علاء مبارك.. ابن رئيس مسلم لدولة مسلمة

كلمة ابن الرئيس المؤمن علاء مبارك

لا مش الرئيس، ابن الرئيس، يعني، ابن المؤمن الرئيس علاء مبارك، يعني ابن الرئيس علاء مبارك المؤمن، علاء المؤمن مبارك... كدهون يعني

قال لك: انا مسلم، وما باخافش من حد، وح اتكلم حتى لو ح ابقى لوحدي ومافيش حد ورايا!

وقريب قوي ح نعمل تاج في المدونة دي: الحرية لعلاء مبارك. وجابر يعمل له بانر: افرجوا عن علاء مبارك، وقال: مصر كبيرة بحضارتها وتاريخها واسلامها.

صح يا شيخنا، احنا كلنا معاك في الحرب ضد قريش/الجزائر الكفرة الفجرة البلالام الحبظلم بظاظا. بس هو ليه عمرو اديب بيقول له يا علاء؟ هو عمرو اديب واصل قوي كده؟ وانا اللي عمالة اعك فيه؟ هو انا مالي عاملة زي الطور الاعمى ابو قرون وبيدخل في اي حتة كده مش عارف هي ايه؟ بس انا ح اتأسى بالمناضل الاول، زعيم الامة، السيد علاء مبارك سعد سعد يحيا سعد

لا اتأثرت... اتأثرت اتأثرت والدمعة فرت من عيني، خصوصا لما قال انا ما باخافش من حد، ايها الاخوة، ان العملية الفدائية التي قام بها علاء مبارك، دون اية حسابات، وبلا اي مواربة، قد قطعت علينا كل سبيل للتراجع او المهادنة او الاستسلام بعد ان ضحى بامنه ورزقه وحياته وعرض نفسه للخطر وقال: انا ما باخافش. والمرة اللي فاتت بيقول للبيت بيتك مش ح اطول عليكوا ما تقطعوش المكالمة.

انت ياراجل انت بتشتغلنا؟ ده ناقص تشتكي لنا من غلاء الاسعار وتقديم المدنيين لمحاكم عسكرية

طيب يا سيدي المسلم، انا كمان مسلمة، وبما اننا زمايل في الاسلام احب اقول لك الآتي

1- حضرتك اسأت استغلال سلطاتك بوصفك ابن الرئيس وارهبت عدد من الاعلاميين زي شوبير وابراهيم عيسى ومجدي الدقاق واحنا مش في عهد عمر بن الخطاب يا ابن الاكرمين وانت عارف ان احلامك اوامر وبعد مكالمتك بربع ساعة شوبير اعتذر عن زيارته للجزائر

2- يا سيد يا مسلم حضرتك اهنت افراد وشعب، وقلت على روراوة: هوهاوة، وقلت على الشعب الجزائري: ح اديهم على دماغهم. و"عروبة ايه؟ بس يكلمونا عربي بس الاول" يعني بتعايرهم بان كان عندهم احتلال، واخيرا قلت عليهم: ايه البرود التلامة والتلاحة اللي هم فيها دي؟

3- يا سيد علاء مبارك يا مسلم، حضرتك خلقت فتنة بين شعبين مسلمين بدل ما تصلح بينهم، واثرت الناس، وتسببت في فوضى، وهددت السلم الاجتماعي، والامن، وبسببك، تفاقمت ازمة كبيرة قوي بين شعبين مسلمين، بيصلوا لرب واحد وكتابهم واحد، والشعب اللي انت بتقول عليه: بس يكلمونا عربي الاول. مسلمين برضه، والشعب اللي انت اعلنت عليه الحرب والقطيعة وقلت مافيش جزائري يدخل مصر ومافيش مصري ح "اوديه" الجزائر، وانا مش فاهمة انت بتدخل وتودي باي سلطة، ده شعب مسلم برضه، وتعلن القطيعة بين المسلمين وعلى اثر مكالمتك كل النقابات والشركة العربية ومهرجان السينما قاطعوا الجزائر، وانت عارف ان ده بسبب مكالمتك التهييجية، وبسبب مكالمتك الناس نزلت الشارع تحرق وتكسر سفارة ناس مسلمين برضه، والقطيعة دي انت عملتها في الشهر الحرام، والناس داخلة على حج بيجمع بين المسلمين، (تخيل مصري وجزائري اتقابلوا في الحج؟ ممكن يتجادلوا وللا يتخانقوا واحرامهم يتفك بسبب كلمة تقولها لا تلقي لها بالا) والناس داخلة على عيد، عيد المفروض انه بيوحد المسلمين.
4- يا مسلم، اساس الاسلام العدل والمساواة، والعيال بتوع ستة ابريل اللي ما عملوش حاجة في الناس غير ان قالوا لهم ما تنزلوش من البيت، اتقبض عليهم واتبهدلوا واتمرمطوا واتعذبوا ونصهم اتجنن، والنص التاني بيشاور عقله، واسراء طلعت تقول حرمت يا بوجي، بس عشان قالت للناس اقعدوا في البيت.

امال اللي حرض الناس على النزول للشارع في اول مرة، ثم اكد على اهمية المظاهرات في تاني مكالمة، ده اسمه ايه؟
خليك حقاني، اللي سرى على اسراء عبد الفتاح يسري عليك. ده قانون يا استاذ علاء، وبما انك بتقول انك مواطن وفقط، فالقانون يمشي عليك، واحنا تحت قانون الطوارئ، وتحريض الناس على التظاهر ضد قانون الطوارئ، ويا مسلم، الناس سواسية كأسنان المشط. وانت مسلم، وما بتخافش غير من ربك: إن الله يأمر بالعدل والإحسان وإيتاء ذي القربى وينهى عن الفحشاء والمنكر والبغي، يعظكم لعلكم تذكرون.

العدل: انه يتم تطبيق قانون الطوارئ عليك بوصفك محرض على التظاهر.

الاحسان: اللي انت ما عملتوش ابدا مع دولة وشعب مسلمين. وقدرت وما عفيتش، وعارف ان الناس انضربوا عندنا واصريت على انك تداري الحقيقة، بالرغم من ان وزارة الداخلية اعلنت عن اصابة خمسة واربعين جزائري عندنا. اصيبوا من ايه دول؟ اتكعبلوا في السجادة؟

وبدل ما نتعاون مع الفيفا ونعاقب اللي عملوا كده دارينا عليهم مما دفع بالفيفا انها تعاقبنا.

هو ده الاحسان؟ وهل من الاحسان او من العدل انك تبقى عارف ان فيه ناس اتظلمت عندنا ولم ترد اليهم مظلمتهم ولما قدروا علينا انتقموا تقوم بدل ما تداوي الجراح وتلم شمل الناس وتهدي، تقول كفاية بقى كفاية؟ كفاية ايه؟ كفاية صلة رحم؟ كفاية بر بين الاخوة؟

يا مسلم: واخفض جناحك للمؤمنين.

يا مسلم: اشداء على الكفار رحماء بينهم.

5- يا مسلم: ما شفتش اسلامك ده وغزة بتضرب. ما كنت تتصل برضه بالتليفون وتعبر عن رأيك بوصفك مواطن مسلم.

يا مسلم ياللي بتتكلم عن ابن محمد فؤاد اللي بيجيله كوابيس، اطفال غزة بعضهم اصيب بخلل عقلي (مش نفسي، عقلي) بعد حرب غزة، حيث اننا قفلنا عليهم الباب بالمفتاح من برة وسيبناهم ينضربوا جوة.

6- يا مسلم: انت حضرت كاس الامم الافريقية واستمتعت بمشاهدة المباراة وفيه الف مسكين غرقوا في البحر. ما شفناش قلبك اتخلع عليهم زي ماهو مخلوع على اللي كان نايم فوق ابنه. طب ده كان نايم على ابنه عشان خايف من الطوب، امال اللي ناموا على عيالهم عشان نازل عليهم قنابل عنقودية يعملوا ايه؟

يا مسلم: ما يمكن ربنا دوقنا حتة صغيرة قوي قوي قوي من الهلع اللي الناس شافته، شوف الناس اتخضت ازاي من التهويش، مجرد التهويش بسكينة، وشوية طوب اتحدفوا كسروا الازاز لمدة كام ساعة

امال اللي قعدوا تلات اسابيع يخبطوا على بابنا: افتحوا لنا افتحوا لنا. وهم نازل على دماغهم قنابل فسفورية؟

يا مسلم ياللي ما بتخافش غير من ربك: ما سمعناش صوتك خالص بخصوص المظاليم دول، وللا المظاليم اللي اتحرقوا في قطر.

7- يا مسلم: انت السبب في التراشق بالالفاظ ووصول الاعلام بتاعنا لاحط درجة ممكن يوصل لها انسان في العالم لما صحفي يقول: بلد المليون لقيط، واعلامي يقول: الجزائر بنعرفها من نسوانها.

يا مسلم: كنت فين والناس بتصفر وتعمل: بووووو، اثناء النشيد الوطني الجزائري.. نشيد الشهدا، اللي لحنه محمد فوزي. لا وكمان بتدافع عن سلوك الجمهور المصري اللي اهان ناس في كرامتهم الوطنية. وقال: .... امك يا جزائر.

يا مسلم: خليك عادل... خليك حقاني، مدام مش بتخاف غير من ربك، قول اللي ليك واللي عليك، الظلم ظلمات يوم القيامة

الظلم ظلمات يوم القيامة

الظلم ظلمات يوم القيامة

وانا ما اعرفش المسلم ده اللي بيقطع ارحام المسلمين ويشعل بينهم القطيعة والفتن ويستثير داخلهم مشاعر الانتقام تجاه بعض ده يبقى نظامه ايه عند ربنا

يا مسلم

ياللي ما بتخافش غير من ربك

8- خاف من ربك.. خاف من ربك واسكت بقى

من كان منكم يؤمن بالله واليوم الآخر فليقل خيرا او ليصمت. وانت من ساعة ما اتكلمت ما قلتش خير واحد. ما قلتش كلمة واحدة فيها بر، ما قلتش كلمة واحدة فيها صلة رحم، ما قلتش كلمة واحدة فيها اصلاح، ما قلتش كلمة واحدة فيها احسان، ما قلتش كلمة واحدة فيها عفو، حتى لما حبيت تقتص ما اقتصتش بعدل، وعملت رد فعل اكبر بكتير من الفعل. وهولت، واهنت ناس، وجرحت كرامتهم، وقلت عليهم همج، قلت على مسلمين همج، وهان عليك، وطلعت من بقك

يا مسلم انت بقالك كام يوم شاغل المسلمين بتفاهات وسفاهات وادعاءات وتهويلات؟ بقالك قد ايه مدخلهم في صغائر مهولها. يا مسلم اطلب من وزارة الداخلية تجيب لك تقارير عن الناس اللي بيخبطوا على البيوت في مدينة نصر ويقولوا: عندكوا جزائريين هنا؟

9- يا مسلم انت لا غضبان لبلدك ولا غضبان لله

انت غضبان لكرامتك ومصالحك، ليه وليه الناس تنضرب وانت معاهم، والاضرار اللي وقعت على اللي انت كنت معاهم اقل بكتير من الاضرار اللي وقعت على المسلمين اللي في رفح المصرية، اقل بكتير من الاضرار اللي وقعت على بدو سيناء، اقل بكتير من الاضرار اللي وقعت على ركاب العبارة والقطارات وسكان العمارات المنهارة.

اتق الله وما تبررش لنفسك وما تخليش الحاشية تزين لك سوء عملك، وما تضحكش على نفسك وتفتكر انك غضبان لله

انت مش غضبان الله، اللي بيغضب لله يغضب من فرقة الناس، يغضبة من فتنة الناس، يغضب من استغلال الناس. ما يغضبش عشان كان ناس في حاشيته وانضربوا.

10- يا مسلم انت اذيت المسلمين اذية كبيرة كبيرة كبيرة، ارتكبت في حقهم جريمة، اشعلت بينهم العداوة والبغضاء والشقاق وفتنتهم وحرضتهم على اعمال شيطانية واثرت جواهم العصبية ودعوة الجاهلية

يا مسلم، المسلمين واحد، مافيش بينهم جزائري ومصري وهندي وتايواني. ومافيش بينهم ما يسمى بالكرامة، ربنا امر الرسول، وهو اكرم الناس، انه يخفض جناحه للمؤمنين، ما يستخدمش الغلظة والفظاظة والبذاءة وطولة اللسان ويحرضهم على بعض

يا استاذ علاء

يا مسلم

اتق الله

اتق الله

اتق الله

وامر بالمعروف وانه عن المنكر، انت كل اللي عملته لحد دلوقت انك نهيت عن المعروف وامرت بالمنكر، وكل من حاول يهدي بين الناس هاجمته بالاسم وارهبته، واشجع واحد فيهم خاف فعلا، وكل من اشعل الفتن والقطيعة شجعته.

11- وانت شايف اموال المسلمين بتهدر على فريق مهزوم وساكت وانت عارف ان فيه ناس بتاكل من الزبالة

وانت عارف ان فيه ناس نايمة في الشارع

وانت عارف وقبل ده كله ان المنتخب غير مستحق للمال ده لانه مهزوم

ياللي ما بتخافش غير من ربك... ما قلتش كلمة حق في المال المهدر ده ليه؟

يا مسلم

12- المسلم، ما بيمشيش يقول انا مسلم انا مسلم والناس عارفة انه مسلم، والناس عارفة انه ابن رئيس في دولة المحسوبية هي المتحكمة فيها وكأنه بيرهب اللي مش مسلم في الدولة دي او بيقصيه ويحسسه بالعزلة والوحدة ولما ابن الرئيس يقول في سياق حرب بيشنها: انا مسلم، غير لما انا اقول انا مسلمة، انا اقول انا مسلمة براحتي، زي ما انا اقول رأيي في ابراهيم عيسى ومجدي الدقاق وشوبير براحتي، لكن لما ابقى عارفة ان الناس ح تخاف من كلامي لاني ليا سلطة ابقى كيسة فطنة زي ما الرسول قال، ما ابقاش ابن الملك واقول: انا ما باخافش من حد انا مسلم. والناس كلها عارفة ان ما باخافش من حد دي اشتغالة، مين يقدر يخوفك عشان تخاف من حد؟ وبما ان ما باخافش من حد مش معلومة، يبقى الجزء التاني هو اللي معلومة، وبما انه مش معلومة، كل الناس عارفة انك مسلم، يبقى فرمان يا ابن الفرعون الاكبر. يبقى كأنك بتقول ان غير المسلم خواف. وبما انك حبيب الملايين دلوقت، فانت حبيبهم لانك بتخوض حرب على الجزائر، وانت حبيبهم لانك مش بتخاف من حد، وانت حبيبهم لانك بتشتم الناس وتغلط فيهم وتهينهم، وانت حبيبهم لانك مش ح تسكت زي ما قلت، وانت حبيبهم عشان انت مسلم! طب ايه رأيك ان فيه ناس مش مسلمة، ومش بتخاف برضه، وهم جزء من رعاياك يا مولاي، وما طلبوش منك تبقى مش مسلم، بتقول لهم كده ليه؟

ده بالنسبة للي مش مسلمين وابتديت بيهم كحسن الضيافة يعني

اتكلم بقى عن نفسي، ايه انا مسلم دي بقى؟ وانا ايه؟ حاطة هبل في اودتي وبالف حواليه نحن غرابة عت عت مثلا؟ طب انا مسلمة ومش موافقة على كلامك، وانت ابن الرئيس، ومسلم، يبقى ايه؟ اترفدت انا من الاسلام دلوقت؟

ايه انا مسلم دي مش فاهماها، انا مسلمة، ومش بامشي اقول: انا مسلمة انا مسلمة انا مسلمة انا عتريس انا بلوى سودا
المسلم بيقول انا مسلم لما حد بيسأله: انت دينك ايه؟ فيجاوب مسلم. لما واحد كل الناس عارفة انه مسلم مش بيقول انه مسلم.
المسلم بيعمل اعمال المسلمين والناس عارفة انه مسلم ولما تشوف افعاله تقول ده مسلم صالح ولا نزكي على الله احدا

لما "الامير" يهتف بحاجة يبقى بيثير في الناس حماسة معينة، في اول مكالمة قلت "انا مصري" عشان تثير حماسة شوفونية في اتجاه معين. لان كلنا عارفين انك مصري، فدي مش معلومة، ده هتاف. ودلوقت بتقول "انا مسلم" عشان تثير جوة ناس حماسة دينية وتوحي لهم ان قطيعة الجزائر جهاد في سبيل الله، وعليه، فكل من يخالفك من المسلمين يبقى متخلف عن الجهاد في سبيل الله. يعني زايدت على وطنيتنا ودلوقت بتزايد على دينا. اثرت نعرة شوفونية، ودلوقت بتثير نعرة طائفية.

وتقول ما تخافش غير من ربك؟


13- يا مسلم بيريز هنا، بيريز القاتل، على ارضك وفي بلدك ووالدك بيقابله في نفس التوقيت اللي انت بتقول فيه لسفير الجزائر: لو عندك كرامة امشي مش عايزينك.

في نفس الوقت اللي انت بتطرد فيه مسلم من ضيافة المسلمين، قاتل الناس، الاطفال والابرياء والنساء والعزل، على ارضك نازل اهلا وحالل سهلا

هو المسلم بالكلام؟ ما كانتش العين بكت

مش ح اقول لك، يا مسلم، غير كلمة واحدة، لو كنت فعلا بتخاف من ربك:

حسبي الله ونعم الوكيل

حسبي الله ونعم الوكيل

حسبي الله ونعم الوكيل

ربنا بينا وبينك... انت عملت جريمة، جريمة، جريمة، وربنا ح يحاسبك عليها

لو مسلم صحيح وبتخاف من ربك، اقبل النصيحة لله، وخير الخطائين التوابون. ولو فضلت تكابر، فلا يدخل الجنة من كان في قلبه مثقال ذرة من كبر.

واستفت قلبك ولو افتوك، لو ترضى ان حد يعمل كده ما بينك وبين جمال اخوك، استمر في اللي بتعمله ما بين مصر والجزائر

"فهل عسيتم إن توليتم أن تفسدوا في الأرض وتقطعوا أرحامكم؟"

ده الرحم اللي بينا وبين الجزائر، رحم تاريخ، ولغة، وقارة، وعروبة، ودين، وحتى حامض نووي.