Friday 6 November 2009

وكمان طلع مافيهاش اسلحة



يوم الاربعاء اربعة نوفمبر الصبح اسرائيل هبشت سفينة في عرض البحر بعد ما اخترقت المياه القبرصية وقالت فيها اسلحة وراحت خاطفاها، كده بلطجة، وعملت زي الولية الشرشوحة وفتحت الابواب للصحفيين، لاول مرة لان اسرائيل لا تتسم بالشفافية، وبعدين فرجت الناس على الاسلحة
انا بيني وبينكوا قلت ايه الخيبة دي، يعني بيهربوا اسلحة، ماشيين كده فاكرين الدنيا امان؟ مش ياخدوا بالهم، وبعدين اسرائيل هجمت بشكل غير شرعي على السفينة، ما ضربوش عليها ليه مدام معاهم سلاح؟ هم من حقهم، مدام اسرائيل قرصنت عليهم في مياه قبرصية من حقهم يدافعوا عن نفسهم ويضربوا السفينة الاسرائيلية
جه المعلم قال: اسرائيل كدابة، دي كان فيها بضائع رايحة ايران
قمت انا قلت في عقل بالي: الله، وكمان بتكدبوا؟ ليه بقى؟ انتوا دولة، ولها سيادة، ومن حقكوا تعملوا صفقة اسلحة، يعني لما تيجي مركب امريكي محملة بالسلاح لاسرائيل من حق سوريا انها تعترضها بقى، ومن حق حزب الله واي حد انه يعترضها
كل ده ومصر ايه؟ ساكتة، احنا مالنا
قووووم اسرائيل اخدتها الجلالة وراحت لافعة مصر في السكة: وعلى فكرة بقى، السفينة دي عدت من مينا دمياط
توء
طب دي سفينة جاية من ايران، رايحة سوريا، عشان سوريا توصل السلاح لحزب الله، طب مصر مالها في الليلة دي؟ دمياط ايه دخلها في الخريطة
طبعا زي ما ذكرنا قبل كده مصر كانت بتقوم بدورها وساكتة الحقيقة

طب ده مش حلو الكلام ده، لان ده معناه ان اسرائيل بتتحرش بايران وسوريا وبتلفق لهم تهم وواضح انها مش عارفة تستفزهم فابتدت تهبل بقى، اصل مصر ح تكدب ليه؟ هي تكدب، بس مش ح تكدب لصالح سوريا وايران ابدا، وبعدين هي فعلا كانت ساكتة ما اتكلمتش لحد ما اسرائيل بغباوتها المعتادة جابت سيرة مصر ومصر عايزة تبرأ ساحتها، وهي عمرها ما ح تعدي سلاح جاي من ايران لسوريا ابدا

ده على جثة عوكل حاجة زي دي تحصل

9 comments:

مي ثابت said...

ياااااااه الموضوع ده طويل أوى

بصى يا نونة
فيه عدة نقاط

الأولى
______
من يوم الأربع أعلن الصهاينة إنهم إعترضواالسفينة بعد ما غادرت ميناء دمياط

http://www.bbc.co.uk/arabic/middleeast/2009/11/091104_als_israel_intercepts_arms_ship_tc2.shtml

طيب ليه الخارجية المصرية إتأخرت فى نفى وجود الكلام ده
؟؟


الثانية
_____________

كل الأخبار أكدت إن السفينة خرجت من الموانى الإيرانية فى طريقها لسوريا مروراً بقبرص و قناة السويس

الوحيد اللى قال العكس هو الوزير السورى المعلم

قال إنها خرجت من سوريا محملة ببضائع لإيران

الثالثة
___________

كم التناقض فى المعلومات الواردة من الصهاينة عن حجم الأسلحة و نوعيتها

مي ثابت said...

دلوقتى بيجرى الحديث عن وجود سفينة أخرى إسمها فيزيا تابعة للشركة الإيرانية للملاحة يعنى خرجت من إيران فعلاً

و هى التى كانت تحمل الإسلحة و فرغتها فى السفينة فرانكوب اللى كانت بداية إبحارها من سوريا و ده يفسر كلام المعلم

http://aawsat.com/details.asp?section=4&article=543198&issueno=11301

و بكده إتحلت النقطة التانية

مي ثابت said...

و بكده إتحلت النقطة التانية

أما عن مصر ليه إتأخرت فى الرد

فده لإن فى يوم الأربعاء كان الكلام عن مجرد مرور بميناء دمياط

لكن بعد كده و كما هو منشور مصر تلقت ما وصف بإنه رسالة لاذعة تشير إلى بقاء السفينة لمدة أسبوع فى دمياط دون أن تُكتشف حمولتها
هنا كان لابد من الرد .

و بكده أعتقد إتحلت النقطة الأولى

مي ثابت said...

أما بقى النقطة التالتة و الخاصة بالتناقض الصهيونى

فعادى جداً الصهاينة موروطين فى تقرير جولدستون فبيشغلوا العالم و يسلوه شوية

فمرة يقولوا كاتيوشا و بنادق
و مرة يقولوا أسلحة نوعية ستخل بالتوازن

مرة يقولوا ثلاث شاحنات
و مرة يقولوا
36
وبعدين
40

مي ثابت said...

لكن فعلاً أجمل ما سمعت فى هذا الموضوع هو ما قاله

الجنرال ميشيل عون

قال

أننا أحرار، سواء أكان أمر السفينة صحيحاً أم خطأً

وإذا لم نأت بالسلاح من إيران يمكن أن نشتريه من الصين أو من كوريا

وربما نشتريه أميركياً من تجار السلاح

و لو أمكنني لاشتريت السلاح للقضية الفلسطينية لا للداخل اللبناني

Unknown said...

مش عارف - حاسس فعلا" أن السفينه كانت فيها أسلحه
لكن من ناحيه تانيه كلامك صحيح ومصر عمرها ماهاتعدى أسلحه متبادله بين سوريا وأيران !!!!!

هو ممكن ده يكون مقدمه لتحرشات تانيه فى الطريق وبداية أستفزاز لشن حرب على حزب الله ؟

قبرص فين من العمليه دى ؟ دول دخلوا مياهها الأقليميه !

Unknown said...

يا مي
ازاي سفينة بتهرب سلاح ح تتمشى كده في البحر؟ يعني انا لو باهرب مخدرات اخد المخدرات في شنطتي وانزل اشتري جزمة وشنطة واروح اتغدى في ماك دونالدز وبعدين انزل اخد مركب في النيل واروح السينما وبعدين اروح الغرزة اديهم المخدرات؟

دي لو صفقة اسلحة من حق سوريا انها تشتري صفقة اسلحة وح تبقى سفينة حربية مش سفينة بضائع

لو متهربة يبقى الطبيعي انها الاول تنزل حمولة الاسلحة بسرعة وبعد كده تعمل التمويه اللي هي عايزاه
انما تفضل تتمشى في البحر بالسلاح؟

ثم انا عايزة اعرف هي اسرائيل بتعمل معانا كده ليه؟

لا بجد

حد من عرب تمانية واربعين بيفهم في العقلية الاسرائيلية يشرح لنا هم ليه كده؟

يعني احنا عملنا شغل منايفة واستندلنا مع العرب وقلنا لهم: باقول لكوا ايه؟ احنا ضيعنا فلسطين ضيعناها... اللي يعرف ابويا يروح يقول له ومالكمش حاجة عندنا بقى ياللا سكة السلامة اللي عايز ييجي يتفضل اللي مش عايز انا رايحة اشوف مصلحتي

والاتفاقية اللي عملناها دي اتفاقية غير اخلاقية بالمرة

بالمرة

مافيش مسوغ اخلاقي واحد من اي وجهة نظر في الدنيا يبرر اللي احنا عملناه

حتى كارتر ما عرفش يبرر الاتفاقية اخلاقيا

دي حركة واطية واطية واطية وحتى احنا وحتى اللي مع الاتفاقية ما بينكروش انها حركة واطية ودون ورمة

بس بيبرروها بانهم بيقولوا: بلا اخلاق بلا بتاع كل واحد يشوف مصلحته

صح؟

فين بقى؟ فين مصلحتنا؟ ليه اسرائيل غلسة كده

يعني كنا ح نعمل ايه اكتر من المركب فعلا عدت علينا وفتشناها وانت عارفنا طريقة تفتيشنا غبية ازاي؟
اظن الكل عدى من مطار مصري وعرف ازاي ان الحاجة اللي هم مابيفهموش دي ايه بيصادروها والحاجة اللي مش بيعرفوا يفتحوها بيكسروها

ولو كان فيها سلاح كانت مصر جريت زي الكلب اللولو على امريكا واسرائيل وقالت لهم: بصي يا طنط انا جبت ايه؟

دي فرصة ذهبية لاعطاء شرعية للوريث

ولو كانوا عايزين حتى يلفقوا تهمة باطلة لايران واسرائيل ممكن برضه
تليفون صغير بس، انشالله ميسد كول واحنا كنا ح نكلمهم على حسابنا واللي عايزينه ح يتعمل
احنا اساتذة تلفيق وما نعزش عليهم حاجة

طب ليه بيغلسوا علينا؟
ليه اتحرشوا بمصر وجروا شكلها وعايزين يحرجوها ويقولوا ان مصر عدت اسلحة وصهينت عليها؟

يعني نعمل ايه اكتر من اللي بنعمله؟
ثم هم كده مش كسبانين حاجة لما يغتتوا على مصر بالطريقة دي
مافيش حد عارف يقبلهم

نتكلم بصراحة اكتر
اظن بعد تلاتين سنة اتهرينا واتفشخنا والمصريين بقى عندهم استعداد يتقبلوا اسرائيل يا مي
عندهم استعداد
الشعب مش الحكومة بس
طب ليه اسرائيل مش عايزة تديهم فرصة؟ ليه دايما حريصين انهم يرسلوا رسالة للمصريين ان جنبهم تعبان اصفر كل ما يصحى يبخ عليهم سم؟

احنا ما بنجيش بالعين الحمرا، احنا بنيجي بالكلمة الحلوة، والله
ودي حاجة سهل ان اي حد يعرفها، ده حتى عمر الشريف قال: الجرسون المصري قول له كلمة حلوة وحط فلوسك في جيبك، لو اديت له كل البقشيش اللي في الدنيا وانت قليل الادب ح ياخد البقشيش ويفضل يدور على طريقة يئذيك بيها من غير ما يتقفش
طب هم لا بيدوا بقشيش ولا بيقولوا كلمة حلوة
هي دي غباوة؟ وللا سوء فهم؟ وللا بقى ربنا عالم بينا وبيتولانا من عنده؟ وللا ايه الحكاية؟

حد يفهمني

على فكرة مش اذكيا زي ما كل الناس بتوحي لنا

عمرو

لا مافيهاش اسلحة شكلهم مش عارفين الاسلحة بتيجي منين وبيحاولوا يهبلوا وزي ما مي قالت هم عندهم تقرير جولدستون وبيحاولوا يغلوشوا

مي ثابت said...

بصى يا نونة

بحسب الرواية

السفينة فرانكوب

اللى كانت بتتفسح فى اليونان و قبرص

مكنتش محملة بالأسلحة وقت الفسحة

إنما بمواد غذائية من سوريا لإيران

وصلت دمياط إتفتشت و خلاص


و بحسب الرواية إن السفينة فيزيا اللى خارجة من إيران ديه اللى كانت فيها الأسلحة

و بعد كده تم نقل الأسلحة لفرانكوب



طيب المصريين سمحوا بالتبادل
؟؟

ميه فى الميه مصر الرسمية لا يمكن و لا يعقل تعمل و لا تسمح بده أبداااااااا


أنا طبعاً أعرف التفتيش فى المطار و أد إيه دقيق و محترم

لكن مشفتش الموانى المصرية إيه حالها





يبقى السؤال المحير اللى سألتيه

سوريا دولة و إيران شرحه

إيه المشكلة إن يبقى فيه سلاح متبادل يمكن التصريح به

؟؟

عموماً ننتظر الأيام اللى جاية خاصةً إن الصهاينة صرحوا إنهم حيعرضوا الموضوع على الأمم المتحدة


و أنا بادعى ربنا يكسفهم زى ما حصل الشهر اللى فات

لما الصهاينة إدعوا إن حزب الله بينقل صواريخ فى جنوب لبنان
و فى الآخر إتضح إنه باب جراش

و بقت فضيحة للصهيونى لإنه إخترق القرار
1701
بإختراقه الأجواء اللبنانية و التجسس و التصوير

مي ثابت said...

علمت الآن إن فيه قرار لمجلس الأمن رقمه

1747

بيحظر على إيران تصدير الأسلحة للخارج

و أعتقد ده ممكن يكون إجابة للسؤال الخاص بحرية تبادل الأسلحة بين إيران و سوريا

http://www.egypty.com/news-details.aspx?news=7873