Thursday 3 September 2009

الله، هم بتوع القومية الفرعونية بيحبوا اسرائيل ليه؟

كانت مناقشة غريبة قوي، مش اللي يعوز يعمل حاجة مش يعملها مظبوط وللا هي اي هطرسة؟ ازاي واحد نازل شتيمة في العرب، اللي المصريين مخلفينهم (ملحوظة: لان اليهود بيحسبوا النسب بالام فهم حاسبين الاسماعيليين مصريين عشان كده بيقولوا العرب مش ساميين) واللي من حوالي الفين سنة ابتدت هجراتهم لمصر الى الصعيد (انظر جمال حمدان) وفي نفس الوقت بيحب اسرائيل اللي الحقيقة، وكلمه لله والتاريخ، مافيش حد طلع عين العبرانيين وكفر سيئاتهم ومشاهم يكلموا نفسهم وهو اصلا اللي بدع استعبادهم غير المصريين، وبعد ما مصر بقت مسيحية المسيحيين المصريين طلعوا عين اليهود عشان ايام اضطهاد المسيحيين اليهود تعاونوا مع الوثنيين ضد المسيحيين (ههههههههههه اندال طول عمرهم) بس لما مصر بقت مسيحية المصريين انتقموا من اليهود شر انتقام، وماحدش انقذهم غير دخول العرب كالعادة، مش مفروض الفراعنة بيحبوا اليهود، المفروض ان العرب هم اللي بيحبوهم، والمفروض ان المصريين بيحبوا العرب وبيعتبروهم ولادهم، يبقى ازاي كل ما اقابل حد من بتوع القومية المصرية الاقيه بيحب اسرائيل وبيموت فيها وبيتعامل معاهم عيانا بيانا كده؟ بس عند في العرب؟ طب احنا ولاد عم واتخانقنا يا كتكوت ما تدخلش انت بقى يا خال خليك في فسيخك ونيلتك،
هييييه، كان فيه واحد جزائري زمان كان بيقول لبابا: الدنيا كلبة يا سي احمد، الدنيا كلبة يا سي احمد
اي والله، هو طبعا مما لا شك فيه مافيش عرقية اسمها المصريين، ولا عرقية اسمها اليهود، اليهود دول دين، وطبعا مما لا شك فيه ان العرب الاسماعيلية (اللي اصلا مش وارد يبقى فيهم نقاء عرقي لانهم هم اصلا مش عرق) نصهم عراقي (كلدان في جنوب العراق وسيدنا ابراهيم كلداني - التوضيح ده عشان ماليش مزاج للغباوة كفاية اللي سمعته) ونصهم من ناحية الام مصري، والعبرانيين ولاد عمهم والمصريين اخوالهم، ده انثروبولوجيا، وجمال حمدان اللي بيقول مش انا، والدي ان ايه كمان، انا بس باستعجب على الدنيا الكلبة، يعني ايام عز العرب كان كل واحد، حتى اللي مش عربي، يدعي انه عربي، حتى ابن خلدون كان بيقول انه عربي و"اعداءه" كانوا بيقولوا لا ده اسباني أصلي، وكان كل الناس بتتمحلس لهم زي ما بيتمحلسوا لامريكا كده، وعلى رأسهم اليهود و
it goes without saying
ان مصر عربية ومن زمان، ولما يا عيني المركب غرقت، اول اللي هربوا الفيران
بعد عشر قرون قاعدين ندلع في اليهود اول ما وقعنا خلعوا، وكل الناس بقى ابتدت تخلع مننا
دلوقت بقى، احنا في مرحلة اننا نخلع من نفسنا، دي بقى جديدة، يعني الدنيا دي لو مافيهاش مصريين، او لو كان المصريين انقرضوا قبل سيدنا اسماعيل ابو العرب، ما كانش النهاردة ح يبقى فيه حاجة اسمها عرب، وعشان كده اللغة العربية فيها كتير من اللغة المصرية، مش عشان "احنا مش بنتكلم عربي احنا بنتكلم مصري قديم" ده واحد غبي، يعني طلع ان العربي مش عربي، طلع مصري، والنكتة بقى اني قريت واحد كويتي بيقول: الكويتيين مش عرب
على فكرة
ولا سيدنا محمد ح يطلع عربي كمان؟ بالمرة بقى، فرعوني؟ او فينيقي؟
هييييييييييييييييييييه الدنيا كلبة يا سي احمد
طيب، قومية فرعونية يبقى الكام مهفوف اللي في البلد دي، ومنهم زاهي حواس اللي الظاهر اتلبس من كتر ما بينبش قبور الناس، يعملوا القومية الفرعونية صح بقى
 المفروض المؤمن بالقومية الفرعونية ده يطالب بالدهب اللي اخدوه العبرانيين، وبعدين يا يرجعوا عبيد تاني، يا يدفعوا بقى تمن صكوك العتق، والمفروض انهم يرفضوا وجود اسرائيل عشان اصلا فلسطين ايام الفراعنة كانت تبع المصريين، يعني يتحشروا كده ما بين الفلسطينيين والاسرائيليين ويقولوا لهم ولا بتاعتك ولا بتاعتك، دي بتاعتي انا وانتوا ح تشتغلوا عندي عبيد، ثم ان المصريين القدماء كانوا دايما بيساعدوا الكنعانيين ضد العبرانيين وبيقفوا جنبهم، مش بيجوعوهم، وكانوا على طول في حلف معاهم عند في العبرانيين، والكلام ده مكتوب في الكتاب المقدس لان المصريين القدماء من كتر غلهم ما استعنوش يكتبوا كلمة عن العبرانيين، والمفروض ان المصريين القدماء عمرهم ما عملوا اي معاهدة مع العبرانيين، والمفروض ان المصريين القدماء لا مؤمنين بارض موعد ولا مؤمنين باله الانبيا ده خالص، ومؤمنين ان كل حاجة بتاعتنا، السودان وليبيا وفلسطين واحيانا الحبشة، اه ما احنا كنا بلطجية برضه يعني، ايه سر بقى ان بتوع القومية الفرعونية بيجاهروا بالعمالة لاسرائيل في نهار رمضان؟ نوع من انواع التعاطف مع زميل في العنصرية والدماغ الوسخة اللي مليانة عناكب وعايشة في تاريخ غير مؤكد مات واندفن من الاف السنين؟ عشان احنا اصلنا ناقصين عته، عموما هي القومية الفرعونية دي اهبل حتى من الصهيونية، وطبيعي ان اللي يصدق فيها يبقى معوق
وياريت ماحدش فيهم يتناقش معايا تاني عشان انا مسكت لساني بالعافية حيث اني كنت في حالة سنتمنتالية مهترئة واهي طارت، ده ايه القرف ده في الايام المفترجة دي، في رمضان؟ في رمضان والشياطين محبوسة، عمالة وجهل وغباوة في ساعة واحدة؟ امال ح يعملوا ايه في العيد؟

85 comments:

Fady Wadie said...

صدقيني انا مش عارف مين اللي انت بتتكلمي عليهم دول
بس اكيد ان الكلام ده هبل لان مفيش حد مصري فرعوني نقي بعد كل الحضارات اللي عدت علينا

بس الاكيد اننا مش عرب علشان احنا حاميين و العرب ساميين

و الاكيد اكتر اني مش بقبل اليهود - مش عارف كده لله في لله - او للدقة مش بقبل الصهاينه اصل اليهوديه ديانة سماوية مينفعش اني اقول عليها حاجه
كمان كان في يهود مصريين فطبعا مينفعش اعاديهم

و بالنسبة للدهب بتاعنا فانا فعلا عاوزه لان ده اتسرق مننا زيه زي كل الاثار بتاعتنا اللي ماليا دول العالم كلها زي المسلة اللي قدام البيت الابيض - انا مليش دعوة انا عاوزها

هرطقة said...

أصلا أى كائن عنده أى بقايا من آدمية.. وبأى مرجعية.. يحب إسرائيل بتاع ايه
كيان عنصرى استعمارى مدمر
من نشأتها ولحد دلوقتى طايحة فى الجميع دبح وتدمير
واحتلال وسرقة
يعنى هنفترض جدلا ان العرب ولاد تييييت ويستاهلوا
هل ده مبرر لحب إسرائيل

انتى أصلا بتتكلمى مع الأشكال دى فى نهار رمضان بتاع ايه
عايزة عذر عشان تفطرى

amr imam said...

والله عندك حق دول مفروض اصلا ولا يترد عليهم ولا يتعملهم اى قيمة اعتبريهم هواءءءءءءءءءءءءءءءءءءءءءءءءءءءءءء
ولاد التيتتتتتتتتتتتتتتتتتتتتتتتتتت

بدل ما يعملة دعاية فى نهار رمضان لاسرائيل يفتكرة بحر البقر يفتكرة دير ياسين يفتكرة قانا يفتكرة علمائنا الى ماتة على ايديهم يفتكرة د يحى المشد
بلاش يفتكرة 20 مليون شاب مصرى بيعانة من الادمان وكمان بيعانة من عدم صلاحية العلاج وبردة اسرائيل هى السبب
بلاش كل دة الشخ القعيد ضربوة بصاروخ على كرسية وهو خارج الجامع الست موتوها هى وجانينها وهو لسة مشفش النور اية هما مبيحسوش معندهمش تميز بجد مواشىىىىىىىىىىىىىىىىىىىىىىىىىى
وعاملين دكاتراااة
معلش لو كلامى اتلخبط شوية اصيى استفزيت بجد من الكلام

مدونة النسر المصرى said...

شاركى معنا فى الحملة القومية لحماية مياه نهر النيل من غزو اسرائيل
فبعد ان بدأت اسرائيل تكثيف الاجتماع مع دول حوض النيل (رواندا -اثيوبيا -اوغندا -تنزانيا)
فى تل ابيب
وخروج زعماء الدول الى تل ابيب لتبادل الزيارة وبحث القضاء على مصر وتضييق الخناق عليها
ان الاوان لنا للدفاع عن هذا النيل وهذه الثروة العظيمة
لان القادم هو نكون اولا نكون
(حرب العطش)

دول حوض النيل تساومنا على ال55مليار متر مكعب من مياه النيل
ومصر تحتاج الى 88مليار متر مكعب من المياه عام 2025
واذا كان الرئيس وحاشيته الان مهتمين فقط بالتوريث وجمال مبارك
فعلينا نحن الشعب ان نحافظ على المياه
لانه بعد ذلك لن يكون الا جوع وجفاف وتدمير فشاركنا وكن اول من يبدأ

Anonymous said...

انا بقول يمكن السبب عقده ذنب وبيكفروا عن ظلمهم ليهم :)

Rateb said...

والله قلتى اللى فى نفسى
يعنى فيه حد عاقل يختار قوميةلا ليها عنده ادب ولا شعر ولا اخلاق ولا مبادئ ولا اى حاجة كده

واحد من الناس said...

"هم بتوع القومية الفرعونية بيحبوا اسرائيل ليه؟" يمكن عشان مش عايزين وجع دماغ؟ أصل الموضوع حيبقى أسهل بكتير إذا حبوا إسرائيل.. بس مش شايفة إن كلامك فيه تعميم؟

Unknown said...

المقص

العرب امهم مصرية، ودخول العرب مصر كان ضرورة وحتمي، وما كانش احتلال لان مصر هي اللي كانت تحت الاحتلال الروماني وفي الفترة دي بقى اولاد اسماعيل هم اللي كان عليهم تخليص المنطقة من النفوذ الاجنبية حصلت قبل كده مع كذا حد والمصريين كانوا من ضمنهم

والاكيد اننا عرب يا استاذ مقص واكتر من كده احنا اللي انتجنا العروبة اصلا والموضوع مالوش دعوة بساميين وحاميين دي كدبه يهودية الاعراق اختلطت
واننا خليط وما لناش عرق
ومصر دي خليط من ايام الفراعنة وفضلت تختلط


هرطقة
هههههههههههههههه

عمرو امام
لا ماهم بيقولوا ان الحروب دي سببها اننا اتورطنا في العرب :) مع ان يعني مافيش حاجة مكرهه اليهود في العرب غير ان امهم مصرية
احنا اصل العداوة من الاف السنين


النسر المصري

اشارك، بس قول لي اشارك ازاي، دي حاجة مهمة قوي يا ابني

بص انا الميل بتاعي في البروفايل
عندك بانرات عندك بوستات توضح
ارجوك
الموضوع ده مهم قوي وانا مستعدة اشارك باي طريقة


فتاة من الصعيد
ههههههههههههههههههه

راتب
اسم الله عليييييييك يعني لو حبينا نتكلم مصري قديم ح نقوله ازاي؟: عصفورة مقطف سنبتلين يا راتب؟
وعليكم العصفورتين ومقطفين وسنبتلين يا نوارة.. ازي مفتاح الحياة؟
وآمون زي البومة
وآمون؟ طب كويس، آخر مرة شفتك كان التعبان في السلطانية


يعني لا مؤمنين بالديانة الفرعونية القديمة، ولا بيتكلموا لغتها، ولا هو هو حتى الدي ان ايه، ولا حتى يعرفوا كانوا بيغنوا ازاي؟ طب على الاقل الصهاينة عندهم العبرية فضلت محفوظة في الكتاب المقدس وفضلوا يصلوا بيها، عندهم مزيكا متوارثينها، الديانة اللي بسببها خرجوا من مصر لسة مؤمنين بيها ودي اهم نقطة
اللغة والعقيدة من اهم الحاجات اللي بتعمل القوميات والثقافة
لكن لا عندنا لغتهم ولا مؤمنين بديانتهم طب على اي اساس احنا فراعنة يعني؟ عشان بناكل فول؟

واحد من الناس

اززززززيك وحشتني قوي انت فين يا عم

والله فيما يخص اسرائيل يا احمد لا مش باعمم خالص
لان اصلا اختراع القومية المصرية ده اختراع صهيوني
والصهاينة اخترعوه عشان يفصلوا المصريين ويعزلوهم
وهم اللي بييحيوا القوميات الصغيرة عشان ده بيخدم عليهم وعلى وجهة نظرهم

وكل ادبيات ال"متفرعنين" بتدافع عن اسرائيل

واحد من الناس said...

على فكرة أنا مش أحمد!! أنا واحد تاني من الناس.. بالنسبة للقومية الفرعونية أو بالأصح "المصرية" (اصلنا مش حنبني معابد بدل الجوامع والكنايس) أنا مش شايف فيها مشكلة في حد ذاتها لو حطينا موضوع اسرائيل ده على جنب

Unknown said...

هههههههههههههههه
موضوع اسرائيل ما يتحطش على جنب لانها هي مصدر الفكرة اصلا
ازاي مؤسس الفكرة يتحط على جنب؟
واذا حطينا موضوع اسرائيل على جنب تبقى دي قومية ميتة اصلا

Anonymous said...

هههههههههههههههه
في العيد يا ست نوارة هيخبزوا كحك يوم كيبور ويقولوا انه أصله فرعوني وكانوا بيطفحوه يوم الزينة..

طبعا العرب المستعربة (الاسماعيليين) هم فعلا متصلي النسب مع المصريين القدماء، بخلاف العرب البائدة اللي كانوا قبل كدة، عشان كدة أصبحت العربية هي اللسان، زي ما قال الرسول، مش عرق..

لكن يا حاجة أصلا اللي بيتكلموا دول حتى مفهمش صفات الفراعنة الوراثية عشان يفتحوا بقهم، دول عاملين زي اليهودية اللي بتبقى روسية شقرا وخضرا وبيضة، وتقول لك ساميّة، هأو، سامية اتجوزت..

واحد من الناس said...

ده إذا افترضنا إن فكرة القومية المصرية (مش الفرعونية) دي اختراع صهيوني.. اللي أعرفه إن جذورها من أيام ثورة 1919.. بالنسبة للقومية الفرعونية.. أنا شامم ريحة نظرية المؤامرة في كلامك بس يمكن إنتي عندك معلومات أكتر عن الموضوع.. أنا معلوماتي عن الجماعة دول محدودة

Unknown said...

احمد نصر
ههههههههههههههههههههه
ماهو الموكوس زاهي حواس قرر كده بقدرة قادر ان المصريين الموجودين دلوقت جيناتهم هي هي بتاعة المصريين اللي من سبعتلاف سنة

انت عارف فوق انه كذاب اشر
انت عارف الكلام ده معناه ايه؟ معناه ان احنا ما اطورناش
يعني ده معناه المصريين الموجودين دلوقت كان مفروض يموتوا من زمان قوي بسبب الامراض المتوارثة والاعاقات البدنية والذهنية الناتجة عن ان المصريين هم هم من سبعتلاف سنة ما اتغيروش

هو معتوه الراجل ده

Unknown said...

واحد من الناس

لا من قبل ثورة تسعتاشر يا واحد من الناس
من نفس التوقيت اللي نشطت فيه الصهيونية وحاجات تانية كتير

اوروبا كانت عايزة تفتت الخلافة العثمانية عشان تخلص منها فكانت انجلترا بتغلق كيانات جوة كيانات وقوميات جوة قوميات عشان تخلق عصبيات متضادة داخل المنطقة وده يسبب عدم استقرار ويهد الخلافة ويمكنهم من السيطرة على المنطقة

واوروبا هي اللي عملت الصهيونية، وهي اللي عملت حتى القومية العربية، والقومية المصرية، والكردية، والفينيقية وكل الهلوسات اللي احنا عايشين فيها دي عشان تضعفنا وتتمكن من السيطرة علينا

والصهيونية اتعملت، لو جاز التعبير، مغرز في اليهود، كانوا عايزين يخلصوا من اليهود ويستخدموهم عشان يعملوا لهم الشغل الوسخ في المنطقة وتفضل المنطقة مش مستقرة طول الوقت
ومش ح يسمحوا باستقرار المنطقة خصوصا بعد ما امريكا ورثت تركة الامبراطورية التي تغيب عنها الشمس
وامريكا دي اكبر تاجر سلاح في التاريخ
نسبة كبيرة جدا من دخلها معتمدة على السلاح
يعني لو بكرة الصبح الحروب وقفت ح يموتوا من الجوع
ده بجد
حتى هيئة المعونة الامريكية والجمعيات الخيرية الامريكية متمولة من صناعة السلاح هم نمرة واحد في العالم في تصنيع السلاح
والفرق ما بينهم وما بين تاني واحد، اظن روسيا مش متأكدة، فرق كبير قوي

المهم يعني مش دي القضية
القضية ان تخليق كيانات صغيرة وقوميات تافهة
- ما تآخذنيش القومية الفرعونية دي قومية تافهة، لا لها دين حي ولا لغة حية ولا اي اثر غير الفول والطعمية وشم النسيم -
ده بيساعد على السيطرة على المنطقة لانها ح تفضل عايشة في صراعات او على الاقل عزلة - زي عزلة مصر دلوقت - طول الوقت
وعزل سكان المنطقة عن بعض باحياء لغات ميتة زي العبرية والمصرية القديمة والسيريانية الخ ده برضه مش في صالحنا ده بيسهل السيطرة علينا
وكل واحد متقسم له دور مظبوط على مقاس قوميته التافهة
فلسطين اتحولت من خلال القومية اليهودية الى قاعدة عسكرية لهم
مصر تبقى لهم سوق
والعراق اهي راحت ستميت حتة وهي فيها قوميات كتير
والجزيرة العربية غرقانين في الصراعات المذهبية والسنة والشعية والكلام الفارغ ده
وال سعود بيقمعوا الشيعة بجنون والشيعة ساكنين في اكتر مناطق فيها بترول فمحتاجين امريكا - ال سعود يعني - عشان تحميهم من السكان
كده تمام

اذا ما كانش قومية هابلة تعزل الناس وتهطلهم وتفرج الناس عليهم وتجعلهم عبرة خلقه زينا كده

تبقى صراعات مذهبية زي الخليج

ويا سلام بقى
يا سلام على العراق اللي فيها كل حاجة نفسك فيها

وابسط حاجة بس عايزة اقولها لك

القومية المصرية اللي انت بتتكلم عنها دي ما تفرقش كتير عن الصهيونية

وعنصرية
وسواء انت مسلم وللا مسيحي العنصرية حرام
الا اذا كنت ح تعبد امون رع

أحــوال الهـوي said...

تسلم دماغك
تحياتي

Unknown said...

نوارة

هو انا كنت قريت فى كتاب شخصية مصر لجمال حمدان
ان اليهود او بنى اسرائيل بيقولوا انهم ابناء عمومة للمصريين
على اساس ان بنى اسرائيل من نسل اسحاق بن سيدنا ابراهيم
و المصريين على اساس انهم عرب من نسل سيدنا اسماعيل

او على ما فتكر لأنى مش متذكر قال ايه بالضبط
----
سؤال تانى

هو عمرو ( مواطن مصرى
(
ده وجوده مهم جداً فى البوست ده
هههههههههههههه

Unknown said...

بدراوي

ايوة جمال حمدان اثبت علميا ان المصريين الاكثر عروبة
اكتر حتى من السوريين ومن العراقيين
ومن الجزيرة العربية
وده نظرا للجينات والثقافة والهجرات

طبعا كل الناس بتحاول تهرب من العرب دلوقت لانهم بقوا شتيمة

بس - باد لاك - احنا مش ح نعرف نخلع
واي كلام من بتوع القومية المصرية دول جهل مطبق
الى جانب عمالة طبعا
قطعا
والموضوع مافيهوش نظرية مؤامرة ولا دياولو
ده كلامهم من بقهم والله
ما مصريين بقى ومخهم قفل زي الصعايدة بيخروا بكل حاجة

وملحوظة بس انثروبولوجية وجينية كمان
مسيحيين الصعيد عرب

وطبعا الهجرات العربية ما عملتش تغيير جذري في الجينات لانهم اصلا جايبين جيناتهم مننا

احوال الهوى

تسلم وتعيش

mido said...

تقرير: تمييز منهجي ضد الشيعة في السعودية

Unknown said...

حتى لو حاول المصريين التبرؤ من انهم عرب
على اساس ان البعض شايف ان مثلاً فتح مصر كان غزو مش فتح اسلامى او فتح عربى

على اساس ان فيه ناس شايفين العرب هماه بتوع الجزيرة الحفاة العراة و كذا و كذا

او حتى بيقولوا احنا مش عرب
و مش كل من تحدث اللغة العربية بقى عربى
على اساس ان فيه دووول بتتكلم لغات اخرى زى مثلاً اثيوبيا بيتكلموا فرنساوى
لكن ميقدروش يقولوا انهم فرنساوييين

و دول امريكا اللاتينية بعضها بيتكلم اسبانى او برتغالى
مش فاكر

بس مقالوش احنا اسبان او برتغاليين

بقول حتى لو كل ده
بس للأسف المصريين عرب بحكم التخلف اللى عايشين فيه دلوقتى
بحكم الديكتاتوريات اللى منتشرة فى كل حتة
بحكم النهب

Anonymous said...

كلامك عن تفتيت الكيانات الكبرى لقوميات تافهة صحيح 100%..انا كنت هاتكلم عنه لأني درسته في الجامعة بشكل أكاديمي وكانوا فعلا بيضربوا مثل باليهود والفراعنة كقوميات بائدة بيعاد إحياءها..بس انتي جبتي من الآخر :)

زاهي حواس بقى ممكن يقول لنا اذا كان باباه كائد تابية؟..وبعدها نبقى نتكلم في الجينات :))))

Unknown said...

ايه الكلام اللي بتقوله ده يا بدراوي
ده كلام عنصري وانهزامي وفوق ده كله مش علمي
ايه المقارنة ما بين دول افريقية بتتكلم فرنساوي وشعب انتج شعب تاني
والفتح الاسلامي كان غزو؟

طب
انا ما باثقش في الوكيبيديا ولا حتى في النصوص اللي بتنزل على النت لاني حصل معايا شخصيا ان كتب نازلة على مواقع بتتشال منها نصوص موجودة في اصول الكتب

ومش ح اقول لك اقرا فتح العرب لمصر اللي كاتبه باتلر وهو راجل مفتري وبيكره العرب

ولا ح اقول لك راجع تاني شخصية مصر
بس دي تفاصيل دخول العرب لمصر
http://ar.wikipedia.org/wiki/%D8%A7%D9%84%D9%81%D8%AA%D8%AD_%D8%A7%D9%84%D8%A5%D8%B3%D9%84%D8%A7%D9%85%D9%8A_%D9%84%D9%85%D8%B5%D8%B1

من على ويكيبيديا اللي كلكوا بقيتوا تاخدوا منها معلومات عشان مكسلين تقروا كتب

عمرو بن العاص ما دخلش بجيش، ده دخل بشلة وكل اللي سهلوا له الدخول كانوا مصريين وما لقاش اي مقاومة من المصريين كل المقاومة كانت من الرومان
والرومان لما لقوا المصريين بيتعاونوا مع العرب حبسوا مجموعة منهم في حصن بابليون وخزقوا عينيهم وقطعوا ايديهم ورجليهم والعرب فضلوا محاصرين الحصن عشان يخرجوا منه المصريين وعمرو بن العاص بعت لعمر يقول له: ابعت لي اربعتلاف جندي
اربعتلاف بس
قام عمر بعت له اربعة، اربع افراد، وقال له دول ناس مبروكة لو ربنا فتح على وشهم الحصن يبقى ربنا رايد لو ما فتحش خد بعضك وارجع

هو فيه احتلال في الدنيا بيعمل كده؟
امال لو ما كنتش عايش وعندك دش وشفت لما بلد بتحتل بلد بتعمل فيها ايه كنت قلت ايه؟
وارجو منك قراءة الدافع الاقتصادي للفتح العربي
اقراه كويس

الحاجة التانية، انا عايزة اعرف، ليه ماحدش بيقول على قوات الحلفاء اللي ساعدت فرنسا على الخلاص من النازي انها احتلت فرنسا؟

بلاش
ليه ماحدش قال على العرب اللي راحوا افغانستان عشان يحاربوا السوفييت انهم احتلال؟
ليه سبعتلاف مصري كانوا عايزين يسافروا العراق يحاربوا هناك
وليه ماحدش قال عليهم احتلال
ليه بقى المصريين ما قالوش انهم كانوا محتلين السودان؟ ومحتلين ليبيا؟ ومحتلين فلسطين؟ خاصة بقى ان الدول دي ما كانتش تحت احتلال اجنبي بيضطهدهم ويفقرهم

طب ليه كيلوباترا مش احتلال؟ على اي اساس معتبرها ملكة مصرية؟

ليه عيلة ساويرس مش عيلة محتلة؟ ماهم يونانيين بقى

يعني مافيش بينهم وبين المصريين رابطة الدم والتاريخ والجغرافيا اللي بتربط العرب بمصر

Kalimalhus said...

إنتى شاغلة نفسك بحكاية الدى إن إيه و العرق ليه؟؟

يعنى لو ثبت إننا من ناحية الدى إن إيه أقرب للهنود من العرب هنصحى الصبح نتكلم هندى أو هنحس فجأة إن ثقافتنا هندية؟

قصة الدى إن إيه هيه مجرد فضول علمى لا يمكن يكون له أثر على الهوية لأن الهوية بتعتمد على اللى الناس حاسة بيه..

على فكرة الدراسات الأخيرة بتقول إن المجموع الجينى للمصريين ما إتغيرش إلا بقدر ضئيل بس فى نفس الوقت هو أقرب ما يكون إلى المجموع الجينى لشعوب غرب آسيا و شمال أفريقيا يعنى لا مؤاخذة العرب .. و الحقيقة إن المكون الأساسى العرقى للمصريين هو مكون عربى من قبل الفراعنة و بالتالى إحنا عرب من الأصل و مازلنا عرب و ماكناش حاجة تانية فى يوم من الأيام..

بس أرجع و أقولك و لو كان كلام حمدان غلط و كلام حواس غلط و أى كلام تانى قابل إنه يكون غلط .. المهم هو إنى دلوقت بأكتب بلغة إسمها اللغة العربية و اللغة هى وعاء الثقافة و المكون الرئيسى ليها .. و ده بيخلينا عرب بغض النظر حتى عن عقيدتنا يعنى المسيحى المصرى ليس أقل عروبة من المسلم المصرى و مش لازم ننسى إن من موارنة لبنان و سريان سوريا و كلدان العراق كان و مازال ناس هم الأكثر إيمانا بالقومية العربية..

حكاية اللى بيحبوا إسرائيل ماليش نفس أعلق عليها لأنى بحاول أصون لسانى فى رمضان سواء فى نهاره أو مساه و دول ماينفعش الكلام عنهم بالأدب..

Unknown said...

اه ونسيت اقول لك

مافيش داعي للتهرب من المسئولية
لو فيه تخلف وقمع ده بسببنا كلنا وكلنا متحملين المسئولية دي

انا بقى جدي لامي ايراني واقدر اخلع منكوا وفقا للتقويم اليهودي
بس انا ما اخلعش من ناسي عشان عايزة اهرب من المسئولية
العرب كانوا قوة عظمى لمدة تسع قرون وبعد كده الاتراك قرنين والاتراك ما كانوش ح يبقوا قوة عظمى ولا كان ح يبقى فيه حاجة اسمها تركيا لولا فضل العرب عليهم

بس الدنيا كلبة
الدنيا كلبة

Unknown said...

احمد نصر
هههههههههههههه
زاهي حواس من مناخيره كده تقدر تعرف انه يهودي

Unknown said...

مهندس حر

هههههههههههههه
لا والله مش شاغلة نفسي بموضوع الدي ان ايه
لسبب بسيط، ان كل البشر لهم اصل واحد

بس العالم ياخويا واخداه شوطة الدي ان ايه وزاهي حواس عمال يقول تحليل جيناتنا زي تحليل الموميات

طب ومين قال له ان الموميات دي ما اختلطوش

اذا كانت نفرتيتي نفسها ما كانتش مصرية مية في المية
ح نجيب ابعد من كده ايه؟

مش ممكن يا مهندس الجينات مش بتتغير لان ده معناه فناء الناس اللي جيناتهم فضلت على حالها
او على الاقل انتشار الامراض والاعاقات الذهنية بينهم

هممممم
هي الاخرانية دي ممكن تؤكد اننا ما اطورناش جينيا
ههههههههههههههههههههه

Unknown said...

اه ونسيت اقول لك

انا ح ادور لك على التحليل اللي عمله علماء اسبان واسرائيل حاربته

ولقوا في جينات المصريين والسنغال جينات يابانية

!!!!!!!!!!!!!!!!!!!!!!!!!!!!

mido said...

فى ناس على تويتر بيشتموكى و بيقولوا عليكى مخرفة

عشان بتقولى ان المصريين عرب

:S :S

مواطن مصري said...

مش كل الي بيحبو القومية الفرعونية يبقو مع اسرائيل انا مع الهوية المصرية الفرعونية انها ترجع تاني

هتلر بالرغم انو مجرم بس رجع للهوية الالمانية و المانية احتلت اوبا كلها

اتاتورك رجع للهوية التركية و فصل الدين عن الدولة و تركيا تقدمت دلوقتي و أنقذها من الضياع


يا نوارة زاهي حواس دة راجل محترم و ووطن و لية انجازات كثير جدا في مجال الاثار


و فين العرب دلوقتي بس فالحين في الوهابية و الصراع الشيعي السني

و نشر النقاب و تصدير التطرف و الي يقولك دة حمساوي ودة فتحاوي

احنا عندنا حضارة المفروض نفتخر بيها و نرجعلها عشان نتقدم

كل العالم بيتمنى يكون عندة ربع الي عندنا

Unknown said...

مين دول؟
لو عندهم تصحيح علمي يقولوا لي
انا مش جايبة الكلام ده من دماغي
انا جايباه من جمال حمدان اذا كانوا مش بيعتبروا التوراة مصدر علمي
هي مش مصدر علمي اكيد بس ممكن تبقى مصدر تاريخي
لو فيه نظرية تانية لواحد بيفهم احسن من جمال حمدان يقولوا

مين دول؟

مواطن مصري said...

و بعدين احنا مصرين افارقة

في الاساس

و ان حكاية اسرائيل بتقول انهم احفاد الفراعنة دة كذب عشان يقنعو العالم انهم هم الي بنو الاهرامات

mido said...

بدون ذكر أسماء

:D

مواطن مصري said...

نفسي واحد زي اتاتورك كدة يكون عندنا

عشان يعرف العرب مين هما المصرين


العرب بس فرحانين ب البترول بتاعهم و بكرة هيخلص

mido said...

مواطن مصرى


فرحان علشان المانيا أحتلت اوروبا كلها ؟

و نسيت ان المانيا اتضربت لحد متسوت بالارض

و هتلر انتحر

مساء الفل

Unknown said...

بدون ذكر اسماء ليه انا بصيت على التويتر ما لقتش حد بيحاول يناقشني في الموضوع ده

الا اذا كان قصدك ناس جرابيع
طب وانت بتهتم بكلام الجرابيع ليه؟ اذا كان حد مخه نضيف اتكلم معاه حد مخه في زبالة اجيب له خنازير تاكل مخه

مواطن

اسرائيل قالوا انهم احفاد الفراعنة؟

:)
يا حبيبي
امال انا باقول ايه من الصبح
ماحدش بيكره الفراعنة قد اليهود

Unknown said...

على فكرة انا نسيت اوضح
ان الكلام ده مش كلامى
انا بحب العب لعبة محامى الشيطان
و حبيت اوضح اللى بيتقال

لكن انا متفق مع كلامك كله
انا بس بحب اوضح ان مينفعش نتبرء من فكرة اننا عرب لو مش بالتاريخ و بالعرق
يبقى على الأقل بالظروف المنيلة اللى احنا عايشينيها

و انا لما قولت البعض بيقول ده غزو مش فتح اسلامى كنت بقول الكلام اللى بيتقال فقط
لكن انا مش مؤمن بكدة طبعاً

mido said...

مواطن مصرى

متزعلش بقى

من ايران لأنها عايزه تزود نفوذها فى المنطقة

و تحتل الدول العربية فكريا و اقتصاديا ... الخ

مخلاص بقى ما انت بتدافع عن هتلر

mido said...

بالظبط

ناس جرابيع

انا مش مهتم على العموم

Unknown said...

مواطن يا حبيبي

ايه مقومات القومية دي؟
كل قومية لها ثقافة: يعني لغة، وعقيدة، ولبس، وعادات خاصة ما يشاركهمش فيها اي حد

طيب اللغة، ح نعمل ايه في اللغة يا مواطن؟ ح نعمل زي شادية وفريد الاطرش في فيلم انت حبيبي: باحبك يا مقطف؟

بالنوسبة للعقيدة: ح نعبد آمون رع؟ وللا اتون اله الشمس؟

بالنسبة للبس
همممم
لو ترضى تلبس جيبة وشبشب وباروكة قماش وتمشي كده في الشارع
ياللا
بالشفا
العادات الخاصة: احنا ما بقاش لنا عادات خاصة خلاص، يا اما اللي حوالينا اخدوها منا زي الاربعين والخمسان (طبعا احنا كل عادتنا مياتم) يا اما احنا اخدناها من غيرنا زي كل عادات الصعيد
وفقا لجمال حمدان تاني، كل عادات عائلات الصعيد المسيحية قبل المسلمة عادات عربية لانهم اصلا قبائل عربية
وهاجروا قبل عمرو بن العاص ما يتولد بست قرون
مافيش الا شم النسيم

فيه قومية في الدنيا تقوم على شم النسيم؟

Anonymous said...

طيب، مواطن مصري بيقول: لازم نرجع لحضارة الفراعنة عشان نتقدم..

س سؤال: نرجع لإيه بالضبط؟
وإيه هي مقومات التقدم اللي سابهالنا الفراعنة؟
إيه هي مبادئ التقدم اللي ممكن نستفيد منها وخلفهالنا الفراعنة؟

علوم العرب ولغتهم ومبادئهم كلها عندنا وعارفين ازاي نتقدم بيها..
إيه بقى علوم الفراعنة اللي ممكن تفيدنا النهاردة؟

أكتر من كدة..مين قال لك..ان واحد من عصرنا عنده استعداد يتحكم بأسلوب الفراعنة؟
أو عنده استعداد يعيش في حضارة على نهج الفراعنة؟
حضارة الفراعنة اللي طحنت الفرد لحساب الملك؟..وكلنا عارفين اللي حصل لأجدادنا في بناء الاهرامات عشان جلالته يموت فيها!!

إذا كنا معجبين بعظمة الهرم وروعة الهندسة فيه، فده مش معناه اننا على استعداد النهاردة نعيش مسخرين لأي إنجاز مهما عظم ونضحي بذواتنا وحياتنا في سبيله ما دام العائد بتاعه راجع لفرد في النهاية..

حضارة الفراعنة لم تضع الإنسان على رأس أولوياتها، عشان كدة باقولها وأنا مصري وأبويا مصري: لا يشرفني ولا أتمنى نرجع لعصر الفراعنة وربنا ما يعيدهم تاني (وإن كنا عايشين فعلا في عصر الفراعنة الجدد النهاردة)

ده طبعا على فرض انه عندنا من آثار الفراعنة ما يكفي لإحياء حضارتهم..

Unknown said...

بدراوي

انت برج الحوت وللا ايه؟
:)


ميدو
ونفسه في اتاتورك
نفسه في واحد مجنون تاني، تاني، ما كفناش كل المجانين اللي جم في حياتنا

Unknown said...

لأ هو بيقول ايه
؟!!

هههههههه
لأ انا برج العقرب
و فى مذاهب أخرى
برج الجدى
ههههههههههههه

اصل جاى للدنيا شهرين بدرى
هههههههههه
ففيه ميلاد حقيقى و ميلادى مش حقيقى
هههههههههههههههههه

Anonymous said...

على فكرة انتي عمالة تقولي الأفكار نفسها معايا فنفس الوقت..أمشي انا بقى :))))

Unknown said...

احمد نصر

لا والنبي ما تمشيش
انت كلامك اعقل والنبي خليك

Unknown said...

بدراوي

لا المفروض انك تبع الميلاد الحقيقي مش اللي مكتوب

انت برج العقرب؟

يا مامي
:))

مواطن مصري said...

احمد نصر علوم الفراعنة شوف الفراعنة بنو ازاي الاهرمات الي العالم كلة بينظر ليها نظرة اعجاب قبل حضارة العرب

من لا يحترم حضارتة ميستحقش انة يكون انسان مصري

مش عاجبك الفراعنة و حضارتهم روح اقعد في دول البترو ريال


لو على احيائها احنا ممكن نحيها من تاني نتعلم التاريخ من تاني و يتعلم في المدارس و اللغة تتعلم في المدارس من تاني

ما الايرانين بيتكلمو فارسي


يبقى احنا نتعلم لغتنا القديمة

زي ما بنتعلم الانجليزي و الفرنساوي

Unknown said...

مواطن

اموت واشوفك بالجيبة والشبشب والباروكة والكحل ابو شرطة

مواطن مصري said...

الانسان الي مش بيحترم حضارة اجدادة ممكن يبقى عميل و جاسوس ل أي دولة تانية

عشان معندهوش انتماء للبلد الي هو عايش فيها

مواطن مصري said...

مش مهم اللبس المهم ان احنا نتمسك بحضارتنا و نحترم اجدادتنا المصرين و نتعلم منهم ازاي سبقو العالم

و بنو حضارة عظيمة

مواطن مصري said...

و نعمل زي ما اتاتورك عمل في تركيا

Unknown said...

مش مهم ازاي؟
الجلابية لبس عربي
اياك تلبسها
والبنطلون والقميص لبس اوروبي
ما تلبسوش برضه
خصوصا بقى ان الاوروبيين ابعد كتير من المصريين

ومدام انت فرعوني عايز ليه ديمقراطية؟
المفروض تبقى عايز حكم شمولي حيث ان الملك يبقى هو ابن الاله
وليه عايز اقتصاد ليبرالي؟

الاقتصادي المصري القديم شمولي وقائم على الانتاج مش الاستثمارات والدولة هي اللي كانت متحكمة في ادوات الانتاج
يعني عايز دولة شيوعية ملكية حضرتك

ده غير الجيبة والشبشب والكحل
امال زعلان من عبد الناصر ليه؟

Unknown said...

واللغة الميتة دي ح تتكلمها ازاي؟

زي شادية وفريد الاطرش مش كده؟

Unknown said...

انا قولت مفيش الا مواطن مصرى
عشان تتعلمى منه حب مصر
هههههههههههه

عمرو انا بحترمه بس اما بيتكلم عن مصر
بيفتح على الرابع
و يخون الكل
---------
اللى بقول لحضرتك ايه يا استاذة نوارة

معلش هو احنا ليه دوناً عن شعوب الأرض اللى مش عارفين لينا لبس يحدد هويتنا

يعنى الخليج كله عارف لبسة شكله ايه

انما احنا لبسنا بقى اوروبى فى اوروبى
بس تيجى تلاقى حد يقولك الشادور الإيرانى ينتهك هوية مصرية الثقافية

انما اللبس اللى مش حشمة اللى كله اوروبى لا ينتهك هوية مصر

ياريت تقوليلى المصرى اللى حيفضل مصرى
النيل رواه و المخبر فى قفاه
على رأى عم جلال عامر

ايه كينونة لبسة
شكل اللبس ايه

عشان انا عايز اعود الى هاميس

و اشم عبق التاريخ

انا بتكلم جد

TAFATEFO said...

عروبة مصر من قبائلها

مواطن مصري said...

مش هتتكلمي عن حرب ايران في اليمن و دعمها للحوثين ولا اية

:D

Unknown said...

الجغرافي الروماني/اليوناني الأصل سترابو في كتاباته وصف مدن جنوب مصر بأنها نصف عربية و الكلام ده قبل ميلاد المسيح بعشرات السنين

حركة الشعوب قديما كانت دائمة بحثا عن الموارد عشان كده كثير من القبائل العربية ـ اللي هم موجودين من قبل سيدنا اسماعيل بالمناسبة ـ انتقلوا من شبه الجزيرة لمناطق تانية مثل بلاد الشام و العراق و مصر و شمال و شرق افريقيا و ده مثبت في كتابات مؤرخين و جغرافيين مثل سترابو و هيرودتس في وصفهم لشعوب الكنعانيين و الفينيقيين و غيرهم

زي بالضبط ما الأوروبيين الأريين هم أصلا شعوب هاجرت من الهند و فارس...الحضارات القديمة كلها قامت على هجرة الشعوب و اختلاط الشعوب و بالتالي الثقافات ببعض. عشان كده فكرة القوميات و الأعراق كلام ساذج و من غير معنى

mido said...

المشكلة انك بتسألى


مواطن مصرى

أسألة منطقية جدا

و هو مش بيرد

:D

Fatma said...

ههههههههههههههههههههههههههه

في حاجات مميتة من الضحك في المناقشة دي
مميتة بجد

طيب واحدة زيي تروح فين ولا تيجي منين
لو كل واحد هيمسك في اصله ويقول قوميتي ومافرط فيهش
اعمل انا ايه بقى في الورطة دي شوري عليا يا نوارة

مواطن

الايرانيين بيتكلموا فارسي واحنا نروح نتعلم لغتنا
حاضر موافقة
قولي اروح اتعلمها فين وعلى ايد مين وبتتنطق ازاي ارجوك

يا مواطن حبك واحترامك لتاريخنا زمان مالوش اي علاقة باتخاذ التاريخ اللي مافضلش منه غير اهرامات قومية
قوميتك حاليا يا قومية وطنية يعني مصري يا قومية دينية يا قومية اساسها القارة يعني افريقي يا قومية اساسها اللغة يعني عربية يا اي حاجة تانية بس
المهم انها تبقى حاجة ليها وجود مش خيال سرمدي

overdose said...

نوارة معلش استغلال هو جمال حمدان اتكلم عن دا فين في شخصية مصر ولا ف ايه ممكن لينك بلييز
:)

Anonymous said...

مممممممم
انا رحت التراويح ورجعت لقيت مواطن مصري راكب الحصان وعمال يوزع صكوك غفران ويقول مين اللي (يستحق) يبقى مصري ومين لا يستحق..

لا كدة بجد أنا بدأت اصدق انه مؤهل بجدارة يبقى فرعون جديد :))

عموما خلينا نتفق على حاجة..
القوميات والأعراق والجنسيات كلها، مفهاش يستحق ولا يستحق..
أنا لما أكون مصري فده مجرد أمر واقع، ملكش انك تغيره أو تنكره أو تعتبر انه حد يستحقه أو لا يستحقه، ببساطة الاستحقاق ده بنقوله في حاجة بتمنح بعد اختبارات الكفاءة، وده مش حقيقي في حالة الجنسية أو القومية، الجنسية والقومية صفة بنقولها كأمر واقع..

زي ما بنقول في العرق، فلان زنجي..
مفيش واحد يستحق يبقى زنجي وواحد لا يستحق..هو اتولد زنجي..هو كدة ربنا خلقه كدة..

فلان مغولي..ربنا خلقه كدة..
مغولي ياباني..مغولي صيني..مفهاش استحقاق دي، متعبش فيها ولا ذاكر لها مثلا..

نفس الكلام فلان مصري، أبوه مصري وامه مصرية، اتولد واتسجل في السجل المدني المصري أو في سفارة مصرية..

انزل من عالحصان بقى لأني مصري بأمر ربنا..هتعترض على قضاء ربنا كمان؟

حاجة كمان، الجنسية مفهاش فخر، مينفعش حد يفخر لمجرد انه أمريكي،أو لمجرد انه مصري، أو لمجرد انه طلع لقي نفسه ياباني..كدة ببساطة لأنه زي ما اتفقنا قبل كدة، ده أمر الله وقضاؤه وقدره..واحد اتولد ولقي نفسه (ولا حول ولا قوة إلا بالله) روسي!!
إيه الفخر فيها دي؟!
واحد اتولد ولقي نفسه (وإنا لله وإنا إليه راجعون) صيني..
إيه الانجاز في كدة؟!!

بمعنى آخر انه الجنسية في حد ذاتها مش فخر لحد، انما الفخر بيكون بالانجازات الجماعية والفردية، والصفات الايجابية في الفرد والجماعة..

وطبعا المصري اللي بيحب بلده هو اللي بيدور لها على المبادئ والقيم الأرقى..وبيحاول يبني حضارتها وانجازاتها على أسس سليمة..أكيد مش أسس الفراعنة أبدا ولا فكرتهم عن العالم :)))

مواطن مصري said...

نوارة لو عاوزة تعرفي عن الحوثين عامل بوست عن احداث صعدة

Unknown said...

بدراوي
انت بتسأل على اللبس المصري
اللبس المصري كتير والاكل المصري كتير مش هاميس عودي يا هاميس بس

بالعكس انا فخورة جدا ان مصر من اكتر الدول تطورا واستيعابا للثقافات المختلفة
ايوة
حتى في عز وكستها دي، شوف، مصر ما مرش عليها الوكسة دي غير في عهد الرومان وفي اخر عهد المماليك قبل ما الترك يدخلوا
بس حتى في الاوقات دي البلد دي مفتوحة وبتقبل كل الثقافات وفي نفس الوقت لها شخصية مميزة

وبتوع القومية المصرية عايزين يلبسوا مصر والمصريين توب مش مصري خالص
وهو توب العنصرية
اهي دي الحاجة اللي ما بنعرفش نعملها باتقان احنا بنحب نتعلم من الوافد ودي مش حاجة وحشة ولا عبودية زي ماهم مفهيمنا لاننا برضه لينا شخصيتنا

مصر حلوة، حتى في اوحش اوقاتها حلوة ودمها خفيف وطيبة
وذكية


الكتاب اللي جايبة طفاطيفو مهم قوي قوي قوي قوي يا شباب

ياريت نقراه كلنا
شكرا يا مصطفى


دينا

تمام ابصم بالعشرة على الكلام ده
التعصب للعرقية اصلا حرام
الرسول قال على العصبية: دعوها فانها منتنة او كما قال

والمفروض ان المسيحية كمان ديانة عالمية مش بتبص للاعراق والاجناس

ده، لا مؤاخذة، شغل يهود، انا ما عنديش اي كراهية حقيقية في داخلي لليهود ولا احتقار ليهم
بني ادمين يعني زي اي بني ادمين فيهم الكويس وفيهم الوحش
لكن انا باتكلم على الثقافة، هم اللي ثقافتهم مبنية على مين ابن مين ومين من قبيلة ايه وسبطه ايه ويفضلوا يتتبعوا الانساب لحد سيدنا ابراهيم

وانا ما عنديش شوفونية ولا حاجة، بس المصريين ممكن يبقى فيهم عيوب كتير غير انهم يقعدوا يدوروا في مين جده منين والا ما كانتش البلد دي عاشت
ده كل اللي يعدي على مصر عشان يشتري حاجة يخلف له عيل

ده الفرنساويين عدوا على المنصورة قلبوها كلها ناس شقر وعينيهم زرقا
قال ويقول لك جيناتنا ما اتغيرتش قال

احنا لينا طبع معروف ان اللي بييجي يقعد عندنا بيبقى مننا والا بقى سعاد حسني مش مصرية، وانور وجدي مش مصري، وفؤاد حداد مش مصري ونجاة مش مصرية وعائشة التيمورية مش مصرية حتى نفرتيتي مش مصرية؟

لا مصريين، وطول عمرنا اللي بيقول على نفسه مصري بيبقى مصري

ميدو
هههههههههههههه

فنون
والله يا اوختشي احنا لو اتبعنا الاسلوب ده يبقى نص البلد ح تنطرد برة مش انت بس

اوفردوز

اه على شخصية مصر
اظن ان كل اجزاء شخصية مصر موجودة على
4shared

احمد نصر
درر يا احمد
والله العظيم درر
ربنا يحميك

مواطن
انا مالي ومال الحوثيين
انت مش قلت مالناش دعوة بالعرب؟
وبعدين الناس عندها قومية بتدافع عنها
هههههههههه

مواطن مصري said...

انا بتكلم على المد الايراني في اليمن عشان ناخد حذرنا منة


لو على اللبس يبقى بقى نمنع النقاب في مصر و الجلباب


:D :D

Unknown said...

والبنطلونات الجينز والبدل كمان يا مواطن

نمشي كلنا، ستات ورجالة، لابسين جيبة، بس، اخضر وباستك من فوق
وباروكة قماش في الحر ده

وصندل بصباع

ايه رأيك؟

مواطن مصري said...

هههههههه انا ممكن البس جلباب متصمم على الطراز الفرعوني

:D

Kalimalhus said...

على فكرة فيه لخبطة عجيبة حاصلة تقريبا من كل اللى بيعلقوا!!

أولا.. موضوع الهوية مايتاخدش قفش كده و نقعد نجيبله كلام من ورا لقدام و من قدام لورا.. هوية أى إنسان فرد مركبة من عناصر مختلفة و بدرجات مختلفة .. و على المستوى المجرد لما نتكلم عن هوية عربية و هوية مصرية و غيره فيه برضه علاقات تداخل أو إحتواء..

ثانيا.. مجرد إننا نصدق إن فيه تناقض بين العروبة و المصرية و بعدين نقعد نتخانق على إحنا عرب و ألا مصريين فده كلام فارغ..

صحيح فيه هوية عربية و فيه هوية مصرية لكن العلاقة بينهم مش تناقضية .. يعنى كل مصرى هو عربى باللسان و الثقافة و لكن يختلف المصرى عن التونسى زى ما يختلف النوبى عن الإسكندرانى و العرايشى عن المنوفى.. يعنى ينفع نقول إن المنوفيه قومية مستقلة و إن المنايفة إحتلوا مصر من سنة 1970؟؟.. للأسف ما ينفعش ههههههه

ثالثا.. فكرة القومية دى متعلقة بالدولة القومية .. يعنى فكرة إن كل جماعة من البشر ليهم هوية مشتركة من حقهم تقرير مصيرهم و إختيار إن يكون ليهم دولة خاصة بيهم .. و هى فكرة إخترعها ملوك عصر النهضة فى أوروبا لتدعيم سلطتهم فى مواجهة السادة الإقطاعيين و الكنيسة .. و تطورت لغاية ما تبلورت دمويا فى الحرب العالمية الأولى اللى الحاج ويلسون بعدها إتكلم عن حق تقرير المصير للشعوب و إحنا صدقنا و أكلنا الشاورمة..

مفيش أى حاجة تقول إن الدولة القومية هى الشكل الطبيعى الوحيد للدولة الحديثة لأن التطبيق الدقيق للمقولة دى هيوصل بينا لتجرئة المجزأ إلى مالا نهاية أو إلى قمع الأقليات للحفاظ على وحدة الكيان السياسى القائم على الهوية الواحدة .. و كل عمليات التصفية العرقية و الدينية طالعة من الحكاية دى..

رابعا .. حكاية الهوية الفرعونية دى كلام فارغ بخلاف إنه خاطئ من حيث المبدأ .. إحنا بس دونا عن العالم بنتكلم عن المصريين القدماء بوصف الفراعنة و بنقول الحضارة الفرعونية لأن كلمة فرعون تطلق فقط على الحاكم و ليس الشعب .. الفراعنة هم ملوك مصر القديمة أما الشعب و الحضارة فهما مصريان..

الثقافة المصرية القديمة مثل غيرها تفاعلت مع كل ما وفد عليها و تطورت إلى ثقافة قبطية فى عهد الرومان ثم تفاعلت بشكل إندماجى مع الثقافة الإسلامية اللى كانت العامل الأساسى لتكوين حاجة إسمها الثقافة العربية فى جزء ضخم من العالم الإسلامى..

حقيقة إن بعض المسلمين تبنوا اللسان العربى و أسهموا فى بناء شخصية عربية متميزة عن غيرها فى حين ظل مسلمون آخرون متمسكين بلغاتهم الأصلية بيشير إلى أن هناك تداخل شعبى أكبر و وجود أصول مشتركة سهلت هذه العملية.. يعنى بلا شك إن العرب الذين هاجروا إلى مصر بعد الإسلام و ربما قبله قد إمتزجوا بالمصريين و تقبل المصريون اللغة العربية (على المستوى الشعبى) بسهولة و ده دليل إن المصريين لغة و ثقافة كانوا أساسا قريبين إلى العرب .. و إلا فلماذا لم يحدث نفس الشيئ مع الثقافة اليونانية مع العلم بأن الثقافة الخاصة بالنخبة الحاكمة فى شرق البحر المتوسط و مصر كانت يونانية منذ غزو الإسكندر و حتى الفتح العربى و الدولة البيزنطية نفسها كانت ثقافتها و لغتها يونانية مش لاتينية.. و رغم إن أعداد ضخمة من اليونان عاشوا فى مصر و فى كل حتة منها من الإسكندرية لجزيرة فيلة..

أخيرا .. إحنا عرب لأن كلنا ماعدا قلة لا يعول عليها حاسين إننا عرب عارفين إننا عرب .. و الهوية لا تتحدد إلا بما يعرف به الإنسان نفسه و أنا شخصيا مصرى عربى مسلم .. و جارى جرجس مصرى عربى مسيحى و لو سافرنا أمريكا هيحجزونا فى الجمارك إحنا الإتنين ساعتين و يمكن يومين عشان عرب إرهابيين..

مواطن مصري said...

بأمر المحافظ: ممنوع دخول السيدات ديوان عام محافظة أسيوط .. بدون محرم !

أسيوط ـ عبده حسانين : قرر اللواء نبيل العزبي محافظ أسيوط، حظر دخول النساء لمبني ديوان عام المحافظة بدون محرم . اشترط المحافظ وجود محرم مع المرأة التي تدخل المحافظة، أو تستعين بأحد موظفي الديوان المقربين لهن . وكان أعضاء مجلسي الشعب والشوري التابعون للحزب الوطني قد اتهموا اللواء سامي فودة سكرتير عام المحافظة، بارتكاب أعمال منافية للآداب تسئ لسمعة المحافظة وقياداتها . تقدم نبيل العزبي بمذكرة الي محمد عبدالسلام المحجوب وزير التنمية المحلية يطلب نقل السكرتير العام، واستجاب » المحجوب « ، وأصدر قراراً بنقله لديوان عام وزارة التنمية المحلية . تدخل أحمد عز أمين تنظيم الحزب الوطني في القضية وطالب المحافظ باحترام النواب وعدم التعرض بالإساءة لهم أو الخوض في سمعتهم حتي لا يفقدوا مصداقيتهم في الشارع . وتصاعد الموقف، وأصدر المحافظ أوامره بمنع دخول السيدات بدون » محرم « لديوان عام المحافظة . وصف بعض أعضاء المجلس الشعبي المحلي قرار المحافظ بأنه يتناقض مع السياسة العامة للدولة، والتي طلبت توسيع مشاركة المرأة .
http://www.alwafd.org/details.aspx?nid=30682

اخرى المد الوهابي

Unknown said...

مهندس حر

اظن كل اللي علقوا متفقين معاك ما عدا مواطن مصري


بس احنا ينفع نقول ان فيه احتلال منوفي لمصر حصل سنة سبعين
وانا من انصار جدار الفصل العنصري لاحاطة المنوفية واعادة منايفة تمانية واربعين المنتشرين في انحاء الجمهورية من حيث اتوا

مواطن مصري said...

انا معاكي في موضوع الاحتلال المنوفي و نشر المذهب المنوفى و لازمن نقف ضد هذا المد

:D

حسن على said...

ومصر دي خليط من ايام الفراعنة وفضلت تختلط" بأختصار شديد: مصر دى هى المزرعة الوحيدة وسط بلاد صحراوية قاحلة من "الاطلسى الى الفارسى"...وموجات الجفاف اللى عدت كتيرة جدا الشىء اللى ادى الى هجرات جماعية من دول الجوار هربا من الفحط والجفاف,دة بقى غير هجرات الحروب والاتطهاد الدينى,دةغير هجرات مسلمى جزر البحر الابيض بعد طردهم منها, لأ والمغاربة ,يروحوا الحج بالجمل ويرجعوا يقطنوا اسكندرية اللى جميع "شيوخها وعلماء الدين فيها مغاربة, من الاخر موقعنا الجغرافى والنيل طببببعا جعل كل الاعراق تتنادى للهجرة لمصر وقت الازمات .... اضرب دة فى ست سبع تلاف سنة النتيجة اختلاط كبير فى الاغراق

TAFATEFO said...

مش عارف مهندس حر يقصد ده أو لا

بس أعتقد ان مفيش أهبل من الإنفصاليين غير القومجية

العروبة .. لا القومية

احنا مصريين .. وعرب

أيوه مصر عربية .. واحنا عرب .. ولا تعارض بين مصريتنا وعروبتنا

يعني لما يطلع واحد أهبل وعبيط ومتخلف يقول حاجه زي "الوحدة الجماهيرية الفورية بين سورية والعراق وليبيا والجزائر والأردن" يبقى ده أهبل وأسخف وأعبط من الإنفصاليين

اتحاد عربي .. ده ما يجب أن نحلم به .. اتحاد عربي قائم على المصلحة وتقويه العروبة (الجنس) واللغة والدين والثقافة والتاريخ .. إذا كانت دول مثل دول الإتحاد الأوروبي التي لا يجمعها إلا المصلحة اتحدت رغم ما بينها من عداوة ودم وخلافات تاريخية واختلاف جنس ولغة ودين

لكن جمعتهم المصلحة التي تفرقنا

اتحاد لا وحدة .. لما يؤمن العرب بالمصلحة المشتركة يبقى في كلام عن الإتحاد .. وأي كلام عن الوحدة ده تخريف

احساس لسه حى said...

انا شايف انها مبقتش تفرق ودلوقتى من مهم اصلك ايه المهم انت دلوقتى ايه

والباسبور اهم من اى عرق

والامريكانى اللى ملهوش اصل يكسب

Unknown said...

لا ده مش هبل
اوروبا عملت كده ومختلفين في اللغة وتاريخهم مع بعض وحش
المفروض نعمل تكتل زي ما كل الناس بتعمل تكتلات
وكل دولة متميزة في حاجة ترمي بياضها ويعملوا نهضة مع بعض، اقتصادية وصناعية
بدل ماهم بيشتغلوا رقاصين مع بعض زي طقم الرقاصين اللي كان بيرقص ورا ليلى مراد وكارم محمود
ماهم كده كده مصيرهم واحد مش محتاجين يعملوا وحدة
محتاجين يعملوا اتحاد زي الاتحاد الاوروبي كده

Unknown said...

وده مش هبل ولا حاجة
الهبل هو اللي احنا فيه

Unknown said...

مصطفى انا مش فاهمة تعليقك
عمالة اقراه كذا مرة ومش فاهماه

النص الاولاني مختلف عن النص التاني
هو ايه الفرق ما بين اللي بيقول الاتحاد بين مصر وسوريا وليبيا والاردن
وما بين اتحاد عربي زي الاتحاد الاوروبي؟

TAFATEFO said...

أيوه زي الفل

اتحاد مش وحدة .. الجمهورية العربية الموحدة .. ده (في رأيي) هبل

احنا كلنا عرب .. وما قد يجمعنا هو اتحاد -ليس وحدة- قائم على المصلحة الملحة (لكن في العالم العربي العظيم مصلحة الشعوب حاجه ومصلحة الأنظمة حاجه تانيه) ويقوي هذا الإتحاد الهوية العروبية (العروبة) والثقافة واللغة والدين

الإتحاد الأوروبي هو اتحاد بين دول مختلفة اللغة والدين والجنس والتاريخ والثقافة وتجمعهم المصلحة .. المصلحة الإقتصادية والعسكرية

الانفصاللين عايزين الناس تتنصل من هويتها العروبية لصالح الهوية الوطنية

والقومجية عايزين الناس تتنصل من هويتها الوطنية لصالح الهوية العروبية

ومفيش أهبل من دول غير دوكهومه

Unknown said...

اااااااه
فهمتك

بس اللي انت خايف منه، او بسبب خبراتنا السيئة اتعقدنا منه، ده لا وحدة ولا اتحاد

الوحدة موجودة بالفعل
دي بتبقى ما بين الشعوب، لما بنتكلم مع بعض ونفهم بعض، لما عاداتنا شبه بعض، لما حتى دماغنا الوسخة شبه بعض :) لما آلاف الشباب يروحوا بهبلهم نقابة المحامين قال ايه عشان عايزين يطوعوا في العراق وفي الاخر يتقبض على كل الاسماء اللي اتقدمت

لما احنا بلدنا مش محتلة بس حاسين بالاهانة كأن بلدنا هي اللي محتلة

ده موجود كله غصب عنا حتى اللي انت مسميهم الانفصاليين - عاجبني قوي الاسم ده - يعني مثلا مواطن مصري مهتم باللي بيحصل في اليمن وفي فلسطين وفي العراق
غصب عنه
ده تحت الجلد

بس اللي انت بتتكلم عليه حصل وفشل قبل كده وده مش وحدة ولا اتحاد
ده له علاقة بالانظمة العربية

هو احنا عاملين وحدة مع انظمتنا عشان هم اللي يوحدونا؟

Kalimalhus said...

مصطفى..

بغض النظر عن توصيف أى حد بالهبل لأن دى مسألة نسبية بس مش عارف إن كنت مدرك تطور الإتحاد الأوروبى و الإتجاه اللى رايحين فيه لأنه فى النهاية هيوصل لشيئ يشبه الإتحاد الكونفدرالى و يمكن يتحول تحت ظروف و ضغوط معينة لإتحاد فيدرالى..

أغلب الأوروبيين حاليا بيفكروا فى نفسهم على إنهم "أوروبيين" قبل جنسياتهم القطرية .. اللى مختلف فى الموضوع ده هو البريطانيين لأسباب كتيرة بعضها تاريخى و بعضها إقتصادى لأن إقتصاد بريطانيا ممكن يكون مرتبط بأمريكا أكتر من أوروبا..

التفريق بين الوحدة و الإتحاد ينفع بس بالصورة اللى نوارة وضحتها .. خلاف كده يبقى نوع من النقاش العقيم زى كده لما إختلفوا فى مجمع اللغة العربية على الفرق بين الزمن و الزمان..

فكرتك عن الإتحاد هى فكرة تلاقى المصالح و بصراحة أنا بيجيلى مغص من أى حاجة بتقوم على مبدأ المصلحة و على مبدأ إعتبار تبادل المصلحة هو الأساس المنطقى الوحيد للعلاقة التعاقدية بين الإنسان و المجتمع و المجتمع و الدولة و بين الدول و بعضها.. الفكرة التعاقدية دى هى فى الواقع غطاء لمجتمعات قائمة على صراع المصالح و فى حقيقتها هى سوق ضخمة للرقيق بيتم فيها تداول البشر فى هيئة حافظات مصالح و تأثير زى محافظ الأوراق المالية كده..

TAFATEFO said...

وجهات نظر

TAFATEFO said...

سلامة حضرتك من المغص يا باشمهندس

حرتك مش شايف فرق بين الوحدة والإتحاد .. طيب احنا هنكمل كلام من بعد تويتر

منوفي مش هوية .. منوفي يعني اتولد في المنوفية .. شبراوي يعني اتولد في شبرا في القاهرة .. وده مصري

ومصر عربية .. بالتالي عربي

شايف ان في فرق بين هويتي الوطنية كمصري وبين عروبتي

شايف دي هوية ودي هوية

TAFATEFO said...

اتحاد قائم على المصلحة .. ليه اتعلمت الجامعة العربية .. لتبني مواقف عربية خارجية موحدة ولفض النزاعات بين العرب

لو كان هناك اتحاد عربي يتضمن سياسة خارجية موحدة وقوة فض منازعات واتفاقية دفاع مشترك .. واتحاد اقتصادي

هل ده يكون اتحاد أقوى ويحقق مصلحة أكبر

ولا وحدة قائمة على اللغة .. بلد للي بيتكلموا عربي؟؟

مواطن مصري said...

نوارررررررررررة سمعتي اغنية منير


بحبك بحبك يا مصر

http://www.youtube.com/watch?v=jUcoxq60XPQ


هي كلمات بتاعت عم احمد فؤاد نجم بس بيقولو اتعدلت صح يا نوارة؟

Anonymous said...

بصي الفقير ح اقول لك كلمة ابرك من عشرة
فايدة القومية الفرعونية من ساعة ما اخترعوها -من ساعة ما اللطفيين والسيسيين والحواسيين والنوحيين -محمد نوح فرعوني برضه على فكرة- والنطيحة والمتردية وما أكل السبع ما تبنوها، فايدتها الوحيدة في الحياة هي اخراج مصر من الصراع العربي الصهيوني ببدعتين اساسيتين:
-على فرض ان مصر برغم من عدم ترقيها لأكثر من الطور الشعوبي في العصر الفرعوني وبالرغم من ال100 سنة التي ظل النيل يفيض ويغيض فيها فلا يجد من يزرع به -راجعي ابن أياس- الا أنها لا زالت فرعونية ولا تزال "الأمة المصرية" شعبا فرعونيا واحدا -مهو مفيش بقه فرق بين الشعب والأمة- وعلى ذلك مفيش مشكلة ابدا في ان بني اسرائيل الذين هم أنقى عرقيا منا يكونوا محتفظين بقوميتهم الصهيونية برضه لتشابه الظروف...
-السبب الثاني هو اخراج مصر من الصراع "العربي الصهيوني" عربي صهيوني بقه احنا مالنا..؟ انت عربي يا عم..؟ حد الله.. صهيوني يا كابتن..؟ يا ريت والله بس ما ينفعش.. وعلى ذلك بقه احنا احرار، نمضي ما نمضيش، نقفل المعبر أو ما نفتحوش، نتحالف مع اسرائيل ضد اي حد بما تقتضيه مصالحنا.. الخ..!
كما تنبأ عصمت سيف الدولة في "هذه المعاهدة" و "عن العروبة والإسلام" الأخير ده بقه.. مش شفتي "هذه المعاهدة"؟ ده أروع :)
ورمضان كريم

Anonymous said...

مممم.. بعد ما قريت التعليقات وتكملتًا -تكملة يعتي - على الكلام السابق.. ان القومية العربية ما اخترعتش أصلا لأنها كانت موجودة.. ده من ناحية، من ناحية تانية القومية العربية هي النفي الوحيد للقومية الصهيونية...
نفس الكتابين اللي فاتوا :)

أبو أمك said...

القومية الفرعونية دي غير القرية الفرعونية اللي في الجيزة ؟

سكوت هنصوت said...

نوارة

انا ما كنتش هقول غير الكلمتين الي قولتيهم عن القوميات....كل الكلام الي انت قلتيه, حقيقي وموثق وموجود و مراجعة في كتاب مصر في عيون كتابها المعاصرين لمحمد جبريل, تصوروا إن مكتبة الأسرة هي الي طابعاه و بتبيعه بكلام فاضي...انا ذهلت لما قرأت إزاي انجلترا وفرنسا سعوا لدعم العميل الملك حسين الأب في الأردن عشان يثير النعرات الطائفية والعرقية في الدول الإسلامية التابعة للخلافة العثمانية زمان وإزاي بسذاجة منقطعة النظير اندمجت الشعوب الإسلامية في نعرة العروبة و ثورات الشعوب الحرة وهاتك يا حركات انفصالية...والنتيجة اننا بقينا دويلات وشراذم...كلنا بنتكلم لغة واحدة وبنعبد رب واحد ولينا ماضي واحد وتاريخ واحد...و بيتحكم فينا شوية حوش وزبالة الشعوب...وموليين علينا شوية خونة وعملا في صورة ملوك وحكام...لو انصفنا لوضعناهم في مزابل الأمم...تحياتي لقلمك المبدع..ويا ريت كل قراءك يقرأو كتاب مصر في عيون كتابها المعاصريين..لإنه اكتر من رائع