Friday 4 September 2009

ح الظابط طير الحالة السنتمنتالية المهترئة

استغفر الله العظيم من كل ذنب عظيم يا رب. ده انا لسة كنت باقول مجهودات السادة المدونين حسنت من اداء الداخلية ومباحث السجق المدني اتصلت بيا عشان تحقق في المقال اللي نشرته في الدستور. مافيش 24 ساعة من عودتي من التحقيق الاقيلكوا اهازيج عندنا في العمارات، اسمع يا سيدي:
العمارات عندنا ورا جامعة عين شمس، قدامها ممرين ووراها ممر. فيه تصليحات في احد الممرات، قام بعض السكان اقترح ان الناس تركن ورا العمارات عشان يوسعوا وبالتالي فهم محتاجين الممرات اللي ما بين العمارات عشان العربيات تعدي، كويس لحد كده؟ كويس قوي
الطبيعي ايه؟ الطبيعي انه يتم ابلاغ حراس العمارات وكل حارس يبلغ السكان، او يعلقوا ورقة على مدخل كل عمارة او في الاسانسيرات، او يعملوا ده كله مع بعضه، مش كده؟ وللا انا مجنونة وعندي هلاوس؟ لا الظاهر اني مجنونة وعندي هلاوس، عشان تفتق ذهن احد السكان اللي تصادف انه رائد شرطة انه يجيب من واحد صاحبه في المرور يافطة مرورية: ممنوع الانتظار! طبعا اي انسان عنده ذرة مخ ح يلاقي اشارة مرورية زي دي في مكان ماهواش شارع ح يعتبر ان فيه واحد بيهزر هزار سخيف، جات الناس ركنت. وجيت انا ركنت طبعا لان مافيش مكان في حتة تانية، انزل لك النهاردة يا استاذ الاقي على شباك العربية مخالفة مجهولة الهوية ملزوقة. ناديت على البواب قال لي: لا ما تقلقيش، هم عاملين كده بس
انا: يعني ايه يا سيد؟
سيد: ما الدكتور فلان في العمارة هنا والدكتور علان في عمارة خمسة برضه نزلوا لقوا الورقة دي ملزوقة بس عرفوا انها كده وكده لما لقوا مافيش رقم العربية ولا اسم امين الشرطة ولا حاجة، اللي بيعمل كده كابتن هاني
(ومخلي البوابين يقولوا له كابتن)
انا: مين كابتن هاني ده؟ وجاب الدفتر منين؟
سيد: ماهو ظابط، رائد، بيلزقها كده عشان الناس ما تركنش، وهو اللي جاب الاشارة المرورية دي وحطها بتاعة ممنوع الوقوف
انا: ظابط بوليس وبيستظرف على الناس كده؟ طيب يا سيد، انا ح اركن هنا، وقول له اني ح اركن هنا ولو نزلت بكرة ولقيت حاجة تانية ملزوقة ح اقدم فيه شكوى لوزارة الداخلية، ده اسمه سوء استغلال سلطات، الحكومة مدية له الدفتر ده مش عشان يلعب بيه، والدفتر ده انا وانت دافعين تمنه من الضرايب
سيد: هو مش في المرور
انا: وكمان مش في مرور؟ طب لو نزلت بكرة ولقيت الورقة دي ح ابلغ فيه هو وصاحبه اللي ادا له الدفتر ده
سيد: طب استنى اما نتأكد طيب عشان...
انا: زي ما باقول لك كده، لما تشوفه في صلاة الفجر وللا في اي داهية قول له اني ح اقدم بلاغ في وزارة الداخلية..سلام
------
هو رائد ده يطلع عنده كام سنة؟
طير لي الحالة السنتمنتالية المهترئة اللي كنت فيها 

12 comments:

mido said...

الداخلية قريت مقالك

:D

قالوا ايه ؟

mido said...

والدفتر ده انا وانت دافعين تمنه من الضرايب

:d :D

اكتبى مقال فى هانى

mido said...

الرائد بيحط نسر على الكتافة

:D

مواطن مصري said...

:D :D

Unknown said...

تعليق على البوست اللى فات

يارب ابقى حمار شغل
و الاقى شغل يليق بقيمتى
و احس انى بنى ادم

دعواتك

Unknown said...

ميدو
عملوا تحقيق وكتبت التفاصيل وبعتها للدستور وابراهيم منصور قال لي قبل ما ينشروها ح يقولوا لي

هههههههههههه
على فكرة موضوع الضرايب ده لازم نهتم بيه
زي ما بيطالبونا بالضرايب في الاعلانات لازم نطالب بالخدمات

بدراوي

اشتغل شغلانة مش بتحبها قوي لحد ما تلاقي شغلانة تحبها
امين المباحث في مباحث السجل المدني قال لي: اذا لم يكن ما تحب فاحب ما يكون
:)

مواطن مصري said...

نوارة سؤال هو لو شفت المتش هل كدة صيامي هيبقى مقبول ولا لا؟

:D

Unknown said...

لو زملكاوي يبقى مقبول ان شاء الله
:)
الزملكاوية مستضعفين

مش فاهمه said...

فكرت فى اسم يناسب اللى ناويه تعمليه مالقتش غير "الجريئه" مع الأعتذار لجريئة مصر الأولى اللى رافعه رأسنا فى قناة نايل سينما ايناس الدغيدى .......الله يحرقها

أحــوال الهـوي said...

ان شاء الله هيدفعك غرامه فوريه 150 ج التوقف في الممنوع

و 200 ج اعاقة سير
600 ج الاعتداء علي نسر اثناء تادية و ظيفته
تبقي كده الحسبه 3000 ج
اديله 4000ج و اخلصي

تحياتي

حسن على said...

احوال الهوى: اعجبنى اقتراحك جدا, واقترح انك تزود المبلغ الى خمس بواكى" مقفولين وتحدفهم فى وشة بأهمال, عشان تعقدة فى عيشتة وتذلة, ومرة على مرة , حايحرم يعمل كدة تانى

حسن على said...

مش عارف اية اللى فكرنى دلوقت انما,وبالنيابة عن مجامع اللغة العربية وكلية الفنون الجميلة نحيى الاستاذة نوارة على مجهودها الدئوب فى "النحت" بأبتكارها لكلمة "هطرسة" واقترح بالمرة ان تسمى الدولة حاليا بدولة "الهطارسة" قياسا على دولة البطالمة