Tuesday, 3 November 2009

يا مبارك ما يهزك ريح


الحمد لله اطمنا عليه، بخير وطيب وبصحة، خلاص بقى، يقعد
 يقعد يقعد يقعد، مين جاب سيرة توريث؟ انا اذكر اني في المؤتمر بتاع السنة اللي فاتت لما اتواجهت بجمال قلت نفس الكلام: مبارك يقعد يقعد يقعد
خلاص يا ريس
you made your point
مافيش داعي كل شوية تهددنا بجمال من السنة للسنة، احنا راضيين ومبسوطين، وعلى رأي امي، احنا ح نلاقي فين رئيس نشتمه ويسكت لنا؟
انتوا شفتوا جمال بيزعق للصحفيين ازاي؟ لسة امين السياسات وبيزعق للصحفيين وبيبرق لهم وبيخبط على الترابيزة، وكل ما حد يسأله سؤال، سؤال عادي يعني ما يقصدش منه حاجة، يجز على سنانه ويقول: ما انت لو ركزت شوية في الكلام مش ح تسأل السؤال ده!! الله، ايه يا راجل؟ الجدع بيسأل يعني مافيش حاجة، مالك؟
امال لو بقى رئيس ح يعمل فينا ايه؟
خلقه ضيق شوية هو، مش هادي زي الحاج الكبير
خلاص، خلاص، خلاص، خليك قاعد يا ريس، هو احنا قلنا لك تمشي؟ احنا بنتكلم بس يعني، وانت ما بتزعلش من الكلام، ح تجيب لنا اللي بيزعل من الاسئلة ليه بقى؟ احنا ح نرجع لـ"لن ارحم" وح افرم واعجن واعصر تاني؟
بلاش جمال والنبي، وحياة حبيبك النبي يا شيخ، ما انت كويس اهو الحمد لله ربنا يديك الصحة، انت زعلان عشان بنتكلم يعني؟ ادينا بندردش ورانا ايه ورانا ايه، مانت مش معقول ح تقفلها لنا من كل ناحية، لازم نقول بقين نفك بيهم عن نفسنا، مش كل ما ح نتكلم ح تهددنا بالمحروس، ايه بقى؟
وبعدين اعمل بنصيحة معاوية: يا بني ان الملك عقيم
وما تعملش زي الملك لير لبعدين تتبهدل، انت برضه عشرة عمرنا وما تهونش علينا
خليك بقى، يا نوصلك يا توصلنا... واذا كان ح يبقى جمال، يبقى توصلنا احنا احسن
روح يا شيخ، ربنا يجعل يومي قبل يومك
----
اه، نسيت اقول حاجة:
امبارح وانا نايمة صحيت على صريخي وماما قعدت تقرا لي قرآن وقالت لي النهاردة كنت بتصرخي وانت نايمة امبارح ليه؟
انا كل اللي فاكراه اني كنت باحلم بجمال مبارك واقف بيقول كلمة في المؤتمر
والله، والله العظيم، وبعدها بقى صحيت على صوتي وانا باصرخ

حرام عليك يا ريس... احنا ما عملناش حاجة

32 comments:

مواطن مصري said...

ههههههه شعبولا انضم للوطني من اجلك انت


http://www.youtube.com/watch?v=Ge7YZPSVmB0

جبهة التهييس الشعبية said...

ماهو يدوبك كده شعبولا على قدهم
شفت البيض اللي احمد عز بيعمله

http://www.youtube.com/watch?v=iGbi0YboyOk

يععععععععععععععععع

مى said...

كده نجحت الخطة و عوكل

(قصدى الرئيس المبارك مبارك)

يبدو كان عملينا تمثيلة نوفل مخصوص

علشان يتوبنا و ندعيله بالصحة و طولة العمر

و قد كان

مش بعيد يطلع مفيد و لا سرور بكرة و يعلن إن طالما إحنا متمسكين بالريس لحد آخر نفس عندنا
و آخر نبضة فى قلبنا

يبقى نرجع تانى للمادة
76
قبل التحسينات

و لا إنتخابات رياسية و لا يحزنون

كان مالها الإستفتا

إحنا بس اللى إتبطرنا عليها

صحيح مينفعش معانا غير عين جمال الحمرا علشان نتوب

جبهة التهييس الشعبية said...

انا كنت باحلم بجمال مبارك وصحيت وانا باصرخ
تصدقي؟
فزعت امي وتاني يوم كانت مخضوضة وبتقول لي بتصرخي وانت نايمة ليه؟

مواطن مصري said...

لية كدة احمد عز ع الليل

الي مش هيسمع الكلام هيتفرج ع احمد عز كل يوم

:D

مى said...

طبعاً مصدأكى

إذا كان مربلينا الرعب و إحنا صاحيين

أكيد فى الضلمة و إحنا نايمين تأثيره أشد


المشكلة إنه ضعيف الشخصية و مسلم نفسه للداهية عز الحديد

و التانى من خبثه مفهمه إن هوه الزعيم و مفجر ديناميت الوطن و ثوراته

يعنى إذا إستلم نوفل لا قدر الله

حيبقى عز هوه الحاكم الفعلى

جبهة التهييس الشعبية said...

على فكرة
الانسان الضعيف بيبقى عنيف وقاسي جدا
وهو فعلا ضعيف
وعشان كده ح يبقى قاسي وهيستيري

الراقص العالمي احمد هز؟
يا شيخة حرام عليك، ده كفاية المظمبليط اللي عامله في راسه

لا قولي لي يا اخوتشي
ما تعرفيش الكوافير بتاعه؟ اصل القصة دي عاجباني بافكر اعملها

مى said...

حلوة أحمد هــــز

و لا الشوز اللى لابسه

حايز على أعلى سكور


طيب شوفتيه فى آخر كلمته لما خلاص كان حيلم النقطة و قعد يصقف للعروسة و العريس و الناس اللى قاعدة على الكراسى

الراجل بيحن لشغلته القديمة

simplymoi said...

You are sooooooooooooooo funnnnnnnnnnnnny nawara, try to make something like late night show on youtube.

سومه...مجنونه فى بلد عاقل said...

جيمى(تأديب وتهذيب واصلاح)تحسيه خالتك فرنسا فى فيلم اللمبى:))

سومه...مجنونه فى بلد عاقل said...

افلام الحزب الوطنى....ام الاجنبى

dr.lecter said...

نفسي مغممومه من المؤتمر ده يارتني ماتفرجت عليه ولا علي ظرف مبارك وهو بيقول اجيبلكم عيبش منين ااكلكم منين

faissl said...

أما إن هزارك ماسخ صحيح يا عوكل
هو الواحد ما يتفكش معاك بكلمتين أبدا..؟ :D

مواطن مصري said...

انا لقيت الاغنية الاصلية لو اتركبت على

احداث المؤتمر هتبقى حلوة

انا المعلم يلا

http://www.4shared.com/file/63527348/7956986a/____.html?s=1

مى said...

فيديو الهز فظيييييع

كان ناقصه بس منظر وزيرة توريد الخادمات و هى بتبوس إيد شجرة الدر

علياء said...

لعنة حلت على البشرية يوم ما شافك الفضاء البلوجرى

استاذة نوارة
من فضلك ادخلى على مدونة اللعنة و حتشوفى انه يقصد باللعنة الاسلام و رسول الاسلام ,و وصلت بيه الجرءة انه يجيي يعمل دعاية لعنصريته و سبه للاسلام و للرسول الاكرم هنا
و الله انا دمى بيغلى من اللى قريته عنده
و عملت اكونت مخصوص علشان احذر منه و من امثاله زى اللى مسمى نفسه سهران من فلسطين
فاذا وجدتى ما اقوله صحيح فياريت تمسحى اسمه و اسم كل العنصريين اللى زيه من مدونتك , علشان مينفعش يستغلوا تسامحنا و يطعنونا بالسكاكين

مش فاهمه said...

انا برضه من ساعة ما عمرو أديب ابتدى يتكلم ان الرئيس برضه متربى فى الريف و يعرف المواطن البسيط عايش ازاى عكس الريس الصغير جمال وكدهو عرفت ان بما ان عمرو اخو عماد و عماد اخو عمرو يبقى اكيد عمورة يعرف اللى مانعرفوش و بناء عليه و لكل هاتيك المجالى يبقى الغرض من الحزب و الشو كله اننا نعرف الفرق بينهم و نقول الريس الكبير ارحم من الريس الصغير وقد كان

mohamad said...

يا بنتي ما تركزيش بكل محسوسياتك في المؤتمر وتفصيلاته أحسن يجيلك هسس

العالم دي خلتنا نكلم نفسنا وإحنا ماشيين في الشارع من غير حتى ما نركز معاهم

esraa said...

عقدك جمال خلاص؟
بقي بيجيلك وانت نايمه في الكوابيس؟
لا حول ولا قوة الا بالله يابنتي

Dr Nemo said...

الحمد لله
لقيت حد شاف زى اهه


مى


لو عندك صورة او فيديو للخدامه وهيا بتبوس ايد سوزى ياريت تجبيها
الوليه نرفزتنى بحركتها دى
ناقص ايه تانى على الملكيه يعنى؟


شوفوا الموضوع ده خلونا نفضح شلة الارشانات دول يمكن يتلموا ويخلو فى عيونهم حصوة ملح

nanaalol said...

الغـر يـب
------------

كُلُّ ما في بَلْـدَتي

يَمـلأُ قلـبي بالكَمَـدْ .

بَلْـدَتي غُربـةُ روحٍ وَجَسَـدْ

غُربَـةٌ مِن غَيرِ حَـدْ

غُربَـةٌ فيها الملاييـنُ

وما فيها أحَـدْ .

غُربَـةٌ مَوْصـولَةٌ

تبـدأُ في المَهْــدِ

ولا عَـوْدَةَ منها .. للأبَـدْ !

**

شِئتُ أنْ أغتـالَ مَوتي

فَتَسلّحـتُ بِصوتـي :

أيُّهـا الشِّعـرُ لَقَـدْ طالَ الأَمَـدْ

أهلَكَتني غُربَتي ، يا أيُّها الشِّعرُ،

فكُـنْ أنتَ البَلَـدْ .

نَجِّـني من بَلْـدَةٍ لا صوتَ يغشاها

سِـوى صوتِ السّكوتْ !

أهلُها موتى يَخافـونَ المَنايا

والقبورُ انتَشرَتْ فيها على شَكْلِ بُيوتْ

ماتَ حتّى المــوتُ

.. والحاكِـمُ فيها لا يمـوتْ !

ذُرَّ صوتي، أيُّها الشّعرُ، بُر و قـاً

في مفا زاتِ الرّمَـدْ .

صُبَّـهُ رَعْـداً على الصّمتِ

وناراً في شرايينِ البَرَدْ .

ألْقِــهِ أفعـى

إلى أفئِـدَةِ الحُكّامِ تسعى

وافلِـقِ البَحْـرَ

وأطبِقْـهُ على نَحْـرِ الأساطيلِ

وأعنـاقِ المَساطيلِ

وطَهِّـرْ مِن بقاياهُمْ قَذ اراتِ الزَّبَـدْ .

إنَّ فِرعَــونَ طغى، يا أيُّها الشّعـرُ،

فأيقِظْ مَـنْ رَقَـدْ .

قُل هوَ اللّهُ أحَـدْ.

قُل هوَ الّلهُ أحَـدْ.

قُل هوَ الّلهُ أحَـدْ.

the poet: Ahmed mater

أبو أمك said...

جمال إيه بس وبتاع إيه
مافيش ريس جديد في البلد خلاص
من قلة الرؤساء يعني هايعيدوا من الأول وبعد مبارك هاييجي جمال عبد الناصر ؟

مى said...

Dr Nemo

عذراً معنديش فيديو لواقعة التقبيل لإنى شفتها و أنا فى الطريق فلم أتمكن من التسجيل


لكن تقدر تدخل على اللينكات ديه فقد تناولت الواقعة


http://6april.org/modules/news/article.php?storyid=223

http://ikhwanonline.com/Article.asp?ArtID=55898&SecID=230

مى said...

نونة

علياء عندها حق

مدونة اللعنة حاجة تثير الغثيان فى العنصرية و سب دين الإسلام

و جاى يعملها إعلان هنا
!!!!

حاجة فى منتهى الغرابة
!!

زقزوق said...

انا شايف ان الواد على عكس ابوه المتهته عيي اللسان لسانه طليق وبيعرف يتكلم

Tamer M. Fawzy said...

البوست بتاعك جامد جدا والفيديو جبااااااااااااااار يا استاذة نوارة
:))




مدونة اللعنة
حقارة حلت قدام عينيا بصراحة
لعنة ان شاء الله

عالم حبيب said...

ههههههههههه بجد العنوان ضحكني جدا

مواطن مصري said...
This comment has been removed by the author.
مواطن مصري said...

حرق التيشيرت و قولنا شوية عيال

انما رابررز حقير جزائري يتهجم على مصر

و يهين الابطال المصرين

انها الحرب

اسمعي و سلميني ع القومية العربية

http://www.youtube.com/watch?v=1KIy_Ks99-0

واحد من العمال said...

فعلاً مبارك أرحم من جيمى

ثائر جبر said...

العيب مش في المعلم و لا في ابنه العيب في الصبيان اللي يجيب كرسي يقعد عليه

muhanad said...

انا متفق مع اخوانا اللى خايفين من ابن عزو لو جيمى
ركبنا بدل ابوه

فعملت حاجة كده على السريع من اللى بيعملو فيناابن المفترية ده على الصبح يوميا

اسهم شركات عز تحكى قصة صعوده

http://www.mtyhoo.co.cc/2009/11/blog-post_08.html

هو صحيح قصير واوزعه لكن قرصته والقبر على راى مصطفى بكرى