Monday, 23 November 2009

علاء مبارك.. ابن رئيس مسلم لدولة مسلمة

كلمة ابن الرئيس المؤمن علاء مبارك
لا مش الرئيس، ابن الرئيس، يعني، ابن المؤمن الرئيس علاء مبارك، يعني ابن الرئيس علاء مبارك المؤمن، علاء المؤمن مبارك... كدهون يعني
قال لك: انا مسلم، وما باخافش من حد، وح اتكلم حتى لو ح ابقى لوحدي ومافيش حد ورايا!
وقريب قوي ح نعمل تاج في المدونة دي: الحرية لعلاء مبارك. وجابر يعمل له بانر: افرجوا عن علاء مبارك، وقال: مصر كبيرة بحضارتها وتاريخها واسلامها.
صح يا شيخنا، احنا كلنا معاك في الحرب ضد قريش/الجزائر الكفرة الفجرة البلالام الحبظلم بظاظا. بس هو ليه عمرو اديب بيقول له يا علاء؟ هو عمرو اديب واصل قوي كده؟ وانا اللي عمالة اعك فيه؟ هو انا مالي عاملة زي الطور الاعمى ابو قرون وبيدخل في اي حتة كده مش عارف هي ايه؟ بس انا ح اتأسى بالمناضل الاول، زعيم الامة، السيد علاء مبارك سعد سعد يحيا سعد






لا اتأثرت... اتأثرت اتأثرت والدمعة فرت من عيني، خصوصا لما قال انا ما باخافش من حد، ايها الاخوة، ان العملية الفدائية التي قام بها علاء مبارك، دون اية حسابات، وبلا اي مواربة، قد قطعت علينا كل سبيل للتراجع او المهادنة او الاستسلام بعد ان ضحى بامنه ورزقه وحياته وعرض نفسه للخطر وقال: انا ما باخافش. والمرة اللي فاتت بيقول للبيت بيتك مش ح اطول عليكوا ما تقطعوش المكالمة.

انت ياراجل انت بتشتغلنا؟ ده ناقص تشتكي لنا من غلاء الاسعار وتقديم المدنيين لمحاكم عسكرية

طيب يا سيدي المسلم، انا كمان مسلمة، وبما اننا زمايل في الاسلام احب اقول لك الآتي

1- حضرتك اسأت استغلال سلطاتك بوصفك ابن الرئيس وارهبت عدد من الاعلاميين زي شوبير وابراهيم عيسى ومجدي الدقاق واحنا مش في عهد عمر بن الخطاب يا ابن الاكرمين وانت عارف ان احلامك اوامر وبعد مكالمتك بربع ساعة شوبير اعتذر عن زيارته للجزائر

2- يا سيد يا مسلم حضرتك اهنت افراد وشعب، وقلت على روراوة: هوهاوة، وقلت على الشعب الجزائري: ح اديهم على دماغهم. و"عروبة ايه؟ بس يكلمونا عربي بس الاول" يعني بتعايرهم بان كان عندهم احتلال، واخيرا قلت عليهم: ايه البرود التلامة والتلاحة اللي هم فيها دي؟

3- يا سيد علاء مبارك يا مسلم، حضرتك خلقت فتنة بين شعبين مسلمين بدل ما تصلح بينهم، واثرت الناس، وتسببت في فوضى، وهددت السلم الاجتماعي، والامن، وبسببك، تفاقمت ازمة كبيرة قوي بين شعبين مسلمين، بيصلوا لرب واحد وكتابهم واحد، والشعب اللي انت بتقول عليه: بس يكلمونا عربي الاول. مسلمين برضه، والشعب اللي انت اعلنت عليه الحرب والقطيعة وقلت مافيش جزائري يدخل مصر ومافيش مصري ح "اوديه" الجزائر، وانا مش فاهمة انت بتدخل وتودي باي سلطة، ده شعب مسلم برضه، وتعلن القطيعة بين المسلمين وعلى اثر مكالمتك كل النقابات والشركة العربية ومهرجان السينما قاطعوا الجزائر، وانت عارف ان ده بسبب مكالمتك التهييجية، وبسبب مكالمتك الناس نزلت الشارع تحرق وتكسر سفارة ناس مسلمين برضه، والقطيعة دي انت عملتها في الشهر الحرام، والناس داخلة على حج بيجمع بين المسلمين، (تخيل مصري وجزائري اتقابلوا في الحج؟ ممكن يتجادلوا وللا يتخانقوا واحرامهم يتفك بسبب كلمة تقولها لا تلقي لها بالا) والناس داخلة على عيد، عيد المفروض انه بيوحد المسلمين.
4- يا مسلم، اساس الاسلام العدل والمساواة، والعيال بتوع ستة ابريل اللي ما عملوش حاجة في الناس غير ان قالوا لهم ما تنزلوش من البيت، اتقبض عليهم واتبهدلوا واتمرمطوا واتعذبوا ونصهم اتجنن، والنص التاني بيشاور عقله، واسراء طلعت تقول حرمت يا بوجي، بس عشان قالت للناس اقعدوا في البيت.

امال اللي حرض الناس على النزول للشارع في اول مرة، ثم اكد على اهمية المظاهرات في تاني مكالمة، ده اسمه ايه؟
خليك حقاني، اللي سرى على اسراء عبد الفتاح يسري عليك. ده قانون يا استاذ علاء، وبما انك بتقول انك مواطن وفقط، فالقانون يمشي عليك، واحنا تحت قانون الطوارئ، وتحريض الناس على التظاهر ضد قانون الطوارئ، ويا مسلم، الناس سواسية كأسنان المشط. وانت مسلم، وما بتخافش غير من ربك: إن الله يأمر بالعدل والإحسان وإيتاء ذي القربى وينهى عن الفحشاء والمنكر والبغي، يعظكم لعلكم تذكرون.

العدل: انه يتم تطبيق قانون الطوارئ عليك بوصفك محرض على التظاهر.

الاحسان: اللي انت ما عملتوش ابدا مع دولة وشعب مسلمين. وقدرت وما عفيتش، وعارف ان الناس انضربوا عندنا واصريت على انك تداري الحقيقة، بالرغم من ان وزارة الداخلية اعلنت عن اصابة خمسة واربعين جزائري عندنا. اصيبوا من ايه دول؟ اتكعبلوا في السجادة؟

وبدل ما نتعاون مع الفيفا ونعاقب اللي عملوا كده دارينا عليهم مما دفع بالفيفا انها تعاقبنا.

هو ده الاحسان؟ وهل من الاحسان او من العدل انك تبقى عارف ان فيه ناس اتظلمت عندنا ولم ترد اليهم مظلمتهم ولما قدروا علينا انتقموا تقوم بدل ما تداوي الجراح وتلم شمل الناس وتهدي، تقول كفاية بقى كفاية؟ كفاية ايه؟ كفاية صلة رحم؟ كفاية بر بين الاخوة؟

يا مسلم: واخفض جناحك للمؤمنين.

يا مسلم: اشداء على الكفار رحماء بينهم.

5- يا مسلم: ما شفتش اسلامك ده وغزة بتضرب. ما كنت تتصل برضه بالتليفون وتعبر عن رأيك بوصفك مواطن مسلم.

يا مسلم ياللي بتتكلم عن ابن محمد فؤاد اللي بيجيله كوابيس، اطفال غزة بعضهم اصيب بخلل عقلي (مش نفسي، عقلي) بعد حرب غزة، حيث اننا قفلنا عليهم الباب بالمفتاح من برة وسيبناهم ينضربوا جوة.

6- يا مسلم: انت حضرت كاس الامم الافريقية واستمتعت بمشاهدة المباراة وفيه الف مسكين غرقوا في البحر. ما شفناش قلبك اتخلع عليهم زي ماهو مخلوع على اللي كان نايم فوق ابنه. طب ده كان نايم على ابنه عشان خايف من الطوب، امال اللي ناموا على عيالهم عشان نازل عليهم قنابل عنقودية يعملوا ايه؟

يا مسلم: ما يمكن ربنا دوقنا حتة صغيرة قوي قوي قوي من الهلع اللي الناس شافته، شوف الناس اتخضت ازاي من التهويش، مجرد التهويش بسكينة، وشوية طوب اتحدفوا كسروا الازاز لمدة كام ساعة

امال اللي قعدوا تلات اسابيع يخبطوا على بابنا: افتحوا لنا افتحوا لنا. وهم نازل على دماغهم قنابل فسفورية؟

يا مسلم ياللي ما بتخافش غير من ربك: ما سمعناش صوتك خالص بخصوص المظاليم دول، وللا المظاليم اللي اتحرقوا في قطر.

7- يا مسلم: انت السبب في التراشق بالالفاظ ووصول الاعلام بتاعنا لاحط درجة ممكن يوصل لها انسان في العالم لما صحفي يقول: بلد المليون لقيط، واعلامي يقول: الجزائر بنعرفها من نسوانها.

يا مسلم: كنت فين والناس بتصفر وتعمل: بووووو، اثناء النشيد الوطني الجزائري.. نشيد الشهدا، اللي لحنه محمد فوزي. لا وكمان بتدافع عن سلوك الجمهور المصري اللي اهان ناس في كرامتهم الوطنية. وقال: .... امك يا جزائر.

يا مسلم: خليك عادل... خليك حقاني، مدام مش بتخاف غير من ربك، قول اللي ليك واللي عليك، الظلم ظلمات يوم القيامة

الظلم ظلمات يوم القيامة

الظلم ظلمات يوم القيامة

وانا ما اعرفش المسلم ده اللي بيقطع ارحام المسلمين ويشعل بينهم القطيعة والفتن ويستثير داخلهم مشاعر الانتقام تجاه بعض ده يبقى نظامه ايه عند ربنا

يا مسلم

ياللي ما بتخافش غير من ربك

8- خاف من ربك.. خاف من ربك واسكت بقى

من كان منكم يؤمن بالله واليوم الآخر فليقل خيرا او ليصمت. وانت من ساعة ما اتكلمت ما قلتش خير واحد. ما قلتش كلمة واحدة فيها بر، ما قلتش كلمة واحدة فيها صلة رحم، ما قلتش كلمة واحدة فيها اصلاح، ما قلتش كلمة واحدة فيها احسان، ما قلتش كلمة واحدة فيها عفو، حتى لما حبيت تقتص ما اقتصتش بعدل، وعملت رد فعل اكبر بكتير من الفعل. وهولت، واهنت ناس، وجرحت كرامتهم، وقلت عليهم همج، قلت على مسلمين همج، وهان عليك، وطلعت من بقك

يا مسلم انت بقالك كام يوم شاغل المسلمين بتفاهات وسفاهات وادعاءات وتهويلات؟ بقالك قد ايه مدخلهم في صغائر مهولها. يا مسلم اطلب من وزارة الداخلية تجيب لك تقارير عن الناس اللي بيخبطوا على البيوت في مدينة نصر ويقولوا: عندكوا جزائريين هنا؟

9- يا مسلم انت لا غضبان لبلدك ولا غضبان لله

انت غضبان لكرامتك ومصالحك، ليه وليه الناس تنضرب وانت معاهم، والاضرار اللي وقعت على اللي انت كنت معاهم اقل بكتير من الاضرار اللي وقعت على المسلمين اللي في رفح المصرية، اقل بكتير من الاضرار اللي وقعت على بدو سيناء، اقل بكتير من الاضرار اللي وقعت على ركاب العبارة والقطارات وسكان العمارات المنهارة.

اتق الله وما تبررش لنفسك وما تخليش الحاشية تزين لك سوء عملك، وما تضحكش على نفسك وتفتكر انك غضبان لله

انت مش غضبان الله، اللي بيغضب لله يغضب من فرقة الناس، يغضبة من فتنة الناس، يغضب من استغلال الناس. ما يغضبش عشان كان ناس في حاشيته وانضربوا.

10- يا مسلم انت اذيت المسلمين اذية كبيرة كبيرة كبيرة، ارتكبت في حقهم جريمة، اشعلت بينهم العداوة والبغضاء والشقاق وفتنتهم وحرضتهم على اعمال شيطانية واثرت جواهم العصبية ودعوة الجاهلية

يا مسلم، المسلمين واحد، مافيش بينهم جزائري ومصري وهندي وتايواني. ومافيش بينهم ما يسمى بالكرامة، ربنا امر الرسول، وهو اكرم الناس، انه يخفض جناحه للمؤمنين، ما يستخدمش الغلظة والفظاظة والبذاءة وطولة اللسان ويحرضهم على بعض

يا استاذ علاء

يا مسلم

اتق الله

اتق الله

اتق الله

وامر بالمعروف وانه عن المنكر، انت كل اللي عملته لحد دلوقت انك نهيت عن المعروف وامرت بالمنكر، وكل من حاول يهدي بين الناس هاجمته بالاسم وارهبته، واشجع واحد فيهم خاف فعلا، وكل من اشعل الفتن والقطيعة شجعته.

11- وانت شايف اموال المسلمين بتهدر على فريق مهزوم وساكت وانت عارف ان فيه ناس بتاكل من الزبالة

وانت عارف ان فيه ناس نايمة في الشارع

وانت عارف وقبل ده كله ان المنتخب غير مستحق للمال ده لانه مهزوم

ياللي ما بتخافش غير من ربك... ما قلتش كلمة حق في المال المهدر ده ليه؟

يا مسلم

12- المسلم، ما بيمشيش يقول انا مسلم انا مسلم والناس عارفة انه مسلم، والناس عارفة انه ابن رئيس في دولة المحسوبية هي المتحكمة فيها وكأنه بيرهب اللي مش مسلم في الدولة دي او بيقصيه ويحسسه بالعزلة والوحدة ولما ابن الرئيس يقول في سياق حرب بيشنها: انا مسلم، غير لما انا اقول انا مسلمة، انا اقول انا مسلمة براحتي، زي ما انا اقول رأيي في ابراهيم عيسى ومجدي الدقاق وشوبير براحتي، لكن لما ابقى عارفة ان الناس ح تخاف من كلامي لاني ليا سلطة ابقى كيسة فطنة زي ما الرسول قال، ما ابقاش ابن الملك واقول: انا ما باخافش من حد انا مسلم. والناس كلها عارفة ان ما باخافش من حد دي اشتغالة، مين يقدر يخوفك عشان تخاف من حد؟ وبما ان ما باخافش من حد مش معلومة، يبقى الجزء التاني هو اللي معلومة، وبما انه مش معلومة، كل الناس عارفة انك مسلم، يبقى فرمان يا ابن الفرعون الاكبر. يبقى كأنك بتقول ان غير المسلم خواف. وبما انك حبيب الملايين دلوقت، فانت حبيبهم لانك بتخوض حرب على الجزائر، وانت حبيبهم لانك مش بتخاف من حد، وانت حبيبهم لانك بتشتم الناس وتغلط فيهم وتهينهم، وانت حبيبهم لانك مش ح تسكت زي ما قلت، وانت حبيبهم عشان انت مسلم! طب ايه رأيك ان فيه ناس مش مسلمة، ومش بتخاف برضه، وهم جزء من رعاياك يا مولاي، وما طلبوش منك تبقى مش مسلم، بتقول لهم كده ليه؟

ده بالنسبة للي مش مسلمين وابتديت بيهم كحسن الضيافة يعني
اتكلم بقى عن نفسي، ايه انا مسلم دي بقى؟ وانا ايه؟ حاطة هبل في اودتي وبالف حواليه نحن غرابة عت عت مثلا؟ طب انا مسلمة ومش موافقة على كلامك، وانت ابن الرئيس، ومسلم، يبقى ايه؟ اترفدت انا من الاسلام دلوقت؟
ايه انا مسلم دي مش فاهماها، انا مسلمة، ومش بامشي اقول: انا مسلمة انا مسلمة انا مسلمة انا عتريس انا بلوى سودا
المسلم بيقول انا مسلم لما حد بيسأله: انت دينك ايه؟ فيجاوب مسلم. لما واحد كل الناس عارفة انه مسلم مش بيقول انه مسلم.
المسلم بيعمل اعمال المسلمين والناس عارفة انه مسلم ولما تشوف افعاله تقول ده مسلم صالح ولا نزكي على الله احدا

لما "الامير" يهتف بحاجة يبقى بيثير في الناس حماسة معينة، في اول مكالمة قلت "انا مصري" عشان تثير حماسة شوفونية في اتجاه معين. لان كلنا عارفين انك مصري، فدي مش معلومة، ده هتاف. ودلوقت بتقول "انا مسلم" عشان تثير جوة ناس حماسة دينية وتوحي لهم ان قطيعة الجزائر جهاد في سبيل الله، وعليه، فكل من يخالفك من المسلمين يبقى متخلف عن الجهاد في سبيل الله. يعني زايدت على وطنيتنا ودلوقت بتزايد على دينا. اثرت نعرة شوفونية، ودلوقت بتثير نعرة طائفية.
وتقول ما تخافش غير من ربك؟


13- يا مسلم بيريز هنا، بيريز القاتل، على ارضك وفي بلدك ووالدك بيقابله في نفس التوقيت اللي انت بتقول فيه لسفير الجزائر: لو عندك كرامة امشي مش عايزينك.

في نفس الوقت اللي انت بتطرد فيه مسلم من ضيافة المسلمين، قاتل الناس، الاطفال والابرياء والنساء والعزل، على ارضك نازل اهلا وحالل سهلا

هو المسلم بالكلام؟ ما كانتش العين بكت
مش ح اقول لك، يا مسلم، غير كلمة واحدة، لو كنت فعلا بتخاف من ربك:
حسبي الله ونعم الوكيل
حسبي الله ونعم الوكيل
حسبي الله ونعم الوكيل
ربنا بينا وبينك... انت عملت جريمة، جريمة، جريمة، وربنا ح يحاسبك عليها
لو مسلم صحيح وبتخاف من ربك، اقبل النصيحة لله، وخير الخطائين التوابون. ولو فضلت تكابر، فلا يدخل الجنة من كان في قلبه مثقال ذرة من كبر.
واستفت قلبك ولو افتوك، لو ترضى ان حد يعمل كده ما بينك وبين جمال اخوك، استمر في اللي بتعمله ما بين مصر والجزائر
"فهل عسيتم إن توليتم أن تفسدوا في الأرض وتقطعوا أرحامكم؟"
ده الرحم اللي بينا وبين الجزائر، رحم تاريخ، ولغة، وقارة، وعروبة، ودين، وحتى حامض نووي.

57 comments:

lastcrazyboys said...

انت لســة مصــرة انه ابن الرئيس اللي بيتكلم
ما الراجل قالها وعــادها "خماشــر" مرة " ..انا بتكـلم بصفتي مواطن "بيقف في فرن العيش ..وبيدفـع المخــالفة ..وبيعمل جمعية عــشان يقبضها الأول " والراجل زي اي "شـاب" مش هيسيب الأعبـاء اللي على كتفه ..والدنيا الصعبة في البلد..ويطلعوله الجزائريين ينكــدوا عليه هم كمــان
==

اه بالنســبة لمقال ابراهيم عيسى اللي بتنتقديــه ..فأولا: القرصة كانت شديدة شوية ..وعيسى راجل بيحترم الاتفاقيات
ثانيا : حتى لو نحينا السبب الأول جانبا..تقدري تقوليلي : ايييه اللي يتمسك فعــلا على عــلاء..!! كله كلام مرسل..ملوش اســانيد

يعني ممكن يشيعوه ..وميري ..بالقــانون

أخيرررا بقى..ايييه حالة الشيزوفرينيا اللي انا فيها دلوقتي ..انا بجــد الراجل مخليني منتشي فكريا " زيي زي اي فرد من في الشــارع برضه ..ومحدش يعاملني بحكم منصبي"
وفي نفس الوقت بتريق على الموقف..طب تيجي ازاااي
يمكن تكون ردة الفعل المبالغ فيها من
!!!..اللي حواليا..خلت الجانب ده يتغلب

Hani Gamal said...

عشرة على عشرة ، مش لاقى كلام أقولوا ، مقالة هايلة

جبهة التهييس الشعبية said...

لاست كريزي بوي
ههههههههههههههههههههههههههههههه

انت اسكندراني وللا ايه؟ اصلك بليغ قوي

هاني

شالله تسلم وتعيش يا جابر بخاطري

بهيج الشرير said...

بوست حلو بجد ياأبلتي، وبرضه والنبي ماتنسيش موضوع دماء المصريين وكرامة البلهارسيا علشان عايز أطلع في التليفون وأتكلم في التليفزيون

lastcrazyboys said...

هع هع هع

يمكن عشــان كنت بكلم "ولا " اسكندراني ساعتها..بس انا لو كنت اسكنــدراني بجد ..كنت اديتها واحــدة اسكندراني ..زي عزت العلايلي في اسكندرية ليه بعد اللي بيحصل

عارفة ..يمكــن يكون مش وقته بس اجمل شيء ان الواحد يكــون من كل شبر من البلد دي
مش شعارات ولا انشــا
في حاجة محدش يعرفها غير اللي لف المحافظات دي حتة حتة..ولما تسمعي واحد متقوليش ده صعيدي..لأ
ده من سوهاج ..او من اسيوط او من قنا
لأنك غصتي في قلب اللكنة
والأهم ان اكتر حاجة تحبيها في الناس لما تطول رحلتك: عيـــوبهم

عليا النعمة انا بقول شعر يا جدعاااان ..بلا جمال بخيت بلا بتاع
هع هع
===
اااه بالمناسبة دي .شوفي السبق الصحفي بتاع البيت بيتك ..اللي اتعمل كليب بيتذاع كل 3 دقائق على مزيكا وراها اغنية لمبارك اولها الخطبة بتاعة امبارح
http://www.youtube.com/watch?v=8yQa-42ZdnQ

اسمعي وقوليلي رأيك ..مش تقوليلي ..مش باقي مني غير شوية دم

مهندس حر said...

ده إنتى ربنا فاتح ليكى أبواب البلاغة اليومين دول على مصراعيها.. إنتى بتلحقى تكتبى الكلام ده كله إمتى؟.. و الأهم جايلك نفس تكتبى؟ .. أنا بفتح الوورد و دماغى مليانة كلام و بعد أول جملة كأن الكلام جردل مية إترمى عالرمل و راح و ما يبقاليش غير كرشة نفس و رغبة فى الهروب للبلكونة مع سيجارة أحرقها و تحرقنى..

على العموم كفاية إن فيه حد قادر فى الأيام دى يكتب و لسه العتمة ماخنقتش حسه .. و أنا اللى كل يوم بيعدى أقول أهى جابت آخرها و ماعادش بعد ضلمتها ضلمة و سبحان الله يخلق مالا تعلمون يجينى نهار بعتمة أشد تخلى اليوم اللى فات كأنه الصبح المبين!!

أنا عارف إنى بهلفط بكلام خارج الموضوع .. بس إنتى عارفة كلامى فى الموضوع و مش محتاجانى أكرره و لو حد تانى يهمه يعرف فكلامك لسان حالى عوضنى الله به عن لسانى المحشور فى حلقى..

شكرا يا نوارة..

حـنــّا السكران said...

تسلم إيدك يا نوارة .

ـ هو قال انه انا مسلم و نحنا بنحترم كل الأديان , بنحترم اليهودية و المسيحية ... و بعد شوية قال : هم ليه يكتبوا هالكلام عن حسن شحاته .. هو يهودي ؟؟؟ ههه
والله شي بيضحّك .
ـ عمرو أديب حكاية .. حكاية بلدان مش بلد واحد .. هذا الجيل من الإعلاميين قضى على كل شي محترم في مهنة الإعلام .. و من وراهم صاروا الرقّاصات و الممثلات و الخولات و المغنيات يطلعوا يقدموا برامج كمان .. و الممثلات يغنوا .. و المغنيات يعملوا أفلام إباحية .و تاني يوم يستغلوا شهرتهم من ورا الفيلم الإباحي و يعملولهم ألبوم غنائي أو فيلم سينما .. عمرو أديب إعلامي على هذه الشاكلة ..

Phobos said...

Keep it up ya Nawwarah ... you are on fire ( kwayyes ya3ni :D)

الشاطر حسن said...

الله يفتح عليكي..
حسبي الله فيهم وفي كل اللي معاهم
الله يفتح عليكي يا شيخة
ربنا يخليكي وينصرك وينصر كل اللي بيقروا كلامك ويرتاحوا
وأنا منهم
شكرا يا نوارة.. باقرا مدوتك عشان أحس إن لسه عندنا بني آدمين
شكرا شكرا شكرا
دعاء سلطان

جبهة التهييس الشعبية said...

دعاااااء حبيبتي

معلش يا شباب

لزمن ولابد ارحب بدعاء سلطان اولكش

واضرب احلى تعظيم سلام

ده النور فج في المدونة

جبهة التهييس الشعبية said...

لاست كريزي بوي

الله

ايه العصيدة دي؟ نزل عليه الوحل امتى محمد سعيد ده؟

شفت وصلة المعايرة وبعدين الطرد وبعدين التكفير

ايه العثل ده؟


مهندس حر

ههههههههههههههههه لا مش بتهلفط انا فاهمة بتقول ايه

بس بيقولوا الستات لما بتضايق بترغي كتير والرجالة لما بتضايق بتجيلها كتمة وما بتقدرش تتكلم

انا من الغيظ باكلم نفسي


جو

عمرو اديب كل حلقة يلحس جزمة السعودية ولية النعم

ومراته ما وراهاش الا ساويرس

انا عايزة اعرف هم عايشين ليه؟ يعني ايه كنههم في الحياة وسبحان الله ما جمع الا اما وفق

Phobos

ههههه اه واخدة بالي انك تقصد حاجة كويسة

حسن مدني said...

شوفي يا نوارة

هو فيه نقطة واحدة أعتقد إنه أشار إليها، وأظنها صح جدا.
إن اللي غلط لازم يتعاقب.
أظن دي متفقين عليها؟
أي حد تجاوز لازم يتحاسب، هنا او هناك، في الملعب أو في الإعلام أو في الشارع؟
كله لازم يتحاسب.

غير كده، كلامك تمام التمام وأنا متفق معاكي..

بس في التحقيق،حاقول أنا مسلم، ومش باخاف غير من ربنا، وحاقول زي اللي قاله الشاب المسلم المصري اللي مش بيخاف من حد..

تحياتي

جبهة التهييس الشعبية said...

اللي غلط يتعاقب بما فيهم المشجعين المصريين

وقبل ما نطالب ان غيرنا يتعاقب الامانة والحق والدين والاخلاق وحتى المهنية تحتم علينا اننا نعترف بان الاتوبيس اتضرب مش يفضلوا في الاعلام يقولوا كانوا بيمثلوا

مع ان الفيفا عاقبتنا

بس كده الاعلام اخذته العزة بالاثم

وكل اللي مصر على ان الاتوبيس ما اتضربش واخداه العزة بالاثم

dalallaila said...

الله ينور عليكي يا نوارة.. تسلم ايديكي..
دلال

mido said...

بالنسبة لمقال ابراهيم عيسى

ابراهيم كتب المقال قبل علاء مينتقده بأكتر من 8 ساعات

يعنى قبل الساعة 3 عصرالعى أقصى تقدير لكن علاء اتكلم فى البيت بيتك الساعة 10.30 م او اكتر


الا بقى لو ابراهيم بينجم و عارف ان علاء حيهاجمه فى المستقبل القريب

راح كتب مقاله ده

!!!!!



Kontiki said...

صباح الخير يا نوارة
مفيش حاجة تتقال بعد اللى قلتية
حسبى الله ونعم الوكيل فى الظلمة المتكبرين اللى بيستغلوا الشعب سهل الانقياد اللى معندوش قضية حقيقة ولا قيمة مؤمن بيها عشان كدة اى شوية هطل فى التليفزيون بيحركوه !!
وفى لحظة تلاقيهم قاموا على شعب من اخواننا وحتى لو مش بيتكلموا عربى وحتى لو غير مسلمين لازم فى النهاية نحترم الانسان. نحاسب المخطىء ومثير الشغب انما مش نغلط فى امة بحالها ونعاير و نشتم و نوصف باحقر الالالفاظ

m5m said...

ههههههههههه

خدتى بالك من أخر ثوانى فى الجزء الأول من المكالمة لما علاء رد على أديب وبيقولله أنا مش فاكر انى قلت كده بس لوكنت قلت يبقى تمام؟

عمرو أديب بيحط له الكلام فى بقه

.............

سيبك بقى...ممكن تفكرى تانى فى الاقتراح اللى قلتهولك قبل كده فى البوست قبل اللى فات (بوستاتك كتير قوى يانوارة) انك تبطلى بقى بوستات اللطم والنواح والدعا دول اللى مطلعينك جزائرية أكتر من الجزائريين وتنزلى بوست هادى متوازن يقترح حلول وكلنا نقول حلول لانقاذ مايمكن انقاذه بدل ماكل واحد داخل يهوى ع الولعة؟

Amr said...

كفيتى ووفيتى يانواره
بس نفسى ربنا يكرمنى وأشوفهم يوم الحساب
اللى بيفتن شخص كأنما فتن الناس جميعا"
طب اللى بيوزع الفتنه بدون حساب على أكتر من مليون شخص ربنا هايبصه ازاى يوم الدين ؟

التاريخ يعيد نفسه - حلمت خير اللهم أجعله خيرا" بمانشيت للأهرام


مصر ترحب وتعترف بالجميل للأخوه الأسرائليين لمساندتهم لمصر فى ثورتها العظيمه ضد المحتل الجزائرى

الحكومه الأسرائيليه تعد بتدخل الجيش لمساندة مصر عندما يفرغ من القضاء على غزه وأهلها

صوت الحق said...

يا نوارة علاء مبارك مش سياسي يعني ميعرفش يقول ايه و ميقولش ايه بيتكلم علي طبيعته كدة لكن انتي قاعداله عالكلمة هو مش عامل حسابه علي كدة هو الغلط انه كل يوم بيطلع في برنامج و هو غير مؤهل لكدة

Dr Nemo said...

بضم صوتى لصوت مهندس حر
انا حتى كتبتها يجى اربع مرات فى اربع ايام ورا بعض على تويتر
اقولكوا انا قرففففففففففت وداخل انام
بس انتى طلعتى كل البقلايظ اللى كانت محشوره فى غدة الفذلكة بتاعتى
تكرمى

الصيق الصدوق said...

اكيد احنا والجزائر شعب واحد واللي بينا اكبر من اللي حصل ودي ازمة وهتعدي ومش لازم نخلي الازمة تتحول لحقد بين الناس بين الشعب هنا وهناك انا مقتنع بالكلام ده مليون في المية
لكن اسلوبك وطريقتك من اول الحكاية اللي انت مسمياه عقل هيكون نتيجته لو كل الشعب تابع مدونتك انه هيتجنن اكتر واكتر والازمة هتولع ليه؟
لانك من الاول اعتبرتي الشعب خصمك بدون اي مبرر فقط لانه خرج في الشوارع والمبادين فرحان بالفوز فرحة بريئة ملهاش اي علاقة بحد من الحكومة لان بكل بساطة الناس ملهاش اي صلة بالحكومة وده على فكرة كلامك القدبم
من هنا بدأ ت البوصلة عندك تتوه شوية
واصبحت مرتبكة اسف بس ده رأي المتواضع
وخد عندك كل كلمة من مصر كدب وتزوير ماشى انت ليكي خبرة طويلة باساليب الحكومة وكل كلام الجزائريين اصبح مقدس عندك طيب ما هي نفس اساليب الحكم عندهم وده
رأيك انت وبيستغلوا الكورة علشان يلهوا شعوبهم
واصبحتي تجهدي نفسك لانكار اي شكوى مصرية شركات ساويرس اللي اتحرقت ده تفسيره عندك مؤامرات بين مصريين علشان يحلوا مكانه بالرغم ان مفيش شرطة خالص حاولت تمنع الغوغاء دول عكس الشرطة عندنا منعتهم يقربوا من سفارة الجزائر
وبرضه مكتب مصر للطيران خربوه بسبب مؤامرات وهمية
واحنا ضربناهم وكسرنا الباص وكمان طلعنا جبناء لكن هما وده كلامك علموا علينا بالمطاوى والسنج وخلعوا بناطيلهم قدام البنات والستات بس فضلوا واقفين شوفي الشجاعة هو ده الفرق وبعدين لازم تعرفي انهم مش عايزين لا يقتلوا ولا يدبحوا هم عايزين يهينوا ويرعبوا فقط ده شغل المجرمين المحترفين ودول لو ناس عاديين او هواه كانت حصلت مجازر
وبعدين انا مصدقك ان الكليب ده مش في السودان بس الاكيد انه في ملعب كورة مش كده انا عمري ماشفت مشجعيين كده ابدا بس انا خايف يطلع كليب تاني يثبت برضه انهم مش جزائريين او مثلا مصريين ومفبركينه مخصوص للازمة دي
لكن يستاهلوا البنات والستات والشباب والرجالة اللي راحواعلشان دول جمهور سيس لو الجمهور السيس زي مابتوصفي الجمهور المصري
كان مثلا عامل وقفة تأييد لغزة او تنديد بالخرب على لبنان وانا بقول مثلا
راح شوية بلطجية من اللي عرفاهم عمل فيهم زي ماحصلهم فى السودان كنت هتتريئي عليهم بكلامك واوصافك الغريبة دي لا طبعا مش بس كده كنت عملتلهم كام بوست علشان تاخدي حقهم وتنددي بالاجرام والوحشية دي
شوية عدل فى كلامك لو سمحتي


ولو الحكومة بعتت جمهور الكوروة العادي ببلاش وعلى حساب الحكومة كنت ساعتها كتبتي وقلتي مش الغلابة بتوع الدويقة اولى من لعبة ملهاش لازمة ولو بعتوا بلطجبة وحصلت مدابح كنت قلت مش حرام عشرات القتلى دول وحسبي الله فيكوا وكلام من نفس العينة دي
مش ممكن كده لازم يكون عندك توازن علشلن كلامك يكون ليه تأثير عند الناس المصريين طبعا ويكون ليكي دور في وقف الفتنة لازم يكون حساب والمخطئ يتعرف على الاقل ماتتكررش الفتنة دي تاني
وتفضل علاقتنا احنا الشعوب بدون ازمات
وطبعا ده دور الحكومة هنا وهناك بعيدا عن كل المهاترات والشتائم على فكرة ادخلي على مواقع الجرائد الجزائرية هتلاقي كمية شتائم اكتر واسوأ بكتير من اللي يتسمعيه في اعلامنا
معلش طولت عليكي واسيبك لقول خاتم الانبياء والمرسلبن
قال رسول الله صلى الله عليه وسلم: انصر أخاك ظالماً أو مظلوماً، فقال: رجل يا رسول الله صلى الله عليه وسلم أنصره إذ كان مظلوماً، أفرأيت إذا كان ظالماً كيف أنصره؟! قال: تحجزه أو تمنعه من الظلم، فإن ذلك نصره

Sarah said...

Well Said.

almodather said...

سلام عليكم
الصراحةأنا أول مرة اشاركم في البلوج
دي
ومتزعليش مني اول تعليق ليا هيبقي نقد
علاء مبارك اللي انتي خليتيه زي فتافيت الخبذ المبعثر وسط الطريق ميستاهلش منا كده
لان احنا بجد شعب مبيعجبناش حاجة
اول حاجة الراجل ده لو كان عايز يبقي رئيس دولتك هيبقي رئيسها وهوا مبيسلكش اي مسار حكومي يعني لا وزير ولا سفير ولا حتي ساعي ضرايب
:)
أنا عايز اعرف مثلا انتي ايه اللي يرضيكي

ناس اهانونا وضربو اخواتنا وبناتنا وشيوخنا وطردو المصريين من هناك ورافضين يعتذرو عايزاه يطلع يقول ايه؟
يقول الجزائر الشقيق والعروبة ؟
مافي ستين داهية العروبة لو كرامتنا هتبقي بالشكل ده
خلاص بقينا ملطشة للي يسوى واللي ميسواش يدونا علي قفانا ؟
اه طبعا منسكتش علي حقنا وناخد وقفة ومش عايزين السفير
اللي علاء مبارك بيقولو بيقولو زي اي مواطن عادي كلنا حاسين باللي هوا حاسو ده
اه نديهم علي دماغهم لو محترموناش ايه الغلط في كده

وبعدين كل المقال ده طلع علشان راجل طالع يقول ناخد حقنا ؟
خلاص انتي بيعتي اللي حصل ونسيتيه ومستنيه نقطع في فروة بعض ؟
بجد ليه كده بناكل في بعض وسايبين الناس ييجو علي حقنا يا شيخة انتي بتتكلمي عليه هوا بس انو جاي يتكلم الوقتي بس ومتكلمش في موضوع غزة , طيب مانا عمري مشفت تجمهر في الشارع المصري زي مكان يوم الماتش
المرة دي اتجمع اراءنا بجد
بس حتي يوم غزة متجمعناش زي اليوم ده
بصي حطيها حلقة في ودانك ( اللي يوطي راسو يستاهل الضرب علي قفاه ) والراجل مقالش غير كده قال متسكتوش
انا اسف معارضك في كلامك بس دي وجهة نظري
تحياتي
المدثر جبر

حسن على said...

هامش جانبى صغير: النشيد الوطنى للجزائر ,من الحان الاستاذ -العظيم -احمد صدقى, رحمة اللة علية

فتاه من الصعيد said...

أنا ملاحظه ان علاء اتكلم في برامج كتير اوي

بجد في حاجه غريبه .... مش من عادته الرغي ولا الظهور

بس هو بيقول لازم نعمل حاجه .... مفيش حاجه اتعملت غير الرغي والشتيمه على الجنبين

طيب لو الحكايه حكايه بزنس .... ما اعتقدتش ان يلزمه تلات برامج ومداخلات كتيره كده

تحياتي

بنت مصرية said...

تسلمي من كل فتنة وكل علاء

الله ينور يا نوارة :)

فتاه من الصعيد said...

معلش تعقيب

ولو مساله كرامه لانه كان معاهم .... برضو ليه تهييج الناس كده .... ما يعمل اللي في ايده من سكات .... ماهو واصل واحنا اصلا موش بايدنا شيء اصلا

ولو هيسحبوا الشغل من الجزاير .... ماهو فيديو سرقه الاجهزه من اوراسكوم كافي لاننا نفهم وكده

انا بفكر بصوت عالي بس ..... موش فاهمه

تحياتي

حسن على said...

مهندس حر:ده إنتى ربنا فاتح ليكى أبواب البلاغة اليومين دول على مصراعيها.. إنتى بتلحقى تكتبى الكلام ده كله إمتى؟" (يؤتى الحكمة من يشاء,ومن بؤتى الحكمة فقداوتى خيرا كثيرا) صدق اللة العظيم"

الصارم الحاسم....يوما هل أكونه said...

وهو ده الاسلوب الصح
؟

كلامك في مضمونه وفي افكاره صحيح تماما....لكن الاسلوب


ما هو هدفنا الاساسي من كل المعارضة اللي بنعملها سواء صوتيا او كتابيا او فعليا
؟

هل ما نريده هو تسجيل موقف وفش غل...ام اصلاح للناس حولنا
؟

والناس دول اللي نتمنى اصلاحهم يتضمنوا ابن الرئيس والرئيس ان امكن - ده ان امكن

ودي اول طلعة لينا مع علاء...نشحوره كده
؟

يعني ده مش واحد له تاريخ طويل معانا زي مبارك الاب او جمال او نظيف او العادلي او طنطاوي او او او

وبعدين اتهمه البعض بالدفاع عن مصالحه المالية ....اتهام مرسل دون دليل..ماذا لو كان صادقا في انفعاله
؟

يبقى احنا عملنا ايه
؟

اعنا الشيطان عليه واعناه على الاستكبار

لو فيه دليل ماشي لكن كلام مرسل

نقطة انه زعلان ان ابوه بيتشتم...ابوه واخوه لازم يتشتموا لانهم هم من لغوا معارضة محترمة تستطيع محاسبتهم وتصحيح مسارهم بالحسنى وبالدستور...لكن هو ما فعل
؟

فيه حاجات ناقصة...فيه ناس كتير عندها حاجات ناقصة واحنا عندنا حاجات ناقصة وهو اول مشاركة ليه فعليا...نقرفه ونرفضه
؟


انا مش خالف تعرف معاكي ومش قصدي اني اكون خالف تعرف - وبالمناسبة مش اذا خاصم فجر لاني اذا كنت كده ماكنتش جيت علقت عندك مع كل ما تفعليه معي وما شاء الله عندك من المعلقين ما يكفي ويزيد لكن باتعامل بنفس القاعدة اللي ذكرتها اعلاه لاني اجد افكارا كثيرة جيدة هاهنا


ما اقوله انه رويدا شوية...ان احد من المرتبطين بالحكم اظهر شئ يبدو انه جيد ورغبة في التواصل فلا نرفضه مباشرة...نرى ما عنده وبعد كده نتعامل معه

والموقف ده لازم يبقى في حله شئ من الحزم مع كثير طبعا من العقل والحكمة ايضا لكن شئ من الحزم...شد وجذب يعني مش تراخي ولين فقط...وأنا ادرى بالجزائريين وكما كنت ادافع عنهم من قبل فازعم ان اعلم كيف يمكن التعامل مع المتعصبين منهم

amksep said...

"والمرة اللي فاتت بيقول للبيت بيتك مش ح اطول عليكوا ما تقطعوش المكالمة.

انت ياراجل انت بتشتغلنا؟ ده ناقص تشتكي لنا من غلاء الاسعار وتقديم المدنيين لمحاكم عسكرية"

مش ممكن هاموت من الضحك

سبهللة said...

بصى انا هابطل ادون وكفاية اقرا اللى انتى بتكتبيه
الله يفتح عليكى يا شيخة
وجزاكى الله خيرا
بدعى ربنا ليلي نهار
ان الغمة تتشال من على عيوننا ونعرف ان الناس دى اخواتنا
وما نقطعش رحمنا معاهم عشان ربنا ما يقطعناش يوم القيامة

dr.gesho said...

يا جماحه انتوا ظالمين الراجل
المواطن
المسلم
الغلبان
الطيب
الحنين
اللى قلبه قلب خسايه
بس اوعى الجمبرى يعضكوا بقى
حسبنا الله و نعم الوكيل
تحياتى

طبيب .. احترفت الاعمال said...

والله تسلم ايديكى يا نوارة

لازم الكلام ده يوصل للناس
زى ما الغوغاء كلامهم ملأ السمع والبصر

تناقضات مضحكة فى

كم ذا بمصر من المضحكات
ولكنه ضحك كالبكاء

عذرا أهل الجزائر
واقتبس ما قاله عبد الرحمن يوسف وهو يعتذر فى لبنان عن مواقف مبارك الأب

لستم صغارا لأن فيكم صغار
ولسنا حميرا لأن فينا حمار

soreal said...

funny that mona talks about ireland... just a few days ago, there were demonstrations and calls here for boycotting the french goods because of what happened during the recent world cup match between them.

while the irish do have a justified right to do that.... nevertheless;
football is just one kind of the opium(s) available for the dumpified masses..

زقزوق said...

روعة روعة
ممكن تمضي لى على الاتوجراف دا؟

walaaz said...

أنصر اخاك ظالما او مظلوما

دى حلقة الشيخ القرضاوى على الشريعة والحياة عن دعوة الجاهلية اللى بتحصل

http://www.youtube.com/watch?v=-wuqv52PwI0&feature=player_embedded#

naalco72 said...

نوارة اريد في البداية ان احييكي على مدونتك و عقلك الرزيين, انا لم ادون او اكتب في حياتي في اي مدونة من قبل مع اني كنت اتابع مدونتك لفترة ممتدة منذ 2007 وحتي الان و التي وقعت عليها بالصدفة خلال بحثي في الانترنت. خلالها لم يكن ليجذبني اي موضوع للمشاركة به وخاصتا ان معضم المواضيع كانت تخص مصر. و لانني من مواطني سوريا فلم يكن لي ان اشارك في امور وحوارات تخصكم و انتم اعلم بها مني. ولاكن كانت تستهويني كتاباتك وتعليقاتك وتعليقات الاخريين. إلى ان حدث ما حدث بخصوص المبارات و ما تبعها من امور رجوت ان لا تحدث بين بلدين عربيين شقيقين.
لقد تابعت كل ما كتب من تعليقات في مدونتك و غيرها من المدونات و المواقع الاخبارية. خلالها اثارني كثير من التعليقات من الاخوة المصريين و الجزائريين وبخاصة حيين ما يحطون جام غضبهم على العرب و العروبة و القومية و تناسو رابط الدين في بعض الاحيان او جله. خلالها كان عقلي ينهيني في كل مرة هممت بالرد على معلق ما لعلمي اني سوف اشطح في الرد بشكل صائب او غير صائب فقط لاثبات فكرة ما قد اكون غير مقتنع بها وفي النهاية ستجرح من جرحني. وكان الحل ان اقنع نفسي باني "صائم عن الكلام" "صائم عن الكلام" "صائم عن الكلام" "صائم عن الكلام" لا لشيء اكثر من علمي اني ساحاسب على ما ساقوله او اكتبه في يوم ما بطريقة ما و ساندم يوم ما و الدنيا دوارة. فالحمد الله اني لم اشمل في دعواتك عن من اشعل الفتنة وقد كانت نائمة.....

كانت لدي قناعة ثانية بمثابة الحل لعدم الخوض في صراعات ذات مقصد اضاعة الوقت و الرغي, الا وهي "ان كل ما يصدر من البشر من تصرفات او اقوال او افعال او احكام مسبقة او حب او كره او حقد و الكثير غيرها, هي شيء طبيعي يعبر عن طبيعة البشر التي جبلو وخلقو عليعها", وهاذا فسر لي وهون لي الكثير مما حدث. فكان من الطبيعي ان يكون حالة المصريين و الجزائريين و العرب علي ما هم عليه و ان تكون ردات الفعل و الاقوال غير موزونة و مربكة ذات تعليلات مهزوزة. اي اننا نفعل كل ما بوسعنا لاثبات ما لا لزوم لإثباته ولا طائل من إثباته لا لشيء غير لإرضاء طبيعتنا التي جبلنا عليها.
يكفيني تفلسفا و لا أريد ان استمر في شرح و تشريح الفكرة و الاشخاص و المدونون إعتبرها طريقة لإلتماس العذر للأخريين.

سيدة نوارة مع اني قلت اني سوري ولاكن كان لي الشرف و الحض اني تعاملت وتربييت مع مضم الجنسيات العربية و الاجنبية و بالاخص المصرية
و الجزائية و اعرف الشخصية المصرية و البشخصية الجزائرية عزة المعرفة حيث اني ترعرعت في الجزائر لدرجة اني كنت اتقن لهجتهم و تربيت مع المصريين وزرت مصر ولي اولاد عم نصفهم مصري مع اتقان الهجة المصرية كما لي اولاد خال نصفهم جزائري اي ما اريد ان اصل اليه اني لست بغريب عن طباع الشعبيين.

الشخصيتين متشابهتين تاكيدا لما دونتيه, الطرفيين طيبون و عاطفييون و يستثارون بسرعة دون الرجوع الى لغة العقل و تقويم ما ينطق ان كان صح ام غلط, المهم ان اجرح المقابل لي بالقدر نفسه و اكثر فقط لاشباع غريزة الانتقام الشخصي المربوط بإحساس الانتصار؟؟؟؟؟

في نهائية المطاف طبيعة البشر تتغلب على العقل عند الكل و تحجم عند البعض الاخر باستخدام العقل و هذا ما اضنك تمارسينه.

انكم اخوتنا لا جدال في ذاك. ما انتم عليه هو ما عليه جميع العرب. ولكم حق على اخوتكم كما لإخوتكم حق عليكم ولاكن ما باليد حيلة لا منكم و لا من إخوتكم.

ارجو المعذرة حاولت ان لا اقع في الفخ المنصوب قدر المستطاع لكي اكتب بشكل غير منحاز. اعذريني على الاطالة .

loly said...

انا مش مع الكلام ده بصراحة مع اني مش مع سياسة حسني مبارك ولا مع الحكومة انما الحق يتقال برده يعني الراجل لو عنده ولد سياسي زيه مكروه ولو عنده ولد دمه حامي زي باقي الشعب ومن حقه يتكلم ماهو شاب برده وألا ده مش زي اولادكم او اخواتكم وعنده حميه زي باقي الشعب والا انتم فرحنين اوي بالسكاكين والمطاوي والسنج اللي رفعها الشعب الجزائري ولا يعني المصريين مكتوب عليهم طول عمرهم انهم يفضلوا بدون كرامه وموطيين الراس وأل ايه كبار هو الكبير يتهان ويتبهدل ؟ لأ دي مش حكايه كبر بقا دي حكايه قلة كرامه

loly said...

انا مش مع الكلام ده خالص بصراحة رغم اني عمري ما اتفقت مع حسني مبارك ولا مع سياسة الحكومه بس يعني لو الراجل عنده ولد سياسي زيه مكروه وده طبعا مبدأنا كلنا بما اننا بنكره جمال مبارك طبعا ولو الراجل ظهر له ولد زينا دمه حامي وعاوز حق المصريين وبيتكلم وبيتحمق زي حمقتنا كمان مش عاجب؟ طب يعني يولع في اولاده الاثنين والا ايه ؟ وبعدين مابرده علاء ده بنيآدم ومن حقه يقول رأيه ما احنا ياما بنقول حتي في ابوه والا هو مش بنيآدم زي اولادكم او اخواتكم والمفروض ما يبقاش له رأي في اي حاجه لمجرد ان ابوه الرئيس ماهو كده يجيله اكتئاب يا جماعه وألا ايه وألا انتم يعني عاجبكم اوي ومنغشش في دماغكم منظر السكاكين والمطاوي والسنج والاخشاب اللي كان ماسكها الجزائريين والله ده لو الاسرائيليين اللي معاههم في المباراه وقاتلين عيلتهم كلها مش هيقدروا يمسكوا سكينه واحدة من اللي مسكوها دي وحسبنا الله ونعم الوكيل

m5m said...

يانوارة

ياريت تفكرى زى ماحطيتى النشيد الوطنى الجزائرى فى السايدبار تحطى كمان النشيد الوطنى المصرى

وبعدين هو فيه نشيد وطنى 6 دقايق؟

مخبر قمل دولة said...

تحفففففة
تحففففففة
والله انتي زي العسل
انا كركرت ضحك ف اول التدوينة
وانتي بتقولي
صح يا شيخنا، احنا كلنا معاك في الحرب ضد قريش/الجزائر الكفرة الفجرة البلالام الحبظلم بظاظا. بس هو ليه عمرو اديب بيقول له يا علاء؟ هو عمرو اديب واصل قوي كده؟ وانا اللي عمالة اعك فيه؟ هو انا مالي عاملة زي الطور الاعمى ابو قرون وبيدخل في اي حتة كده مش عارف هي ايه؟ بس انا ح اتأسى بالمناضل الاول، زعيم الامة، السيد علاء مبارك سعد سعد يحيا سعد

نور الدين said...

تقدير عميق لذاك لقلم النابض بالحق
الذى استطاع بتميمة سماوية صادقة ان يزيل أثر السحر الاسود الذى يدندن به سحرة فرعون الجديدفى أذن شعبى وامتى التى أرهقها الجوع فصارت فى قطعان الباحثين عن لقمة العيش

لله درك ما أروعك
تحياتى لك ما أشرقت شمس الحرية وغربت دولة الظالمين
.....
نورالدين محمود

Amr said...

هههههههههههه
هايغيروا اسم شارع الجزائر عندنا فى المعادى

وهايغيروا أسم قرية الجزائر بالواحات الخارجه

يالهوىىىىىىىى ياختىىىىىىىىىىىى

nanaalol said...

شكرا أ / نوارة قبس من نور فى وسط الظلمة الحالكة
بدأت أشعر ببوادر الأكتئاب مما يجرى الآن ، حسبى الله ونعم الوكيل فى كل من يوقع بين العرب و المسلمين بالفتنة ، اللهم رد كيده الى نحره و أشغله فى نفسه
شكرا جزيلا لكى و للمعلقين العاقلين
غدا سيتمنى المتعصبون لو أنهم فى مكاننا و لم يحملوا أوزار ما يفعلون

نور على

زقزوق said...

عايز اقول للاستاذ حاسم صارم ان علاء مبارك ورغم ان دى اول طلعه ليه زى ما قلت لكن كان لازم يتشحور كده حتى لو كان انفعال صادق ومالوش مصلحة مالية فى الجزائر وزى ما قالت الحاجة نوارة منفعلش ليه لغزة لغرق العبارة لحريق القطرلاكل المصريين مزروعات مروية بميه مجارى او للحرب البيولوجية المقصودة والممنهجةمن نظام حكم ابيه لابادة المصريين بالفشل الكلوى والكبدى_ اعلى نسب اصابة بالعالم_ هو يختفى ويغيب من اول ما ابوه المجرم يحكمنا من تلاتين سنة ولا كارثة من كوارث حكم ابوه يثير (انفعاله الصادق) الا ماتش كورة اتغلبنا فيه ؟؟؟انت تاكلنى ميه مجارى وتشن عليا حرب بيولوجية ناجحة وتقمعنى وتهتك عرضى وتغتصبنى وتدخل عصاية طولها متر فى مؤخرتي فى اقسام الشرطة ومثيرش انفعالك الصادق الا لما اتغلب فى ماتش كورة.. الصارم الحاسم هل يوما تكونه؟
الاجابة لا طبعا

Unique said...

آآآآآآآآآخر الأخبار
رئيس البرلمان الجزائري اعتذر يا ردااالة
عايزين ايه تاااني ؟؟؟

http://www.youm7.com/News.asp?NewsID=159486

توفيق التلمساني said...

الأخت الكريمة أنت تؤسسين لقواعد جديدة أرجو أن يكون لها في القريب العاجل دور في صنع الرأي العام.
متابع و معجب كثيرا بثقتك في نفسك و بإيمانك بما تقكتبين
توفيق

سقراط مصر said...

" يا مسلم بيريز هنا، بيريز القاتل، على ارضك وفي بلدك ووالدك بيقابله في نفس التوقيت اللي انت بتقول فيه لسفير الجزائر: لو عندك كرامة امشي مش عايزينك "

علاء قعد كام سنه ساكت وقاعد في بيتهم ولما اتكلم وخرج خربها

صحيح يصوم يصوم يصوم ويفطر على بصله

الصارم الحاسم....يوما هل أكونه said...

زقزوق

ما تقوله وما قالته نوارة صحيح...لكن اتحدث عن اسلوب الحوار مع شخص يبدو انه ممكن التفاهم معه...ولا اقول انه بسبب انه له حيثية...اعتبره انسان عادي ممكن تكسبه لصف الحق


تابع مدونتي لو احببت حالا هأنزل ان شاء الله تفصيل اكثر في وجهة النظر هذه


واكونه او لا اكونه دي مشكلتي
:)

هتشوفوا said...

ابرهيم عيسى لسه الحمد لله مابيخافش, هو بس عايز يقول لجمال ابعد عن السياسة واحنا مش هانيجي جنبك, ولو حس أن علاء بيقدم نفسه هايديله فوق دماغه, ولسه بتكلمي على فلوس اللعيبة, احنا قلنا ان المنتخب بيصرف على نفسه يعني الستة مليون المكآفات دول, بيجبوهم في ماتش واحد واللعيبة المحترفين بياخدوهم مرتب شهرين تلاتة والله العظيم دي أرزاق, لو مضايقة روحي العبي كورة

بوست تحفة

حسن على said...

اعتذر عن الهامش الذى كتبتة بخصوص النشيد الوطنى الجزائرى,الذى مو فعلا من الحان محمد فوزى ,وليس من الحان فنانى المفضل احمد صدقى,وربما كان هذاسبب الخلط بين الاسمين

Badeea said...

http://www.facebook.com/#/notes/mohamad-abd-elbadeea/qr-fy-l-lrb-mn-bn-lm-lslmy/211010392386

في 6 أيام الأول من ذي الحجة (أعظم أيام طاعة وعبادة وأسوء أيام ظلم للنفس عند الله) وصل عدد المعجبين والمؤيدين لأحد مجموعات كراهية الجزائر على الفيس بوك 113 ألف , وفوق 190 مجموعة كراهية للجزائر، في حين أنه على مدار 4 سنوات أكبر مجموعة لكرهية إسرائيل بها 81 ألف
عضو و 112 مجموعة كراهية لإسرائيل

ويلكم يا عرب

كازانوفا said...

علاء مبارك لايسعى الى اى سلطة ولا منصب
وقال كلمتين بما انه راجل متصب كرويا وفيه جدعنة ولاد البلد وقال انا مش بكلم النهاردة اى ابن رئيس
انا بكلم مواطن مصرى
يعنى الراجل ساكت مش عاجب واتكلم برده مش عاجب انتوا يا مصريين مش عاجبكم حاجة والنقد عمال على بطال واجب عليكم لازم تكتبوا كل يوم زى واجب المدرسة كده

عملتى الواجب النعاردة ؟

Maha said...

والله يا بنتي لو حتزهقي من جملتي الجاية دي مش حزهق إني أقولهالك

"الله ينورك عليك يا نوارة بجد"

كان نفسي أكون مفيدة في التعليق شوية بس مفيش حاجة غير الجملة اللى فاتت اللى كانت في نفسي

خدي بقى بالمرة الكاريكاتير الجامد ده

ايه البلطجة دي

YasiraAli222as said...

الاسباب الحقيقية وراء الفتنة بين مصر والجزائر: صراع نجل مبارك وشقيق بوتفليقه
نقلا عن موقع إنقاذ مصر
علم مراسلنا في القاهرة من مصادر رئاسية أن الخلافات ما بين الاسرتين الحاكمتين بمصر والجزائر تفجرت بسبب صفقة طائرات تقدر قيمتها بمليار دولار كان من المفترض ابرامها قبيل ثلاثة شهور ما بين وكيل شركة "لوكهيد مارتن " الامريكية بالقاهرة "علاء مبارك "نجل الرئيس المصري الاكبر وبين الدوائر الجزائرية مقابل حصول " علاء " علي عمولة تقدر بمائة مليون دولار، ومع اقتراب اتمام الصفقة بين علاء كممثل للشركة بالمنطقة وبين الجزائريين تدخل "سعيد بو تفليقة " شقيق الرئيس الجزائري والحالم يوراثته هو الآخر وتعاقد مع وكيل فرنسي لتوريد تلك الصفقة الضخمة لبلاده وأخذ العمولة لنفسه والتي كان من المفترض ان يحصل عليها علاء مبارك لو كان قد ورد الصفقة . وقد ترتب علي تلك الفعلة تدهور كبير في علاقات البلدين حيث تدخل القذافي لتنقية الاجواء ورتب لقاء في طرايلس الغرب بين الرئيس المصري "حسني مبارك " ونظيره الجزائري " عبد العزيز بوتفليقة " الا ان نيران الحقد داخل مبارك واسرته استمرت مستعرة الا ان جاءت مباراة الجزائر حيث وجدها الطرفان فرصة لتصفية خلافاتهما وتوظيف الشعبين فيها ومن هنا حرص علاء وجمال معا ان يشعلا نيران الفتنة ووجدنا علاء مبارك يخرج لاول مرة ويتصل بالفضائيات والاعلام ويحرض علي ضرب الجزائريين بالجزمة متسترا وراء كرة القدم كما وجدنا ابوه حسني مبارك يجمع اركان حربه ويدق طبول الحرب وقطع العلاقات مع الجزائر، ويركب الموجة باعتباره مدافعا عن كرامة المصريين رغم أن الأحداث هي أحداث شغب وفتنة ساهم فيها الطرفان ولا علاقة لكرامة مصر والمصريين بها لأننا لا نتحدث عن أعداء، وبناء عليه قام بهذه الحملات الإعلامية الجبارة لتحريض شبابنا وأبنائنا في مصر والجزائر ضد بعضهما البعض وتضخيم الفتنة بين الشعبين الشقيقين أصحاب التاريخ والمصير المشترك رغم أنف آل مبارك وآل بوتفليقة.

YasiraAli222as said...

الاسباب الحقيقية وراء الفتنة بين مصر والجزائر: صراع نجل مبارك وشقيق بوتفليقه
نقلا عن موقع إنقاذ مصر
علم مراسلنا في القاهرة من مصادر رئاسية أن الخلافات ما بين الاسرتين الحاكمتين بمصر والجزائر تفجرت بسبب صفقة طائرات تقدر قيمتها بمليار دولار كان من المفترض ابرامها قبيل ثلاثة شهور ما بين وكيل شركة "لوكهيد مارتن " الامريكية بالقاهرة "علاء مبارك "نجل الرئيس المصري الاكبر وبين الدوائر الجزائرية مقابل حصول " علاء " علي عمولة تقدر بمائة مليون دولار، ومع اقتراب اتمام الصفقة بين علاء كممثل للشركة بالمنطقة وبين الجزائريين تدخل "سعيد بو تفليقة " شقيق الرئيس الجزائري والحالم يوراثته هو الآخر وتعاقد مع وكيل فرنسي لتوريد تلك الصفقة الضخمة لبلاده وأخذ العمولة لنفسه والتي كان من المفترض ان يحصل عليها علاء مبارك لو كان قد ورد الصفقة . وقد ترتب علي تلك الفعلة تدهور كبير في علاقات البلدين حيث تدخل القذافي لتنقية الاجواء ورتب لقاء في طرايلس الغرب بين الرئيس المصري "حسني مبارك " ونظيره الجزائري " عبد العزيز بوتفليقة " الا ان نيران الحقد داخل مبارك واسرته استمرت مستعرة الا ان جاءت مباراة الجزائر حيث وجدها الطرفان فرصة لتصفية خلافاتهما وتوظيف الشعبين فيها ومن هنا حرص علاء وجمال معا ان يشعلا نيران الفتنة ووجدنا علاء مبارك يخرج لاول مرة ويتصل بالفضائيات والاعلام ويحرض علي ضرب الجزائريين بالجزمة متسترا وراء كرة القدم كما وجدنا ابوه حسني مبارك يجمع اركان حربه ويدق طبول الحرب وقطع العلاقات مع الجزائر، ويركب الموجة باعتباره مدافعا عن كرامة المصريين رغم أن الأحداث هي أحداث شغب وفتنة ساهم فيها الطرفان ولا علاقة لكرامة مصر والمصريين بها لأننا لا نتحدث عن أعداء، وبناء عليه قام بهذه الحملات الإعلامية الجبارة لتحريض شبابنا وأبنائنا في مصر والجزائر ضد بعضهما البعض وتضخيم الفتنة بين الشعبين الشقيقين أصحاب التاريخ والمصير المشترك رغم أنف آل مبارك وآل بوتفليقة.

riverChief said...

you die

and then ill contribute a penny