Tuesday, 24 November 2009

خلاص بقى.. خدوهم على قد عقلهم

والله ما باقول كده عشان انا مصرية، انا بقالي فترة باحاول اطلع نفسي واتعامل على اني سنغالية مع الموضوع عشان ما اظلمش حد. بس من خلال متابعتي للاعلام المصري باقول للعرب، خلاص بقى، خدوهم على عقلهم، والله. خلاص.
مالكوش دعوة بيا انا سنغالية دلوقت. المصريين زعلانين. مكبرينها، مزودينها، متجننين، ماشي، الرحمة بقى. ارحموهم. اتفرجت النهاردة على العاشرة مساء، على الاقل لانه البرنامج الوحيد اللي مافيهوش شتيمة وضرب بالجزم وخوض في اعراض الناس وتحقير للجزائريين والصراخ الهيستيري بكرامة مصر اللي ظهرت فجأتن زي عفريت العلبة. بس الحلقة كانت بعنوان: لماذا يكرهوننا؟
خلاص.. انا عارفة ده جنان رسمي، مافيش حد بيذنب الدول المحيطة بيه ويحط افتراض ويحاكمهم على اساس الافتراض ده وكمان يدافع عن نفسه ويحس انه ضحية غير اتنين، امريكا ومصر.
الاعلام الامريكي عمل كده عشان يوجد مبررات للحرب على العرب والمسلمين ويقنع الناس ان المسلمين بيكرهوهم فيستاهلوا يموتوا. ده مبرر معقول، يعني اقصد الواحد يبقى فاهم هم بيعملوا كده ليه؟
لكن ليه المصريين بيعملوا كده؟ انا عارفة، بس خلاص، حرام بقى، قولوا لهم احنا بنحبكوا. اكيد يعني مصر مش عايزة تستعمر حد، هم بس تعبانين، مرهقين، حاسين بالضعف، الجيل ده من المصريين جيل ضاربه السلك، وان شاء الله الاجيال اللي جاية ح تعمل بيبي تقيلة على قبورنا، والموضوع مالوش علاقة خالص بمصر، مصر مش مجرد جيل فاشل في مطلع قرن مليان ظلم في كل الكرة الارضية، بقالها كتير، وح ييجي ان شاء الله اجيال تانية واكيد ح تبقى اوضاعهم احسن، اصل مافيش اوسخ من كده بصراحة، ح يحتقرونا صحيح ويقولوا الحمد لله ان الجيل ده غار في داهية، بس خلاص تعاملوا بقى. والله هم مش اشرار، مش اشرار قوي يعني، هو كل انسان جواه طاقة شر، ومع الفشل والمعاناة والاحساس بانه اوحش جيل مر على تاريخ مصر، بيتصرف تصرفات هوجاء.
يعني نفس الجيل ده اللي عامل عزا لكرامة مصر، هو الجيل اللي بيقعد يشتم في تاريخ مصر، هم هم يعني، بيقولوا على نفسهم مصريين ويقولوا مصر دي عمرها ما شافت يوم عدل وطول عمر المصريين عبيد. واي واحد بيفك الخط عارف ان ده كلام فارغ، بس هو الجيل ده من المواطنين حاسس بالفشل، وبصراحة حاسس انه عار على البلد دي وعلى تاريخها، انا واحد قالها لي بالمفتشر: احنا مشكلتنا ان لنا تاريخ. عارف كده لما يبقى ابوك دكتور مخ واعصاب وامك عالمة ذرة وانت ساقط تانية ابتدائي بعد ما عدتها سبع مرات؟ احساسه انه خريج تانية ابتدائي يخليه يقول لابوه: ايه يعني دكتور انت يعني؟ طب ده انا باعمل فلوس اكتر منك، بس ح يروح لابن عمه وح يقرفه بقى، انا ابويا دكتور، انا امي عالمة ذرة، المفروض، رحمة بيه يقول له وماله؟ انت سيد الناس وابن اصول، ما يكبسوش ويقول له ما تسكت بقى يا ساقط تانية ابتدائي، وللا يعمل زي الفلسطينيين اللي مصممين اننا نرجع المدرسة عشان عندهم امل اننا نذاكر وننجح وناخد الدكتوراه كمان، وما تقعدوش بقى تخنقوهم وتقولوا لهم لو انتوا بقيتوا كويسين احنا كلنا ح نبقى كويسين عشان ح تسمعوا كلام وحش، مش عشان الجيل ده بديل وقرون، بس عشان ده كلام فوق طاقته، اصبروا على رزقكوا، ح ييجي جيل كويس، ادي البلد قاعدة ح تروح فين يعني؟ ح تغرق؟ اهو تبقوا استريحتوا واحنا متنا واستريحنا.
فخلاص بقى، خلاص، ارحموهم، بالراحة، اعملوا معاهم زي عم مدبولي ما كان بيعمل مع قناوي في اخر فيلم باب الحديد، او زي ما فؤاد المهندس كان بيغني للسفاح ماما زمانها جاية. مش عايزين مشاكل الله يخليكوا، لحد ما الغمة دي تنزاح، هو الجيل ده ح يفضل عايش الى الابد؟
يعني يرضيكوا ومصر مبتلاه بالجيل الضعيف ده تقع فريسة في ايد اسرائيل ونتعزل وييجي اللي بعدنا يلاقوها عكة يقعدوا ميت سنة يصلحوا فيها؟ الناس لبعضيها، هم عايزين كلمتين حلوين، عندهم نقص حنان وعايزين حد يقول لهم: باحبكوا باحبكوا باحبكوا. ما تعملوا لهم اللي هم عايزينه ده الكلمة الطيبة صدقة، لحد بس ما الواد ساقط تانية ابتدائي يخلف عيل يمكن يفلح في المدارس وياخد الدكتوراه اللي انتوا عايزينها.
بلاش سلخ وتريقة والنبي، الكترة تغلب الشجاعة، فما بال مافيش شجاعة؟ وما تزعلوش، ما تزعلوش والنبي من قلة الادب دي، ده واد ساقط تانية ابتدائي هايف وكل ما ح تقول له يا فاشل ح يرد عليك ويقول لك: انت بتهين الدهاشنة؟ وماحدش بيهين الدهاشنة غير هبله، وقعدته مع العيال الصيع في وسط السكة يلعب معاهم بلي ويركب الزقازيق في المولد ويتخانق مع عبيط القرية ويعمل عقله بعقل عيل قد عياله شاط الكورة وجات في الازاز. وعلى رأي منى الشاذلي: الرد على جريدة الشروق ده زي واحد كاتب نوت على الفيس بوك يقوم رئيس الوزرا يخش ويتخانق معاه، معلش، بكرة تروق وتحلا، هو ح يموت وح تفضل الدهاشنة، من هنا لحد ما يموت طبطبوا عليه وادوله نبوت الغفير وقولوا له: احنا بنحبك يا بهلول، وقال على رأي المثل عمر الضفر ما يبقى مية والدم ما يطلعش من الكم.
وكلمة لاخوتي المواطنين، احنا جيل عار على البلد دي، يعني خسارة في جتتنا مصر الحقيقة، بس اهو نصيبها، من هنا لحد ما نموت والبلد دي ربنا يعافيها مننا ويجيب لها جيل محترم (وح ييجي جيل محترم بس نطلع منها احنا وما نحاولش نهبب اي حاجة عشان بنعك) نتنيل ونسكت ونبطل جر شكل في الناس، احنا بالصلاة ع النبي في ظرف خمس ايام اشترينا عداوة كل العرب، وكسبنا احتقار عالمي تاريخي عمره ما حصل في عيلة الدهاشنة، ده احنا في عز العدوان الثلاثي والعالم كله بيشتمنا وبيقول علينا شيوعيين عمر ماحد احتقرنا الاحتقار ده كله، كانوا بيكرهونا بس بيحترمونا، انما بعد انجازاتنا وتظاهراتنا الشعبية حتى مجلة التايمز مستهيفانا، فرانس توينتي فور مستهيفانا، اسرائيل مستهيفانا، الامريكان طلعوا علينا نكت وصحابي الامريكان اللي على الفيس بوك بعتوا لي يقولوا لي كده، اهمد يا بهلول، العب قدام البيت وما تروحش تبل نفسك في الترعة عشان البلهارسيا وما تحدفش الناس بالطوب والا والله ما اوديك الزقازيق في العيد.
كفاية بهدلة في البلد دي، نسيبها في حالها مدام مش عارفين نشرفها وما نلخصش مصر فينا عشان بجد احنا عيبة في حقها، احنا مش مواطنين، احنا ميني مواطنين، بميني مخ، وميني انتماء، وميني وطنية، وميني انجازات، وميني كرامة اتلخصت في ماتش كورة وواحد قلع بنطلونه لفردوس عبد الحميد، ده حتى الشهادة لله واحدة اتصلت تدافع عن القومية العربية، (بعد سيل من المكالمات من كذا بهلول بيقولوا: الواد مندوح ابن عمي سماعين وحش، مش بيحبني، مش بيجيب لي عسلية ولا ارواح زي زمان غيران مني عشان كسبت دور السيجا من الواد زاهر اخوه الصغير واخدت القرش اللي معاه طب واني مالي، مش هو اللي خسر؟)، وعشان تثبت ان القومية العربية لسة موجودة وان الواد مندوح ابن عمي سماعين، هو ابن عمي شقيقي، ولسة بيحبني ضربت مثل بجروب على الفيس بوك ضد الجزائر وعليه عدد كبير من العرب مشتركين فيه و"ما تتخيليش زعلانين علينا قد ايه يا مدام منى" وقاموا معانا بالواجب وحضروا الصوان من الاول لحد ما لمنياه، وحتى "في ستار اكاديمي كل العرب كانوا بيصوتوا لقماح عشان مصري"، خلاص بقى، انتوا ايه مافيش في قلبكوا رحمة؟ معلش البطن قلابة بقى، انا مش عارفة الخلفة السودا دي جابتها من مين؟ طبعا، ماهي اللي تخلف من عوكل ح تجيب ايه؟

29 comments:

Phobos said...

وكل ما ح تقول له يا فاشل ح يرد عليك ويقول لك: انت بتهين الدهاشنة؟ LOOOOOOOOOOOL

ahmed said...

الحملاوي عامل شغل :) .. نشطاء سياسيين مصريين بجد .. حاجه تجيب العيا

حسن على said...

"الاستاذة نوارة:استعارة من الكاتب الصحفى منير عامر "واحد احساس مضبوط من فضلك" هذا ما يليق ان نسمى بة مقالاتك الساخرة العاقلة الضاحكة فى وقت واحد ,واجى اكتب تعليق الاقيكى "مقفلة" الموضوع ولامكان لأضافة والا اصبحت تزيد سمج. تقبلى تحيتى واحترامى ومودتى الصادقة دائما

lastcrazyboys said...

انا بقى مش عاجبني من كــلام الناس العاقلين بتاع كل يوم ده ..ومعشش في نفوخي غير المثال بتاع الواد اللي امه عالمة ذرة وابوه دكتور
طبعا باقي الكلام مش هناقشك فيه
لان طبعا هنقعد للصبح في الموال ده

بس انا هأيدك في حاجة تانية..تحرق الدم برضه ..ليييه بقى

اصل ماينفعش شـوية العيال الصيع اللي بيجروا ورا الكورة في كل حتة
"اللي هم احنا طبعــا" ..ساكتين وحطين خـ..... في خشمهم يا هنادي
والصفــوة عاملين الغاغة دي كلها
ومحدش يقوللي : لا لا لا مش موضوع ماتش كورة
لا يا حلو منك ليه ..العالم كللله بيقول دول صعبان عليهم يتغلبوا في كورة ..واننا مجانين
طب مجانين دي وانا معترف..بس مش بالعالم دول لا مواخذة يعني

يبقى احنا هنا بنتخانق عشان الفنانين اضربوا .." انا كلمت الناس اللي سافروا مع الالتراس وقالولي احنا اول ناس اتعرضنا للهجوم ونزلنا اتعاملنا عاادي..والعيال جريوا مننا ..لما وصلنا لمكان العشا قالولنا الفنانين بيضربوا..والطيارة هتتأخر شوية
"
وماجد المصري بيقول : مش ممكن يا جماعة ..مششش ممكن ..ايه خير يا استاذ ماجد..قالك : ده انا سمعت اقذع الشتايم
نعم يا روح خالتك..ده احنا لما بنروح اسماعلية الإمن بيحذرنا نفتح الستاير..بينقح علينا عرق الشجاعة .. .نطلع نهلل من الشبابيك..ود عندك طوب ..وكل ما تشتهي الانفس
طب انا قدام عيني واد خد الشباك ونزل بيه في اسماعلية ..وكنا هنهرسه لانه كان في الاتوبيس اللي قدامي مباشرة

واي حد راح ماتش الستة يعرف الموضوع ده
يبقى سيبوا الكورة لاهل الكورة
ولو عالفنانين ..يبقوا يناموا بدري بعد كده ..وبلاش صرمحة في بلاد الله
===
ملحوظة اخييرة هتخنقك طبعا : انا بقى اكتر حاجة مكيفاني ..انه كفاية بقى موضوع الريادة ده ..لانه احنا واخدينها بأنه :متعرفوش احنا مين يا ولاد الكلب ..احنا المصريين

وهم حطين في دماغهم يورونا مقامنا صح
والناس التانية لسة عايزين يحاربوا لاخر جندي مصر
كفااية بصراحة عالاااااخر

mido said...

كل ده بذنب الناس الغلابة اللى احنا قافلين عليهم

مضيق رفح

هو احنا حنشوف خير ابدا

:D

بهيج الشرير said...

بقى ياأبلتي هو ده عمرو أديب اللي بتحكوا عنه! ده ياإخوانا صلعته شبه طيز العيل

حسن مدني said...

الله يسامحك يا نوارة

قلبي وجعني من الضحك ومن الكآبة، بتفكريني بمحمد الماغوط. مضحك ومبكي زي حالنا بالضبط

وعلى فكرة، مافيش حد بيكره مصر، بالمطلق، فيه ناس بتكره الحكومة، وده عادي، وفيه ناس بتكره حالنا، زي ماحنا كارهينه، وده لازم. وفيه ناس متضايقة من حاجات معينة، وده برضه عادي.
أنا مقيم في البحرين، وعندي معارف وأصدقاء من كل بلاد العرب تقريباً.
أنا سمعت وصف (صحيح مصري) على أكثر من موقف في البحرين، منهم بصيغة المدح، ومنهم بصيغة العتاب، ومنهم بصيغة الذم. وكلهم على حركات لا تصدر إلا من مصري.

تحياتي

khairy said...

بجد احييكي علي الموضوع تحفه وموضوع تانيه ابتدائي ده فعلا بيوضح اللي وصلناله بس انا كنت دايما بفكر في اللي احنا فيه ده علي ان مصر بقالها فتره ماشيه بنظام طرابيزة القمار يعني احنا بقالنا سنين دلوقتي شغالين خصخصه زي اللي قاعد بيلعب قمار وكل شويه يخسر يقوم بايع لغاية موصل انه بقي قاعد بالملابس الداخليه وطبعا وهو بيلعب قاعد يسكر فبعد مخسر كل حاجه نزل يطوح في الشارع وقعد يقول انا جدع انا كبير انا الكل في الكل المشكله بقي ان بعد كده ان اللي بيسكر ده هيغمي عليه في نص الشارع وسط الناس ده اللي مخوفني ان هييجي علينا اليوم اللي هيغمي علينا فيه بس يمكن وقتها مصر تفوق ونرجع نبقي حاجه

Amr said...

عارفه يا نواره كلامك ده بيشرح دعاء طول عمرى بخاف منه بس بحبه وأنتى جبتيها كده بالمفتشر

اللهم أستعملنا ولا تستبدلنا

أنا خايف يانواره ربنا يستبدلنا

وربنا لما بيبدل خلق بخلق بيأه بغضب
دايما" العلماء بيقولوا أن الأقوام اللى ربنا عذبهم ايام الرسل والأنبياء كانوا بيمروا بمرحلتين
هتك ستر وبعدين عذاب
واللى أحنا فيه ده ياخوفى ليكون المرحله الأولى
أحنا ظلمنا كتير أوى وأفسدنا فى الأرض كتير أوى
وأدينا داخلين على نقطة اللاعوده


ليه كده يابنت عمنا ؟
هيا ناقصه ؟

سجدة said...

تصدقى بالله انا جالى إحباط شديد وكنت بكره حكومة البلد دى مش عارفة اليومين دول بدأت ازعل من الشعب هو كمان
انا بقعد افهم فى الناس يعنى قلة بقتنعوا والباقى راسهم والف ....قديمة المشكلة بقه اللى انى بقدر اقناعهم هما اصحاب العقول البسيطة والخبرة القليلة فى الحياة لكن للاسف المتعلمين جدا واصحاب الخبرات فى الحياة منتهى التمسك بنفس النغمة ونفس وجهات النظر انا خلاص حقيقى قفلت ودنى عن كلام الناس فى الشارع وعن كل الحوارت لأنى بجد تعبت وحاسة نفسيتى زفت وبنام احلام بالاحداث دى
وحاسة ان البلد دا ولا هيقوم لها قومة ولا بعد سننننننننننننننننين طويلة
إحبااااااااااااااط
حسبنا الله ونعم الوكيل

JanuskieZ said...

Hi... Looking ways to market your blog? try this: http://bit.ly/instantvisitors

فلاشاوي said...

وأنتي بتطلبي من باقي العرب إنهم ياخدونا أحنا على قد عقلنا
؟

على أساس أن باقي العرب عاقلين وأحنا مجانين
؟

طيب

بما أني واحد من المجانين احب أقولك ان اكتر حاجة مفرحاني في اللي بيحصل هو أن بتوع القومية العربية هيتهدوا بقى ويريحونا من الصداع بتاع الفكرة العبيطة دي اللي ماتت مجرد ما الراجل اللي دعا ليها مات

الا هو صحيح ليه مصر زمان وقفت مع الجزاير ضد المغرب .. ليه يعني أعتبرنا الجزاير عرب والمغرب لأ

على أي أساس يعني ؟

مش العربي ده هو اللي مفيش حاجة في الدنيا عرفت تغير طبعه القذر غير الإسلام وبعد مجهود خرافي من أعظم الرسل اللي عاش في وسطيهم 23 سنة وأول أما مات ارتدت معظم الجزيرة العربية إلا مكة والمدينة ؟

العرب اللي كان الواحد فيهم أما يصحى الصبح ومش لاقي حاجة يعملها فيروح يغير على خيمة جاره

العرب اللي الفرس كان عندهم حضارة على يمينهم والروم عندهم حضارة على شمالهم وهم بيدفنوا البنات بالحيا ويستوطنوا في حتة فيها مرعى لغاية ما يخلص يسيبوه ويدوروا في حتة تانية وعمرهم ما فكروا يعمروا مكان يعيشوا فيه للأبد

مين الحمار اللي فكر إن عقلية زي دي فطرتها وتسليتها هي الحرب بينها وبين بعض انه يعمل بينهم وحدة على اساس كونهم عرب

وبعدين أنا مش فاهم ليه لغة واحدة بقت شيء كافي لعمل وحدة ما احنا شايفين الإتحاد الأوروبي اللي بيتكلم يجي عشر لغات مختلفة متحد واخر حلاوة

اللغة اللي العرب مكانوش بيستخدموها غير يا إما في هجاء أو نفاق وفخر عبيط لقبيلة بتتنطط في الصحرا على كام قبيلة اضعف منها

أنا عارف يا حبة عيني أن بتوع القومية العربية محروقين ومش راضيين يصدقوا أنها ماتت وشبعت موت لغاية ما ريحتها طلعت والدود بيسرح على جسمها وهم قاعدين جنبها عالسرير ويقولوا بكرة تقوم وتبقى زي الفل
هاتلوها انتوا بس شيخ شاطر وهو يقرا عليها وهتقوم تتنطط دلوقت
!
بلا قلة عقل ..
قومية عربية قال
الحمدلله أني مجنون
!

طيف بدر said...

يا رجال مصر و يا أبطال الجزائر ... جتكم خيبة !!!
----------------------------------
ضابط مخابرات أمريكية يتم التحقيق معه في الولايات المتحدة لاغتصابه نساء مصريات في قلب القاهرة و نساء مصريات في قلب الجزائر أثناء تأدية مهمة استخبارية في القاهرة و الجزائر ...
هل تعرفون لماذا يتم محاكمته ؟؟ لأنه صور ما قام به على شرائط فيديو دون تصريح من المخابرات الأمريكية !!!
-----------------------
من جريدة (الشرق الأوسط)
http://www.aawsat.com/details.asp?section=4&article=505035&issueno=11021

"وكانت قناة «إيه. بي. سي» الإخبارية الأميركية أول جهة إعلامية أكدت أول من أمس، عودة وارين إلى واشنطن والتحقيق معه. وقالت «إيه. بي. سي» إن المرأتين قالتا إن الاعتداءين الجنسيين المنفصلين وقعا في مقر السكن الرسمي لضابط الاستخبارات. وأضافت أن اكتشاف أكثر من 12 شريط فيديو يظهر فيها ضابط الاستخبارات في أوضاع مخلة مع نساء أخريات، دفع وزارة العدل الأميركية إلي توسيع التحقيق ليشمل مصر حيث عمل الضابط في فترة سابقة. "
---------------------
من موقع قناة (فرانس 24)
http://www.france24.com/en/20090129-cia-algeria-station-chief-faces-sex-assault-probe

"Officials told ABC that prosecutors have broadened the investigation to Egypt because the date on some tapes matched the time when the officer was posted in Cairo"
------------------------

Shoukry said...

You know that I was against this from the beginning but I cannot afford this anymore ... really

May be we are sick and full of problems and we cannot serve the Arabian situation as we were before, is this an excuse to forget all of our contributions and start humiliating us?! why didn't they stand with us and help us instead?!.

I am talking about all the Arabian countries who humiliated us in Libya, Saudi Arabia, Algeria, Kuwait, Syria and Qatar. All of these countries have very bad memories with humiliating Egyptians. Why??! Why don't you help during the bad situations ?!

They accuse us that we were cowards during the war occurred on Gaza although, Gaza authorities reported that the aid sent by Egypt was the biggest and on the other hand, they sends more than 20000 armed men to Sudan in a football match with - Sister - country, where were they during the war on Gaza?!

The problem in the latest attacks on football fans is that it was systematic and on purpose and all the witnesses said that its will was housed and served by the Algerian authorities. may be we attacked them here like they did with us when we was there but it was just raging football fans not a systematic system from the authorities.

You shouldn't say that Egyptians just remembered that they have dignity. well, may be we was easy in dealing with that matter during some situations from Arabs and Foreigns but this doesn't mean that we show submission to everyone. You may be wondering why we didn't do this when Israel killed 2 soldiers on the border, Israel hate Egypt and Egypt hate Israel so there is enough reason to Psychologically understand the attack but this is not the situation with Algeria, I - myself - didn't expect that it reaches this extent and they forget the history between the 2 countries that easily.

You are talking about media, Egyptian media is very kind, really, their media was the one who heated the situation from the beginning. Look at the media perspectives before and after the match. Look at Wael El Ibrashi perspectives after what occurred to him in Sudan and Even Amr Adib?! Before the match, he had calls from people who told him that Algerians Carry knifes and have the will to assault Egyptians and he told them that it is just a football game and we are brothers and nothing can happen?!. I have this video if you want it

Telling truth doesn't heat the situation, the corrupted media of Algeria who told many lies about the killing that occurred and Assaults on Algerians in Egypt heated the situation. I saw Algerian Fans in El Haram street Carrying their flag and verbally assaulting Egypt!!!!!!! and no one attacked them, they burnt our flag in the Stadium and in our country and nothing happened to them. Every thing being reported that it had occurred in Egypt was done by a few raging fans like - AGAIN - what they did in Algeria. On contrary, Here was just football but the assault in Algeria was political.

At least here in Egypt, We saw many many many people before the match who tried to put things into its proper perspective whereas their media and even the national ones was all in one direction which put the authorities into question. Why all this?!!!

They know that we are raging here, How come they didn't have an immediate official apology to what happened?!!!

Please don't blame the media here, it was very natural to react this way to the situation.

جبهة التهييس الشعبية said...

انا كتبت رد طويل على

شكري

اللي مصمم يقول كلام الاعلام المصري

سواء في موضوع غزة او في موضوع الجزائر

بس طار

بس يا شكري انا مكسلة اعيد الكلام اللي قلته بخصوص المساعدات الكتيرة اللي العرب قدموها لنا
وانا ماحدش اهانا ولا حاجة احنا اللي بنهين الناس ونقلل منهم

وعن موضوع غزة اللي هو اصل البلا كلها لان موقفنا كان عار والعالم كله كان بيشتمنا وفعلا كسبنا قرف العالم

وعلى فكرة الناشطين في امريكا واوروبا حرقوا العلم المصري مع العلم الاسرائيلي

بس طبعا الخواجات على قلبنا عسل

بص يا شكري

نصيحة لوجه الله

ما تكررش كلام الاعلام المصري وتقول عليه رد فعل عشان هو مبني على اكاذيب وعشان هو السبب في ان كل العالم بيحتقرنا دلوقت

ده بيريز قال لمبارك ما تهدي مع الجزائر شوية انتوا مكبرينها

كفاية بقى ضحكتوا علينا العالم



الرد التاني لفلاشاوي

انت المفروض انك مسلم يعني؟

مسلم وبتقول الكلام العنصري ده؟


ده انت ربنا ح يبهدلك على الكلام اللي بتقوله ده

اي والله

جبهة التهييس الشعبية said...

طيف بدر

طب ممكن اسأل هو الظابط اللي جه يغتصب في مصر والجزائر ده

جاي مصر والجزائر بالذات؟

اشمعنى

انا اللي يهمني اعرف نوع المهمة الاستخباراتية اللي جالها في مصر والجزائر

واللي بعدها مصر والجزائر اتخانقوا على ماتش وازاز في تي شيرت محمد فؤاد

mido said...

اقرى مقال عيسى :

بيحرض على الانقلاب عينى عينك

:D

http://dostor.org/ar/index.php?option=com_content&task=view&id=38807&Itemid=64

mido said...

نوارة

ضابط المخابرات الامريكى ده كان فى شغله العادى

مكتبه يعنى

سواء لما كان شغال فى مصر او لما كان شغال فى الجزائر

و أثناء عمله اعتدى على النساء دول

مجاش مخصوص يعنى

و الخبر ده من 6 شهور تقريبا

جبهة التهييس الشعبية said...

حسن مدني

انا مش عارفة ايه حكاية كل الناس بيكرهونا دي

تفتكر يعني اي مواطن في اي بلد تانية فاضي يفكر بيحب مصر وللا بيكرهها؟

خلاص بقى ياخدونا على عقلنا والله

يقولوا لنا بنحبكوا وخلاص

لاست كريزي بوي

ههههههههه
حلوة قوي

انا ح اخدها لنك على البوست في التحديث

بس هو ماحدش قال عايزين يقاتلوا لاخر جندي مصري

دي اوشاعة طلعها السادات عشان يعزل مصر عن المحيط العربي

وبصراحة من قلة الاصل اللي في الجيل ده اننا بنهون كل مساعدة جات لنا

واحنا جات لنا مساعدات كتير مادية وعينية والجزائر مات لها كتيبتين في الحرب معانا

كتبيبتين كاملين كلهم ماتوا

ماهو ده من ضمن وطيان الواد ساقط تانية ابتدائي

مهما الواد مندوح يجيب له ارواح وعسلية ياكلها ويخبي الباقي ويقول له انت ما جبتليش حاجة يا مندوح


اي والله

وبدل ما في كل مناسبة نقعد نعاير الناس ونقول لهم قمصاني وشراباتي

على رأي المثل بقى: ان كنتوا اخوات اتحاسبوا

نتحاسب بالورقة والقلم ونشوف مساعداتهم ونشوف مساعدتنا والفرق يتدفع بقى

عشان نخلص من الوش ده

بس هم اصلا لو فتحوا بقهم في انهم ساعدونا ح يتمرمطوا بهدلة وتهزئ

فخليهم بقى ساكتين ويخادونا على عقلنا وخلاص


عمرو

هو الجيل ده واطي فعلا
وياكل وينكر بكرة نموت وربنا يخلص العالم منا

انا عمري ما شفت كم الانحطاط ده في تاريخ مصر الحديث ولا القديم يا اخي

عمري في حياتي ما شفت الانحطاط ده ابدا

ولا في اسود ايام العثمانيين وصلنا للمستوى الواطي ده

جبهة التهييس الشعبية said...

ميدو

ولسة

بس على فكرة، غالبا خلاص، يعني ربنا مش ح يعقابنا تاني بقى مافيناش امل

اصل كل الهوس بتاع الماتش ده من اثار حرب غزة واحساسنا بالفشل وان كل العالم كان نازل شتيمة فينا

خيري

والله فعلا بنتصرف زي السكرانين

حسن علي
انا باحب جلال عامر


سجدة

مش ح يقوم لها واحنا عايشين

احنا مش ناس مقهورة

احنا ناس فاهمة غلط

اصل الناس عمالة تقول الاعلام هو السبب، ماللي بيشتغلوا في الاعلام دول ما هم مواطنين زينا

صحيح انهم موجهين من علاء مبارك عشان الحملة اللي على الجزائر دي

بس انا باتكلم عن الكواليتي بتاع الحملة

حاجة وضيعة فعلا
ويا اما وضاعة زي الكلام عن اعراض الناس

يا اما جنان زي: هم بيكرهونا ليه

طب على فرض بيكرهونا

معقولة يعني كل الناس غلط واحنا اللي صح؟ ما اكيد لهم سبب يعني

phobos
:)

احمد
:)
الحملاوي نعمة واللي يكرهها يعمى

مصر 30 said...

يا ترى والدك غحساسه إيه و هو كان كاتبلك قصيدة بيتنبأ فيها إن زماننا حايبقى أحسن من زمانهم و عدت السنين و بقينا نقول و لا ربع ساعة من أيامهم ؟؟؟

جبهة التهييس الشعبية said...

مصر 30

تصدق ان ابويا مصدوم؟

تصدق؟

ابويا ده ما بيتصدمش ابدا ابدا ابدا

ياما دقت على راسه طبول يعني

وعلى طول عنده امل

اول مرة اشوفه مصدوم، ولا حتى اتصدم ايام حرب غزة الصدمة دي

عشان مصدوم في الناس

زمان الوصل said...

حظّنا حلو إن الماتش الأخير كان مع فريق عربى .. عشان نعرف نعلّق كل غضبنا و ردود أفعالنا على العروبه و القوميه و الدّاعين لهما !! متهيّألى لو كنّا لاعبنا فريق أفريقى ليس بيننا و بينه عامل العروبه المشترك كانت بقت مشكله حقيقيه للإعلام و المهيّجين إنّهم ماكانوش هيلاقوا ما يملئوا بيه مئات من صفحات الجرائد و ساعات الإرسال للتّ و العجن فى الموضوع .. ياولاد المحظوظه

Kontiki said...

ازيك يا نوارة
مش عارفة القصة دى اخرها اية ؟ يعنى عاوزين يوصلوا لاية مثلا ؟؟ حنعلن الحرب على الجزاير ! نقطع علاقات دبلوماسية وثقافية مع دولة ! عشان ماتش وشغب بعد الماتش !
اية الهدف من دة كلة
الهاء عن اية؟ التوريث والفساد والغلاء والتعليم الحقير والوظائف المنعدمة واكوام الزبالة
ما اصلا الشعب ملهى بالحشيش والدين و الدش والكورة ويلا عشان منتحرمش من حاجة اهم ادونا قضية وسابوا الغوغاء من نفسهم يعبروا و يكسروا ويحرقوا
ولا دة مثلا اختبار لمدى قدرة النظام رغم مساوئة على توجية الراى العام !
زمان قوى كان بيجيلى سؤال جغرافيا اكتب اسماء خمس دول فى الوطن العربى
كت بكتب مصر و ليبيا وتونس والجزائر و المغرب
دلوقت انا عاجزة عن التعبير
عشت وشفت دول عربية بتحرق اعلام بعض
ويعايروا بعض بالاحتلال
والانسان بيتهان والكل همجى ومتعصب والكل خسران
حسبى الله و نعم الوكيل

lastcrazyboys said...

انا لله في لله ..لما بيجيبوه يعلق في الجزيرة على اي حدث بحس انه صخص سييييس ..بس انا شايف ان العينات اللي زيه وشوبير لابد من وجودها
عشــان التف عالارض مش مظهر حضــاري

بصي عاللينك ده
http://www.elbashayer.com/news-71836.html
===

إلا بالحق شكــر خاااص يا مصر 30 لاني كنت ناااسي خالص انها ابنة واحد من فطاحل مشجعي النادي الأهلي..هو صحيح عم نجم لسة بيتشبث بالاسلــوب الكلاسيكي" وده يتضح من لقاءاته المتعددة" ولسة مشتاق لشعار "الأهلي حـديد"..وشيلوا الـرِّف"..بس الايــام زي ماتغيرت عالمستوى الاقتصادي والمادي..اتغيرت عالمستوى الاجتماعي والاخلاقي والعلمي..والاهم من كل ده ..العقلي

لأنه على ايامكم يا عمنا..كان في ناس جاهلة..بس عارفين انهم جهلة..
وقليل الادب كان عارف انه شمحطجي ابن كلب
انما دلوقتي محدش عارف حاجة عن نفســه..وكل واحد فاكر ان ده الصــح ..فليك حق تتصــدم

ملحوظة : تحيــة خالصة ..على انك عرفتي تخلينا نخش المدونة بتــاعة
نــــوارة
دون النظـر -عند التعليق- انها ابنة هامتين من هامات مصر الثقافية

مواطن مصري said...

طب فين الفضيحة ؟؟؟


هو قال انة في وكالة طارق نور


و متحاصر من برة

اسمعي المكالمة تاني

rekapi said...

يا بنت الايه !!! تصدقي اول مرة اعرف انك بنت الاستاذ الكبير عمي وتاج راسي الاستاذ احمد فؤاد نجم معلش سامحيني علي جهلي واللي مايعرفك يحهلك اصلي جديد علي المدونة بتاعتك وبصراحه هذا الشبل من هذا الاسد هي هي طولة اللسان ولامؤاخذه ..العرق دساس يا عمي ..المهم ان بصراحه كلامك كل يوم بينزل عليا بردا وسلاما وبيفكرني بالمثل اللي بيقول العقل زينة ..فعلا احنا وصلنا لمرحلة محتاجين ان العالم كله يخدنا علي قد عقلنا يعني بالبلدي احنا عجزنا ..شيخوخة والله يا ست الناس ..بقينا شبه الريس بتاعنا راجل كبير في السن ومحتاج اللي يسايسه ..يارب يتوكل بقي علي الله ويجي حد كويس يعرف قيمة البلد دي بحق وحقيق يمكن ساعتها علي رايك نكون متنا وشبعنا موت ومش مهم الجيل اللي جاي يشتمنا ويعمل ببي علي قبورنا بس المهم انه يتعلم من اخطاءنا وميكررهاش تاني ..go on واحنا وراكي يا كبيرة

Ahmed said...

بصراحه انا مش معاكي في اللي بقوليه بالضبط

هو احنا فعلا عندنا انتقادات لاداء الحكومه ومشاكل داخليه كتير
. بس دا ميديش الحق لايدوله تايه انها تهينا
احنا ممكن نتكلم عن فسنا زي ما نحب بس منقبلش حد يتكلم عنا.
وزي ما احنا عندنا فساد هم عندهم اكتر بكتير
وحدش اصلا يقدر ينكلم.
المكشله الحقيقيه ان في جهات بتحاول توقع مصر لان اذا سقطت مصر سقط العرب
وللاسف في ناس من الغرب عندهم احقاد
بيكرهو مصر لمجرد احساسهم انهم احسن منهم في كل المجالات
وبالتالي يبدا الكره
بدل ما يحاول يطور نفسوا ويكون احسن .
مينفع نظام او حكومه دوله عربيه يبعت مشجعين ماجورين لضرب جماهير دوله تانيه دي القضيه مش مساله ماتش كورهز


وبعدين احنا مش بنمن عليهم كل شويه او نقعد نفكرهم باللي عملناه ليهم لا الكلام دا مش صحيح .
لكن لما حد ينسى المعروف ويبدا يغلط فيك وقتها بس بتبدا تفكره عشان تقوله عيب كده غيب اللي تعمل دا بعد اللي عملته معااك .

انا مقدر ان اداء الاعلام المصري سيء جدا ودا غلط ؟ بس حد فيكم راي الاعلام الجزائري .؟ دا مش غلط دا بيعمل فتن وينقل اخبار كاذبه وهمهم المكسب المادي فقطز ربنا يحمينا والمسلمين شر الفتن

Shoukry said...

just for you to clarify my point of view. I want to stress of just one thing. All Arabs should stand with us if they cannot serve the Arabian case like we were before instead of burning our flag. If they burnt Mubarak's picture I will understand but not our flag. They flag - with its current shape - is a symbol to all Egyptians.

If like what is LastCrazyBoy said that they insist on showing us what really we are. It doesn't show respect as well and it is not from the brotherhood we claim.