Friday 20 November 2009

قصر ولم المتكسر بقى في موضوع الكرامة المهدر


 تحية الى الروح النضالية المحيطة بسفارة الجزائر:





قال لك مقاطعة الجزائر فنيا واقتصاديا وسياسيا
ما تفككوا من موضوع كرامة مصر والمصريين دي بقى عشان الموضوع بوخ فعلا.. يعني تبعتوا ناس سيس ينضربوا ويجروا وترجعوا تعيطوا؟
احساس الناس العادية في مصر دلوقت، زي احساس الجزائريين بعد الماتش الاولاني، انهم انضربوا وما اخدوش حقهم، ده كل اللي فارق معاهم، مش ان فيه ضرب، هم متعودين على الضرب، زي ما الجزائريين اتحبس دمهم لما الاتوبيس بتاعهم انضرب وتلات لعيبة اصيبوا وواحد من البعثة جاله ارتجاج في المخ، الاصابات مش هي اللي حبست دمهم، التقرين على الموقعة وتزوير تقرير مباحث وتسخير الاعلام المصري عشان يدعي ان الناس هي اللي ضربت نفسها وتنضيف الاتوبيس قبل معاينة الفيفا (وما كانش فيه داعي ابدا للفيلم الهندي اللي حرق دم الناس على الفاضي لان الفيفا كشفتنا وح تعاقبنا) هو اللي خلاهم بيهروا وينكتوا وفي نفسهم، ويروحوا يحاصروا المصريين زي ما احنا كده محاصرين السفارة الجزائري، وجالهم نفس احساس "انتوا بعتوا جمهور سيس ما اخدلناش حقنا". والموقف الرسمي الجزائري دلوقت شبه الموقف الرسمي المصري ساعتها اللي على حسب قول وائل عبد الفتاح، ان الرئيس مبارك قال لابو تلفيقة تعليقا على حادث الاتوبيس: انا ما اقدرش اسيطر على مشاعر الجمهور المصري. وفوق البيعة المباحث زورت تقرير، وفوق البيعة الاعلام، بكل قنواته حتى الخاصة ما كانش له سيرة غير الجزائريين اللي ضربوا نفسهم (ملحوظة: عشان تتأكدوا بس ان كلامي صح، الجزائريين علقوا على حادث السودان وقالوا: المصريين ضربوا نفسهم - يعني انتقام اهو باين، وما تقلبوش شفتكوا وتقولوا: انتقاميين همج، وما تعملوليش قلبنا ابيض ومتحضرين عشان الجمهور المصري الكروي دغان وقلبه علبة بلاك اسود وميته ما يدفنش، هو احنا ضربناهم ليه في الماتش الاولاني هنا غير عشان ضربونا من عشرين سنة؟ وبالمناسبة بتوع الالتراس قالوا ضربناهم والامن قرن علينا واحنا لنا حق هم ضربونا سنة 89). وابو تلفيقة (يا هيافتهم هم الاتنين) بيرد له الحركة عشان الناس وقتها كانت عاملة زينا كده دلوقت.


وانا مش فاهمة ايه اللي دخل اتنين رؤساء في ماتش كورة؟ حاشرين مناخيرهم في لعبة الفقرا ليه؟
دلوقت اللي مجنن الناس ومخليهم يحاصروا سفارة الجزائر ويحرقوا عربية الامن المركزي اللي كانت واقفة تحميهم (لاول مرة في التاريخ من ساعة ما مبارك مسك الحكم) ما كانش ثورة على الحكومة ولا عشان غوغاء، المظاهرات دي تقريبا دعا لها علاء مبارك بالمفتشر لما قال احنا كمصريين لازم نقف وقفة ونقول كفاية بقى كفاية طبطبة وتحسيس (!!)، بس هم حرقوا المدرعة عشان عايزين يوصلوا رسالة انهم "لا ده احنا صيع قوي وبنحرق ونكسر ومش احنا اللي ننضرب ونجري" وح يموتوا من الغيظ من حكايات الناس اللي استخبت في البيوت والطوب اللي كان بيعدي فوق راسهم والفيديو بتاع "كله يوطي كله يوطي" واللي بيغيظهم اكتر ان الاعلام عمال يقول لهم: احنا شعب متحضر. الكلمة دي مجنناهم، عشان الكلام ده بالنسبة لهم معناه انهم بيقولوا لهم انت خـ... بس بادب. هم ما يعرفوش الكلام العـ.. ده، هم يعرفوا "انا اخد حقي بايدي وما استناش حد ياخدهولي" مش اللي رايحين يصقفوا في الماتش، حد بيصقف في ماتش؟ هي سيمفونية لبتهوفن؟ وينضربوا ويجروا، ويقولوا هو احنا بلطجية؟ لا انتوا مش بلطجية صح، مالكوا بقى ومال الكورة، الناس عندها احساس انه تم اقتحام الحاجة الوحيدة اللي بيمتلكوها.
ولو كان اللي راح جمهور عادي اللي متعود يروح الماتشات ويشجع ما كانش اصلا الفريق خسر لان الكورة هي اللعبة الوحيدة اللي الجمهور فيها بيسوق الفريق بتاعه، وهي لعبة عنيفة، ومعمولة اصلا عشان الفئات اللي جواها طاقة عنف في المجتمع مش عشان الناس اللي بتصقف واللي بتخاف على البنات اللي معاها، الامورة اللي خايفة تقعد جنب امها هي مش رايحة سيما. ثانيا ما كانوش اصلا ح يضطروا يشتروا سكاكين من السودان، مطوتهم في جيبهم، موسهم في بقهم، تمامهم، اللي يقرب جنبهم يشرحوه. وكان ح تحصل مصادمات اكثر عنفا ويمكن كانت وقع قتلى
بس ماحدش كان ح يبقى دمه محبوس بالطريقة دي، ولا السفارة كانت اتحاصرت، ولا اسعاد يونس كانت قاطعت الجزائر، ولا مهرجان السينما كان حشر نفسه في الليلة السودا دي واسعاد يونس تقول انا مش باكلم الشعب الجزائري انا باكلم القادة والمثقفين اللي ما اخدوش موقف
هم كانوا القادة والمثقفين في مصر اخدوا موقف شكله ايه لما تقرير المباحث الجنائية اتزور عشان يطرمخ على ضرب اتوبيسين واصابة تلات لعيبة؟ ثم ايه دخل القادة والمثقفين في ام الكورة، الكورة دي بتاعة الناس اللي لا هم قادة ولا مثقفين وبتدخل البهجة على قلوبهم عشان عندهم احساس ان لعيبة الفريق دول عبيدهم، وهم المسيطرين عليهم، وبيرفعوهم ويخسفوا بيهم الارض.
مش هو لعيبة الكورة دايما يقولوا بعد كل ماتش: طبعا بسم الله الرحمن الرحيم في الاول، طبعا الحمد لله رب العالمين، وطبعا اللي حصل النهاردة طبعا بفضل ربنا والحمد لله والشكر لله وطبعا انا باهدي النصر ده للريس، وطبعا باشكر الجامهور اللي لولاه ما كناش فزنا في الماتش ده.
و"الجامهور" عارف ان الكلام ده صحيح ودي الحالة الوحيدة اللي بيحس فيها انه له كنترول على اي حاجة في الدنيا.
وبصرف النظر عن حالة الجنون اللي في الاعلام وللا في الناس، الحق حق، الحقيقة ان الجمهور المصري والجمهور الجزائري خالصين. احنا ضربنا اتوبيساتهم واصبانهم في لاعبين اساسيين (ودي خسارة اكبر من الخسائر في الجمهور السيس - على الاقل بالنسبة لمشجعي الكورة وهم دول الوحيدين المهمين في الليلة دي وهم دول الوحيدين اللي اتنكدوا بجد من غير مزايدات على موضوع كرامة مصر) واستهبلنا وكمان شرشحنا لهم، وهم لبدوا لنا في الدرة وادونا مقلب حرامية.
ايه لزوم بقى الشعب الهمجي والشعب الجبلي واحنا ولاد النيل.. ايه ولاد النيل يعني؟ خـ.... يعني؟ ماهو كلام التطييب لمصر والمصريين اللي بيتقال في الاعلام ده معناه كده، وبعدين بيحزن الناس على نفسها زيادة ماهي حزنانة. وقال ايه الجزائريين شعب عنيف بطبعه، انما احنا بنزقزق ونصوصو. لا معلش احنا جامدين قوي وبنضرب وعندنا بلطجية، والبلطجية دول اصابو تلات لعيبة وارهبوا الفريق الجزائري وخلوهم يلعبوا وهم عاملين بيبي على روحهم هنا.
خلاص، خالصين، خلصنا بقى ما تقعدوش تجننوا في الناس بزيادة
والناس مش ح تشتفي الا تاخد حقها بالضرب عشان تبقى لها ايد زيادة على الجزائر، لا بقى سفارة ولا اسعاد يونس ولا مهرجان القاهرة ح يفش غلهم
هم مستنيين ماتش، كمان عشرين سنة، ويرنوهم علقة.. ده اللي ح يهديهم، وده طبيعي ان بين مصر والجزائر يبقى فيه المنافسة دي لانهم اقوى بلدين في افريقيا، واحسن فريقين كورة في افريقيا، واعنف شعبين كمان في افريقيا. وكل واحد شايف نفسه ملاك، وما يضحكنيش غير: الجزائريين شعب عنيف. على اساس ان رجالتنا لابسين جيبات وحاطين آي لاينر مثلا.. دول الرجالة اللي بعتوهم، مش كل الرجالة هنا كده. والمنطقة اللي جاي منها المشجعين بتوع ماتش السودان شبه منطقة اسطبل عنتر بالظبط. ايه؟ ما شفتوش ناس في اسطبل عنتر بيتخانقوا بالسيوف والجنازير وللا ايه؟
ثم ايه لزوم السودان وغزة وكل اللي عدى من جنبنا اتشتم واتف عليه؟ الواحد ح يمشي يعتذر عنكوا لمين وللا لمين؟ السودان وربنا بلاها وطلعت اوسا اللي المفروض كان باضت لها في القفص هي السبب، مش ان احنا والجزائريين رحنا للناس اللي استضافونا عملنا لهم مشاكل عشان مجانين، وقناة الجزئرة اتشتمت واتقال انها عتمت على الخبر، انا شفت الخبر ولقيتها جايبة كل الصور وجايبة الخبر كامل بتقرير من جانبين، حتى في الموجز، وطبعا قطر اتشتمت، وغزة اتشتمت... انا مش عارفة هم غايبين عن ايران وحزب الله العميل فين؟

بالنسبة للاعلاميين، والفنانين، وراخرين المدونين دول اللي طلعوا في البخت، والصحفيين: ادعي عليكوا بايه اكتر من اللي انتوا فيه وانتوا حالكوا يقرف الكلب الاجرب على راي خالتي فرنسا. يا تافهين يا فاضيين، مش عشان الكورة في حد ذاتها تافهة (ولو انها تافهة وشرير ومؤامرة سلطوية نخبوية على الشعوب الفقيرة)، بس عشان انتوا مش مهتمين بالكورة فعلا، طب اللي محروقين بجد الكورة دي كل حياتهم، انتوا مدفوسين ليه؟

لايموها بقى عشان بوخت كيك وما تقعدوش كل ما تشوفوا خلقة الناس تعيطوا لهم انتوا بتحبسوا دمهم كده بزيادة، ايه العياط ده كله؟ ومنى الشاذلي تطلع تقول بيحصل فينا كده ليه؟ هو سبق والاخوة الفنانين والمطربين واعضاء الحزب الوطني ولفيف من المسئولين راحوا في اي مؤتمر او مهرجان جزائري وانضربوا؟ ايه اللي وداهم ماتش كورة؟ اللي يلعب الدح ما يقولش اح، هم ايش عرفهم، هم مثلا عارفين احنا كنا بنلعب وحش وللا حلو؟ عارفين الحكم كان كويس وللا وحش؟ طب عارفين خطة الفريقين كانت ايه؟ عارفين اي حاجة كانت بتحصل في ام الملعب؟ وبعدين يخرجوا ينضربوا ويجروا؟ ويرجعوا هنا يعيطوا ويأوأوا ويكسروا نفس الناس زيادة بالعبء النفسي اللي بيحطوه عليهم؟ وفاروق جويدة شاعر الحمامتو المذبوحتو ده اللي بيكتب قصايد اكتر من تدويناتي وتويتاتي مجمعة يكتب في الموضوع ده؟ وتدخلوا القومية العربية؟ وتستدعوا السفير؟ (ادي اخرة يبقى عندك رئيس مهووس كورة ولا فاهم حاجة في حياته غير فيها) انتوا عايزين تموتوا الناس بالسكتة القلبية؟
ما موقف مصر دلوقت شبه موقف الجزائر بعد الماتش الاولاني بالظبط بالظبط بالظبط، لا زادوا عليه ولا نقصوا، الفرق بس ان المصريين ما لقيوش شركات ومجمعات سكنية جزائرية يحاصروها راحوا السفارة. والمصريين اللي راجعين من السودان بيتكلموا عن جحيم السودان بيقولوا نفس الكلام اللي قاله العائدون من جحيم القاهرة، وصحفي في المصري اليوم حب يعمل مغامرة لبس علم الجزائر ايام الماتش الاولاني وانضرب لما بان له اصحاب.
بالنسبة للسياسيين والاعلاميين والمثقفين والمدونين المصريين والجزائريين، هم الاتنين هايفين وفضحية وما يشرفوش اي بني ادم الحقيقة، والبني ادم ده اللي هم العرب بدون ذكر اسماء، الاتنين ما يشرفوش العرب. وكل واحد فيهم شوية يقول احنا مش عرب وشوية يقول احنا العرب والتانيين يهود، ثم ايه احساس اليهود وانتوا الاتنين بتشتموا بعض بيهم؟
وايه احساس العرب وكل واحد فيكوا عمال يقول انا مش عربي، وبعدين يرجع يرفد التاني من العروبة؟
وايه دخل ياللي حاصرتوا غزة يا يهود وياللي ياما ساعدناكوا واكلناكوا وشربناكوا وقمصاني وشراباتي وفانلاتي، وانا عايزة اعرف حرب ستة وخمسين دي قامت ليه بقى بالظبط؟ ايام حرب غزة (اللي مؤخرا اتشتمت من الجزائريين والمصريين عشان شوية منهم بيشجعوا مصر وشوية منهم بيشجعوا الجزائر وانا مش فاهمة ولاد الهايفة كورة ايه اللي بيشجعوها في القصف ده) ابو الغيط في وصلة المعايرة اللي كان فارشها للفلسطينيين قال ان حرب ستة وخمسين دي كان سببها دعم مصر للفلسطينيين وقمصانها وشراباتها وفانلاتها، دلوقت بيقولوا قمصان وشرابات وفانلات ستة وخمسين راحت للجزائر.
ثم ايه الجنان ده؟ الجزائريين يقولوا احنا امازيغ ولما حد يقول لهم يا امازيغ يزعلوا، المصريين يقولوا منتخب الفراعنة ولما حد يقول لهم يا آل فرعون يزعلوا، ايه منتخب الساجدين الفرعوني اللي بيزعل من وصفه بآل فرعون ده؟ ولايموا موضوع الفراعنة ده بقى عشان بقيتوا مضحكة العالم، فراعنة ايه في موسم الجوافة ده؟ هو فيه فراعنة دلوقت انتوا هبل؟ وللا هو استفزاز للناس؟ تقعدوا تقولوا احنا الفراعنة (اللي فعليا وثقافيا وعلميا مالهمش وجود خلاص) وبعدين ترجعوا تقولوا الناس بتكرهنا ليه؟
والجزائر ارض الشهدا ارض الشهدا، الله ايه يا عم، مال الشهدا ومال الكورة، هو فيه لعيب كورة بيستشهد؟ دول بيعيشوا لما يدفنوا كل جمهورهم، النعمة حلوة، وشوفوا لكوا حاجة تانية تعايروا الناس بيها غير موضوع انكوا بتموتوا كتير ده. وايه مصر فوق الجميع؟ ده ايحاء مش حلو ده، شوفوا لكوا شعار تاني، اللي عنده كلوستروفوبيا ح يتهيأله ان مصر كابسة على صدره، واللي عنده بارنويا ح يتهياله ان مصر ح تقع على راسه، واللي مخه وسخ ح يتخيل مصر في مشاهد مخلة بالاداب. وايه حكاية: كفاية بقى كفاية... كفاية ايه؟ هو انتوا كل ما حد يشوفكوا تقولوا له كفاية؟ ما عرفتوش تقولوا لمبارك كفاية ماشيين تقولوا كفاية لاي حاجة؟
طب على الله تقولوا كفاية للاكل، وللا للفلوس، وللا للجنان والهوس والهبل والهطل والخلل والعته والغبا والوش، الا دايما تقولوا كفاية على حاجات مافيش منها اصلا، زي كفاية طبطبة وكفاية نقول احنا كبار وكفاية بنفوت. اذكر حادثة واحدة الحكومة وللا الاعلام المصري فوت اي حاجة لاي حد؟ هو انتوا حد بيعرف يكلمكوا بشرشحتكوا دي؟ ده الناس بتتقي الحكومة المصرية واعلامها بل والاعلام المعارض والمستقل والشعبي خوفا من شر لسانهم.

وبصرف النظر عن مبارك وابو تلفيقة، اللي انا شايفاه ان كل من بنسمع صوتهم باي وسيلة من المصريين والجزائريين بيشتموا بعض باللي فيهم اصلا. وزي ما انتوا بتتكلموا عن كرامة مصر هم كمان بيتكلموا عن كرامة الجزائر.
وطالع مصطفى عبده يقول احنا مش اخوات... لا وحياة خالتك، ده انتوا توأم
فولة وانقسمت نصين
وفولة مسوسة كمان
اووووووووووووووووووووووووووووووووووووووووع

--------
تحديث:
بالنوسبة بس للهايفين اللي فرحانين بعلاء مبارك عشان قال كفاية تحسيس كفاية طبطبة
هو من امتى احنا بنسمع صوته وللا نعرف عنه حاجة؟ علاء ده بتاع البزنس، والجزائر ضربته في مقتل لما كبدت نجيب ساويرس عشرة مليون وفرضت عليه ضرائيب 600 مليون بعد ما كانت بتعفيه
داست على ديله يعني ومدت ايدها على اكل عيشه، عشان كده قرر انه يبطل تحسيس ويقف وقفة والحكومة الجزائرية لو عاقلة تهدي مع ساويرس/علاء مبارك عشان هو مالوش في السياسة بس نابه ازرق وعض قلبي ولا تعض رغيفي
حتى بالامارة قال: ما احنا بنلعب كورة مع دول الخليج وكلنا اخوات وعرب
يعني العشرين واحد اللي اتعوروا واوا ما يشبهوش اللي ماتوا في العبارة عشان علاء يهز طوله ويتصل يعبر عن اسفه، ونازل شرشحة للجزائريين: هوهاوة، اديك على دماغك، انتوا ماسكين علينا زلة... الراجل مش بيكلمنا خالص، بيكلم صحاب المحل: هو انا عمري اتأخرت في دفع الايجار؟

55 comments:

Unknown said...

اللى غايظنى هايفرسنى كل شويه حد يطلع يقول كفايه اللى عملنهولهم
يانهار أسود !!!!!!!!

ياجدعان وقفنا معاهم فى ثورتهم وقفوا معانا فى 73 ولولا شيك بومدين اللى فتحه وسابه للسوفيت على بياض كانت الحرب أتأجلت كام سنه

يعنى خالصين

أشرف ذكى امبارح عماله يقول الأم غضبانه الأم غضبانه
كان ناقص يقولنا القطه أكلت عيالها ياولاد

اللى ضرب الأتوبيسات هنا فى القاهره لو هانقول عليه الشعب المصرى يباه اللى ضربونا فى أم درمان الشعب الجزائرى
أيكش تفشخوا بعض حتى - بس كلمة الشعب دى قدسيتها كبيره أوى ياجماعه وماتخشش فى أى موضوع وسخ بالمنظر ده

ليه هنا محدش طلع وقال والله ياجماعه دى فعلة عيال صغيرين ومعلش أو حتى قول تقرير المباحث
المشكله أن محدش نطق وفتح خشم أهله من المسئولين
بينشروا تقرير المباحث هنا جوه البلد للناس
مش مهم احنا نعرف دى بأت حاجه دوليه - طلعوا مسئول رسمى وقولوا أى زفت - أعتذروا - انفوا أى نيله
بتقولونا احنا ليه ؟
قولوا للجزائريين والفيفا

وبعدين معلش بأه - قولوا نظرية مؤامره أو أى حد فى نفسه أى حاجه يقولها
المسئولين هنا عارفين أن الجزائر هاتبعت أسفل وأزبل ناس
باعتين أولاد بابى ومامى والفنانين ليه ؟
شباب حى شبرا بس لو سفرتوهم ياكلوا العيال الرمم دى
ليه مطلعين دول ؟
أمبارح واحده أتصلت بشوبير مقولش ياجدعان
يالهوووووووووى على حرقة الدم
ياى
دول موتونا
ياى
كانوا ماسكين حاجات وحشه فى أيديهم

ياخى أ.ا

بعتينهم علشان يضربوا وأنتم عارفين أنهم هايضربوا - علشان بعد كده تطلعوا تعيطوا للفيفا وضربونا ياسعادة البيه
عورونا ياسعادة البيه حتى شوف

ألا صحيح هى أمهم ولا أختهم الكبرى ؟

Anonymous said...

48 ساعه كان مبدع امبارح

قالوا احلى كلام
قالوا ان
الرئيس بوتفليقه هو المدبر للعاركه

والسودان غطت ع الموضوع .... وبعدين رجعوا شكروها

الجزائر بعتت قوات عسكريه .... وبعدين طلعوا مسجلين خطر

وهناء السمري كانت مبدعه .... شرشحت اخر شرشحه

-----------------------------------

المشكله ان الناس موش عارفه ان الجزائريين شككوا في مصداقيه ان محدش مات ولا اتقتل ولا اعتدي على شرفه لانهم موش بيثقوا في الحكومه الجزائريه وتصريحاتها

وكمان الحكومه بعتت المشجعين العاديين علشان بدل ما يتظاهروا ضد الفقر .... يتظاهروا ضد مصر

تحياتي

Anonymous said...

على فكره

الناس دي ذكيه اوي

هيتم استغلال الموضوع علشان التوريث

وهتشوفوا :)

تحياتي

muslima said...

السلام عليكم ورحمة الله

الفيديو اللى جايباه البى بى سى ده مش مبين اى حاجة

لها دليل

لاب جزائرى مضروب على راسه

والتانى ماسك شوية طوب وعمال يشاور ومتنرفز

شوفى

انا اميل اكتر لتصديق الرواية اللى بتقول انهم اللى كسروا الاتوبيس من جوه بطافيات الحريق

وعلى افتراض ان حد من المشجعين المتعصبيت ضرب الاتوبيس

لا يتساوى ابدا مع الارهاب البدنى والنفسى اللى احتشد له الالاف من الجزائرين تجاه المصريين

وبعدين انتى زعلانة ليه ان المثقفين ولا ولاد الذوات يروحوا الماتش

امال نعمل زيهم ونبعت المساجين وقطاع الطرق

وكانت تبقى مدبحة بقه

والاعلام بتاعهم اللى بيوصفنا باننا قاهرة العار واننا صهاينة

ادخلى وشوفى الصحف الجزائرية على النت

هو ده الاعلام الصح مهما اختلفنا ومهما اللى حصل

على قد منا مش موافقة على تناول الاعلام المصرى مع مباريات النتخب مع الجزائر والتعبئة والشحن اللى عملوه

لكن مفيش كلمة مش كويسة اتقالت على الجزائريين

من 3 شهور وفى شحن وقلة ادب

وعموما
احنا ساهمنا فى المهزلة دى بعدم تنظيم وعدم رؤية وبعد نظر لامور كتيرة

اقول ايه
احنا بقينا فعلا ملطشة
وحسبنا الله ونعم الوكيل

Amal said...

اعصـــــــابك يا نوارة ... اقلك احسن تنطنشي كل شي كأن مافي شي بيحصل لان الناس زي ماقلتي "مش صاحية" !!

يا شيخة وانتي تحرقي اعصابك على ايه ؟؟ على ماتش كرة !! خليهم الاثنين يضربوا راسهم في الحيط عشان يهدوا شوية ويرحمونا من المصخرة ذي

مش فاهمه said...

شوفتى برنامج منى الشاذلى امبارح مش قادره اقتنع بكلامك يا نوارة ناس سيس ايه اللى انتى بتقولى علينا بعتناهم و لو كنا بعتنا بلطجيه زى ماهم عملوا كنتى برضه حاتقولى ده ماتش نبعت بلطجيه ليه احنا اتعاملنا على انه ماتش و بعتنا فنانين و مذيعيين و ناس عاديه هم بقه عملوا ايه و بعدين تقولى نتفهم موقفهم و ان موقفنا زى موقفهم بعد المباراة هم ادعوا اننا بعتنا جزائريين فى نعوش و كسروا ممتلكات مصر فى الجزائر و طلعوا طيارات عسكريه شحنوا فيها شباب ولا ست واحده راحت ولا طفل و احنا معانا ستات و اطفال و اشتروا سكاكين و مطاوى فيه ايه كل ده يبقى اسمه احنا و هم زى بعض انتى شغاله جلد فى الذات بطريقه زياده قوى يا نوارة
و بعدين قناة الجزيره اللى لو حد كح بتجيب اصله و فصله و حسين عبد الغنى الله يحرقه ولا هو هنا ولا ذكرت حاجه عن الموضوع انا شخصيا كنت منتظرة منك مثلا تسألى زمايلك هناك ساكتين ليه عن اللى حصل ما صورتوش ليه مش جايز تكون كل دى اوهام و هلاوس عندنا احنا صحيح زى ما منى الشاذلى قالت قالوا لها بعتنا اتنين و بعد الماتش واحد راح ينام فى بيته وو التانى سافر مستنينك تجيبى لنا الحقيقه حصل ولا ماحصلش و ليه الصمت ده

بصى يانواره انا عارفه جايز يطولنى منك كلمتين كده ولا كده و لو حصل يبقى كتر خير الدنيا و كل واحد يروح لحاله بس انا صعبان عليا واحده زيك ممكن تهد الدنيا على الفايس بوك و التويتر و تعمل حملات فقط لأثبات ما حدث معانا احنا لحد دلوقتى السودانيين و الجزائريين بيقولوا اننا بنتبلى عليهم هو مش اسمه ارهاب لما تكونى محاصرة بالاف المشجعين فى اتوبيس و تترفعى بطوب و مطاوى و سكاكين
مش عيب زى ما بتقفى مع الأخوة الأقباط لما مسلمين فى قريه يرهبوهم تقفى مع مصريين اتهانوا و اتذلوا و اتروعوا فى السودان اعرف ان ليكى اصدقاء فى كل مكان فى العالم ليه ما نفضحش اللى حصل مش اكتر من كده و انتى قادره على ده

انا باعارض كتير و مش عاجبنى حاجات كتير و فعلا انا ماكنتش متوقعه اللى حصل ده و علشان ايه فيه خلل بدل ما نحاول نثبت للناس اللى حصل لأخواننا المصريين - اعتبريهم اخواننا المصريين - بنشتم فى بعض
عليكى دور فى اثبات اللى حصل ده لو تقومى بيه يبقى خير و بركه لو لسه مقتنعه برأيك برضه فى ان الكفتين متساويتين اسفه اقولك انك غلطانه و اخيرا الخلاف فى الراى لا يفسد للود قضيه و اختلافنا يثرى الموضوع و يساعدنا على وضع افضل ارجو ان يتسع صدرك لكلامى و تراجعى موقفك

Os Ansary said...

نوارة الله يحميك ويحفظك

لان على الاقل بنلاقي مصري واحد زيك

واعي وفاهم

خواطر شابة said...

في كل مرة يزداد احترامي لقلمك واعتزازي اني من القراء الدائمين لمدونتك
تحية تقدير واحترام نابعة من القلب

Unknown said...

بصرف النظر عن عدم احترامك للناس و لرأى الناس وانك شايفة انك انتى والكام واحد اللى بيطبلوا هما اللى صح وكل البلد والناس اللى عاشت الموضوع واللى اتعاملت مع الهمج دول بجد مش مبادرات..كل دول انتى شايفاهم غلط واللى صح هماانتى وأحمد خيال الظل -بكل بذاءاته- اللى رشحك السنة اللى فاتت للقب أكتر شخصية فشيخة وبضينة بين المدونات..وبهيج اللى كان مستلمك شتيمة وتهزىء فيكى انتى والعائلة الكريمة واحد واحد قبل أن ينقلب فجأة
وسبحان من له الدوام
الى أحد الأنصار -على رأى حبايبك ولاد الخضرا- بصرف النظر عن ده كله وعن رأيك فى الصحفيين-اللى معتبرة نفسك منهم- والفنانين والشعراء-اللى الوالد منهم- انهم ناس سيس لأنهم كانوا ناس محترمة رايحين يشجعوا عزل بدون سنج ومطاوى

نفسى أعرف رأيك فى البنات المصرية اللى كانوا هناك وانضربوا واتهانوا واتقلع لهم البنطلونات وقلعوا تيشيرتاتهم ومشيوا عريانات عشان ماينضربوش

نفسى أعرف رأيك بأى وجه من الوجوه التى ترتدينها سواء وجه المصرية المناضلة أو الحقوقية الناشطة أو بنت الناس اللى بيتقطع قلبها للغلابة والمستضعفين أو وجه البنت اللى كان ممكن تكون هناك معهن

نفسى أعرف رأى البنت المصرية الجدعة بنت الراجل المصرى اللى قال فى يوم :صباح الورد اللى فتح فى جناين مصر

واللى قال :على اسم مصر تقدر تقول ماشاء..أنا مصر عندى أحب وأجمل الأشياء

نفسى أعرف رأيك بدون تنظير وفلسفة و أسلوب خالف تعرف

elmonadel said...

الفريق المصرى كان بيلعب بدون جمهور و اداء الفريق فى الشوط الثانى كان واضح جدا انهم بيضيعوا وقت علشان يخلص الماتش لصالح الجزائر لأنهم عارفين ان الماتش لو انتهى بفوز مصر الخوجات اللى فى المدرجات مش هيقدروا يحموهم - كان لازم يسافر جمهور الاهلى والزمالك الاسماعيلى و المصرى ولو كان فيه طريق برى مفتوح كنا رحنا بالميكروباصات و الاتوبيسات الترامكوا من كل شارع وحارة فى مصر.
وخلى الطيارات علشان مشجعى اوبرا عايدة.

Hoda said...

لا طبعاً يا نواره اللى حصل فى القاهره غير اللى حصل فى السودان بالمره ... وانتى ايه اللى مخليكى متأكده ان تقرير الاتوبيس واللى اتعورو من الجزائرين اترمخ عليه ... احنا لا جرينا وراهم بالسنج ولا ههدناهم قبل لاالماتش بالقتل وامناهم لغاية نهاية الماتش .. يا شيخه دا كانوا واقفين على كوبرى سته اكتوبر بأعلامهم وبيشتمونا ولا حد رفع صباعه عليهم .. وفى شارع الهرم عند فندق اوروبا اللى هما نازلين فيه قعدوا يشتموا فى المصريين وهما فى بلدنا وشوفيهم هناك فى السودان الفيديوهات اللى قبل الماتش وهما بيحرقوا علم مصر كل دا واحنا زيهم بالظبط .. عمرها حصلت عندنا من اى شعب او اى ماتش كوره ما حنا لما كسبنا تونس فى بلدهم ما حصلشى كده .. ادخلى على اى موقع سيبرى هما فيه واتفرجى مدى الحقد والكراهية والحقد علينا دا زى ما يكون قتلنا ابوهم دا شعب غبى وزباله .. وعمرنا ما نكون متساويين بيهم ابداً

lastcrazyboys said...

!!..ايييه ده

انتي تركيزك رجعلك أهو..وللمرة الالف..تثبتي أنك العاقلة الوحيــدة في أم البلــد دي

انا مابقولش كده مديح ولا حاجــة لا سمح الله
وانما عشـان أحـذرك من القــادم لأنه لا بــوادر "تلوح في الأفـق"..للعــودة الى العقــل

فربنــا يتــولاكي بقى الفترة اللي جاية دي برحمتــه

لأن بجـد زي ما بكلمك..احنـا معندناش اي فرصة جوانا لتفويت الموضوع
وفعــلا تقدري تقولي ان الجنان ده مرحلة "سـامية"للي بيحصل..لأن المجنون ده خلاااص..مرفوع عنه القلم

انما اللي احنا فيه ده اسمه "عتــه" أو "هبل" اي حاجة بعيد عن الجنان

المصيبة الكبرى بقى الحالة الي انا فها دلوقتي ..لاني عارف "انها اشتغالة كبرى " وواثق انها كده
بس عندي استعداد تااام للانسياق لها
وســونة بقت اجدع ناس بجد بقى
وهطلع زي محمد فؤاد ونشوى مصطفى ..وخالد الغندور أشن وانف ..واقول انا بفتخر ان انا جيت في هذا لعصر

او يمكن عشان حاسس ان احنا ماحليتناش الا شوية كرامة
وعايزين نحس انها ماراحتش لسة
http://www.youtube.com/watch?v=wNCxRFjkMmo

==

mido said...

لا بس انت نسيتى حاجة مهمة هم زودوها علينا

انهم كسروا شركات

لكن احنا لأ

:P

Rateb said...

يا نواره اللى مالوش كبير بيشترى له كبير ومصر والجزاير مالهمش كبير

يساري فلسطيني said...

رائعةكالعادة... ان يحتفظ الانسان بعقله وسط هذا الجنون و وباء انفلونزا الهبل ... انا استغرب عدم قيام الطرفين بسحب الصفراء و اعلان الخرب ... لكي دائما التحية.

lastcrazyboys said...

وبعديييين أخييييرا صرنا متوحدين في حاجة


صرنــا بلد واحدة

http://www.youtube.com/watch?v=7IS5fFRXC0Y&feature=related

ماجد said...

لاء احنا اتهنا واتبهدلنا بس اللى فرق المرة دى ان ولاد الاكرمين واصحاب الاكرمين كانوا موجودين واتبهدلوا يظهر واتهانوا علشان ربنا كبير وعلشان يعرفوا طالما احنا ملناش كرامة فى بلدنا يبقى عمر ما حد فيهم حيبقالوا كرامة احسن يمكن يفوقوا ويعرفوا رغم ان كل اللى بيحصل دة من اولة لاخرة جهل وتخلف وحسبى اللة ونعم الوكيل

شلاطة said...

ولو اني مش بعلق عندك
الا اني معجب جدا بارائك
بس رايك النهارده
غاظني جدا
بصي
متقارنيش اتوبيس وزلطة بارهاب بدني ونفسي
ولو الناس دي رجاله على حق
كانوا عملوها راجل لراجل
دول ولا اعلام محترم نفسه
ولا رؤساء محترمه نفسها
ولا اي نيلة
وبعدين الرؤساء ميدخلوش فعلا في الكورة
بس يتدخلوا لما شعبهم يتهان
بصرف النظر غن مدى وجهته او سبب وجود شعبه في البلد دي
منقعدش نطلب من الحكومة انها تتدخل انقاذا لكرامتنا
لما نتبهدل في اي دولة عربيه ولما تتدخل نقول بس دي كورة انما التانيين بيعملوا حاجه تانيه
وبعدين ايوا كرامتنا وكرامتنا وكرامتناوكرامة المصريين فوق كل حاجه
النقطة دي بالذات مفيهاش كلام ولا شعارات
وبعدين بذمتك محستيش بغصة حتى على نفسك وانتي بتسمعي الأخبار دي امبارح
بصرف النظر عن نوعية الجمهور اللي راح
فافي ولا مش فافي
عموما
الاختلاف في الراي لا يفسد للبتنجان تقلية

المهدى said...

تعيش نوارة نجم
محمد المهدى

Anonymous said...

نوارة انا بتابع مدونتك من أكثر من سنه
ودي أول مرة أعمل حساب علشان أقدر أعلق عندك
لأني مش قادر أستحمل أسكت

انا مصدوم جداً من حالة الهستريا والجنون الموجودة في الشعب المصري

وصدمتي الأكبر في ناس كنت بحب أقرأ مدوناتهم وتعليقاتهم
ومتخيل أنهم مناطلين النت إللي بيمثلوا الإعلام البديل المحايد
لكن أكتشف أنهم مجرد أطفال ومراهقين تافهين عندهم حالة شوفينية عالية
الإعلام الحكومي وإعلام رجال الأعمال بيتبول في دماغهم

أنا مش لاقي أي مدون واحد مصري عاقل دلوقتي غيرك أنتي

نفسي واحد من العالم المحروقة قوي على الكرامة المصرية
يقولولي بتبقى فين حالة الاستنفار دي لما بيتقل واحد مصري
علي الحدود على أيد اسرائيل

يا نوارة من كام شهر كان بيزور مصر بن أليعازر
وده واحد صادر ضده أحكام كتيرة في مصر بتهمة قتل وتعذيب الأسرى المصريين
واحد كان بيتلذذ بفقع عين الأسرى المصريين

وبدل ما يتم القبض عليه وتنفيذ الأحكام الصادرة ضده
يستقبل إستقبال رسمي ويقابله رئيس الدولة ويقولوا عليه ده صديق لمصر
ما ثارتش وهاجت الناس وقتها ليه
إيه إنعدام العقل الموجودة في المصريين دي

ثايرين وهايجين علشان أتحدفوا بالطوب بعد ماتش كورة
ناس نازلة شتيمة في الجزائر وناس عايز تقطع العلاقات وناس عايزة تعلن الحرب
إيه قلة الأدب وقلة الكرامة إللي عندهم دي

طب إذا كانت دي معركة و حرب فعلاً بين جماهير البلدين
بحسابات الأرباح والخسائر وفقاً للإحصاءات المعلنة من الجهات الرسمية في مصر
المصريين هما اللي كسبوا المعركة
عدد المصابين الجزائريين في مصر أكثر وأصاباتهم أسؤ من عدد المصابين المصريين
دا إحنا هنا غير الضرب والشتيمة إللي شافوها الجزائريين منا
الشرطة كانت بتتعمد إهانة بعض الجزائرات وتفتشهم تفتيش ذاتي قبل دخول الاستاد


أنا صدمتي في الشعب الجاهل ده من وقت الحرب على غزة
وقتها أنتي كنت بتبرري تصرفاته
بأن أكيد فيه حاجة في الهواء أو في المية مخليه الناس مجنونة

أنا كنت بدور عن فترة تاريخية
كان الشعب المصري فيه نفس صفات السلبية والجهل والتعصب بالصورة الغريبة دي
مالاقتش غير فترة فرعون موسي

نفس صفات فرعون موسي هي نفس صفات فرعون دلوقتي
ونفس صفات الشعب المصري وقتها هي نفس صفات الشعب المصري دلوقتي
شوفي وصف القرآن او العهد القديم عن فرعون موسى وقومه
فاسقين ومجرمين وظالمين ومسرفين وعالين (نفس الشوفينية)
ورغم الحقائق إللي كانت واضحة زي الشمس
والتسع آيات اللي هدت حيل المصريين
إلا إن الشعب الجاهل كان منقاد وراء فرعون وآلته الإعلامية المستخفة بعقله
وزي ما فرعون كان بيحزب الناس ضد طائفة معينة
نفس القصة بتتكرر مرة ضد الفلسطنيين ومرة ضد الأقباط
ودلوقتي ضد الجزائريين والسودانيين

لو ظني ده صحيح يبقى الشعب والأجيال الحالية دي نهايتها منيله بستين نيله
أسؤ بمراحل من سؤ المعيشة اللي عايشينها

نصيحة ليكي يا نوارة ما تتوقفيش عن نصح وتوعية الناس
وخليكي دائماً منبر للإعلام البديل

ورغم إن التجربة بتوضح إن النتيجة هتكون محدودة جداً
لكن إفتكري الآية
(وَإِذَ قَالَتْ أُمَّةٌ مِّنْهُمْ لِمَ تَعِظُونَ قَوْمًا اللّهُ مُهْلِكُهُمْ أَوْ مُعَذِّبُهُمْ
عَذَابًا شَدِيدًا قَالُواْ مَعْذِرَةً إِلَى رَبِّكُمْ وَلَعَلَّهُمْ يَتَّقُونَ)

masrawy ala tool said...

تعادلت مصر والجزاير فى حصيلة الفساد والشفافية حسب تقرير دولى أصدرته، أمس، منظمة الشفافية الدولية.واحتلت مصر والجزائر المركز الـ١١١ مكرر، فى التقرير الذى وضع قطر فى المركز الـ٢٢ باعتبارها أكثر الدول العربية شفافية
قرر الفنان عمرو دياب تأجيل حفل جامعة المستقبل، الذى كان من المقرر إقامته مساء اليوم الجمعة، وذلك مراعاة لمشاعر الشعب المصرى وما حدث للمصريين فى السودان يوم الأربعاء الماضى عقب انتهاء مباراة كرة القدم بين المنتخب الوطنى المصرى ونظيره الجزائرى، فى استاد أم درمان بالخرطوم.

واختار "الهضبة" تأجيل الحفل إلى يوم 4 من شهر ديسمبر المقبل، ويرى دياب أنه لا يجب على أى مصرى أن يفرح أو يحتفل قبل رد كرامة الشعب المصرى، والرد على الإهانة الكبيرة التى وجهها الجزائريون إلى المصريين، مطالبا بألا ندعها "تمر مرور الكرام"، ولابد من وقفة قوية وحازمة فى مواجهة كل ما حدث من الشعب الجزائرى
احتجاجا على أعمال البلطجة والعنف ضد المشجعين المصريين..
"الجيزة"تدرس تغييراسم شارع الجزائر بـ"حسن شحاتة
منتهى منتهى منتهى التخلف".،

تــسنيـم said...

نوارة.. احنا عايزين عيالنا من الجزاير يا نوارة

الناس هناك طالع عين أبوها و أوراسكوم بتقول اللي عايز ينزل مصر يقدم استقالته كما لو كان اللي هيقدم استقالته هيعرف ينزل مصر

سكان مصر الأصليين هما اللي في الجزاير و السعودية و الكويت و الإمارات بيشتغلوا عبيد عشان لقمة العيش يا نوارة.. دول اللي بيتسحلوا هنا في الشوارع و بيتنفخوا في المعتقلات و بيطلع دين أبوهم في أقسام الشرطة.. عشان كده مالهومش قيمة و محدش جاب سيرتهم خالص و لا اهتم بيهم

لكن اللي في السودان دول النخبة.. عيال الأكابر

اللي معاهم 3000 جنيه ممكن يرموهم ع الأرض في رحلة اليوم الواحد للسودان.. هما الممثلين و الرقاصين و عيال الأكابر اللي أصلا محدش يعرف يدوسلهم على طرف هنـا في مصر


عشان كده اللي في الجزاير هيروحوا فطيس.. عشانهم هنا بيروحوا فطيس

لكن اللي في السودان .. بيحطوا صابعهم هنا في عين التخين ويقولوا عارف إنت بتكلم مين؟؟


عايزين عيالنا يا بلد.. زي ما بعتوا جابوا عيالهم من السودان يبعتوا يجيبوا عيالنا الغلابة

رئبال عبدالله said...

سيناريو الازمات المعاصرة

مجهولي الحال اغلب الظن انهم من جيش المدونين الاسرائيلي يدخلون الى مواقع عربية مختلفة ويلقون بسمومهم فيها.

يسارع مرتزقة الاعلام الرسمي العربي لتلقف المادة الاكثر رواجاً وانسجاماً مع السياسة الاعلامية الرسمية ويبدأون ببثها على نطاق واسع مع اضافات تليق بقدرتهم على الاختراع والتفكير الابداعي في مجال صناعة الخبر من لا شيء

ينضم الى المعركة سواد الناس، ويساهم كل منهم بما يستطيع من قول وفعل وحركة وسكون

تحت وطأة "الحرب" تنضم فئات اكثر تنوراً وصدقاً للمعركة، نظراً لضغط النظير عند البعض وتضرر البعض الآخر من القصف العشوائي

ينهمك الجميع فيما يحدث، وينسون سببه التافه ومايمكن ان يتمخض عن نتيجته من كوارث ومصائب اولها الخزي في الدنيا وآخرها جهنم في الآخرة

تبدأ المواجهة الشاملة بكل الادوات او تنتهي ... بحسب فائدة من بيده القرار

اما ان يقول: الى الحرب ياثيران.
او الى الاقفاص يادجاج

وفي الحالتين نثبت يوما بعد يوم
اننا الشيء الارخص من ارخص شيء باعه سارق في ايام وفرة الاشياء الرخيصة

عندما يجتاح الجنون المدينة، على العقلاء الصيام عن الشرب من بئر الجنون، الشرب قد يروى عطشك الآن ...ولكنك ستركب في قطار يعج بالمجانين ويتجه الى جهنم على خط مستقيم

وحتى يعود العقل الى اهله
لا عزاء للاشياء

سامي said...

وبدا المصلحون على الطرفين كالمساكين، كحالهم في واقعهم الفعلي مع الأنظمة، إنهم بلا إمكانيات تسمح لهم ولو بالوقوف في وجه العاصفة فضلا عن محاولة تهدئتها أو إيقافها، وعلى ما حفل به الانترنت من مبادرات مصالحة، وكذا ما قامت به بعض برامج إعلامية على طريق التهدئة إلا أن الكارثة المنتظرة قد وقعت، بل أكاد أقول وقعت على أقل الوجوه سوءا.

ولكن الأمور ما زالت تتطور، وآخر ما أسفر عنه المشهد مقاطعة فنية بين مصر والجزائر بدأها ممدوح الليثي، وتبدو آخذة في التصاعد .. وما زال يتوقع تطورات أخرى، وأحمد الله تعالى أن في مصر رئيسا لا يحب أكثر من الاستقرار والهدوء وقد قال ذات مرة بصراحة “أنا لا عايز ادخل تاريخ ولا جغرافيا”.

وإذا كان لكل طرف ما يستفيده من هذه اللحظة الكاشفة، فأحق الناس بهذا طائفة المصلحين، وأولهم الإسلاميين.

إن نفس الجمهور المتعصب في البلدين هو ذلك الجمهور الذي خرج بآلافه وملايينه يتظاهر للقدس والأقصى، وأفغانستان والعراق، وهو الجمهور الذي يتنازل عن أمواله ويسكب دموعه وتجتاحه الحرقة والألم لقضايا المسلمين شرقا وغربا.

بل وهو نفس الجمهور الذي يقف وراء الإسلاميين في أي نشاط وفي أي انتخابات، وتاريخ هذا معروف في مصر والجزائر معا، ويعرفه الإسلاميون جيدا.

إن أولى التحليلات بالإهمال والإلقاء في سلة القمامة هو التحليل الذي يحمل الجمهور مسؤولية ما حدث، أو قل يحمل قوات المشاة (الرَّجَّالة) تطور الحرب دون أن ينتبه لدور الجنرالات والعمداء وقادة الألوية. ذلك أن الصعود لكأس العالم لم يمثل يوما مطلبا جماهيريا حقيقيا ولا خرجت لأجله مظاهرات ولا سقطت لأجله أنظمة ولا ذكره مرشح في برنامجه الانتخابي. إنما الأزمة كانت في تضخيم هذا الصعود ليمثل “شرفا وطنيا” نستحق لأن نخوض من أجله “حربا شاملة” نستلهم فيها “روح أكتوبر / روح الشهداء” وننشيء فيها “الجسور الجوية” وننادي “إلى الجهاد في السودان”.

من كان يظن أن الداخلين إلى المعركة الكبرى سيتحلون بالروح الرياضية أو حتى يمكنهم أن يفعلوا لو أرادوا؟

إن الدرس الأكبر الذي يخرج به الإسلاميون مما حدث أن يراجعوا مناهجهم الفاشلة في الإصلاح (ولا أدري متى يمكن أن يقتنع الإسلاميون أنهم فاشلون، وأن الأنظمة استطاعت شلهم تماما وتجريدهم بالكامل من وسائل الفعل المؤثر).

سامي said...

هل حقا يمكن إصلاح هذه المجتمعات بالأسلوب الهادئ المتدرج الذي يعتمد التربية والتوعية في ظل الدولة المركزية المسيطرة والتي تملك كل وسائل التأثير؟؟؟

إن الشحن العنيف الذي استطاع أن يصنع حريا حقيقية سالت فيها الدماء ينبغي أن يتوقف أمامه الإسلاميون ليبصروا شيئا واحدا واضحا وكاشفا وجديرا بأن يعيدوا النظر.

إن الحركات الإسلامية عبر ستين سنة لم تستطع يوما واحدا أن تشحن عواطف الشعوب نحو قضية دينية قومية تتصل بعقيدة الناس وبحياتهم هي قضية الأقصى وفلسطين مثلما استطاعت مجموعات إعلامية في خلال أسابيع أن تفعل لأجل قضية تافهة لا هي دينية ولا وطنية ولا مؤثرة على حياة الناس.

واللحظات التي ارتفع فيها مستوى تعاطف الشعوب مع قضايا المسلمين كلها .. كلها بلا استثناء .. صنعتها أيضا وسائل الإعلام، إما المحلية قبل أن تنكشف عمالة الأنظمة بوضوح حين كان لديهم مساحة حركة وتصعيد، أو الفضائية والانترنت بعد الانفتاح الإعلامي الحديث.

ولكن يبقى أيضا دور الدولة المركزية شديد الهيمنة والتأثير، فلا كل الإعلام استطاع أن يغير الوضع في مصر أثناء حرب غزة ولا أن يفتح معبر رفح، بل ولا استطاعت مظاهرة واحدة الخروج في الضفة الغربية احتجاجا على ما يحدث في غزة.

واستطاعت الدولة وبإعلامها الجبار شحن الناس في الاتجاه المعاكس، حماس هي التي أخطأت، حذرناهم، لا نستطيع فتح المعبر، إسرائيل تريد تهجير الغزاويين إلى سيناء، أو تريد جر مصر إلى الحرب.

ومهما كانت القضية حيوية ومؤثرة فحين يسكت الإعلام لا يشعر الناس بشيء، فهدم الأقصى الذي كان قبل شهرين لم يحرك أحدا ولم يسمع به إلا المهتمون فقط، وغرق العبارة عام 2006 وموت أكثر من ألف لم يصمد أمام طوفان “فرحة الفوز بكأس الأمم الإفريقية”، كما أن انهيار المنازل على رؤوس الناس وموتهم أمام أفران الخبز وغرقهم في عرض البحر بحثا عن الرزق وهتك أعراضهم في أقسام الشرطة … وغيره وغيره ومصائبنا ما أكثرها، كل هذا لايجد أحدا يهتم به أو يتعصب له رغم أنه مرتبط بصميم حياة الناس وواقعهم.

فليراجع الإسلاميون أنفسهم، ولقد انضاف لهم عبء جديد لم يكن يخطر لهم على بال بعد مباراة الكرة بين مصر والجزائر، ذلك هو نزع العداوة والبغضاء بين الناس الذين وحدهم الإسلام واللغة والتاريخ والجهاد ثم استطاعت أن تفرقهم الكرة.

سامي said...

وليراجعوا أسلوبهم في الإصلاح .. إن خبرة السنين والأعوام من الصحوة الإسلامية كافية لأن يبصر الجميع إلى أين وصلوا بعد محاولات التصالح مع الأنظمة العميلة التي زرعها ويرعاها الاستعمار (وهذا يتم علنا لا سرا) وكذلك محاولات التسلل إلى البرلمانات وعبر هوامش الحرية الضيقة المتاحة في الصحف ووسائل الإعلام.

في ستين سنة ما استطاعت الحركات الإسلامية شحن الناس لأجل قضية بهذا المستوى، مع فارق القيمة بين قضايا الأمة وقضية “دخول” –مجرد دخول- كأس العالم.

وإذا كنا نعيب على مرتزقة الإعلام بقول المتنبي:

وتكبر في عين الصغير صغارها … وتصغر في عين العظيم العظائم.

فبقول المتنبي أيضا نلوم الحركات الإسلامية:

ولم أر في عيوب الناس عيبا … كنقص القادرين على التمام

م محمد الهامى
مدونة المؤرخ

المهدى said...

نوارة..... بلال فضل أنضم أمبارح للقافلة ويطلب أعادة النظر فى العلاقات المصرية الجزائرية على كل المستويات وأن علاقتنا بدولة أسلامية مثل تركيا أفضل وأبرك من علاقتنا مع الجزاير
وكمان أشاد بالمكالمة المحترمة والمسئولة للسيد علاء مبارك !! ده من مكالمة هاتفية على قناة مودرن سبورت والنبى ياشيخة خدى منه موقف العيال دى كلها عوجة طبعا رباية المنوفى إبراهيم عيسى
دا أنت حتى سامحتيه على موقفه السافل من السيد حسن أثناء حرب غزة
محمد المهدى

مي ثابت said...

تسنيم
_ _ _ _ _

عندك ألف حق
سلامة و عودة المصريين من الجزائر الآن هو الأولى بالتركيز


رئبال عبد الله
_ _ _ _ _ _ _ _

بارك الله فيكِ

فعلاً هذا هو السيناريو

الذى للأسف يتكرر و فى كل مرة نقوم فيه بدور المفعول به

Unknown said...

بس بس بس بس بس بس بس


دلوقت حالا واحد قايل لي ان فيه رجل اعمال جزائري ومعاه شركاء فرنسيين بينافس ساويرس وشركاه واللي منهم علاء مبارك في المشروعات اللي في الجزائر

وفيه من اجنحة السلطة، ناس كتير مع المستثمر الجزائري لانه مقدم عروض احسن وسمسرة اكبر للسلطة

وبوتفليقة يا عيني اللي انا نزلت فيه شتيمة ده طلع شرابة خرج على حسب كلام الشخص اللي قال لي

والمناوشات والمنافسة دي من قبل الماتش

وكل واحد بقى سيب على التاني كلابه

والكلاب دول اللي هم احنا

منهم لله
منهم لله نكدوا عليا واضطروني اقاطع الماتش (ولو اني اتفرجت عليه خلسة) وخلوني ما اعرفش اشجع ولا انبسط بالهلولة اللي عملوها دي

طب انا ذنبي ايه انا؟ انا كنت عايزة اتفرج على الكورة وكنا عايزين نكسب ونطلع كاس العالم ونتفرج على ماتشات حلوة في ملاعب نضيفة

احنا مالنا احنا بخناقة الكبار؟ والفريدم هاوس دخلت راخرة في الموضوع وهبلت في النص..احنا مالنا احنا؟

وايه دخل العروبة ومصر في الماتش؟ يعني لو كنا لعبنا مع انجلترا وانضربنا

ولو غلبنا انجلترا طبعا كنا انضربنا

كان ده كله حصل؟
لو كنا لعبنا مع انجلترا كنا قلنا دي احتلتنا سبعين سنة؟ ايه دخل الاحتلال في الكورة؟

هم بيطاردونا حتى في الحاجة الوحيدة اللي بتبسطنا ليه؟

Unknown said...

أسرائيل الرابعه عالميا" من ناحية البحث العلمى وأمريكا ال 12 وألمانيا ال 15
لا ونشرينها فى الأهرام ومش مكسوفين

cover me and cry yamaaaaaa

مي ثابت said...

منهم لله حولوا البلد لسبوبة

نبيع إراداتنا للأمريكان علشان التوريث

و نبيع أمن ولادناو علاقتنا بالجزائر و نتلاعب بشعبين علشان بيزنس ابن الريس

!!!

المهدى said...

نفس كلام صراع المستثمرين ده ودور بعض الجنرالات لمح بيه عمرو الشوبكى أمبارح فى مودرن سبورت ( برنامج كورة أون لاين ) يعاد الأن
محمد المهدى

هبه said...

مش عارف أنتى حتقابلى ربنا بأى وش من الوشوش الكتيره اللى بتستعمليها على حسب الموقف ؟؟؟؟
عموما اٍسألى مرات أبوكى الجزائريه عن السبب اللى كان بيخليها تشتم المصريين أوسخ شتائم و لأقذر شتائم فى قهوة تانتنفيل و قهوة اللوتس فى وسط العاصمه الجزائريه و بحضور والدك ربنا يديله الصحه و طولة العمر و رغم هذا تزوجها فيما بعد !!!!!
اٍتقى الله يا نواره
اٍتقى الله

Unknown said...

ياريت نشوف هنا

http://www.tahyyes.org/2009/11/blog-post_8279.html?showComment=1258685374011#c1407602567173274518

ازاي واحدة سودانية بتعبر عن غيظها

وشوفوا ادبها قال وبتعتذر عن حدتها

هههههههههههه

والله العظيم السودانيين ما كان ليهم يدخلوا بين مصر والجزائر ابدا

هم مالهم بالشراشيح دول؟

Mohamed said...

يا نوارة راعى الرياضة و الرياضيين بعت فرافير الحزب الوثنى بدل ما يبعت بالطجية الحزب اللى بيقفلوا الانتخبات وكانوا هينيموا الجزائر من المغرب.
بس هنقول ايه
وكما قال الشاعر الرجالة دى مش لابسة بانطلوناتها ليه يا وديع

Anonymous said...

هههههههههههههه

حلو تعليق الست السودانيه

بس انا ليا عتاب ع الحكومه السودانيه

ايه اللي خلاكم تقبلوا المباراه تقام عندكم

ده احنا جران من زمان..... لسه هتعرفونا دلوقتي

بعدين السودان اكتر بلد منكن نمسك عليها ذله لو حصل اي حاجه .... دا انتم كنتم تبع المملكه المصريه واحنا اللي اديناكم الاستقلال " على اساس اننا كرمناكم يعني ... موش لاننا عايزين نخلص من المشاكل بتاعت الانجليز وتلاكيكهم ولا حاجه "

استدعوا السفير السوداني وشكروه على فكره

يخانقني في شارع .... ويحايلني في مكتب وزير الخارجيه

تحياتي

Ahmed Fawzi said...

http://www.youtube.com/watch?v=vr3x_RRJdd4&feature=fvw

الأغنية و الفيديو ده علشان سينتمانتليتك المهترئة فى الأيام الغامقة
:))))))))))))))

Unknown said...

مانا قلتلك بوتفليقه غلبان افتكرتيني بهزر
مش قلتلك الجيش هناك هو اللي مولع الدنيا

طب احنا عايزين عيالنا اللي هناك دول بقي

أبو عمر - الصارم الحاسم said...

طبعا عندك حق في 99% من كلامك


بس في حنة الاستثمارات انتي مش واخدة بالك من اللي بيحصل

كده ابعاد المؤامرة اتضحت

الحكاية انهم عايزين يستولوا على جيزي - اوراسكوم للاتصالات - الفرخة اللي بتبيض دهب

كده اتضحت بالكلام عن المنافسة من رجال اعملا جزائريين لساويرس

فرصة وجات لحد عندهم وعملية تطفيش

ان المصريين اللي شغالين هناك يطفشوا فيجيبوا مكانهم ناس من جنسيات تاينة - مفيش جزائريين هيقدروا يسدوا او مش بالعدد اللازم...ويدخلوا ساويرس في دوامة فيتخلى عن الشركة بأي سعر- مش اي سعر اوي بس في الظروف العادية لا يمكن يتخلى عن جيزي لانها كما قلت فرخة وبتبيض دهب وميزانيتها بالمليارات وساويرس بالفعل عمل مجهود خرافي في بنائها اكتر من موبينيل خمس ست مرات


ويمكن فيه استثمارات تانية حاطين عينهم عليها


علاء مبارك على العكس كان مستبيع اما خبط في ناحية الاستثمارات ودي نقطة تحسب له لا عليه - وطبعا وان كان من البداية هو ما شاركش ساويرس الا لانه ابن الريس لكن اتكلم في اللحظة دي انفعاله كان يبدو صادق مش مصالح


الجزائريين في العادي بيكرموا المصريين آه...لكن زي ما بيقولوا المعدن بيبان اما تتضاد المصالح...ومعدنهم بان


وده مش معناه اننا ملائكة وقلبنا ابيض يعني...بس هما الاكثر قذارة هذه المرة ..والاكثر بغيا

Rateb said...

https://www.blogger.com/comment.g?blogID=2720530513312889612&postID=7386989661772727301

انا عملت بوست عن الموضوع يمكن ماحدش يقراه خالص بس قلت اللى فى نفسى وخلصت ضميرى

مشروع مدونة said...

أرى أن نعامل الناس بما نحن أهله، وليس بما هم أهله
لانحسن إذا أحسنوا ونسئ إذا أساؤوا، ولكن نحسن إليهم ونمنعهم من الإساءة دون إساءة

ولمن الموضوع أكبر من ذلك، فقد اختلط الحابل بالنابل، السياسة والقهر، والاحباط، ويهاجم المنتخب والمصريون بسبب سلوكيات حاكمهم الدكتاتور الذى يكرهونه هم أيضا، ولكنها العروبة أعيت من يداويها ..

Kalimalhus said...

إنتى عارفة موقفى كويس و بالتالى مش محتاج أوضحه لكن أنا هختلف معاكى فى نقطة واحدة.. أنا مش موافق إن يتقال واحدة بواحدة و نبقى كده خالصين .. الكلام ده ما بيصفيش المواضيع لكنه بيبقى على الضغينة دفينة فى النفوس..

الصح إن كل من له حق ياخده و كل من أجرم يعاقب .. مين أجرم أكتر من التانى مش مهم لأن فى النهاية المجرمين الحقيقيين همه اللى فضلوا ينفخوا فى النار و يشعللوها لحد ما بقت أكبر من إن أى حد يطفيها..

أنا نفسى أعتر فى إبن الكلب اللى بدأ بأول إساءة و كل إبن كلب إستخدم أحد عبارات السفالة فى حق الشعب التانى لأول مرة .. دول فعلا اللى يستحقوا يرجمهم الحجيج السنة دى..

طبعا أنا حارق دمى زيك العالم المشخلعة اللى مبدورة فى القنوات الفضائية بيتشهنفوا و يتشحتفوا و ينهنهوا و يقولوا السوفاج ليزأنيمو كأننا شعب الملايكة اللى بيدلدق سماحة يا ولداه و حياة المسيحيين المصريين اللى بيطلع عليهم كل ساعة و التانية مسلمين مصريين برضه يحرقوا بيوتهم عشان إستجروا يصلوا فيها و اللى بيطلعوا يولعوا فيهم دول لا همه مشجعى كورة و لا بلطجية لكن ناس عاديين مؤمنين و على طهارة خارجين من صلاة الجمعة .. و يقولك الطبيعة الجبلية؟ .. إسفوخس على كل البيض الممشش اللى ظهر على السطح و كبس على مراوحك يا بلد

Unknown said...

هو بشكل عام فيه واحدة بعتت لي على البرايفت وما اعرفش اذا كانت عايزة تقول اسمها وللا لا ح اسيب الحكاية دي لها

قالت لي ان منافس ساويرس على شركة الاتصالات جنرال في الجيش الجزائري

طب احنا مالنا؟

احنا كنا عايزين نلعب ونشجع ونكسب

ذنبنا ايه ساويرس والجنرال يدخلوا لبعض بلطجة ويسلطوا على بعض كلابهم اللي اتضح انهم احنا؟

بالنسبة للمجانين اللي دخلوا هنا انا حطيت لهم فيديو مخصوص هدية لهم

ومش ح اتناقش مع مجانين طبعا

بالنسبة لحكاية المعدن اللي بيبان

اظن احنا اخر ناس نتكلم على موضوع المعادن ده؟ ده احنا اذا خاصم فجر

Rateb said...

يا جماعة اللى انضربوا دول اللى فوق احنا زعلانين ليه

سامي said...

علاء مبارك لسه متصل ع البيت بيتك
ولما حب يشير للمسئولين الجزائريين قال لفظة (جنرالات) فعلا
ودى مش صدفة

Ahmed Mohamed said...

في نقطه مهببه محدش بيتكلم فيها
ان الي حصل في مصر في الماتش الاولاني كان رد فعــــــــــل للي حصل في الماتش الاول بينا وبين الجزائر
لما لعبنا في الجزائر واتغلبنا 3_1 هناك
وضربونا هناك والمنتخب اتسمم وطلع عين اهله

http://www.masrawy.com/News/Egypt/
Sports/2009/october/16/zaher.aspx


ملكيش في الكوره مش تتكلمي فيها
مصر والجزائر ليس بينهم اي وجه مقارنه
فالاولي خمس مرات كاس افريقا والثانيه لا تذكر
بل ومكنتش حتي بتدخل التصفيات
ومغلوبه من طوب االارض

لا الوحشة بتبور ولا ام طرطور

Ahmed Mohamed said...

http://www.echoroukonline.com/
ara/national/44652.html

يساري فلسطيني said...

http://www.alquds.co.uk/index.asp?fname=today\20z50.htm&storytitle=ffمهزلة جزائرية مصريةfff&storytitleb=عبد الباري عطوان&storytitlec=

Unknown said...

احمد علام

قسما بالله العظيم ماشفت في حياتي احمر منك هههههههههههههه

انت ما بتعرفش تقرا؟ انا قايلة ان اللي حصل في القاهرة كانت انتقام لحادثة حصلت من عشرين سنة يا ابلة ويلوك ويلوك ويلوك

امشي يالا من هنا

Unknown said...

طب جرب ما تسيبنيش في حالي

عشان تبقى فرجة خلقه

Phobos said...

اعقل يا علام ، إنت مش عرف إنت بتتكلم مع مين :) أول مرة في حياتي اتفق معاكي يا نوارة .... فعلاً الإعلام مطلع المصريين دول ملايكة ....آل إيه الجزائريين معورين نفسهم ..... د هما كانو محروقين بس خلاص بأه، وحدة بوحدة ! فالحين احنا أوي نتشاطر عل سودان والجزائر. بس احنا برده غلابة .... كان نفسنا ندي حد على قفاه بدل محنة طول الوقت بناخد بس !!!

Unknown said...

أخي، تدري؟
لا وجود لفروق جوهرية أساسية بين تدوينتي وتدوينتك حول الموضوع..
انا متفق معك حول كل ما كتبته عن الموضوع. بدون استثناء!

(فقط لم أفهم بعض الكلمات لاعتماده اللهجة المصرية في التدوين).

أبو عمر - الصارم الحاسم said...

يبقى بصي لنفسك في المراية في موضوع اذا خاصم فجر ده

Adham said...

Agreeing with every word..

Adham

LMUUM said...

آه و الله يا نوارة ده كلامك صح 100% و الله العظيم اقنوات المصرية خنقتنا بالحكاية دي ، ما أعرفش الجزائرية لأني ما بفهمش عليهم كتيير ، بس خلاص يعني حصل و ضربتوا و إضربتوا عاوزين إييييييييييييييه!!!!!!!! ده فضحتونا وسط الإعلام العالمي و العربي كمان ، ده احنا مكسوفين من نفسنا لأننا عرب و كا العالم بيتفرج علينا بنتخانق عشان ماتش كورة ، ربنا يخزي يهودكوا يا شيييييييييييييييييييييييييييييييخ