Sunday 15 November 2009

مصر مبارك.. ربنا يخليهولنا

انا عايزة اعرف انا معادية مبارك وابنه ليه؟ بجد يعني؟ مبارك حي لا يموت، وربنا عايزه رئيس جمهورية، ربنا عايزه، يؤتي الملك من يشاء وينزع الملك ممن يشاء ويعز من يشاء ويذل من يشاء
ولحد دلوقت ربنا بيعز مبارك وبيذل اللي بيعاديه
انا مافيش بيني وبينه لا هو ولا جمال مبارك اي حاجة شخصية، ولا حاجة تمس حياتي، انا الحمد لله والشكر لله عايشة كويس ومرتاحة في حياتي بفضل ربنا يعني
ايه اللي طسني في عقلي وخلاني افتح مدونة وامسك في خناق الراجل وابنه من غير اي مناسبة؟ ليه عملت كده؟ 
عشان الناس الغلابة اللي عندهم انيميا وسرطان ونايمين في عشش ورجال الاعمال بيقلبوهم في الفلوس؟ طيب الناس دي انا شفتها دلوقت حالا في الشارع وهي بترقص ومبسوطة قوي، مش هاممها ان اللعيبة ح ياخدوا كل واحد اتنين مليون من فلوسهم اللي سرقها منهم رجال الاعمال وسابوهم جعانين، مش هاممهم انهم ساكنين في عشش واللعيبة كل واحد ح ياخد شقة، وجابر شاف في ميدان التحرير الناس رافعين يفط: نعم لمبارك في الانتخابات القادمة
طيب الناس اللي انا خليت امن الدولة يفتح لي ملف بسببهم ما طلبوش مني حاجة ومش متضايقين، كانوا فرحانين ان جمال مبارك معاهم في الماتش
طول ما انا ماشية في الشارع ما شفتش غير العيال اللي عندها فقر دم والنسوان اللي بيقعدوا يعيطوا لي عشان جوزها مشلول وهي عندها ضغط وقلب وسكر وابنها بيغسل كلى ومش معاها فلوس
واهم بيرقصوا اهم وبيقولوا مصر مصر، وما نزلوش بنص العدد ده لا عشان فلوسهم، ولا عيشهم، ولا امراضهم
وماحدش زعلان ان البلد دي متخلفة وما عندهاش اي مشروع قومي، وماحدش زعلان ان البحث العلمي عندنا ماشي بالمانفلة، وماحدش عندنا زعلان اننا اتصالحنا على اسرائيل واتخانقنا مع الجزائر، وماحدش زعلان ان مبارك قاعد بقاله تمانية وعشرين سنة بالكورة بس لان ده انجازه الوحيد، وماحدش مستغرب ان القائد الاعلى للقوات المسلحة هز طوله وراح زار لعيبة كورة، وماحدش زعلان من اي حاجة، الحمد لله احنا شعب سعيد
امال انا تاعسة نفسي ليه؟ اما انا بني ادمة غريبة فعلا، باعاند ربنا اللي عايزه رئيس كمان خمسين سنة (لان مصر ح تكسب الجزائر في السودان طبعا، انا شفت حتت متقطعة من الماتش وانا في الشغل ولقيت منتخب الجزائر فريق ضعيف جدا، امال كان لزومها ايه طولة اللسان دي كلها وهم مكسحين كده؟) وللا باعاند الشعب اللي مش مهتم ان مالوش اي انجاز حضاري ولا ثقافي ولا علمي ولا سياسي ولا اقتصادي ولا انه مش لاقي ياكل ولا يشرب ولا حتى لاقي لا مؤاخذة يشخ لانه ماعندوش صرف صحي وشايف ان الانجاز ده كفاية، وربنا اداهم اللي هم عايزينه وح يكسبوا في السودان، على الاقل واحد صفر
والجزائر حظها كويس، ح تخسر والحمد لله، قبل شحن الماتش ده كان فيه انتفاضة فقراء في الجزائر وكانوا بيضربوا الشرطة بالحجارة زي فلسطين ايام الانتفاضة، وان شاء الله لما يخسروا ح يرجعوا يعملوا انتفاضة تاني
خلاص بقى ربنا بيدي كل واحد على قد اللي هو عايزه وعلى قد عمله
وانا اسفة ياريس، والله العظيم تلاتة باقولها من اعماقي، حقك على راسي من فوق يا سيادة الرئيس حسني مبارك
انا قليلة الادب ولساني طويل وسفلت عليك من غير اي سبب، انا كويسة قوي وزي الفل، مش عارفة عملت كده ليه؟ وحقك على راسي يا جمال بيه، ما انت ماسك البلد بقالك اربع سنين اهو وانا ما اشتكيتش وعلى المستوى الشخصي ما عنديش اي مشاكل
واللي حصل لهم مشاكل بسببك مبسوطين مش متضايقين، ورافعين يفط بيبايعوك في ميدان التحرير سواء حضرتك او الوالد، مش عارفة ليه قلة الادب بتاعتي دي
طب والله ما باتريق، والله العظيم ما باتريق، انا اسفة فعلا، رجعت في كلامي، اتحشرت في اللي ماليش فيه ورجعت اهو في كلامي
ربنا يهني سعيد بسعيدة
بس لو تسمح لي يا سيادة الريس حضرتك وجمال بيه تسيبوني احب حسن نصر الله ممكن؟ انا مش ح اتدخل في حاجة تاني، انا الحمد لله بخير والمفروض استمتع بحياتي وابطل انكد على نفسي، والناس اللي بتنكد عليا ح ابعد عنهم
بس انا باحب حسن نصر الله، لو تسمحوا لي افضل احبه، الراجل بعيد عنكوا يعني، ده بيعادي اسرائيل، وانتوا اعملوا اللي على كيفكوا، تصالحوا اسرائيل تدوها غاز كهربا مية، اللي تحبوه، والله ما باتريق، باتكلم بجد، وصدقت: التوزيع غير العادل للثروة افضل من التوزيع العادل للبؤس، وانا عن نفسي مش من بتوع البؤس، وما كانش ليا حق ابدا اني اتكلم عن مشاكل مش بتاعتي
كل واحد يتكلم عن نفسه
انا ح اعيش اللي فاضل لي من الدنيا وانبسط
ربنا يخليك للشعب يا ريس... بيحبك والله، وانا ح اعوز افرق الاحبة ليه؟ ماليش مصلحة

113 comments:

Anonymous said...

لالالالالالالا

موش للدرجه دي

احنا مانستغناش عنك ابدا

معلش الناس بتتلكك ع الفرحه بجد

بكره يفوقوا .... بعد ما يصحوا من النوم

دمتي بكل خير

Unknown said...

ح يفوقوا عشان يستعدوا لماتش السودان

وح نكسبه عشان تبقى عارفة

فريق الجزائر كسييييييييييييح

Anonymous said...

صحيح هي الدنيا هايصه عندكم

اصل عندنا هايصه اه .... بس موش بدرجه القاهره

يعني انا كنت في الشغل ورجعت عادي .... البلد موش مقفوله

طيب لو حضرتك مضايقه من زيطه الشعب .... ما تيجي تهاجري عندنا

والله لما مصر بتفوز موش بنعمل زيطه جامده اوي

تحياتي

يا مراكبي said...

تصدقي وبصراحة وبدون مجاملة إنتي عندك حق؟

تصدقي فعلا إنك حارقة دمك على ناس مش هاممها أي تدهور في البلد بس المهم تكسب في ماتش كوره؟

شر البلية ما يضحك فعلا

بوست ساخر ومؤلم وحقيقي للأسف
:-(

Unknown said...

انا عايزة اقول لك اني اضطريت البس ابيض واسود واحمر عشان ما انضربش لان اللي بيلبس اخضر بينضرب

وعايزة اقول لك اني عشان يعدوا العربية بتاعتي لازم اديهم كلاكسات تشجيع وابتسم لهم بنفاق يا كده يا اما ما اعديش

انا النهاردة كنت قمة النفاق عشان ارجع بيتنا سليمة

Anonymous said...

طيب ما نفوز

المشكله موش في الفوز

المشكله في استغلال الفوز

بجد انا موش بشوف فرحه رهيبه غير في البلاد الكبيره

يعني في اي بلد صغيره او قريه الموضوع بيعدي والناس اهي نامت عندنا

انتم اللي بتموتوا في الظيطه في البلاد الكبيره

تحياتي

مشروع مدونة said...

ماحدش عايزه
ولا حد بيحبه هو ولا ابنه
وطول أجل الأب ابتلاء من الله

لن يغيره حتى نغير مابأنفسنا

Anonymous said...

هههههههههههه

طيب ده انا لبست اخضر من يومين كده

هو تركواز تقريبا

لالالالالا انتم باين عليكم فاضيين

واكاد اجزم انكم موش عندكم مشاكل

تحياتي

بهيج الشرير said...

ياترى ياأبلتي لما كوستاريكا والنمسا بيكسبوا في الكورة؛ شادية بتاعتهم بتغني برضه ياحبيبتي ياكوستاريكا وياحبيبتي يانمسا

Unknown said...

مش بتتريقي فعلا؟
يا نهار إسود!!

دعاء said...

يا نوارة متديقيش نفسك يا بنتي ولا تحرقي دمك

على العكس ده المفروض إنه يخلي الشعب يصعب عليكِ اكتر إن اكبر إنجاز لينا هو ماتش كورة..

عن نفسي بكره الكورة و مش بحبها وكنت مستهيفه الناس ألي عاملة كل الهيصة دي على ماتش،

ولكن عدوى الحماس صابتني، ومكنتش وقتها بنافق، صعب تشوفي كل الناس البسطاء دول فرحانين ومتتأثريش بيهم حتى ولو على حاجة هايفة..

ومش ذنب اللعيبة في رأيي انهم ياخذوا فلوس أو شقق أو غيرة..

هما الناس الوحيدين في البلد دي ألي بيعملوا ألي عليهم بجد

لو اشتغلنا في الطب والعلوم والأقتصاد والجيش و....الخ بنفس درجة وحماس الكورة دي وبنفس طريقة اللعيبة كنا بقينا بلد أول أو على وشك يعني..


الذنب ذنب من همش كل شيء في البلد حتى لم يتبقى بها سوى الكورة..

متجيش قوي على الغلبان ألي ملقاش حاجة تسعده في بلدنا دي كلها غير حته بتاعة مليانه هوا بتتحدف بين الرجلين

الله يكون في عونه ويفرحه ولو حتى الساعتين بتوع الماتش دول

Unknown said...

لا مش باتريق

هو انا ايه مشاكلي؟
نظام مبارك بيمسني بشكل شخصي في ايه؟
ولا حاجة انا زي الفل
بالعكس بقى
انا عشت شوية ايام السادات وعشت معظم عمري ايام مبارك وايام مبارك احسن بكتير بالنسبة لي على المستوى الشخصي

انا مزعلة روحي على المتضررين والمتضررين اهم بيرقصوا في الشارع وبيهتفوا لمبارك

ابقى انا بقى يعني عايزة امشي الكون على كيفي؟

المهم ابقى انا واهلي بخير
وخلاص
وكل واحد ادرى بنفسه واللي عنده مشكلة يتكلم عنها هي وبس ومالوش دعوة بمشاكل غيره

ده احنا حتى عاملين دوشة على الفاضي
الراجل ده مشروعه القومي الوحيد هو الكورة
واهو ناجح فيه
والناس راضية بان مشروعها القومي الوحيد يبقى الكورة
ومبسوطين بالنجاح
انا مزعلة روحي ليه؟ الا اذا كنت رخمة

مواطن مصري said...

مدام الشعب راضي و ساكت يبقى الشعب حر

لو الشعب مش عاجبة الريس كان غيرة من زمان

Anonymous said...

طيب موش يمكن الناس اللي بتهيص دي معندهاش مشاكل

اصل شكلهم كده مبسوطين .... يبقا مفيش مشاكل

صدقيني محدش مغلوب على امره وقرفان هيطلع يهيص

كمان الناس تنزل تهيص اه .... لكن تطالب بحقها ازاي وهي خايفه

في فرق برضو

استاذه نواره .... حضرتك اخر واحده توقعت انها تحبط

تحياتي

wahat_alshohada said...

اقسم بالله العظيم
انى كنت عايزة اكتب رسالة زى بتاعتك دى بالظبط
رسالة استقالة من الاهتمام بالناس
كل واحد يشوف نفسة صحيح
وانا شخصيا هقف بعييييد و اتفرج و استنى صلاح الدين يجى يشيل الليلة
دة انا حتى فوجئت بشباب يعنى
كنت اظنهم عاقلين يا محمد
بس اتضح انى انا اللى ضاربة
دة احنا وصلنا لمرحلة من الانحطاط
لايمكن يكون لها نظير
مازعلناش على الشرف و الدم و الكرامة
ولا حرق الاقصى من 10 ايام
ولا شئ اثر فينا غير الكورة
بالسلامة بقى
ياللا يا بنتى انا معاكى
اياكش تولع
ايمان بدوى

wahat_alshohada said...

انا كنت مخدوعة فى الناس زيك
بس ماتش مصر و الجزائر فوقنى
مافيش فايدة ابدااااااااااااااا

Unknown said...

انتي صح يا نواره
بس شعبنا من كتر طيبته ما بيصدق حاجه تفرحه
يمكن فرحان من قلبه
اه في فرحه من القلب فرحه انتصار مش اكتر
عشان يمكن انتصار مش طايلنه غير بالكورة
بس اهو في الاخر انتصار
كمان الفرحة دي مكسورة لعلمك جوا كل واحد فينا
وكل كلامك ده في دماغه وهو فرحان وبيقول ياريت نتجمع كده في حل مشاكلنا ونقف في وش حكومه فاسده
ويمكن ده سر الفرحه المستخبي رقم اتنين انه اخيرا لقى حد يقف معاه
بس صدقيني فرحه اه بس مكسورة

فلاشاوي said...

كلامك فيه خلط كتيير
وقراءة غلط خالص للموقف

إنتي إفترضتي إن اللي رفع اليفط دي مصريين غلابة بيايدوا الرئيس
مع أنك عارفه أن محدش فيهم هيكلف نفسه خمسمية جنيه عشان يعملها

يا ست الناس ما أنتي عارفة المأجورين وطبيعي النظام هيستغل شيء زي ده لمصلحته وهيكون مأجر ناس تبعه محضرين اليفط ويمشوا وسط الناس مستغلين فرحتهم

وعارفه إن في مرشحين للحزب الوطني بيستغلوا ده عشان يرضى عنهم النظام ويقبلهم

الناس كانت فرحانة لمصر .. ,اقدر أبالغ كمان وأقول مكنوش فرحانين
بالكورة .. لأ فرحانين لمصر

شوفتي فرحة الستات والبنات .. من إمتى ستات وبنات مصر بيهتموا بالكورة .. ما بيهتموش .. بس هي مصر

عارف أنها كورة
بس المخرج اللي كان مع كل جول وفرصة يجيبلنا المحروس في المدرجات مأمور بكده مش لأنه بيحبوا

الهتيفة مأجورين
والمفروض إنك عارفه

بالعكس
اللي حصل نقدر نشوف فيه أن الناس بتحب البلد رغم اللي فيها
وإن اللي بيشكك في أنتماء المصريين عمال على بطال غلطان

ومرة تانية عارف إنها كورة
لكن بقولك والله الناس ما هي فرحانة لمجرد أنها كورة
فرحانين عشان مصر
نفسهم يفرحوا بيها في أي شيء
وده سبب الأأغاني الوطنية بعد الفوز
أحنا مش عاوزين كورة .. أحنا عاوزين نصر .. أي نصر

بهيج الشرير said...

الله يهديكي ماتقلبيش عليا مواجع قديمة وتفكريني بأواخر أيامي قبل ماأمشي، كنت تقريبا باأفكر زيك كده وكنت على وشك يجيلي إنهيار عصبي

مش فاهمه said...

لأ بجد ايه دخل عيشه فى ام الخير هو علشان الناس العاديه و حطى خط تحت العاديه دى نفسها فى فرحه اى فرحه و السلام
الناس العاديه عايزه تفتكر ان لسه فيه حاجه اسمها بلد عايشين فيه و عايزين يلاقوا شئ يتجمعوا حواليه من غير ما الأمن المركزى يكهربهم بجد انا من الناس اللى كان نفسى ولادى اللى وصلوا لمرحله ان اى خرم ابره فى اى حته فى العالم حايبقى احسن من هنا كان نفسى اوصلهم احساس بانتماء باى انتماء ازاى وانا ولا قادره اقولهم مارسوا الأنتماء ده فى المدرسه ولا الجامعه ولا النادى مش قادره اخدهم وننزل مظاهرة انا واحده عاديه و مش حمل ضرب و اغتصاب و كهربه و خوزقه انا واحده باحاول ارضى ربنا فى شغلى و اقاوم باضعف الأيمان و احيانا باللسان و الكتابه لكن ولادى لم اراهم بيهتفوا باسم مصر ولا فخورين بعلمنا ولا قادرين يكملوا دراستهم و حياتهم فى البلد دى الا وهم فرحانين باى انتصار حتى ولو فى الكورة
مافيش اى علاقه بين فرحتنا و رضانا عن اللى بيحصل من حكومتنا و ريسنا ولا فيه اى علاقه بين فرحتنا و استمرارنا فى مقاومتنا الصامته اللى ان شاء الله لما يكون فيه قائد بجد نلتف حوله و نقابات محترمه تاخد لنا حقوقنا لما نقف و نتكلم و مثقفين و قاده حركات يقدروا يتشجعوا يقفوا و يعضدوا مطالبنا و يواجهوا بها الحكومه و يطلبوا مساعده العالم كله لكن عايزين ناس تخرج علشان رغيف العيش و اكل المجارى و بعدين تنضرب و تتكهرب و يتحط عصيان فى لامؤاخذه اجسامهم و بعدين قادة المعارضه و المثقفين و القاده الشعبيين يقفوا يتفرجوا و يمصمصوا شفايفهم و كل واحد منهم عياله متعلمين فى الجامعات الأمريكيه و قاعد فى التكييف و بيصيف فى مارينا و غايه ما يعملوا يايعمل قصيده هجاء فى الحكومه و التوريث يا اما يلوم علينا سكوتنا و هوانا و لأ كمان مش عاجبهم ان الناس الغلابه تفرح يبقى اسمه ايه ده
يايقول لنا على حل بقه ينتشلنا من اللى احنا فيه زهقنا كلام

overdose said...

مبسوطة الناس عمرها

Asmaa mahaba said...

:((((
نواره الانسان بيعمل اللى عليه ميهموش الناس دماغها ايه المهم تبقى عارفه انك ماشيه صح يمكن كلمه واحده تهدى واحد احسن من صفر انا برضو قولت كدا بس من اسبوع تقريبالكن رجعت تانى اقول مع فارق التشبيه طبعا واننا شىء لا يذكر جنبهم
شوفى الانبياء والصالحين تعبوا ازاى عشان يصلحوا الناس ....ويمكن كانت احوال الناس اصعب من دلوقتى متعتذريش على كلمه حق قولتيها كلمتك اللى مأثرشى دلوقت ممكن تأثر بعد ميت سنه وتتجازى بيها خير
.................
خليهم يفرحوا شويه بكرا يفوقوا ويفهموا اما بكرا دا جاى امتى معنديش فكره بس جاى ان شاء الله
وبعدين انتى لسه عارفه الشعب المصرى دلوقت؟؟

Unknown said...

الكلام عن ان الناس عايزة تفتكر ان فيه حاجة اسمها مصر وما قدامهمش غير الكورة ده كلام مجافي للصحة

لو كانوا عايزين يخرجوا بنفس العدد ده ويقولوا مصر في حاجة تانية

زي مثلا ضد الفقر وللا البطالة وللا اي مشاكل من اللي احنا عمالين نهاتي فيها ونغني ونرد على نفسنا كانوا عملوا كده

هم مش عايزين مش مش قادرين

مش عايزين هم مبسوطين كده
هم ادرى بنفسهم

برضه الكلام عن ان الناس بكرة تفوق وتفهم ده افتراض فوقي ان الناس مش فايقة ومش فاهمة

كل الناس بتتكلم في السياسة في مصر
وبيفهموا كويس قوي وماشيين يشتكوا طول الوقت
طول الوقت بيشتكوا
لكن مش عايزين على الاقل دلوقت يعملوا حاجة

ومش باين عليهم انهم تعسا
ولا هم كمان اغبيا ومش فاهمين

هم ادرى بنفسهم واحنا كده بنضحك على نفسنا لما نفضل نتكلم في كلام الناس بتقول احسن منه وعارفين احسن منه ومش عايزين يعملوا بخصوصه حاجة

هم ادرى
هم ادرى

مدام ما نزلوش بالعدد ده عشان الفقر ونزلوا عشان الكورة يبقى هم ادرى

ده اختيار
مش مجبرين عليه ولا هم اغبيا ومش فاهمين

دعاء said...

يا نوارة أنتي ما شفتيش الكلام ألي قالته مش فاهمه..

الناس لما تخرج تفرح على ماتش الآمن المركزي مش هيضربهم ومش هيتشدوا ومش هيتفصلوا من اشغالهم ومش ومش ومش ومتعديش

لكن لو خرجوا يتكلموا عن لقمة اعيش والفقر وغزة أنت عارفة هيحصلهم ايه..

وعارفه بيحصل ايه للبيخرجوا فعلا..

دي الأغلبية الصامته ألي هتموت ونفسخا تهتف بأسم مصر في أي حاجة أي حاجة والسلام بس متتبهدلش بعديها..

صدقيني لو حكومتنا بتكره الكورة وحطت أمن مركزي علشان يمنع الناس تهيص بالكورة، كل واحد هيصر في قلبة ويخرس ولا هيخرجوا ولا هيرحوا..

الناس تفسها تفرح بحاجة للبلد وفي نفس الوقت متتبهدلش..

اي نعم ممكن نسميه جبن بس أحنا مش اشجع الشجعان علشان نحكم عليهم..

لكن مش معنى كده انهم بايعين القضية ولا راضين على عائلة مبارك او اي كلام م ده، ولو جيتي فكرتي اي واحد فيهم بكرة

بالسكر الي غلي و الموصلات الزحمة والمية المقرفه وابنه الي عنده فشل كلوي والمعاشات الي بتنقص هتلقيه بيسبلك في الحكومة وسنينها من كبيرها لصغيرها..

هما بس نفسهم يشوفوا اي نصر لمصر ميتعقبوش عليه اي حاجة والسلام

أبو أمك said...

دول قلة من الشعب مايجوش كام مليون اللي نزلوا وهيصوا
الدنيا لسه بخير...وفيه كتير لسه مهتم بقضايا الوطن
قعد ومانزلش الشوارع
عشان يتابع التحليل بعد الماتش

مش فاهمه said...

هم نزلوا علشان مافيش عصايات امن مركزى و هراوات مكهربه
هم نزلوا علشان بيحبوا الكورة و فقط ولأنهم اتلعب بيهم اعلاميا و اتشحنوا اعلاميا بقوة لم يسبق لها مثيل و اللوم مش على الناس اللى بتحب الكورة و بتتنشق و تتلكك على فرحه دى كورة و لا شئ اكبر ولا اقل من انها كورة كوننا عايزين نحملها اكتر من كده او نحمل الشعب اكتر من كده هو ده الغلط فى رأيي فيه فروق رهيبه بين ان تخرج علشان الكورة و الأمن بيحرسك و انك فى الجامعه مثلا تخرج علشان القدس او التوريث و الأمن المركزى كله بيضرب فيك
ليه مانبصلهاش بنظرة تانيه كفايانا جهاد على النت و مصمصه على الشعب اللى مش عارف مصلحته امال لو كنا عايزين ديومقراطيه اديكى شايفه كم الناس اللى حاتطلع تقولك الكورة مهمه و المننتخب املنا
ليه بنبص على الناس من برج عالى و بندعى دايما انهم مش عارفين مصلحتهم و احنا بس اللى عارفين و حتى لو ده صحيح ده عيب مين عيب اللى مغيب بقاله عشرات السنين بفعل فاعل و مقصود انه يهمش سياسيا و تجفف منابع ممارسة السياسه امامه و لا عيب طبقة المثقفين و المتعلمين اللى المفروض ياخدوا بايد الناس دى و ينزلوا لهم و يكلموهم و يدلوهم على الطريق
لكن لو هو اتفاق ضمنى ان الناس المثقفه و اللى عليهم مهمة تنوير الناس و تعريفهم حقوقهم وواجباتهم تفضل تتكلم مع نفسها و تاخد قرارات للناس العاديه بعيدا عن الناس فعليا و دمتم و الناس العاديه تفضل تشتكى و ماتقدرش تتجمع و تتتلم الا فى الكورة يبقى ولاحد يزعل لأن كل واحد بيمثل دوره كويس

Unknown said...

ههههههههههههههه

ابو امك

انا باحبك قوي ههههههههه

باقول لك ايه ما تيجي على التويتر

http://twitter.com/

Unknown said...

على فكرة

الاعداد دي لو نزلت الشارع عايزة لها تلات جيوش عشان تعرف تقمعها

يعني يقرمشوا الامن المركزي بسنانهم

ولما حبوا ينزلوا في سبعة وسبعين نزلوا وماحدش عرف يحوشهم

اللي عايز حاجة بيعملها

وهم عايزين كده
هم ادرى
انا مش بازايد عليهم، انا بازايد على نفسي

انا فاكرة نفسي ح افهم احسن من كل دول؟ ابقى حمار ببردعة

Khaled Khalil said...

يا سلام يعني لما تلاقي كل الناس بتحشش هتقولي و ماله الحشيش, ما أحشش زيهم لما هو بيبسط أوي كده

دعاء said...

انتي مصممه تكتئبي يا نواره وتحملي الموضوع أكتر مما يتحمل

أنا حاسة بالي مضايقك بس قادرة في نفس الوقت أفهم الناس بتفكر ازاي ربما لأني بفكر كده بهلهليه لا بتفكير منظم ولا بكلام مرتب..

بفكر وخلاص فقادرة افهم إن ده لا تأيد لحكومة ولا غيرة

دي فرحة عبيطة من الآخر ومرة تانية

كل واحد بيخاف ينزل مظاهره ميعرفش إن الأعداد دي هتبقى موجودة.. هو بيخاف ينزل علشان هيتبهدل..

لكن في الكورة لو نزل عبيط لوحدة يهيص محدش هيبدله فمبيبقاش في اي حذر

الناس خوافة ايوه وعن نفسي احنا اول الخوافين..

انا خوافة جدا والكلام الي بقولة هنا مثلا لا يرقى شيء للنزل وتظاهر و اخذ موقف حقيقي على الأرض..

علشان كده مش عايزة احكم على الناس دي بخوفها

لو منعوهم من النزول للكورة هيقعدوا في بيوتهم ويخافوا برضة بكل اسف

الموضوع ببساطة ايه هو الي مسموح بيه؟؟

الخوجة said...

نوارة كلامك صادق وكل واحد بيقول ياله نفسى الكل عاوز نوارة تشعلل ويتفرجوا علشان يقولوا دى اخرتها

فاكرة يوم عسكرى المرور انا قلت هتحصل مظاهرة بسبب نوارة ولاحاجة كل كلمة فى البوست دهب نعم اختنا الاستاذة الفاضلة
الناس لايهمها اى شىء

اختى الفاضلة الاستاذة نوارة اتكلمى زى مانتى عاوزة فى زمن جبن فيه الرجال لاكن ماتضربيش دماغك فى الحيط


هو حد قالك حاجة على حبك للشيخ حسن نصر الله

انتى صاحبة مبدأ


ونفس الحال عندك هو ماعندنا

نفس الوضع

والكل اصبح يكتب عن المزيكا والشعر ولبس الحريم

واصبح يشوف قضايا خارجية


بس رايك مهم يانوارة

وادى فيديوهات بلدنا مع انتظار البقية بمجرد دخول الهدف التانى

نفس القصة

مباراة مصر والجزائر 14/11/2009




انتى شمسنا اختنا الفاضلة

ماشى نعم التفكير

الناس عاوزة كدة براحتها

شوفى
خرجوا للكورة

Unknown said...

يا نواره رفقا بنفسك
الناس في مصر حزينه جدا و الله ، و الفرحه دي حاجه كده زي ما يكون ناس كانت بتتلكك انها تفرح ، حتي الواحد ساعات يكون قاعد في سرداق عزاء و الاقي ناس بتتكلم جنبي و تضحك .. عادي يعني
و مش تنسي ان العشرين ثلاثين سنه الاخيره دماغ الشعب المصري انضربت بمضرب بيض و بقي الحزن و الفرح و الشجاعه و الخوف كله سايح علي بعضه .
عموما عشرين او ثلاثين سنه في عمر مصر مش كتير ، و اكيد بكره الحال ينصلح .
و نكون افضل و احسن ..

أبو عمر - الصارم الحاسم said...

طب ما هم بيخرجوا ان حصل حاجة للاقصى

وبيخرجوا ان تم التهجم على النبي صلى الله عليه وسلم



لكن ما عدا ذلك الناس عندها قلة وعي رهييييييييييييبة


ترتيب الضرورات في الاسلام - الدين - العرض - العقل - النفس - المال

الناس مازال عندها الدين ييجي منه...كدين وشعائر ولكن فيه حتت ناقصة زي العدالة وغيرها...والعرض مازال موجود برضه...بنسبة...لكن باقي الاولويات ضايعة

يبقى المطلوب هو رفع الوعي عند الناس...ولو الدين عندهم قوي افهامهم ان باقي الاولويات ايضا من الدين

وبعدين المفروض اللي بيشتغل بيشتغل لوجه الله حتى لو الناس كلها انفضت عنه وتركته وحيدا....فقط هكذا يكون الثواب

لا تزال طائفة من امتي قائمين لا يضرهم من خذلهم......الخ

ومعذرة الى ربكم...وكل يحشر على نواياه

Unknown said...

طب قابلوا

شوارع غزة مليانة ناس نازلين يحتفلوا بانتصار مصر
وشوارع غزة زي شوارع مصر بالظبط

دول الناس اللي احنا قاطعين عنهم الاكل والمية وقاتلين لهم قتيل من كتر التعذيب

مش ممكن انا صح وكل الناس دي غلط

اكيد انا اللي غلطانة طبعا

أبو عمر - الصارم الحاسم said...

كووول الفرح ده مالوش اي علاقة عند ناس كتير بمبارك وابنه

الناس عايزة تحس انها بتكسب في حاجة...اي حاجة

واهل غزة على الرغم من كل اللي بنعمله فيهم معتبرينا اهلهم وفرحانين لمكسبنا

واهل غزة عندهم وضوح رؤية - اعني عندهم وعي - اكثر الف مرة من الشعب المصري

ببساطة...هل ما تفعله الحكومة فينا صح ام خطأ
؟

وهل كل واحد ناوي يقبل الغلط ده ام لأ
؟

وماذا سيفعل
؟

هكذا يحاسبنا الله...وكل انسان ملزم بعمله

أبو عمر - الصارم الحاسم said...

على فكرة انا مش قاعد في المكيف وبقول للناس اعملوا

وسيبك من حوار الاسم المستعار اللي بستخدمه...الناس دي - الأمن - لو شايفين شغلهم واكيد شايفينه أكيد عارفين العبد لله مين

Anonymous said...

تحياتي لك

رغم ان عملي في مجال الانترنت الا انني قمت بالاشتراك لأبدي اعجابي بكتاباتك الناضجة و الشجاعة. مواقفك القوميةاتابعها دائما و ان كنت لااتفق مع بعضها...

استمري في الكتابة .. فشجاعتك مصدر الهام لنا جميعا.

فلاشاوي said...

لا بجد .. دي بقت حاجة تنرفز
خاصة بعد كلام الأخ واحة الشهداء
اللي عاوز يستقيل من الإهتمام بالناس
لا يا عمنا نرجوك نبوس إيديك لا تستقيل
هنعيش من غيرك إزاي أنت وباقي المدونين الأبطال المجاهدين العظماء اللي أيديهم بتوجعهم جدا وهم بيجاهدوا من ورا شاشات اللاب توب

---------------------

هو في إيه .. هو خلاص كل مدون إعتبر نفسه بطل مناضل والشعب الجبان إتخلى عنه ولا إيه

أو إن الشعب زي ده ميستاهلش نضالكم
خلونا نجرب محدش يعبر مدوناتكم بالتعليقات لمدة شهر ونشوفكم هتستمروا ولا لأ
عشان نعرف أنتوا بتجاهدوا عشان مين بالظبط !

-----------------

ما بلاش قلة عقل
مش كل واحد فتح مدونة يشتم فيها النظام بقى بطل
كل الناس بتشتم في النظام بس مش كلهم عندهم مدونات

مع كل إحترامي ليكي ولمدونتك يا نوارة اللي بتابعها دايما عشان حابب إسلوبك حتى لو كنت بختلف معاكي

لكن مدونتك ومدوناتهم مهمة ليكم أنتوا نفسكم اكتر ما هي مهمة للناس

--------------------------
ده حتى لو في ناس اخدت أموال بسيطة عشان تهتف .. هو ده مش دليل على حاجتهم

أما واحد يروح يدي صوته لمبارك عشان عشرين جنيه .. ده معناه إيه غير أنه في حالة إحتياج شديد
واحد فقير متوسط او عديم التعليم بتطالبه بأنه يكون تصرفاته زي تصرفات المثقفين


ده حتى لو عارف أن صوته لمبارك غلط
تعرف إيه أنت عن إحتياجه
تعرف إيه أنت إن 20 جنيه تعني بالنسباله يو حلو عياله يناموا فيه فرحانين وملعون أبونا أحنا مدونين على مثقفين

تعرف إيه أنت إن إبنك يكون محتاج وأنت مش قادر
لو طلبوا مني أعمل أي حاجة عشان اسعده هعمل
وهو أنا أما أرفض حضرتك هتعملي إيه
ولا حاجة طبعا لأنك متوقع مني أني أنا أهتف بإسمك يا مناضل يا كبير
يا مدون يا عظيم ياللي بتموت نفسك عشان تكتب كل تدوينة وتدوينة
----------------------------
معظم المدونين إن لم يكونوا كلهم هم أشخاص على الاقل متوفر لهم عيشة مناسبة إن لم تكن جيدة
وإفتراض أنهم حاسين بالغلابة إفتراض غبي لا يمكن طرحه حتى لو كانوا في أوقات بيروحوا للدويقة ولا للمعبر بشوية مساعدات عشان يقنعوا نفسهم قبل أي حد أنهم ابطال وأهل خير
ودول أصلا قليلين جدا
وباقي المدونين أسود من ورا الشاشة بس
جهااد الفيس بوك والبلوجير
------------------------


أنتوا ولا حاسين بالناس ولا تعرفوهم
عشان لو كنتوا حاسين بيهم أو تعرفوهم كنتوا عرفتوا ليه فرحانين
بدل ما أنتوا مندهشين وعاوزين تستقيلوا من الإهتمام بالناس

لا والنبي خليكوا شوية
والنبي والنبي هنحسن من نفسنا عشانكوا
إدونا فرصة تانية نثبت لنا فيها حبكوا

------------------
أوووووووووووووووف

حـنــّا السكران said...

ما في فائدة

والله ما في فائدة

و عاش مبارك

قاهر الهكسوس على رأي بهيج

و عاش كلّ رفاق مبارك في القصور العربية .

و لتذهب الشعوب إلى الجحيم

لتذهب برجليها و برضاها

ما حدا أخدها و لا حدا معبّرها أصلاً منشان ياخدها الجحيم أو غيره .

حب وطن ؟؟؟؟؟؟

ك.اخت الوطن , إذا هيك صارت الوطنية و حب الوطن .

ارتاحي يا نوارة .. و انا معاك باللي قلتيه ..و يحيا عوكل إله الشمس و الكورة .و ربّ البندورة .

المهدى said...

والله أنا كنت فى نفس حالتك دى ورغم أنى مهتم بالكرة وأدعى أنى أفهم فيها ورغم أنى مصرى أصلى إلا أننى ظبت نفسى متلبسا بتشجيع الجزائر أنتقلت فجأة ودون أن أشعر للمعسكر الأخر عندما قفز البعيد فى الهواء وياللعجب سعيدا بفوز مصر ووجدت الملايين للحظة فى نفس معسكر جمال مبارك وهاتك يا إحباط إلى أن أخرجتنى زوجتى وهى من مواليد عام ( الرخاء) ولا تهتم بالكرة على سؤال يا ترى الناس الغلابة دول فرحوا كدة بالعبور ؟
وبما أنى من مواليد عام ( الحسم )فكان يجب أن أرد بحسم ... أكيدلأ
وقررت الأن أن أصدر لك هذا السؤال تفتكرى الشعب المصرى سنة ثلاثة وسبعين كان يعبر عن فرحته بهذه البدائية وهذا الهوس ؟
هل فرحةالمواطن الصابر الصامد عندما عبر الهزيمة ورد الأعتبار وأستعاد الأمل لنفسه وأولاده ومستقبله ووطنه تماثل فرحة المواطن الصابر الصامد اللى طلعان دينه فقط ليعيش يومه لو أحرز المنتخب جون ؟
هناك فارق بين الفرح والتعبير عن الفرح
ويمكن المبالغة فى التعبير فى حد ذاتها تعكس كم الأحباط والحزن
هما معاك ومعايا بس فعلا زى مقال لك كتير غيرى نفسهم يفرحوا ولو بالكدب ولو تمثيل

أما بالنسبة للسؤال الأخر طب ليه
مبيتحركوش فده مالوش أجابة ومش فى 77 بس كمان فى 19 وفى 35 لو تخرجى من الأحباط وتراجعى نفسك حتتأكدى أنه سؤال بدون أجابة
شعب طيب متحضر باله طويل يعرف يصبر على الظلم ولكن متى ينفجر لا أحد يعلم ممكن بعد 37 سنة لما أحتلوه زى سنة 19 وممكن بعد 12سنة لما سرقوا ثورته زى 35 وممكن بس بعد 3 سنين لما سرقوه هو شخصيا بأوهام الرخاء وأخر الحروب فى 77 أنا خرجت من الإحباط ورجعت فرحت زى كل مصرى عقبالك
ومع أن فرحتنا الحقيقية لم تأت بعد إلا أننا فى الأنتظار
محمد المهدى

Unknown said...

يا سيد فلاشاوي

انا ملاحظة من كام تعليق لك ان حضرتك مش بتفهم الكلام

بجد والله
بترد على كلام في دماغك مش على الكلام اللي بيتقال لك

الكلام اللي في دماغك ياريت حضرتك تشوف مين قالهولك وتروح ترد عليه
لما اقول كلام ترد على كلامي

وانا مش شايفة اصلا ان فيه رد

انا حرة والله اغير موقفي
انا لا قلت اني بطلة ولا مناضلة حضرتك

انا باقول ان الناس عارفة هي عايزة ايه

مافيش داعي اني اتحدى رغبات الناس وافضل اهاتي في حاجات ما تهمهش في حاجة واضايق نفسي

ما انا برضه انسانة وليا حياة وضيعت على نفسي فرص كتير عشان شاغلة نفسي بحاجات كنت فاكراها مهمة وطلعت مش مهمة ولا حاجة

طلعت الكورة اهم

وتحليلك انت مش لازم هو اللي يكون صح

انت حضرتك مش دكتور تحاليل عشان تزعم انك تعرف كل الناس عايزة ايه وبتفكر ازاي ده تكبر منك

ولا انت من حقك تزعم انك تعرف الناس بتنزل في الماتشات بالملايين ليه وما بتنزلش لما اسعار الاكل بتغلا ليه

هم بيعملوا كده عشان هم بيعملوا كده

عشان هم عايزين كده واكيد لهم وجهة نظر

مش من حقك تتكبر وتدعي لنفسك القدرة على معرفة مكنونات كل الملايين دي
اتكلم عن نفسك يا زعيم الامة

انا كنت باتكلم عن معاناة ناس كانوا هم بيشتكوا لي وقلبي كان بيوجعني

وبعدين واضح ان شكواهم دي بقت اغنية اكتر منها شكوى حقيقة

او هكذا يبدو

انا طبعا مش متعمقة في النفس الانسانية زي حضرتك ولا بازعم اني فاهمة الناس كويس وعارفة بيعملوا كده ليه

انا ليا الظاهر وبس

الظاهر انهم لما بيعوزوا حاجة بيعملوها ومش محتاجين حد يتكلم بلسانهم ولا يشرح نيابة عنهم

هم بيعرفوا يتكلموا وبيعرفوا ينزلوا الشوارع لو عايزين

ومش صحيح ان ما عندهمش وعي وعايزين حد ياخد بايدهم

ومش صحيح انهم غلابة ولا حاجة

لما بيحبوا يقطعوا حد بيعرفوا يقطعوه ويخلوه ما يسواش تلاتة نكلة زي ما عملوا في الجزائريين

ولمابيحبوا ينزلوا الشارع بالملايين بينزلوا

ولما بيبقوا مش عايزين يبقى مش عايزين مش من حقك تفرض عليهم حاجة

هم مكتفين بالشكوى والبرطمة

خلاص
مش هو ده اللي بيريحهم؟ لما يحبوا يعملوا اكتر من كده ح يعملوا اكتر من كده من غير قيادة حد ولا ارشاد حد ولا حد يتكلم نيابة عنهم

وانا مش بينوبني غير النكد والعياط وبس

طب انا ذنبي ايه يعني؟ انا كان عندي تصور خاطئ انهم بيكرهوا مبارك مثلا، وانهم محتاجين حد ينقل شكواهم اللي اكلوا دماغي بيها

وطلعت غلطانة
هم مش مكسورين زي ما كنت فاكرة، ولا غلابة، ولا محتاجين مساعدة

دول يساعدوا بلد
انا بقى من حقي اراجع نفسي يعني

سيبنا لك تحليل البول بتاعك

وفتح مخك شوية وافهم اللي قدامك بيقول لك ايه انت مالك قفل كده

حسن على said...

"ولعلك باخع نفسك على اثارهم ان لم يؤمنو بهذا الحديث اسفا" صدق اللة العظيم هونى عليك يانوارة

Unknown said...

جو
ههههههههههههههههه

وحشتني

Unknown said...

يا استاذ حسن انا مش باخعة نفسي ولا حاجة

انا واحدة مؤمنة بحكمة الشعوب
وبصرف النظر عن المغالطات والهطرسة بتاعة: التعصب الرياضي موجود في كل حتة في العالم
ماشي
ولو اني عمري ما شفت في حياتي تعصب رياضي يؤدي الى ذكر هزيمة سبعة وستين وجميلة ابو حريد اللي عملوها مومس وحصار غزة واحفاد نابليون يا ولاد الحرام
وعمري ما شفت ماتش بيتحول لحرب وناس تتصور ان الوطن اتلخص في استاد
ده ما بيحصلش في اي حتة في الدنيا
لكن خلينا نقول انه بيحصل في اي حتة في الدنيا
وايه المشكلة

طيب خلاص
ما الفقر موجود في كل حتة في الدنيا، والتخلف موجود في حتت كتير في الدنيا، والتحرش موجود في كل حتة في الدنيا، واطفال الشوارع موجودين في كل حتة في الدنيا والفساد موجود في كل حتة في الدنيا والحكم العسكري موجود في حتت كتير في الدنيا والتبعية موجودة في حتت كتير في الدنيا والفشل مالي الدنيا

ايه المشكلة؟
خلاص، مدام هبل الماتش ده مافيهوش مشكلة عشان الانجليز بيحرقوا الاستاد يبقى كل اللي عندنا مافيهوش مشكلة لانه موجود في حتت تانية
طب انا مزعلة نفسي ليه اذا كان ده المعيار؟

الايرانيين مثلا نزلوا بنفس الاعداد دي عشان يقولوا
where is my vote

المصريين حتى ما بيروحوش الانتخابات

طيب يا استاذ حسن مش يمكن هم لهم حق؟ مش يمكن لهم وجهة نظر؟ انا غلطت لما افتكرت اني اقدر اعمل واجب تجاه الناس وغلطت لما افتكرت ان الناس غلابة

بقى ده منظر ناس غلابة ده؟ بقى اللي عمله المصريين والجزائريين مع بعض يدل على انهم فيهم ذرة غلب واحدة؟

لا مش غلابة
واكيد لهم وجهة نظر
مايمكن شايفين ان الايرانيين دول شوية ناس مجانين جازفوا بوحدة بلدهم وسلمها الاجتماعي وهم عارفين ان بلدهم مهددة

صح؟

ما يمكن هم شايفين ان السلم الاجتماعي والاستقرار اهم من الديمقراطية والانتخابات

طب ماهي وجهة نظر برضه

ما يمكن خايفين من المشاريع القومية الجادة، ما يمكن حاسين ان المشاريع القومية الجادة ممكن تعرضهم لعدوان ثلاثي تاني وهم بيفضلوا الامن على التقدم

انا ما اعرفش
انا مش زي فلاشاوي بافتي فيما يشعر به الناس

انا باقول يمكن

وانا مؤمنة ان الشعوب تعرف احسن من الافراد ومؤمنة ان القاعدة العامة للناس تعرف احسن من الاليت

مدام اتصرفوا التصرفات اللي هي بالنسبة لي مش مفهومة

وممكن كمان اقيمها على انها لا اخلاقية وهم قابلين ده وشايفينه صح ومبعث للفرحة كمان

يبقى هم صح وانا اللي غلط

لازم اراجع نفسي

اللي المجموع الناس يقرره هو الصح

ومدام مشروعه القومي كورة يبقى هو كده

ويبقى انا هابلة وباهبل لما اتكلم في حاجة تانية

وبما اني باكره الكورة وباقرف منها ومن الحالة المقززة اللي كانت قبل الماتش واللي لسة ح نشوف منها كتير فانا بقى ذوقي مش مناسب لذوق مجموع الناس اللي هو اكيد اصح مني

مش ممكن كل الناس غلط وانا اللي صح

ورجاء يعني للاخوة مع كامل احترامي ليهم

مافيش داعي للادعاء بانكوا بتفهموا في مكنون الناس وعارفين اسباب تصرفاتهم

ماحدش يعرف اسباب تصرفاتهم غيرهم

اللي نزل الشارع ورقص وهيص وهو جعان

واللي استلف فلوس عشان يحضر الماتش وهو مرتبه اقل من تمن التذكرة

هو عارف عمل كده ليه وهو لوحده اللي يقدر يقول ويقرر ولو ده الرأي العام المفروض الواحد يحترمه من غير فذلكة

والناس فعلا بقى بتحب مبارك

بجد

وبتتعاطف معاه وبتاخد صفه في حاجات كتير

اقربها حرب غزة

اهو كان مرتكب جريمة والرأي العام كان معاه

واي محاولة لادعاء ان ده بسبب تضليل الرأي العام فده مش صحيح

انا شايفة ان الناس نبيهة وبتفهم وده كمان شعب عجوز مش عيل عشان ينضحك عليه

لما يبقى ده رايه تبقى دي اختياراته وهو حر فيها ما ينفعش اعانده

ينفع اخد موقف مغاير وابقى اقلية، مسموح لي، وللا ايه؟ وللا ممنوع ده كمان؟

يعني اذا كان مسموح ان البلد يبقى فيها مسيحيين

مسموح ان البلد يبقى فيها ناس بتكره الكورة وبتقرف منها

بس الاقلية اللي زيي تحترم الاغلبية اللي زي الناس اللي نزلت وما تتكلمش نيابة عنهم ولا تفرض رأيها عليهم

ده كومن سنس يعني

amr220 said...

test

Al said...

كأن مياه النيل احتفظت بالفيضانات المائية والشعبية لنفسها، فلا تعرف إنْ كان المصري سيُلقي على مسامعك نكتة أو يصيح في وجهك!

لو أمسكت بوقا يصيب طبلة الأذن في مقتل فور قربه من حنجرتك، ووقفت في أعلى مكان ليسمعك ثمانون مليوناً من المصريين، وحذرتهم من أفعى تخرج من قصر العروبة وتبتلع أولادهم وأهلهم فأغلب الظن أن حنجرتك ستتهتك وتنفجر قبل أن تتحرك شعرة واحدة في الجهاز العصبي لأبناء بلدك!

Unknown said...

الو الو
اتنين اربعة ستة تمانية
هلل هلل

المهدى said...

يا نوارة طبعا الناس صح عايزين يفرحوا بس نفسهم يفرحوا بس نقطة ومن أول السطر
ليه بتمدى الخط لحد آخره ليه ؟خلتيهم بيحبوا مبارك وبيقفوا معاه؟ ليه ربطتى اللى شوفتيه النهاردة بغزة ؟ ما أنت ليكى ميت تفسير عن موقف المصريين من غزة كلهم أعقل من هذا التفسير
فيه شوفينية مصرية وفيه إحباط مصرى وفيه إحساس بالذات أحيانا مبالغ فيه وفيه قسوة وغباوة تقطم أصلب ظهر كل الحاجات دى أنت نفسك لمحتيها وأتكلمت كتير عنها وكل الحاجات دى لو حطتيها جنب بعضها ومن غير إحباط لازم تودى الناس لكل مظاهر الفرح وأكرر مظاهر الفرح و العته اللى أنت شوفتيها دى
بذمتك فيه حد منتصر وبجد ينكر أخوه فيه حد منتصر وفرحان بجد ينسى دم شهدا ويسئ لأبطال ده حد فرحان وألا حد مأزوم وفى ورطة
أخيرا بينى وبينك نفس السؤال تفتكرى الشعب الغلبان ده فرح كدة يوم العبور
وبينى وبينك الأيام
والله لو حسيتى بعد أسبوع من الأن أن الوصول إلى كأس العالم أعاد للمصرى كرامته وأنهى شكواه فلك الحق فى كل كلمة قلتيها
أما إن راحت السكرة وجائت الفكرة فيبقى لسة الدنيا بخير
محمد المهدى

Unknown said...

محمد مهدي

انا لسة شايفة تعليقك معلش

اصلي انضربت على دماغي من اللي ما وراهمش غير المزايدات على شخصي الضعيف وبيدعوا اني انا اللي بازايد

لا
سنة تلاتة وسبعين الاسرى الاسرائيليين لما جم استقبلناهم بالصفيق احتراما لبدلة المحارب اللي هم لابسينها

وللا الظاهر قرفة الاسرائيليين معانا حلوة بقى وللا ايه

يا عم اللي عايز يعمل حاجة يعملها

وانا متمسكة باعتذاري لمبارك وابنه

Unknown said...

المهدي

عشان انا مش معنية بالتفسير

خلاص بطلت احاول افسر وابرر واحلل

هو انا عارفة كل حاجة؟ انا مش عارفة حاجة خالص

انا ليا بالوقائع دلوقت

الوقائع بتقول ان الناس كانت متعاطفة مع موقف مبارك اثناء غزة

الوقائع بتقول ان الناس فعلا جعانة ومش مهتمة انها جعانة

مريضة ومش مهتمة تتعالج

اهتمت قوي بالماتش وصبت فيه كل مشاعر الانتماء

رفعوا يفط بيقولوا نعم لمبارك

وكل المؤشرات وتصرفاتهم بتقول انهم بيحبوه او على الاقل مش بيكرهوه

عشان هم بيعرفوا يعبروا عن الكراهية

عرفوا يشرشحوا للجزائريين ويعبروا عن كراهيتهم للجزائر كويس

عرفوا يحدفوا الجزائريين بالطوب ويرموا بلاهم عليهم ويقولوا لهم انتوا اللي ضربتوا نفسكوا

عرفوا يرعبوا فريق كامل ويخلوه يلعب زي المعوق من كتر ماهو خايف منهم

كل مشاعر الكراهية دي ما عبروش بنصها تجاه مبارك

يبقى مش بيكرهوه

انا لا عايزة تحليلات ولا فذلكات ابوس ايد بقى

كفاية

كفاية دين ام نخبوية خلاص انا جبت اخري

انا ح اجيب لك من الاخر يا مهدي

ايوة انا مصدومة
بس باحاول اتعامل مع الصدمة

انا مش عايزة تفسيرات ولا تبريرات انا عايزة نرتب الاحداث اللي حصلت على الارض ونواجهها بقى
once and for all

الوقائع واضحة مش قابلة للتفسير والتأويل

ده لا هو شعب غلبان ولا مغلوب على امره واظن انت شفت انه مش مغلوب على امره واظن انت شفت انه عمل ازمة دبلوماسية مرتين مع الجزائر

وبمنتهى الجبروت شهدوا شهادة زور وزوروا تقارير معاينة وعملوا كل الوساخات اللي ممكن تتعمل وفعلا اذا خاصم فجر

ليه؟ عشان هي دي طريقتهم لما بيكرهوا وهم بيكرهوا بجد من قلبهم

انا ماليش دعوة بالتبريرات بتاعة شحن اعلامي وخرا

ماحدش عرف يشحنهم بمنظر الاطفال اللي بتموت في غزة ليه؟

هم عقلهم في راسهم

واذكيا جدا وواعيين لا هبل ولا اغبيا ولا ضعفا ولا غلابة يا محمد

خلاص
انتهينا بقى انا مش ح اقعد اضحك على نفسي

amr220 said...

اولا : من حق بعض المصريين و انا اولهم انهم مايحبوش الكورة و مايحبوش الهبل و العته و التخلف اللي بيحصل في الشوارع بعد بعض الماتشات

مصر كسبت ايه؟ كسبت انها تروح تلعب في السودان مع نفس الفريق تاني؟ و بعد ما تغلب الجزائر؟ خاتاخد كاس العالم يعني؟

أيوه انا فرحان طبعا لبلدي و فرحان ان منتخب مصر كسب المباراة بس حاروح ادهن وشي احمر و ابيض و اسود و اقعد اصوت و اتنطط في الشوارع ؟؟

حاروح اقف قدام جمهور الجزائر و اقول احو احو قال ايه عايزين ياخدوه؟ و دا حصل

نوارة عندها حق
و انا لما سبت البلد دي من عشرين سنة كنت عارف الكلام اللي هي بتقوله النهاردة و ان مافيش فرد واحد و لا اتنين و لا الف حايقدر يغيروا حاجة في مصر

لما الناس كلها او اغلبها او الملايين اللي بتنطط في الشوارع بعد الماتش تحب انها تغير الواقع
ساعتها الواقع حايتغير

سلام كبير لبهيج
ليك وحشة يا راجل هههههه

المهدى said...

يا ستى سلامتك ماعاش اللى يزايد عليكى أنت
أكيد الناس صح بس والله مأزومة بتعبر عن أزمتها عن غلبها
وأدى أنت قولتيها بنفسك هوة ده بالظبط الجواب وهى دى الحقيقة المنتصر والفرحان واللى ليه أمل فى بكرة ممكن يروح بمنتهى القوة والعزة لغاية عدوه عشان يعرفه قد أيه هو قوى ومتحضر أما المأزوم والمهزوم فلا يرتكب إلا كل خبيث ودنئ
هو ده التفسير الموضوع لا فيه مبارك ولا فيه قرفة إسرائيل
محمد المهدى

فلاشاوي said...

مش عارف يا نوارة هو مين اللي مش بيفهم الكلام

أنا بدأت كلامي بالرد على الأخ اللي قال أنه هيستقيل من الإهتمام بالناس

وواضح جدا من كلامي إني بتكلم على كل من يملك نفس الفكرة وإن كنتي تملكين نفس الفكرة فكلامي موجه ليكي كمان من ضمنهم .. لكن مش لوحدك

وأنا مقولتش أني أنا فاهم الناس الغلابة لاني ما مرتش بنفس تجاربهم
لكن قولت إن معظم المدونين مش فاهمينهم لكن ما قولتش على نفسي إني فاهم

للأسف أنا كنت بتكلم بشكل عام وحضرتك اللي نزلتي بالحوار للمستوى الشخصي

وكلمات زي

تحليل بول

أنت مالك قفل كده ليه

أنا لم أقل مثلها
ولا يمكن مقارنتها بكلمات مثل
مدعي النضال
أو فاكر نفسه بطل

على فكرة يا نوارة
أنتي أما بتغضبي ما بتوزنيش كلامك


وكل كلامك ده كلام عاطفي
وبكره أو بعده هترجعي تكتبي زي الأول
لأني زي ما قولت
أنتي محتاجة التدوين أكتر ما الناس محتاجة تقرا اللي بتكتبيه

وعلى فكرة راجعي ردي الأول هتلاقيني قولت أني بحب إسلوبك وإن كنت بختلف معاكي

أنا لم أرفضك كلك ولن أفعل لما أختلفت معاكي

لكني إنتي رفضتيني كلي ووجهتي ليا إهانة بمجرد ما أختلفت معاكي

مش هزعجك بتعليقاتي على مدونتك تاني

في حفظ الله وأمنه

بهيج الشرير said...

عندك حق ياياأبلتي، الناس متكيفة من عوكل ملك الفياجرا وقاهر الهكسوس أخر تكيف، والراجل تعبان معانا عالآخر وعمال يبلبع في الفياجرا ليل نهار علشان تنمية الموارد البشرية، وخلانا في تلاتين سنة بس من ستين مليون لتمانين مليون

Al said...

سيدي حمال مبارك .. الآن يمكنك أن تعتلي عرش مصر ..!!؟؟

الآن يمكنك أن تطل علينا من شرفة قصر عابدين أو العروبة أو شرم الشيخ أو برج العرب، وتجمع بصقة كبيرة وتقذفها في وجوهنا جميعاً فنحن لم نحافظ على مصرنا منكم، وبررنا ارهابكم، وأعطيناكم الكرباج لتسلخوا أقفيتنا به، وفتحنا صفحات مطبوعاتنا لتلمعيكم، وقرأنا واستمعنا لعشرات الآلاف من الحكايات الموثقة والمعروفة للقاصي والداني عن عفن هذه الأسرة التي لم يكره مصر والمصريين منذ خمسة آلاف عام أحد مثلما فعلت أسرة مبارك، ومع ذلك فنحن ننام، ونستيقظ، ونأكل، ونشرب، ونربي أولادنا، ونشاهد مسرحيات ومسلسلات، ونكذب على الله، ويكره بعضنا بعضا في دينه أو مذهبه أو طائفته أو طبقته الاجتماعية أو خلافه الفكري، ولو أن كراهيتنا تلك توجهت للمجرم الحقيقي لما بقي والدك في الحكم أكثر من ولايتين ليدفنه التاريخ في هوامشه.

Unknown said...

انا عايزة اعرف انا اخدت ايه من الخرية اللي انا فاتحاها دي؟ ها

اخدت ايه؟ انا الكلام اللي ح اقوله تحت تأثير صدمة العدو الجزائري والجماهير الوطنية الغفيرة مش ح تسمعوه مني وانا في حالتي الطبيعية

انا دلوقت مش عارفة ح اعمل ايه اصلا؟ اعمل ايه؟ اعمل ايه ياربي؟ ومش عارفة مين العرص اللي دخل في دماغي اني لازم اخدم الناس؟ وكله طلع نصب في نصب

والناس دي لا عايزة خدمة ولا عايزة حاجة دي ناس قادرة وفاجرة واول مرة اعرف يعني ايه الواحد يبقى قادر وفاجر

وياضنايا يا قلب امهم عايزين يفرحوا

انا اشتغلت في العمل التنموي سنتين وانا باقول لكوا العمل التنموي ده نصب اصلي ولا اي حاجة
ولا بيخدم الفقرا ولا خرا

كل اللي بيعمله انه بيسكتهم شوية ويخليهم يستحملوا عيشتهم

اغلبية فقيرة مسروقة وانا تبقى شغلتي اني اشتغل لهم شحاتة اروح اشحت من اللي سارقينهم الفتافيت عشان افتح لهم مشغل وللا ورشة وللا اعالجهم واقعد انتع في قلبي في محو الامية وهم ح يعملوا ايه بالقراية والكتابة ها؟ حد يقول لي

او زي عبد المنعم كده، يبقى له حق في شقة المحافظة اقوم اروح اشحت من اهل الخير، اللي هم اصلا حرامية وبيتصدقوا على الناس بفلوسهم، عشان اجيب له شقة بديلة

يعني انا زي الرقاصة اللي بتصرف على البلطجي

كل اللي باعمله اني باحوش الفقرا عن الحكومة باني اقوم بدور الحكومة

Unknown said...

واخرة المتمة الواد يروح يتلم على واد تاني ويسرقوا شقة ويتخانقوا على السريقة وواحد فيهم يقتل التاني زي ما حصل ما حازم

عشان الحكاية ما كانتش شقة وشغلانة وخلاص ده له حق في الدولة وانا ما عرفتش اجيبه

مش بس ما عرفتش اجيبه ده انا رحت شحت عليه وربيت جواه نفسيه شحات بيشحت من حرامية ويوم ما يبقى عنده طموح يبقى نفسه يبقى زي الحرامية اللي هو بيشحت منهم ويفشل بخيبته في السرقة ويتقتل

يعني لقيت نفسي باضر الناس مش بانفعهم

رحت اتنيلت على عيني اتجوزت جوازة سودا عشان قال لي انا طفل شوارع وقال ايه قلت مدام عايزة اخدم الناس لازم اعيش عيشتهم

وطبعا اي عرص خول نجس يدخل هنا ويقول لي: اصل انا ما باصدقكيش

عشان هو واطي وخنزير اصلا ومش بيصدق ان مش كل الناس واطية زيه

بس ده كان السبب الوحيد لجوازي لاني اصلا ما كنتش ناوية اتجوز وقال نادرة نفسي لخدمة الناس

اللي طلعوا مافيش في افتراهم ولا جبروتهم اصلا
وسكنت في بدروم وبقيت يعدي عليا تلات ايام ماعنديش حتى عيش وجبنة في البيت قال ايه عشان ادوق الجوع اقوم اعرف ادافع عن الجعانين

انا عايزة اعرف الافكار الوسخة دي جات لي منين؟ منييييييييييين الافكار العرص دي جات لي؟

ده انا جات لي شغلانة مترجمة في الامم المتحدة ورفضتها عشان الشغل في الامم المتحدة حرام
مين اللي دخل في مخي الكلام الوسخ ده؟

Unknown said...

وبعدين قالوا المدونات بتفضح الحكومة وبتعمل رأي عام وممكن تغير
وانا اصلي كل اللي يشور عليا باسمع كلامه عشان انا اصلا دلدولة وغبية
وقال ايه، الناس تغير مصيرها بايدها بس الناس عايزة رأي عام، والنظام قوي بالمعونات ولو اتفضح المعونات ح تقل او يتسبب ده في حرج ده غير ان يبقى فيه وعي وشبكة اتصالات بين كل الناس اللي عايزة تغير وتتنيل تخدم دين ام ميتين ام البلد الوسخة دي

قلت وماله

هي جات على كده، افتح مدونة واتنطط في المحاكم والقرى والنجوع واتفرج على مناظر وسخة واستحمل كل عرص قاعد على طيزه يخش ينظر على ميتين امي عشان فاضي وفاكرني فاضية زيه ومش مصدق بروح اهله اني فعلا عايزة اعمل حاجة للمناظر اللي شفتها في العشوائيات والمؤسسات وضيعت شغلانات كتير في كريري عشان انا باخدم بقى، هابلة وفاكرة نفسي باخدم، واللي يدخل يتعولق واللي يدخل يسفسط واللي داخل يبربرش ويحب واشكال وسخة لما طلع ميتيني

واتبعبص في الاخر ويطلع البهوات عاملينها سبوبة وكل واحد شاف سكته واللي شبك مع معونة امريكاني واللي شبك مع الفريدم هاوس واللي راح اسرائيل والشريف اللي فيهم اخد لي تمويل من انجلترا وفوق ده كله اتشتم ويطلع دين امي انا بقى
وكل واحد قالع لي مالط وبيعايرني اني لابسة هدومي

وبعد ده كله
الناس الغلابة المكسورين المقهورين المفشوخين يطلع منهم كل الشر والتشرد والجبروت والقدرة والفجر اللي في الدنيا

هم لهم اختياراتهم وانا طلعت حمارة وغبية وبافرض عليهم اختياراتي على انها مصلحتهم

وعمالة اضحك على نفسي بقالي سنين

سنين
لا اللي كنت باديهم محو امية كانوا عايزين يتعلموا
ولا اللي كنت باخد بالي منهم عشان يبقى عندهم حرفة ويحسنوا من مستواهم كانوا شايفين اصلا اني باحسن من مستواهم كانوا فاكريني بافرض نفسي عليهم ويضحكوا عليا تديهم الدوا اللي مفروض ياخدوه يبيعوه ويشتروا بيه موبايل
ولا كان ليا اتدخل في حياة حازم ونجيب له شقة وندور له على شغل كان مفروض نسيبه هو يدور زي ما عبد المنعم طالع دينه كده وبيدور

اللي خلى حازم يحاول يسرق ويتقتل وعبد المنعم لا ان حازم جبنا له شقة ودلعناه والحاجة جات له بالساهل وعبد المنعم اتبهدل واتلطم
ولا كان لينا نتدخل في حياتهم ولا كانوا عايزينا نتدخل في حياتهم
ولا اللي رحت عشت معاه في البدروم كان عايز يعيش في البدروم ده كان عايزني انا اخده في حتة نضيفة ويعيش سفلقة على قفايا وانا عاملة لينا وعايشة في خرابة حبنا
ولا اللي جريت اصورهم كانوا عايزين يتصوروا
ولا النظام اتفضح ولا هامه
ولا المعونة اتأثرت
ولا هو قاعد بالمعونة اساسا هو قاعد بالناس دي
ولا ضغطت ولا فضحت ولا نيلت وما نابنيش غير شوية بلاوي اتحدفت عليا
الناس دي عايزاه
ولو مش عايزينه كانوا شالوه من زمان

ولاد الوسخة اللي عاملين لي غلابة مسكوا شعب بحاله خلوه ما يسواش تلاتة نكلة ورموا بلاهم عليه وقالوا انت السبب وعملوا ازمة دبلوماسية ما بينهم وبين فرنسا وازمة دبلوماسية ما بينهم وبين مصر والامن اللي بيمسكهم يعذبهم راحوا ظبطوا معاه عشان يرنوا الناس علقة ويرموا بلاهم عليهم زي النسوان اللبو ويقولوا لهم انتوا اللي ضربتوا نفسكوا، وكل ده بتظبيط مع الامن، دلوقت بقى صاحبهم الامن؟ مش ده اللي بيحط لهم العصايا؟ وخلوا العالم كله من اقصاه الى اقصاه بيتكلم عليهم وعلى فضايحهم

يعني اهو
اهو بيعرفوا يخلوا العالم يتكلم عليهم اهو
بيعرفوا يكسروا ويحرقوا ويضربوا ويفضحوا ويشرشحوا لما يخرسوا الدنيا كلها من لسانهم ويعملوا ازمات دبلوماسية اهو
بيعرفوا يقلبوا العالم ويخلوا رويترز ومعاريف والدنيا كلها باصة عليهم اهو
بيعرفوا ينزلوا الشارع بالملايين اهو
بيعرفوا يرعبوا بلد بحالها ويخلوا المنتخب بتاعهم يلعب زي الفار خايف يجيب جون احسن يتقتل اهو
اهم، بيعرفوا يعملوا كل حاجة لوحدهم
ومن غير ماحد يساعدهم
ولا يمحي اميتهم ولا يعمل لهم ورشة ولا يدور لهم على شقة ولا يمشي يسود وشه عند ده وعند ده عشان يلم لهم تبرعات ولا يتنطط لهم في المحاكم
ولا يحب على ايدهم عشان ما ينزلوش من البيت
احا، ده احنا كنا بنبوس ايدهم ما ينزلوش من البيت، عرفوا ينزلوا بالملايين اهو
وعرفوا يحولوا حتة ماتش لحرب ضروس قومت العالم كله على رجل والناس بقت تضرب كف على كف ويعملوا لهم برامج في التلفزيون عشان يقولوا المصريين مالهم؟
لما بيعوزوا يوصلوا صوتهم وصورتهم للعالم بيعرفوا يعملوا كده لوحدهم بفقرهم وانيميتهم ومرضهم وغلبهم ده كله
ولما بيعوزوا يعملوا حاجة بيعملوها باصرار وارادة والحاح واستقتال
يعني اللي ما اتعملش ما اتعملش عشان هم مش عايزين يعملوه مش عشان مش قادرين يعملوه
هم قادرين على كل حاجة

امال انا بهدلت ميتين ام نفسي ده كله ليه؟
ليه؟
عشان غبية
غبية

سيبوني بقى

فلاشاوي said...

يا نوارة
بالله عليكي تقفلي الجهاز بتاعك وتروحي تنامي دلوقت

أنتي منفعلة جدا

هتشوفوا said...

والنبي ما تزعلي نفسك, معلهش سيبي الناس تفرح شوية وتنسى همومها, والله كلنا عايزين ننسى, ومعلهش برضه ماتعديش اللعيبة دول ناس زينا, والفلوس اللي هايخدوها دي حقهم, هما اللي جايبنها والمنتخب بيصرف على نفسه وكلها في الآخر أرزاق, والنظام مابيدخلش في اختيار اللعيبة اللي بتلعب وتاخد الفلوس دي, أنا عارف انهم بيحسنوا صورة النظام, بس معلهش والله كان كل ما تيجي صورة جمال وخصوصا بعد الماتش كنت باشتمه, والله ما بنحب حد في النظام طب انا فرحتي بعد الماتش كانت زايدة واتصلت بأبويا التعبان وقلتله أنا فرحان يا بابا علشان انت فرحان, لأني عارف أنه بيحب الكورة والله وهو سليم بصحته كان بيتعب لما نتغلب في ماتش, هو معلهش مالوش قوي في السياسةبس هو اللي علمني كل حاجة ولما قلت لماما مبروك, قالتلي مبروك على ايه, لما تبقى تخطب نبقى نبارك لك ودايما بتقول لبابا , هو كل ما يتكلم تضيع المكالمة في الكورة,ده بدل ماتسأله عامل ايه في شغله والله كلنا بنحب حسن نصرالله زيك بالظبط ومعلق صورته في أودتي, ولما حد يقولي ده شيعي والكلام الفاضي ده, أقوله ده بطل, والنبي ما تزعلي نفسك,هي ساعات الناس الطيبة بتنسى اللي عمله مبارك فينا لما بتفرح بس أنا مابنساش حتى وأنا فرحان, خلاص يا نوراة ما تزعليش ربنا يخليكي

مش فاهمه said...

صعبه جدا الفاظك يا نوارة يا عزيزتى انتى بتعملى اللى عليكى و ليس عليكى ادراك النجاح
" فأما الزبد فيذهب جفاء وأما ما ينفع الناس فيمكث في الأرض"
احنا مسلمين و موحدين و عارفين ان الحساب بيجمع فى الأخر و اننا لما نعمل خير دلوقتى مش لازم نحصده دلوقتى احنا بنعمل الى علينا و بس
غلطانه علشان ضيعتى فرص كتير من وجهة نظرى اه غلطانه احنا مش رهبان علشان نعيش علشان خاطر غيرنا و نفسنا لأ احنا نعمل لنفسنا و اللى ربنا يقدرنا عليه لغيرنا و الحساب و الجزاء عند ربنا
راجعى نفسك يا نوارة و ارجوكى الغى من المدونه كل الكلام الخارج ده صدقينى انتى بتكتبى لله و للتاريخ فبلاش تكون فيه نقط سودا فى الكلام ده
و ياريت تاخدى كلامى بدون حساسية

doudou said...

طيب أنا أعمل ايه في نفسي
حبيت اساعد أطفال معاقين طردوني
حبيت أساعد أطفال شوارع في لأحداث طردوني
عملت للغلابه على الجبل ملعب كورة خدوه مني واحد من صغار أعضاءالحزبالوطني
جيت أقول ساعدوني أجيب مكان أعلم فيه العيال محدش عبرني
أجرت كام محل وقلت ساعدوني في التوضيبات فلوس توصيلات مياه و بياض و محارة و تبليط محدش عبرني أعمل ايه؟حد يقول اعمل ايه؟أنا مليش في السياسة بس مش عارفه أعمل حاجه صح
ومشكلتي مش مع الحكومة أنا باتجنبها والله المشكلة مع الناس اللي بيهيصوا للكورة والمدعين والزيف اللي طغى

الخوجة said...

معذرة لجميع الاخوة دى اسمها يانوارة نوبة صحيان متأخرة

أنا معاكى فى كل كلمة فى تعليقك الأخير وأى حد يلوم نوارة يأتى لها بالعكس

اللى استفاد

الكل استفاد من نوارة

وبمعنى دقيق
دوار نوارة

زى دوار العمدة

احسنتى وشوفى شمسك بتطلع منين اكبر منك سنا

ولايغرك

اى كلام

------------

اخيرا فقتى

الكل اتنجم على حسابك

بس صعب كلامك اوى

مين الان بيهتم بنوارة الانسانة

دى انسانة


كلامك صعب يانوارة


الصدق عملة نادرة

ان لم تنتهى

=============

وبعدين نسيبك ازاى دا نتى نوارتنا كلنا
============

ايوة هو دة الكلام

انتى ليكى كل حاجة حلوة المكانة الاجتماعية

وكل اللى انتى عاوزاة

هو دة الصح الأن

ريحى شوية من حرقة دمك


وان شاء الله

أمرك الى خير


فرجة قريب


محدش يقدر يلومك ولا يقول كلمة واحدة

Anonymous said...

هاهاها..
قلت البوقين دول قبل كدة :)))

بتفكريني بواحدة قالت لي مرة، انتا قالب لنا دماغنا فلسطين فلسطين، وعمرك ما اتكلمت على مصر واللي بيحصل فيها إلا لما ارتبط الموضوع بفلسطين..

بغض النظر عن انه الكلام ده مش حقيقي بالنسبة لي، لكن قلت لها الفلسطينيين يستاهلوا لأنهم عايزين يساعدوا نفسهم..

انما لما بتكلم لمصلحة بلدي أول ناس بتزعل هم المصريين..خلاص أنا أزعلنا ليه؟ :))

we can said...

طيب وحضرتك فاكرة ان كلامك هيغير البلد تسكتى تتكلمى هتفرق يعنى ؟
ممكن اسألك سؤال يمكن تعرفى منه الشعب فرحان ومتجمع كدا لية ؟

حضرتك ممكن تنزلى تغيرى بنفسك وتبتدى والباقى يكمل وراكى بس حضرتك مبتعمليش كدا لية مش بتقولى انا بكرة اسرائيل انا معادية ليها بطرق مختلفة سواء على بيتك عربيتك لية متعمليش مظاهرة ما هى حرية شخصية
طيب لية منزلتيش الشارع وعاملتى جروب ولمتو الزبالة ما هى بلدكم مش لازم نستنى الحكومة اللى تلم الزبالة يعنى مادام كل هدفنا اننا نفيد بلدنا

يمكن عشان مش مسموح فى بلدنا
او ساعتها هتروحى وراء الشمس بالثلث زى ما بيقولوا
فى نفس الوقت ينفع تنزلى تفرحى بماتش كورة والكل بفرح بيكى وتتشالى فوق الكتاف لو قولتى هتاف حلو

الشعب بينفس عن كبتة فى حاجة مسموحة وحاليا مفيش غير الكورة مش هم راضين ولا هم متوحدين هم مكبوتين وبيطلعوا كبتهم فى حاجة متاحة معليهاش عقاب ودا لاننا شعب جبان مش بنتجمع ولما حاولنا نتلم فى حاجة مش مسموحة او مسموحة نظريا بس اهانونا واهنا احنا كمان نفسنا و فشلنا

حبى حسن نصر الله اتكلمى عن الغلابة
تضامنى مع الحكومة او عاديها مش هتفرق كتير كله كلام وعرض اراء لكن كأفادة للغلابة لا يا افندم ولا انتى ولا انا ولا اى حد هيقدر يفيد بالكلام والتعاطف معاهم
والشتم والاهانة للى خلوهم غلابة واهانو اداميتهم
بالعكس دا احنا ممكن نتحول زيهم من كتر الاعتراض ونندمج فى السب وننسى حبنا للتغير واننا نكون افضل

ملحوظة : لا انا تبع الحكومة ولا بقول الشعب مظلوم ولا ظالم انا حد مؤمن ان كل علية لوم والكل مش بيقوم بواجبة كويس حتى انا شخصيا مهما عملت مش بقدر اعمل حاجة تسمى شئ فعلى يفيد بلدى بس على الاقل فاهم انه مش بالكلام والسب والاعتراض والتعاطف ودا اللى بحاول اوصله وانفذه

وملحوظة تانية كنصيحة وهى هدفى الاساسى من التعليق عايزة تفيدى الغلابة اعمليلهم حاجة بجد حاجة غير الكلام

شكرا جزيلا

Empress appy said...

سالت نفسى السؤال ده انا حارقه دمى على ايه
بس انا حارقه دمى علشان م شعارفه اعيش كويس اه انا شايله هم الاس عاوزه كمان اعيش فى جو نضيف الناس فى عشوائيات كتير مش بيهمها تبقى كويسه ولا ليها تطلعات هما عاوزين فلوس على الجاهز انا بحبارب فى ده انهم يبقى ليهم هدف مش علشانهم بس علشانى انا كمان من حقى مخافش على ولادى لما يجوا ان شاء الله من الاغتصاب من حقى كل ده يا نواره حرقه دمى علشان ناس كتير معندهاش دم

Anonymous said...

آه..

أنا دلوقتي بس قريت آخر 3 تعليقات كتبتيهم!!

انتي عملتي في روحك كدة؟!!

نوارة انتي عايزة اعادة تأهيل شامل، مفهومك أصلا عن خدمة الناس غلط!!

انا موافقك على فكرتك في نقط..بس بجد اللي انتي عملتيه في نفسك ده مسموش خدمة ناس!!..ده اسمه مرمطة ومرمغة وحاجات تانية..

أنا عارف اني يمكن مليش أقول لك الكلام ده..

بس معلش، أهو خدي شوية صراحة يمكن يضايقوكي ويزعلوكي لكن يمكن برضو تلاقي فيهم حاجة تنفع..

قضية الاخوان بتاعت الشاطر اللي اتحبس فيها، أفتكر وقتها كنت انا قلت اقتراحات وأفكار خاصة بيا، وقلت انه رجال أعمال الاخوان لازم يطلعوا بفلوسهم من البلد، وقلت لازم النشاط (الخيري) الخاص بالاخوان يتوقف أو يتحدد..وقلت انه ده لازم يكون توجه لكل رأس مال وطني شريف وكل جمعية خيرية موجودة مش بس الاخوان..

طبعا في شوية بشر اتنططوا وقالوا الاخوان هيمنّوا علينا بفلوسهم وانتا فاكر الاخوان لوحدهم هم اللي بيعملوا خير وهي مصر هتغرق منغيرهم وكلام فارغ من ده..
وقتها انتي قلتي: مش هينفع كل واحد فينا يشيل على ظهره واحد تاني..وانه والنظام بتاع الجمعيات الخيرية ده مش نافع..

وقتها قلت انه حد فهمني!!

بس اللي انتي بتحكيه ده مش حد شال على كتفه واحد ولا اتنين ولا شعب بحاله على كتفه!!

ده -لمؤاخذة- حد عمل خده مداس للبشرية كلها!!

بجد غلطتي في حق نفسك!!..ازاي كنتي هتخدمي الناس وانتي بتعملي كل ده في نفسك؟!

نوارة: بجد التفتي لحياتك..يمكن في وضع تاني كنت أقول لك اعملي حاجة للناس..
لكن عمري ما كنت هقول لك جوعي بمزاجك!!
وهاتي واحد من الشارع حكميه في نفسك!!

لا بجد..كفاية عليكي في الجاي تكسبي لقمتك بالحلال..لو ده مفهومك في خدمة الناس يبقى انسيهم!!

الناس مبتتخدمش كدة!!..الأب عمره ما بيعمل لعياله كل حاجة وأي حاجة هم عايزينها حتى لو يقدر..لأنه مش مصلحة عياله انه يديهم كل حاجة منغير حساب!!

والناس مش مصلحتها برضو انها تلاقي اللي يديها كل حاجة وأي حاجة منغير ما يبقى في تمن تدفعه!!

لو عايزين يحسّنوا وضعهم ماشي، إيه المطلوب مني؟..لكن ميقولوش عايزينني أنا أحسن وضعهم!!

dr.lecter said...

بصي المصريين مابيفرحوش غير بحاجتين

ماتشات الكوره وعلاوه يوليو

الكوره فعلا بتوحد صفوف الشعب كله

اه جيمي كان موجود وكان فاقعني هو وزكريا عزمي وشله الحزب كلها

اه كان فيه تجاوزات وقله ادب وكان فيها افوره في الفرحه

بس علي الاقل المصرين ليوم واحد طلعوا من الاكتئاب اللي هم فيه ينسيهم همومهم كلها واحباطاتهم

اهم حاجه بس يوم الاربعاء مانتغمش

وعلي فكره من مصلحه الحكومه اننا نفوز

الناس بجد بتدور علي اي حاجه تبسطها

محمد فوزي said...

نواره لما قريت الموضوع نفسه ولأنه مكتوب بطريقه ساخره كنت هدخل أعلق تعليق كوميدي على طريقة أخيرا فهمت يا وديع , بس بجد لما قريت التعليقات لقيتك منفعله قوي وحزينه قوي فهتكلم بجد شويه وهحاول مبقاش من المنظرين السفسطائيين عشان على الأقل ميطولنيش وابل الشتائم اللي صابهم

بكل واقعيه يا نواره هي دي الحقيقه
الناس (مش الإيليت لأ الناس الغلابه العاديه خالص دول) على أقل تقدير مش بيكرهوا مبارك
والشتيمه والنكت والكلام اللي بيتقال ده كله مجرد كلام لا يعبر عن حاله ممكن تحرك للتغيير
أسباب كتير بقى بتعمل كده موروثات على أفكار دينيه مفهومه صح أو غلط على وعلى وعلى وانتي اكيد ادرى مني بيها

بس انتي مش محتاجه تعتذري يا نواره ولا محتاجه تكرهي الناس اللي دافعتي عنهم ( وانا متأكد طبعا ) إنك مكرهتيهومش ومش هتكريههم , كل المطلوب منك بس إنك ترتبي أفكارك وتبصي للأمور بنظره تانيه

هتلاقي إن كتير منا ماسك المشكله من فوق وبيعالج في ورق الشجر مش في الجذور , اللي محتاج علاج واللي محتاج إصلاح واللي محتاج نقد وتوجيه وإعادة نظر هو المواطن المصري مش أي حد تاني
وأكتر وقبل قيادته وحكومته كمان
لأنه في النهايه القيادات والحكومات هي إفراز للشعب نفسه
وزي ما انتي قولتي اللي عاوز حاجه بيعملها

مطلوب مننا كلنا لو عاوزين نخدم مجتمعنا والناس إننا نركز عليهم ونحاول نغير أخطائهم اللي هي بطبيعة الحال أخطائنا احنا كمان لأننا منهم

ممكن ننفعل مع القضايا القوميه ولازم ننفعل , ممكن ننفعل من حالات الفساد ومنبقاش بشر لو معملناش كده , إنما ميكونش تركيزنا كله الريس والحكومه والحزب الوطني وكأن الناس نفسها بخير وزي الفل وناقصهم بس حكومه وقياده رشيده

هي دي أفكاري وقناعاتي من ساعة ما بدأت أدون واللي خلت كتير مقتنعين إني حزب وطني بس ممكن أكون إصلاحي وطني وانا الحقيقه لا حزب وطني ولا بتاع كل الحكايه اني شايف الأزمه في حته تانيه

Fatma said...

اه بيعرفوا بس بيخافوا ومافيش حاجة قدرت تلمهم على هدف واحد قد الكورة ومافيش اي حملات كانت قوية وايجابية وبتضرب على وتر المشاعر قد حملات الكورة
اللي عايز يلم الناس على هدف مفيد لازم يبقى محدد ومنظم ويستخدم الاساليب الصح مايبقاش عشوائي
وبيستخدم اساليب غلط ولازم يوصل صوته للناس اللي مهتم بامرهم مش بيكلم نفسه واللي زيه ويسيب الناس المعنيين بالامر عايشين في مية البطيخ . اكيد رحتي عشوائيات وشفتي الناس هما كتير اوي بيرفضوا ان حد يساعدهم هما عايزين حد يديهم فلوس واكل وشرب وهدوم ويسيبهم ويمشي انما تنميةو الكلام دا مالهمش فيه ومش عايزينه لانهم اساسا مش فاهمينه
لازم توعية ولازم تنمية ولازم شغل كتير على شخصية الانسان المصري لازم توعيه قبل ما تطلبي منه يثور ويتحرك عشان لو ثار وهو كدا هيبقى خراب مستعجل عليه هو اول واحد
فاكرة يا نوراة ايام انتخابات ايران انت كنت عايزة نجاد عشان نصير البسطاء والفقراء واختيار الاغلبية وقلتلك وقتها انا خايفة على بلدنا بجد لان الاغلبية عندنا هتنتخب مبارك وابنه
كل كلامك في البوست بيؤكد المعلومة دي حتى اللي متضايقين منه عايزينه اللي مش عايزينه هما المدونيين واللي على تويتر ودول قلة مندسة فعلا لا يمثلوا صوت الاغلبية ابدا
:)

عموما في الاخر انا مازلت مندهشة انك مستغربة ومتضايقة للدرجة دي احنا طول عمرنا كدا في الكورة ومش احنا بس دا العالم كله من اغنى الدول لافقرها يعني شيئ معروف جدا ومتكرر
انت يظهر اول مرة تركزي ولا ايه ؟؟
واهي يومين فرحة وهتاخد وقتها وتروح لحالها ونرجع تاني زي ماحنا وكأنك يا ابوزيد ماغزيت ونستنى تصفيات كاس العالم الجاية عشان يتكرر المشهد
يعني اللي حصل امبارح ماهواش حدث عظيم ولا هيغير حاجة في حياة الناس لا سلبا ولا ايجابا شوية مشاعر فرحة كان نفسهم يحسوها ولقت منفذ وطلعت وخلاص

وبعدين انا مبسوطة ان العرب فرحانين لنا كدا
مصر لو اتأهلت ان شاء الله يا نوراة هتبقى الدولة العربية الوحيدة اللي بتلعب في كاس العالم
والعرب كلهم حتى الجزايريين اللي احنا مقطعين بعض دلوقتي هيشجعونا من مبدأ انا واخويا على ابن عمي
اللي بتعمله الكورة مش سهل حاجة تانية تعمله

م/ الحسيني لزومي said...

الاخت نواره انا عايز تفسير( في بوست طبعا) لما يحدث من الشعب المصري بعد الفوز في ما تشات الكوره...انا كان عندي 18 سنه ايام حرب اكتوبر والنصر العظيم انا لم اري الجماهير تخرج الي الشوارع بهذه الهستريا من الفرح.
انا عجزت ان اجد تفسير..... شعب محبط البطاله والفقر تنخران فيه حتي النخاع.. الفساد والرشوه حشت وسطه... الجبايه شغاله فيه ليل نهار وهو مفلس ...الخ .ومع ذلك لا يحرك له كل هذا ساكن

mido said...

كله بثوابه يا نوارة

Unknown said...

انا اسفة يا شباب على الانفعال بتاع امبارح

بس انتوا ليه مش مصدقين ان الناس بتحب مبارك؟

احنا كنا فاكرين نفسنا مين عشان نفتكر اننا بنفهم يعني؟ عشان بنعرف نقعد على الكمبيوتر وبنعرف لغات؟

طظظظظظظظظظظظظظظ فينااااا

الناس بتفهم احسن مننا
الناس العادية الغالبية يعني اللي خمسة وخمسين في المية منهم تحت خط الفقر

بيفهموا احسن مننا
وهم صح واحنا غلط ووالله لما شفتهم امبارح انبهرت بيهم

انا ما اتضاقتش منهم انا اتضايقت من نفسي عشان ضيعت وقتي

زي البت غادة اللي داخلة لي تفكرني بانها اطردت

اهي
هي دي يارب
هي دي يارب
امسكوها وارجموها اللي داخلة بتعليق
doudou

اقتلوها، هي دي اللي جرت رجلي للعشوائيات والمؤسسات والمشي البطال ونكدت عليا حياتي وحشرت مناخيرها وحشرتني معاها في اللي مالناش فيه

وبتاخد سبعة وخمسين قفا على سهوة وتفتح مشغل يتقفل لها وتفتح مدرسة تنطرد منها وتروح لابو العيش عشان تشغل العيال في مزرعته يطردها وكل اللي يشوف وشها يطردها وبقالها عشر سنين كل يوم تيجي تقول لي: انا اول مرة اتهان، اقول لها انت ذاكرتك زي القطط؟ انت يا بنتي مش امبارح قايلة لي كده؟ واصلا اللي هي عمالة تنطرد عشانهم بيستأفوها وتجري وراهم عشان تشغلهم في الورش ما يعبروهاش وطبعا طلعوا كلهم في الماتش امبارح

منك لله يا شيخة

الكلام على ان الناس وحشة غلط
والكلام برضه على ان الناس مش فاهمة او مش قادرة غلط

لا هم وحشين ولا هم غلابة ومش عارفين ومش قادرين

هم لهم اختيارات ولهم وجهة نظر

اكيد احنا اللي غلط


الاستاذ حسين لزومي حضر احتفالات الناس بنصر تلاتة وسبعين وقال الناس ما كانتش كده

وانا اللي اعرفه ان الناس استقبلت الاسرى الاسرائيليين في محطة مصر بالتصفيق احتراما لبدلة المحارب

تحضر يعني فوق الوصف، ولا السويد يبقوا بالتحضر والادب ده

وزي ما احمد نصر قال، انا اللي فاهمة غلط مش الناس هي اللي غلط

ده اكيد
اكيد

انا ما قلتش الكلام بتاع امبارح عشان امن على حد ولا ازايد على حد

انا واحدة فاشلة اصلا ح امن بايه

انا بس كنت باقول اني ضيعت وقتي
وكنت باشرح انا ازاي وصلت للمدونة

انا مش مضطرة اكتب في مدونة اقدر اكتب كتب اكتب في جرايد واخد فلوس

مش باسلي نفسي يعني كان عندي تصور واكتشفت اني غلطانة جدا في التصور ده

وفاشلة
وغبية
ومتكبرة كمان عشان افتكر نفسي اني اقدر اساعد حد

اساعد نفسي

Unknown said...

محمد فوزي

صح
انت كل كلامك صح

وانا والله مش باكره الناس
امبارح بس وانا في الشارع حسيت اني باكرههم بس لما فكرت لقيت ان لو حد يتكره يبقى انا

بالعكس الناس دي مبهرة جدا

بقالهم شهرين عندهم اصرار وعزيمة وتخطيط واستقتال في حاجة

عشان تبقى عارفة انا الحتت اللي شفتها من الماتش

المنتخب المصري كان فاشل قوي ومرتبك وعصبي

اللي عمل ماتش امبارح وجاب النتيجة دي هو الجمهور فعلا

الاستقتال بتاعهم اللي ظهر في شكل شرشحة وتصييح وارهاب ورمي بلا

ماشي الحاجات دي شكلها كلها اخلاق واطية صح

بس الاخلاق نسبية

هم عندهم هدف معين وعايزينه ومافيش اي حاجة تمنعهم عنه

لا اخلاق منعتهم، ولا علاقات دبلوماسية منعتهم، ولا شرطة منعتهم

حتى الشرطة اللي بيكرهوها حطوها في جيبهم
عشان يعملوا اللي هم عايزينه

يعني مش زي ما بتقول

فنون

طول عمرنا بنحب الكورة

هي مش حكاية حب كورة حكاية انهم حطوا خطة ما تخرش المية

دي
الناس دي اللي معظمهم ما بيفكش الخط

حطوا خطة جماعية للعب باعصاب الفريق المنافس وارهابه بحيث انه يلعب بالطريقة المزرية دي

وخطة للضغط على المنتخب بحيث يحس انه لو ما جابش النتيجة المرجوة تبقى نهاية العالم

كل ده تخطيط جماهير الكورة اللي هي عشرات الملايين

هم اللي عملوا كده

بالذمة مش حاجة مبهرة؟

مش عاجبنا الهدف؟ او مش عاجبني انا؟ ومش عارفة ليه المجهود الحربي ده كله ما تسخرش لحاجة انا شايفاها مفيدة؟

انا مين انا عشان احدد للناس ايه مفيد وايه مضر؟

انا حمارة اصلا

انا حتة بتاعة متربية في مدرسة ارسالية ولما حبيت اعيش زيهم بقيت نكتة زي لينا بتاعة المتزوجون

ايش فهمني انا في المهم واللي مش مهم؟

وزي ما انت قلت بالظبط
النكت والتريقة والشكوى من مبارك دي كلها زي الست اللي بتشتكي من جوزها
بس ابو عيالها ومش عايزة تطلق

اتدخل انا ليه وارفع لها قضية خلع هي كانت طلبت مني كده؟

ولو كانت عايزة تطلق كانت جات معايا المحكمة عشان تتابع القضية

بتعرف تمشي على رجليها وبتعرف تروح كل حتة لو عايزة كانت هي رفعت قضية خلع لوحدها مش ح تستناني

ما اخدتش غير اني ابقى انا خرابة البيوت


ما يمكن يا فنون عايزين استقرار اهم من اي حاجة تانية

اكيد لهم حكمة

زي ما الستات مش بيرضوا يطلقوا عشان مش عايزة خراب بيوت

الناس مش بتطلق عشان مش عايزة خراب بيوت

هم صح

ولا انا ولا انت ولا غادة ولا اي حد من اللي هنا يقدر يقرر للناس

الناس بتفهم وده شعب عجووووووز عجوز

لا من حقنا نقيمه ولا من حقنا نقول له يعمل ايه وما يعملش ايه

ده يودينا البحر ويرجعنا عطشانين يا اختي

ولو قعدتي تصوتي وتلطمي وترقعي بالصوت من هنا للصبح في حاجة هو مش عايزها مش ح يعملها

ولما بيعوز حاجة بيعملها لا بيحوشه خوف ولا بيمنعه فقر

دول جبابرة يا شيخة

Unknown said...

هتشوفوا

صح
اللي يفرح واللي يزعل ده يرجع لصاحب الشأن
وكنت غلطانة جدا لما بازعل نفسي على غيري وغيري اصلا مش زعلان وعنده اللي يفرحه


وانا لسة متمسكة برأيي في ان الشعوب لها حكمة والشعوب مش بتغلط


مش فاهمة

هههههههههههه
ولا تاريخ ولا جغرافيا

انا عبيطة
والله

والالفاظ دي الفاظ مصرية صميمة

لا يكف عن ترديدها بطل الامة شوبير حبيب الملايين

شوبير باشارة من صباعه امبارح على التلفزيون قال: اي شغب احنا الخسرانين

قام كل اللي في الاستاد وصلهم الكلام وسمعوا كلامه

تصدقي؟

الغجر اللي مسكوا فريق رنوه علقة في الشارع وفتحوا لتلاتة دماغهم بكلمة من شوبير اتأدبوا وكملوا الماتش من غير اي مشاكل

قال وانا كنت باكره شوبير عشانهم، عشان حرامي وصاحب جمال مبارك وكلب سلطة

ده طلع زعيم امة وهم بيفهموا في الناس اكتر مني

ومش بيقيموا الناس زي ما انا باقيمهم

انا محتاجة اراجع نفسي عشان اعرف الصح من الغلط

الناس دايما صح
مافيش شعب غلطان


الخوجة
انشالله يجبر بخاطرك
انا باقول اسافر في حتة وللا اقعد شوية افكر يمكن اطلع بحاجة صح مرة في حياتي

احمد نصر

:)

انت عارف انا دايما ابصم على كلامك بالعشرة

doudou

ده انا ح اخرب بيتك



we can

انا كنت فاكرة ان افضل الجهاد كلمة حق عند سلطان جائر

الحديث صح بس انا الظاهر كنت فاهمة كلمة الحق دي غلط

حسين لزومي

عشان تلاتة وسبعين كانت حرب
والفين وتسعة ماتش
وهم بيعرفوا يتصرفوا باللي يليق بكل حدث

صدقني هم هم الناس وصدقني هم صح
لا هم همج ولا هم جهلة

هم فاهمين بيعملوا ايه

ولما حبوا يبقوا منظمين ومؤدبين في اثناء الماتش والماتش يمشي بسلاسة

عملوا كده

والله العظيم انا منبهرة بالناس المعجزة دي بيعرفوا في كل موقع يتصرفوا ازاي

احنا اللي مخنا على قدنا يا استاذ حسين

الظاهر التعليم بيخرب المخ
والله العظيم

فعلا التعليم المصري بايظ
الحمد لله ان الامية اغلبية

فنون ومحمد فوزي

انا رديت عليكوا صح؟

صبرني يارب said...

نواره

ما تحاسبيش ناس مش فاهمه وناس مش عارفه وناس مسلوبين الاراده

ناس بيتصلبوا يفرحوا

انا لا باحب الكوره ولا ليا فيها

بس عذرت الناس

عشان هما غلابه
وعشان دماغهم ما فيهاش حاجه غير هم اللقمه
وعشان متنومين مغناطيسي وماشين ورا الاعلام الهاتف بتاعنا
الهاتف وراء كل اهبل فى الكون

وعشان احنا بجد غلابه

ومش من حقك تعتبري مساعدتك للناس انك بتتجبي عليهم وخساره فيهم عشان فرحوا بحاجه من وجهة نظرك هايفه

احنا بنفكر يا نواره
ودي مشكلتنا وده الفرق بينا وبين الناس الي ما عندهمش امكانيه تعمل كده

عشان كده احنا تعبانين ومنكدين على نفسنا
حاولي وجربي انك تعملي مش واخده بالك
ومش هاتعرفي
ده قدرنا

تحياتي ليكى

Kontiki said...

ازيك يا نوارة
انا اسيبك 24 ساعه ارجع الايكى كدة :)
من وجهة نظرى السوداوية الكئيبة دى حيلة نفسية اسمها التنفيس شعب مكبوت ومش قادرين نتكلم او نعبر او نحتج على اى حاجة جد اخرنا بلوج واللى بيزودها بيتجرجر عايشين بحكمة فرعونية اننا لا نقدر على تغيير الواقع مش من قيمنا الكفاح من اجل التغيير وليس فى الامكان ابدع مما كان مش بنحب المسئولية
انا كنت زيك امبارح ماشية مذهولة من الشحن الاعلامى وحشد الجماهير عشان ماتش كورة يعنى الناس دى ممكن تتحرك الناس دى موجودة مش ميتة بس بتفضل تتوجة وتمشى جنب الحيط
وخدى بالك ان الالمان الشعب اللى وقع سور برلين عندهم اقوى منتخب كورة الجدية عند الشعب دة فى الامور الجادة وفى اللعب كمان طالما حيلعب باسم بلدة انما هنا الاية مقلوبة الامور الجادة مفيش روح او طاقة او مدافع عنها او محاولة تغيير لها وامور اللعب بيشغلونا بيها كانها نهاية العام !!!
والشعب عندة طاقة وقرفان وطقهان وبالتالى بستغلها فى المجال المسموح واللى وتم توجيهه له وتمت مباركة مشاركتة
انما اى مجال او كلام تانى
انتى فاهمة بقى :) :D

مش فاهمه said...

أهو أنا دلوقتى فهمت لو
doudou
دى طلعت صاحبتى الأنتيخ يبقى معاكى حق تعملى فيها اللى يلد عليكى و علشان نتأكد اكتر قولى لها كلمة السر ......ايرلندا ......لو طلعت تعرفها تبقى هى البت
doudou بنت الأيه
لأ بجد ابعدى شويه و قيمى الموضوع و ربنا حاينور لك طريقك بس كمان المصريين مش بالحكمه ى كلها لو تفتكرى جمال حمدان قال عليهم ايه جايز تعرفى تتعاملى معاهم

Unknown said...

انا معترضة على ان الناس مش فاهمة ومش واعية والكلام ده

معلش يعني
انا مين وحضراتكوا مين عشان نقييم الناس ونقول عليهم ما بيفهموش ومغيبين؟

ما يمكن احنا اللي مش بنفهم
ما يمكن احنا اللي منفصلين عن الواقع
ما يمكن احنا اللي مغرورين والتعليم بوظ مخنا وحط فيها بلوكات وخلانا متجمدين؟

ومعترضة على ان الناس اتشحنت بالاعلام

ده كلام جمهور الكورة نفسه اللي كسر وضرب وشرشح

وده اسمه كهن فلاحين

يعملوا العملة ويلزقوها في غيرهم

ماهم شافوا اطفال في غزة بتتحرق على مدى تلات اسابيع وما اتشحنوش ولا حاجة

هم بيتشحنوا باللي بييجي على هواهم

واللي هم عايزينه هو اللي يكون هم احرار وواعين وفاهمين ومش مغيبين

اذا الشعب يوما اراد الماتش فلابد ان يستجيب الحكم

Sam said...

نوارة...انتى عندك حق فى اللى بتقوليه...

و فى النهاية ربنا بيدى الشعب حاكم يستاهله...يعنى لو احنا نستاهل حد محترم كان ربنا ادانا واحد محترم...لكن طبعا عشان احنا متنيلين بنيلة فربنا ادانا مبارك و خايفين كمان من اللى ممكن يبقى اسوء من مبارك...

ليكى حد تضايقى و تتنرفزى لان حرب الجزاير و مصر كانت حاجة تفقع...

و ليكى حق تاخدى الموقف ده و فى رأيى ده الموقف الصح اصلا و الموضوع مش سلبية بس مينفعش حد يدافع عن ناس مش ناوية تدافع عن نفسها...انا شايفة انه كفاية مساعدة الناس عن طريق منظمات خيرية و فلوس و مشاريع و رعاية و بس... لكن سياسيا i really don't believe it's worth it...

Fatma said...

_ صوتي في ايه يا حاجة في تعديلات الدستور النهاردة : قلت نعم لمبارك طبعا يابني بيقولوا هيقللولنا الاسعار وكدهون وهو راجل طيب


- على فكرة انا بحبه فعلا وبتضايق اوي لما بسمعكم بتتكلموا عليه كدا دا راجل طيب اوي : فتاة في العشرينات

- هو انتو كنتوا تقدروا تعملوا ربع اللي بتعملوه دلوقتي ايام عبد الناصر ولا السادات؟ سقف الحرية ارتفع جدا انتوا اللي مش عارفين تستغلوه في حاجة مفيدة وبتهدروا طاقتكم في اي كلام . صديق بابا

- كل واحد قاعد ع الكمبيوتر حاطت ماج النسكافيه جنبه وعمال يقولك لازم الناس تعمل ولازم تسوي ماتعمل انت ياروح امك . واحد صاحبي

- انا طبعا هنتخب جيمي ..وانا كمان ..وانا كمان ..: انتوا بتهزروا يا جماعة ؟ امال عايزانا نختار مين ؟ كله خرا على الاقل الخرا اللي متعودين عليه اسلم واضمن..لا وجيمي مش خرا على فكرة ماله ماهو كويس انتوا عايزين ايه عايزين البلد تولع احنا عايزين نعيش في سلام احنا مش حمل مصايب ربنا يعدي الايام دي على خير : صاحباتي

فئات عمرية مختلفة وطبقات اجتماعية مختلفة

Fatma said...

انا مش عايزاكي تحبطي ولا تستسلمي بس احنا فعلا بنكلم مين يا نوراة على المدونات وتويتر ؟ بنكلم نفسنا ! بنكلم الناس اللي شايفة الحاجة اللي احنا شايفنها وموافقانا عليها ؟! اللي حصل في الماتش ان ماحدش استنى حد يبدأ وكل واحد ابتدى بنفسه والناس اتلمت كلها على شيئ محدد وواضح ومتفق عليه من الاغلبية الكل عايز مصر تفوز غني وفقير ذكي وغبي صغير وكبير عارف ومش عارف هو دا الفرق

Kontiki said...

تغيير الواقع لازمة تغيير قيم
تغيير انسان واعادة تشكيلة وخلقة من جديد
زمان قبل تكنولوجيا الفضائيات كان مشجعى اللعبه محددودين ومنحصرين فى الملعب او اللى بيشوف الماتش على القناة التانية انما لما عقول البيزنس اتدخلت حولوا اللعبة لهدف قومى بقت من اهتمام الاسرة اية اللى يخلى الام تمشى مع ولادها وهى راسمة العلم على وشهم جوة السوبر ماركت عشان مصر حلو ! طب اية اللى بيخليها تسيبهم يرموا الزبالة فى الشارع ؟ مش دى مصر ودى مصر !!
المشكلة ان القيمة مفقودة وكل محركات الجمهور :) قصدى الشعب بقت فى ايد الميديا والميديا عاوزة فلوس والفلوس مع الشعب اللى بيصرف فى ساعه ونص ماتش على الاكل والشر ب مبالغ وهمية
والعجلة تمشى اعلانات وديلفرى وكافتيرات دة بالاضافة انه شعب كسلان لية يقرا لما ممكن يتفرج على فيلم؟ لية يفكر فى التغيير ويتحمل مسئولية طالما فى اللى حيشيل الليلة هو ومش مهم التمن ؟
عموما زى ما دكتور مصطفى محمود الله يرحمة كتبها فى يوم ما معناه ان فرح المصريين انفجار وحشى وسوقى
والاية مقلوبة فى مصر المحروسة بس لازم حاجة تحصل تعدل كفة الميزان

Unknown said...

يانواره أنتى ربنا مديكى هبه وقدره انك تجمعى الناس حواليكى وتصححيلهم بعض المفاهيم وتوضحيلهم حاجات كتير
لو عايشه وسط مليون من عينة الناس اللى كانوا فى الشوارع والبيوت هايموتوا على الماتش
وواحد بس غيرهم بيفكر فى البلد ومهموم ربنا هايسألك عليه
للأسف انتى من أول يوم بدأتى تكتبى المدونه دى بأيتى صاحبة رساله وعبء لازم تكمليه .

بيقولوا جول عماد متعب كان تسلل ؟!!!!!

wahat_alshohada said...

ملاحظة قبل ما ابدأ - مش هنزل لمستوى ناس متخلفة مش بس مش بتفهم لا دة حتى مش بتعرف تقرأ-
نوارة معاها كل الحق انا يا بنتى من زماااان ناس كانوا بيقولوا لى كدة و كنت بقاوح و اقول معلش نعمل برضو اللى علينا - بس مباراة مصر والجزائر و ما قبلها و ما بعدها كانت نقطة فاصلة فى حياتى بجد. قبل ما انسى احب اقول للناس اللى كانت بتقول ان المصريين عايزين ينبسطوا من غير الامن المركزى ما يضربهم دة كلام مش صحيح و بدليل واقعتين -الاولى فيه ناس معرفة راحو يحجزوا تذاكر المباراة من الدقى لقوا عربيات امن مركزى بالهبل و عالم ما تتعدش باللالاف و الامن نازل ضرب فى الناس -
الحاجة التانية الواد كريم ابن اختى راح هو وصاحبة برضو يحجزوا وكان فيه لواء واقف قالهم عايزين نظام كدة وهدؤ قالوا له طبعا ياباشا وقل ما يكمل الجملة كانت الناس نطت وجابوا الباشا بالعافية من تحت الرجلين بسبب الزحام اما كريم وصاحبة رجعو البيت بعد 20 ساعة انتظار واحد راجع من غير الفانلة و التانى من غير جزمة
بعد اللى حصل
لالالالالالالالالازم يكون فيه واقفة
اقفى يا نوارة و ابعدى شوية و ارتاحى و ريحى اعصابك و اتفرجى من بعيد شوية زى مانا هعمل

بهيج الشرير said...

سؤال والنبي ياأبلتي، إنتي قلتي أن شوبير باشارة من صباعه امبارح على التلفزيون قال: اي شغب احنا الخسرانين، والناس سمعت كلامه؛ ياترى ياأبلتي كان بيشاور بأنهي صباع، مايمكن هي دي المشكلة

Anonymous said...

إنتي زعلانة ليه بس طيب يا نوارة :)

والله بقولك بابتسامة :)

متزعليش :)

أنا بحبه جدا

وأتمنى والله العظيم,تحبيه جدا جدا :)

ربنا يكرمك,ويفرحك يارب:)

Anonymous said...

:)

Anonymous said...

يا أخت إيمان بدوي، انتي متقلقيش من حاجة :))

لسبب بسيط، انتي قضيتك كسبانة..
انتي واقفة في صف شعب عايز يساعد نفسه، واقفة جنب ناس بتحارب بضوافرها وتنحت في الصخر من خمسين سنة وقدامهم هدف واحد..

نوارة زعلانة عاللي خسرته في شعب مش عايز يساعد نفسه، مش عايز اللي هي عايزاهوله..

انتي واحدة من جماعة بشرية بتطالب بنفس أهدافك..

هي لأ، هي واحدة وقعت في وسط جماعة ليهم دماغ غير دماغها..

حقيقي لو الشعب محسش بمشكلة ابتداء يبقى وجود نوارة وأمثالها غير مبرر..

حقيقي لو في ناس هتفضل تطبطب وتدي الناس حسنة تستعيض بيها عن حقها الأساسي عند الدولة يبقى عمر الناس دي ما هتحس بالمشكلة، وعمر اللي بيطبطبوا ما هيغيروا حياتنا لأنه ده في الأول والآخر مش في ايديهم ولا امكاناتهم!!

التكافل والاحسان والمفاهيم الحلوة دي دورها بييجي لما يكون في عدل والناس واخدة حقها الأصلي..زي الناس في غزة، تحت الحصار والكل جعان، ساعتها بيتكافلوا، كل واحد بياكل نص بطن عشان جاره..

لكن ميبقاش الناس كلها ضايعة وجعانة وهفتانة عشان في شلة حرامية واكلة حقهم، وانا متخيل اني هبقى بديل للحكومة وادي الناس دي حسنة بدل ما تجوع والحكومة مش بتديهم حقهم!!

لأ سيب الناس تجوع، واللي عايز الحكومة دي يستحمل بقى الجوع..واللي عايز يغيرها عشان ياكل ينزل ويموت وهو بيغيرها أكرم له من انه يموت من الجوع..

أنا لقمتي كسبتها من حلال مش من دم حد ولا عرقه، ويادوب بتقضيني..اللي له حق عند حد يروح ياخده منه ميطالبنيش أنا بيه..

ووالله ما بخل، ولا قلة أصل، ولا أي حاجة..

بس احنا جربنا الحنيّة في غير موضعها وغير أهلها وعرفنا بتعمل ايه..

ووالله يوم ما تبقى أزمة مصر اننا محاصرين زي الناس اللي في غزة، ولا اننا -فعلا- مواردنا ضعيفة ومش مكفيانا، يومها بس هقسم لقمتي مع الناس وهنزل أساعد المحتاجين..

لكن مش هنقلبها استنطاع وابقى انا فاكر نفسي "السدر الحنين" زي بتاع شيرين سيف النصر كدة في أمير الظلام..

دي حالة مصر ببساطة..ووالله الحكاية كدة، أيام 2005 أنا افتكرت الشعب المصري خلاص، خرج من القمقم وكله هيبقى أليسطة..
واتنططت وفرحت وطغى اهتمامي بحال مصر على اهتمامي بفلسطين فعلا..
ببساطة لأني حسيت انه لو المصريين هيساعدوا نفسهم أخيرا، يبقى الأقربون أولى بالمعروف..
أولى بأعصابي وأولى بجهدي وأولى بأمني الشخصي، أيامها في أول الكلام ده كنت لسة في مصر..
بعد شوية لقيت كفاية نفسها مليانة شباب بقوا شلل..
وكل شلة بقت مش عارف ازاي، زي ما نوارة اتكلمت عليهم..
وسمعت أخبارهم..
ولقيت اني كنت مغفل، ندمت على أي حاجة عملتها أو فلوس صرفتها..

كانوا الفلسطينيين أولى بيها..
وكانت مظاهرة لفلسطين أولى بميت مرة من اني أحاول اتظاهر عشان الحكومة في يوم من الأيام..

لأنه الفلسطينيين عايزين يساعدوا نفسهم..

احنا مش عايزين..

Unknown said...

الكلمة دي قالها أحد الحكماء , مش فاكر إسمه ايه المهم هذا الحكيم كان بيقول ما معناه

و أنا في العشرين من العمر كنت أحلم بإصلاح العالم كله و حاولت كثيرا لم أستطع و حين بلغت الثلاثين من العمر حاولت إصلاح بلدي حتى بلغت الأربعين و لم أستطع و في الأربعينات من العمر قلت لابد من أصلح فساد مدينتي و حاولت كثيرا حتى الخمسين و لم أستطع
و في الخمسينات من عمري قررت أن أصلح الحي الذي أعيش فيه و حاولت ولم أستطع حتى بلوغ الستين و هنا قررت أن أصلح عائلتي و أحسن تربية أبنائي و لم أستطع و ها أنا على فراش الموت الأن و أدركت أن الحل هو إصلاح نفسي أولا
ليتني بدأت بنفسي
ليتني بدأت بنفسي
ليتني بدأت بنفسي

حسن على said...

الاستاذة نوارة:اشكرك على الرد.وفى الموضوع كل البلاد التى تدهور بها الحال -بريطانيا مثلا -اذا لم تكسب مباراتها مع الفرق الاجنبية قام (الهالوجانز)- بألقاء الطوب على المحلات وتكسير وتخريب ماتصل الية ايديهم,باعتبار ان الهزيمة فى المباراة هزيمة عسكرية ماسة بالشرف الوطنى وهى طبعا ليست كذلك, ولكن تردى الاقتصاد وعدم وجود امل منظور فى تغير الاحوال الى جانب تقهقر مكان ومكانة بريطنيا تجعل من سماهم الجبرتى ب (الذعر والجعيدية واسافل الناس والاوباش ) تلجاء الى العنف المجنون عند الهزيمة والفرح المجنون عند النصر ,وكفى اللة المؤمنين شر القتال ,الفوز فى مباراة كرة قدم- بعد شرب جالون من البيرة- هو بديل لتحسن الاحوال الاقتصادية او للنصر العسكرى أو كأن بريطانيا اصبحت امبراطورية عظمى من جديد. نفس الظاهرة موجودة فى كل بلد تراجع بة الحال الى درجة "عشانا عليك يارب" يلتمس الامل فى اى فوز من اى نوع ليؤكد لنفسة -ولو بالوهم انة مازال متقدم ومنتصر نوع من انواع الكذب على الذات

بهيج الشرير said...

سؤال والنبي ياأبلتي، هل صحيح ناويين يشيلوا كلمة "نعيما" من التداول لو الواد إبن عرس مسك الحكم

أبو عمر - الصارم الحاسم said...

يا جدعان

يا مؤمنين

يا موحدين بربنا

محدش يزعل على حاجة كويسة عملها

وما يفتركش انها مالهاش لازمة وراحت في داهية

تروح في داهية لو ما بتعملهاش لوجه الله

يبقى نعملها في المقام الاول لوجه الله

يمكن اللي حصل فرصة عشان نجدد نيتنا فيما نفعله


اللي بتقوله ده نتيجة اننا بنعمل اصح آه....لكن تحديد الهدف محتاج تظبيط


الموضوع هو ثبات على مبدأ

واحقاق لحق

وعمل الصح بغض النظر عن الناس


لكن لا تنس نفسك في كل هذا


وفي النهاية ربنا مش بيحاسب على النتيجة

بيحاسب على الفعل



يا حاجة نوارة

اقري سورة نوح في الجزء 29 بتفسيرها لعل نفسك تهدأ قليلا


وماتندميش على حاجة كويسة عملتيها بغض النظر عن نتيجتها كانت ايه

الخوجة said...

على كذا وكذا انتى لخصتى الموضوع كله فى كلمتين

ان

ده كهن فلاحين

عاوزين كل حاجه لحدهم

ولو اخدتى بالك الصورة على باب المدونة انتى واضعه شعار يتعارض مع كهن الفلاحين

يعنى الحرية لاتوهب


بس هذا

ماجنيتية من كهن الفلاحين


معلهش كان لازم تاخدى دورة فى كهن الفلاحين اللى من نتاجة تم اصطيادنا واحد ورا الثانى

وانتهت القصة

أكلت يوم أكل الثور الابيض


ياستى الحاجة دى بلد دبلومات


والدبلومات حاضر نعم لايهمهم الا ماهو تحت ايديهم بس

اكبر خدعه بالتاريخ


وبعدين يانوارة

انتى ليكى دور سبحان الله

لسان وعبقرية

دى موهبة

فيه خسارة وقتية ماشى


بس انتى برضة موهبة

هما بتوع الادب الانجليزى كده

مهما كان انتى النوارة

بس كلامك صعب

المهدى said...

نوارة كفاية كدة صلى على النبى وأبعدى شوية زى ما كتير قالولك ما فيش فايدة يا بنتى من المناهدة معاك أبعدى شوية عشان تشوفى أحسن
بالمناسبة عرفت ليه ناس كتير شايفين أنك شبه مروة الشربينى
أنا النهاردة عرفت
محمد المهدى

Wild at Heart said...

يا نوارة المصريين مش لاقيين فرصة يشجعوا فيها مصر غير بالكورة لما يعملوا أمسية في حب مصر زي شباب 6 أبريل يتقبض عليهم طب يعملوا إيه يطقوا من جنابهم، هما بيحبوا البلد لكن مش كلهم بيحبوا الحكومة، وبعدين إيه موضوع الملف ده نهار أسود.

Al said...

كل المصريين يؤكدون لك أنه تم استبدال شعبنا العظيم، وأن الذين تراهم على أرض الكنانة لا علاقة لهم من قريب أو من بعيد ببناة الأهرام، وأنه لو بعث الله نبياً الآن فربما يعتذر عن الرسالة، فالذي حدث يصطدم مع كل قواعد المنطق والأخلاق والمباديء والقيم، وأنْ المساجد والكنائس لم تعد قادرة على أداء مهمتها الروحية، وأنه إذا استمر الوضع في هذا التدهور فإن الشمس لن تشرق على مصر، وربما يستعد التاريخ لكتابة خاتمة حكاية الغول والأٌقزام، وأن أمراً ملكياً مباركيا بذبح المصريين كلهم، ودفنهم في مقبرة واحدة لن يحرك عضلة واحدة في وجه عليه جبهة كانت تسجد لله ثم اكتشفت أنها مشغولة بطاعة الشيطان.

لذا ، تقرر تعيين صاحبة المدونة سفيرة للنوايا الحسنة ..!!؟؟

حسن على said...

بعد زلزال بقوة عشرين على مقياس رختر المكون من عشر درجات,تقول نوارة فى نوبة من التواضع اليابانى الصينى انها لاشىء ومعملتش حاجة ذات اهمية,(وهذا كذب كبير) فقرائها يعرفون قدرها وهى كاتبة متفردة صنعت لغتها الخاصة بل حتى الفاظها الخاصة,عفوية على نحو قاتل من الفصاحة وخفة الدم وعمق تناول اى موضوع فى قالب العامية المرحة, اخذ عليها القيام بدور شرين فى المتزوجون - قامت بهذا الدور فى الحياة!!!!!!!!!!!!!!!!!!!!!!!!!!!طبعا السنتمنتنالية المهترئة لعبت دور رئسى فى ما حدث ,ويبدو انة خطاء القصد منة اثبات بشريتها . اخيرا بوست من اروع ماكتبتة نوارة

أدهم الصفتى said...

عرفتي بقى ليه يا نوّاره فيه ناس كتير كويسه بقت بتقرف من السياسه

يا أختي الموضوع انتهى ، ربّنا خلاااااااص رفع التكليف عن المصريين ، يعني لا ثواب ولا عقاب ولا جنة ولا نار للمصريين ، آخرنا نخلّل في برزخ أوضتين وصالة ولا شكلها كده
حانفضل في مصر

طبعا زي ما انتي هارشه : التكليف ... للبني آدمين

أقول ايه بس ، انا قرفتتتتت ، انا قرفاااااان ، أوععععععععع عليكوا جبلّة شعب جلده تسع راقات

Unknown said...

وحشتني يا ادهم

والله ان كان حد له حق يقرف انت اكتر واحد لك حق تقرف من مصارينك

اللي شفته مش شوية

Anonymous said...

استمري ... لديك ما هو اهم من وظيفة الامم المتحدة و غيره من المكاسب المادية ... لديك الوف و الوف تفتح موقعك يوميا لتقرأ كلماتك ... هناك امل دائما في الشعوب و موضوع الكورة حالة استثنائية ... تحياتي لك .

Anonymous said...

المناضلين ذهبوا للموت و هم يتغنون بكلمات والدك ... الكلمات تبقى دائما ان كانت صادقة ... و انت كلماتك صادقة لدرجة المرارة.. تحياتي ...

wahat_alshohada said...

ربنا يكرمك يا احمد نصر كلامك درر بس برضو مانا فى قلب المشكلة و المصريين دول شعبى واهلى وبيتنبح صوتى زى مانت عارف اقول يا ناس حد يعمل كذا طيب حد يوقع كذا طب حد يبعت رسالة ايميل لكذا وبحتاج دعمهم ووقفتهم
ولا حياة لمن تنادى خالص نهائيا
واذ فجئتا الاقى ملايين ملايين فى الشارع
بيعملوا كل حاجة طيب لو موجودين هنا و هناك فى الكورة و فى غيرها ماشى وكمان عودة الجاهلية وانت مصرى و انا جزائريى ودة اسكندرانى دى قلة ادب و عدم تربية ولا دين و لا اى حاجة خالص
انا فعلا وقفت لازم اقف و اعيد نظر والحمد لله ان اكتر تعبى و مشاركاتى وعملى مع فلسطين لسة فيهم خير و فيهم امل وعارفين عايزين ايه وهدفهم ايه زى ما قلت انت بس اللى فرسنى منهم انهم برضو طالعين يشجعونا بعد كل اللى بنعمله فيهم و نقوله عليهم علشان عندهم اصل و طيبين ربنا عافاهم من غباء الكورة

wahat_alshohada said...

اقسم بالله فيه حاجة غير طبيعية بتحصل معلش يا نوارة سامحينى - هوريكم كام عنوان بس من عناوين اخبار المواقع 1- -
" "جسر جوي لنقل مشجعي مصر والجزائر جسسسسر جوى تحس انك فى حرب
الكلمة دى ماسمعتهاش من ايام حرب اكتوبر

2- أبوالغيط يهيب بسفارتنا لدى السودان حشد الدعم للقاء مصر والجزائر
الراجل ماتحركش لما الصهاينة ضربوا غزة من جوة مصر وضربوا رفح المصرية واتحرك علشان ماتش كورة
وكمان رئيس الجزائر "اصدر توجيهاتة" بسفر الجزائريين- ايه الخيبة القوية دى

3- رجال اعمال واعضاء البرلمان ينظمون رحلات مجانية للجماهير المصرية إلى السودان
شفتم بقى الفيلم دة كله كان ليه
ايوة كله علشان الانتخابات الجاية اما انت يا رجل اعمال ولا عضو مجلس شورى و الا شعب تسفرنى السودان
هديك مش بس صوتى و هديه لحبايبك جمال و اصحابة

فى النهاية واحد كاتب تعليق
لتفرح إسرائيل واميركا
لقد فعلت كرة العيال ما لم تستطع المخابرات الأمريكيه فعله فى ضرب العرب ببعض

الله اكبر عليهم صحيح

هتشوفوا said...

على الله تكوني بخير الوقتي, أنا فيه عندي بقين لو تسمعيهم
أول مرة كنت اخش على مدونتك من فترة كبيرة يجي 3 سنين, ولقيتك كاتبة كلمة عرص,أنا استغربت قلت هي الكلمة دي ممكن تنكتب عادي يعني, أنا طبعا بسمع كل حاجة وبقول كل حاجة في الشارع وفي الماتشات, بس ماتخيلتش ان ممكن بنت تقولها, بصراحة دخلتي دماغي وقلت أكيد هي كلمة عربية فصحى واحنا فاكرين أنها عيب, أكيد هي أدرى, وبما أني معارض بالفطرة حتى قبل ما أفهم اللي حاصل, فكنت بتعلم منك حاجات كتير
أنا والله العظيم لا ببربش ولا بنظر ولا بسفسط ولا أي حاجة ولما قريت كلامك قلت ليه بس كدة كل شوية نوارة تتعصب وتتكلم معانا بالأسلوب ده, احنا نشتمهم هما ماشي لكن ليه نشتم بعض, يعني أنا قلت الحمد لله أن دايما تعليقاتي موافقة ليكي ولسه ماحبتش اعترض زي عادتي, فأكيد ما تقصدنيش بالخول العرص النجس الخنزير, ليه كل شوية نلاقي واحد بقى شهيد مدونة نوارة ويبقى زكرى ويطرد بعد فضيحة بجلاجل, مش أحسن تريح دماغها وتقرأ التعليق وما تنشروش أو تنشره وماتردش ليه مش قادرين نفهم ان فيه ناس بتوصل لها الفكرة بعد ما تختلف معانا وليه عايزين الناس كلها تفهم احنا بنفكر ازاي, وتقتنع برأينا وتعرف ان احنا عمرنا ما عملنا حاجة وحشة,أنا عارف أن جزء كبير من كلامك كان فضفضة وأثر في جدا, بس يا نوارة ده في خلال شهر واحد طلع أمن والتاني طلع ميتين أمه ليه كدة هو ده الاختلاف, أنا والله حتى كلامي ساعات كتير بابقى مش عارف إذا كان صح ولا غلط, وممكن الكلام اللي بقولهولك الوقتي يكون غلط

Unknown said...

Dear Nawwara,
There is a wise story i read before about two saints who had alot of provision to distribute over the people in their village...the first one gave alot of money to the poor and a bit of it to the rich becuase he felt the rich already have enough and he should be just and fair to the poor...
The second one simply gave a lot of money to the rich and a bit of it to the poor...and when he was asked why? He said, It is God's well! who am i to go against it? He knows best!

MerMaid said...

I feel ur depression ,,Takhayally lmma yekoon el " Helm " fe Msr ennena neroh Kas el 3alm???!!!
Fuck Kas el 3alm.... ana a3raf en El Helm dh beykoon Tatweer selah nawawy aw toloo3 el amar aw hatta nehawel...

laken lmma yekoon elHelm howa match kora yeb2a ay daraga wesel leha el masryeen???
Kelmet helm 80 000 000 de mostafezza gedan ....
el masryeen ba2o yenkerho besaraha
ana american + Egyptian y3ny Nahs bel gooz.

cheer up

sleepless said...

http://www.youtube.com/watch?v=ZQGDqAaL6A0

waa
tch this, u wiil like it

سميربس said...

اقرأى مقالة ابراهيم عيسى اليوم

http://dostor.org/ar/index.php?option=com_content&task=view&id=38056&Itemid=1

سميربس said...

اقرى مقالة ابراهيم عيسى اليوم


http://dostor.org/ar/index.php?option=com_content&task=view&id=38056&Itemid=1

Dr Nemo said...

للاسف يا نواره
انا منظر وسوفسطائى
يعنى نالنى من حبك جانب
بس فى نفس الوقت اللى كلامك هزنى
الا انه غاظنى منك
انا على العكس منك يا نواره
مبهدلتش نفسى كده
او بالاحرى
مبهدلتش نفسى لسه
بس لما تبصى على وضعى هتقولى العيل التيت ده شاغل نفسه بالسياسه ليه؟
انا فى كلية محترمه شغلنتها محترمه وهتخرج ان شاء الله السنادى
ولو ما اشتغلتش طظظظظظ
انا والدى عنده تجاره دواجن محترمه وبرضه تبع دراستى لانى طبيب بيطرى
يعنى كشغل مش مفروض انطق
دا انا فلة
الاشد من كده ان والدى ووالدتى بيحجوا
ولسه ماشيين قريب
وانا اللى شايل البيت باللى فيه بقدرة ربنا وستره
ومع ذلك والدى مصر انى مش نافع عشان قعدتى قدام المخروب ده للى اسمه كمبوتر
عارف انى معارض وبسب ام النظام ليل نهار قدامه
ولا بيكلمنى على دى هوه اهم حاجه اشوف شغلى
لما رحت امن الدولة مقليش معدتش ليك دعوه بحد وامشى جمب الحيط
قالى ادخل اضحك عليهم بكلمتين واطلع خلينا نروح
فى الكليه عاملينى معارض لا يشق له غبار
واللى ليه نفس يوسخ ودنه بكلمتين عن الوضع فى مصر او حال النظام او موقفنا من امريكا وايرانت بيجيلى اوسخهلمه
انا باللفظ الدارج
راجل مبسوط
مبسوط اوى
وكمان مشغوووووول اوى
وعندى اللى مكفينى عشان ارضى نفسى بالمال
وكمان عندى ما يكفينى عشان ارضى شعورى بذاتى
دا انا راجل شايل بيت يا جدعان يعنى اسد اسد يعنى
اشغل ميتين اهلى بالسياسيه والناس والاحوال ليه يانواااااره
لييييييييييييه
لان عارف ان انا صح
انا على عكسك على قد ما زعلت على قد ما قلت دا شعب غلبان فى عقله
انا صح يانواره
انا شايف النظام وسخ وانا عارف انى صح
انا شايف ان الشعب عايز نفضه عشان يشوف مصلحته وعارف ان انا صح
انا شايف ان الشعب بعيد عن ربه ولازم يرجعله وبرضه عارف ان انا صح
بالررغم انى بكتب التعليق ده والعصر مأذن من ساعه ولسه مصلتوش وربنا يستر بس برضه عارف ان انا صح
اتهزى يا نواره
بالفصيح
فلترتج عليك جوانب نفسك
بس ارجعى تانى للمسار اللى انتى وانا وكل اللى بيكلموك هنا متاكدين انه صح
بس كووووووووووول اللى وافقك مارس معاكى نفس اللى انتى عملتيه
انتى رجعتى علينا افكارك النيجاتيف بتاع فلم حياتك
فرصه كويسه للتطهر
فليغطس جميع المحبطين فى بسين السخف ده
اللى نفسه يرجع فى الحوض اللى فى اخر التدوينه يرجع
خمسوا فيه
بس ارجعوا وامسحوا بقكوا منك ليها له
وخلونا نشوف شغلنا
كلنا فى نظر اغلب اللى نعرفهم
مجرد مهرجين
احنا الشطه الحراءه اللى الكبد الملوثه اللى بيطفحوها من على عربية النظام الوسخ
اى نعم بنثبت انها ملوثه
الا اننا بنخليها مقبولة الطعم قابلة للهضم
خلصت تنظير وسفطسه يا نواره

مش فاهمه said...

عمر طاهر كتب فى الدستور مقال بعنوان : بس انبسطنا
بيقول فيه
"فرحتي بهذا الجو العام بغض النظر عن النتيجة تذكرني بقصة اتنين خرفان، كانا يعيشان فوق أحد الجبال حياة الأكل والشرب واللعب إلي أن شعرا بالملل الشديد وفكرا في الانتحار، خروف منهما قال للتاني طيب ما تيجي نجرب ننزل السوق ونشتغل يمكن نكسر الملل، الخروف التاني قال له هنعمل إيه وإحنا مش معانا غير جنيه واحد بس أنا شايله للطوارئ؟، الخروف قال له واحد فينا يلم بطاطا ويشويها والتاني يلم درة ويشويها وننزل نبيعها ونشتغل ونكسب.

عملوا كده فعلاً وكل واحد جهز بضاعته ونزلوا السوق بدري جداً قبل ما أي حد ييجي، كل واحد فرش بضاعته في حتة وفضلوا مستنيين الناس بس ماحدش جه، الخروف بتاع البطاطا قال أنا هاروح أجبر بخاطر صديقي، راح له وقال له بكام الدرة ياعم قال له بجنيه، اداله الجنيه وأخد الدرة وكانت لذيذة جداً، بعد شوية الخروف بتاع الدرة قال لما أروح أرد الزيارة، راح لصديقه وقال له بكام البطاطا يا عم قال الواحدة بجنيه، اداله الجنيه وأخد البطاطا وكان هيعيط وهو بياكلها من كتر حلاوتها.

بعد شوية الخروف الأولاني وحشه طعم الدرة اللذيذ، راح لصديقه واشتري منه واحدة واداله الجنيه، شوية والخروف التاني اشتاق لطعم البطاطا وراح اشتري واحدة، وهكذا فضلوا رايحين جايين علي بعض والجنيه محتار بينهم لحد بضاعتهم هما الاتنين ما خلصت قبل الناس ما تيجي، فقرروا يرجعوا الجبل، الخروف الأولاني قال لصديقه مش ملاحظ إننا اشتغلنا وتعبنا وماطلعناش غير بنفس الجنيه اللي معانا، الخروف التاني بص لصاحبه وابتسم وقال له (بس اتبسطنا).
"

zizbad said...

عزيزتي / نوارة نجم
نور للحرية سطع ونجم للأمل بزغ
هكذا يوحي اسمك ، وهكذا يرآك كل الباحثين مثلك عن شعاع من النور والحرية في هذه القرية الظالم حكامها ، فإذا بك فجاءة وبغير سابق إنذار تهلين التراب على رؤوسنا، وتطفئين الشعاع في قلوبنا ، فتصيرين مثل أعدائك الظلمة المستبدين ، وواحدة منهم ، تنضمي إليهم وتسيري في ركابهم وتحت رايتهم ، فتتكلمين بلسانهم وتحدثين بنفس منطقهم وبذات اسلونهم .
لا لشيء إلا لأنك رأيت هذه الشرذمة من الشعب البائس المسكين في غفلة من النظام ، وفي مسحة وحيدة من حرية ، قد خرجوا عن بكرة أبيهم يهللون ويرقصون ويضحكون لفوز منتخب بلادهم في كرة القدم .
كلا يا سيدتي ما نسي الشعب قسوة ألامه ومتاعبه وأحزانه ، وما نسي الشعب قسوة جلادية وحكامه ، وما نسوا كبت الحريات وأبنائهم وإخوانهم في المعتقلات ، ما نسوا ذلك وغيره من الغلاء ولهيب الأسعار والبطالة وكتم الأفواه وهجرة الشباب وانهيار الصخور وحرائق القطارات وموتى الأسفلت وووو ، وما نسوا أيضا القابع فوق قلوبهم والجاسم فوق صدورهم منذ ما يزيد على ثمانية وعشرين عام وابنه الذي يطل علينا كل صباح بوسامته وطلعته البهية ليخبرنا بما هو أسوء لأبنائنا والأجيال القادمة من بعدنا .
كلا ما نسي وما نسينا . ولكنها لعبة النظام والورقة الرابحة لديه أمام العالم الديمقراطي ، يقدمها لهم بعد أن أتته على طبق من ذهب ، ليثبت لهم أن رعاياه لا يشتكون ولا يتكلمون ولا يصرخون ولا يتألمون مثلما يزعم أمثالك من دعاة الحرية والرأي ، فهاهم مبسوطون فرحون سعداء .
ولكن لحظة أيتها المرتدة عن الحرية والمنهزمة في المعركة والمنسحبة بكل خزي وعار وضعف واستسلام ، وتاركة موقعك وتاركة الذين تعاطفوا معك يوما وحدهم يواجهون المصير المحتوم ، فلقد فاتك لسبب أو لآخر أن من رحم المأساة خرج الشعب المسكين يضحك ويفرح ويهلل ، من رحم الظلم والمعاناة والضيق واليأس والقنوط خرج الناس يرفعون أعلام بلادهم ويهتفون بحبها وولائهم لها ، من رحم الاستبداد والديكتاتورية والقسوة والمعاناة خرج الناس واجتمعت كلمتهم على تحيا جمهورية مصر العربية حتى ولو كان ذلك في كرة قدم . وهي الكلمة التي نسينها والتي فقدت معناها .
وفاتك أن أكثر من هذا هم لا يستطيعون ، لا يستطيعون أن يعبروا أو يخرجوا أو يعلنوا ، وإلا فالويل كل الويل والسيف كل السيف والجحيم كل الجحيم لمن يخرج ويجتمع على غير هذا .
فاتك هذا ونسيتي ومن حقك أن يفوتك وتنسي ، ولكن ليس من حقك الاعتذار لهم عن كلمات من نور سطرتها بيديك وقلتها بلسانك واحتواها منتداك يوما ما .
فهي بعد أن كتبت بمداد قلمك ، وبعد أن خرجت من عقال لسانك ،لم تعد ملك وإن ظلت مسجلة بإسمك ، ولكنها ملك لنا ، للرعايا ، للشعب المسكين الذي فرح بعد أن كاد ينسى طعم الفرح . فاستكثرتي مثلك أعدائك عليهم هذا الفرح
انطفأ نورك يا نوارة وخبا نجمك وسنبحث عن نور غيرك ونجم آخر في سماءنا الملبدة بالغيوم ، إلا أن تعودي وتعتذري لنا كما اعتذرتي لهم