Tuesday 1 September 2009

اليوم الحادي عشر

يتهيالك انك واخد بالك من حاجة معينة، وتطلع لا واخد بالك ولا حاجة
بس ربنا بياخد باله بدالك بقى من كل حاجة، وماحدش بيصيدك غير نفسك يا اخي، سبحان الله، وتبقى ماشي كده مش ناوي تجيبها البر وبرضه ربنا يسترها معاك
ايه اللي بيخليك تتخنق من الناس بقى؟ نفس السبب اللي بيخليهم يتخنقوا منك، كل واحد عايز الكون كله يمشي على مزاجه، والناس كلها تفكر زي ماهو بيفكر، واللي هو عايزه يتعمل، حتى في حياة غيره، اللي هو عايزه هو اللي لازم يتعمل، ولما ده كله ما يحصلش تتخنق من الناس والناس بدورها بتتخنق منك لنفس الاسباب
ولو الكون مشي على مزاجك ح تطربق على دماغك انت، اي والله، عن جد يعني على رأي الشوام، عن تجربة
ولو الناس كلها فكرت زيك ح تبقى عايز ترميهم من الشباك، لانهم اصلا ح يوروك وساخة مخك، وعمرك ما حتحس انك حمار، ح تستحمر الناس بس، وتقول ياربي انا شفت الحمورية دي فين؟ وعمرك ما ح تعرف انك شفتها في المراية
ولو الناس عملت لك كل اللي انت عايزه ح تتخنق منهم برضه، وتزهق
طب لما انت خنيق والناس خنيقة زيك بالظبط، ما تشيل ده من ده يرتاح ده عن ده، حل عن الناس وخليهم يحلوا عنك، شوية بقى عشان النفس وياريت تنسى دورك التاريخي شوية، خليك في نفسك، انت مالكش دور تاريخي يا اقرع، انت مستني القطر اما ييجي، ما تعملش مهم بقى، انت عارف كام مليار زيك جم الدنيا؟ عامل مهم ليه؟ ما تعملش دوشة ولا تسمح لحد يدوشك وخلاص، مسيره جاي يعني ح يروح فين، القطر يعني، تلاقيه بس متعطل في الاشارة، هو الحقيقة رخم، بيتأخر قوي، اصله اشاش
حاول تاخد بالك بقى من كل اللي بيقلقك وابقى تف في وشي، تتفاجئ بعد شوية ان ربنا سترها معاك في حاجة عمرك ما كنت تتخيل انها تحصل وانت فاكر نفسك الفتك.
اقعد بقى

9 comments:

hasona said...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

عايز أقول اننا في أيام مباركة ويجب استثمارها في الخير والتقرب من الله

mido said...

متكسريش مجاديفنا

soreal said...

ya sub7an allah!

just an hour ago, i wrote the following in my blog:

the fall is easier when there is no one around

to worry about your self inflected wounds rather than worry about explaining/justifying or even pegging for sympathy no matter how genuine it is

most of the time its not

at the end of the day, you are on your own...

Fahd said...

طيب لو بتناقشي حد وكان اقل ذكاءا ودماغه نشفه وصوته عالي كمان
تعملي ايه
مش هتتخنقي منه

يعني هو لا بيسكت ولا بيقتنع

Unknown said...

فهد
انا يا اخويا ما باشوفش غير اللي انت بتوصفهم

ايوة هو خنيق ولا بيسكت ولا بيقتنع بس انت كمان بالنسبة له لا بتسكت ولا بتقتنع ولازم الا يقنعك باللي هو بيقوله عشان عنده احساس بان عنده "مهمة في الحياة" عنده احساس بالاهمية

لو لك مزاج اتكلم لو ما لكش مزاج ما تردش
ما انت غريب برضه يا فهم
لما مخنوق منه بترد عليه ليه؟

Fahd said...

مهو بيفتي وشايف نفسه صح
وبيقول كلام غلط

انا مش شرط اكون اكثر ذكاءا بس عارف ان عقلي له حدود والي حد ما بفكر بشكل علمي
فكره قصاد فكره وبفترض ان فيه احتمال اكون غلط

لكن هو لا اطلاقا
هو الصح دائما فلا يخطأ
وبيقول كلام غلط سواء في الدين او في الحياة ومش مع نفسه لا دا قدام الناس

بتلاقي واجب عليكي تخشي معاه في معركة

أبو أمك said...

أنا ؟؟

حسن على said...

نوارة فى حالة صوفية,طيبة,ودودة,متسامحة,تعظ القارىء بفناء الدنيا وقصر رحلتها,...ولأقناعةبذلك(بالتى هى احسن) وجهت خطابها العام الى ذات نفس القارىء مباشرة وبص فى المراية تشوف الحمار "وقلمين على وشة وهو داخل المدونة عشان يفوق و"لايمشى فى الارض مرحا" يقوم القارىء يختشى على دمة ولا يلح فى الجدل!

Anonymous said...

طيب خدي المزيد من التصوف بقه :D
حكى لي احبابنا عن الإمام الشعراني انه شاف واحدة قدام الجامع جميلة جدا وباين عليها الفقر وقاعدة بتبيع لمون... فكر في نفسه.. "لما دي قاعدة في السوق متمرمطة كده امال مين اللي يتستت ويتبفدد..؟" وفضل ماشي.. شوية ولقى اللي بيخبط على كتفه.. التفت لقى بتاعة اللمون وراه وبتقول له: لما يبقى لك كون ابقى نظمه زي ما انت عايز..!!"
رمضان كريم :)