت فى برنامج او قريت فى جرنان
الحقيقة مش فاكر

ان سألوا فلان برده مش فاكر مين
بس انا متأكد جداً انى سمعت الكلام ده

المهم قالوله ايه رأيك فى الشاعر فؤاد نجم
و انه بيقول انا مش بحج عشان مختلف مع النظام السعودى

معلش اعذرينى الزهايمر شغال حلاوة معايا
فده كل اللى فاكره من الموضوع

Unknown said...

نعم؟

Unknown said...

نعم ؟

ديه ليا انا

معلش اعذرينى زى ما قولتلك
بس ححاول ادور على الموضوع و اجيبه

Unknown said...

أيوا الحوار ده
مع مصطفى فتحى
http://nohamy.blogspot.com/2009/08/blog-post_29.html

و ده السؤال الخاص بوالدك


هناك تصريح لأحمد فؤاد نجم أنه مسلم و يحب ربنا و لكنه لا يمارس الصلاة كثيرا ولا يرغب في الحج لأنه مختلف مع النظام السعودي

هو حر وأنا أحترم فيه انه لم يخاف من أفكاره و إعلانها بكل حرية وفي الأخر الله هو الذي يحاسب البشر

mido said...

نوارة

نعم ايه ؟

!

-----

يا جماعة بلاش موقع المصريون ده

انتم بتثقوا فى اخباره ازاى ده

!!!

Unknown said...

اه نعم دي ليك انت يا بدراوي

زي ما قلت قبل كده، هو غلطان اصلا انه بيسمح لحد يساله اسئلة زي دي انا شخصيا اللي يتكلم معايا في الحاجات دي مالوش عندي غير الجزمة

Kalimalhus said...

عنان ليس متحدثا رسميا بإسم كفاية ثم أنه قال فى حفل الإفطار الذى أقامه مؤخرا أن كفاية قد إنتهت كحركة و بالتالى لا يمكن القول أنه يتحدث عن توجهات حركة يرى أنه لم يعد لها وجود..

عنان أيضا رجل أعمل و رجال الأعمال فى النهاية لابد من أن يعودوا إلى مكانهم الطبيعى مع من يحمون مصالحهم.. من الممكن أن يطمحوا إلى مزيد من الديموقراطية و المهلبية و لكن بشرط ألا يكون هناك أى إحتمال لخلخلة الإستقرار الذى يحفظ إستثماراتهم فى أمان..

Unknown said...

طب خلاص يا نوارة
انا فهمت
و انا برده مالوش حد حاجة عندى
بس ابقى خللى الوالد
يصحى شوية
عشان كذا مرة مذيعين احرجوه بأسئلة حراقة فقط للإثارة