بالنوسبة لفيديو المطاوي

فيه حد، عرف نفسه بانه لا مصري ولا جزائري، وبعت لي اتنين فيديو بخصوص المطاوي

ده الفيديو اللي وسائل الاعلام المصرية ادعت انه من السودان



وده فيديو لنفس الناس من زاوية تانية

وانا مش باقول ان ما حصلش حاجة خالص مالص، اولا ده مش طبيعي انه ما يحصلش حاجة، اذا كان صحفي في المصري اليوم هنا في مصر لبس جزائري ما فاقش غير في المستشفى
عادي، هي دي الكورة، ومش متوقع ان الجمهور الجزائري ما يحدفش البعثة المصرية بالطوب
وانا مصدقة حكايات الناس اكتر ما انا مصدقة الفيديوهات المضروبة، يجيبوا واحد بينضرب وما نعرفش مين اللي بيضربه ومين هو اصلا وبينضرب فين اساسا، يجيبوا فيديو من ايام الرسوم المسيئة لناس بتحرق كتاب ويقولوا ده الجزائريين بيحرقوا الانجيل عشان مصر فيها مسيحيين، يجيبوا فيديو لناس شايلة مطاوي وواحد بيصورهم من قريب قوي، يعني انت عايز تقنعني ان الجمهور السيس ده كان يقدر يقرب جنب العيال الشبيحة دول ويصورهم من قريب كده؟ ده كان اتاكل
انا كل اللي باقوله اني مش داخل دماغي ابدا انها مؤامرة عسكرية من النظام الجزائري اللي بعت عشرتلاف بلطجي معاهم عشرتلاف مطوة والاصابات كلها طفيفة في عشرين واحد، دي حتى تبقى عيبة في حقهم يعني، ماهم لما جم عندنا كانت الاصابات عشرين واحد جزائري برضه
واتهام حكومة انها بعتت بلطجية بالقصد ده اتهام عايز دليل والا يبقى الحكومة المصرية هي اللي سلطت الالتراس يضربوا اللعيبة ويفتحوا لهم دماغهم ويجيبوا لمدرب حراس المرمى بتاعهم ارتجاج في المخ، حتى لو الامن طرمخ عليهم، بس اتهام السلطة المصرية بحاجة زي دي حاجة كبيرة قوي، ممكن تطرمخ عشان خايفة من عقوبات الفيفا، لكن صعب قوي تسلطهم، واتهام زي ده محتاج دليل
وبعدين ما عوروش اللعيبة ليه لما هم عيال جامدة كده؟
ثم ده كله فيه سلطات بتحقق فيه، وشرشحة الاعلام وفيديوهات اليوتيوب مش هي اللي ح تفصل، التحقيق هو اللي ح يفصل، زي ما الفيفا فصلت كده في حادثة ضرب اتوبيس اللعيبة عندنا.
وسواء الحكومة بعتت ناس وده ثبت او مجرد بعتت جمهور كورة عادي وجمهور الكورة بطبعه غوغائي وبلطجي في كل حتة في الدنيا، ايه دخل كرامة مصر في الموضوع؟ مالها مصر ومال الحكاية دي؟ دي كورة
دي كورة
دي كورة
ولما فيه ناس قالت عيب تضربوا اللعيبة، نفس الناس اللي بيعيطوا دلوقت قالوا: ماهي دي الكورة، ولو ان بقى في عرف الكرويين الصح اللعيب ده مقدس والاعتداء عليه خط احمر واصابته بالنسبة لجمهور الكورة كارثة خصوصا قبل الماتش. لكن شغال، ماهم ضربونا سنة 89 وكده خالصين.
احنا في السودان اتغابينا وبعتنا جمهور عرة..عرة..عرة فعلا، حزب وطني، ومطربين، وممثلين، وفردوس عبد الحميد اللي بتعيط عشان الراجل قلع لها البنطلون، بتعيطي ليه؟ ما تدوري وشك يا ستي: دول بيقلعوا، دول بيقلعوا
يا لهوي؟ يا خرابي؟ يا جمالي؟ ما انت لو كنت نزلتي اي منطقة عشوائية وواحدة ست بقى مش راجل قلعت لك مالط ما كنتيش اتخضيتي وعيطتي وبربرتي وقرفتينا احنا


مالها مصر؟ المرحومة جالها سل امتى؟ ايه العزا اللي ناصبينه لمصر ده وفتحي عبد الوهاب طالع يهتف بمنتهى الحماس ودم الثأر بيبك من وشه: حممممممد الله على السلاااااااامة، وقدررررررر ولطففففففففففففففففف، قام الجماهير الغفيرة وقفت وصقفت له، قام هو عامل علامة النصر اللي شبه خريطة الدلتا دي...


يامي يامي يامي... انا متأكدة ان الخمسة وتلاتين مليون ما بيناموش الليل بعد الهتاف الحماسي ده خصوصا ان محمد فؤاد اعلنها مدوية:
اناااا مش ح اسيب حقيييي... انا ح اعمل حفلةةةةةة



وواحد مجنون طالع في العاشرة مساء يقول يجب علينا اننا نوقع بين المغرب والجزائر ونطالب بحق المغرب في الصحارى، طب احمد حسن قال: ده كلام ممتاز عشان هو مش فاهم حاجة ولا عارف مين سحارة دي؟ او فاكرها اخت سحر جعارة اللي هي اسم على مسمى الحقيقة، ومنى الشاذلي اتحفته بشوية مثقفين سيس كنا ح نسمع شخير الواد لو كانت استنت خمس دقايق كمان. انما ده مصطفى الفقي قال كده كمان!!!! ادعي عليك بايه يا مصطفى يا فقي؟ ربنا ح يدفس مناخيرك في وشك اكتر من كده ايه؟ ندخل ونعمل زي اسرائيل بين المغرب والجزائر عشان خسرنا ماتش كورة؟

حافظ المرازي وجمال بخيت قالوا كلام كويس قوي
بس حتى منى الشاذلي اللي كانت عاقلة طالعة في الحلقة دي بتسخن، مما يوحي ان فعلا بقى كل القنوات الفضائية بلا استثناء جاية لها اوامر من فوق قوي بالتصعيد، طبعا هي بنت ناس برضه ومتربية فبتسخن بطريقة بكيزة مش زي مصطفى عبده وشوبير وتامر سمين. بس جمال بخيت حبس دمها وخلاها مش عارفة تروح ولا تيجي، وارتبكت، الظاهر ضميرها مش مطاوعها على اللي هي بتعمله ده.
بس يعني، ملعونة اللقمة المتغمسة بالذل
وحافظ المرازي بقى جاب لها لستة طويلة باصابات الجزائريين وطعن واحد جزائري بالسكينة هنا في مصر (ما ماتش ما ماتش.. اصيب بس) ايام مباراة الجزائر الاولى تقوم تقول له: ما واحد سوداني طعن في السودان! ده طلع بقى اينما تكون الجزائر تدركها كرامة مصر ولو طعنت سوداني او حتى تونسي... وكل ده في اطار الكورة والله، ده فيه ناس بتموت في ماتشات الكورة، احنا الحمد لله لا قتلنا ولا اتقتلنا. حاجات بسيطة، مالهاش علاقة بمصر خالص، لو كانوا بعتوا جمهور كورة كان ضرب واتضرب وما كانش حد سأل في امه، وهو ما كانش طلب من حد حاجة هو بياخد حقه بدراعه (وهو الوحيد اللي له الحق في انه يحضر المباراة دي لان مالوش متعة في حياته غيرها، حرام عليكوا، ساب لكوا الفلوس وساب لكوا السلطة وساب لكوا الشهرة ومالوش في حياته غير الكورة بتنطوا له فيها ليه؟ ثم ان اللعيبة من امثال احمد حسن اللي نام وحلم واتقلب في الكرسي في ندوة منى الشاذلي مش عايز غيرهم ما كانش عايزكوا، ههه لا والطربش وقع بلسانه وقال: ماهو انا مش معقولة ح اقول للناس اللي راجعة مضروبة انا ما كنتش عايزكوا تيجوا، خلاص هم جم بقى وباشكرهم، بس اه احنا كنا عايزين تشجيع احسن من كده، وقاعد في وسط مكرم محمد احمد ومصطفى الفقي ومنى الشاذلي مش فاهم هم بيقولوا ايه، وجمال بخيت هزأه والواد هو ماله ومال الكلام ده كله :) هو عايز يلعب ويتشجع ويكسب وينبسط وواحد يتصل ويقول انا مش مثقف بس انا مش ثقافتي ضحلة زي لعيبة الكورة، هو حد قال لك انهم بيدرسوا في الجامعة يا عم؟ العيال مغلولة انها اتغلبت وعايزة تفش غلها تقوموا تاخدوهم على عقلهم؟ وتكبروها في مخهم وتقولوا لهم كرامة مصر وتوقعوهم في السلطة الجزائرية، وتخلوا الواد يبغبغ زي العبيط كلام هو مش فاهمه ويقول على اللعب في ازمة الصحارى اقتراح كويس؟ وجمال بخيت يزعق له ويقول له انت ازاي تقول كويس؟ هو ايش عرفه هو؟ لا انتوا تعرفوا تلعبوا كورة زيه ولا هو بيفهم في مشكلة الصحارى زيكوا) كل المشكلة ان البهوات انضربوا
البهوات انضربوا، وحتى ما انضربوش، دول اتخوفوا واتقلع لهم البنطلون وجريوا استخبوا في البيوت و"كان مفروض يجيبوا لنا غدا وما جابوش حاجة" و"والله ادونا سندوتشات وشنطة فيها كاب وطاولة" طاولة؟ ادوا لكل واحد طاولة في الماتش؟ احيييييه احيييييييه يابو سوسو احيه
وانا مش فاهمة يا اخويا حكاية البنات اللي بتروح الماتشات دي، احنا على ايامينا ما كانوش يرضوا يودونا الاماكن دي، عشان دي بتاعة الرجالة، ده الجمهور الجزائري ما كانش فيه ست واحدة في السودان. وحتى لما بعتوا ست في القاهرة بعتوا واحدة بتدرع، مش هالة صدقي اللي اول ما رجعت من السودان قال: تؤ.. مش حلو.. مش حلو ابدا اللي حصل ده.
وبعدين يدخلوا القومية العربية في الموضوع، وكرامة مصر، وكرامة مصر كانت فين لما الف واحد غرقوا والريس ومراته واقفين يتنططوا في كاس الامم الافريقية ولا كأن الف دبانة اترشوا بيروسول؟ وكرامة مصر كانت فين لما تلاتلاف واحد ماتوا في قطر؟ وكرامة مصر كانت فين لما الامن سلط بلطجية على الصحفيات عشان يقلعوهم هدومهم؟ (طب دول قلعوا لك يا فردوس امال لو كانوا قلعوك كنت عملت ايه؟) وكرامة مصر كانت فين في اقسام الشرطة؟ وكرامة مصر كانت فين والقناصة الاسرائيلي بيتسلوا على المواطنين المصريين اللي في رفح المصرية؟ وكرامة مصر كانت فين لما اتقبض على ابو عمر ولففوه كعب داير في اوروبا ينزلوه ترانزيت في كل حتة شوية ويفضلوا يعذبوا فيه؟ وكرامة مصر كانت فين لما الطبيب المصري اتجلد في السعودية ولية النعم؟ وكرامة مصر كانت فين لما السد العالي بتاعها اتهدد، ماحدش استدعى السفير يعني، وقالوا لنا استدعاء السفير لا يحل الازمات، اشمعنى استدعاء سفير الجزائر هو اللي بيحل الازمات؟ وكرامة مصر كانت فين لما كل يوم والتاني يكتشفوا جاسوس اسرائيلي ويبعتوه لاسرائيل في الكتم على حد قول رئيس الجمهورية؟ وكرامة مصر كانت فين لما شريطها الحدودي ومجالها الجوي فضلوا ينضربوا تلات اسابيع وكل اللي بيعمله حرس الحدود انهم يقولوا للناس ابعدوا من هنا اسرائيل ح تضرب؟ وكرامة مصر كانت فين لما النشطاء الامريكان والاوروبيين حرقوا علم مصر مع علم اسرائيل اثناء حرب غزة عشان اولمرت كان بيشكرنا كل تلات دقايق؟ وللا الايد الامريكاني اللي حرقت علمنا مع علم اسرائيل حرقته بحنية مش زي شعب الامازيغ الهمج؟ وكرامة مصر كانت فين لما اتقبض على مصري واترحل على جوانتانمو واحنا ولا سائلين في قرعته؟ وكرامة مصر كانت فين لما صدام كان بيبعت لنا جثث عيالنا مطعونة في توابيت واحنا عاملين عبط عشان الراجل كانت ايده فرطة ايام مجلس التعاون الخليجي؟
وللا دول عشان غلابة مافيهمش مطرب ولا ممثلة؟
ايه كرامة مصر اللي انفجرت في وشنا بدون سابق انذار دي، ما تردوا؟ ردوا ردت المية في زوركوا ان شاء الله، يا كدابين يا منافقين يا نصابين يا اللي فاتحين مدرسة في العهر والقوادة وكل واحد فيكم قالع لنا هدومه وبيعايرنا اننا لابسين هدومنا؟ ايه حكايتكوا؟ ايه اللي وراكوا؟ اخدتوا قصاد الخراب اللي جبتوه علينا ايه؟

بعتني بكام يا عشري؟

على الله يكونوا اكتر من خمس بواكي، وللا ممسوك عليكوا ذلة وللا اكل العيش مر وللا ايه الحكاية؟

الله اكبر عليكوا.. والله ما ح يسيبكوا

هو حد اهان مصر وفضح مصر وذل كرامة مصر غيركوا؟ الناس عمالة تتفرج علينا وعاملانا نكتة ومستنقصانا

على رأي العراقيين: اكو الله.. اكو الله.. وح يفرجنا عليكوا... وقريب قوي ان شاء الله

قال صحيح ح يشيلوا الدعم من العيش؟