هو فاروق حسني تبع الوهابيين كمان؟

انا ما اعرفش مدى صحة كلام الراجل ده، بس فعلا اقوى نفوذ في العالم الاسلامي هم آل سعود زي ما اسرائيل اقوى نفوذ في العالم الغربي

وهو شكله كده مش ناوي يعمل حاجة، قعد يبوس في رجلين الاسرائيلين ويستسمحهم ويتكلم عن الهولوكوست! احنا ح نفضل ناصبين العزا العالمي ده كتير على ضحايا الهولوكوست؟

وفاروق حسني لو راح ح يعمل ايه؟ اهو ده اللي انا مش عارفاه

ده خلاص مرشح مصر، زي المنتخب القومي كده ما اقدرش اقف ضده، بس انا قلقانة منه، حاسة انه ح يسخر اليونسكو للتوعية بالهولوكوست، وفوائد البكاء على الهولوكوست، وتبقى مصيبة لو الراجل ده طلع كلامه صح وفوق انه يخدم على مصالح اسرائيل يخدم على مصالح آل سعود كمان، وهي تمشي يعني، دول معاهم نفوذ دولي ودول معاهم فلوس بالهبل وهو صاحب مبادئ زي ما انتوا عارفين. ثم انا خايفة يروح يفضحنا هناك، يارب ما يعملش كده، وللا يعمل، خليه يروح يحرقهم ماهم يستاهلوا

انا بقى عايزة اعرف، فيه ناس مش عايزاه يروح اليونسكو ليه؟ انا عايزاه يروح، على الاقل نترحم احنا شوية يعني، مش احسن ما كانوا يبعتوا زاهي لحواس؟ اهو فاروق حسني على الاقل بيعرف يتكلم كلمتين على بعض بدل ما لحواس يروح يكلمهم عن نفسنا وريحتنا، وده منصب شرفي، واهو اسمه مصر برضه اخدت رئاسة اليونسكو، وفي نفس الوقت ح نخلص بقى احنا هنا، ماحدش ح يتحرق تاني ان شاء الله، واثارنا تاخد اجازة شوية، ويمكن اللي ييجي بعديه يهتم شوية بالاثار الاسلامية، لاني كنت قعدت مع طلبة كلية اثار وقالوا لي ان الدولة مهتمة بس بالاثار الفرعونية وهم صوروا اثار اسلامية مهمة جدا نايم فيها ناس والمجاري مغرقاها (ياباي يا فاروق، للدرجة دي يا اخي؟) انا باحب فيلم ملاكي اسكندرية، اصل لسة شايفة اعلانه دلوقت. المهم يعني، ربنا يسعده ويبعده، ويارب ما يفضحناش، وللا يفضحنا بقى، ماحنا مفضوحين خلقة ربنا، بس تبقى مشكلة انه بسبب انبطاحه يمكن الاسرائيليين والوهابية اكتر ماهم متمكنين، ودي مش مخاوف سياسية والله، بس الاتنين خطر على الثقافة، الاسرائيليين بيزوروا تاريخهم عشان يعملوا ان اليهود هم اللي عملو كل حاجة، والوهابيين بيطمسوا تاريخنا اصلا عشان نطلع احنا مالناش لازمة في الحياة، هم ايه؟ متجوزين في السر؟