Sunday 22 November 2009

بالنوسبة لفيديو المطاوي

فيه حد، عرف نفسه بانه لا مصري ولا جزائري، وبعت لي اتنين فيديو بخصوص المطاوي
ده الفيديو اللي وسائل الاعلام المصرية ادعت انه من السودان



وده فيديو لنفس الناس من زاوية تانية



وانا مش باقول ان ما حصلش حاجة خالص مالص، اولا ده مش طبيعي انه ما يحصلش حاجة، اذا كان صحفي في المصري اليوم هنا في مصر لبس جزائري ما فاقش غير في المستشفى
عادي، هي دي الكورة، ومش متوقع ان الجمهور الجزائري ما يحدفش البعثة المصرية بالطوب
وانا مصدقة حكايات الناس اكتر ما انا مصدقة الفيديوهات المضروبة، يجيبوا واحد بينضرب وما نعرفش مين اللي بيضربه ومين هو اصلا وبينضرب فين اساسا، يجيبوا فيديو من ايام الرسوم المسيئة لناس بتحرق كتاب ويقولوا ده الجزائريين بيحرقوا الانجيل عشان مصر فيها مسيحيين، يجيبوا فيديو لناس شايلة مطاوي وواحد بيصورهم من قريب قوي، يعني انت عايز تقنعني ان الجمهور السيس ده كان يقدر يقرب جنب العيال الشبيحة دول ويصورهم من قريب كده؟ ده كان اتاكل
انا كل اللي باقوله اني مش داخل دماغي ابدا انها مؤامرة عسكرية من النظام الجزائري اللي بعت عشرتلاف بلطجي معاهم عشرتلاف مطوة والاصابات كلها طفيفة في عشرين واحد، دي حتى تبقى عيبة في حقهم يعني، ماهم لما جم عندنا كانت الاصابات عشرين واحد جزائري برضه
واتهام حكومة انها بعتت بلطجية بالقصد ده اتهام عايز دليل والا يبقى الحكومة المصرية هي اللي سلطت الالتراس يضربوا اللعيبة ويفتحوا لهم دماغهم ويجيبوا لمدرب حراس المرمى بتاعهم ارتجاج في المخ، حتى لو الامن طرمخ عليهم، بس اتهام السلطة المصرية بحاجة زي دي حاجة كبيرة قوي، ممكن تطرمخ عشان خايفة من عقوبات الفيفا، لكن صعب قوي تسلطهم، واتهام زي ده محتاج دليل
وبعدين ما عوروش اللعيبة ليه لما هم عيال جامدة كده؟
ثم ده كله فيه سلطات بتحقق فيه، وشرشحة الاعلام وفيديوهات اليوتيوب مش هي اللي ح تفصل، التحقيق هو اللي ح يفصل، زي ما الفيفا فصلت كده في حادثة ضرب اتوبيس اللعيبة عندنا.
وسواء الحكومة بعتت ناس وده ثبت او مجرد بعتت جمهور كورة عادي وجمهور الكورة بطبعه غوغائي وبلطجي في كل حتة في الدنيا، ايه دخل كرامة مصر في الموضوع؟ مالها مصر ومال الحكاية دي؟ دي كورة
دي كورة
دي كورة
ولما فيه ناس قالت عيب تضربوا اللعيبة، نفس الناس اللي بيعيطوا دلوقت قالوا: ماهي دي الكورة، ولو ان بقى في عرف الكرويين الصح اللعيب ده مقدس والاعتداء عليه خط احمر واصابته بالنسبة لجمهور الكورة كارثة خصوصا قبل الماتش. لكن شغال، ماهم ضربونا سنة 89 وكده خالصين.
احنا في السودان اتغابينا وبعتنا جمهور عرة..عرة..عرة فعلا، حزب وطني، ومطربين، وممثلين، وفردوس عبد الحميد اللي بتعيط عشان الراجل قلع لها البنطلون، بتعيطي ليه؟ ما تدوري وشك يا ستي: دول بيقلعوا، دول بيقلعوا
يا لهوي؟ يا خرابي؟ يا جمالي؟ ما انت لو كنت نزلتي اي منطقة عشوائية وواحدة ست بقى مش راجل قلعت لك مالط ما كنتيش اتخضيتي وعيطتي وبربرتي وقرفتينا احنا


مالها مصر؟ المرحومة جالها سل امتى؟ ايه العزا اللي ناصبينه لمصر ده وفتحي عبد الوهاب طالع يهتف بمنتهى الحماس ودم الثأر بيبك من وشه: حممممممد الله على السلاااااااامة، وقدررررررر ولطففففففففففففففففف، قام الجماهير الغفيرة وقفت وصقفت له، قام هو عامل علامة النصر اللي شبه خريطة الدلتا دي...


يامي يامي يامي... انا متأكدة ان الخمسة وتلاتين مليون ما بيناموش الليل بعد الهتاف الحماسي ده خصوصا ان محمد فؤاد اعلنها مدوية:
اناااا مش ح اسيب حقيييي... انا ح اعمل حفلةةةةةة



وواحد مجنون طالع في العاشرة مساء يقول يجب علينا اننا نوقع بين المغرب والجزائر ونطالب بحق المغرب في الصحارى، طب احمد حسن قال: ده كلام ممتاز عشان هو مش فاهم حاجة ولا عارف مين سحارة دي؟ او فاكرها اخت سحر جعارة اللي هي اسم على مسمى الحقيقة، ومنى الشاذلي اتحفته بشوية مثقفين سيس كنا ح نسمع شخير الواد لو كانت استنت خمس دقايق كمان. انما ده مصطفى الفقي قال كده كمان!!!! ادعي عليك بايه يا مصطفى يا فقي؟ ربنا ح يدفس مناخيرك في وشك اكتر من كده ايه؟ ندخل ونعمل زي اسرائيل بين المغرب والجزائر عشان خسرنا ماتش كورة؟

حافظ المرازي وجمال بخيت قالوا كلام كويس قوي
بس حتى منى الشاذلي اللي كانت عاقلة طالعة في الحلقة دي بتسخن، مما يوحي ان فعلا بقى كل القنوات الفضائية بلا استثناء جاية لها اوامر من فوق قوي بالتصعيد، طبعا هي بنت ناس برضه ومتربية فبتسخن بطريقة بكيزة مش زي مصطفى عبده وشوبير وتامر سمين. بس جمال بخيت حبس دمها وخلاها مش عارفة تروح ولا تيجي، وارتبكت، الظاهر ضميرها مش مطاوعها على اللي هي بتعمله ده.
بس يعني، ملعونة اللقمة المتغمسة بالذل
وحافظ المرازي بقى جاب لها لستة طويلة باصابات الجزائريين وطعن واحد جزائري بالسكينة هنا في مصر (ما ماتش ما ماتش.. اصيب بس) ايام مباراة الجزائر الاولى تقوم تقول له: ما واحد سوداني طعن في السودان! ده طلع بقى اينما تكون الجزائر تدركها كرامة مصر ولو طعنت سوداني او حتى تونسي... وكل ده في اطار الكورة والله، ده فيه ناس بتموت في ماتشات الكورة، احنا الحمد لله لا قتلنا ولا اتقتلنا. حاجات بسيطة، مالهاش علاقة بمصر خالص، لو كانوا بعتوا جمهور كورة كان ضرب واتضرب وما كانش حد سأل في امه، وهو ما كانش طلب من حد حاجة هو بياخد حقه بدراعه (وهو الوحيد اللي له الحق في انه يحضر المباراة دي لان مالوش متعة في حياته غيرها، حرام عليكوا، ساب لكوا الفلوس وساب لكوا السلطة وساب لكوا الشهرة ومالوش في حياته غير الكورة بتنطوا له فيها ليه؟ ثم ان اللعيبة من امثال احمد حسن اللي نام وحلم واتقلب في الكرسي في ندوة منى الشاذلي مش عايز غيرهم ما كانش عايزكوا، ههه لا والطربش وقع بلسانه وقال: ماهو انا مش معقولة ح اقول للناس اللي راجعة مضروبة انا ما كنتش عايزكوا تيجوا، خلاص هم جم بقى وباشكرهم، بس اه احنا كنا عايزين تشجيع احسن من كده، وقاعد في وسط مكرم محمد احمد ومصطفى الفقي ومنى الشاذلي مش فاهم هم بيقولوا ايه، وجمال بخيت هزأه والواد هو ماله ومال الكلام ده كله :) هو عايز يلعب ويتشجع ويكسب وينبسط وواحد يتصل ويقول انا مش مثقف بس انا مش ثقافتي ضحلة زي لعيبة الكورة، هو حد قال لك انهم بيدرسوا في الجامعة يا عم؟ العيال مغلولة انها اتغلبت وعايزة تفش غلها تقوموا تاخدوهم على عقلهم؟ وتكبروها في مخهم وتقولوا لهم كرامة مصر وتوقعوهم في السلطة الجزائرية، وتخلوا الواد يبغبغ زي العبيط كلام هو مش فاهمه ويقول على اللعب في ازمة الصحارى اقتراح كويس؟ وجمال بخيت يزعق له ويقول له انت ازاي تقول كويس؟ هو ايش عرفه هو؟ لا انتوا تعرفوا تلعبوا كورة زيه ولا هو بيفهم في مشكلة الصحارى زيكوا) كل المشكلة ان البهوات انضربوا
البهوات انضربوا، وحتى ما انضربوش، دول اتخوفوا واتقلع لهم البنطلون وجريوا استخبوا في البيوت و"كان مفروض يجيبوا لنا غدا وما جابوش حاجة" و"والله ادونا سندوتشات وشنطة فيها كاب وطاولة" طاولة؟ ادوا لكل واحد طاولة في الماتش؟ احيييييه احيييييييه يابو سوسو احيه
وانا مش فاهمة يا اخويا حكاية البنات اللي بتروح الماتشات دي، احنا على ايامينا ما كانوش يرضوا يودونا الاماكن دي، عشان دي بتاعة الرجالة، ده الجمهور الجزائري ما كانش فيه ست واحدة في السودان. وحتى لما بعتوا ست في القاهرة بعتوا واحدة بتدرع، مش هالة صدقي اللي اول ما رجعت من السودان قال: تؤ.. مش حلو.. مش حلو ابدا اللي حصل ده.
وبعدين يدخلوا القومية العربية في الموضوع، وكرامة مصر، وكرامة مصر كانت فين لما الف واحد غرقوا والريس ومراته واقفين يتنططوا في كاس الامم الافريقية ولا كأن الف دبانة اترشوا بيروسول؟ وكرامة مصر كانت فين لما تلاتلاف واحد ماتوا في قطر؟ وكرامة مصر كانت فين لما الامن سلط بلطجية على الصحفيات عشان يقلعوهم هدومهم؟ (طب دول قلعوا لك يا فردوس امال لو كانوا قلعوك كنت عملت ايه؟) وكرامة مصر كانت فين في اقسام الشرطة؟ وكرامة مصر كانت فين والقناصة الاسرائيلي بيتسلوا على المواطنين المصريين اللي في رفح المصرية؟ وكرامة مصر كانت فين لما اتقبض على ابو عمر ولففوه كعب داير في اوروبا ينزلوه ترانزيت في كل حتة شوية ويفضلوا يعذبوا فيه؟ وكرامة مصر كانت فين لما الطبيب المصري اتجلد في السعودية ولية النعم؟ وكرامة مصر كانت فين لما السد العالي بتاعها اتهدد، ماحدش استدعى السفير يعني، وقالوا لنا استدعاء السفير لا يحل الازمات، اشمعنى استدعاء سفير الجزائر هو اللي بيحل الازمات؟ وكرامة مصر كانت فين لما كل يوم والتاني يكتشفوا جاسوس اسرائيلي ويبعتوه لاسرائيل في الكتم على حد قول رئيس الجمهورية؟ وكرامة مصر كانت فين لما شريطها الحدودي ومجالها الجوي فضلوا ينضربوا تلات اسابيع وكل اللي بيعمله حرس الحدود انهم يقولوا للناس ابعدوا من هنا اسرائيل ح تضرب؟ وكرامة مصر كانت فين لما النشطاء الامريكان والاوروبيين حرقوا علم مصر مع علم اسرائيل اثناء حرب غزة عشان اولمرت كان بيشكرنا كل تلات دقايق؟ وللا الايد الامريكاني اللي حرقت علمنا مع علم اسرائيل حرقته بحنية مش زي شعب الامازيغ الهمج؟ وكرامة مصر كانت فين لما اتقبض على مصري واترحل على جوانتانمو واحنا ولا سائلين في قرعته؟ وكرامة مصر كانت فين لما صدام كان بيبعت لنا جثث عيالنا مطعونة في توابيت واحنا عاملين عبط عشان الراجل كانت ايده فرطة ايام مجلس التعاون الخليجي؟
وللا دول عشان غلابة مافيهمش مطرب ولا ممثلة؟
ايه كرامة مصر اللي انفجرت في وشنا بدون سابق انذار دي، ما تردوا؟ ردوا ردت المية في زوركوا ان شاء الله، يا كدابين يا منافقين يا نصابين يا اللي فاتحين مدرسة في العهر والقوادة وكل واحد فيكم قالع لنا هدومه وبيعايرنا اننا لابسين هدومنا؟ ايه حكايتكوا؟ ايه اللي وراكوا؟ اخدتوا قصاد الخراب اللي جبتوه علينا ايه؟

على الله يكونوا اكتر من خمس بواكي، وللا ممسوك عليكوا ذلة وللا اكل العيش مر وللا ايه الحكاية؟

الله اكبر عليكوا.. والله ما ح يسيبكوا
هو حد اهان مصر وفضح مصر وذل كرامة مصر غيركوا؟ الناس عمالة تتفرج علينا وعاملانا نكتة ومستنقصانا

على رأي العراقيين: اكو الله.. اكو الله.. وح يفرجنا عليكوا... وقريب قوي ان شاء الله


36 comments:

بهيج الشرير said...

ناس ياأبلتي بتقول أن الهبل اللي بيحصل ده سببه أن مية المجاري اللي بيشربوها مغشوشة

شاب فقرى said...

لا إله إلا الله

الفيديو دلوقتى بقى مشكوك فى صحته يعنى ؟؟؟؟

طيب والجزائريين أغنياء أوى عشان يبعتوا الكم الرهيب دا للسودان ؟؟؟

دا إحنا اللى جمب السودان مروحناش كلنا

وبل حتى راح مننا كل دول

لا إله إلا الله

أنا مش هرد على الغباوة بتاعت إن نتدخل بين المغرب والجزائر ونولعها

عشان هتبقى غباء صرف وغباء أصلى أصلى مش تقليد

وهيبقى فعلا موت القومية العربية

صباح التيت

شاب فقرى

شاب فقرى said...

المقطع بتاع فيلم إبراهيم الأبيض حلو أوى

أنا شفت الفيلم والموسيقى اللى فيه رهيبة وجامدة جدا

بس ياترى إحنا إتباعنا بكام فى كل المواقف اللى قلتيها دى ؟؟؟؟

وياترى المصريين اللى ماتوا دول كلهم وجبتى سيرتهم إتدفع فيهم كام ؟؟؟

أكيد أكتر من خمس بواكى

وموضوع رفع الدعم دا أساسا بيتكلموا فيه بقالهم كتير

لكن من الواضح فعلا إنه وقت تلميع ولاد الريس ورفع الدعم عن الرغيف

وبعدين صحيح مش إحنا أخدنا موقف وقلنا هنسامح ومش كل الجزائريين عملوا كدا ؟؟؟

يبقى ليه هنفكر فى الفيديوهات بقى ؟؟؟؟؟؟؟؟

ما خلاص حتى لو كانت حصلت فاحنا مش هنقاطع

وكمان بالنسبة للموضوع صدق ولا كذب

فى شهود عيان عالموضوع يعنى الحكاية مش فبركه من الإعلام وتوصيات من فوق وبس

يمكن ييكونوا بيضخموا الموضوع اللى هوا ضخم لوحده

خالص التحية والاحترام

شاب فقرى

lastcrazyboys said...

أول هاااام ..تصدقي عيييب قوي لما تستدلي بالفيديو التاني ده ..عشــان انا بقالي 3 ايام بقتــع في البهوات اللي عندي.." والنصيب فيهم واحد شغال في الارصــاد ..أي والله في الأرصــاد ..ان السودان استحاااالة يبقى فيها غيوم بالشكــل ده في مثل هذوها الوقت من السنــة
تااااني هااام منــك لله ..انا بقيت الاحظ ناس كتير همدت ..واتهدت ..وشكلك كــده هتمليلنا البلــد ناس عاقلة باسلوبك ده..ربنا يستر

بس انتي بتتكلمي صــح .." انا مشفتش منى الشاذلي النهاردة " بس علي النعمة بتتكلمي صح..مادام قلتي احنا مالنا ومال الكورة ..دي مكان الرجالة ..يبقى بتتكلمي صح الصح
وبعدين الشرذمة اللي زي حالات مشجعي الكورة دول
لما ينزلوا في موقعة زي بتـاعة الجزائر..يا ينتصروا وبكــده يبقى صوت الشعب هيتغلب على الصعوبات التي تواجهه بعد الدفعة المعنوية الطاغية..يا اما الجزائرين يخلصوا عليهم ..وتخلصوا منهم ومن وجع الدماغ
ومن الدعم العيني ..والدعم النقدي

وتفضى بقى الحكومة لتنظيم رحلات الفنانين ورجال الصفوة..وشباب الحزب لمهرجان "كان" ..وحفلات الاوسكار
كل سنة

مواطن مصري said...

يجب ان نعترف: أُهين المصريون دارنا


تعامل الإعلام السوداني والشارع السوداني مع ما جاء على لسان المشجعين المصريين العائدين من السودان عقب المباراة بنوع من ردود الأفعال ورد الإساءة بالإساءة وهذا غير مقبول من وجهة نظري, أولا لان المصريون الذين تعرضوا لتلك الاهانة والاذلال واغلبهم مثقفون وفنانون ورجال مجتمع كانوا ضيوف في بلدنا. يجب حمايتهم حتى يعودوا سالمين الى مصر وهذا من واجبات الضيافة ، الضيافة لا تنتهي بنهاية المباراة بل بالمغادرة من المطار وهذا ما لم يحدث بعد المباراة حيث تٌرك الحبل في القارب ونحن الذين سمحنا للجزائريين ان يهينوا المصريين في بيتنا لا مجال لانكار ذلك واما اننا ضعفاء امنياًَ.


http://www.sudaneseonline.com/ar1/publish/article_2364.shtml


ما رائيك في هذا الكلام؟؟؟؟؟؟


شهادة من السودانين المحترمين الشرفاء

abderrahman said...

اللي حمل الفيديو ده من تلات ايام ونشره على النت لو كان عنده ضمير وهو بيدور كان عرف انه مش من السودان وانه هيتعرف انه مش من السودان
وكذلك الكليب التاني بتاع الواد اللي بيضربوه وشايل علم مصر

abderrahman said...

الكارثة انه في وسط العبط ده جزائريين جايبين كليب من مصر لواحد عاري تماما ومضروب مطاوي في جسمه وبيطلبوا منه مطالب جنسية لاذلاله وبيصوروه اللي حاط الكليب عبيط بيقول انه جزائري لكن بالمتابعة بيتضح انه كل اللي في الكليب مصريين وانهم مجموعة حيوانات استفردوا بواحد بينهم خلافات معاه

والكليب ده لو شوفتيه أهم من اللي بيحصل ده كله

الناس بتعمل في بعض أوسخ من اللي حكومة والشرطة بتعمله فيهم

lastcrazyboys said...

!!..مــواطن

انت ليييه مصمم تطلع انها معترضة على المعلومات اللي بتقول ان الفنانين اضربوا ..الست ماقالتش حاااجة
كل ما هنالك ..انها بتقول دول غوغاء..وانتوا مش "سونة " يعني ..ولا اجدع ناس ولا حاجة ..زيكم زيهــم

وبصــراحة عنــدها حق..وبعدييين انت هتخنقنا لييه وتعمل زي الفنانين والمهابيل اللي في الاعــلام ..اللي عمالين يقولوا : اضربنا ..اهو بصي بصي ..وش متخربش كم خربوشة ..وضفري اتقطم

ايييه يا جدعااان ..هو انتوا عمركم ما اتخانقتوا قبل كده..ولا وقعتوا في مشاكل ..هو احنا بس اللي كنا بتخانق ..ونعمل مشاكل في ام البلد دي
ولا انتــوا النظــام عندكم ازاي..ولا
!!....اييييه ..ماتفهموني

انا اللي اعرفه وطلعت عليــه: مالك
ياض
--
-الواد عادل منص عيال اتلموا عليه وحبوا يشكــلوا عليه
--
خلاااااص مات الكــلام ..ولو حد جه سأل محصلش حاجة


وهووووب تقوم المعركة اللي بجد بقى ..مش نقعد نولول ..ونأكد انهم ضربونا ..ايه الخنقة دي

Unknown said...

شاب فقري

مين ده اللي قال ح نسامح؟ ده حتى اسم النبي حارسه وصاينه علاء بيه ابن البلد الددع بالدامد قال لن نقبل اي اعتذار من الجزائريين

وانا مش عارفة صفته ايه يقبل وللا يرفض؟ ثم مين ح يعتذر له اصلا؟

ااااااااااااااااه

اصل جمال مبارك لما اللعيبة الجزائريين انضربوا راح اعتذر لهم وهم ما قبلوش اعتذاره

طب هو مين اللي ح يعتذر لعلاء مبارك عن اي حاجة؟

حتى لو الجزائريين فكروا يعتذروا، ح يعتذروا له هو بالنوسبة لايه؟ طب يعتذروا لطارق الدسوقي وبسام رجب هم اولى

وطبعا فردوس المنهارة من اللي قلع بنطلونه

ومحمد فؤاد اللي الازاز لا يزال في تي شيرته

لاست كريزي بوي

لا حضرتك انا مكتنعة تماما ان الموتوشة دي بتاعة الرجالة واحنا نتفرج في البيت حفاظا على هدومنا لاني انا عن نفسي ما احبش حد ياخد مني حاجة

بس ممكن الستات تحضر في الاستاد، لو الماتش مابين انبي ونادي السكة او ممكن مزارع دينا

لكن الحلوين رايحين ماتش الجزائر ومصر في تصفيات كاس العالم؟

ولهم عين يعيطوا: قلعت التي شيرت ومشيت عريانة في الشارع عشان كنت لابسة احمر

طب وده اسمه كلام يا امورة؟ مش جايبة معاكي زاكتة وللا شيرز؟ ده احنا في الشتا حتى

وبهاذوها المناسبة احب احيي واهني كل شاب جزائري بلطجي وكل شاب مصري سيس حضروا الموئعة العظيمة دي وفضلوا على مبدأهم وما اتحمرشوش بالامورة حيث ان الجزائري التزم بادب الصياعة والمصري التزم بنص الجدعنة

واحب اطمن الشابة انها ما تتخضش على نفسها اكمن الشبان المحرومين ما عبروهاش في هذا اليوم العظيم، واقول لها، يابنتي تأكدي ان كل شاب فيكي يا محروسة، خصوصا اللي كانوا متجمعين حوالين سفارة الجزائر مش حارقهم حاجة غير انهم ما راحوش الماتش والمنتخب خسر في غيابهم، وكل شاب جزائري، خصوصا اللي محاصرين اوراسكوم
كل الشباب الحلو اللي زي الورد ده، روح بيتك بيتك عشان يبتدي يهتدي ويتعظ قبل يوم الوقفة
ومنتظر يوم الوقفة بفارغ الصبر عشان يدعي ربنا للاخوة بالمصالحة والمقابلة السريعة في ايتها ماتش انشالله حتى للتبرع للنور والامل ويتملي المدرج بنات لابسين احمر
وهو ح يعمل الواجب الصح

وبانصحها انها لو مزنوقة في التشجيع ممكن تحضر بطولات البلي مسافات طويلة وده اخرها

وباحيي الاهل والاحباب اللي قلبهم قلب اسد عشان يبعتوا بنتهم للجهاد على الجبهة الخيطرة دي

نفسي اقابل بت م اللي بيروحوا ماتشات الكورة عشان اسكعها قلم على وشها


مواطن مصري ياللي ح تموت مبربش

انا طبعا داعية على كل النفاخين في الفتنة بس انت بالنوسبة لك مافيش حاجة ممكن تتعمل معاك اكتر من اللي انت فيه

السلطات السودانية اعترفت بان المصريين، لا مؤاخذة، انضربوا

وقالت ان وسائل الاعلام المصرية بالغت، وانهم حرروا تسع محاضر

وبنظرة سريعة على اصحاب الشهادات ح تلاقي ان رد فعلهم اكبر من اثار الاحداث على شكلهم

حيث انهم ناس ولود ناس ومتربيين على الغالي وما ركبوش اتوبيس قبل كده

وانا اؤكد لك، ان اي حد فيهم لو ركب اتوبيس من الاحمر ده مش السيرفيس
وللا حتى ميكروباظ من بتوع فيصل ح يتصدم نفس الصدمة اللي هو فيها حاليا دلوقت

وممكن يقلع التي شيرت بتاعه بمنتهى البساطة

كان فيه مشجعين جزائريين شبيحة
ده عادي
المش عادي انك تبعت لهم فردوس عبد الحميد وبسام رجب وابراهيم عبد القادر

يا سلام، بس اللي عمل القائمة دي بني ادم اصيل والله
ماحدش فاكر الناس دي خالص
ده حتى احمد عبد الوارث راح

دول كان ناقص يبعتوا فارس وعلي حميدة

فما فيش داعي تستشهد بكلام السودانيين عشان هم مش ناويين يجاملونا في صوان العزا ده


احمد عبد الرحمن

الناس كلها بتتفرج علينا

وبيتفوا علينا كمان

مطلعين علينا نكتة: مرة بلد اتغلبت في ماتش قطعت علاقتها الدبلوماسية مع البلد المنتخب اللي غلبها

انت ملاحظ ان كل ده عشان ماتش؟

عمرو موسى طلع يعلق

كل ده في ماتش؟

حـنــّا السكران said...

أنا من يومين سمعت و على قناة مصرية و في برنامج شتائم من العيار الثقيل , أن هذا الفيديو لا علاقة له بالحوادث الأخيرة .. واحد اتصل و قال و الموجودين أمّنوا على كلامه بما فيهم الإعلامي الكبير شوبير ( يا نوارة , عندكم كيف بيصير الواحد إعلامي ؟ متل عندنا؟ بيبيع قفاه و بيصير إعلامي كبير؟ .. من وين لوين لاعبي فوتبول سابقين صاروا إعلاميين كبار و استلموا الهواء و الفضاء و صارت الناس تحت رحمة غبائهم و جهلهم و وصوليتهم؟)
ـ تانيا يا ستنا , انت غاب عنك جُمل تاريخبة عظيمة كتيرة .. أنا صار لي تلات أيام باخد جرعات جلد ذات مكثفة على يد الأخوة عندكم .. محمد فؤاد اتصل و بكي بكاء شديد اللهجة على الهواء و قال بالحرف : ( أحمدك يا رب , الحمد لله إني عشت في زمن الرئيس حسني مبارك و في زمن جمال بيه مبارك و علاء بيه مبارك , الحمد لله اني عشت في زمن الناس دي , الناس دي بتحبنا يا جماعة )
و مبارح المغني حكيم اتصل بشوبير و قال بالحرف الواحد : ( دول بلد المليون لقيط مش مليون شهيد ) .هل تتخيلي واحد يقول عن شهداء مصر أنهم لقطاء؟
ـ أحد الأسئلة اللي كانت مذيعة عظيمة بتسألها لنفسها و للأخوة المشاهدين الأعزاء : ( همّ بيكرهونا ليه ؟ ) كررت السؤال كثيراً .. طبعا انت عارفة ماذا تعني لي مصر يا نوارة .. بس والله العظيم , أنا كرهت نفسي و أنا بتفرج .. قدروا يخلوني أكره نفسي بساعة أو ساعتين , و وقتها لو طلع أبويا قدامي كان رح يسألني : انت بتكرهني ليه .. واحد كرّهتيه بحاله ..بترجعي بتسأليه ؟
أنا فعلاً تذكرت لما كانوا الأمريكان بيشكلوا لجان ( و هم بيقصفونا أو بيزودوا اسرائيل بالقنابل و الصواريخ منشان تقصفنا) بيشكلوا لجان منشان توصل لجواب تاريخي ألا و هو : العرب و المسلمين ليش بيكرهونا ؟ .
ما شاهدته في الإعلام المصري ذكّرني بهذا الشيء .
أنا أتكلم عن هذه الحالة و هذه الحوادث و ردود الأفعال فقط , و لا أتكلم عن الحالة العامة .
طبعاً أنا ما تكلمت عن الجزائر و متعصبي الجزائر , أنا موقفي من الطرفين متل موقفك تماماً .

حـنــّا السكران said...

بعدين لا تنسي أنّ هيفا أعلنت موقفاً صارماً إلى جانب مصر , اليوم اتصل فيها طوني خليفة و أخد منها تصريح تعلن فيه أنّها مع القضية , و أنّ الشعب فيه ( واوا) و مستعدة تبوسه كلّه .

amr220 said...

و الله مافيش فايدة

مهما تعملي و مهما تقولي

دا شعب مغيب

بقاله 30 سنة محكوم بقانون الطوارئ

و بس النهاردة افتكر كرامة مصر

تليفون أهبل من علاء الأهبل

نص الشعب عاوزه يبقي رئيس دلوقتي

خلاص نسيوا كل حاجة

يعني اي واحد عنده عقل حايسأل نفسه

عشرات الالاف من البلطجية الجزائريين

بالسكاكين و المطاوي و السنج

بيطاردوا المصريين في شوارع الخرطوم

فين القتلي؟؟؟ فين اللي ادبحوا؟؟؟

يا شعب يا مغيب

انتم اللي بتهينوا كرامة مصر

اتقوا الله عشان يجعل لكم مخرجا

Unknown said...

لاست كريزي بوي

اهو انا يا اخويا مش حارقني بقى غير: ضربوني يا طنط إهئ إهئ إهئ

وقال احمد السقا يقول انا ندمان اني ما كنتش هناك

كان ح يعمل ايه الامور؟ هو فاكره فيلم الجزيرة؟


جو

هم عندكوا بيبيعوا قفاهم؟ لا احنا عندنا بيبيعوا قفاهم بس انزل شوية، بتاع متر كده وللا حاجة.

لو سمحت، ما تحرفش في كلام المجاهد المناضل اللي الازاز لا يزال في تي شيرته محمد فؤاد

هو قال: علاء مبارك.. الباشا.. الباشا الكبير.. اللي ضفره برقبة اي رئيس عندهم
ح يجيب لي حقي

هم بيكرهونا ليه دي اتجاوب عليها والله

بيغيروا مننا

طبعا ما احنا اتجوزنا قبلهم كلهم وهم لسة قاعدين عوانس

انا عايزة ادي الاعلام المصري جائزة في العهر

ما شاء الله، هو ده الاحتراف، مش الناس اللي واخدين العهر هواية، احنا بالصلاة ع النبي اعلامنا واخد الموضوع جد وجد الجد وبيعمل الصح مع اي زبون

وكله بالمستندات
وشعارنا، الزبون دايما على حق
والاعلامي اللي على حق يقول للتحسيس لأ

هامش: التحسيس هو آفةأوشكت ان تحطم مستقبل هذه البلاد لولا ان رزقها الله بابنها البار زعيم الامة علاء باشا كبير مبارك حيث اطلق صرخته المدوية: كفايانا طبطبة كفايانا تحسيس

وسيكون النشيد الوطني لهذه الثورة: يا اطبطب يا احسس

لفنانة الشعب والشورى الانسة نانسي عجرم التي لا تقل وطنية واخلاصا لمصر عن زميلتها في الكفاح هيفاء وهبي اذ اتصلت بابرهيم حجازي في مكالمة طويلة والراجل في سنه ده ساح على نفسه واتبهدل خالص واسعدت ملايين المصريين وحمستهم الى القضاء على التحسيس حيث انهم، وكما قال كوكب الشرخ علاء مبارك، لازم يقفوا وقفة ويبطلوا تحسيس وطبطبة

وقد لبت الجماهير الغفيرة نداء علاء بكل الحماس الذي التهب عقب مكالمة هيفاء وهبي

يسري said...

مؤامرة على الشعبين لجرهم إلى خلافات و مناوشات جانبيه من أجل إلهائهم عن ما يحدث لهم فى بلادهم من فساد و نهب
ما طول عمرنا إحنا و الجزائر بنتضرب فى بلادنا و نتسحل

و لا احنا عاملين زى اللى انضرب برة منطقته و عامل هيصه و اللى يشوفه جوة منطقته .. مش حيعرف وشه من قفاه من الورم...

و بعدين يعنى البعثتين من الجانبين بيهولوا وبيكذبوا و عاملين هيصه و متفقين مع المسئولين و فى ناس فيهم شوية صغيرين مكانوش عارفين باللى حيحصل عشان يبنانوا فعلا مخضوضين

و بعدين فرضا فرضا إن اللى حصل كله فعلا حصل
( الاتوبيس الجزائرى اتحدف بالطوب و البعثه المصريه اتحدفت بالطوب برضه .. فكرة السكاكين دى مش داخله دماغى خالص خالص يعنى كلهم شايلين سكاكين و مفيش ولا علم جزائري واحد مفيش واحد لابس تيشيرت المنتخب مفيش واحد ملون وشه بالاخضر .. الفيديو من ساعه مشفته على الفضائيات و هو مش داخل دماغي و عارف انه حيطلع فطشه و تهجيص )
عشان 8 او 80 او 800 فرد نظلم ونشتم و نكفر و نلعن 80 مليون ب عيالهم بنسوانهم بعواجيزهم
و عشان 4 او 40 او 400 فرد نقوم نشتم برضه و نسب و نلعن الاربعين مليون
ب عيالهم بنسوانهم بعواجيزهم برضه

مش معقول يعنى
نظلم شعبين و نشتمهم بأبشع الشتايم و نوصمهم و نصفهم بالخيانه و العماله و الفرنجة ؟؟

و لا تزر وازرة وزر أخري
و لا تزر وازرة وزر أخري
و لا تزر وازرة وزر أخري

و لا هى الحسنة تخص و السيئة تعم ؟؟؟

بلا وكسه

و حيلغوا الدعم من على العيش ..
روحوا بقا حدفوهم بالطوب و المولوتوف
دا معملتوش كده فى سفارة اليهود
و لا عشان كانوا سايبينكم تههلوا و تهيصوا عشان على مزاجه متقوموا تفتروا
على العساكر ؟؟
و الله العظيم احنا شعبين تركيبتنا غريبة غريبه غريبة

لعبوها صح يا نوارة .. لعبوها صح الحكومتين المرة دى
و ربنا يستر على العواقب

المقال دا من الجزيرة عجبنى شوفيه كدا
http://www.aljazeera.net/NR/exeres/C569B6CF-D904-4F4C-8F9D-9B277ED2BD64.htm

حرة المداد said...

تحيا مصر وتحيا الجزائر...تحيا الامة العربية والاسلامية...ولتسقط العمالة للامريكان والصهاينة المتحكمة في اعلامنا والتي أججت مشاعر العداوة بين الاشقاء عملا بمبدأ فرق تسد...وحتى تشغلنا عن مخططات التهويد في القدس والاقتحامات المتكررة للمسجد الاقصى وعن قضايانا المصيرية في الداخل والخارج...ما جمعه الله لا تفرقه كرة قدم!!!!!!...!....أين كانت كل هذه الجموع الحاشدة المنفعلة الصارخة في الاسابيع السابقة عنما توالت الاقتحامات على مسجد الأقصى؟!!!!...هل كرة القدم أغلى عندنا من المسجد الأقصى؟!!!.......اللهم أيقظ أمتنا من غفلتها وبصرنا بما يحاك لنا من أعدائنا...ولا تجعل بأسنا بيننا شديدا وانصرنا لا في كرة القدم ...بل على أنفسنا وعلى أعدائنا

شلاطة said...

يسلم فمك يانوارة

لا وهزيدك في الشعر بيت
لا دول كمان عاوزين يمنعوا السفن الجزائرية من العبور في قناة السويس
شفتي الوكسة اللي بقينا فيها
http://www.saveegyptfront.org/news/?c=200&a=25525
هههههههههههه
صحيح هم يبكي وهم يضحك

وبالنسبة للدعم
اه ياماما مصلحجي بتاع التضامن قال كده امبارح في البرلمان
ان الدعم هيترفع عن العيش وهيبقى ب 20 قرش في مقابل 13 جنيه ونص في الشهر لكل مواطن

http://www.saveegyptfront.org/news/?c=170&a=25520

سجدة said...

هيفاء ادخلت فى الموضوع
غطونى وصوتوا
يا بخت الجزائر يا بختها
هيفاء مش هتغنى هناك تانى

Unknown said...

على فكره يانواره

أنا شفت حلقة عمنا الكبير وأستاذنا محمود سعد

بجد بجد راجل فى منتهى الأحترام
ياريت تنوهى عنها لو شفتيها لأنه حق علينا زى مابنهاجم المتخلفين بتوع البرامج التانيه
لازم نشاور على الناس المحترمه اللى فاهمه رسالتها وبتحتفظ بتوازنها وسط الهوجه

منى الشاذلى أمبارح - وأنا من عشاقها على فكره - كانت جيده فى نقطه واحده وهى عدم الخلط بين شعب وبين شوية بلطجيه
غير كده كانت بتعرض نفس الفيديوهات اللى بتزود الأزمه

بالنسبه لأحمد حسن أنا شفته عند أبن ماما نونا وبعدها بساعه كان عند منى

الواد قاعد مزنوق والكلام عمال يطير فوق دماغه ولا هو فاهم أيتها حاجه
طب خدلك ساتر ياعم لحاجه تيجى فى مخك تنورهولك !!!!!

سجدة said...

عارفة يا نوارة للاسف واللى مزعلنى اننا الى بنحكى الحوار دا وبنقول الحق فين قلة قليلة لا تذكر
للاسف حتى الناس اللى كنت فاكرها مثقفة وذو علم انساقوا بشكل غريب وراء الإعلام انا بحثت فى الجزيرة والبىبى سى عن الفيديوهات اللى اذعها القنوات بتاعتنا مش لاقيت حاجة
طب الناس دى فين ليه مبحثتش بنفسها ودورت ليه سلمت
دا احنا قدمنااااااا كتييييييير اوى لحد ما نفوق
بقه مكالمة تنسينا كل الاهوال اللى بنعشيها كل يوم

Anonymous said...

ليه منى الشاذلي اخدت تعليمات

موش جايز ده رايها

موش كل من نختلف معه يبقى واخد تعليمات

عارفه انك كنتي متوقعه من اعلاميه محترمه زيها انها تقول كلام مختلف

لكن يا استاذه نواره المصريين انضربوا اه .... بس معرفوش يضربوا لانهم عيال سيس

لو كانوا من بتوع الالتراس كانوا عملوا مجزره

وكمان التامر الحكومي الجزائري باين .... عملوا كده علشان يلهوا الناس ..... وعشان بيقولك ان القياده السياسيه في مصر اتكبرت على القياده السياسيه هناك في حادث ضرب الاتوبيس هنا في مصر .... وقالت انتم اللي ضربتم نفسكم

تحياتي

نادر عزام said...

كلامك كل مضبوط وانا معاك في كل الا قولتليه انا بكلمك من النمسا وعايز اقولك اذ كنتم انتم في مصر والوطن العربي مش متخيلين مدى التقزم الا وصلنا ليه احنا هنا نشعر بالمرارة ضعفين لان في الوقت الا شايفين فيه بلاد متحضرة بتجري في البحث العلمي والتفدم والنعليم احنا في الوطن العربي معتدش عندنا حد بيفكر إلا في ماتش كورة وشحن الناس قبل المبارة وكان الرد طبيعي للشحن المضلل للشعوب العربية
تعرفي تقوليلي الناس الا خرجت في مظاهرات وطالبوا بغلق السفارة الجزائرية كانوا فين أيام حرب غزة قبلها وبعدها والاطفال والشيوخ بيضربوا مش بمطاوي وسنج بل بطيارات وقنابل
بلاش نتكلم على الفلسطنيين خلينا في البلاوي بتاعت بلدنا كانوا فين في قطار الصعيد الافاتت من شهرين ولا العبارة ولا حتى الشرفاء الا في المعتقلات وسرقة اموالهم ولا حتى الجنود المصريين الا بيموتوا بطريق الخطأ طبعا على أيدي اليهود فين الرجالة دولة طيب
امته هنفوق بقى
وفي ظل المعمه طلع وزير التضامن بيقول هيلغوا الدعم للرغيف في مقابل 13 ونص جنبة
أنا أعز أصدقائي هنا من الجزائر و نموت غيظا لاننا شايفين اللعبة من بره ,عندما شاهدنا كيف لعب النظامين بشعوبهم بالكورة, ولم يخسر الا الشعبين ولم يفز إلا النظامين المصري والجزائري

المهدى said...

صباح الخير يا نوارة
برافو عليكى فعلا كل الإدعاءات متهافتة وغير مؤكدة فيه غلوشة وصوت عالى ووساخة بير أتنزح ومش فاضل منه غير الوساخة أللى كلنا وكل العالم شايفها
صحيح منى الشاذلى تعمل على طريقة بكيزة هانم لكن أعتقد أن هذا توجهها الشخصى حيث أن قناة دريم أو أغلب الأعلام يبدو أنه قرر مواربة البكابورت اللى أتفتح بقاله يومين ومعدش عنده مانع يسمع أصوات أهدأ قليلا والدليل على أن منى تعمل من دماغها برنامج صباح دريم بالأمس وفيه مسحت المذيعة ( الجدعة ) بهيثم شاكر بلاط البرنامج وقالت أنه هارب من التجنيد وعليه حكم ورايح يشجع مصر وراجع يولول والكلام زى ما بقولك كدة بالحرف
بمناسبة الطاولة فدى رمز منتخب مصر والأخوة الرياضيين اللى المفروض مبيفهموش غير فى الرياضة مافيش واحد فيهم إتكلم بجد عن أسباب هزيمة أقوى فريق كرة أتجمع بالصدفة فى مصر مع مدرب محظوظ لا يعمل ولا حتى ساعة يوميا والجميع يعرف أنه لا يتابع الدورى ولا يقرأ الخصم وشبه مقيم فى قهوة بالمهندسين يلاعب أى كلب يمر أمامه عشرة طاولة ويلهف أول كل شهر مائة ألف جنيه ويستغل الجميع سذاجته وحظه للتنقيط والمجاملة بمنتخب مصر ثم فيه بلد فى الدنيا يتغلب ميقولش ليه ؟
بل يقول الحمد لله على الهزيمة
صحيح المهم كرامة مصر
بلد بتفكر برجليها وبتلعب بقلبها وبتتخانق بلسانها المنظرين بيتكلموا فى الكورة وبتوع الكورة بيضعوا إستراجية الدولة العليا
محمد المهدى

mido said...

مكالمة جمال بخيت كاملة


ضحكة شريرة

:D

Unknown said...

هو فيه ايه؟الدولتين بيجهزو لأيه؟
ايه اللى هايحصل الأيام دى وعايزين الناس تبقى فى غيبوبه؟!!!!!!!!!!!!!!!

Sam said...

نوارة ...عندك حق فى كل كلمة قلتيها...بس مين يسمع...

انا مفقووووووووووووووووووووووعة...
و المشكلة انك لما تقولى الكلمتين دول لحد يقولك انت مش مصرية و معندكيش انتماء...

بس انا سعيدة الحقيقة...ده الناس طلع انها بتعرف تطلع مظاهرات اهه... شايفة المظاهرات الرائعة اللى فى الزمالك؟؟؟..

شفتى ازاى عمال فى مجلة اكتوبر طلعوا و اعتصموا ضد رئيس التحرير عشان كتب مبروك للجزائر ؟؟؟...

و يرجعوا يقولوا ده مش بسبب الكورة...لأ بسبب الكورة على فكرة...و ابو الكورة اللى تعمل فى الناس كده...

طبعا الموقف كان ممكن يتحل بكذا طريقة و مكنش الموضوع تفاقم كده...كانوا مبعتوش الفرافير دول هناك او كانوا عملوا الماتش من غير جمهور ...او كانوا بعتوا امن مع الجمهور فى موقعة الجزاير...او كانوا لغوا ام الماتش ده كنا كلنا ارتحنا و محصلش اللى حصل...

و لو كانوا لحقوا و الحكومة اتدخلت و صفوا الاجواء بين الاتنين و كنا تانتهينا ...لكن طبعا ايه اللى يشغل الشعب المصرى غير الخناقات خليهم يتخانقوا مع الجزائريين و يسيبونا فى حالنا و ده اللى حصل...

ده الناس بقت تحب علاء مبارك موت موت موت...

و يرجع الرئيس يقول ضبط النفس...ضبط النفس ايييييييييييييييييه ارحمنا ...حتى فى ديه يا شيخ مش هاين عليك تتصرف...و المشكلة ان الناس مش شايفين المشكلة...المشكلة ان بلدهم مش عايزه تجبلهم حقهم... و مع ذلك ماسكين فى خناق الجزائريين...طب ازااااااااااااى؟؟؟

انا مفقوعة و هعيط من الفقعة...و الالف اللى ماتوا فى العبارة دايما فى بالى...ليييييييييييه محدش قام القومة دى لييييييييييييييييه؟؟؟؟...بجد حاجة تقرف...

جمال بخيت كلامه حلو جداااااااا....ابراهيم عيسى كتب مقالة تحفة...و كلامك تحففففة...لكن لا حياة لمن تنادى...

و حسبى الله و نعم الوكيل فى اللى اشعل الفتنة...ربنا يوريهم بجد...الاعلاميين العرة بتوعنا ربنا يوريهم على المصيبة اللى عملوها...

mohamad said...

يا نوارة
الحكاية كلها خناقات على بيزنس بفلوس كتيرة - شغل الإتصالات عامل زي الوزة اللي بتبيض دهب . . وشكلها كده حصة أوراسكوم في السوق الجزايري مستاهلة تسخين الواغش دول
وشغل المقاولات برضة بيكسب ويتطمع فيه

ويارب يارب يا رب . . تكون حملة الإستئساد لكرامة المصريين بالخارج بداية للإهتمام بالموضوع ده وأخده بصورة جدية . . تكون النصرة للعامل البسيط زي نصرة واحد رجل أعمال

ربنا يهدي الحال ويفضح نية الجميع قدام الجميع

الخوجة said...

علشان ماخدوش العيال المتربية الصيع بتوع بلدنا

اخدوا شوية عيال وحريم بسكوت
شوفوا العيال المصرية العادية

دول عيال متربية فى مدارس الحكومة ومالهاش فى انفلونزا الطيور والحمير ولا حتى الخنازير علشان طوال اليوم بياكلوا من الزبالة

وبيقلبوا الزبالة ويبيعوها ومعاهم ليسنسات وبكالوريوسات هما دول شباب مصر الخقيقى اللى الدولة لاتسمع له ولاتراة وانما ترى الرئيس واولادة

نعم الكل ليس له حق فى الحياة ابن الرئيس بس هو اللى له حق فى الحياة
والكل بينفخ فيه هو من نفس سننا

وسبحان العاطى الوهاب

طلعت برة الموضوع شوفوا عيالنا صح

ونفتخر علشان لما بيجى عيل منهم يعيط بنضربة على قفاه

مش بنطبطب
هنطبطب على ايه ياحسرة

الحكومة خلتنا شويه غنم ممنوع تشيل معاك حتى قصافة يبقى سلاح ابيض

وكل شباب الدول العربية يحمل مالذ وطاب من انواع السلاح

طيب دول لو هاجمونا داخل بيوتنا هنا كنا عملنا فيها حريم علشان الدولة صادرت واستولت على كل انواع الاسلحة وممنوع تشيل حتى قصافة بسكينة خايفين لا العيال يغزوهم انتى السبب ياحكومة قصقصتى ريشنا واخدتى كل حاجة من ايدينا
هذا ماكسبناه من حكم الظباط واستيلاؤهم على كل حاجه لعيالهم حتى الحكم

عاوزين يستولوا علية لعيالهم ماهما ماشيين بنظام ميز الظباط والشعب كله مراسله ليهم ويساعدهم مجموعه من المنافقين والمطبلتية



http://www.youtube.com/watch?v=j4QkspcclJk



دول بقى لعندهم نادى ولاماما ولابابا يابتوع الحزب الوطنى


ومع ذلك شوف وطنيتهم

http://www.youtube.com/watch?v=7B50TxqxyP0

دول وقفوا الطريق الزراعى السريع ومحدش قال ليهم اعملوا كدة

احياة ابوكم اتوكسوا واحد واحد قال رايح السودان ويعيط الحقونا لو عيالنا كنا قلنا له اتصرف يابن الكلب

انا مش مخلف سوسن

ايوة

عندنا بنتبرأ من العيل اللى يعمل زى الحلويين الطعميين اللى راحوا السودان


http://www.youtube.com/watch?v=PlRv269pbH4


شايفين العيال احياة ابوكم تكرور الفيديو دة علشان تحسوا ان انتى ياحكومة سبب نكبتنا

دى عيال بتمصمص العظم

http://www.youtube.com/watch?v=tjoKvvFAyvg

عيال متربية بفلوس حلال

بوبو said...

انا مبلاقيش ناس عاقلة الا هنا لما ادخل اقرا كلامك.. دا انا مدرسة ابتدائي في مدرسة لغات ولو شفتي العيال اللي في رابعة وخامسة ابتدائي عاملين ازاي في موضوع الجزائر دا هيجيلك هبل وتفضلي تدعي من هنا لسنين عمرك الجاية كلها - ربنا يطول عمرك - على الكلاب اللي ولعوا الدنيا كدة.. الواد عنده عشر سنين بالكتير ويقولي دا انا لو شفت واحد جزائري هقتله.. اقوله تقتل مين يا ابني.. طيب قول لو شفت واحد اسرائيلي ، يقولي لاااااااااااا دا المصريين اتهانوا.. دا واحد مات.. دا مش عارف مين حصله ايه ، ولو حاولت افهمهم العيال كلهم ينسوا الادب وينفجروا في وشي كالصاعقة.. مين المسؤول انه يملا اطفالنا حقد على اخواننا في العروبة؟ هي العروبة خلاص بقت كلمة طالعة من متحف التاريخ؟ بقولها وانا حاسة انها كلمة غريبة والله.. بقينا كائنات منقرضة ولا ايه يا نوارة؟

سامي said...

وبعدين يدخلوا القومية العربية في الموضوع، وكرامة مصر، وكرامة مصر كانت فين لما الف واحد غرقوا والريس ومراته واقفين يتنططوا في كاس الامم الافريقية ولا كأن الف دبانة اترشوا بيروسول؟ وكرامة مصر كانت فين لما تلاتلاف واحد ماتوا في قطر؟ وكرامة مصر كانت فين لما الامن سلط بلطجية على الصحفيات عشان يقلعوهم هدومهم؟ (طب دول قلعوا لك يا فردوس امال لو كانوا قلعوك كنت عملت ايه؟) وكرامة مصر كانت فين في اقسام الشرطة؟ وكرامة مصر كانت فين والقناصة الاسرائيلي بيتسلوا على المواطنين المصريين اللي في رفح المصرية؟ وكرامة مصر كانت فين لما اتقبض على ابو عمر ولففوه كعب داير في اوروبا ينزلوه ترانزيت في كل حتة شوية ويفضلوا يعذبوا فيه؟ وكرامة مصر كانت فين لما الطبيب المصري اتجلد في السعودية ولية النعم؟ وكرامة مصر كانت فين لما السد العالي بتاعها اتهدد، ماحدش استدعى السفير يعني، وقالوا لنا استدعاء السفير لا يحل الازمات، اشمعنى استدعاء سفير الجزائر هو اللي بيحل الازمات؟ وكرامة مصر كانت فين لما كل يوم والتاني يكتشفوا جاسوس اسرائيلي ويبعتوه لاسرائيل في الكتم على حد قول رئيس الجمهورية؟ وكرامة مصر كانت فين لما شريطها الحدودي ومجالها الجوي فضلوا ينضربوا تلات اسابيع وكل اللي بيعمله حرس الحدود انهم يقولوا للناس ابعدوا من هنا اسرائيل ح تضرب؟ وكرامة مصر كانت فين لما النشطاء الامريكان والاوروبيين حرقوا علم مصر مع علم اسرائيل اثناء حرب غزة عشان اولمرت كان بيشكرنا كل تلات دقايق؟ وللا الايد الامريكاني اللي حرقت علمنا مع علم اسرائيل حرقته بحنية مش زي شعب الامازيغ الهمج؟ وكرامة مصر كانت فين لما اتقبض على مصري واترحل على جوانتانمو واحنا ولا سائلين في قرعته؟ وكرامة مصر كانت فين لما صدام كان بيبعت لنا جثث عيالنا مطعونة في توابيت واحنا عاملين عبط عشان الراجل كانت ايده فرطة ايام مجلس التعاون الخليجي؟
وللا دول عشان غلابة مافيهمش مطرب ولا ممثلة؟
ايه كرامة مصر اللي انفجرت في وشنا بدون سابق انذار دي، ما تردوا؟ ردوا ردت المية في زوركوا ان شاء الله، يا كدابين يا منافقين يا نصابين يا اللي فاتحين مدرسة في العهر والقوادة وكل واحد فيكم قالع لنا هدومه وبيعايرنا اننا لابسين هدومنا؟ ايه حكايتكوا؟ ايه اللي وراكوا؟ اخدتوا قصاد الخراب اللي جبتوه علينا ايه؟

كيفونى قوى دول
انتى بت رائعة نفسى اقابلك واسلم عليكى

Unknown said...

شفتى الخبر ده :
http://www.yallakora.com/arabic/news/details.aspx?id=102950&Catid=1&region=

وجعتنى قوى حتة ربنا يجبر كسركم دى

على فكرة يانوارة أنا ابتديت فعلا أحس ان فيه لعبة وسخة فى الموضوع(مش خايف من دعاكى ساعة المغربية ولا حاجة) ومتوقع النغمة تهدا الفترة الجاية بعد ما نجحوا انهم يستنزفوا طاقة الشعب فى الشتيمة والمظاهرات وبرامج الفضائيات

بس معرفتى بالجزائريين وقرايتى لجرايدهم بتولعنى كل ما أهدا

Unknown said...

انا عايزة اوضح بس انا ليه قلت حتى منى جالها تليفون
او الاعلاميين جالهم اوامر


لان منى الشاذلي غيرت رأيها مية وتمانين درجة بشكل مفاجئ وبدون مقدمات

شمس العصارى said...

بقدرة قادر لقيت نفسى ضمن الدعو عليهم قلت لا بقا يعنى مبقاش طيب و هادى و فاهم و يتعمل فيا كده
انا مكنتش ناوى ارد بس حرد لسببين
1- انى انا فاهم وواعى ومدرك للابعاد المنظورة و الغير منظورة و المستخبية و المدارية ههههههههه و بفضل انى موجعش دماغى لكن انتى بقدرة قادر دخلتينى فى الموضوع و دعيتى عليا - اى و الله حصل- و حقلك اهه
2- حجاوبلك على السؤال الى محيرك : يطلع مين عيلاء مبامبامبارك -حتى اسمه بيقف فى الزور هههههه-؟
ابدا باجابة السؤال : السيد عيلاء ده يا هانم يبقى ابن صاحب العزبة و هو واخوه الى مسيرين الخولى ورجالته اصل عقبال املتك كده مصر بقت عزبة مبارك و عياله و احفاده من بعده و انتى عارفة مين الخولى ورفاقه و اكيد برضه عارفة مين هما العبيد ههههههههه
ثانيا : ايوه انتى دعيتى عليا مش انتى قلتى" حسبي الله ونعم الوكيل في كل اللي عمل او بيحاول يعمل كده في الناس، وكل اللي بيساند كل الافعال السابق ذكرها، باي طريقة، وكل اللي راضي عنها، وكل اللي ساكت عليها"
وانا طيب و ابن حلال بس ساكت عنها
اصل دول بقا مش نافع فيهم كلام
شعب اهوج و اللهو سهل تخديره و تسييره و بابسط و اتفه الاسباب فطول ما الناس تركت عقولها و ماشية بمبدا" الى يعوزه الريس كله كويس " يبقى اى كلام لا يجدى و لا ينفع معاه - احنا تعبنا من الكلام -ربنا يهدى
و متقولليش " لا انت سلبى و انت ..... و انت...... " عارف ده كله
لكن المواطن الى تنتهك كرامته ليل نهار و يجوع و يقتل بالبطئ بالجهل و المرض و الفقر و فى الاخر يثور - دون حق - على ماتش كورة ميبقاش مواطن لانه ببساطة وجوده زى عدمه يبقى نكلم مين بقا
ـــــــــــــــــــــــــــ
على فكرةانا مش من دائمى الردود و كنت بشوف كلامك و مواضيعك عن طريق نور اسلامنا و بيعجبنى الاسلوب البسيط - اسلوب الحكى العادى - و خصوصا تعليقات الافلام
و مكنتش برد علشان بحب اخفى شخصيتى العبقرية و علشان متعجبيش بكلامى و طريقتى و خصوصا انى زى ما قلت فاهم وواعى و ميضحش عليا هههههههههه
المهم ارجعى بقا و غيرى الدعاء او ادعيلى تانى و طلعينى من جملة الناس المدعو عليهم - ينوبك ثواب و احنا فى ايام مفترجة - يلا بقا غيرى الدعاء

شلاطة said...

http://www.mediafire.com/download.php?lmmmy45xyim

دي الحلقة بس صوت من غير صورة فيها جزء حافظ المرازي عند الدقيقة 45 بالضبط

http://www.mediafire.com/download.php?ymundv03kym

ودا الجزء بتاع مداخلة جمال بخيت عند الدقيقة 44
ملقتش الفيديو بس قلت الصوت اكيد هيفي بالغرض

Unknown said...

تحية لك اختي نوارة ..احكيكي من المغرب...انا شايف انه صار ينطبق علينا الحديث الشريف..إذا أسندت الامور لغير أهلها فانتظر الساعة....صرنا نشوف عادل إمام ينظر للصراع الداخلي الفلسطيني...باعلام القنوات الفضائية مجموعة من المرتزقة لم يدرسوا الاعلام بل ربما لم يدرسوا شيئا..شوبير الغندور نادر السيد....ناس لا تعرف ان تحكي بدون ريموت كونطرول ...اما حكاية دي مصر و عقدة الريادة..فعن اي ريادة نتحدث...الناتج القومي لكل الدول العرربية الديكتاتورية ما يساويش ناتج القومي الاسباني....الله يصبرك و يصيرنا و صدق علينا قول الجبيب المصطفى...كيفما كنتم يولى عليكم..

سكوت هنصوت said...

يا نوارة...انا كمان محروقة من الإعلام الشرشوح بتاعنا...وشايفاه انه بجد سافل وقليل الادب

بس ما ينفعش كمان انت تسفهي قوي كده من الي حصل

الي حصل مش ماتش كورة..الي حصل اكبر من كده بكتير ولو ما بدأناش نبص للأمور من الزاوية دي يبقى عمرنا ما هنتعلم الدرس


احنا عندنا جريمة مركبة..بطلها الحكومتين الحكومة المصرية والحكومة الجزائرية

الحكومة المصريه الي اتصرفت بغشم رهيب...وما سجلتش اي حاجة على الإطلاق بشكل رسمي متحضر واكتفت بانها تمشي الأمور بطريقة الكفته وانت الكبيرة يا ام سيد...والنتيجة انها طلعت ام سيد فعلا ولما اكتشفت ان العيال بتقلعلها ملط في الشارع فرشت الملاية على السلم وقعدت تشرشرح

الواقع ان الي حصل فعلا فيه نوع من إهدار الكرامة...صحيح ان كرامتنا مهدرةمن زمان لكن دي اول مرة الي تهدر كرامتهم الصفوة...ولاد الريس والفنانين وزبانية الحزب الوطني

حتى نبيل لوقا بباوي الكلب كان بيرقص في الإستاد

دلوقتي الناس دي متعودة تبهدل مش تتبهدل...فكان لازم امتهان كرامتهم (الي احنا متعودين عليه) يبقى بالنسبة لهم غير طبيعي

وعلاء مبارك لما اتكلم كان فعلا بيتكلم بإخلاص واحد مصري اتهان وشعر بالذل وانه اتلطخ على قفاه وانه نفسه يرفع راسه

افتكري يا نوارة حرقتك لما العسكري قالك الي لابسينك زيك هما الي بيفجروا واحساسك بالإهانة انه بيتهمك انك ارهابية وعياطك وقعادك في القسم اربع ساعات عشان بس حسيتي بالإهانة

ده احساسك وانت مواطن عادي بتتهاني كل يوم يعني في المواصلات وفي شغلك وفي الشارع لكن ابن الريس بقى الي عمره ما حد قاله تلت التلاتته كام لما يتهان

وييجري زي الفراخ عشان يركب عربية لإنه ممكن يتضرب بطوبة ولا بدبشة...اكيد هو كمان حاسس بقدر مضاعف من المهانة

كون بقى كلامه مؤثر وهو مش مقدر خطورته ما ينفيش عنه صفة انه كان صادق جدا في كل كلمة قالها

والشعب المصري كله كان محروق لما شاف الأوتوبيسات مضروبة بالطوب وحالة الذعر

انا بقول كده عشان انا كان نفسي اروح السودان ...واشجع في الماتش ده بس ما لقتش تذاكر

وكنت فاكره ان بجد هيبقى ماتش جامد والله بقى لما نشوف بلدين شقيقتين عربيتين بيلعبوا في بلد اختهم التالته

كنت فاكره اليوم هيبقى رائع

ومش متخيلة لو كنت في اوتوبيس من دول احساسي كان هيبقى ايه

مفيش داعي لتهميش القضية من اي طرف

مصطفى عبده و خالد الغندور وحكيم وكل من تطاور على الشعب الجزائري او التاريخ الجزائري او حتى ادى نفسه حق انه يمن عليهم دول لازم ينضربوا بالنار في ميدان عام

لكن محاكمة الحكومة الجزائرية لابد منها لإن الي اتعمل ده فعلا اهانة واهانة بالغة كمان ومش بس اهانة ده كمان غباء ....والغبي يتأدب

Unique said...

نواااارة
استلمي الفيديو ده !!
http://www.youtube.com/watch?v=KCAhIicb7W4

عشان ميبقاش الناس بس تقول ان الجزائريين هنا محصلهمش حاجة
و انهم اللي عملوه في السودان لله في لله كده
بصوا شوفوا تصرفهم كان نتيجة ايه

و برضه
حسبي الله و نعم الوكيل في كل واحد ولعهااااااا كده !!