محضر الجلسة لندوة المجلس الاعلى للقوات المسلحة

تحديث:
نسيت اقولكم كمان ان محمد صبحي قال: انا منزعج جدا من المطالبة بحل مباحث امن الدولة، كل دولة لازمها امن
تحديث:
اه.. نسيت اقولكم، اخو هشام طلعت مصطفى قعد يقول: انا زعلان على بلدي، ونفسي اساعدها، بس انا خايف اتحول للنائب العام.. ومن ضمن الكلام اللي قلته وانا نسيت اكتبه، اني قلت تعليقا على الكلام ده: على فكرة احنا مش عايزين نتذل لحد، وماحدش يقول لي ان القانون والعدالة بيعطلوا الاقتصاد، احنا نزلنا في الثورة عشرين مليون، ومستعدين نتطوع في اي عمل عشان نحمي اقتصاد بلدنا ولا ان رجال الاعمال الفاسدين اللي خايفين من القانون والامارات يذلونا ويجبرونا اننا ما نحاكمش الفاسدين، وعلى فكرة احنا مش بنقبض بالدولار ولا بناكل كنتكاي
وحسين عبد الغني قال اللي عايز يشتغل بالقانون اهلا وسهلا بيه، اللي مش عايز بالسلامة
بسم الله الرحمن الرحيم يا رب ما انساش اي حاجة ابدا

ابتدت بأن اللواء محمود نصر عضو المجلس العسكري قال: نود التأكيد على ان المجلس العسكري يعترف بشرعية ثورة 25 يناير، واستعرض الحالة الاقتصادية بالارقام، واخد وقت بتاع ساعة كده، وفيه بريزينتيشن ان شاء الله احاول اخدها منهم عشان انشرها، وقال ان فيه ازمة اقتصادية، بس انا متفائل بروح الثورة، لكن عندنا مشاكل آنية، واحنا مجتمعين مع حضراتكم عشان نسمع اقتراحاتكم وافكاركم غير التقليدية لحل الازمة الاقتصادية الحالية، احنا جيش.. دي اول مرة نحكم بلد، ومحتاجين مساعدتكم، ما اتحطيناش في الموقف ده قبل كده.

بعدين اتكلم حسب الله الكفراوي الكلام بتاعه ده، وقعد يترحم على السادات، والحقيقة ما خلصش كلام، وبعدين اتكلم بعديه واحد مش فاكراه، وقال كلام مش مهم ابدا ابدا ابدا، البتة يعني، بعدين د. ابو العلا ماضي اتكلم في مقترحات اقتصادية، وبعدين واحد مش عارفاه قعد يحط خطة خمسية ويتكلم في التفاصيل، فالدكتور جلال امين اتغاظ وقال ده كلام مش مهم ابدا، راح اللوا ما صدق وقال فعلا كلام مش مهم، واحنا عندنا في القوات المسلحة لما بنقول حنتكلم خمس  دقايق يبقى هم الخمس دقايق مش تلت ساعة، احنا مش طالبين خطة خمسية، عارفينها احنا الخطط دي، احنا عايزين حلول آنية تسعف الحالة الاقتصادية بشكل آني. بعدين اتكلم طلعت السادات واعوذ بالله.. اعوذ بالله وربنا، تقولش السادات يبعث من جديد؟ رغي رغي رغي، ورايش كله.. وفاكر نفسه بيتكلم في مجلس الشعب وقعد يقول: افتح يا راجل.. افتح.. اه وربنا قال كده، راح اللوا بص له وهو مش فاهم كده، راح قايل: افتح لي الاستثمارات، خلاص.. الحبيب العدلي مشي، ما تقعدش تاخد فلوس من المستثمرين، افتح افتح افتح.. هو حيجيبه من برة؟ وواحد من الاخوان اتكلم وقعد يقول في ارقام ويشكك في الارقام اللي طرحها المجلس العسكري فاللواء قال له الارقام دي دقيقة وممضي عليها وانا حاجيب لك التقرير. وعماد اديب كان قاعد جنبي قال: هو ده بقى اقتصاد الاخوان.. مافيش فكر خالص! 

كل ده وانا رايحة وجاية على واحد كده اكتشفت انه مدير الاوتيل في الاخر، وقلت له انا مفوضة من حوالي 250 واحد على المدونة والتويتر اني اوصل صوتهم للمجلس هنا، ولازم اتكلم ودول مش بيسكتوا، راح مقعدني قدام عشان ييجي الدور عليا بدري، اصلهم كانوا بيتكلموا بالدور، ورحت باعتة للواء ورقة بالمعنى ده، وقلت له يا تخليني اقرا النقط اللي معايا يا اكتبها لك في ورقة، راح باصص لي وانا رافعة ايدي وقال: دي نوارة؟ نصقف لها يا جماعة عشان دي من شباب الثورة العظيمة ماحدش صقف غير حسين عبد الغني وجلال امين وابو العلا ماضي. فيه حد تالت اتكلم برضه عارفين مين؟ عميد كلية الاعلام اللي بلال فضل شطفه على اون تي في، قعد يقول لازم تواجهوا الاعتصامات الفئوية بكل حسم وحزم، وبعدين عادل حمودة اتكلم بعده وقال: انا اللي كشفت فساد داماك، لكن احنا محتاجين دلوقت ان اي رجل اعمال دفع رشوة لمسئول المسئول هو اللي يتحاسب ورجل الاعمال ما يتحاسبش والا الاستمثارات حنخسرها، قام اللواء قال: والله انا عارف الكلام ده، بس الناس مصرة على المحاكمات، واحنا ما نقدرش نتدخل في القضاء، لكن مثلا الامارات لما لقت اننا بنحاسب بتوع داماك قالوا بتعملوا في الناس بتوعنا كده؟ طب مافيش استثمارات، واحنا محتاجين الاستثمارات دي بشكل ملح والا الاقتصاد حينهار. وبعدين اللواء قال لي تعالي يا نوارة اطلعي هنا وكلميهم... وراح مشاور عليا وهو مبتسم: دي من بتوع الثورة، لازم نكرمها

فقلت لهم الآتي بالنص:

انا مش عايزة اتكرم ولا حاجة انا قبل ما اجي نزلت على المدونة والتويتر اني جاية هنا وفيه حوالي 250 واحد وكلوني اقول الكلام ده، وانا الثوار بيقولوا عليا "نوارة عميلة الجيش المصري" وانا مش زعلانة من اللقب ده لاني باحب الجيش، ولو اني عمري ما قعدت مع ظابط جيش غير واحد من سنتين كان بيحبني وما حصلش نصيب، الكلام عن الازمة الاقتصادية اللي كلنا عارفين اسبابها ومافيش داعي للاستفاضة فيها والشباب بيقولوا ان عشان الازمة الاقتصادية تتحل نوفر فلوس الداخلية، الامن المركزي على سبيل المثال امبارح ضرب المتظاهرين بالقنابل المسيلة للدموع والرصاص المطاطي والخرطوش، بعد غياب من يوم 28 اول ظهور للشرطة كان وهي بتحمي السفارة الاسرائيلي من متظاهرين مصريين، اذا كان الناس دي عقيدتهم ان الشعب هو العدو وان مهمتها تحمي اسرائيل يبقى ادوهم اعانة بطالة وفيه تسعة مليون عاطل مستعدين يخدموا بلدهم وولاءهم للوطن وللشعب مش لاسرائيل. امبارح اللواء فاروق لاشين المتهم بضرب المتظاهرين اثناء الثورة واللي بعد كده بقى محافظ الجيزة كان بيقود معركة ضد المصريين لحماية السفارة الاسرائيلي، والامن الوطني لسه بيشتغل ضد الناس. 

الحالة الاقتصادية عشان تتحسن لازم الناس تستعيد الثقة مع المجلس العسكري، انا عايزة اوضح ان انتوا دايما بتفهمونا غلط، ودايما بتعتبرونا بنشتمكم، احنا لو ما كانش لنا عشم في القوات المسلحة المصرية ما كناش هاجمنا ولا اتكلمنا، كنا عملنا زي ما عملنا مع الامن المركزي، احنا بصراحة بنحتقر امن الدولة والامن المركزي، لكن بنحب الجيش المصري، والاثر النفسي لتعذيب الجيش المصري للمتظاهرين اقوى بكتير من الاثر البدني، لازم تبطلوا تضربونا، ولازم الثقة ترجع، وعشان ترجع يجب الافراج عن كل المعتقلين، واعادة المحاكمات العسكرية، ورفع كل القيود عن وسائل الاعلام. 

فيه حاجات كمان بتكلف الدولة فلوس وبتساعد على انتشار الفساد وده بيهدد الحالة الاقتصادية، زي المجالس المحلية، وزي المحافظين اللي لازم يبقوا بالانتخاب، وانتخاب عمداء ورؤساء الجامعات، وعشان الامن يرجع لازم يتحاكم ضباط الشرطة المتورطين في ضرب المتظاهرين. 

(في الحتة دي طلع جوز نسوان قالوا: ما تخلصي بقى.. احنا مش عايزين نسمع الكلام ده، فاللواء محمود قال: لا.. سيبوها تكمل وتفضفض.. قلت له: انا مش بافضفض، انا جاية لك بتفويض من اكتر من 250 مواطن وانا لخصت كلامهم دي معجزة)

لازم يتم اتخاذ موقف حاسم من الشرطة، فاللواء قال لي: بس احنا مش ثوار، احنا جيش، يعني ما بنفهمش غير في ضرب الرصاص. قلت له: ليه كده يا سيادة اللواء، ده الجيش والشعب ايد واحدة. فالجدع بتاع جمعية جمال مبارك قال لي: والشرطة والشعب والجيش ايد واحدة. قلت له: لا انا اسفة، الشرطة هربت من واجبها من يوم 28 واول ظهور لها كانت بتحمي السفارة الاسرائيلية وبتضرب المصريين بالنار، تاني؟ بعد كل اللي حصل ده تاني؟ احنا مش حنقبل تاني ده يحصل. 

ولازم يبقى فيه شفافية، حضرتك قلت في كلمتك ان فيه اجندات خارجية وداخلية بتهدد الثورة وعايزة تفشلها، يا ريت تقول لنا ده مين، صارحونا، احنا في ضهركم ونعرف نحميكم، لأن عدم مصارحتكم لينا بتحطكم في موقف محرج، وبتخلي الناس تتهمكم انتوا، بالنسبة للاعتصامات الفئوية اللي كانوا بيقولوا عليها الزملا هنا عاملوها بكل حزم، الحزم الوحيد المقبول في حل الاعتصامات الفئوية هو حد اقصى وحد ادنى للاجور، بقى عايزين تتسامحوا مع رجال الاعمال اللي نهبوا مليارات وعايزين تتعاملوا بكل حسم مع عامل بياخد 400 جنيه؟ اعمل حد اقصى وحد ادنى للاجور وده مش حيكلفك لانك حتعيد هيكلة الوظائف والاجور من جوة المؤسسة وساعتها مش حتلاقي اعتصامات فئوية، لكن انا ما اقدرش اطلب من عامل بعد ما بات في الميدان 18 يوم انه يفضل يقبض 400 جنيه ويسكت. وبعدين قانون منع التظاهر ده مش عملي، وبينهك الشعب والجيش، لأن لا الشعب حيبطل يتظاهر، ولا الجيش حيبطل يضربهم طول ما فيه القانون ده، الغي القانون لانه منهك، وهو اللي بيعطل الانتاج، لان التعامل الامني بيخلي الناس تعند وتكمل اعتصام مش بتمشي، ثم طالبين نلغي التظاهر واصلا مافيش حاجة بيتم انجازها من غير مليونيات. 

الفتنة الطائفية اللي برضه بتعطل الاقتصاد مش حتتحل بالعرفي ولا بفض الاعتصامات، حتتحل بقانون دور العبادة الموحد وقوانين للمواطنة، والعدالة كمان كفيلة بانها تعيد الثقة بين الناس والجيش، مش معقولة ابراهيم كامل يبقى اول واحد ياخد براءة قدام محكمة عسكرية وعمرو البحيري ياخد خمس سنين وعايزين الناس تسمع الكلام. لازم يتم تحديد جدول زمني لتسليم السلطة لان الضبابية دي بتصيب الناس بالقلق، والناس القلقانة مش بتشتغل. واستمرار امن الدولة بيئذي البلد.. هم اللي بيعملوا الفتنة الطائفية، وهم اللي بيبعتوا البلطجية، لازم يبقوا تحت اشراف قضائي وحقوقي، واخلاء سبيل ضباط الشرطة المتورطين في التعذيب وضرب المتظاهرين عمره ما حيعيد الامن ابدا، ده حيزود الانفلات الامني. 

فيه ثروة بشرية اسمها العشوائيات، دي ممكن تدخل دخل للبلد، يعملوا ريسايكل للزبالة، مشاريع غزل ونسيج، بس هم مش عايشين في امان، هم مش بلطجية، البلطجية الهربانين من السجون هم اللي بيهجموا عليهم والشرطة العسكرية مش بتسأل فيهم والامن مش بيحميهم، فيه حاجة كمان حتفيد الاقتصاد: محاكمة اعضاء الحزب الوطني المتورطين في الفساد، الناس دي احنا محتاجين فلوسهم مش يتسابوا كده. 

الاعلام مهم جدا للتواصل مع الناس، وفيه ناس مدربة على النفاق حتى لو ما جلهاش اوامر، لازم السياسة نفسها تتغير. وما ينفعش حل مشاكل الطائفية بناس مثيري الطائفية زي محمد حسان، ويحيى الجمل دوره ايه في الحياة؟ بيعمل ايه يعني؟

(اللي في القاعة: تؤ تؤ تؤ.. بس بقى.. اللواء: سيبوها تكمل)

الحوار الوطني اعضاؤه غير منتخبين وما يمثلوش الناس، مجلس الشورى مالوش لازمة لانه مصروف على الفاضي، وزير الداخلية لازم يبقى مدني عشان يحافظ على حقوق المدنيين ما يبقاش عقلية بوليسية. 

اخيرا فيه كام حاجة لو اتعملوا الناس حترتاح والاوضاع حتتحسن:

- المخلوع يروح سجن طرة بدل ما احنا بنصرف عليه ما يروح مستشفى طرة، يعني ايه مش مناسبة له؟ ما هو اللي عاملها للناس يدوق اللي هو عمله للناس

(الناس اللي في القاعة: اففففففففففففففف تؤ تؤ تؤ) 

- اعادة هيكلة المؤسسات واجورها

- تغيير المحليات والمحافظين يبقوا بالانتخاب

- مافيش اعتصامات تتفض تاني بقى.. لا بالقوة ولا بالذوق، الاعتصام يتفض بالاستجابة للمطالب، ماحدش يمد ايده على المصريين

واللي اتقبض عليهم يطلعوا كلهم

-------------------

طبعا حتسألوني فاكرة الكلام ده كله ازاي، حاقولكم لاني كاتبة النقط على الكمبيوتر وطبعتها، فافتكرت كلام، وفيه نقط كتبتها في الجلسة افتكرت بعضها، والبعض الاخر مش فاكراه، زي ان في الاخر فيه نقطة خامسة مش فاكراها، بس فاكرة اني وانا راجعة مكاني واحدة محجبة وحاطة برنيطة على حجابها قالت لي: انتوا زودتوها قوي

اللواء محمود قال: طبعا احنا بنحييها لانها من شباب الثورة.. بس انا مش فاهم حاجة خالص، واكيد فيه ناس من الحضور ممكن يتكلموا مع الشباب ويفهموهم اكتر مني، لاني مش عارف افهم هم بيفكروا ازاي؟

!!!!!!!!!!!

بعدين قام الراجل اللي من جمعية جمال مبارك، واللي فضحه كان حسين عبد الغني، اول ما قال انا من جمعية شباب مش عارفة ايه راح حسين عبد الغني معلي صوته وقال: دي بتاعة جمال مبارك

الراجل ده قال: لازم يبقى فيه حسم وحزم في التعامل الامني.. فاللواء قال له: يعني ايه حزم بقى وحسم، فهموني عشان احنا جيش، يعني اول ما تقول حسم وحزم نفهم انك بتقول اضربوا بالنار

فقال له: اضرب بالنار

فاللواء قال له: نضرب بالنار؟

فجلال امين وحسين عبد الغني وانا وابو العلا ماضي وكام حد تانيين قالوا: لا لا لا.. وبعدين قلت له: او نجرب فيك يا استاذ.. انت اول واحد ينضرب بالنار، وحسين عبد الغني قال له: احنا مش محتاجين ناس فاشيست زيك

بعدها محمد صبحي اتكلم وقال: احنا كلنا ضد اسرائيل بس احنا مش عايزين ناس تحطنا في مواجهة مع اسرائيل زي اللي راحوا يقتحموا السفارة امبارح، راح اغلب اللي قاعدين صقفوا. وبعدين قال لازم يبقى فيه حسم وحزم، اي بلطجي يقتحم قسم اي بلطجي يعتدي على الناس اضرب بالنار فورا (تصفيق من القاعة) واي حد يعمل فتنة طائفية ياخد اعدام شنقا، ست شهور بس الفتنة دي حتخلص (تصفيق من القاعة). رحت باصة للظباط اللي واقفين ورايا وقلت لهم: انتوا عايزين تقتلونا؟ راح واحد منهم قالي: هو انت بتقتحمي قسم؟ قلت له: احيي بلطجي ولا تقتل بريء.. راح ساكت. 

بعد شوية جه مدير الاوتيل - هو ظابط جيش او مخابرات عسكرية ما اعرفش عشان لابس مدني - وقعد جنبي وقعد يرسم لي على الورقة ويقول لي انا عندي شقة، جبت كهربا بعشرتلاف جنيه، وما دفعتهمش، ده اسمه الدين الخارجي، جبت مقاول يشطب لي الشقة بميت الف جنيه، وما دفعتهمش، ده اسمه الدين الداخلي وبعدين سبت لمراتي 20 جنيه عشان تدفع فاتورة الكهربا، هو ده الاحتياطي بتاعنا. نعمل ايه؟ قلت له ايه الناس الفاشيست اللي انتوا جايبينهم دول؟ هم دول بقى اللي قلبوكوا علينا بعد ما كان الجيش والشعب ايد واحدة؟ قال لي: كل واحد فيهم كان بتاع مبارك واستفاد من مبارك ودلوقت جاي بيتكلم عن الثورة، عشان كده باحب ابوكي، عشان هو اللي شتم مبارك في وجوده، مش زي عبد الرحمن الابنودي اللي كان بيبوس ايد مبارك واول ما مشي عمل ثوري.. فماندي فهمي قالت له: طب ما انتوا اللي داعيينهم. قالها: نعمل ايه؟ احنا محتاجين مساعدة الناس، عايزين حد يحط لنا خطة كويسة عشان نجتاز المرحلة دي. قلت له: لو كان فيه خير ما كان رماه الطير، لو دول بيعرفوا يحطوا خطط ما كانش مبارك سقط.. اداني ورقة وقلم وقال لي: خدي اكتبي لي اسماء الناس اللي ندعيهم الاجتماع الجاي.. احنا خلاص ما بقيناش عارفين انتوا عايزين مننا ايه؟

كتبت كل اللي موجودين على الفون بوك بتاعي

ولما يتصلوا بيكوا روحوا

روح يا اخويا منك لها له.. روحوا واتكلموا وقولوا كل حاجة.. ده جيش مصر يعني، ولا ما يشبهش الفريدم هاوس، والمعهد الديمقراطي، والسفارة الامريكاني، وفريدريش ناومان، والسفارة التركي، وكود بينك، والبوسنة، والهند والسند وبلاد تركب الافيال، ما بتقعدوا مع طوب الارض ولما بنكلمكم بتقولوا: مش مهم انا رحت فين؟ المهم انا باقول ايه.. هو ده كان جيش اسرائيل؟ تسعين في المية من اللي راحوا الاجتماع ده راحوا عشان يلحسوا الجزم يمكن المجلس العسكري يرمي لهم عضمة يقرقشوا فيها، وكل اللي نازل عليهم: اضربوهم، احرقوهم، موتوهم، انسفوهم... لو نص العدد ده كان ناس عندها ربع انسانية السياسة اللي مضايقانا حتتغير، ذنب اللي حيموت بعد كده في رقبتكم لو ما رحتوش.. اديني باقولكم، الاغلبية اللي بترضى تروح بتحرض على قتلنا وش

انا كتبت كل اللي اعرفهم.. واللي حتجيله دعوة ومش حيروح حسبي الله ونعم الوكيل فيه، واللي حيروح ومش حيقول كل اللي في بطنه حسبي الله ونعم الوكيل فيه

حسين عبد الغني اتكلم كلام رائع، وركز على نقطة اساسية: انا شايف ان كل اللي بيتكلموا مسميين الثورة "الكارثة اللي حصلت" مافيش كارثة حصلت.. فيه ثورة عظيمة حصلت، ومافيش ازمة، ومافيش مصيبة حتحصل، الشرطة بتعاقب الشعب، وده مش مقبول.. راحت برضه واحدة كده طالعة لوحدها وقالت له: بس بقى.. خلص

راح شاخط فيها وقالها: هو انت مديرة الجلسة ولا سيادة اللوا؟ 

وراح مكمل كلامه، وقال ان فض الاعتصامات بالطريقة دي مش مقبول، واننا بنحب القوات المسلحة، لكن لو سمحتوا اسمعونا، كده الرصيد خلص، واذا ما كانش عقول ثورية هي اللي تدير المرحلة دي البلد مش حتمر بامان، ماحدش يعند مع الناس. 

جلال امين قال نفس الكلام تقريبا، بس قال ان ده مش وقت الحد الادنى للاجور، لكن ممكن نرفع الاجر بشكل مؤقت لحين استصدار قانون بالحد الادنى للاجور. 

اه نسيت.. ابو العلا ماضي اتكلم عن الضريبة التصاعدية. 

وبعدين قالوا لنا تعالوا على الغدا:

رحنا على الغدا، لقيت اللواء محمود بيقول فين نوارة؟ انا عايز اقعد جنبها.. انا جاي اقعد جنبك بقى عشان افهم انتوا بتفكروا ازاي؟ اصل احنا عايزين نفهمكم، هو انتوا ليه مش كلكم حاجة واحدة؟ فيه ستميت ائتلاف، واحنا مش عارفين نكلم مين، يعني انت مثلا تبع مين؟ قلت له انا مش تبع حد، قال لي: شوفتي؟ اهو احنا بقى مش عارفين نتعامل كده.. كل شوية حركة وائتلاف وحزب لما دوخنا

قلت له: بس دي حاجة كويسة.. دي حرية

قال لي: ماشي.. بس احنا مش فاهمين منكم حاجة، وعلى طول انتوا زعلانين

فمدير الاوتيل الظابط قال له: هم بيحبوا بلدهم، وعايزينها احسن بلد، بس الظاهر فيه مشكلة تواصل بينا وبينهم، يعني مثلا انا باشوف ناس بتعمل كروت ويكتب فيها: فلان الفلاني.. ثورة 25 يناير. 

(حقة فيه حد بيعمل كده؟)

وبعدين جات الولية ام برنيطة وقعدت تاكل في دماغه لحد ما احد الظباط قالها: هو عايز ياكل.. فراحت باصة لي ومتخانقة معايا تاني وقالت لي: انتوا زودوتها.. وراحت باصة للواء وقالت له: دول عايزين يمشوا البلد على كيفهم، هم مين عشان يتكلموا نيابة عن الشعب، وتبص لي: لعلمك يا حبيبتي، انا باحضر هنا من زمان.. والظباط واقفين يضحكوا وانا مذهولة، قلت لها: انت بتحرضي علينا؟ قالت لي: ايوة باحرض عليكم

وبعدين قلت للواء: لو سمحت كفاية ضرب، وبلاش اعتقالات، وافرجوا عن المعتقلين.. فقال لي: حاضر... واللي اخدوا محاكمات عسكرية حتتعاد محاكمتهم وحتى الظباط اللي اعتصموا، المفروض ياخدوا اعدام، بس مش حنديهم اعدام عشان البلد في حالة استثنائية. قلت له: ده فيه تلاتة منهم ماتوا. قال لي: والله العظيم مافي حد مات منهم، والله العظيم ما في حد مات منهم، والله العظيم ما في حد مات منهم.. وبعدين برضه اتلمت عليه شوية نسوان قعدوا ياكلوا في دماغه، لقيت ظابط صغير كده، مش حاقول رتبته، اولا عشان مش بافهم في الرتب، ثانيا مش حاقول كان على كتفه ايه عشان ما يتئذيش، ثالثا: الشهادة لله مز يعني، حرام يروح في داهية

مال عليا وشوشني وقال لي: انت عارفة اللي حصل مع العيال بتوع سفارة اسرائيل امبارح؟ دول مقبوض على شوية منهم ومتوجه لهم تهم انهم حاولوا يقتحموا السفارة واتلاف منشآت عامة وممكن يروحوا في داهية

قلت له: مش صحيح، دول عشان يقتحموا السفارة لازم يطلعوا في الاسانسير، كل اللي عملوه انهم زقوا الحاجز، وكانوا بيتكلموا مع الجيش عشان ينكس لهم علم اسرائيل وهم بيتكلموا فوجئوا بالامن المركزي بيضرب 

فقال لي: طيب كلمي اللواء محمود عنهم.. وخدي منه وعد يطلعهم

قلت للواء محمود: انا مش حاكل الا لما انت تقعد، اول ما قعد قلت له: فيه عيال مقبوض عليها امبارح، يعني ما بقاش الا يتحاكموا عشان اسرائيل.. قال لي: ما كانوا حيخربوا الدنيا امبارح. قلت له: لا مش صحيح.. طلعوهم لو سمحت.. فقال لي: ربنا يسهل ان شاء الله

وبعدين جات ست كده قعدت تاكل في دماغه وعايزة تعمل معاه حوار، قال لها: لا.. انا مش قادر اتكلم انا بالنسبة لي نوارة اهم عشان عايز افهم شباب الثورة.. فضلت تكاكي وتاكل في دماغه وتشتمني انا وشباب الثورة في وشنا

وبعدين هنج خالص وبقى شكله تعبان، فقلت له شكلك تعبان مش حينفع نتكلم، فمدير الاوتيل قال له: هي كتبت لنا قائمة بالناس اللي ندعيهم وربنا يسهل، هي مش عاجبها اللي حضروا النهاردة وبتقول انهم ثورة مضادة.

وبعدين سلمت عليهم ومشيت

بس خلاص

-------

احنا حنعمل ايه؟

حنعمل حشد لقضايا الاجماع الوطني.. ما عادش ننزل الجمع باعداد قليلة ابدا

نمسك قضايا الاجماع الوطني قضية قضية

ونرجع الجمع لقوتها تاني.. غلطنا جدا اننا سبنا الشارع

وغلطنا جدا اننا فتحنا مواضيع بعيدة عن الاجماع الوطني تخلي شكلنا عار في الميدان

وغلطنا جدا اننا كنا مش بنروح نقابلهم ونقولهم اللي في نفسنا

وانا من ضمن اللي غلطوا

بس طبعا مش عشرين مليون حيقابلوهم

لكن على الاقل مليون واحد ينزلوا في قضايا الاجماع الوطني 

ونعمل مؤتمرات شعبية

مؤتمرات شعبية ومليونيات.. مارشات عسكرية وقرآن

وربنا يستر

بس على فكرة.. البلد مليانة زبالة.. وياما زبالات لابسة بدل وبرانيط