مصر مبارك.. ربنا يخليهولنا

انا عايزة اعرف انا معادية مبارك وابنه ليه؟ بجد يعني؟ مبارك حي لا يموت، وربنا عايزه رئيس جمهورية، ربنا عايزه، يؤتي الملك من يشاء وينزع الملك ممن يشاء ويعز من يشاء ويذل من يشاء

ولحد دلوقت ربنا بيعز مبارك وبيذل اللي بيعاديه

انا مافيش بيني وبينه لا هو ولا جمال مبارك اي حاجة شخصية، ولا حاجة تمس حياتي، انا الحمد لله والشكر لله عايشة كويس ومرتاحة في حياتي بفضل ربنا يعني

ايه اللي طسني في عقلي وخلاني افتح مدونة وامسك في خناق الراجل وابنه من غير اي مناسبة؟ ليه عملت كده؟ 

عشان الناس الغلابة اللي عندهم انيميا وسرطان ونايمين في عشش ورجال الاعمال بيقلبوهم في الفلوس؟ طيب الناس دي انا شفتها دلوقت حالا في الشارع وهي بترقص ومبسوطة قوي، مش هاممها ان اللعيبة ح ياخدوا كل واحد اتنين مليون من فلوسهم اللي سرقها منهم رجال الاعمال وسابوهم جعانين، مش هاممهم انهم ساكنين في عشش واللعيبة كل واحد ح ياخد شقة، وجابر شاف في ميدان التحرير الناس رافعين يفط: نعم لمبارك في الانتخابات القادمة

طيب الناس اللي انا خليت امن الدولة يفتح لي ملف بسببهم ما طلبوش مني حاجة ومش متضايقين، كانوا فرحانين ان جمال مبارك معاهم في الماتش

طول ما انا ماشية في الشارع ما شفتش غير العيال اللي عندها فقر دم والنسوان اللي بيقعدوا يعيطوا لي عشان جوزها مشلول وهي عندها ضغط وقلب وسكر وابنها بيغسل كلى ومش معاها فلوس

واهم بيرقصوا اهم وبيقولوا مصر مصر، وما نزلوش بنص العدد ده لا عشان فلوسهم، ولا عيشهم، ولا امراضهم

وماحدش زعلان ان البلد دي متخلفة وما عندهاش اي مشروع قومي، وماحدش زعلان ان البحث العلمي عندنا ماشي بالمانفلة، وماحدش عندنا زعلان اننا اتصالحنا على اسرائيل واتخانقنا مع الجزائر، وماحدش زعلان ان مبارك قاعد بقاله تمانية وعشرين سنة بالكورة بس لان ده انجازه الوحيد، وماحدش مستغرب ان القائد الاعلى للقوات المسلحة هز طوله وراح زار لعيبة كورة، وماحدش زعلان من اي حاجة، الحمد لله احنا شعب سعيد

امال انا تاعسة نفسي ليه؟ اما انا بني ادمة غريبة فعلا، باعاند ربنا اللي عايزه رئيس كمان خمسين سنة (لان مصر ح تكسب الجزائر في السودان طبعا، انا شفت حتت متقطعة من الماتش وانا في الشغل ولقيت منتخب الجزائر فريق ضعيف جدا، امال كان لزومها ايه طولة اللسان دي كلها وهم مكسحين كده؟) وللا باعاند الشعب اللي مش مهتم ان مالوش اي انجاز حضاري ولا ثقافي ولا علمي ولا سياسي ولا اقتصادي ولا انه مش لاقي ياكل ولا يشرب ولا حتى لاقي لا مؤاخذة يشخ لانه ماعندوش صرف صحي وشايف ان الانجاز ده كفاية، وربنا اداهم اللي هم عايزينه وح يكسبوا في السودان، على الاقل واحد صفر

والجزائر حظها كويس، ح تخسر والحمد لله، قبل شحن الماتش ده كان فيه انتفاضة فقراء في الجزائر وكانوا بيضربوا الشرطة بالحجارة زي فلسطين ايام الانتفاضة، وان شاء الله لما يخسروا ح يرجعوا يعملوا انتفاضة تاني

خلاص بقى ربنا بيدي كل واحد على قد اللي هو عايزه وعلى قد عمله

وانا اسفة ياريس، والله العظيم تلاتة باقولها من اعماقي، حقك على راسي من فوق يا سيادة الرئيس حسني مبارك

انا قليلة الادب ولساني طويل وسفلت عليك من غير اي سبب، انا كويسة قوي وزي الفل، مش عارفة عملت كده ليه؟ وحقك على راسي يا جمال بيه، ما انت ماسك البلد بقالك اربع سنين اهو وانا ما اشتكيتش وعلى المستوى الشخصي ما عنديش اي مشاكل

واللي حصل لهم مشاكل بسببك مبسوطين مش متضايقين، ورافعين يفط بيبايعوك في ميدان التحرير سواء حضرتك او الوالد، مش عارفة ليه قلة الادب بتاعتي دي

طب والله ما باتريق، والله العظيم ما باتريق، انا اسفة فعلا، رجعت في كلامي، اتحشرت في اللي ماليش فيه ورجعت اهو في كلامي

ربنا يهني سعيد بسعيدة

بس لو تسمح لي يا سيادة الريس حضرتك وجمال بيه تسيبوني احب حسن نصر الله ممكن؟ انا مش ح اتدخل في حاجة تاني، انا الحمد لله بخير والمفروض استمتع بحياتي وابطل انكد على نفسي، والناس اللي بتنكد عليا ح ابعد عنهم

بس انا باحب حسن نصر الله، لو تسمحوا لي افضل احبه، الراجل بعيد عنكوا يعني، ده بيعادي اسرائيل، وانتوا اعملوا اللي على كيفكوا، تصالحوا اسرائيل تدوها غاز كهربا مية، اللي تحبوه، والله ما باتريق، باتكلم بجد، وصدقت: التوزيع غير العادل للثروة افضل من التوزيع العادل للبؤس، وانا عن نفسي مش من بتوع البؤس، وما كانش ليا حق ابدا اني اتكلم عن مشاكل مش بتاعتي

كل واحد يتكلم عن نفسه

انا ح اعيش اللي فاضل لي من الدنيا وانبسط

ربنا يخليك للشعب يا ريس... بيحبك والله، وانا ح اعوز افرق الاحبة ليه؟ ماليش مصلحة