Sunday, 1 November 2009

بس بس بس بس اتفرجت على الخطاب



اولا اي شاب من الشبان اللي لسة ما دخلوش دنيا انصحهم نصيحة اخت كبيرة انهم ما يتفرجوش على الخطاب ده لو كان في خطتهم الجواز والخلفة، واي شاب اتفرج ربنا يتولاه، معلش، العوض على الله بقى، وكل واحد منه لله، ودي حاجة يابني ما تعيبكش هو كان بايدك بس مافيش داعي بعد ما اتفرجت تحرج نفسك وتحاول تتجوز، عشان كله ح يبقى في وشك وفضيحتك ح تبقى بجلاجل
 ثانيا: ده طلع عوكل فعلا، انا عايزة اعرف مين خريج نحن الامنية اللي شكل له الخطاب، ده تشكيل "الارضي كرويتان تلفو حول نفسها"، ده غير ابدعاته هو بقى: اولتويتوي لكل فؤات مدحودي الدخل، ايه الحلاوة دي؟ ده قطع الشورت في البيسين خالص

ثالثا: ايه كمية الصرف الصحي اللي كبه على دماغنا ده؟ ومشروع الصرف الصحي، والصرف الصحي بقى احسن، وح نروح الريف ونعمل صرف صحي، كانت خطبة طافحة في وشنا وريحتها كيك بصراحة
هو ما اتكلمش غير في نقطتين فقط لا غير: الزيادة السكانية، ومشكلة الصرف الصحي. وهدفه من الخطاب انه يقطع خلف الناس عشان مشكلة الزيادة السكانية تتحل (على فكرة الخطبة دي كانت عملية اخصاء تامة وواقعية وحقيقية زي اللي بيعملوها للخرفان عشان تسمن.. انبسط، ح تتخن وتربرب ويدبحوك على العيد في قطر)، والهدف التاني انه يجيب للناس امساك عشان ما يضطرش يعمل مشاريع صرف صحي كتير
طلبتها ونلتها يا حااااااج
حصل.. حصل يا عوكل حصل، انا مش قلت لكوا ده راجل عقر وكل اللي بيعوزه بيحصل؟

رابعا: بيقول لنا بكل فخر واباء وشانون ان مصر اكبر دولة مستوردة للقمح في العالم
والمفروض ان دي غلطتنا احنا عشان بنخلف وبناكل عيش... اما انتوا شعب رخم صحيح، يعني الراجل عمل اللي عليه وخصاكوا، بطلوا اكل عيش بقى، انتوا مش مفروض عاملين دايت؟

خامسا: حكى حكاية باين قوي انها فشرة، عن واحد غلبان مسكين قال له عايز شقة يا ريس عشان ساكن فوق السطوح وطلع مخلف تسعة وهو ومراته يبقوا حداشر فقال له انت عايز عمارة مش شقة، والمفروض اننا نصدق القصة الفاكسة الخزعبلية المشعوذة المريضة دي، مش عيب في السن ده ويكدب؟ هو فيه حد بيعدي من الشارع اللي جنب الشارع المتقاطع مع الشارع الموازي للشارع اللي هو معدي منه عشان ييجي واحد غلبان يقرب منه في المطار ويطلب شقة كمان وياخد ويدي في الكلام؟ طب نرد على العشوائيات اللي هو بيقولها لنا دي بايه؟ ده كان زمانه بقى مصفى زي ابو العربي الله يرحمه
ويكاد المريب يقول خذوني قال لجمهور الترسو اللي قاعدين يتفرجوا عليه: على فكرة دي قصة حقيقية مش تأليف انا مش ح اقول اسمه ولا بيشتغل ايه
 ههههه يا راجل هو حد سألك على اسمه وبيشتغل ايه؟ احنا ح ندور وراك يعني؟ ما خلاص باين انك واخد دماغهم وبتسرح بيها في اشارة ميدان روكسي والناس صقفت وماحدش احرجك، اسكت بقى بتحرج انت نفسك ليه؟ ده كان ناقص يحط كوباية المية على عينه ويقول: والنيعمة دي على عيني وللا اطفحها وما اوعى اعملها بيبي والعشرة دول والنار دي وللا تحرقني زي السوجارة وحياة ضنايا اللي قاعد وباترجاه من الدنيا وللا يعدم الشعب ان اللي باقولهولكوا ده حوصول

سادسا: ايه كم الظرف الفشيخ ده؟ هو مش كان لطيف زمان؟ وللا ابنه كرف عليه؟ وللا هو بيضحك بس لما ما بيبقاش قاصد؟ هو راح لمونولوجيست الماني يحفظه نكت؟

سابعا: خلاص يعني؟ ما بقاش يكلم حد غير بتوع الحزب الوطني؟ هم دول الشعب بالنوسبة له؟ مخاصم الباقيين ولما بنتصل بيه حاطط الفويس ميل وبيقول لصفوت لما الشعب يتصل على الارضي قول له مسافر؟
ثامنا:  هو اللب بقى رمز الحزب الوطني؟ هالة ابو علم كانت بتقزقز لب في اثناء 
الخطبة ليه؟ اكيد اللب ده له حكمة في الحزب الوطني، هل مثلا وسيلة جيدة ومفيدة للتف على قفا الشعب؟
تاسعا: ايه احساسك وانت رئيسك لطيف وخفيف خفة السنين كده؟ كركركركركر قوي فحت  يعني





10 comments:

Al said...

وهل حقا أن المصريون قي القرن الواحد والعشرين بعد الميلاد يعتبروا عارا على مصريين ( مصري ) القرن الواحد والعشرين قبل الميلاد؟

Al said...

قوم يامصرى مصر دايما بتناديك
خد بنصرى نصرى دين واجب عليك

عيد لى مجدى إللى ضيعته بإيديك
شوف جدودك فى قبورهم ليل نهار
من جمودك كل عضمة ب تستجار
فين آثارك يا للى دنست الآثار
دول فاتوا لك مجد وإنت فت عار

محاسب/ محمد الجريدي said...

دائما صراحتك وسخريتك صادمه لدرجة إن الواحد مش عارف والله يقولك إيه
بس إنتي عارفه إن بابا مبارك
تعب والسن له حكمه
فهل من الممكون أن تسامحيه علي تقل دمه
وإوعي تفكري
إن ده طبعه
دا كان تمام والله بس الزمن يابنتي ربنا ما يواريكي
أما جيمي فكان دائما له روح مرحه تفوح منها رائحة مواضيعه من قبل أن يتكلم فيها
ولهذا لما تشوفيه تحسي بنفس الإحساس الخنيق لما تقعي في بلاعه
وأحيانا بيتحول

إتلمي بقي
وخديلك ساتر بدل مايسحلوكي

إقعدي بالعافيه


أو بمزاجك
هههههه
سلام

Amr said...

ههههههههههههههههههههههههههههههه
ههههههههههههههههههههههههههههههه

والله يا نواره البوست ده خفف وقع الأرتجاع المخى اللى حصلى شخصيا"
وقلل شويه من وجع العمليه اللى أتعرضلها شباب مصر (شباب سابقا")

dr.lecter said...

ياريتني ماتفرجت عليه امبارح من ساعتها وانا مفقوع ومحموق وخصوصا البقين بتوع احمد عز

مخبر قمل دولة said...

موتيني م الضحك وانا باقرا :D

جبهة التهييس الشعبية said...

Al
حاضر ح نقوم
احنا ظابطين المنبه على خمسة

محمد جريدي
حاضر ح اتلم
بس يبطلوا بقى هم كمان الانسان طاقة

عمرو

هو انت اتفرجت؟ معلش معلش، اللي انكسر يتصلح

dr.lecter

احمد عز بتاع مفجر الثورة؟ هههههه هو كل سنة يفجر في وشنا الثورة
ربنا يديله الصحة

مخبر قمل الدولة

انا بقى كان دمي محروق وانا باكتب
هههههههه

الخوجة said...

أنتى مش هتجيبها لبر انتى هتسحبينا كلنا معاكى .ربنا يستر.أنتى عيبك الوحيد أن أنتى بتقولى اللى داخلنا وانتى بتقرأية.
الناس دى كلها بتحذر من المصل ودول جابوة برضة
مش عارف هما مضيقين مننا لييه

side effects of flu shots - الأثار الجانبية للقاح انفلونزا الخنازير

والأغرب ماعملوش حاجة ولا هيعملوا حاجة كأن ان احنا اللى قامت علشنا الثورة ولا أخدنا ميراثهم
التعليم فى مصر | الخوجة - تعليم الحزب الوطنى

Kontiki said...

ازيك يا نوارة
يخرب عقلك يا بنتى هههه اية البوست دة :)
الخطاب لا شفت ولا سمعت انما واضح انه كان خطبة عصماء :)

Tamer M. Fawzy said...

ما شفتش الحمد لله غير الكام ثانية اللي عز حيا فيها جيمي و صقف له
و حمدت ربنا اني ما شفتش الباقي