Wednesday 2 September 2009

خالتي بتسلم عليكي

ايه مسلسلات رمضان دي؟ دي حلوة قوي، ايه اللي نور الشريف عامله ده؟ ما تخافوش؟ طب انا من منظره كده خفت وما رضتش اتفرج على المسلسل، ليلى مراد جايبين واحدة كانت بتمثل دور فرخة في كارتون اطفال، هي اسم الله عليها بتتكلم كده يا حبة عين امها؟ إيوإيوإيوإيو.. وفيه كوميديان تاني بيمثل دور عبد الوهاب، هم كان قصدهم يهزروا؟ المفروض كانوا يقولوا انهم بيضاحكوا معانا عشان انا كنت داخلة جد، بس والله قضيت وقت لطيف، وفيه بقى مسلسل خالتي بتسلم عليكي، بس خالتي دي كانت المخابرات المصرية، المخابرات الاسرائيلي اسمها العمة، هم دايما السلايف كده بينهم حزازات، انا لو من المخابرات المصرية ارفع قضية على المسلسل ده، بقى فيه جهاز مخابرات في الدينا كل ادوات الاستخبارات بتاعته هي البص من الشباك؟ ده تشويش لسمعة مصر، حتى ما عملوش زي خالتي بتسلم عليكي وحطوا اجهزة تصنت من اللي بيبقى شبه الحلق الحمصة ده، طول الحلقات خمس ظباط منهم رتبة كبيرة مدلدلين نفسهم من الشباك وعمالين يبصوا على الرايح والجاي ولا قهوة المعاشات، واللي بيراقب نبيل ماشي وراه بالموتوسيكل، اتفضلوا اهو، المتوسيكل اهو، قدامي اهو، ماشيين ورا فريدريك
ده غير بقى الالمان اللي بيتكلموا انجليزي، حتى نشرة الاخبار بتاعتهم في التلفزيون الالماني كلها بالانجليزي من اللي هو: زااات كونفيليكيت بيتوين ايجيبيت آآآآند اسرائيل ايدنديييد ويييززززز وووووور، وجايبين واحد من سرس الليان يقول النشرة الالماني في تلفزيون تليمصر. وللا الالمان بقى، الالمان، هير الواد لاللو من شبرا، فراو خالتي مسألش من مصر عتيقة، انا مبسوطة قوي بالمسلسل ده، طب لو المخابرات المصرية قلبها ابيض وبتسيب المسلسلات تلعب، طب بالنوسبة للموساد، قابلين الاهانة دي؟ قابلين انهم ماشيين والمخابرات المصري وراهم بالفيسبا وهم مش شايفينها؟ وقابلين ان رانيا مش عارفة ايه دي مرات محمد مختار تبقى عميلة موساد؟ والموساد مأجرة شقق اودة وصالة وعفشة مية في الكيتكات بتاعة المانيا تقريبا؟ وبيتفاهموا مع بعض كده، بصوا، كده، يعني بيغمزوا لبعض ويعضوا على شفتهم كده
انا طول عمري باحب الكارتون
الا سؤال، هو محمد مختار كل ما يتجوز واحدة لازم تمثل جاسوسية فاشلة؟ بيقنعهم بالحكاية دي ازاي؟
استنوا استنوا استنوا، دلوقت حاليا، شلومو بيقول لعزرا: اعتبر نبيل "الفدائي" اللي فجر فيك القنبلة سنة تمانية واربعين
اي والله، فيه اسرائيلي بيقول علينا فدائيين، الناس مهما كان مقدرينا، وزي ما انتوا عارفين، كل رجالتهم لابسين نضارات مدورة وخنف وكل نسوانهم مزز، طب ماهو البطن اللي تجيب ست مزة ماهي اكيد ح تجيب راجل مز واللي تجيب نضارة مدورة ح تجيبها في الناحيتين، وباسم ياخور قد الشحط وبيقول: ماما جولدا، ح نشوف بقى ماما جولدا الحلقة الجاية، مش عارفة ح تبقى جايبة معاها بقلظ العبري وللا لا
انا مش عارفة المسلسل ده مش عاجب ماما ليه، بتقول لي انها مش بتحب الهبل،  
مش بتحب الهبل ليه؟ هو ايه الوحش في الهبل؟ وبانبسط وباضحك، مش احسن من الست كوم اللي كلها دمها بق واستظراف مافيش بعده استظراف، حرب الجواسيس مافيهاش حد بيستظرف، هم ظراف، ومش عارفين انهم ظراف كمان
حتى المسلسلات التاريخي مش موجودة، مسكنا السوريين ونزلنا عليهم قر ونبر لحد ما اتوكسوا جنبنا، على الله بتوع الريادة المصرية يبقوا مبسوطين كده، ماهو احنا يا نفشل الناس كلها معانا يا ننكد عليهم، مش بعيد ينطسوا في مخهم هم راخرين ويعملوا مسلسل جاسوسية يطلعوا المخابرات بتراقب اسرائيل من خرم الباب
خلوا بالكوا بقى، اي واحد لازق شنب عيرة باين وراكب فيسبا يبقى مخابرات مصري واي واحد ماشي قدامه ومش سامع صوت الفيسبا يبقى مخابرات اسرائيلي
اقتلوه بقى 

35 comments:

سكوت هنصوت said...

نوارة...

فاتك بقى نور الشريف وهو عامل عمرو بن العاص في رجل الاقدار

بقى عمرو بن العاص...قاعد مع مراته وعيالة قعدة صفا وتجلي...و بيكلم ولاده عن عقوبة الإحتكار (واخدالي بالك انت) يقوم يقوله ايه.."تلك هي فلسفة الإسلام" على إعتبار ان المسلمين الأوائل كانوا مثلا بيقروا لفولتير...

ولا عبد الله بن عمرو...الي المفروض انه اعبد من ابيه...وافقه منه...طالع عامل دقن دوجلاس اخر حلاوة....

وطبعا المسلمين كالعادة لابسين ابيض في ابيض...وعاملين شنبات ولحى دوجلاس...كلهم بلا إستثناء...والكفار هما الي لحاهم على السنة طويلة ومتسوية...ولابسين الوان...

اه ولا المشهد الخالد الي عمرو بن العاص بيقول فيه لصاحبة ( قبل الإسلام) كنا صفرا لا نساوي شئ....المخرج معندوش خبر إن العدد صفر ما كانش لسه اخترع...

هنقول ايه بس....انا الأول كنت متحمسة اشوف عمرو بن العاص لما يمثلة نور الشريف....لقيته مسلسل أهبل عاملة ناس هما كمان هبل...الي كتب الحوار ما فكرش لحظة كده في الكلام الي بيتقال...عمال يكلمنا عن الفلسفة والمنطق والعرب لسة ما عرفتهمش...

ولا النجاشي بقى...اااااوووه...حدوته..النجاشي الي هو ملك سايب الي وراه والي قدامه وقاعد لابس ملاية ملفوفة زي ما يكون مقبوض عليه في قضية اداب....وقاعد بس يدعو للإسلام...لا وإيه...وعمال يكلم عمرو بن العاص...انه اسلم تسلم يا عمرو...و ما توجعش قلبك يا حبيبي...

وكله كوم والفرخة الي جايبنها تمثل ليلى مراد....بصراحة حاجة اخر عيا...

انا مش عارفة المخرج لما شاف اول حلقة صورها ازاي قدر يكمل ويعرض المسلسل في رمضان كمان......


بس ما قلتليش رأيك ايه في إبن الأرندلي؟؟؟

د. محمد رضا said...

هههههههههههههههههههههههههه

مش معقوله يا بنتي انتي

بجد انا بقالي 10 ايام بقلب في القنوات

ايه الغم دا

يعني هنضيع رمضان وكمان من غير مسلسلات عدله

حسبنا الله

البنفسج الحزين said...

ههههههههه
والله ضحكتيني يا نوارة وخصوصا الحته بتاعه:
(اي واحد لازق شنب عيرة باين وراكب فيسبا يبقى مخابرات مصري واي واحد ماشي قدامه ومش سامع صوت الفيسبا يبقى مخابرات اسرائيلي)مع اني مش باتابع المسلسل ده.

Fatma said...

المسلسلات السنة دي كتير منها ابتدى كويس واتحول بقدرة قادر لممل

ماتخافوش ماشوفتوش ولا ناوية نور الشريف دا تقيل على قلبي اوي

ليلى مراد خساااااااااااااارة لان المسلسل قبل ما ليلى تكبر كان حلو اوي اوي اوي بجد

جايبنلنا واحدة شادية تعمل نفسها ليلى مراد ليه؟ دي شبه شادية وبتتكلم زي شادية لما تحب تستهبل في ادوار معينة
مالهاش اي علاقة بليلى مراد خالص

حرب الجواسيس صعب صعب صعب مسلسلات المخابرات دي قذرة انا اساسا اعدت النظر في رأفت الهجان مع انها كانت عاجباني لما كنت عيلة صغيرة انما لما شوفتها تاني اتشليت برده
ومن كام سنة كان في العميل 1001 بتاعت الاخ اللي شبه ميكي ماوس دا مصطفى شعبان كانت مريييييعة

اللي كانت حلوة اوي في اولها ولحد دلوقتي مش بطالة هدوء نسبي بتاعت عابد فهد ونيللي كريم بس بغداد سقطت امبارح خلاص وانا قعدت اعييييط
:)

بتفرج ع الباطنية والادهم تضيع وقت بس ما يشلوش بصراحة
لا حلو ولا وحش

وكنت بحب اسماعيل ياسن لحد ما اشرف عبد الباقي طلع دمرني مش قادرة المح المسلسل من ساعتها

فاتيما said...

و الله الست الوالدة عندها ألف حق
المسلسل دا و غيره
كلها سلق و إستخفاف بعقول الناس
و بخبراتهم الفنية المتواضعة حتى كمشاهدين بيشوفوا حاجات تانية معمولة بإحترام و جهد واضحو المقارنة بتبقى مضحكة لدرجة الهبل اللى بتقول عليه والدتك
رمضان كريم عليكى

ذو النون المصري said...

انا بقالي سنين تركت فيها رؤية المسلسلات نهائيا
ربما اسمع عن مسلسل انه كان مميز فاشوفه في العرض الثاني
........
البوست دمه خفيف جدا
جايز لانه عن ناس دمهم خفيف و ظرفاء كما ذكرتي في التدوينه
........
كل عام انت بخير
تحياتي

tarek momen said...

بنتي الصغيرة خدت بالها من حكاية الكلام انجليزي وقالت لي يظهر الألمان هاجروا و سابوا بلدهم للأنجليز و لو سامية فهمي راحت انجلترا هتلاقيهم بيتكلموا الماني
هو مين اللي اخرج العك ده

Fahd said...

انا وحشني الكلام مواطن مصري عن الظلاميين الرجعيين الارهابيين

الا ياتري هو فين

كل سنة وانت طيب يا مواطن

mido said...

اقرى المقال ده

:))))

عصام زكريا يكتب: حرب المتاعيس

فـدوى فـريد فتحى said...

بجد انا موت من الضحك على كلامك
واحب أضيف لك كمان الى جانب الالمان الى بيتكلمو انجليزى مكسر
موديلات العربيات
انا ماشفتش ولا عربيه فى ألمانيا موديل الستينات
ولا الاتوبيسات الى بيفتح توماتيكى توماتيكى
وكلو كوم والستايلست بتاعت المسلسل كوم تانى
ده لبس ناس فى الستينات

والله انا مش مزعلنى غير تشويه القصه
وانا الى كنت فاكره انى حشوف رأفت الهجان التانى
ماهى الايد الى كتبت فخ الجاسوسيه (قصه ساميه فهى للمبدع صالح مرسى )هى ذات الايد الى كتبت رأفت الهجان
كوارث أخراجيه حصلت فى المسلسل ده
وانا أاهن لو الاسرائليين شافوه حيرجعو يحتلونا تانى مادام جهاز المخابرات موكوس الوكسه دى

ahmed samir said...

قلتي اللي انا كنت عايز اقوله على حرب الجواسيس
المسلسل ده مش نازلي من زور

اربعه ضباط مخابرات قاعدين في عربية واحدة بيراقبوا شقه و أول ما نبيل ينزل في عربية الشرطة كلهم يطلعوا وراه زي الهبل مع انهم عارفين ان لسه في شخص في الشقة
منتهى الهبل
دي مراقبة شرطة مش مراقبة مخابرات

Unknown said...

ههههههههههههههههههههههههه

مها
موتنيني من الضحك
ههههههههههههههههه
هههههههههههههههههه
طب ابو جهل ما قالش لقريش: عندما نقتل محمدا سوف نعطيكم ميسد كول


محمد رضا
بس قانون المراغي لسة حلوة


البنفسج الحزين
فاتك نص عمرك
لازم تتابعي فشر الهساهيس
الحقي


فنون

اممممممممم يا لئيييييمة
انا عارفة انت بتتفرجي على الادهم ليه؟ :) انا برضه باتفرج لنفس السبب


فاتيما
طب وهو الهبل وحش؟ هو فيه احلى من الهبل؟


ذو النون المصري

ايييييه ده؟ انت فين ياراجل كل سنة وانت طيب


طارق
نادر جلال
مخرج نادية الجنسي الابدي
ههههههههههههههههه

فهد

يا اخويا ما كان لسة من يومين كده بيتكلم عن الظلاميين بتوع الشرطة اللي بيقبضوا على المجاهرين بالافطار
ههههههههههههههه
انت بس مش متابع

ميدو
ههههههههههههههههههههه

فدوي

الحقيقة انا من رأي فنون
رأفت الهجان فاشلة برضه

الواحد كان بيحبها عشان كان صغير

احمد
اااه شفتهم يا قلبي وهم قاعدين محشرين في العربية ومستنيينه ينزل؟

دكـــــتور جدا said...

يا جدعان هو فيه وقت في رمضان عشان نضيعه في المسلسلات
محتاجين نركز مع العبادة والخشوع والقرآن علشان نطلع بأثر كويس بعد رمضان

Dr Nemo said...

الله يخرب بيت عقولهم ....... اللى رباه لينا نبيل فاروق شفاه الله وعفاه...... كجيل عشرينيات دلوقت.... هيببوظوه هما للاجيال الجديده الصغيره..... اييييييييييييه فينك يا ادهم ياصبرى تيجى تضربلك عشره فى لمحه بصر ودون ان يتحرك احدهم.....ههههههههه والله كانت روايات حلوة ياجدعان

مواطن مصري said...

حرب الجواسيس دة مسلسل كوميدي طول الوقت عمال أضحك و انا بتفرج على المسلسل دة

خصوصا المخبارات بتاعتنا الي بتراقب من الشباك

فين ايام رأفت الهجان

مواطن مصري said...

نوارة هما كل اليهود كدة مخنفين

مش عارف لية التلفزيون المصري بيطلعهم مخنفين هما مفيهومش واحد يتكلم عدل ولا اية

Unknown said...

ههههههه
والله يا مواطن تحليل الدي ان ايه بيقول ان اليهود السفرديم اقرب لنا في الجينات من الاشكيناز
واللي هم بيتريقوا عليهم انهم مخنفين دول سفرديم
يعني لو احنا خنف يبقى هم كمان خنف

Ahmed Fawzi said...

كان فيه خبر النهاردة إن السوريين حايعملوا أول مسلسل جاسوسية سورى

حسن على said...

سكوت هنصور : ملحوظة عابرة : مفيش حاجة اسمها "دقن دوجلاس" لكن فية حاجة اسمها شنب دوجلاس, والتسمية جائت من "دوجلاس فير بانكس الاب" ممثل السنيما الصامتة والابيض واسود

مواطن مصري said...

هو مسلسل نيللي كريم بيجي امتى؟

البنفسج الحزين said...

انا بصراحه مش باتابع غير مسلسلين اتنين هما أفراح ابليس وابن الارندلي
( الاولاني باحس اني باتفرج علي الطبعه التانيه من حدائق الشيطان لانه بيدي نفس الصورة النمطيه اياها بتاعه صعايدة المسلسلات اللي هي واحد صعيدي غني وشرير وله نفوذ في بلده وكل الناس بتخاف منه وله علاقه بالكبارات والبشوات في مصر اللي بيسافرلها بالطيارة كل ما يحب وعضويه مجلس الشعب اللي بيديها للي هو عايزة والناس جزم وملهاش رأي طبعا قدامه )هو بس الجديد انه مكبرين شكله شويه عن حدائق الشيطان مش طالع جان قوي المرة دي يعني.والست عبله كامل دورها نسخه بالكربون من دورها في مسلسل حق مشروع اللي كان فيه حسين فهمي مهببين له وشه بقعر حله عشان يبقي صعيدي وكأن أدوار الصعايده بقيت كلها تيمه واحده وأداء واحد مفهوش اي جديد.

Kalimalhus said...

بقى قانون المراغى لسه حلوة؟؟!!!.. طب هاتى راسك شمال شوية عشان أنا حدفت كوباية الشاى عليكى..

إنتى بتهزرى؟؟.. يعنى عشان كل المسلسلات ما تتشافش أصلا قوم خلاص نحمد ربنا لما نلاقى واحد معدى فنيا و نعتبره حلو؟؟.. خلاص مفيش أى إعتبار للمضمون أو الرسالة اللى فى المسلسل ؟.. طيب خالد الصاوى بيمثل كويس و رشوان توفيق ممثل قدير من زمان.. الست أنوشكا عاجباكى؟.. الست الطويلة الفرعة غادة عبدالرازق داخلة دماغك..

إصرار الناس دى إنها تطفحنا غصب عن عين أهلنا تفاصيل حياة ناس ما تهمناش و تعيشنا الآلام العاطفية الدقيقة لناس مستريحة و عايشة أحلى عيشة إيه المقصود بيه؟.. يعنى عبد المقصود الموظف اللى قاعد ببيجامة مقطوعة عند الركبة يتفرج ليه على واحدة مش قادرة تتعامل مع مشاعرها المتضاربة تجاه زوج خانها و لو الست نفيسة مراته بتتفرج معاه مش هاتقول : طب بس يجيبولى الفيلا دى و الراجل الحليوة ده و خليه يخوننى مع طوب الأرض و أنا مش هايهمنى .. طبعا نفيسة مابتقبلش الخيانة و لو عبد المقصود بص للبت ولاء اللونة بنت الجيران و هى طالعة عالسلم مش هاتسكتله و هتقطع الشبشب الزنوبة على دماغه .. بس أكيد نفيسة ماعندهاش وقت و لا نفس تعيش الصراع النفسى اللى بيعذب الست أنوشكا و اللى هو محور حديث الأهل و القرايب و الأصدقاء..

غير كده إيه باقى الموضوعات فى المسلسل .. الأخ اللى إتجوز و ساب بنته على وش جواز و خلع مع العروسة ذات الخمسين خريفا و رايحين يقضوها أتوستوب فى أوروبا زى الهيبيز و بنته اللى مش عايوة تتجوز خوفا من الملل و البت الصغيرة اللى بتعاكس المستر بتاع الدراما عالنت و المحامى اللى مش عايز يعيش فى فرنسا مع المدام لأنه بيحب الزحمة و دايب فى دباديب مصر قوى..

مين الناس دى؟.. كام فى المية مننا يعرف ناس زيهم؟.. و بلاش نجيب سيرة حالة التعاطف السينتمينتالى الفزيع مع الشاب القاتل اللى طلع براءة زورا و بهتانا عشان إيه كان متهدد فى السجن و بالتالى ده مبرر للشهادة الزور لإنقاذ حياة بسلامته و طبعا لو كان ضحيته واد من الشعب يعنى قول طبيب و ألا صيدلانى و ألا مهندس إبن ناس طيبين بس مامعاهمش فلوس و بلاش نقول من ولاد الغلابة الأقل حيثية من كده .. لو حد تانى أبوه مش من الحيتان كان حقه راح فطيس و ماحدش خد بتاره..

كفاية كده عشان مواطن مصرى مايقوليش حقد طبقى و ألا حاجة و رمضان كريم و الصبر من عندك يارب..

احساس لسه حى said...

انتى زعلانه ليه

ما الفن نعظمة هجس وملهوش لازمه

ويوم ما تلاقى عمل محترم يحترم عقليتك يبقا صدفه وغلطة من الفنانين

اهو الناس بتتسلا وهى سبوبه لازم الكل يعيش بيها وفيها

وخلى الشعب يشرب

واحد من الناس said...

انت فاتك إن محمد مختار لازم يجيب مراته تمثل ومخرج الروائع نادر جلال يخرج.. مراته بتتغير حسب التساهيل بس نادر دة ثابت لا يتغير.. الله يرحم نادية الجندي.. كان لازم في كل فيلم تعمل تلات حاجات: ترقص وتنضرب بالقلم ويغطسوا وشها في المية..

وبعدين لو حنتكلم في موضوع الخنفان والنظارة المدورة والدقن المكعبة يبقى لازم نفتكر العمل الخالد "فارس بلا جواد" (أو "زورو") اللي الأمريكان كانوا زعلانين قوي منه.. بس أول ماشافوه فطسوا على نفسهم من الضحك ومجابوش سيرته تاني..

tamer.sala7 said...

ومحدش اخد باله من الحلقة اللي كانت منة شلبي مكلفة بأنها تعمل حوار مع وزير الاعلام في الستينات


محدش قال للمخرج ان اصلا مكنش فيه وزارة إعلام في الستينات وكان اسمها وزارة الارشاد

بنت الصالحين said...

ههههههههههه

أسعدكِ الله

انا مش بشوف مسلسلات والحمدلله مريحة نفسي

يابنتي بلاش وجع دماغ
هتتعبي نفسك ع الفاضي

قبل ماابطل اشوف الوش ده افتكر ان كل القصص والسيناريوهات كانت واحدة

فـ على ايه

بلا وجع دمااااغ


على فكرة عجبني التدوينة اللي قبل دي جدااااا

تقبل الله صيامك وقيامك

soreal said...

LOL...

getting over this Egyptian window gazing, the fake "sonia graham" wanna be, and that cheesy music that plays during "heated romantic moments", am actually enjoying 7rb elgawasees...
also , not all israelies are ugly, shlomo is kind of cute :P

bas begad, you have no idea how close to reality this series is.

amr imam said...

بصى مبدائيا البوست دة ملوش حل
انا هتجنن اية الهبل الى بيعملوة دة بس الشهادة لله عاملة انجاز فى المسلسل دة ملوش حل عارفاة ولا اقولك علية
انهم فطرو الباشا فول فى المنيا انا لما شوفت مدا الاستغراب على وشة وهو بيقول فول هنا فول والتانى بيرد علية بيقولة مش عارف النقيب مين جابة منين والنقيب مين وضبة ازاى اية دة اية المسخرة دية
وزعلنين اوى على شتم السادات مهو طول ما انتى طبعا قصدى هما
بتفرجوا الناس قد اية احنا سزاج وتافهين كل ما يضربونا على قفانا وكل ما نتكيف منهم ونقول الله يزودة الضرب شويتين ولماااااااااا
ولا بلاش كدة هنضيع صيمنا ويا ريت هيحسوة ولا يفهمة

مع فائق احترامى وتحياتى

Anonymous said...

اضحك الله ثغرك يا نوارة
رااااائع

مش فاهمه said...

متهيألى اخفهم دما ابن الأرندلى و مسلسل الكأبة الرسمى اللى اسمه هاله و المستخبى الواد باسم السمرة ده حكايه بجد كل ما اشوفه احس انى شوفته مرة بيسوق توك توك ولا بيتخانق فى المنيل القديم ولا محجو فى القسم ..ممثل هايل بجد

مش فاهمه said...

بالحق نسيت اقولك شوفتى الست صابرين لا فض فوهها بتقول ايه على ظهورها بضفيرتين ليف تحت الحجاب .قال ايه الست ممثله و لازم تتقن دورها و ان المرحلة الزمنيه اللى بتمثلها ماكانش فيه حجاب قوم ايه اخترعت حكاية الضفيرتين الليف .........يخرب بيت كده

Mo said...

أنا عارف اني وصلت عالحفلة دي متأخر بس لما قريت الردود حسيت ان في حاجة ناقصة...

هو محدش منكم جاب سيرة الخواجة ايزاك "حبيييييبي" ليه؟ اهو ده بقى ممثل جاب التايهه, جاب شخصية اليهودي العقر من حارة اليهود اللي كلنا بنحبها و حطها في حلقة جديدة... عشان بس لو حد كان متلخبط و مش عارف اليهود من المصريين. ااه و حاجة تانية كمان, مبنى الموساد اللي على ناصية الشارع و عليه علم بلاستك يسد عين الشمس و اللي في الحقيقة محدش في اسرائيل كلها (مدني او عسكري) يعرف مكانه غير اللي بيشتغلوا فيه. ولا الحرس اللي واقفين على المبنى (اللي هما في الحقيقة مش موجودين اصلا) كل قفا منهم ماسك السلاح الروسي من عند الزناد و خزنة الرصاص. واخيرا عشان الموضوع ده بينقطني بس في نفس الوقت ملوش حل, محدش اتكلم عن كمية الاعلام الاسرائيلي اللي في كل حته, تقريبا هما بييجوا هدية مع المكتب او مع كل ترقية علم هدية. انا بيتهيألي ساعات ان لو واحد منهم مش لابس حزام و بنطونه وقع حيطلع لابس ملابس داخلية عليها العلم.

بعدين الناس عمالة تتريق على رأفت الهجان؟ طيب واللهي دي كانت و ما زالت أحسن حلقة اتعملت عن الجاسوسية... على الاقل ماكانوش بيحاولوا يتكلموا "اول انجليش اول زا طايم" و المشاهد اللي كانت في اليونان كانت منصوره في اليونان مش متصوره في رومانيا و بيقولولنا هامبورج. دا غير العدد الرهيب من النجوم الكبار اللي كانوا مشاركين فيها و ماتحسش ان حد عايز يسرق الاضواء من زمايله. واخيرا حد يقدر ينسى الموسيقى العجيبة بتاعت عمار الشريعي؟ مش لا مؤاخذة مزيكه اوض نوم افلام السبعينات على رأي soreal

Salam said...

الحقيقة انت صدمتيني
كنت فاكرك اذكي من كده
مسلسل الجواميس عفوا لاني ضعيف في الكتابة قصدي الجواسيس عمل مشترك بينا وبين الموساد هدفه اصفاء روح المرح علي المشاهد خصوصا في رمضان وعلشان الناس يقرفوا اد ايه الموساد سسزج وبيخدوا علي قفاهم وبالتالي يكسبوا تعاطف الشارع المصري ودي خطوة من خطواط التطبيع ياستي دول غلابة قوي

Salam said...

كده نستيني!!!!!!!!
( يجعله عامر)

Unknown said...

كله كوم و مسلسل إسماعين ياسين كوم تاني ... حرام العبط و الهبل إل أشرف عبدالباقي كان بيتكلم بيه ... هما كان قصدهم يتريقوا على بوققو ولا يهزقوه ولا إيه بالظبط؟