قصر ولم المتكسر بقى في موضوع الكرامة المهدر

 تحية الى الروح النضالية المحيطة بسفارة الجزائر:





قال لك مقاطعة الجزائر فنيا واقتصاديا وسياسيا

ما تفككوا من موضوع كرامة مصر والمصريين دي بقى عشان الموضوع بوخ فعلا.. يعني تبعتوا ناس سيس ينضربوا ويجروا وترجعوا تعيطوا؟

احساس الناس العادية في مصر دلوقت، زي احساس الجزائريين بعد الماتش الاولاني، انهم انضربوا وما اخدوش حقهم، ده كل اللي فارق معاهم، مش ان فيه ضرب، هم متعودين على الضرب، زي ما الجزائريين اتحبس دمهم لما الاتوبيس بتاعهم انضرب وتلات لعيبة اصيبوا وواحد من البعثة جاله ارتجاج في المخ، الاصابات مش هي اللي حبست دمهم، التقرين على الموقعة وتزوير تقرير مباحث وتسخير الاعلام المصري عشان يدعي ان الناس هي اللي ضربت نفسها وتنضيف الاتوبيس قبل معاينة الفيفا (وما كانش فيه داعي ابدا للفيلم الهندي اللي حرق دم الناس على الفاضي لان الفيفا كشفتنا وح تعاقبنا) هو اللي خلاهم بيهروا وينكتوا وفي نفسهم، ويروحوا يحاصروا المصريين زي ما احنا كده محاصرين السفارة الجزائري، وجالهم نفس احساس "انتوا بعتوا جمهور سيس ما اخدلناش حقنا". والموقف الرسمي الجزائري دلوقت شبه الموقف الرسمي المصري ساعتها اللي على حسب قول وائل عبد الفتاح، ان الرئيس مبارك قال لابو تلفيقة تعليقا على حادث الاتوبيس: انا ما اقدرش اسيطر على مشاعر الجمهور المصري. وفوق البيعة المباحث زورت تقرير، وفوق البيعة الاعلام، بكل قنواته حتى الخاصة ما كانش له سيرة غير الجزائريين اللي ضربوا نفسهم (ملحوظة: عشان تتأكدوا بس ان كلامي صح، الجزائريين علقوا على حادث السودان وقالوا: المصريين ضربوا نفسهم - يعني انتقام اهو باين، وما تقلبوش شفتكوا وتقولوا: انتقاميين همج، وما تعملوليش قلبنا ابيض ومتحضرين عشان الجمهور المصري الكروي دغان وقلبه علبة بلاك اسود وميته ما يدفنش، هو احنا ضربناهم ليه في الماتش الاولاني هنا غير عشان ضربونا من عشرين سنة؟ وبالمناسبة بتوع الالتراس قالوا ضربناهم والامن قرن علينا واحنا لنا حق هم ضربونا سنة 89). وابو تلفيقة (يا هيافتهم هم الاتنين) بيرد له الحركة عشان الناس وقتها كانت عاملة زينا كده دلوقت.

وانا مش فاهمة ايه اللي دخل اتنين رؤساء في ماتش كورة؟ حاشرين مناخيرهم في لعبة الفقرا ليه؟

دلوقت اللي مجنن الناس ومخليهم يحاصروا سفارة الجزائر ويحرقوا عربية الامن المركزي اللي كانت واقفة تحميهم (لاول مرة في التاريخ من ساعة ما مبارك مسك الحكم) ما كانش ثورة على الحكومة ولا عشان غوغاء، المظاهرات دي تقريبا دعا لها علاء مبارك بالمفتشر لما قال احنا كمصريين لازم نقف وقفة ونقول كفاية بقى كفاية طبطبة وتحسيس (!!)، بس هم حرقوا المدرعة عشان عايزين يوصلوا رسالة انهم "لا ده احنا صيع قوي وبنحرق ونكسر ومش احنا اللي ننضرب ونجري" وح يموتوا من الغيظ من حكايات الناس اللي استخبت في البيوت والطوب اللي كان بيعدي فوق راسهم والفيديو بتاع "كله يوطي كله يوطي" واللي بيغيظهم اكتر ان الاعلام عمال يقول لهم: احنا شعب متحضر. الكلمة دي مجنناهم، عشان الكلام ده بالنسبة لهم معناه انهم بيقولوا لهم انت خـ... بس بادب. هم ما يعرفوش الكلام العـ.. ده، هم يعرفوا "انا اخد حقي بايدي وما استناش حد ياخدهولي" مش اللي رايحين يصقفوا في الماتش، حد بيصقف في ماتش؟ هي سيمفونية لبتهوفن؟ وينضربوا ويجروا، ويقولوا هو احنا بلطجية؟ لا انتوا مش بلطجية صح، مالكوا بقى ومال الكورة، الناس عندها احساس انه تم اقتحام الحاجة الوحيدة اللي بيمتلكوها.

ولو كان اللي راح جمهور عادي اللي متعود يروح الماتشات ويشجع ما كانش اصلا الفريق خسر لان الكورة هي اللعبة الوحيدة اللي الجمهور فيها بيسوق الفريق بتاعه، وهي لعبة عنيفة، ومعمولة اصلا عشان الفئات اللي جواها طاقة عنف في المجتمع مش عشان الناس اللي بتصقف واللي بتخاف على البنات اللي معاها، الامورة اللي خايفة تقعد جنب امها هي مش رايحة سيما. ثانيا ما كانوش اصلا ح يضطروا يشتروا سكاكين من السودان، مطوتهم في جيبهم، موسهم في بقهم، تمامهم، اللي يقرب جنبهم يشرحوه. وكان ح تحصل مصادمات اكثر عنفا ويمكن كانت وقع قتلى

بس ماحدش كان ح يبقى دمه محبوس بالطريقة دي، ولا السفارة كانت اتحاصرت، ولا اسعاد يونس كانت قاطعت الجزائر، ولا مهرجان السينما كان حشر نفسه في الليلة السودا دي واسعاد يونس تقول انا مش باكلم الشعب الجزائري انا باكلم القادة والمثقفين اللي ما اخدوش موقف

هم كانوا القادة والمثقفين في مصر اخدوا موقف شكله ايه لما تقرير المباحث الجنائية اتزور عشان يطرمخ على ضرب اتوبيسين واصابة تلات لعيبة؟ ثم ايه دخل القادة والمثقفين في ام الكورة، الكورة دي بتاعة الناس اللي لا هم قادة ولا مثقفين وبتدخل البهجة على قلوبهم عشان عندهم احساس ان لعيبة الفريق دول عبيدهم، وهم المسيطرين عليهم، وبيرفعوهم ويخسفوا بيهم الارض.

مش هو لعيبة الكورة دايما يقولوا بعد كل ماتش: طبعا بسم الله الرحمن الرحيم في الاول، طبعا الحمد لله رب العالمين، وطبعا اللي حصل النهاردة طبعا بفضل ربنا والحمد لله والشكر لله وطبعا انا باهدي النصر ده للريس، وطبعا باشكر الجامهور اللي لولاه ما كناش فزنا في الماتش ده.

و"الجامهور" عارف ان الكلام ده صحيح ودي الحالة الوحيدة اللي بيحس فيها انه له كنترول على اي حاجة في الدنيا.

وبصرف النظر عن حالة الجنون اللي في الاعلام وللا في الناس، الحق حق، الحقيقة ان الجمهور المصري والجمهور الجزائري خالصين. احنا ضربنا اتوبيساتهم واصبانهم في لاعبين اساسيين (ودي خسارة اكبر من الخسائر في الجمهور السيس - على الاقل بالنسبة لمشجعي الكورة وهم دول الوحيدين المهمين في الليلة دي وهم دول الوحيدين اللي اتنكدوا بجد من غير مزايدات على موضوع كرامة مصر) واستهبلنا وكمان شرشحنا لهم، وهم لبدوا لنا في الدرة وادونا مقلب حرامية.

ايه لزوم بقى الشعب الهمجي والشعب الجبلي واحنا ولاد النيل.. ايه ولاد النيل يعني؟ خـ.... يعني؟ ماهو كلام التطييب لمصر والمصريين اللي بيتقال في الاعلام ده معناه كده، وبعدين بيحزن الناس على نفسها زيادة ماهي حزنانة. وقال ايه الجزائريين شعب عنيف بطبعه، انما احنا بنزقزق ونصوصو. لا معلش احنا جامدين قوي وبنضرب وعندنا بلطجية، والبلطجية دول اصابو تلات لعيبة وارهبوا الفريق الجزائري وخلوهم يلعبوا وهم عاملين بيبي على روحهم هنا.

خلاص، خالصين، خلصنا بقى ما تقعدوش تجننوا في الناس بزيادة

والناس مش ح تشتفي الا تاخد حقها بالضرب عشان تبقى لها ايد زيادة على الجزائر، لا بقى سفارة ولا اسعاد يونس ولا مهرجان القاهرة ح يفش غلهم

هم مستنيين ماتش، كمان عشرين سنة، ويرنوهم علقة.. ده اللي ح يهديهم، وده طبيعي ان بين مصر والجزائر يبقى فيه المنافسة دي لانهم اقوى بلدين في افريقيا، واحسن فريقين كورة في افريقيا، واعنف شعبين كمان في افريقيا. وكل واحد شايف نفسه ملاك، وما يضحكنيش غير: الجزائريين شعب عنيف. على اساس ان رجالتنا لابسين جيبات وحاطين آي لاينر مثلا.. دول الرجالة اللي بعتوهم، مش كل الرجالة هنا كده. والمنطقة اللي جاي منها المشجعين بتوع ماتش السودان شبه منطقة اسطبل عنتر بالظبط. ايه؟ ما شفتوش ناس في اسطبل عنتر بيتخانقوا بالسيوف والجنازير وللا ايه؟

ثم ايه لزوم السودان وغزة وكل اللي عدى من جنبنا اتشتم واتف عليه؟ الواحد ح يمشي يعتذر عنكوا لمين وللا لمين؟ السودان وربنا بلاها وطلعت اوسا اللي المفروض كان باضت لها في القفص هي السبب، مش ان احنا والجزائريين رحنا للناس اللي استضافونا عملنا لهم مشاكل عشان مجانين، وقناة الجزئرة اتشتمت واتقال انها عتمت على الخبر، انا شفت الخبر ولقيتها جايبة كل الصور وجايبة الخبر كامل بتقرير من جانبين، حتى في الموجز، وطبعا قطر اتشتمت، وغزة اتشتمت... انا مش عارفة هم غايبين عن ايران وحزب الله العميل فين؟

بالنسبة للاعلاميين، والفنانين، وراخرين المدونين دول اللي طلعوا في البخت، والصحفيين: ادعي عليكوا بايه اكتر من اللي انتوا فيه وانتوا حالكوا يقرف الكلب الاجرب على راي خالتي فرنسا. يا تافهين يا فاضيين، مش عشان الكورة في حد ذاتها تافهة (ولو انها تافهة وشرير ومؤامرة سلطوية نخبوية على الشعوب الفقيرة)، بس عشان انتوا مش مهتمين بالكورة فعلا، طب اللي محروقين بجد الكورة دي كل حياتهم، انتوا مدفوسين ليه؟

لايموها بقى عشان بوخت كيك وما تقعدوش كل ما تشوفوا خلقة الناس تعيطوا لهم انتوا بتحبسوا دمهم كده بزيادة، ايه العياط ده كله؟ ومنى الشاذلي تطلع تقول بيحصل فينا كده ليه؟ هو سبق والاخوة الفنانين والمطربين واعضاء الحزب الوطني ولفيف من المسئولين راحوا في اي مؤتمر او مهرجان جزائري وانضربوا؟ ايه اللي وداهم ماتش كورة؟ اللي يلعب الدح ما يقولش اح، هم ايش عرفهم، هم مثلا عارفين احنا كنا بنلعب وحش وللا حلو؟ عارفين الحكم كان كويس وللا وحش؟ طب عارفين خطة الفريقين كانت ايه؟ عارفين اي حاجة كانت بتحصل في ام الملعب؟ وبعدين يخرجوا ينضربوا ويجروا؟ ويرجعوا هنا يعيطوا ويأوأوا ويكسروا نفس الناس زيادة بالعبء النفسي اللي بيحطوه عليهم؟ وفاروق جويدة شاعر الحمامتو المذبوحتو ده اللي بيكتب قصايد اكتر من تدويناتي وتويتاتي مجمعة يكتب في الموضوع ده؟ وتدخلوا القومية العربية؟ وتستدعوا السفير؟ (ادي اخرة يبقى عندك رئيس مهووس كورة ولا فاهم حاجة في حياته غير فيها) انتوا عايزين تموتوا الناس بالسكتة القلبية؟

ما موقف مصر دلوقت شبه موقف الجزائر بعد الماتش الاولاني بالظبط بالظبط بالظبط، لا زادوا عليه ولا نقصوا، الفرق بس ان المصريين ما لقيوش شركات ومجمعات سكنية جزائرية يحاصروها راحوا السفارة. والمصريين اللي راجعين من السودان بيتكلموا عن جحيم السودان بيقولوا نفس الكلام اللي قاله العائدون من جحيم القاهرة، وصحفي في المصري اليوم حب يعمل مغامرة لبس علم الجزائر ايام الماتش الاولاني وانضرب لما بان له اصحاب.

بالنسبة للسياسيين والاعلاميين والمثقفين والمدونين المصريين والجزائريين، هم الاتنين هايفين وفضحية وما يشرفوش اي بني ادم الحقيقة، والبني ادم ده اللي هم العرب بدون ذكر اسماء، الاتنين ما يشرفوش العرب. وكل واحد فيهم شوية يقول احنا مش عرب وشوية يقول احنا العرب والتانيين يهود، ثم ايه احساس اليهود وانتوا الاتنين بتشتموا بعض بيهم؟

وايه احساس العرب وكل واحد فيكوا عمال يقول انا مش عربي، وبعدين يرجع يرفد التاني من العروبة؟

وايه دخل ياللي حاصرتوا غزة يا يهود وياللي ياما ساعدناكوا واكلناكوا وشربناكوا وقمصاني وشراباتي وفانلاتي، وانا عايزة اعرف حرب ستة وخمسين دي قامت ليه بقى بالظبط؟ ايام حرب غزة (اللي مؤخرا اتشتمت من الجزائريين والمصريين عشان شوية منهم بيشجعوا مصر وشوية منهم بيشجعوا الجزائر وانا مش فاهمة ولاد الهايفة كورة ايه اللي بيشجعوها في القصف ده) ابو الغيط في وصلة المعايرة اللي كان فارشها للفلسطينيين قال ان حرب ستة وخمسين دي كان سببها دعم مصر للفلسطينيين وقمصانها وشراباتها وفانلاتها، دلوقت بيقولوا قمصان وشرابات وفانلات ستة وخمسين راحت للجزائر.

ثم ايه الجنان ده؟ الجزائريين يقولوا احنا امازيغ ولما حد يقول لهم يا امازيغ يزعلوا، المصريين يقولوا منتخب الفراعنة ولما حد يقول لهم يا آل فرعون يزعلوا، ايه منتخب الساجدين الفرعوني اللي بيزعل من وصفه بآل فرعون ده؟ ولايموا موضوع الفراعنة ده بقى عشان بقيتوا مضحكة العالم، فراعنة ايه في موسم الجوافة ده؟ هو فيه فراعنة دلوقت انتوا هبل؟ وللا هو استفزاز للناس؟ تقعدوا تقولوا احنا الفراعنة (اللي فعليا وثقافيا وعلميا مالهمش وجود خلاص) وبعدين ترجعوا تقولوا الناس بتكرهنا ليه؟
والجزائر ارض الشهدا ارض الشهدا، الله ايه يا عم، مال الشهدا ومال الكورة، هو فيه لعيب كورة بيستشهد؟ دول بيعيشوا لما يدفنوا كل جمهورهم، النعمة حلوة، وشوفوا لكوا حاجة تانية تعايروا الناس بيها غير موضوع انكوا بتموتوا كتير ده. وايه مصر فوق الجميع؟ ده ايحاء مش حلو ده، شوفوا لكوا شعار تاني، اللي عنده كلوستروفوبيا ح يتهيأله ان مصر كابسة على صدره، واللي عنده بارنويا ح يتهياله ان مصر ح تقع على راسه، واللي مخه وسخ ح يتخيل مصر في مشاهد مخلة بالاداب. وايه حكاية: كفاية بقى كفاية... كفاية ايه؟ هو انتوا كل ما حد يشوفكوا تقولوا له كفاية؟ ما عرفتوش تقولوا لمبارك كفاية ماشيين تقولوا كفاية لاي حاجة؟
طب على الله تقولوا كفاية للاكل، وللا للفلوس، وللا للجنان والهوس والهبل والهطل والخلل والعته والغبا والوش، الا دايما تقولوا كفاية على حاجات مافيش منها اصلا، زي كفاية طبطبة وكفاية نقول احنا كبار وكفاية بنفوت. اذكر حادثة واحدة الحكومة وللا الاعلام المصري فوت اي حاجة لاي حد؟ هو انتوا حد بيعرف يكلمكوا بشرشحتكوا دي؟ ده الناس بتتقي الحكومة المصرية واعلامها بل والاعلام المعارض والمستقل والشعبي خوفا من شر لسانهم.

وبصرف النظر عن مبارك وابو تلفيقة، اللي انا شايفاه ان كل من بنسمع صوتهم باي وسيلة من المصريين والجزائريين بيشتموا بعض باللي فيهم اصلا. وزي ما انتوا بتتكلموا عن كرامة مصر هم كمان بيتكلموا عن كرامة الجزائر.

وطالع مصطفى عبده يقول احنا مش اخوات... لا وحياة خالتك، ده انتوا توأم

فولة وانقسمت نصين

وفولة مسوسة كمان

اووووووووووووووووووووووووووووووووووووووووع

--------
تحديث:
بالنوسبة بس للهايفين اللي فرحانين بعلاء مبارك عشان قال كفاية تحسيس كفاية طبطبة
هو من امتى احنا بنسمع صوته وللا نعرف عنه حاجة؟ علاء ده بتاع البزنس، والجزائر ضربته في مقتل لما كبدت نجيب ساويرس عشرة مليون وفرضت عليه ضرائيب 600 مليون بعد ما كانت بتعفيه
داست على ديله يعني ومدت ايدها على اكل عيشه، عشان كده قرر انه يبطل تحسيس ويقف وقفة والحكومة الجزائرية لو عاقلة تهدي مع ساويرس/علاء مبارك عشان هو مالوش في السياسة بس نابه ازرق وعض قلبي ولا تعض رغيفي
حتى بالامارة قال: ما احنا بنلعب كورة مع دول الخليج وكلنا اخوات وعرب
يعني العشرين واحد اللي اتعوروا واوا ما يشبهوش اللي ماتوا في العبارة عشان علاء يهز طوله ويتصل يعبر عن اسفه، ونازل شرشحة للجزائريين: هوهاوة، اديك على دماغك، انتوا ماسكين علينا زلة... الراجل مش بيكلمنا خالص، بيكلم صحاب المحل: هو انا عمري اتأخرت في دفع الايجار؟